WOTO 36

Du hii soni ku wan limbohati söndö ganjan

Di de doloki buta a pampia

Hii sëmbë kë dë mati ku sëmbë di ta du soni ku wan limbohati. Jehovah kë taa dee mati fëën musu dë sëmbë di an ta ganjan wotowan. Ma di soni aki sa dë wan taanga soni u du, u di u ta libi a wan goonliba ka sömëni sëmbë ta ganjan wotowan. Un wini u ta feni te wa ta ganjan wotowan?

1. Andi da di möön fanöudu soni mbei wa musu ta ganjan wotowan?

Te wa ta ganjan sëmbë, nöö u ta lei Jehovah taa u lobi ën, söseei taa u ta lesipeki ën. Hoi di soni aki a pakisei: Jehovah sabi hii soni di u ta pakisei, söseei a sabi hii soni di u ta du (Hebelejën 4:13). A ta si te u ta du soni ku wan limbohati, nöö a ta tei ën u bigi. Di Wöutu fëën ta taki taa: „Jehovah ta buuse di sëmbë di ta ganjan wotowan, ma a dë gaan mati ku dee sëmbë dee ta libi a wan leti.”—Nöngö 3:32.

2. Andi da wantu fasi fa u sa lei taa wa ta ganjan sëmbë?

Jehovah kë fuu ta „taki soni kumafa a dë tuutuu” te u ta fan ku wotowan (Sakalia 8:16, 17). Andi di soni aki kë taki? Te u ta fan ku dee famii fuu, dee sëmbë dee u ku de ta wooko a di wan kamian, dee baaa ku dee sisa a di kemeente, nasö dee tiima, nöö wa musu ta ganjan de, ma u musu ta taki soni kumafa a dë tuutuu. Sëmbë di an ta ganjan wotowan, an ta fufuu soni u wotowan. (Lesi Nöngö 24:28 ku Efeise 4:28.) Boiti di dë, dee lö sëmbë aki, ta paka hii lanti möni di de musu paka (Loomë 13:5-7). A dee lö soni aki ku woto soni jeti, u ta lei taa u ta „du soni ku wan limbohati”.—Hebelejën 13:18.

3. Un wini u ta feni te wa ta ganjan wotowan?

Te sëmbë sabi u kuma sëmbë di an ta ganjan wotowan, nöö de o ta futoou u. Woo ta heepi wotowan a di kemeente u de ta libi fiifii ku deseei, söseei u de ta libi kuma wan famii. Boiti di dë, u háti an o ta fon u. Te u ta du soni ku wan limbohati, nöö sëmbë o ta „gafa di buka u Masa Gadu . . . di heepima fuu”, nöö di soni dë sa mbei dee sëmbë dee an ta dini Jehovah kë ko dini ën.—Titusi 2:10.

WOTO SONI DI I SA LEI

Woo luku unfa Jehovah ta fii te wa ta ganjan wotowan, söseei un wini a ta tja ko da u. Woo luku unfa i sa ta du soni ku wan limbohati te a nama ku woto soni tu.

4. Jehovah ta wai te wa ta ganjan sëmbë

Lesi Psalöm 44:21 ku Maleaki 3:16, nöö piki dee hakisi aki:

Faandi mbei an dë wan köni soni u biibi taa u sa tjubi soni da Jehovah?
Unfa i si kuma Jehovah ta fii te u ta taki unfa soni dë tuutuu, hii fa a sa ta taanga u du sö so juu?

Wan mii ku hën tata ta fan, nöö di tata tjökö kini a goon ta haikëën. Wan bebe kai a di tafa bandja. — Te miii ta taki unfa soni dë tuutuu, nöö de ta mbei dee gaan sëmbë u de ta wai. Te u ta taki unfa soni dë tuutuu, nöö Jehovah ta wai tu

5. Hii juu u musu ta taki unfa soni dë tuutuu

Sömëni sëmbë ta biibi taa na hii juu joo sa taki unfa soni dë tuutuu. Ma luku faandi mbei u musu ta taki hii juu unfa soni dë tuutuu. Pëë di FËLÖN.

FËLÖN: Andi ta mbei u ta dë waiwai?—Wan limbo háti (2:32)

Wan pisi u di fëlön ’Andi ta mbei u ta dë waiwai?—Wan limbo háti’. Baka di Ben piki di basi fëën taa a booko wan masini, hën de seki maun.

Lesi Hebelejën 13:18, nöö taki unfa u sa lei taa u ta du soni ku wan limbohati söndö ganjan . . .

te u dë makandi ku dee famii fuu.
te u dë a wooko nasö a siköö.
te a nama ku woto soni.

6. A ta tja wini ko da u te wa ta ganjan wotowan

So juu a sa djei kuma u di u ta taki unfa soni dë tuutuu, mbei sömëni soni ta miti u. Ma te u kaba fëën, woo ko si taa a möön bunu te u ta taki unfa soni dë tuutuu, u di a ta tja wini ko da u. Lesi Psalöm 34:12-16, nöö piki di hakisi aki:

Unfa di taki di i ta taki unfa soni dë tuutuu heepi i fii ko abi wan möön bunu libi?

A. Wan womi ku ën mujëë sindo ta bebe kofi, nöö de ta fan.

B. Wan basi ta gafa wan wookoma fëën di ta mbei wagi.

Te womi ku mujëë an ta ganjan deseei, nöö soni o ta waka bunu a di tööu libi u de
Te u ta du soni ku wan limbohati te u dë a wooko, nöö di basi fuu o ta futoou u
Te u ta du soni ku wan limbohati söndö ganjan, nöö woo abi wan bunu në a dee lanti u di köndë

SO SËMBË TA TAKI TAA: „An hogi ee wan piki soni i mindi.”

Faandi mbei i ta biibi taa Jehovah ta buuse hii soni di sëmbë ta mindi, aluwasi a dë wan piki soni seei?

ANDI I LEI?

Jehovah kë u dee mati fëën ta du soni ku wan limbohati. A musu dë u si a hii soni di de ta taki ku hii soni di de ta du, taa de an ta ganjan sëmbë.

Andi i bi o piki?

Andi da wantu fasi fa i sa lei taa ja ta ganjan sëmbë?
Faandi mbei an dë wan köni soni u biibi taa u sa tjubi soni da Jehovah?
Faandi mbei i kë ta du soni ku wan limbohati hii juu?

Mi kaba di woto a:

Pooba di soni aki

Hakisi iseei di soni aki: ’Jehovah ta si mi kuma wan sëmbë di ta du soni ku wan limbohati ö?’ Mbei möiti fii ko sabi andi da wantu soni di i musu tooka.

Woto soni di i sa du:

Woto soni di i sa du

WOTO SONI DI I SA LUKU

Luku di fëlön aki fii si unfa mama ku tata sa lei dee mii u de, u de ta du soni ku wan limbohati.

Ja musu ta mindi soni (1:44)

Luku di fëlön aki fii si un wini u ta feni te u ta hoi useei a dee buka dee u mbei.

Du dee soni dee i paamusi taa joo du, nöö joo feni gaan bunu (9:09)

Lesi di woto aki fii si faandi mbei u musu ta paka lanti möni, aluwasi de an ta wooko ku ën a di soifi fasi.

„Yu musu pai belasting-moni?” (A Waktitoren, 1 u wajamaka-liba 2011)

Lesi di woto aki fii si andi bi heepi wan womi di an bi ta du soni ku wan limbohati faa tooka

„Mi leri taki Yehovah abi sari-ati èn taki a e gi sma pardon” (A Waktitoren, 1 u sebitaa-liba 2015)