Seeka iseei nöunöu kaa fii sa libi a di njunjun goonliba

1, 2. (a) Andi i bi o kë du a di paladëisi? (Luku di peentje a bigi u di woto.) (b) Andi o ta mbei u ta piizii möön gaanfa a di njunjun goonliba?

U KË „libi u teego” seei. Apösutu Paulosu bi taki u di libi aki taa a dë „di tuutuu libi”. (Lesi 1 Timoteo 6:12, 19.) Gaansë u sëmbë o libi u teego a di paladëisi a goonliba aki. Wa sabi unfa a o dë tuutuu te woo ta weki hiniwan mamate, u di wa o ta fii siki möön, woo ta dë waiwai, söseei woo ta fii bunu (Jesaaja 35:5, 6). Pakisei fa a o dë te woo dë makandi ku dee famii fuu, dee mati fuu, ku dee sëmbë dee Gadu o weki ko a libi baka (Johanisi 5:28, 29; Tjabukama 24:15). Joo feni ten u lei njunjun soni, söseei joo sa’ u du dee soni dee i lobi möön bunu. Joo sa lei fa dee soni Gadu mbei buta a liba ala ku goonliba aki ta wooko. Söseei joo sa lei u pëë poku nasö joo sa lei u teeken di wosu di i kë.

² Hii fa u ta wakiti hii dee bunu soni aki, ma di dini di woo ta dini Jehovah o mbei u ta piizii möön gaanfa seei. Pakisei unfa di libi o dë te hii sëmbë o ta lesipeki di santa në u Jehovah, söseei te de o ta tei Jehovah kuma di Tiima u de (Mateosi 6:9, 10). Woo wai seei u si te na wan zöndu libisëmbë o dë a goonliba möön, kumafa Gadu bi abi a pakisei. Pakisei fa an o taanga da u fuu ko dë gaan mati ku Jehovah, nöö te u kaba fëën na wan fuu o dë zöndu libisëmbë möön!​—Psalöm 73:28; Jakobosi 4:8.

3. Andi u musu seeka useei da nöunöu kaa?

³ U ta biibi taa Jehovah o du hii dee waiti soni aki, u di „soni seei an dë di hën an sa du” (Mateosi 19:25, 26). Ee u kë feni di libi u teego a di njunjun goonliba, nöö ’nëën baka u musu biinga’ nöunöu kaa. U sabi taa di kaba u di goonliba aki o ko abiti möön, nöö fëën mbei u musu ta libi a wan fasi di ta lei taa u dë ku di mëni taa di kaba sa ko hiniwan juu. Nöunöu kaa u musu du hiniwan soni di u sa du u seeka useei fuu sa libi a di njunjun goonliba. Boo go luku unfa u sa seeka useei.

UNFA U SA SEEKA USEEI?

4. Unfa u sa seeka useei nöunöu kaa fuu sa libi a di njunjun goonliba?

⁴ Unfa u sa seeka useei nöunöu kaa u libi a di njunjun goonliba? Ee u abi a pakisei u go libi a wan woto köndë, nöö u musu du wan tu soni u seeka useei fuu sa libi a di köndë dë. Kandë u musu bigi lei di töngö u di köndë, söseei u musu lei dee guwenti u dee sëmbë dee ta libi a di köndë dë. U musu njan dee njanjan u di köndë luku. A di wan seei fasi u musu seeka useei nöunöu kaa fuu sa libi a di njunjun goonliba, u di woo du hii soni di u sa du u libi kuma u ta libi a di njunjun goonliba kaa. Boo go luku wan tu fasi fa u sa seeka useei u libi a di njunjun goonliba.

5, 6. Unfa di mbei di woo ta mbei möiti u haika di ölganisaasi u Jehovah sa heepi u u seeka useei fuu sa libi a di njunjun goonliba?

⁵ A di goonliba aki, Saatan kë u sëmbë pakisei taa de sa du hiniwan soni di de kë. Sömëni sëmbë ta si kuma a möön bunu u taki da deseei, nöö de ta si kuma an dë fanöudu u de haika Gadu. Andi ta miti dee lö sëmbë aki? Wë de ta miti fuka, nöö de an ta abi wan bunu libi (Jelemia 10:23). Ma Jehovah da wan lobihati Tiima. Soni o nango bunu ku u seei a di njunjun goonliba te hii sëmbë o ta piki Jehovah buka!

⁶ A di njunjun goonliba, woo lobi ën te di ölganisaasi u Jehovah o ta piki u unfa u musu seeka di goonliba aki ko toon wan hanse paladëisi. Nöö de o piki u tu unfa u sa heepi dee sëmbë dee Gadu o weki ko a libi baka, u de sa ko sabi soni fëën. Jehovah o da u te a hia wooko seei u du. Ma boo taa dee sëmbë dee ta tei fesi hakisi u fuu du wan soni di wa kaba lobi. Woo haika de u? Woo mbei hii möiti u du di wooko di de da u fuu du ku hii u hati ö? Ee u kë seeka useei u libi u teego a di njunjun goonliba, nöö u musu du dee soni di di ölganisaasi u Jehovah ta piki u nöunöu kaa.

7, 8. (a) Faandi mbei u musu wooko makandi ku dee sëmbë dee ta tei fesi a di ölganisaasi u Jehovah? (b) Unfa di libi u so u dee baaa ku sisa fuu bi ko tooka? (c) Andi u sa dë seiki taa o pasa a di njunjun goonliba?

⁷ Ee u kë dë kabakaba u libi a di njunjun goonliba, nöö u musu lei u dë tifihedi, söseei u musu ta wooko makandi ku di ölganisaasi u Jehovah, nöö u musu ta wooko makandi ku dee wotowan fuu tu. Te de da u wan njunjun wooko u du a di ölganisaasi u Gadu, nöö u musu dë kabakaba u wooko makandi ku wotowan, söseei u musu mbei möiti u du di wooko ku piizii, nöö u musu dë tifihedi ku di wooko tu. Te u ta lei u wooko makandi ku dee sëmbë dee ta tei fesi nöunöu kaa, nöö woo sa du ën a di njunjun goonliba tu. (Lesi Hebelejën 13:17. ) Di dee Isaëli sëmbë bi go a di Paamusi Köndë, nöö de bi piki hiniwan u de ka de musu libi (Nöbu 26:52-56; Josua 14:1, 2). Wa sabi naasë de o piki hiniwan fuu u go libi a di njunjun goonliba. Ma ee u lei u wooko makandi ku wotowan nöunöu, nöö ku piizii seei woo du di kë u Jehovah aluwasi ka de piki u fuu go libi.

⁸ Pakisei fa a o dë wan gaandi seei u wooko a di njunjun goonliba u Gadu, te di Könuköndë fëën o tii! Di soni aki mbei u ta piizii u wooko makandi ku di ölganisaasi u Jehovah nöunöu kaa, nöö u ta du hiniwan wooko di de da u fuu du. So juu de sa tooka di wooko di de da u fuu du. Sö nöö de bi manda so u dee baaa ku sisa fuu dee bi ta wooko a di Bëtëli na Amëëkanköndë u de go du di pioniliwooko. Nöö u di so u dee keling-gaanwomi bi ko gaandi kaa nasö u woto soni hedi, mbei de bi manda de go du di apaiti-pioniliwooko. De ta piizii seei ku di njunjun wooko di de da de, nöö Jehovah ta mbei de feni bunu seei. Ee u ta begi Jehovah faa heepi u, ee u ta du hii soni di u sa du u wooko dëën, söseei ee u ta lei u dë tifihedi ku hiniwan wooko di de da u, nöö woo ta dë waiwai, söseei Jehovah o mbei u feni bunu seei. (Lesi Nöngö 10:22.) Boo taa u dë a di njunjun goonliba, hën u bi o kë libi a wan kamian di u lobi. Andi u bi o du ee di ölganisaasi u Jehovah hakisi u fuu foloisi go libi a wan woto kamian? Wë a di ten dë aan toobi ka woo libi nasö andi woo ta du, ma u sa dë seiki taa woo dë ku tangi a hati seei taa u ta libi a di njunjun goonliba.​—Nehemia 8:10.

9, 10. (a) Faandi mbei a o dë fanöudu u abi pasensi te woo dë a di njunjun goonliba? (b) Unfa u sa lei taa u abi pasensi nöunöu kaa?

⁹ So juu a o dë fanöudu fuu abi pasensi a di njunjun goonliba. Biga a sa pasa taa u jei fa so sëmbë ta wai seei u di dee famii u de ku dee mati u de ko a libi baka. Ma kandë u musu wakiti u te Jehovah o weki dee lobiwan fuu puu a dëdë. Ee a pasa sö, woo wai ku dee wotowan u, nöö woo abi pasensi tu ö? (Loomë 12:15) Ee nöunöu kaa u ta lei u abi pasensi, u Jehovah du dee soni dee a paamusi u, nöö a o heepi u fuu abi pasensi a di ten di ta ko tu.​—Peleikima 7:8.

¹⁰ Wan woto fasi fa u sa seeka useei u libi a di njunjun goonliba, hën da te woo abi pasensi te de tooka wan fasi fa u bi ta fusutan wan Bëibel woto fosu. U ta mbei möiti u go öndösuku dee njunjun soni aki ö? Nöö u abi pasensi hii fa wa ta kaba fusutan de u? Ee sö, nöö a di njunjun goonliba an o taanga da u u abi pasensi te Jehovah o piki u wan njunjun soni di a kë fuu du.​—Nöngö 4:18; Johanisi 16:12.

11. Faandi mbei u musu lei u ta da wotowan paadon nöunöu kaa, nöö unfa di soni aki o heepi u te woo dë a di njunjun goonliba?

¹¹ Wan woto fasi möön fa u sa seeka useei u libi a di njunjun goonliba, hën da te u ta lei u da wotowan paadon. A di pisiten u di Dusu Jaa Tii u Keesitu, a o tei ten u hii sëmbë ko dë telutelu söndö föutu (Tjabukama 24:15). Woo lobi dee wotowan fuu ö? Woo ta da de paadon tu ö? Ee u ta lei u ta da wotowan paadon, söseei ee u ta libi bunu ku de nöunöu kaa, nöö an o taanga da u möön u ta da de paadon te woo dë a di njunjun goonliba.​—Lesi Kolosën 3:12-14.

12. Faandi mbei u musu seeka useei nöunöu kaa fuu libi a di njunjun goonliba?

¹² A di njunjun goonliba, a sa dë taa na hii juu woo ta feni di soni di u kë, nasö kandë a o ta dë fuu ta wakiti u feni di soni di u kë. A o dë fuu ta dë ku tangi a hati u dee soni u ta feni, söseei u ta dë tifihedi aluwasi wa feni di soni di u kë jeti. Dee fasi dee Jehovah ta lei u fuu abi nöunöu kaa, de nöö woo abi fanöudu a di ten dë tu. Fëën mbei te u ta lei u ko abi dee fasi aki nöunöu kaa, nöö u ta lei taa u ta si di njunjun goonliba kuma wan tuutuu kamian ka woo libi, söseei taa u ta seeka useei u libi u teego (Hebelejën 2:5; 11:1). Boiti di dë, u ta lei tu taa u kë libi a di njunjun goonliba ka hii sëmbë o ta piki Jehovah buka.

BUTA PAKISEI A DI DINI U JEHOVAH

13. Andi woo ta buta a di fosu kamian fuu libi te woo dë a di njunjun goonliba?

¹³ A di njunjun goonliba, woo abi hii soni di u abi fanöudu fuu abi wan bunu libi. Ma di soni di o da u möön piizii, da di dë di u ku Jehovah o dë möön gaan mati (Mateosi 5:3). Woo abi hia soni ta du a di dini di u ta dini Jehovah, nöö ku piizii woo ta du ën (Psalöm 37:4). Fëën mbei te u ta buta di dini u Jehovah a di fosu kamian a u libi nöunöu kaa, hën da u ta seeka useei u libi a di njunjun goonliba.​—Lesi Mateosi 6:19-21.

14. Un maaka njönkuwan sa buta da deseei a di dini u Jehovah?

¹⁴ Andi sa heepi u fuu ko ta lobi di dini di u ta dini Jehovah möön gaanfa? Wan soni di sa heepi u, hën da te u ta buta maaka di u kë dou a di dini fëën. Ee i da wan njönkuwan, nöö pakisei bumbuu andi i sa du u dini Jehovah a dee njönku jaa fii. A bi o dë wan bunu soni u lesi dee buku fuu dee ta taki u dee peipei fasi fa i sa du di hii-ten diniwooko. I sa buta di maaka da iseei u du wan u dee wooko aki.a (Luku di pisi a basu.) Kandë i sa fan ku wan sëmbë di ta dini Jehovah a di hii-ten diniwooko sömëni jaa kaa. Ee i buta i libi u dini Jehovah, nöö joo lei sömëni soni di o heepi i fii sa dini ën a di njunjun goonliba.

15. Un woto maaka u sa buta da useei a di dini di u ta dini Jehovah?

¹⁵ Sömëni maaka dë di u sa buta da useei a di dini di u ta dini Jehovah. U sa buta di maaka u lei njunjun fasi fa u sa du di peleikiwooko möön bunu. Nasö u sa buta maaka u fusutan dee mama wëti u Bëibel möön bunu, söseei u sa lei unfa u sa mbei de tii u a u libi. U sa pooba söseei u lesi möön bunu, u hoi bunu taki, nasö u da bunu piki a dee kemeente komakandi. Ma di möön fanöudu soni, hën da te u ta buta maaka da useei a di dini di u ta dini Jehovah, nöö a o heepi u fuu sa dë möön fajafaja a di dini fëën, söseei fuu sa seeka useei fuu sa libi a di njunjun goonliba.

DI MÖÖN BUNU FASI U LIBI DI DË NÖUNÖU

16. Faandi mbei di dini di u ta dini Jehovah da di möön bunu fasi u libi di dë?

¹⁶ U ta si kuma u ta makei wan soni a u libi, te u ta wooko ku di ten fuu u seeka useei u libi a di njunjun goonliba u? Wë nönö! Di dini di u ta dini Jehovah da di möön bunu fasi u libi. Wa ta dini Jehovah u di wan sëmbë musu u du ën, nasö u di u kë pasa di gaan fuka libilibi. Te u ku Jehovah dë mati, nöö soni o nango möön bunu a u libi, söseei woo ta dë waiwai. Sö wan libi a bi kë fuu abi. Di lobi di Gadu lobi u, ku di tii di a ta tii u, hën da di möön bunu soni di u abi a u libi. (Lesi Psalöm 63:1-3.) Hii u tuu sa ta feni di piizii di wan sëmbë ta feni te a ta dini Jehovah ku hii hën hati. Dee sëmbë dee dini Jehovah sömëni jaa longi kaa sa taki tuutuu taa disi da di möön bunu fasi u libi.​—Psalöm 1:1-3; Jesaaja 58:13, 14.

17. Unfa dee soni dee woo ta du dee ta da u piizii, o dë fanöudu tjika a di paladëisi?

¹⁷ A di paladëisi woo abi di ten tu u du dee soni u lobi dee o mbei u ta piizii. Kumafa u sabi, Jehovah hën mbei u ku di fii u ta du soni di ta tja piizii ko da u, nöö a paamusi u taa a o „da hiniwan libilibi soni di soni di hën hati fii taa a kë” (Psalöm 145:16; Peleikima 2:24). A dë sö tuu taa u musu ta du soni di ta da u piizii, nöö u abi böö fanöudu tu. Ma u ta möön piizii ku dee soni dë, te u ta buta di dë di u ku Jehovah musu dë mati a di fosu kamian a u libi. Nöö di wan seei soni woo du a di njunjun goonliba. Fëën mbei „a di fosu kamian” a dë wan köni soni u ’biinga u ta dë a di Tii u Masa Gadu [Könuköndë] dendu ta libi kumafa a kë’, söseei u musu ta buta mëni a dee gaan bunu dee u ta feni te u ta dini Jehovah.​—Mateosi 6:33.

18. Unfa u sa lei taa u ta seeka useei u libi u teego a di paladëisi?

¹⁸ A di njunjun goonliba di libi o möön bunu seei möön fa u sa pakisei ën. Boo lei taa u kë libi a di njunjun goonliba u di u ta seeka useei nöunöu kaa da di „tuutuu libi”. Boo lei taa u abi dee fasi dee Jehovah ta lei u fuu ko abi, söseei boo ta paaja di bunu buka fajafaja. Boo feni di piizii di wan sëmbë ta feni te a ta buta di dini u Jehovah a di fosu kamian nëën libi. U ta biibi ku hii u hati taa a di njunjun goonliba, Jehovah o du hii dee soni dee a paamusi u. Fëën mbei boo libi kuma u ta libi a di njunjun goonliba nöunöu kaa.