Soni di Gadu paamusi u di o pasa tuutuu
Sëmbë ta paaja di bunu buka u di Könuköndë u Gadu a hii së u gooonliba, kumafa Jesosi bi taki (Mateosi 24:14). Di Bëibel buku Daniëli ta piki u taa di Könuköndë da wan tii di Gadu seti. Kapitë 2 u di buku dë, ta taki u wan woto di ta lei taa peipei tii u goonliba bi o dë, kumutu a di ten u di fesiten Babilon te kisi di ten fuu aki. Vers 44 u di kapitë dë ta taki u di ten di ta ko. A taki taa:
„Di Gadu u liba ala o seti wan könuköndë di an o booko wan daka. Nöö di könuköndë seei an o pasa a na wan woto sëmbë maun dendu. A o booko hii dee könuköndë aki pisipisi, nöö de an o dë möön. Nöö di könuköndë seei o dë u nöömö.”
Di tjabukama woto aki ku woto tjabukama woto, ta taki taa di Könuköndë u Gadu o tii a dee tii u di ten aki kamian, nöö a o mbei soni waka bunu a goonliba. Unfa di libi o dë te di Könuköndë u Gadu o ta tii? Luku wanlö soni di o pasa aki.
SËMBË AN O TA FETI MÖÖN
Psalöm 46:9: „[Gadu] ta mbei feti kaba a goonliba palalaa te dou. Dee bö a ta booko a tu, nöö dee lanza a ta koti pisipisi. Dee feti wagi a ta tjuma a faja.”
Pakisei fa di libi bi o dë, ee sëmbë bi o wooko ku hii di möni ku hii di köni di de abi u de ta heepi sëmbë, ka u de ta wooko ku dee soni dë u mbei fetilai u kii sëmbë! Te di Könuköndë u Gadu o tii, nöö dee soni dë o pasa tuutuu.
SËMBË AN O TA SUWAKI MÖÖN
Jesaaja 33:24: „Na wan hojo sëmbë o taki taa: ’Mi suwaki.’”
Pakisei fa soni o dë a goonliba te sëmbë an o ta dë ku hati siki, ku kankël, ku malalia nasö ku wan woto siki möön. Hatiwosu ku deesi an o dë fanöudu möön. Hii sëmbë u goonliba o ta dë gösöntu.
SONI O DË U NJAN SEEI
Psalöm 72:16: „Soni u njan o fuu goonliba seei. A dee kuun hedi seei njanjan o dë pasa maaka.”
Soni u njan o ta göö a goonliba tjika hii sëmbë. Hangi pena an o dë möön, nöö sëmbë o ta njan gösöntu soni.
SINKII HATI, TJALI KU KUSUMI KU DËDË AN O DË MÖÖN
Akoalimbo 21:4: „[Gadu] o feki hiniwan u de wojowata puu. Këë an o ta kisi de möön. Dëdë ku tjali ku kusumi an o dë a de dendu möön tu. Söseei sinkii hati an o dë möön seei, kwetikweti, biga dee awoo soni dee bi dë tuu pasa go kaa.”
Hën da sëmbë o ta libi nango nöömö a di Paladëisi a goonliba! Di soni dë di lobihati Gadu fuu, Jehovah, paamusi u.
„DEE SONI DEE MI TAKI, DE O PASA”
Dee soni aki da soni di an o pasa tuutuu ö? Hii fa gaansë u sëmbë bi o taki taa de bi o kë feni di libi di di Bëibel ta paamusi u, tökuseei sömëni sëmbë ta feni taa de an sa fusutan unfa sëmbë sa libi u teego. Di soni aki an ta foondo u u di na wan sëmbë bi libi sö longi wan daka, hën a ko kondëën da wotowan.
Zöndu, dëdë, sinkii hati, sitaafu libi, ku buuse libi ta du ku libisëmbë sö tee taa a ko djei kuma sö di libi bi musu dë kaa. Ma na di soni dë Jehovah, di Gadu di mbei u, bi abi a pakisei da libisëmbë.
U di Gadu kë heepi u fuu biibi taa dee soni dee a paamusi u o pasa tuutuu, mbei a taki u dee soni dee a paamusi u taa: „De an o toona ko a mi ee soni an pasa kumafa mi taki. Soni o pasa kumafa mi taki, nöö dee soni dee mi taki, de o pasa.”—Jesaaja 55:11.
Di Bëibel ta taki taa Jehovah da wan Gadu di „an sa ganjan sëmbë” (Titusi 1:2, NW). U di a paamusi u dee bunu soni aki, mbei a bi o bunu fuu hakisi useei dee soni aki: Sëmbë sa libi u teego a di Paladëisi a goonliba tuutuu ö? Andi u musu du fuu sa feni di libi di Gadu paamusi u? Dee woto dee ta ko o heepi i fii ko sabi unfa dee soni aki dë tuutuu.