Woto u di Jaarboek 2014
De bi heepi wan womi di an ta si, di an ta jei ku di an ta fan
A di jaa 1999, dee baaa u di tapabukama kemeente di dë a Kobe, wan foto u Japan, bi jei soni u wan tapabuka womi de kai Hirofumi. Di wan baaa bi kë miti Hirofumi, hën di mama fëën an bi kë. Di baaa bi nango ta begi di mama hii juu faa miti Hirofumi. Te u kaba fëën di mama tja Hirofumi ko lei ën. Hën uwii ku hën bia bi dë vudjuu. A bi ta djei wan sëmbë di bi lasi sömëni jaa a matu. A bi dë pii sö, nöö an bi ta fan. A bi dë wan bookojesima, nöö an bi ta si soni tu. Di baaa an bi saandi faa taki, hën a panja Hirofumi nëën maun, hën a bigi fan ku ën ku maun. Ma an bi ta buli seepiseepi. Sö wan teni jaa pasa, di Hirofumi bi abi 31 jaa, hën wojo fëën booko, nöö sensi di ten dë an bi miti na wan sëmbë, nöö na wan sëmbë bi ta fan ku ën tu. Fëën mbei an bi sa’ u fan ku maun.
Baka tu daka hën di baaa bi go baka. Hirofumi mama an bi kë biibi, a bi mëni taa di baaa an bi o ko möön, baka di a bi si fa di womi mii fëën dë. Di baaa bi hakisi Hirofumi mama wan pasi möön ee a bi sa miti Hirofumi, hën di mama tjëën go nëën. Baka di di baaa bi puu nango a Hirofumi wan hii liba longi, a bi si taa Hirofumi bi tan di wan seei fasi, hën di mama bi piki ën taa an dë faa ko möön. Ma tökuseei di baaa bi nango nëën jeti. A bi tja cake go dëën, söseei a bi du woto soni tu u lei ën taa a ta booko ën hedi ku ën. Baka tu liba möön, Hirofumi an bi tooka möönsö, a bi tan di wan seei fasi. Di baaa bi bigi si kuma a ta lasi ën ten.
Hën a taa a o go wan lasiti pasi möön. Ma ufö a dou a di wosu, a bi begi Jehovah u heepi ën faa sabi ee a bi musu tan go a Hirofumi. Di a dou, hën a panja Hirofumi nëën maun, hën a piki ën taa wan Gadu dë a liba ala de ta kai Jehovah, ta luku ën hiniwan daka, nöö a ta fusutëën möön hiniwan woto sëmbë taa a ta miti fuka. A piki ën tu taa Jehovah ta booko ën hedi ku ën, nöö a kë puu ën a di fuka di ta miti ën. Fëën mbei a manda wan u dee Kotoigi fëën ko nëën. Ma Hirofumi an bi ta buli. Ma te wan pisi, hën di baaa bi fii taa Hirofumi ta panjëën möön taanga, hën a si taa wata ta pasa nëën wojo. Di soni aki bi naki di baaa hati seei taa a bi bigi këë tu. Te u kaba fëën, a bigi lei Hirofumi soni u Bëibel.
Baka söwan 11 jaa di Hirofumi lei soni u Bëibel, a bi bigi nango a wan zali di dë a zuntu dë, nöö an bi dë faa waka wan longi pasi u go a wan tapabukama kemeente kumafa a bi ta du. Ma na wan sëmbë u di kemeente bi sa’ u fan tapabukamatöngö. Ma baka söwan 18 liba, hën 22 baaa ku sisa u di kemeente dë bi lei di tapabukamatöngö, sö taa de bi sa heepi ën. A di jaa 2012 u jailiba, Hirofumi bi hoi di fosu taki fëën a di Teokalasia-siköö, nöö wan sëmbë bi ta puu dee soni a bi ta taki a di tapabukamatöngö da dee haikama. A tinimu-liba u di seei jaa dë, Hirofumi bi toon wan peleikima di an bi dopu jeti.
„Diiteni jaa longi kaa mi ta suku ën!”
Agnes wan sisa di dë sëndëlengi a Indonesiaköndë, bi guwenti u go peleiki da wan mujëë di bi dë ku bëë. Di mujëë bi ta sei guluntu a wojowojo. A bi lo’ u lesi dee buku fuu, nöö te an bi a’ hia soni u du, nöö a bi ta haika soni u Bëibel. Wan daka Agnes bi go u go luku di mujëë a wojowojo, ma di mujëë an bi sai dë. Di manu u di mujëë bi piki Agnes taa hën mujëë pai. Agnes bi taa a o go luku di mujëë. A bi lolu di buku Dee woto u di Bëibel a wan kado pampia tja go dëën. Di mujëë bi wai seei taa Agnes go luku ën. Ma a bi möön wai di Agnes bi dëën di kado. Di di mujëë jabi di kado, nöö an bi kë biibi andi a ta si. Hën a taa: „Naasë i feni di buku aki? Diiteni jaa longi kaa mi ta suku ën! Mi go suku ën a hii dee bukuwënkë, söseei mi bi ta hakisi hii sëmbë, ma na wan sëmbë bi abi ën, na wan sëmbë bi sabi soni fëën, söseei na wan buku bi dë kuma ën.” Di soni di bi pasa, hën da di di mujëë bi möön njönku, nöö hën tio bi abi di buku Dee woto u di Bëibel, nöö a bi lo u lesi ën. Nöunöu di mujëë toona ta lesi di buku, nöö di möön gaan mujëë mii fëën lo’ u lesi di buku tu. Hii de tuu ta lei soni u Bëibel nöunöu.