Unfa di Gadu di mbei u heepi u fuu ko sabi dee soni dee a paamusi u?

Sensi a di bigi, di Gadu di mbei u, bi ta mbei ëngëli nasö tjabukama fëën, fan ku libisëmbë. Boiti di dë, a mbei sëmbë sikifi di bosikopu fëën ku dee soni dee a paamusi u buta a pampia. Gadu paamusi u taa a di ten di ta ko, woo sa dë waiwai. Wë, unfa u sa ko sabi a di ten aki andi Gadu paamusi u?

Di bosikopu u Gadu sikifi a di Buku fëën (2 Timoteo 3:16). Unfa Gadu bi mbei dee tjabukama fëën sikifi di bosikopu fëën? (2 Petuisi 1:21) Gadu bi buta di pakisei fëën a dee sikifima hati, sö taa de bi sa sikifi hii dee soni dee a taki. U sa maaka di soni aki ku te wan basi hakisi wan wookoma u sikifi wan biifi dëën. Hii fa di wookoma hën sikifi di biifi, tökuseei woo taki taa di basi hën sikifi di biifi. Sö nöö a dë tu taa hii fa Gadu mbei sëmbë sikifi di bosikopu fëën, tökuseei hën da di tuutuu Sikifima u di Buku fëën.

DI BOSIKOPU U GADU DË U FENI A HII SË

Di bosikopu u Gadu dë fanöudu seei. Fëën mbei a kë be hii sëmbë lesi ën, söseei taa de fusutëën. A di ten aki „hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba”, sa jei soni u di „Bunu Buka di dë u teego” (Akoalimbo 14:6). U di Gadu kë fuu feni gaan bunu, mbei hii di Buku fëën nasö wan pisi fëën, dë u feni a hii së u goonliba, a möön leki 3000 töngö. Na wan woto buku dë u feni sö hia a hii së u goonliba, a peipei töngö.