Joo feni gaan bunu te i ta heepi sëmbë di dë ku fuka

Gaan hia sëmbë a hii di goonliba abi njanjan, ku wan tankamian fanöudu. So u de kë dë seiki taa soni o waka bunu da de a di ten di ta ko. Unfa di heepi di woo heepi dee sëmbë aki o mbei taa Gadu feni u bunu, söseei unfa a o mbei u feni gaan bunu?

ANDI DI WÖUTU U GADU TA TAKI?

„Di sëmbë di ta du bunu da dee möfina sëmbë ta leni Jehovah wan soni, nöö a o toona paka di sëmbë dë da di bunu di a du.”​—NÖNGÖ 19:17.

ANDI A KË TAKI U HEEPI WAN SËMBË DI DË KU FUKA?

Jesosi bi konda wan woto u wan womi di wanlö fufuuma bi fon te a fon, hën de disëën faa dëdë (Lukasi 10:29-37). Wan sëmbë di an sabi ën bi si ën, hën a heepi ën. Di womi aki bi heepi di wotowan fëën, hii fa a bi dë wan woto köndë sëmbë.

Di bunuhati womi aki bi tai dee kasikaasi u di womi, a bi da möni u heepi ën, söseei a bi dëën kötöhati.

Andi u ta lei a di woto aki? Jesosi bi kë lei u taa u musu ta heepi sëmbë te ka u sa heepi de dou (Nöngö 14:31). Di Wöutu u Gadu ta taki taa abiti möön, Gadu o puu pena ku fuka. Ma kandë i ta hakisi iseei taa: Na un ten Gadu o du di soni dë, söseei unfa a o du ën? A di woto baka disi, woo taki andi da dee gaan bunu dee Gadu kë da i.