ANDI SA HEEPI U FU WA TA BUUSE WOTOWAN MÖÖN?

1 | Na lobi wan sëmbë möön di wotowan

Di soni di di Bëibel ta lei u:

„Masa Gadu an ta luku fesi. A ta si hii sëmbë di wan fasi. Biga ee wan sëmbë i ta lesipeki ën ta libi bunu nëën wojo, nöö a o tei i ko sëmbë fëën kaa.”—TJABUKAMA 10:34, 35.

Di soni di a kë taki:

Jehovaha Gadu an ta luku un köndë sëmbë u dë, un nasiön sëmbë u dë, un kulölu u abi, nasö unfa de kiija u, nöö a kuutu u. Ma a ta buta pakisei a di fasi fa u ta pakisei ku dee soni dee u ta kë. Di Bëibel ta taki tu taa „di soni di di wojo ta si nöö libisëmbë ta si. Ma Jehovah ta si andi dë a di hati dendu”.—1 Samuëli 16:7.

Di soni di i sa du:

Hii fa wa sa si go a sëmbë hati, tökuseei u sa mbei möiti fuu djeesi Gadu, te wa ta lobi wan sëmbë möön di wotowan. Mbei möiti u si wan sëmbë kumafa a dë, ma na hoi taa a dë kumafa hii dee sëmbë u di lö fëën dë. Ee i ta si so sëmbë wan fasi, kandë u di de dë u wan woto köndë nasö u wan woto nasiön, nöö begi Gadu faa heepi i fu ja ta si de sö möön (Psalöm 139:23, 24). Ee i ta begi Jehovah faa heepi i fu ja ta lobi wan sëmbë möön di wotowan, nöö i sa dë seiki taa a o haika di begi fii, nöö a o heepi i.—1 Petuisi 3:12.

a Jehovah da di në u Gadu.—Psalöm 83:18.

„Nöiti wan daka seei mi ku wan bakaa bi sindo makandi u da woto . . . Nöunöu mi abi baaa ku sisa a hii së u goonliba, nöö u lobi useei.”—TITUS

Tuutuu woto u wan sëmbë—TITUS

An ta buuse sëmbë möön

Wan womi de kai Titus hati bi ta boonu gaanfa seei, u di an bi lobi dee wëti di de bi ta buta u paati sëmbë ku sëmbë. Fëën mbei a bi go nama ku wanlö woto womi di bi lo’ u feti, söseei di an bi lobi dee wëti dë tu. A bi taki taa: „U bi nango suku feti a kamian ka de an bi lobi baakama. U bi nango a kamian kuma dee hotëli ku kamian de ta sei soni u bebe.” Titus seei bi taki taa a bi ta buuse sëmbë, nöö di soni dë bi mbei taa hati fëën bi ta boonu gaanfa seei. A bi taki tu taa: „Solanga mi ku wan sëmbë an bi kai a wan, nöö mi fosu bi ta naki ën, aluwasi ee womi nasö mujëë.”

Titus bi bigi tooka di a bigi lei soni u Bëibel ku dee Jehovah Kotoigi. Di a lesi di Bëibel, hën a bi ko ta si soni woto fasi. A bi dou hën hati seei di a ko sabi taa di Bëibel ta taki taa: „Dëdë an o dë möön. Na wan sëmbë o tjali nasö bai kai wolo, söseei pen an o dë möön.”—Akoalimbo 21:3, 4.

Bigibigi a bi ta taanga da Titus fu an buuse wotowan möön. A bi taki taa: „A bi taanga da mi seei u mi tooka di fasi fa mi bi ta pakisei ku di fasi fa mi bi ta du soni.” Ma di soni di a bi lei a Tjabukama 10:34, 35 bi heepi ën. A sikifi naandë taa Gadu an lobi wan sëmbë möön di wotowan.

Andi bi ko pasa bakaten? Titus bi taki taa: „Di mi si fa dee Jehovah Kotoigi ta lobi de na de, aluwasi fuun pei köndë nasö fuun nasiön de dë, hën mi bi ko dë seiki taa de dë a di tuutuu biibi. Ufö mi dopu ko dë wan Kotoigi seei, wan bakaa baaa u di kemeente bi kai mi ko njan nëën pisi. Ma bi sa biibi di soni dë. Nöiti wan daka seei mi ku wan bakaa bi sindo makandi u da woto, ma te u kaba fëën mi ku wan bakaa bi ta njan a wan tafa nëën pisi. Nöunöu mi abi baaa ku sisa a hii së u goonliba, nöö u lobi useei.”