ANDI SA HEEPI U FU WA TA BUUSE WOTOWAN MÖÖN?

2 | Ee wan sëmbë du hogi ku i, nöö ja musu toona du hogi ku ën baka

Di soni di di Bëibel ta lei u:

„Ee wan sëmbë du hogi ku i, nöö ja musu toona du hogi ku ën baka. . . . I musu biinga fii libi fiifii ku hii sëmbë, ee i sa. . . . Wan musu paka hogi ku hogi baka. . . . Wan jei fa Gadu taki a di Buku ö? A taa: ’Fu tei paima a sëmbë, nöö mi a fika da. Te wan sëmbë du hogi, nöö mi o pakëën nöömö.’”—LOOMË 12:17-19.

Di soni di a kë taki:

An dë wan föutu soni te hati fuu boonu u di wan sëmbë du wan hati soni ku u. Ma Gadu an kë fuu toona du wan soni ku di sëmbë dë baka. A kë fuu abi pasensi, u di abiti möön a o kuutu hii soni a wan leti fasi.—Psalöm 37:7, 10.

Di soni di i sa du:

Te libisëmbë ta toona du hogi ku woto sëmbë baka, nöö a ta mbei de ta möön buuse deseei. Fëën mbei ee wan sëmbë du wan hati soni ku i, nöö ja musu du soni ku ën baka. Na lasi iseei, ma du soni a sö wan fasi fuun libi fiifii ku unuseei. So juu a ta möön bunu fii disa di woto (Nöngö 19:11). Ma so juu a ta dë fanöudu u mbei siköutu nasö gaan lanti sabi, u de sa seeka soni da i. Möönmöön te wan sëmbë du wan gaan hogi ku i.

Te u ta toona du hogi ku sëmbë baka, nöö a ta tja hogi ku da useei

Ma unfa a dë ee wa sa seeka di taki a wan fasi di ta mbei taa u ku di sëmbë sa libi fiifii go dou? Nasö unfa a dë te i mbei hii möiti u seeka di taki a wan fasi di sa mbei taa i ku di sëmbë sa libi fiifii go dou, ma tökuseei an ta seeka möönsö? Ee sö a dë, na toona du hogi ku ën baka, u di di soni dë sa mbei taa soni ko möön hogi. Te ja ta du ku ën baka, nöö a sa heepi i fu ja buuse wotowan möön. I sa lei u futoou di fasi fa Gadu ta seeka soni. „Buta futoou a Gadu, nöö hënseei o heepi i.”—Psalöm 37:3-5.

Tuutuu woto u wan sëmbë—ADRIÁN

An ta toona du hogi ku wotowan möön

Di Adrián bi dë wan njönku kijoo, nöö a bi lo’ u feti, söseei a bi ta toona du hogi ku hiniwan sëmbë di bi du hogi ku ën. Adrián bi taki taa: „Te u bi ta feti, nöö u bi ta suti useei ku goni. Sömëni pasi mi bi kisi gaan makei di bi sa mbei taa mi dëdë.”

Adrián bigi lei soni u Bëibel di a bi abi 16 jaa. A bi taki taa: „Di mi bi ta lei soni u Bëibel, hën mi ko si taa mi musu tooka dee fasi u mi di an bunu.” An bi musu ta buuse wotowan möön, söseei an bi musu ta feti möön. A bi lobi dee soni dee a bi lesi a Loomë 12:17-19 di ta taki taa wa musu toona du hogi ku wotowan baka. Adrián bi taki tu taa: „Mi ko biibi taa Jehovah o seeka soni a wan leti fasi, ma o a du ën nëën fasi, söseei a di juu di a buta. Pikipiki mi disa di feti di mi bi ta feti ku wotowan.”

Wan daka, hën wanlö njönku kijoo di bi lo’ u feti ku Adrián bi ko u feti ku ën. Di basi u di kulupu bi bai taa: „Boo feti nö!” Adrián taki taa: „Mi bi kë feti seei.” Ma ka faa feti, a begi Jehovah, hën a waka go fëën.

Adrián bi taki tu taa: „Di woto daka fëën, mi miti ku di basi u di kulupu, nöö a bi dë hën wanwan. Di mi si ën, hën hati u mi boonu, nöö mi bi kë toona du wan soni ku ën. Ma mi bi begi Jehovah faa heepi mi u mi hoi miseei. Mi bi mëni taa hati fëën bi o boonu tu, ma a bi foombo mi di a waka ko a mi, hën a taki taa: ’Da mi paadon u di soni di bi pasa a di jeside. Mi kë ko dë kuma i. Mi kë lei soni u Bëibel tu.’ Mi bi wai seei taa ma bi lasi miseei di daka dë! Di soni dë mbei hënseei bigi lei soni u Bëibel tu.”