U sa libi u teego

1. Unfa di kai di u ta kai pakisei a di teego libi di Jehovah paamusi u, sa heepi u?

JEHOVAH paamusi u taa dee sëmbë dee ta piki hën buka o „libi u teego” (Lom. 6:23). Te u ta kai pakisei a di soni di Jehovah paamusi u aki, nöö u ta ko möön lobi ën. Pakisei di soni aki luku: Di lobihati Tata fuu lobi u sö tee taa an kë u na wan soni paati u ku ën.

2. Unfa di paamusi di Gadu paamusi taa woo libi u teego, ta heepi u?

² Di paamusi di Gadu ta paamusi u taa woo libi u teego, ta heepi u fuu hoi dou. Aluwasi dee felantima fuu piki u taa de o kii u, tökuseei wa o tapa u dini Jehovah. Faandi mbei? Wë u di u sabi taa ee u hoi useei a Gadu u te u dëdë, nöö a o weki u ko a libi baka. Ee u hoi useei nëën go dou, nöö u sa dë ku di mëni taa wa o dëdë nöiti möön (Joh. 5:28, 29; 1 Kol. 15:55-58; Heb. 2:15). Faandi mbei u sa dë seiki taa u sa libi u teego? Buta pakisei a dee soni dee woo luku aki.

JEHOVAH TA LIBI U TEEGO

3. Faandi mbei u sa dë seiki taa Jehovah sa mbei u libi u teego? (Psalöm 102:12, 24, 27)

³ U sabi taa Jehovah sa mbei u libi u teego, u di hën da di Sëmbë ka di libi ta kumutu, söseei u di a ta libi u teego (Ps. 36:9). Sömëni Bëibel tëkisi dë di ta lei taa Jehovah bi dë gaanduwe kaa, söseei taa a o dë u nöömö. Psalöm 90:2 ta taki taa Jehovah ’bi dë hii juu kaa, nöö a o dë u nöömö’. Psalöm kapitë 102 ta taki sö wan soni tu. (Lesi Psalöm 102:12, 24, 27.) Nöö di tjabukama Habaki bi taki u di Tata fuu di dë a liba ala taa: „Jehovah o, sensi awooten i bi dë kaa. Mi Gadu, ju di Santawan u mi, ja o dëdë nöiti.”​—Hab. 1:12.

4. A dë fanöudu fuu ta booko u hedi ee wa ta fusutan taa Jehovah bi dë gaanduwe kaa u? (konda wan woto)

⁴ A ta taanga da i fii fusutan taa Jehovah „dë u hii ten” u? (Jes. 40:28) Ee sö a dë, nöö na i wanwan a ta taanga da. Elihu bi taki wan soni u Gadu. A bi taki taa: „Na wan sëmbë sa sabi un longi kaa a dë a libi” (Jöpu 36:26). Ma na u di wa ta fusutan wan soni, nöö hën da di soni dë an dë tuu. Hii fa kandë wa ta kaba fusutan unfa sitolomu ta wooko, tökuseei u ta biibi taa a dë. Sö nöö a sa ta taanga da libisëmbë u de fusutan taa Jehovah bi dë gaanduwe kaa, söseei taa a o dë u teego. Ma di taanga di a ta taanga da libisëmbë u de fusutan di soni aki, an ta puu taa Gadu ta libi u teego. Di fusutan di wa ta kaba fusutan di fasi fa Gadu dë, an ta tooka di fasi fa a dë tuutuu (Lom. 11:33-36). A bi dë gaanduwe kaa ufö hii soni a mundu. Ufö di sonu ku dee teeja tuu. U dë seiki taa Jehovah da „di Sëmbë di wooko ku di kaakiti fëën u mbei di goonliba”. Awa, a bi dë kaa ufö a „jabi liba ala kuma wan koosu” (Jel. 51:15; Tjab. 17:24). Andi da wan woto soni di mbei u sa dë seiki taa u sa libi u teego?

JEHOVAH BI MBEI U FUU LIBI U TEEGO

5. Andi Adam ku Eva bi sa biibi taa de bi o feni?

⁵ Hii dee libilibi soni di Jehovah bi mbei a goonliba aki, bi o dëdë wan daka. Ma an bi mbei libisëmbë u de ta dëdë. Jehovah bi piki Adam taa: „Ja musu njan di pau njanjan u di pau de kai: ’Sabi bunu ku hogi.’ Biga di daka di joo njan di njanjan fëën, joo dëdë” (Ken. 2:17). Ee Adam ku Eva bi piki Jehovah buka, de an bi o dëdë. U sa biibi taa a wan ten Jehovah bi o da de pasi u de njan di pau njanjan u di pau de kai „Libi”. A di lö fasi dë, a bi o mbei de ko dë seiki taa de bi o sa „libi u teego”.b​—Ken. 3:22.

6-7. (a) Un woto soni ta lei u taa Gadu an bi mbei libisëmbë u de dëdë? (b) Andi ku andi i kë du a di ten di ta ko? (Luku dee peentje.)

⁶ So könima ko si taa di töönzön fuu sa hoi möön soni sömëni jaa longi, möön leki fa wan libisëmbë ta libi a di ten aki. A di jaa 2010, wan buku bi taki taa di töönzön fuu abi kamian tjika u hoi hii dee soni dee u luku a teefei, aluwasi ee u sindo luku teefei söwan 300 jaa longi. Nöö a kan taa di töönzön fuu sa hoi möön hia soni seei. Di soni aki ta lei taa Jehovah mbei di töönzön fuu faa hoi möön hia soni möön dee soni dee u ta hoi a dee 70 nasö 80 jaa dee u ta libi.​—Ps. 90:10.

⁷ Jehovah mbei u a sö wan fasi taa u ta abi di fii u libi u teego. Di Bëibel ta taki unfa Gadu mbei libisëmbë. A ta taki taa a „buta di fii u libi u nöömö a de hati dendu” (Peleik. 3:11). Di soni aki da wan u dee soni di mbei taa u ta si dëdë kuma wan felanti fuu (1 Kol. 15:26). Ee a ko pasa taa u ko dë ku suwaki, nöö wa ta sindo wakiti u dëdë ko kii u. Ma u nango a data, söseei u ta bebe deesi fuu ko bëtë. U ta du hii soni di u sa du sö taa wa ko lasi libi. Söseei te wan sëmbë fuu lasi libi, nöö a ta hati u seei, aluwasi ee di sëmbe bi gaandi nasö ee a bi njönku (Joh. 11:32, 33). A dë gbelingbelin u si taa di Sëmbë di mbei u, bi mbei u fuu libi u teego, u di a mbei u a sö wan fasi taa u abi di fii u libi u teego, söseei fuu sa ta lei soni u teego. Ma woto soni dë di mbei u sa taki taa u sa libi u teego. Boo luku soni di Jehovah bi du a di ten di pasa, söseei soni di a ta du a di ten aki, di ta lei taa a kë fuu libi u teego.

JEHOVAH AN TOOKA PAKISEI

8. Andi Jesaaja 55:11 ta lei u u dee soni dee Jehovah abi a pakisei u du da u?

⁸ U di Adam ku Eva bi du zöndu, mbei dee bakamii u de ta dëdë. Ma tökuseei Jehovah o du dee soni dee a abi a pakisei jeti. (Lesi Jesaaja 55:11.) A kë taa dee sëmbë dee ta hoi deseei nëën musu libi u teego. U sa dë seiki u di soni aki, te u ta luku dee soni dee a taki ku dee a du, u mbei soni waka kumafa a abi a pakisei.

9. Andi Gadu paamusi u? (Daniëli 12:2, 13)

⁹ Jehovah paamusi u taa a o weki dee sëmbë dee dëdë ko a libi baka, söseei taa a o da de di okasi u de libi u teego (Tjab. 24:15; Tit. 1:1, 2). Jöpu bi dë seiki taa Jehovah ta hangi u weki dee sëmbë dee dëdë ko a libi baka (Jöpu 14:14, 15). Di tjabukama Daniëli bi sabi taa Gadu o weki sëmbë ko a libi baka, söseei taa de o feni di okasi u de libi u teego (Ps. 37:29; lesi Daniëli 12:2, 13.) Dee Dju u di ten u Jesosi seei bi sabi taa Jehovah bi sa da dee dinima fëën „di libi u teego” (Luk. 10:25; 18:18). Sömëni pasi Jesosi bi konda soni u di paamusi aki. Boiti di dë, hën Tata bi weki ën ko a libi baka.​—Mat. 19:29; 22:31, 32; Luk. 18:30; Joh. 11:25.

10. Andi di weki di Gadu bi weki sëmbë ko a libi baka a di ten di pasa ta lei u? (Luku di peentje.)

¹⁰ Jehovah hën ta da sëmbë libi, söseei a abi di makiti u weki sëmbë ko a libi baka. A bi da di tjabukama di kai Elia di makiti u weki di womi mii u wan mujëë u Safati, ko a libi baka (1 Kön. 17:21-23). Baka di dë, hën Gadu bi heepi di tjabukama de kai Elisa faa weki di womi mii u wan mujëë u Sunëmi, ko a libi baka (2 Kön. 4:18-20, 34-37). Dee woto aki ku wotowan jeti, ta lei u taa Jehovah abi di makiti u weki sëmbë ko a libi baka. Di Jesosi bi dë a goonliba aki, hën a bi lei taa hën Tata bi dëën di makiti dë tu (Joh. 11:23-25, 43, 44). Nöunöu dë Jesosi dë a liba ala, nöö Gadu dëën „hii makiti a liba ala ku goon aki tuu”. Fëën mbei a sa weki „hii dëdë sëmbë tuu” ko a libi baka, u de sa feni di okasi u de libi u teego.​—Mat. 28:18; Joh. 5:25-29.

11. Unfa di lusupaima mbei taa u sa libi u teego?

¹¹ Faandi mbei Jehovah da pasi taa di Womi Mii fëën dëdë a wan hogihati fasi? Jesosi ta konda da u faandi mbei a du ën. A taa: „Masa Gadu lobi libisëmbë sö tee a da de di wan kodo Womi Mii fëën, sö taa di sëmbë di ta biibi a di mii fëën aki liba, an o sa lasi go kaba a sösö, ma a sa feni di libi u teego” (Joh. 3:16). U di Jehovah bi manda di Womi Mii fëën faa ko paka da dee zöndu fuu, mbei u sa feni di libi u teego (Mat. 20:28). Apösutu Paulosu bi taki wan fanöudu soni di nama ku dee soni di Jehovah abi a pakisei. A bi taki taa: „Leti kumafa i si a dë taa wan libisëmbë [bi booko Gadu wëti hën a] tja dëdë ko ta kii hii sëmbë, nöö söseei di wan Libisëmbë di hoi Gadu wëti dë tja weki baka a dëdë ko dou a hii sëmbë tu. Nöö leti kumafa hii sëmbë musu dëdë fu di de da bakamii u Adam, nöö söseei dee sëmbë u [Masa Jesosi] Keesitu o toona weki baka a dëdë tu fu de feni libi, fu di de dë sëmbë u Masa Jesosi.”​—1 Kol. 15:21, 22.

12. Unfa di Könuköndë o mbei dee soni dee Jehovah abi a pakisei da u pasa tuutuu?

¹² Jesosi bi lei dee bakama fëën u de begi be di Könuköndë u Gadu ko, söseei u di kë u Gadu pasa a goonliba aki (Mat. 6:9, 10). Wan u dee soni di Gadu kë, hën da u libisëmbë libi u teego a goonliba aki. U mbei soni waka a di lö fasi dë, mbei Jehovah buta di Womi Mii fëën Könu u di Könuköndë fëën. Söseei Jehovah ta pii 144.000 sëmbë tei a goonliba aki, u de wooko makandi ku Jesosi u mbei di kë fëën pasa.​—Ako. 5:9, 10.

13. Andi Jehovah ta du a di ten aki, nöö andi i musu du?

¹³ Jehovah ta tja wanlö „gaan hia sëmbë” ko a wan, nöö a ta lei de unfa de musu libi te di Könuköndë fëën o tii (Ako. 7:9, 10; Jak. 2:8). Gaansë sëmbë u di ten aki an ta libi fiifii ku deseei, u di de ta buuse deseei, söseei u di gaan feti ta feti. Ma dee „gaan hia sëmbë” dee Gadu tja ko a wan, ta mbei möiti u lobi hii pei sëmbë. Nöunöu kaa de ta lei a di fasi fa de ta libi taa de ta mbei dee së ufangi u de ko toon soni u wooko goon (Mik. 4:3). De an nango a feti, ma de ta heepi sëmbë u de sa feni di „tuutuu libi”, u di de ta lei sëmbë soni u di tuutuu Gadu ku dee soni dee a o du da u (1 Tim. 6:19). A kan taa famii u de ta du ku de, nasö a kan taa de ko abi möni fuka, u di de tei di së u di Könuköndë u Gadu. Ma Jehovah ta da de dee soni di de abi fanöudu (Mat. 6:25, 30-33; Luk. 18:29, 30). Dee soni aki ta mbei u dë seiki taa di Könuköndë u Gadu dë tuutuu, söseei taa a o mbei dee soni dee Gadu abi a pakisei pasa tuutuu.

GAAN BUNU DË A PASI TA KO

14-15. Unfa Jehovah o puu dëdë be a kaba a mundu?

¹⁴ Jesosi dë Könu u di Könuköndë u Gadu a liba ala, nöö a o mbei hii dee soni dee Gadu paamusi u pasa tuutuu (2 Kol. 1:20). Jesosi ta feti ku dee felantima fëën sensi di jaa 1914 (Ps. 110:1, 2). Abiti möön, Jesosi ku dee sëmbë dee o tii makandi ku ën o kii hii dee hogihati sëmbë tuu puu.​—Ako. 6:2.

¹⁵ Dee sëmbë dee dëdë o weki ko a liba baka a dee Dusu Jaa di Jesosi o tii, nöö a o heepi hii dee sëmbë dee ta libi kumafa Jehovah kë, u de ko dë sëmbë di an abi zöndu möön. Baka di lasiti tesi, nöö dee sëmbë dee Jehovah o si taa ta libi a wan leti fasi „o feni di goonliba, nöö naandë de o ta libi u teego” (Ps. 37:10, 11, 29). Te u baka fëën, nöö di „lasiti felantima” de kai dëdë, „o kaba a mundu fiaa”.​—1 Kol. 15:26.

16. Andi musu dë di möön fanöudu soni di mbei u kë dini Jehovah?

¹⁶ U si a di woto aki taa na u sösö u ta biibi taa woo libi u teego, ma u ta biibi ën u di sö a dë sikifisikifi a di Wöutu u Gadu. Di soni aki sa heepi u fuu hoi dou a dee lasiti daka aki. Ma ee u kë u Jehovah ta wai ku u, nöö na di libi di u kë libi u teego hën musu mbei u hoi useei nëën. Di möön fanöudu soni di mbei u kë hoi useei a Jehovah ku Jesosi, da u di u lobi de (2 Kol. 5:14, 15). Di lobi di u lobi de, ta da u taanga fuu ta djeesi de, söseei fuu ta konda soni u di biibi fuu da wotowan (Lom. 10:13-15). Te u ta mbei möiti u ko dë sëmbë di ta pakisei wotowan fosu, söseei di lo’ u da sëmbë soni, nöö Jehovah o kë fuu ku ën dë mati u teego.​—Heb. 13:16.

17. Andi hiniwan fuu musu du? (Mateosi 7:13, 14)

¹⁷ Woo dë a dee sëmbë dendu dee o feni teego libi ö? Wë Jehovah da u di okasi dë. Ma u musu mbei möiti fuu ta waka a di pasi di ta tja sëmbë go a teego libi. Wa musu disa. (Lesi Mateosi 7:13, 14.) Unfa di libi o dë, te woo ta libi u teego? Woo piki di hakisi aki a di woto di ta ko.