Soni Di Dee Lesima Hakisi

A Psalöm 61:8 Dafiti bi sikifi taa a o gafa Gadu në u „teego”. Di soni dë kë taki taa Dafiti bi mëni taa an o dëdë nöiti ö?

Könu Dafiti ta kanda ta pëë wan pei gitali.

▪ Wë nönö. Di soni di Dafiti bi taki dë da wan bumbuu soni.

Buta pakisei a di soni di a bi sikifi a di vers dë, söseei a woto vers dee ta taki sö wan soni tu. A bi taki taa: „Mi o kanda wan kanda u gafa di në fii u teego, sö taa hiniwan daka mi sa ta du di soni di mi bi soi taa mi o du.” „Jehovah mi Gadu, mi ta gafa i ku hii mi hati, söseei mi o ta gafa di në fii u teego.” „Mi o ta gafa i në hii ten, aai, u teego.”—Ps. 61:8; 86:12; 145:1, 2.

Di Dafiti bi sikifi dee soni aki, nöö an bi ta pakisei taa a bi o libi u teego a di ten dë. A bi sabi taa libisëmbë ta dëdë u di de abi zöndu. Söseei Dafiti bi sabi taa a bi dë wan zöndu libisëmbë (Ken. 3:3, 17-19; Ps. 51:4, 5). A bi sabi tu taa sëmbë kuma Abahamu, Isaki, ku Jakopu bi dëdë, hii fa de bi ta hoi deseei a Gadu. Boiti di dë, Dafiti bi sabi tu taa te wan pisi, nöö hënseei bi o dëdë tu (Ps. 37:25; 39:4). Dee soni dee sikifi a Psalöm 61:8 ta lei taa a bi dë kabakaba u gafa Gadu u teego, solanga a dë a libi.—2 Sam. 7:12.

So juu Dafiti bi ta sikifi soni di bi miti ën a di libi fëën. U sa feni so u dee soni aki a dee soni dee sikifi a bigi u kapitë 18, 51, ku 52. A Psalöm kapitë 23, Dafiti ta taki taa Jehovah de kuma wan sikapuma di ta tii dee sikapu fëën, di ta tjubi de, söseei di ta mbei de fii bunu. Dafiti bi dë sö wan sikapuma tu. Nöö a bi kë dini Jehovah ’hii hën libi longi.’—Ps. 23:6.

Hoi a pakisei taa Jehovah hën bi mbei Dafiti sikifi dee soni aki. A bi sikifi tjabukama woto di bi ta taki u soni di bi o pasa bakaten. A Psalöm 110 Dafiti taki u wan ten ka hën Masa o „sindo a [Gadu] letisë maun” a liba ala, söseei taa a o feni gaan makiti. Faandi mbei? Wë sö taa a sa feti wini dee felantima u Gadu, söseei faa „sitaafu dee sëmbë u goonliba”. Dafiti bi dë wan gaan avo u di Mësiasi. Di Mësiasi aki bi o dë a liba ala ta tii goonliba aki, söseei a bi o dë „wan mindima u teego” (Ps. 110:1-6). Jesosi bi taki taa di tjabukama woto di sikifi a Psalöm 110 bi nama ku ën, söseei taa so soni bi musu pasa bakaten jeti.—Mat. 22:41-45.

Jehovah bi mbei Dafiti sikifi soni di bi o pasa a di ten fëën, söseei di bi o pasa a di ten di ta ko. A bi sikifi soni u di ten ka Jehovah o weki ën ko a libi baka, nöö a o sa gafëën u teego. Fëën mbei u sa taki taa dee soni dee sikifi a Psalöm 37:10, 11, 29 bi ta taki u di ten u dee Isaëli sëmbë, söseei u di ten di ta ko te Gadu o du dee soni dee a paamusi u.—Luku palaklafu 8 u di woto „Joo dë ku mi a di Paladëisi”, di dë a Di Hei Wakitimawosu aki.

Psalöm 61:8 ku dee woto vers dee ta taki u dee seei soni, ta lei taa Dafiti bi kë gafa Jehovah na awooten Isaëli hii hën libi longi. Söseei de ta lei andi Dafiti o du a di ten di ta ko, te Jehovah o weki ën ko a libi baka.