I dë kabakaba u libi u teego a goonliba u?

I DË KABAKABA U MBEI DI GOONLIBA KO TOON WAN PALADËISI Ö?

Di Jehovah bi piki libisëmbë u de pai miii ’fuu di goonliba, nöö de dë basi fëën’, nöö a bi ta lei taa pikipiki hii di goonliba bi o toon wan paladëisi (Ken. 1:28). Dee sëmbë dee o libi u teego a goonliba aki o abi u du di wan seei soni tu. Wan paladëisi an dë a goonliba aki, u di di djai u Eden an dë möön, nöö fëën mbei di goonliba an o dë wan paladëisi wantewante. Woo abi gaan hia wooko u du baka Amagedon, u di sëmbë poi sömëni kamian u goonliba. A o dë wan gaan wooko seei!

Di soni aki ta mbei u mëni di wooko di dee Isaëli sëmbë bi musu du di de bi toona go a de köndë baka, di de bi kumutu a Babilon. Sëmbë an bi libi a di köndë u de 70 jaa longi. Ma Jesaaja bi taki taa Jehovah bi o heepi de u dee seeka di köndë baka. A bi taki taa: „A o mbei di sabana fëën ko dë kuma Eden, nöö dee kamian dee dë dëëdëë kasaa o ko dë kuma di djai u Jehovah” (Jes. 51:3). Jehovah bi heepi dee Isaëli sëmbë u de seeka di köndë u de ko waiti baka. Sö nöö Jehovah o heepi dee sëmbë dee o libi a goonliba aki, u de seeka di goonliba faa ko toon wan paladëisi. Nöunöu kaa i sa du soni u lei taa i kë heepi du di wooko dë.

Wan u dee soni di i sa du u lei taa i kë heepi du di wooko dë, da te i ta seeka di wosu ku di djai fii u de ta dë limbolimbo. I sa ta du di soni aki aluwasi dee sëmbë dee ta libi a i bandja an ta seeka di kamian u de. Söseei i sa heepi seeka di Könuköndë zali, ku di zali ka un ta hoi gaan komakandi. Ee i sa, nöö i sa fuu wan pampia fii sa go heepi te wan gaan hogi pasa a wan kamian. I sa hakisi iseei taa: ’Mi sa lei u du wan wooko nöunöu kaa, sö taa mi sa heepi ku dee wooko dee woo du a di njunjun goonliba, ee Jehovah da mi pasi u mi libi ala u?’

I DË KABAKABA U HEEPI DEE SËMBË DEE O WEKI KO A LIBI BAKA U?

Di Jesosi bi weki di mujëë mii u Jailusi ko a libi baka, hën wantewante a piki dee sëmbë u de da di mii soni u njan (Maik. 5:42, 43). A kan taa an bi dë wan taanga soni u da wan mujëë mii u 12 jaa soni u njan. Ma nöö pakisei luku unfa di wooko o hia, te Jesosi o du di soni di a bi paamusi u, di a bi taki taa „hii dee sëmbë dee dë a geebi tuu o jei hën töngö, nöö dee o kumutu dë” (Joh. 5:28, 29). Hii fa di Bëibel an ta piki u finifini fa soni o dë a di ten dë, tökuseei u sa pakisei taa dee sëmbë dee o weki ko a libi baka o abi soni u njan fanöudu, wosu u libi ku soni u bisi. Nöunöu kaa i sa lei taa i dë kabakaba u heepi. Boo buta pakisei a wantu soni.

Te di keling-gaanwomi o ko luku di kemeente ka i dë, nöö i sa kai ën faa ko njan a i pisi. Te de manda wan baaa nasö wan sisa di bi ta libi a Bëtëli faa go du di pioniliwooko a di kemeente ka i dë, nasö te wan keling-gaanwomi an ta du di keling-wooko möön, nöö i sa heepi de suku wan wosu. Ee wan gaan könklësi o hoi a di pisiwata ka i ta libi, nöö i sa buta i në fii heepi seeka soni, söseei i sa wai ku dee baaa ku dee sisa dee kumutu a woto köndë.

I DË KABAKABA U LEI DEE SËMBË DEE O WEKI KO A LIBI BAKA SONI U JEHOVAH U?

Kumafa Tjabukama 24:15 ta taki, nöö u sa dë ku di mëni taa milionmilion sëmbë o weki ko a libi baka. Sömëni u dee sëmbë aki an bi feni pasi u lei soni u Jehovah. Ma te de weki ko a libi baka, nöö de o feni di okasi u lei soni u Jehovah.a Dee sëmbë dee bi hoi deseei a Gadu, söseei dee abi öndöfeni, o lei dee sëmbë dee o weki ko a libi baka soni u Jehovah (Jes. 11:9). Wan sisa de kai Charlotte di bi du di peleikiwooko a Europa, Zuid-Amerika, ku Afiikan, ta wakiti di ten dë seei. Ku wai seei a bi taki taa: „Mi ta wakiti di ten ka mi o sa lei dee sëmbë dee o weki ko a libi baka soni u Jehovah. Te mi ta lesi soni u sëmbë di bi libi na awooten, nöö mi lo’ u pakisei taa: ’Ee di sëmbë aki bi sabi Jehovah, nöö di libi fëën bi o dë woto fasi.’ Mi kë konda soni u Jehovah da dee sëmbë dee o weki ko a libi baka, söseei unfa di libi u de o suti tjika te de o dini ën.”

Dee dinima u Jehovah dee bi libi ufö Jesosi bi ko a goonliba aki o abi te a hia soni u lei. Pakisei luku fa a o dë wan piizii soni da u fu konda da Daniëli fa dee tjabukama woto dee a bi sikifi, söseei dee an bi fusutan, bi pasa tuutuu (Dan. 12:8). Nasö pakisei luku fa a o dë wan piizii soni u heepi Luti ku Naomi u de ko fusutan taa a di böngö u de di Mësiasi kumutu. Woo ta wai seei te woo ta lei sëmbë u hii së u goonliba soni u Jehovah, söseei te wa o abi dee bookohedi u di hogi goonliba aki möön!

Andi i sa du nöunöu kaa, sö taa i sa dë kabakaba u heepi dee sëmbë dee o weki ko a libi baka, u de ko sabi soni u Jehovah? Wë wan u dee soni di i sa du nöunöu kaa, hën da i sa mbei möiti fii ko dë wan möön bunu peleikima, söseei i sa mbei möiti fii ta peleiki möön hia (Mat. 24:14). Aluwasi ja sa peleiki hia kumafa i bi o kë nöunöu, u di i ko gaandi, nasö u woto soni hedi, tökuseei dee möiti dee joo ta mbei nöunöu, o ta lei taa i dë kabakaba u lei dee sëmbë dee o weki ko a libi baka soni u Jehovah.

A bi o bunu seei fii kai pakisei a dee fanöudu hakisi dee ta ko aki: I ta wakiti di ten di joo libi u teego a goonliba aki tuutuu ö? Ku piizii i ta wakiti di ten di woo mbei di goonliba ko toon wan paladëisi ö, söseei di heepi di woo heepi dee sëmbë dee o weki ko a libi baka u de ko sabi Jehovah u? Boiti di dë, i ta wakiti ku piizii u da dee sëmbë dee o weki ko a libi baka dee soni di de o abi fanöudu ö? Nöunöu kaa i sa lei taa i dë kabakaba u libi u teego a goonliba aki, te i ta mbei möiti u du dee soni dee woo ta du a di njunjun goonliba.