Wan pau di de faa sa toona göö baka u?

TE I tei wan oleifi pau di ta göö ku ago nëën sinkii, maaka ku wan hanse sedu pau, nöö i ta si taa di oleifi pau an hanse seei. Ma di oleifi pau da wan pau di an ta dëdë hesihesi aluwasi unfa di wei dë. So u de abi 1000 jaa. Wan oleifi pau lutu ta bei go fundu a goon basu, nöö a sa toona göö baka aluwasi de faa di pau tuwë. Solanga di lutu fëën an dëdë, a sa toona göö baka.

Di womi de kai Jöpu di bi hoi ënseei a Gadu bi dë seiki taa ee a bi dëdë, a bi o sa toona libi baka (Jöpu 14:13-15). A bi taki u wan pau, kandë u wan oleifi pau, u lei taa a bi dë seiki taa Gadu bi o sa toona weki ën ee a bi dëdë. Jöpu bi taki taa: „Wan pau seei sa toona libi baka. Ee de faa ën, a o sa toona göö baka.” Te tjuba kai baka deewei, wan oleifi tompi di bi dëë sa toona libi baka, nöö „uwii” sa toona göö nëën „kuma wan njunjun pau”.​—Jöpu 14:7-9.

Leti kumafa wan sëmbë di ta wooko goon kë si wan oleifi pau di de bi faa, toona göö baka, sö nöö Jehovah kë weki dee dinima fëën dee dëdë ku sömëni woto sëmbë tu (Mateosi 22:31, 32; Johanisi 5:28, 29; Tjabukama 24:15). Pakisei fa a o dë wan piizii soni u wai ku dee sëmbë dee Gadu o toona weki baka!