Ingoma Yetingoma
Sengiyikhile imure kanye nebhalisamu* yami.+
Sengiludlile luju lwami nemakhekheba alo;
Nganatsa liwayini lami kanye nelubisi.”+
“Dlanini bangani labatsandzekako!
Ninatse nize nidzakwe lutsandvo.”+
2 “Ngilele kodvwa inhlitiyo yami yona ayikalali.+
Ngiva sithandwa sami siyanconcotsa!”
‘Awu sithandwa sami, ngivulele mntfwanaketfu,
Wena tuba lami lelite ngisho nalesincane sici!
Ngobe inhloko yami imantiswe ngematolo,
Tinwele tami timantiswe ngumswakama wasebusuku.’+
3 “Sengiyikhumulile ingubo yami.
Ngiphindze ngiyigcoke yini?
Sengitigezile netinyawo tami.
Ngiphindze ngitingcolise yini?’
4 Sithandwa sami sasusa sandla saso embotjeni yesikhiya,
Futsi ngavele ngalangatelela kusibona.
5 Ngavuka ngayovulela sithandwa sami;
Tandla tami betintfontsa imure,
Neminwe yami beyintfontsa emafutsa emure,
Bekantfontsela tibambo temnyango.
6 Ngasivulela sithandwa sami,
Kodvwa besesihambile, singasekho.
Ngaphelelwa ngemandla nangibona kutsi sesihambile.*
Ngasifuna kodvwa ngangasitfoli.+
Ngasibita kodvwa sangasabeli.
7 Bogadzi lebebahambahamba edolobheni bahlangana nami.
Bangishaya futsi bangilimata.
Labogadzi lebebasetindvongeni bangemuka iveyili yami.
8 Awu madvodzakati aseJerusalema, fungani kimi kutsi
Nangabe nitfola sithandwa sami,
Nitasitjela kutsi sengiguliswa lutsandvo.”
9 “Sithandwa sakho sincono ngani kulabanye bantfu,
Wena lomuhle kakhulu kunalabanye labasikati?
Sithandwa sakho sincono ngani kulabanye bantfu,
Uze nje usiphocelele kutsi sente sifungo lesinje?”
10 “Sithandwa sami sihle futsi siyacwebetela;*
Sivele nje sehluke kubantfu labangu-10 000.
11 Inhloko yaso yinhle njengeligolide, yebo ligolide lelicwengisisiwe.
Tinwele taso tiyakhephutela kuhle kwemagala elusundvu,*
Timnyama kuhle kwelihhwabayi.
12 Emehlo aso afana nematuba langasemifuleni,
Lageza ngelubisi,
Futsi lahleti ngasechibini leligcwele emanti.*
13 Tihlatsi taso tinjengengadze legcwele timbali letinuka kamnandzi,+
Tinjengendvundvuma yemakha lanukelela kahle.
Tindzebe taso temlomo tifana netimbali, tintfonsa emafutsa emure.+
14 Iminwe yaso injengeligolide, futsi tingalo taso tifana nekhrisolithe.
Umtimba waso ufana nelitinyo lendlovu lelimanyatelako lelihlotjiswe ngesafire.
15 Imilente yaso ifana netinsika temabuli letibekwe etisekelweni teligolide lelicwengisisiwe.
Muhle njengeLebanoni, futsi mudze njengetihlahla temsedari.+
Sinjalo-ke sithandwa sami, unjalo-ke loyo lengimtsandzako, nine madvodzakati aseJerusalema.”