Incwadzi Yekucala YemaKhosi
5 Ngesikhatsi Hiramu, inkhosi yaseThire,+ eva kutsi Solomoni sewugcotjiwe waba yinkhosi esikhundleni sababe wakhe, watfumela tinceku takhe kuSolomoni ngobe Hiramu bekangumngani waDavide.*+ 2 Solomoni wabese utfumela livi kuHiramu,+ watsi: 3 “Wati kahle kutsi Davide, babe wami, akakhonanga kwakha indlu lebitwa ngelibito laJehova Nkulunkulu wakhe ngobe bekalwa timphi letinyenti kwaze kwaba ngulapho Jehova abeka titsa takhe ngephansi kwetinyawo takhe.+ 4 Kodvwa nyalo, Jehova Nkulunkulu wami unginikete kuphumula kuyo yonkhe indzawo.+ Kute umuntfu lomelene nami futsi kute lokubi lokwentekako.+ 5 Ngako ngifuna kwakha indlu letawubitwa ngelibito laJehova Nkulunkulu wami, njengobe Jehova etsembisa Davide babe wami watsi: ‘Indvodzana yakho lengitayibeka esihlalweni sakho sebukhosi esikhundleni sakho, ngiyo letakwakha indlu letawubitwa ngelibito lami.’+ 6 Tjela bantfu bakho kutsi bangigawulele imisedari yaseLebanoni.+ Tinceku tami titawusebenta kanye netinceku takho futsi letinceku takho ngitatibhadala kuye ngekutsi wena ufuna ngikhokhe lokungakanani, ngobe uyati kutsi kute lakitsi lokwati kujuba tihlahla njengebantfu baseSidoni.”+
7 Ngesikhatsi Hiramu eva emavi aSolomoni wajabula kakhulu futsi watsi: “Shengatsi Jehova angadvunyiswa lamuhla, ngobe unikete Davide indvodzana lehlakaniphile kutsi ibuse labantfu labanyenti!”+ 8 Ngako Hiramu watfumela livi kuSolomoni lelitsi: “Ngiwutfolile umlayeto lovela kuwe. Ngitakwenta konkhe lokufisako ngekutsi ngikunikete tingodvo temsedari netemjunipha.+ 9 Tinceku tami titawusuka naletingodvo eLebanoni titehlise titimikise elwandle, futsi ngitawutenta tibe ticumbi tihambe ngelwandle tiyofika endzaweni letawushiwo nguwe. Titawehlukaniswa khona lapho kuze tetfwaleke. Utangibhadala ngekuniketa indlu yami kudla lengitakucela.”+
10 Ngako Hiramu watitfumela tonkhe letingodvo temsedari netemjunipha lebetifunwa nguSolomoni. 11 Solomoni waniketa Hiramu kolo lotikali letima-cor* langu-20 000 lobekukudla kwendlu yaHiramu, wamnika nemafutsa emncumo elikhetselo* latikali letingu-20. Solomoni bekamniketa loko-ke Hiramu umnyaka ngemnyaka.+ 12 Jehova waniketa Solomoni kuhlakanipha njengobe bekametsembisile.+ Bekunekuthula emkhatsini waHiramu naSolomoni futsi benta sivumelwane.
13 Kuso sonkhe sive saka-Israyeli, iNkhosi Solomoni yabela emadvodza imisebenti lebekufanele yentelwe inkhosi; yabela emadvodza langu-30 000.+ 14 Beyitfumela langu-10 000 eLebanoni inyanga ngayinye. Lamadvodza bekacitsa leyo nyanga aseLebanoni bese letimbili tinyanga abe semakhaya; futsi ngu-Adoniramu+ lobekaphetse lamadvodza. 15 Solomoni bekanetisebenti letingu-70 000 letivamile* naletingu-80 000 letaticetula ematje+ etintsabeni+ tiphindze tiwalungise kahle, 16 aphindze abe netindvuna+ letingu-3 300 lebeticondzisa letisebenti. 17 Inkhosi yayala kutsi kucotwe ematje lamakhulu, nematje elikhetselo+ lalungiswe kahle+ kute kwakhiwe ngawo sisekelo salendlu.+ 18 Ngako bakhi baSolomoni nebaHiramu kanye nebantfu baseGebali,+ bebajuba lamatje futsi balungisa tingodvo kanye nematje kute kwakhiwe lendlu.