Sembulo Lesembulelwa Johane
8 Latsi liWundlu+ nalivula luphawu lwesi-7,+ kwathula ezulwini sikhatsi lesingaba yimizuzu lengu-30. 2 Ngabona tingilosi letingu-7+ letima embikwaNkulunkulu, futsi tanikwa emacilongo langu-7.
3 Lenye ingilosi lebeyiphetse sitja semphepho lesiligolide, yefika yema e-al’thare,+ yanikwa imphepho lenyenti+ kuze iyinikele e-al’thare leliligolide+ lebelisembikwesihlalo sebukhosi lapho labangcwele bathantaza. 4 Intfutfu yalemphepho lebeyisesandleni salengilosi yenyukela kuNkulunkulu kanye nemithantazo+ yalabangcwele. 5 Ngaso leso sikhatsi lengilosi yatsatsa lesitja semphepho yasigcwalisa ngemlilo lose-al’thare, yase isijika emhlabeni. Kwabese kuba nekudvuma kwelitulu, kwevakala emavi, kwaba nemibane+ kanye nekutamatama kwemhlaba. 6 Letingilosi letingu-7 lebetiphetse emacilongo langu-7+ talungela kuwashaya.
7 Ingilosi yekucala yashaya licilongo layo. Kwaba khona sangcotfo nemlilo kubhicwe nengati, kwajikwa emhlabeni;+ incenye yesitsatfu yemhlaba yasha, nencenye yesitsatfu yetihlahla nayo yasha, nako konkhe lokuluhlata lokumilako kwasha.+
8 Ingilosi yesibili nayo yashaya licilongo layo. Lokutsite lokufana nentsaba lenkhulu leshako kwajikwa elwandle.+ Incenye yesitsatfu yelwandle yaba yingati;+ 9 incenye yesitsatfu yato tonkhe tintfo letiphilako elwandle yafa,+ nencenye yesitsatfu yemikhumbi yephuka.
10 Ingilosi yesitsatfu nayo yashaya licilongo layo. Inkhanyeti lenkhulu lekhanya njengesibane yawa ezulwini, yawela encenyeni yesitsatfu yemifula nasemitfonjeni yemanti.+ 11 Lenkhanyeti kutsiwa Sihlahla Lesibabako. Incenye yesitsatfu yemanti yabese iyababa, futsi bantfu labanyenti babulawa ngulamanti ngobe besekababa.+
12 Ingilosi yesine nayo yashaya licilongo layo. Incenye yesitsatfu yelilanga yashaywa,+ kuhlanganise nencenye yesitsatfu yenyeti kanye nencenye yesitsatfu yetinkhanyeti, kuze kutsi incenye yako yesitsatfu ibe mnyama,+ nencenye yesitsatfu yelilanga ibe bete kukhanya, kube ngulokufanako nangebusuku.
13 Ngabona lusweti lundiza emoyeni futsi ngaluva lumemeta ngelivi lelikhulu lutsi: “Maye, maye, maye+ kulabo labahlala emhlabeni ngenca yaloko lokutawenteka nasekukhala emacilongo etingilosi letintsatfu lesetitawushaya emacilongo ato!”+