Incwadzi Yekucala YemaKhosi

10 Indlovukazi yaseSheba yeva ngeludvumo lwaSolomoni lolumayelana nelibito laJehova,+ ngako yeta yatomvivinya ngekumbuta imibuto lelukhuni.*+ 2 Yefika eJerusalema ihamba nebantfu labanyenti*+ labaticumama. Bebahamba nemakamela lebekalayishe emafutsa ebhalisamu,+ ligolide lelinyenti kanye nematje laligugu. Yaya kuSolomoni futsi yakhuluma naye ngako konkhe lobekusenhlitiyweni yayo. 3 Solomoni wayiphendvula yonkhe imibuto lebeyinayo. Bekute umbuto lomatima* enkhosini kutsi ingehluleka kuphendvula lendlovukazi.

4 Ngesikhatsi indlovukazi yaseSheba seyikubone konkhe kuhlakanipha kwaSolomoni,+ indlu lebekayakhile,+ 5 kudla lebekuba setafuleni lakhe,+ indlela tinceku takhe lebetihlala ngayo kulelitafula, indlela tisebenti takhe lebetigcoka ngayo nendlela boweta bakhe lebebaletsa ngayo lokudla, baphatsi betindzebe bakhe kanye nemihlatjelo yekushiswa lebekayinikela njalo endlini yaJehova, yasala ibambe wangentansi.* 6 Yatsi enkhosini: “Umbiko lengiwuvile nangiseveni lami lomayelana netintfo lotentile kanye nekuhlakanipha kwakho, uliciniso. 7 Kodvwa angikawukholwa lombiko kwaze kwaba ngulapho mine ngita ngitotibonela matfupha. Sengiyabona kutsi kuncane lengitjelwe kona. Imphumelelo nekuhlakanipha kwakho kukwendlula khashane loko lengikuvile ngawe. 8 Bayajabula bantfu bakho kanye netinceku takho letima embikwakho njalo, tilalele emavi ekuhlakanipha kwakho!+ 9 Shengatsi angadvunyiswa Jehova Nkulunkulu wakho+ lokutsandzile ngekutsi akubeke esihlalweni sebukhosi saka-Israyeli. Ngenca yekutsi lutsandvo lwaJehova ngema-Israyeli luhlala njalo, ukubekile kutsi ube yinkhosi kuze ubuke kugcinwa kwemtsetfo kanye nekulunga.”

10 Lendlovukazi yabese inika inkhosi emathalenta* langu-120 eligolide, emafutsa lamanyenti kakhulu ebhalisamu+ kanye nematje laligugu.+ INkhosi Solomoni ayizange iphindze inikwe emafutsa lamanyenti ebhalisamu kwendlula lawa leyawanikwa ngulendlovukazi yaseSheba.

11 Imikhumbi leminyenti yaHiramu lebeyilayishe ligolide isuka e-Ofiri,+ yaphindze yaletsa netingodvo+ letinyenti kakhulu tem-algamu kanye nematje laligugu+ isuka e-Ofiri. 12 Inkhosi yakha tinsika tendlu yaJehova kanye netendlu yenkhosi* ngaletingodvo tem-algamu. Yaphindze yakha ngato emahabhu netinsimbi temculo letinetintsambo tebahlabeleli.+ Letingodvo atiphindzanga taletfwa nobe tabonwa kuze kube ngulamuhla.

13 INkhosi Solomoni yaphindze yanika indlovukazi yaseSheba noma ngabe yini lebeyiyifisa nalebeyiyicela ngetulu kwaloko leyayiyiphe kona.* Ngemuva kwaloko, lendlovukazi yahamba yabuyela eveni layo ikanye netinceku tayo.+

14 Sisindvo seligolide lebeliletfwa kuSolomoni ngemnyaka besingemathalenta* langu-666,+ 15 nasingalibali lelo lebelichamuka kubatsengisi kanye nenzuzo lebeyingeniswa yibhizinisi kanye nalebeyingeniswa ngiwo onkhe emakhosi ase-Arabiya netindvuna telive.

16 INkhosi Solomoni yakha emahawu lamakhulu langu-200 ngeligolide lelihlanganiswe nalolunye luhlobo lwensimbi+ (lihawu ngalinye belingemashekeli* langu-600 eligolide)+ 17 nemahawu lamancane* langu-300 eligolide lelihlanganiswe nalolunye luhlobo lwensimbi (lihawu ngalinye lelincane belakhiwe ngemakhilogremu lacishe abe mabili* eligolide). Inkhosi yabese ibeka lamahawu Endlini yeLihlatsi laseLebanoni.+

18 Inkhosi yaphindze yakha sihlalo sebukhosi lesikhulu ngematinyo endlovu+ futsi yasinameka ngeligolide lelicwengisisiwe.+ 19 Bekunetitebhisi letisitfupha letiya kulesihlalo sebukhosi futsi besinelivulandi ngemuva kwaso leliyindingilizi. Bekuphindze kube netindzawo tekubeka tandla etinhlangotsini totimbili talesihlalo kanye nemabhubesi lamabili+ lebekeme eceleni kwaletindzawo tekubeka tandla. 20 Bekuphindze kube nemabhubesi langu-12 lebekeme kuletitebhisi letisitfupha, kunelibhubesi linye ngala nangala kwesitebhisi ngasinye. Kute lomunye umbuso lowake wakha intfo lenjena.

21 Tonkhe tindzebe tekunatsa teNkhosi Solomoni betakhiwe ngeligolide, futsi tonkhe titja Tendlu yeLihlatsi laseLebanoni+ betakhiwe ngeligolide lelicwengisisiwe. Bekute lobekwakhiwe ngelisiliva ngobe lisiliva belitsatfwa njengentfo lengenamsebenti ngetikhatsi taSolomoni.+ 22 Inkhosi beyinemikhumbi leminyenti yaseThashishi+ elwandle ikanye nemikhumbi leminyenti yaHiramu. Kanye ngemuva kweminyaka lemitsatfu lemikhumbi yaseThashishi beyita igcwele ligolide nelisiliva, ematinyo endlovu,+ tinhlobonhlobo tetimfene nemaphigogo.

23 Ngako iNkhosi Solomoni beyihlakaniphe+ kakhulu futsi injinge kakhulu kunawo onkhe emakhosi emhlaba.+ 24 Bonkhe bantfu emhlabeni wonkhe bebafuna kubonana* naSolomoni kuze beve emavi ekuhlakanipha lebekafakwe nguNkulunkulu enhlitiyweni yakhe.+ 25 Bebeta baphetse tipho letifaka ekhatsi tintfo letakhiwe ngelisiliva, tintfo letakhiwe ngeligolide, tembatfo, tikhali, emafutsa ebhalisamu, emahhashi kanye neminyuzi. Loku bekwenteka umnyaka ngemnyaka.

26 Solomoni wachubeka nekucongelela tincola temphi kanye nemahhashi;* waba netincola temphi letingu-1 400 nemahhashi langu-12 000*+ futsi konkhe loko wakubeka emadolobheni etincola temphi, lokunye wakubeka dvutane naye eJerusalema.+

27 Inkhosi yenta lisiliva eJerusalema laba linyenti ngangematje, yenta netingodvo temsedari taba tinyenti njengetihlahla temsikhamori letiseShefela.+

28 Emahhashi aSolomoni bekatsengwe eGibhithe futsi licembu lebatsengisi benkhosi belitsenga umhlambi walamahhashi* ngentsengo lefanako.+ 29 Incola yemphi ngayinye lebeyitsengwe eGibhithe beyibita tinhlavu telisiliva letingu-600 futsi lihhashi lilinye belibita letingu-150; labatsengisi bona bebabese batsengisela onkhe emakhosi emaHethi+ nemakhosi aseSiriya.