Imisebenti Yebaphostoli
26 Agripha+ watsi kuPawula: “Uvumelekile kutsi utikhulumele kuze utivikele.” Ngako Pawula welula sandla sakhe wase uyatikhulumela watsi:
2 “Nkhosi Agripha, ngisho nangetulu kwato tonkhe tintfo emaJuda+ langimangalela ngato, mine ngiyajabula ngekutsi ngisembikwakho kuze ngitivikele lamuhla, 3 ikakhulukati njengobe uwati kahle onkhe emasiko emaJuda kanye nekuphikisana lokukhona emkhatsini wawo. Ngako ngiyakucela kutsi ungilalele ngesineke.
4 “Kuliciniso kutsi indlela lebengiphila ngayo emkhatsini webantfu* bakitsi kusukela ngisemncane kuchubeke, nangesikhatsi ngiseJerusalema, yatiwa kahle ngiwo onkhe emaJuda+ 5 lengake ngetayelana nawo, futsi nakafisa kufakaza angasho kutsi bengingumFarisi, ngiphila ngekuvumelana netimfundziso leticinile tenkholo yetfu.+ 6 Kodvwa lamuhla ngimangalelwa ngelitsemba lenginalo esetsembisweni Nkulunkulu lasenta kubokhokho betfu,+ 7 lesi ngulesetsembiso tive takitsi letingu-12 letilangatelela kutsi sigcwaliseke njengobe nje tichubeka tikhonta Nkulunkulu imini nebusuku. Ngako-ke Nkhosi, emaJuda+ angimangalela ngenca yalelo tsemba.
8 “Yini lenenta nicabange kutsi Nkulunkulu ngeke akhone kuvusa labafile? 9 Nami bengiciniseka kutsi kufanele ngente konkhe lokusemandleni ami kuze ngimelane neligama laJesu waseNazaretha. 10 Nguloko kanye lengakwenta eJerusalema. Labanyenti labangcwele bengibavalela emajele+ ngobe bengitfole imvume kubaphristi labakhulu;+ futsi bengikusekela kubulawa kwabo. 11 Bengibahlukumeta ngaso sonkhe sikhatsi emasinagogeni kuze ngetame kubenta baphike kukholwa kwabo; futsi njengobe bengibatfukutselele kakhulu, bengize ngibaphatse kabi ngisho nakulamanye emadolobha.
12 “Ngalelinye lilanga, bengiya eDamaseko kuze nakhona ngente lokufanako njengobe bengitfunywe baphristi labakhulu. 13 Bekukusemini Nkhosi ngesikhatsi ngibona kukhanya lobekwendlula kwelilanga kumanyata kuvela ezulwini, futsi kwatungeleta mine nalabo lebengihamba nabo.+ 14 Sonkhe sawa phansi, ngabese ngiva livi likhuluma nami ngelulwimi lwesiHebheru litsi: ‘Sawula, Sawula, ungihluphelani? Lokuchubeka ukhahlela tindvuku leticijile* kutakulimata.’ 15 Kodvwa mine ngatsi: ‘Ungubani wena Nkhosi?’ INkhosi yatsi: ‘NginguJesu, loyo lomhluphako. 16 Sukuma ume ngetinyawo. Ngobe ngitivete kuwe kuze ngikukhetse kutsi ube yinceku yami nafakazi wetintfo lotibonile naleto lengitakukhombisa tona letimayelana nami.+ 17 Ngitakusindzisa etiveni nakulabantfu lengikutfuma kubo.+ 18 Utawuvula emehlo abo,+ ubente basuke ebumnyameni+ baye ekukhanyeni,+ basuke nasekulawulweni nguSathane+ baye kuNkulunkulu kuze batotsetselelwa tono+ ngenca yekukholwa kwabo kimi, batfole nemvuzo walabangcwelisiwe.’
19 “Ngako-ke Nkhosi Agripha, ngakwenta loko lengatjelwa kona kulombono lovela ezulwini, 20 futsi ngacale ngaya kubantfu baseDamaseko,+ ngase ngiya kulabo labaseJerusalema+ nalabasetindzaweni taseJudiya kanye nakubetive, ngimemetela umlayeto wekutsi kufanele baphendvuke babuyele kuNkulunkulu ngekutsi bente imisebenti lekhombisa kuphendvuka.+ 21 Ngaleso sizatfu-ke emaJuda angibamba ethempelini, etama kungibulala.+ 22 Kodvwa ngenca yekutsi bengisitwa nguNkulunkulu, nalamuhla ngisafakaza kulabo lababonakala baphansi nakulabanemagunya mayelana netintfo baPhrofethi kanye naMosi lebebatsite titawenteka,+ 23 kutsi Khristu bekatawuhlupheka,+ nekutsi njengemuntfu wekucala lobekatawuvuswa ekufeni,+ bekatawushumayela ngekukhanya kulabantfu nasetiveni.”+
24 Njengobe Pawula bekasho letintfo kuze ativikele, Festusi wamemeta watsi: “Uyahlanya Pawula! Kufundza kakhulu kuyakuhlanyisa!” 25 Kepha Pawula watsi: “Angihlanyi Mhlonishwa Festusi, kodvwa ngikhuluma emavi laliciniso nalanengcondvo. 26 Ecinisweni, ngikhuluma ngekukhululeka nenkhosi ngobe itati kahle letintfo, futsi ngiyaciniseka kutsi ivile ngato njengobe tingazange tentiwe emasitseleni.+ 27 Nkhosi Agripha, uyakholelwa yini kubaPhrofethi? Ngiyati kutsi uyakholelwa.” 28 Kodvwa Agripha watsi kuPawula: “Ngesikhashana nje ungangenta ngibe ngumKhristu.” 29 Pawula wabese utsi: “Ngithantaza kuNkulunkulu kutsi ngisho kungendlula sikhashana nobe sikhatsi lesidze, kungabi nguwe kuphela loba njengami, kodvwa nabo bonkhe labangivako lamuhla babe nguloku lengingiko, kepha angifisi kutsi niboshwe njengami.”
30 Ngako inkhosi yasukuma, futsi umbusi kanye naBhenise nalamadvodza lebebahleti nawo basukuma. 31 Njengobe bahamba, bakhuluma bodvwa batsi: “Kute intfo lomuntfu layentile lementa afanelwe kufa nobe kuboshwa.”+ 32 Agripha wabese utsi kuFestusi: “Lomuntfu bekatawukhululwa kube akazange endlulisele licala lakhe kuKhesari.”+