Joshuwa

14 Nguleli lifa ema-Israyeli lalitsatsa eveni laseKhenani, lelo Eliyezeri umphristi naJoshuwa indvodzana yaNuni kanye netinhloko tetindlu taka-Israyeli labawanika lona laba lifa lawo.+ 2 Atfola lifa lawo ngenkatho,+ njengobe nje Jehova bekatsite Mosi ente kuletive letingu-9 nencenye.+ 3 Mosi wanika tive letimbili nencenye lifa lato ngale* kweJordane,+ kodvwa emaLevi akazange awanikete lifa emkhatsini wema-Israyeli.+ 4 Bantfwana baJosefa bebatsatfwa njengetive letimbili,+ lokusive sakaManase nesaka-Efrayimu,+ futsi emaLevi akazange anikwe lifa kulelive, ngaphandle kwemadolobha+ labekatawuhlala kuwo, emadlelo emfuyo yawo kanye nendzawo yetintfo tawo.+ 5 Ngako ema-Israyeli abelana lelive njengobe nje Jehova abetjele Mosi.

6 Ngemuva kwaloko emadvodza akaJuda aya kuJoshuwa eGilgali,+ futsi Khalebi+ indvodzana yaJefune umKhenizi watsi+ kuJoshuwa: “Ukwati kahle loko Jehova lakusho kuMosi umuntfu waNkulunkulu weliciniso+ mayelana nami kanye nawe eKhadeshi-bhaneya.+ 7 Bengineminyaka lengu-40 budzala ngesikhatsi Mosi, inceku yaJehova angitfuma kusuka eKhadeshi-bhaneya kutsi ngiyohlola lelive,+ futsi ngabuya nembiko loliciniso.*+ 8 Nanobe bomnaketfu lengakhuphuka nabo benta labantfu kutsi besabe,* mine ngalandzela Jehova Nkulunkulu wami ngenhlitiyo yonkhe.*+ 9 Ngalelolanga Mosi wafunga watsi: ‘Lelive lohambe kulo ngelunyawo lwakho litawuba lifa lakho nemadvodzana akho kuze kube phakadze, ngobe ulandzele Jehova Nkulunkulu wami ngenhlitiyo yonkhe.’+ 10 Njengobe nje Jehova etsembisa,+ ungigcinile+ kuleminyaka lengu-45 kusukela Jehova enta lesetsembiso kuMosi ngesikhatsi ema-Israyeli ahamba ehlane.+ Solo ngisaphila nalamuhla futsi ngineminyaka lengu-85 budzala. 11 Lamuhla ngisacinile njengobe benginjalo ngalelilanga Mosi angitfuma. Emandla ami solo asafana nangalesa sikhatsi, ngisengakhona kuya emphini futsi ngente naleminye imisebenti. 12 Ngako nginikete lesifundza lesinetintsaba Jehova langetsembisa sona ngalela langa. Nanobe weva kutsi kulendzawo kunema-Anaki+ kanye nemadolobha lamakhulu labiyelwe,+ ngiyaciniseka* kutsi Jehova utawuba nami+ futsi ngitawacosha* njengobe Jehova etsembisa.”+

13 Ngako Joshuwa wambusisa Khalebi indvodzana yaJefune futsi wamnika iHebroni yaba lifa lakhe.+ 14 Kungako iHebroni iyaKhalebi indvodzana yaJefune umKhenizi futsi ilifa lakhe kuze kube ngulamuhla, ngobe walandzela Jehova Nkulunkulu wema-Israyeli ngenhlitiyo yonkhe.+ 15 Ekucaleni iHebroni beyibitwa ngekutsi yiKhiriyathi-abha+ (Abha abeyindvodza ledvumile kuma-Anaki). Lelive laphumula ekulweni timphi.+