Incwadzi Yesibili YaSamuweli

13 Absalomu, indvodzana yaDavide, bekanadzadzewabo lomuhle lebekabitwa ngekutsi nguThamari+ futsi indvodzana yaDavide lengu-Amnoni+ yativa imtsandza Thamari. 2 Amnoni bekacindzeteleke kakhulu kangangekutsi waze waguliswa ngudzadzewabo longuThamari, ngobe Thamari bekayintfombi ntfo futsi bekubonakala shengatsi kute labengakwenta kuye. 3 Amnoni bekanemngani ligama lakhe kunguJonadabi,+ indvodzana yaShimeya+ bhuti waDavide, futsi Jonadabi bekalicili. 4 Ngako Jonadabi watsi ku-Amnoni: “Wena njengobe uyindvodzana yenkhosi, yini lekwenta ucindzeteleke kangaka njalo ekuseni? Awungitjeli ngani?” Amnoni wamphendvula watsi: “Ngiyatifela ngaThamari, dzadzewabo-Absalomu+ umnaketfu.” 5 Jonadabi wamphendvula watsi: “Lala embhedzeni wakho utigulise. Nakefika babe wakho atokuhlola, ubotsi kuye: ‘Ngicela dzadzewetfu Thamari ete atonginika kudla. Nangabe angilungiselela kudla kwalabagulako* ngimbuka, ngitakudla.’”

6 Amnoni walala futsi watigulisa. Inkhosi yeta kuye yatomhlola. Wase utsi kuyo: “Ngicela utfumele dzadzewetfu Thamari kutsi ete lapha atongibhakela tinkhwa letimbili letimise kwenhlitiyo kute anginikete ngidle.” 7 Davide wabese utfumela umlayeto endlini kuThamari watsi: “Ngicela uye endlini yemnakenu Amnoni ufike umlungisele kudla.”* 8 Ngako Thamari wahamba waya endlini ya-Amnoni umnakabo wamkhandza acambalele. Wabese utsatsa inhlama uyayihlanganisa embikwemnakabo futsi wabhaka letinkhwa. 9 Ngemuva kwaloko watsatsa lipani wase umnika letinkhwa. Amnoni akavumanga kutidla, watsi: “Tjela bonkhe bantfu kutsi baphume.” Bonkhe bantfu babese bayaphuma.

10 Ngemuva kwaloko Amnoni watsi kuThamari: “Ngiletsele lokudla* ngale ekamelweni lengilala kulo kute ngidlele khona.” Thamari wabese utsatsa letinkhwa letimise kwenhlitiyo lebekatibhakile watimikisa ku-Amnoni umnakabo ekamelweni lekulala. 11 Nakamnika tona kutsi atidle, Amnoni wambamba wase utsi: “Sondzela lapha dzadzewetfu, ulale nami.” 12 Thamari wamphendvula watsi: “Hhayi mani mnaketfu! Ungangoni ngobe intfo lenjena ayentiwa ka-Israyeli.+ Ungacali wente lentfo lelihlazo kangaka.+ 13 Ngingaphila njani nje nalelihlazo? Wena utawutsatfwa njengendvodza lengenangcondvo ka-Israyeli. Ngicela ukhulume nenkhosi ngobe angeke yale kukunika mine.” 14 Kodvwa akazange amlalele futsi wamehlula ngemandla, wamona ngekutsi amdlwengule. 15 Ngemuva kwaloko Amnoni wacala kumzonda kakhulu Thamari kangangekutsi inzondo labesanayo beyendlula indlela labekamtsandza ngayo ekucaleni. Amnoni wase utsi kuye: “Vuka; phuma uhambe!” 16 Thamari wamphendvula watsi: “Hhayi mnaketfu, kungihambisa nyalo kubi kakhulu kwendlula loku losewungente kona!” Kodvwa akazange amlalele.

17 Amnoni wabita inceku yakhe lencane wase utsi kuyo: “Ngicela ususe nangu umuntfu lapha embikwami bese ukhiya lomnyango nase aphumile.” 18 (Thamari bekagcoke ingubo yelikhetselo* ngobe leyo bekuyingubo legcokwa ngemadvodzakati enkhosi langakaze alale nemuntfu.) Ngako lenceku yamkhiphela ngephandle futsi yawukhiya lomnyango. 19 Thamari wabese utitsela ngemlotsa enhloko+ futsi wadzabula lengubo lenhle lebekayigcokile; watfwala imikhono enhloko, wahamba akhala.

20 Nakabona loko Absalomu+ wabuta Thamari watsi: “Ngumnakenu Amnoni yini lona lobewunaye? Ngicela ungasho lutfo dzadzewetfu. Ungumnakenu.+ Ungayifaki enhlitiyweni lendzaba.” Ngemuva kwaloko Thamari wahlala yedvwana endlini ya-Absalomu umnakabo. 21 Ngesikhatsi iNkhosi Davide iva ngaletintfo lebesetentekile yatfukutsela yagana lunwabu.+ Kodvwa beyingafisi kuyivisa buhlungu indvodzana yayo Amnoni ngobe beyiyitsandza kakhulu futsi beyingumntfwana wayo wekucala. 22 Absalomu akashongo lutfo loluhle nobe lolubi ku-Amnoni ngobe abemzonda+ ngenca yekona dzadzewabo Thamari.+

23 Ngemuva kweminyaka lemibili legcwele, bahhuli betimvu ba-Absalomu bebaseBhali-hasori, eceleni kwaka-Efrayimu+ futsi Absalomu wamema onkhe emadvodzana enkhosi.+ 24 Ngako Absalomu weta enkhosini wefike watsi: “Inceku yakho iyohhula timvu. Ngicela inkhosi kanye netinceku tayo ihambe nami.” 25 Kodvwa inkhosi yatsi ku-Absalomu: “Cha ndvodzana, nangabe sihamba sonkhe sitawuba ngumtfwalo kuwe.” Ngisho noma achubeka nekuyincenga, yala kuhamba kodvwa yambusisa. 26 Absalomu wase utsi: “Nangabe inkhosi ingakhoni kuya, ngicela kuhamba nemnaketfu Amnoni.”+ Inkhosi yamphendvula yatsi: “Kungani kufanele ahambe nawe?” 27 Absalomu wayincenga, ngako inkhosi yavuma kutsi Amnoni kanye nawo onkhe emadvodzana enkhosi bahambe.

28 Absalomu watjela tinceku takhe watsi: “Nibonaka Amnoni futsi ngesikhatsi inhlitiyo yakhe seyijatjuliswe liwayini, ngitawutsi kini, ‘Bulalani Amnoni!’ Nine kufanele bese niyambulala. Ningesabi. Akusimi yini lona lotawube anitfumile? Cinani, nibe nesibindzi.” 29 Ngako tinceku ta-Absalomu tenta ku-Amnoni njengobe abetiyalile; ngemuva kwaloko onkhe lalamanye emadvodzana enkhosi asukuma, ngayinye yawo yagibela umnyuzi wayo yabaleka. 30 Ngesikhatsi lamadvodzana enkhosi asasendleleni, kwefika umbiko kuDavide lotsi: “Absalomu ubulele onkhe emadvodzana enkhosi futsi kute ngisho nayinye lesindzile.” 31 Nayikuva loko, inkhosi yasukuma yadzabula timphahla tayo yalala phansi emhlabatsini. Tonkhe tinceku tayo betime edvutane nayo, setidzabule timphahla tato.

32 Jonadabi,+ indvodzana yaShimeya+ umnakaboDavide, watsi: “Ningenti inkhosi yami icabange kutsi babulele onkhe emadvodzana ayo lamancane ngobe kufe Amnoni kuphela.+ Lesi kube sicondziso lesivela ku-Absalomu lowancuma kwenta loko+ kusukela ngelilanga Amnoni lona ngalo Thamari+ dzadzewabo.+ 33 Ngako ningenti inkhosi yami kutsi inake* lombiko lotsi: ‘Onkhe emadvodzana enkhosi afile’; ngu-Amnoni kuphela lofile.”

34 Kwatsi kusenjalo, Absalomu wabaleka.+ Ngekuhamba kwesikhatsi, gadzi watsi nakaphakamisa emehlo wabona bantfu labanyenti beta ngemgwaco lobewuseceleni kwentsaba ngemuva kwakhe. 35 Jonadabi+ wabese utsi enkhosini: “Emadvodzana enkhosi asabuyile, njengobe nje inceku yakho ishito.” 36 Watsi nje nakacedza kukhuluma, emadvodzana enkhosi angena akhala kakhulu; inkhosi nato tonkhe tinceku tayo nabo badzindza sililo. 37 Kodvwa Absalomu wabaleka waya kuThalmayi+ indvodzana ya-Amihudi, inkhosi yaseGeshuri. Davide walila emalanga lamanyenti ngenca yendvodzana yakhe. 38 Ngemuva kwekubalekela eGeshuri,+ Absalomu wahlala lapho iminyaka lemitsatfu.

39 Ekugcineni iNkhosi Davide yalangatelela kuya ku-Absalomu ngobe beseyikwemukele* kufa kwa-Amnoni.