Incwadzi Yekucala YaSamuweli
26 Ngekuhamba kwesikhatsi, emadvodza aseZifu+ aya eGibeya+ kuSawula afike atsi: “Davide ubhace egcumeni laseHakhila lelibuke iJeshimoni.”*+ 2 Ngako Sawula wehlela ehlane laseZifu akanye nemadvodza langu-3 000 lakhetfwe ka-Israyeli, bahamba bayofuna Davide kulelihlane.+ 3 Sawula wamisa emathende ngasemgwacweni egcumeni laseHakhila, lelibuke iJeshimoni. Ngaleso sikhatsi Davide abehlala ehlane futsi weva kutsi Sawula ute kulelihlane atemfuna. 4 Ngako Davide watfumela tinhloli kuze tiyewubuka kutsi vele Sawula utile yini. 5 Ngekuhamba kwesikhatsi Davide waya kulendzawo lapho Sawula bekamise khona emathende, futsi wabona lapho bekulele khona Sawula na-Abneri+ indvuna yelibutfo lakhe loyindvodzana yaNeri. Sawula abelele kulenkambu futsi atungeletwe ngemasotja. 6 Ngemuva kwaloko Davide watsi ku-Ahimeleki umHethi+ naku-Abishayi+ umnakabo Jowabe, loyindvodzana yaSeruya:+ “Ngubani lotawehla nami siye kuSawula lena enkambu?” Abishayi wamphendvula watsi: “Ngitawuhamba nawe.” 7 Ngako Davide na-Abishayi bahamba baya kulelibutfo ebusuku futsi bakhandza Sawula alele kulenkambu, sikhali sakhe sihlonywe phansi eceleni kwenhloko yakhe. Abneri nemasotja bebalele bamtungeletile.
8 Abishayi wabese utsi kuDavide: “Lamuhla Nkulunkulu unikele sitsa sakho esandleni sakho.+ Nyalo ngicela ungivumele kutsi ngimgwaze ngalesikhali kanye nje siphumele emhlabatsini, angeke kudzingeke ngiphindze kabili.” 9 Kodvwa Davide watsi ku-Abishayi: “Ungamlimati, ngobe ngubani nje longalimata logcotjiwe waJehova+ futsi achubeke amsulwa?”+ 10 Davide wachubeka watsi: “Ngifunga Jehova Nkulunkulu lophilako kutsi nguJehova lotambulala,+ nobe ngalelinye lilanga+ utawufa nobe-ke utawuhamba aye emphini afike abulawe khona.+ 11 Jehova angeke avume kutsi ngilimate logcotjiwe waJehova!+ Ngako nyalo ngicela sitsatse lesikhali lesiseceleni kwenhloko yakhe nalelijeke lemanti futsi sihambe.” 12 Davide watsatsa lesikhali nalelijeke lemanti lobekuseceleni kwenhloko yaSawula, base bayahamba. Kute lowabona+ nobe lowanaka futsi kute lowavuka ngenca yekutsi bebalele bonkhe, ngobe bebafikelwe butfongo lobukhulu lobebuvela kuJehova. 13 Ngemuva kwaloko Davide wawelela ngesheya futsi wema esicongweni sentsaba, khashane nalapho Sawula abekhona khona.
14 Davide wamemeta lamasotja kanye na-Abneri+ indvodzana yaNeri watsi: “Abneri, uyangiva yini?” Abneri wamphendvula watsi: “Ungubani wena lobita inkhosi?” 15 Davide watsi ku-Abneri: “Kantsi awusilo yini lichawe? Ukhona yini lonjengawe ka-Israyeli? Manje-ke awukayigadzi ngani inkhosi yakho? Buka nje lelinye lisotja lifike lapho kuze liyibulale.+ 16 Yimbi lentfo loyentile. Ngifunga Jehova Nkulunkulu lophilako kutsi kufanele ufe ngobe awukayigadzi inkhosi yakho, lengulogcotjiwe waJehova.+ Ase ubuke emaceleni! Siphi sikhali senkhosi nelijeke lemanti+ lobekuseceleni kwenhloko yayo?”
17 Sawula wabese uyeva kutsi nguDavide lolokhulumako futsi watsi: “Nguwe yini lolokhulumako Davide ndvodzana yami?”+ Davide wamphendvula watsi: “Ngimi nkhosi.” 18 Wachubeka watsi: “Inkhosi iyicoshelani inceku yayo?+ Ngenteni, futsi liyini licala lami?+ 19 Nkhosi yami, ngicela ulalele loko lokushiwo yinceku yakho: Nangabe kunguJehova lowente kutsi umelane nami, shengatsi angawemukela* umnikelo wami walokutinhlavu. Kodvwa nangabe kubantfu,+ bacalekisiwe embikwaJehova ngobe bangente ngativa ngite lilungelo lekuhlala endzaweni lelifa laJehova.+ Bangicoshile, batsi: ‘Hamba uyokhonta labanye bonkulunkulu!’ 20 Ngicela ungavumi kutsi ingati yami icitsekele phansi khashane naJehova, ngobe inkhosi yaka-Israyeli ifunana nelikululu,+ futsi kufana nekutsi icoshana nentsendzele etintsabeni.”
21 Nakeva loko Sawula watsi: “Ngonile.+ Buya Davide ndvodzana yami, ngeke ngisakulimata ngobe lamuhla kuphila kwami ukutsetse njengentfo leligugu.+ Mine ngente bulima futsi ngente liphutsa lelikhulu.” 22 Davide wamphendvula watsi: “Nasi sikhali senkhosi. Akute linye lalamajaha litesitsatsa. 23 NguJehova lotawubuyisela umuntfu ngamunye ngenca yalokulungile+ lakwentako nangekwetsembeka kwakhe, ngobe lamuhla Jehova abekunikele esandleni sami kodvwa ngalile kulimata logcotjiwe waJehova.+ 24 Njengobe nje lamuhla kuphila kwakho* ngikutsetse njengalokuligugu, shengatsi nekuphila kwami kungaba ligugu kuJehova, futsi shengatsi angangisindzisa kuto tonkhe tinhlupheko.”+ 25 Sawula waphendvula Davide watsi: “Shengatsi ungabusiswa Davide ndvodzana yami. Utawenta tintfo letinkhulu futsi nakanjani utawuphumelela.”+ Davide wabese uchubeka nendlela, Sawula yena wabuyela endzaweni yakhe.+