Zakhariya
1 Ngenyanga yesi-8 emnyakeni wesibili wekubusa kwaDariyusi,+ Jehova wakhuluma nemphrofethi Zakhariya*+ indvodzana yaBherekhiya loyindvodzana ya-Ido, watsi: 2 “Mine Jehova ngabatfukutselela kakhulu bokhokho benu.+
3 “Khuluma nalabantfu utsi: ‘Naku lokushiwo nguJehova wemabutfo: “Jehova wemabutfo utsi: ‘Buyelani kimi, futsi nami ngitawubuyela kini,’+ kusho Jehova wemabutfo.”’
4 “‘Ningafanani nabokhokho benu, ngobe baphrofethi bakadzeni babatjela batsi: “Naku Jehova wemabutfo lakushoko: ‘Ngicela nishiye* tindlela tenu letimbi futsi niyekele kwenta lokubi.’”’+
“‘Kodvwa abazange balalele futsi abazange banginake,’+ kusho Jehova.
5 “‘Baphi bokhokho benu nyalo? Labaphrofethi basaphila yini? 6 Emavi ami kanye nemitsetfo yami lengayitfumela ngetinceku tami letibaphrofethi, ayizange yini igcwaliseke kubokhokho benu?’+ Ngako babuya kimi futsi batsi: ‘Jehova wemabutfo usiphetse ngendlela lefanele tindlela tetfu netento tetfu, njengobe besekavele ashito.’”+
7 Ngelilanga lesi-24 enyangeni yesi-11, lokuyinyanga yaShebathi,* ngemnyaka wesibili wekubusa kwaDariyusi,+ Jehova wenta kutsi mine Zakhariya indvodzana yaBherekhiya indvodzana ya-Ido ngibone umbono. 8 Ngatsi ngiyabuka ebusuku ngabona indvodza lebeyigibele lihhashi lelibovu, yafike yema esihosheni yanganyakati, yema emkhatsini wetihlahla tamabovana.* Emvakwayo bekunalabagibele emahhashi labovu, lansundvu nalamhlophe.
9 Ngako ngabuta ngatsi: “Bobani laba nkhosi?”
Ingilosi lebeyikhuluma nami yangiphendvula yatsi: “Ngitakutjela kutsi bobani.”
10 Ngemuva kwaloko lendvodza lebeyime emkhatsini wetihlahla tamabovana yatsi: “Laba ngulabatfunywe nguJehova kutsi bayohlola umhlaba.” 11 Babese bakhuluma nalengilosi yaJehova lebeyime emkhatsini waletihlahla tamabovana batsi: “Sesiwuhlole wonkhe umhlaba, satfola kutsi unekuthula futsi ute siphitsiphitsi.”+
12 Ngako lengilosi yaJehova yatsi: “Awu Jehova wemabutfo, kutawuze kube ngunini solo ungawahawukeli emadolobha akaJuda neJerusalema,+ lowatfukutselele yonkhe leminyaka lengu-70?”+
13 Jehova wayiphendvula ngemusa lengilosi lebeyikhuluma nami futsi wayidvudvuta. 14 Ngemuva kwaloko lengilosi yakhuluma nami yatsi: “Memeta utsi: ‘Naku lokushiwo nguJehova wemabutfo: “Nginenshisekelo lenkhulu ngeJerusalema nangeSiyoni.+ 15 Ngititfukutselele kakhulu tive leticabanga kutsi tiphephile.+ Bantfu bami bengibatfukutselele kancane,+ kodvwa letive tibacotfule tabacedza.”’+
16 “Ngako naku Jehova lakushoko: ‘“Ngitawuphindze ngiyentele umusa iJerusalema,+ nendlu yami itawakhiwa+ kabusha kulelidolobha, futsi intsambo yekukala itawelulwa eJerusalema,”+ kusho Jehova wemabutfo.’
17 “Phindze umemete utsi: ‘Naku lokushiwo nguJehova wemabutfo: “Emadolobha ami atawuphindze agcwale tintfo letinhle tize tiphuphume. Mine Jehova ngitawuphindze ngiyidvudvute iSiyoni+ futsi ngitawuphindze ngikhetse iJerusalema.”’”+
18 Ngatsi ngiphakamisa emehlo ami, ngabona timphondvo letine.+ 19 Ngako ngabuta lengilosi lebeyikhuluma nami, ngatsi: “Timelelani letimphondvo?” Yangiphendvula yatsi: “Leti nguletimphondvo letahlakata Juda,+ na-Israyeli+ kanye neJerusalema.”+
20 Jehova wabese ungikhombisa tisebenti letine letinelikhono. 21 Ngabuta ngatsi: “Batowentani laba?”
Lengilosi yangiphendvula yatsi: “Letisebenti titele kutowesabisa timphondvo taletive, futsi tijike phansi letimphondvo letasetjentiswa nguletive natimelana nelive lakaJuda futsi tihlakata bantfu bakhona. Leti nguletimphondvo letahlakata Juda kangangekutsi kwaba bete nalokhona kuphakamisa inhloko yakhe.”