Isaya
21 Simemetelo lesimelene nelihlane laselwandle:*+
Kuyeta, njengesivunguvungu lesitsanyelako lesisuka eningizimu,
Kusuka ehlane, kusuka eveni lelesabekako.+
2 Ngitjelwe umbono lowesabekako:
Umuntfu lokhohlisako uyakhohlisa,
Nembhubhisi uyabhubhisa.
Khuphuka wena Elamu! Vimbetela wena Mediya!+
Ngitawucedza konkhe kububula lakubangela.+
3 Kungako ngisebuhlungwini lobukhulu.*+
Ngibanjwe kuchachatela,
Njengemfati lobelekako.
Ngicindzeteleke kakhulu, angikhoni nekuva;
Ngiphazamiseke kakhulu, angikhoni nekubona.
4 Inhlitiyo yami iphelelwa ngemandla; ngifikelwa kwesaba lokukhulu.
Kuhlwa lebengisolo ngikulindzele kungenta ngesabe.
5 Lungisani litafula nihlele kahle titulo!
Dlanini, ninatse!+
Sukumani nine tindvuna, gcobani lihawu ngemafutsa!
6 Ngobe nguloku lokwashiwo nguJehova kimi:
“Hamba, uyobeka gadzi bese umtjela kutsi abuye atoletsa umbiko walakubonile.”
7 Logadzi wabona incola yemphi idvonswa sipani semahhashi,
Nencola yemphi lebeyidvonswa timbongolo,
Nencola yemphi lebeyidvonswa ngemakamela.
Wabuka ngekucophelela, wanaka.
8 Wabese ubhodla njengelibhubesi watsi:
“Awu Jehova, ngima lilanga ngelilanga etikwesicongosekulindza,
Futsi ngima busuku nebusuku endzaweni yami yekugadza.+
9 Buka naku lokutako:
Emadvodza agibele incola yemphi ledvonswa ngemahhashi laboshelwe!”+
Wabese ukhuluma nami utsi:
“Iwile! Iwile iBhabhulona!+
Tonkhe tithico letibatiwe tabonkulunkulu bayo utiphihlitele phansi!”+
10 Awu bantfu bami lenigcotjwagcotjwe njengalokutinhlavu,
Umkhicito* welibala lami lekubhulela,+
Nginibikele loko lengikutjelwe nguJehova wemabutfo, Nkulunkulu wema-Israyeli.
11 Simemetelo lesimelene neDuma:*
Kunalongimemetako loseSeyiri:+
“Yegadzi! Kusele sikhatsi lesingakanani kutsi kuse?
Yegadzi! Kusele sikhatsi lesingakanani kutsi kuse?”
12 Logadzi wabese utsi:
“Kuyeta kusa, kepha nebusuku buyeta.
Nangabe ufuna kubuta, buta.
Ubobuya futsi!”
13 Simemetelo lesimelene nendzawo lelugwadvule:
Nitawucitsa busuku bonkhe emahlatsini endzawo lelugwadvule,
Awu nine cembu lebantfu baseDedani lenihamba nemakamela.+
14 Letsani emanti kuze nihlangabete labomile,
Nine bantfu labahlala eveni laseThema,+
Letsani nekudla kwalababalekako.
15 Ngobe bayibalekele inkemba, inkemba lelungele kubulala,
Babalekele butjoki lobulungele kudubula, babalekela nekuhlukunyetwa yimphi.
16 Ngobe naku Jehova lakushito kimi: “Ngemnyaka munye, njengeminyaka yesisebenti lesicashiwe,* yonkhe inkhatimulo yeKhedari+ itawuphela. 17 Batawuba bancane labasele emasotjeni aseKhedari langemachawe futsi lasebentisa butjoki, ngobe Jehova Nkulunkulu wema-Israyeli ukhulumile.”