Hezekeli
30 Livi laJehova laphindze lefika kimi latsi: 2 “Ndvodzana yemuntfu, phrofetha utsi: ‘Naku lokushiwo yiNkhosi Lephakeme Jehova:
“Lilani nitsi: ‘Maye lelilanga liyeta!’
3 Ngobe lelilanga lisondzele, selisondzele lilanga laJehova.+
Kuyawuba lilanga lelinemafu,+ lokusikhatsi lesibekiwe setive.+
4 Inkemba itawufikela iGibhithe futsi iTopiya itawetfuka nakubulawa bantfu eGibhithe;
Umcebo wayo utawutsatfwa netisekelo tayo tibhidlitwe.+
5 ITopiya,+ iPhuthi,+ iLudi, bonkhe bantfu bakuletinye tive,
IKhubi kanye nemadvodzana akulelive langephansi kwesivumelwane,*
Batawubulawa ngenkemba.”’
6 Jehova utsi:
‘Labo labasekela iGibhithe nabo batawufa,
Nembuso wayo lotikhukhumetako utawuwiswa phansi.’+
“INkhosi Lephakeme Jehova itsi: ‘Batawubulawa ngenkemba kulelive, kusukela eMigdoli+ kuya eSiyene.+ 7 Emave abo atawushiywa angenalutfo kwendlula onkhe lamanye emave, futsi emadolobha abo atawubhujiswa kwendlula onkhe lamanye emadolobha.+ 8 Bayawukwati kutsi mine nginguJehova ngesikhatsi ngilumeka iGibhithe ngemlilo, nangesikhatsi ngipitjita onkhe emave lanebudlelwane nayo. 9 Ngalelolanga ngiyawutfumela titfunywa ngemikhumbi kuze ngente iTopiya letetsembako ichachateliswe kwesaba; batawehlelwa kwesaba lokukhulu ngelilanga lelitawufikela iGibhithe, ngobe nakanjani litawufika.’
10 “INkhosi Lephakeme Jehova itsi: ‘Ngitabacedza nya bantfu labanyenti baseGibhithe ngisebentisa sandla seNkhosi Nebukhadnezari* yaseBhabhulona.+ 11 Yona kanye nelibutfo layo, lokulibutfo lelinelunya kuwendlula onkhe etiveni,+ batawuletfwa kuze bacotfule lelive. Batawuhoshula tinkemba tabo, balwe neGibhithe futsi lelive litawugcwala tidvumbu.+ 12 Imisele yeNayili+ ngitayomisa futsi lelive ngitalitsengisela bantfu lababi. Ngitakwenta lelive kanye nako konkhe lokukulo kusale kungenalutfo ngisebentisa sandla sebantfu bakuletinye tive.+ Mine Jehova lucobo lwami ngikhulumile.’
13 “INkhosi Lephakeme Jehova itsi: ‘Ngitawubhubhisa netithico letenyanyekako* futsi ngicedze bonkulunkulu labangenamsebenti baseNofi.*+ Angeke kusaphindze kube nendvuna* levela eveni laseGibhithe futsi live laseGibhithe ngitalenta lifikelwe kwesaba.+ 14 Ngitawenta iPhathrosi+ isale ikhala libhungane futsi iSowani ngitayilumeka ngemlilo, ngikhiphe nesehlulelo eNo.*+ 15 Ngitawutfululela intfukutselo yami eSini, lesiphephelo saseGibhithe, futsi ngitawubhubhisa bonkhe bantfu baseNo. 16 Ngitawulumeka iGibhithe ngemlilo; iSini itawubanjwa kwesaba, futsi libutfo litawubhidlita lubondza lwaseNo lingene, kantsi iNofi* yona itawuhlaselwa emini libalele! 17 Emajaha ase-Oni* newasePhibesethi atawubulawa ngenkemba futsi bantfu bakulamadolobha batawutfunjwa. 18 Lilanga liyogucuka libe bumnyama eThaphanesi ngalesikhatsi ngephula lijoka laseGibhithe khona lapho.+ Umbuso wakhona lotikhukhumetako utawubhujiswa,+ emafu atayisibekela nebantfu basemadolobheni akhona batawutfunjwa.+ 19 Ngitawukhipha sehlulelo eGibhithe futsi bayawukwati kutsi mine nginguJehova.’”
20 Ngemnyaka wesi-11, ngenyanga yekucala, elangeni lesi-7 laleyo nyanga, livi laJehova lefika kimi latsi: 21 “Ndvodzana yemuntfu, sengiwephulile umkhono waFaro inkhosi yaseGibhithe; angeke uboshwe kuze uphole nobe ubhandishwe kuze ucine ngalokwanele kutsi ungabamba inkemba.”
22 “Ngako-ke, iNkhosi Lephakeme Jehova itsi: ‘Ngimelene naFaro inkhosi yaseGibhithe.+ Ngitawephula imikhono yakhe, ngephule lolophilile nalolophukile,+ futsi ngitawenta kutsi inkemba iwe esandleni sakhe.+ 23 BaseGibhithe ngitawubese ngibasakatela etiveni nasemaveni.+ 24 Ngitawucinisa imikhono* yenkhosi yaseBhabhulona,+ ngibeke inkemba yami esandleni sayo,+ ngephule imikhono yaFaro futsi yena utawukhala amemete kuhle kwemuntfu lofako embikwayo.* 25 Ngitawucinisa imikhono yenkhosi yaseBhabhulona, kodvwa imikhono yaFaro itawulenga; futsi bayawukwati kutsi mine nginguJehova ngalesikhatsi ngibeka inkemba yami esandleni senkhosi yaseBhabhulona futsi ihlasela ngayo live laseGibhithe.+ 26 Bantfu baseGibhithe ngitabasakatela etiveni nasemaveni+ futsi bayawukwati kutsi mine nginguJehova.’”