Incwadzi Yekucala YaSamuweli
29 EmaFilisti+ ahlanganisa onkhe emabutfo awo e-Afeki, ngaleso sikhatsi ema-Israyeli bekamise emathende ngasemtfonjeni eJezreyeli.+ 2 Baholi bemaFilisti bebendlula nemasotja abo ngemacembu emakhulu nangemacembu etinkhulungwane, futsi Davide kanye nemadvodza labehamba nawo bebashuca ngemuva bana-Akhishi.+ 3 Kodvwa tindvuna temaFilisti tatsi: “Afunani lamaHebheru lana?” Akhishi watiphendvula watsi: “Lona nguDavide, inceku yeNkhosi Sawula yaka-Israyeli, bekasolo anami sikhatsi lesingetudlwana kwemnyaka.+ Kute liphutsa lengilitfolile kuye kusukela ngelilanga lafika ngalo kimi kuze kube ngulamuhla.” 4 Tindvuna temaFilisti tamtfukutselela Akhishi, tatsi kuye: “Tjela lendvodza kutsi ijike.+ Ayibuyele emuva endzaweni lowayinika yona. Ungayivumeli kutsi ihambe natsi kuya emphini, kute ingasijikeli nasekuliwa.+ Nguyiphi nje lenye indlela lengatenta itsandzeke ngayo enkhosini yayo ngaphandle kwekutsi ibulale emadvodza akitsi? 5 Akusuye yini loDavide lebebahlabela ngaye ngesikhatsi bajayiva batsi:
‘Sawula ubulele bantfu labatinkhulungwane,
Davide yena wabulala labangemashumi etinkhulungwane’?”+
6 Ngako Akhishi+ wabita Davide watsi kuye: “Ngifunga Jehova Nkulunkulu lophilako kutsi wena ucotfo, futsi bengingajabula kuhamba nawe siye emphini nelibutfo lami,+ ngobe kute liphutsa lengilitfolile kuwe kusukela ngelilanga lowefika ngalo kimi kuze kube ngulamuhla.+ Kodvwa baholi bemaFilisti abakwetsembi.+ 7 Ngako buyela emuva ngekuthula, futsi kube bete lokwentako lokutabaphatsa kabi baholi bemaFilisti.” 8 Kodvwa Davide watsi ku-Akhishi: “Leni nje, ngenteni? Nguliphi liphutsa lolitfolile encekwini yakho kusukela ngelilanga leyefika ngalo kuwe kuze kube ngulamuhla? Kungani kungakafaneli ngihambe nawe siyokulwa netitsa takho nkhosi yami?” 9 Akhishi wamphendvula watsi: “Mine ngiyaciniseka kutsi ungumuntfu lokahle, ufanana nengilosi yaNkulunkulu.+ Kodvwa tindvuna temaFilisti titsite: ‘Ungamvumeli kutsi ahambe natsi aye emphini.’ 10 Ubovuka ekuseni ngeluvivi nalamadvodza lowefika nawo, nihambe ngekushesha nje nasekusile.”
11 Ngako Davide nalamadvodza labehamba nawo bavuka ekuseni kakhulu bajika babuyela eveni lemaFilisti, futsi emaFilisti ahamba aya eJezreyeli.+