Isaya
16 Tfumelani imvu lendvuna kumbusi walelive,
Kusuka eSela kwendlula ehlane
Kuyofika entsabeni yendvodzakati yaseSiyoni.
2 Njengenyoni lecoshwe esidlekeni sayo,+
Nemadvodzakati akaMowabi atawuba njalo ematubukweni ase-Anoni.+
3 “Niketani seluleko, khiphani sincumo.
Yentani sitfunti senu sasemini sibe njengebusuku.
Fihlani bantfu labahlakatekile futsi ningabatsengisi labo lababalekako.
4 Awu Mowabi, shengatsi labo labahlakatekile bangahlala eveni lakho.
Bani yindzawo yekubhaca kubo ngenca yaloyo lobacedzako.+
Umcindzeteli utawufika ekupheleni kwakhe,
Nekucotfulwa kutawuphela,
Futsi labo labagcobagcoba labanye batawushabalala emhlabeni.
5 Sihlalo sebukhosi sitawubese siyasimama ngekwetsembeka.*
Loyo lohlala kuso ethendeni laDavide utakwetsembeka;+
Utakwehlulela ngekungakhetsi futsi ngekushesha utakwenta kutsi kube nekulunga.”+
6 Sivile ngekutikhukhumeta kwesive sakaMowabi, sidvwale kakhulu+
Siyatati, sidvwalile futsi sitfukutsele kakhulu;+
Kodvwa inkhulumo yaso lengumbhedvo, itawugucuka ibe lite.
7 Ngako bakaMowabi batawulilela bakaMowabi;
Bonkhe batawulila.+
Labo labashayiwe batawubalisa bafune sinkhwa semagilebisi lomisiwe saseKhiri-heresethi.+
8 Ngobe emasimu aseHeshboni+ abunile,
Emagilebisi aseSibima+ abunile,
Babusi betive bagcobagcobe emagala akhona labovu tju;*
Ahambe aze ayofika eJazeri;+
Endlulele nasehlane.
Emahlumela awo enabe aze ayofika elwandle.
9 Kungako ngitawukhalela nemagilebisi aseSibima nangikhalela aseJazeri.
Awu Heshboni nawe Eleyale, ngitakumantisa ngetinyembeti tami,+
Ngobe sekuphelile kumemeta ngenca yesitselo sakho sasehlobo nangenca yesivuno sakho.*
10 Kutfokota kanye nenjabulo kususiwe ensimini yetitselo,
Futsi sekute tingoma tenjabulo nobe kumemeta emasimini emagilebisi.+
Umuntfu lohluta liwayini akasalihluti,
Ngobe mine ngibangele kutsi lokumemeta kuphele.+
11 Kungako ngekhatsi kimi ngilikhalela lakaMowabi,+
Njengekukhala kwelihabhu,
Nelingekhatsi lami likhalela iKhiri-heresethi.+
12 Ngisho nome sive sakaMowabi sitibangela kudzinwa endzaweni lephakeme futsi siya kuyothantaza endzaweni yaso lengcwele, angeke sifeze lutfo.+
13 Leli livi lebelikhulunywe nguJehova mayelana nelive lakaMowabi. 14 Nyalo Jehova utsi: “Eminyakeni lemitsatfu, njengeminyaka yesisebenti lesicashiwe,* ludvumo lwakaMowabi lutawuba lihlazo lelihambisana nalo lonkhe luhlobo lwesiphitsiphitsi futsi labo labatawusala batawuba bancane kakhulu futsi bedzeleleke.”+