Incwadzi Yekucala YaSamuweli
20 Ngemuva kwaloko Davide wabaleka eNayothi eRama. Waya kuJonathani wafike watsi: “Yini lengiyentile?+ Liyini licala lami futsi ngimone ngani babe wakho kutsi angaze afune kungibulala?” 2 Nakeva loko, Jonathani watsi: “Ungakucabangi nekukucabanga loko!+ Angeke ufe. Babe akenti lutfo angakangitjeli, kungaba ngulokuncane nome ngulokukhulu. Manje angangifihlelelani-ke ngalendzaba? Ngeke kwenteke loko.” 3 Kodvwa Davide wachubeka watsi: “Babe wakho wati kahle kutsi uyangitsandza+ ngako ucabange watsi: ‘Jonathani akukafaneli ati ngaloku ngobe utawuphatseka kabi.’ Kepha ngifunga ngekuphila kwaJehova nangekuphila kwakho kutsi sekusele kancane ngife!”+
4 Ngemuva kwaloko Jonathani watsi kuDavide: “Ngitakwentela nome yini loyishoko.” 5 Davide watsi kuJonathani: “Kusasa ngumkhosi wekwetfwasa kwenyanga,+ futsi kulindzeleke kutsi ngidle nenkhosi; ubongivumela kutsi ngihambe futsi ngitawubhaca ngaphandle kwelidolobha kuze kube nguntsambama ngelilanga lelilandzela lakusasa. 6 Nangabe babe wakho atawubuta ngami, ubomphendvula utsi: ‘Davide ucele kimi imvume yekutsi aphutfume aye edolobheni lakubo eBhetlehema+ ngobe wonkhe umndeni wakubo utawube wenta umhlatjelo waminyaka yonkhe.’+ 7 Nangabe atakuphendvula atsi: ‘Kulungile,’ kusho kutsi kutayihambela kahle inceku yakho. Kodvwa nangabe atawutfukutsela, ubociniseka kutsi utimisele ngekungibulala. 8 Yikhombise kutsi uyayitsandza* inceku yakho+ ngobe wente sivumelwane nayo embikwaJehova.+ Kodvwa nangabe nginelicala,+ ngibulale wena. Kungani kufanele unginikele kubabe wakho?”
9 Nakeva loko, Jonathani watsi: “Ungakucabangi nekukucabanga loko! Nangabe bengati kutsi babe utimisele kukubulala, bengingeke yini ngikutjele?”+ 10 Davide wabese utsi kuJonathani: “Mine ngitawutjelwa ngubani nangabe babe wakho akuphendvula kabi?” 11 Jonathani watsi kuye: “Wota siphumele ngephandle kwelidolobha.” Ngako bobabili baphumela ngephandle kwalo. 12 Jonathani wachubeka watsi kuDavide: “Jehova Nkulunkulu waka-Israyeli akabe ngufakazi wekutsi ngitawukhuluma nababe ngalendzaba kusasa nobe ngelilanga lelilandzela lakusasa. Nangabe atawukhuluma kahle ngawe,* ngitawutfumela umlayeto kuwe futsi ngikutjele. 13 Kodvwa nangabe babe afuna kukubulala, shengatsi Jehova angangiletsela* sijeziso emuva kwalesinye nangingeke ngikutjele ngaloko futsi ngikukhulule kutsi uhambe ngekuthula. Shengatsi Jehova angaba nawe+ njengobe nje abenababe.+ 14 Shengatsi ungangikhombisa kutsi ungitsandza* njengaJehova ngisaphila nalapho sengifile.+ 15 Ngicela ungayekeli kuyitsandza* indlu yami,+ ngisho nalapho Jehova sekasusa tonkhe titsa takho* emhlabeni.” 16 Ngako Jonathani wenta sivumelwane nendlu yaDavide watsi: “Jehova utatijezisa titsa taDavide, futsi titawuphendvula kuye.” 17 Jonathani wabese ucela Davide kutsi aphindze afunge kutsi uyamtsandza, ngobe Jonathani abemtsandza njengobe abetitsandza yena.+
18 Ngemuva kwaloko Jonathani watsi kuye: “Kusasa ngumkhosi wekwetfwasa kwenyanga,+ futsi batakubuta ngobe kutawube kungakahlali muntfu esitulweni sakho. 19 Ngelilanga lelilandzela lakusasa, batawuchubeka babuta ngawe, ngako ubokuta kulendzawo lebewubhace kuyo ngalelalanga* futsi ume eceleni kwalelitje. 20 Ngitawubese ngidubula imicibisholo lemitsatfu eceleni kwalelitje kube shengatsi kukhona lengikudubulako. 21 Nangitfuma inceku yami ngitawutsi: ‘Hamba uyotsatsa lemicibisholo.’ Nangabe ngitsi kuyo: ‘Buka! Lemicibisholo iseceleni kwakho, hamba uyitsatse,’ ungabuya ngobe ngifunga Jehova Nkulunkulu lophilako kutsi konkhe kutawube kukuhambela kahle futsi kutawusho kutsi awukho engotini. 22 Kodvwa nangitawutsi kuyo: ‘Buka! Lemicibisholo ilengembili kwakho,’ ubohamba ngobe Jehova ufuna kutsi uhambe. 23 Njengobe tsine sobabili sente setsembiso,+ shengatsi Jehova angaba ngufakazi emkhatsini wami nawe kuze kube phakadze.”+
24 Ngako Davide wabhaca ngephandle kwelidolobha. Kwatsi nakucala umkhosi wekwetfwasa kwenyanga, inkhosi yahlala esihlalweni sayo kuze idle.+ 25 Inkhosi beyihleti esihlalweni sayo lebeyivame kuhlala kuso ngaselubondzeni. Jonathani abehleti abukene nayo, kantsi Abneri+ abehleti eceleni kwayo, kodvwa bekungakahlali muntfu esitulweni saDavide. 26 Sawula akashongo lutfo ngalelolanga ngobe bekatitjela atsi: ‘Mhlawumbe kukhona lokwentekile lokumente wangcola.+ Kungenteka vele ungcolile.’ 27 Ngelilanga lelilandzela lomkhosi wekwetfwasa kwenyanga, bekusolo kungakahlali muntfu esitulweni saDavide. Sawula wabese utsi kuJonathani indvodzana yakhe: “Kungani indvodzana yaJese+ ingaketi kulesidlo itolo nalamuhla?” 28 Jonathani waphendvula Sawula watsi: “Davide ucele kutsi ngimvumele aye eBhetlehema.+ 29 Utsite: ‘Ngicela ungivumele ngihambe ngobe umndeni wakitsi utawube wenta umhlatjelo edolobheni lakitsi futsi umnaketfu ucele kutsi ngibe khona. Ngako nangabe ungivumela, ngicela kuhamba ngiyobona bomnaketfu.’ Kungako-ke angaketi lapha kutewudla nenkhosi.” 30 Ngako Sawula wamtfukutselela Jonathani futsi watsi kuye: “Wena ndvodzana yemfati lolihlongandlebe, ucabanga kutsi angati yini kutsi ukhetse kusekela lendvodzana yaJese, kwaze kwaba lihlazo kuwe nakumake wakho?* 31 Nangabe nje lendvodzana yaJese isaphila emhlabeni, wena angeke ube yinkhosi futsi bukhosi bakho angeke bucine.+ Nyalo tfumela umuntfu kutsi ayilandze ngobe kufanele ife.”*+
32 Nobe kunjalo, Jonathani watsi kuSawula: “Kungani kufanele ibulawe?+ Yenteni?” 33 Nakeva loko, Sawula wajikijela Jonathani ngesikhali kuze amgwaze,+ ngako Jonathani wabona kutsi babe wakhe utimisele kubulala Davide.+ 34 Ngekushesha Jonathani wasukuma esitulweni sakhe atfukutsele abila, futsi akazange adle lutfo ngalelolanga ngobe abemvela buhlungu Davide+ nangekutsi babe wakhe umphatsa kabi.
35 Ngakusasa ekuseni Jonathani wahamba wayohlangana naDavide ngephandle kwelidolobha, futsi abehamba nenceku yakhe leseyincane.+ 36 Wase utsi kulenceku yakhe: “Ngicela ugijime ulandze lemicibisholo lengiyidubulako.” Lenceku yagijima, futsi Jonathani wajikijela lomcibisholo ngembili kwayo. 37 Ngesikhatsi lenceku yakhe ifika lapho bekajikijele lomcibisholo khona, Jonathani wamemeta watsi kuyo: “Lomcibisholo awukho lengembili kwakho yini?” 38 Jonathani wamemeta lenceku yakhe watsi: “Phutfuma! Gijima uyolandza lemicibisholo! Ungemi!” Lenceku yaJonathani yatsatsa lemicibisholo yabuya nayo kuye. 39 Lenceku beyingati lutfo ngaloko lobekwenteka; nguJonathani naDavide kuphela lebebati kutsi kusho kutsini. 40 Ngemuva kwaloko, Jonathani waniketa lenceku yakhe tikhali takhe watsi kuyo: “Hamba ubuyele nato edolobheni.”
41 Naseyihambile lenceku, Davide wachamuka endzaweni lesedvute lengaseningizimu. Wase uyaguca futsi wakhotsama katsatfu, bacabuzana futsi bakhala, kodvwa Davide wakhala kakhulu. 42 Jonathani watsi kuDavide: “Hamba ngekuthula, njengobe sente sifungo+ egameni laJehova satsi: ‘Shengatsi Jehova angaba semkhatsini wami nawe nasemkhatsini wentalelwane* yakho nentalelwane* yami kuze kube phakadze.’”+
Ngemuva kwaloko Davide wasukuma wahamba, naJonathani wabuyela edolobheni.