Incwadzi Yesibili YaSamuweli
1 Ngemuva kwekufa kwaSawula, ngesikhatsi Davide abuya kuyoncoba* ema-Amaleki, wahlala eSikilagi+ emalanga lamabili. 2 Ngelilanga lesitsatfu kwefika lijaha lebelisuka ebutfweni laSawula ligcoke timphahla letidzabukile futsi lingcolile enhloko. Latsi nalisondzela kuDavide, laguca futsi lakhotsama embikwakhe.
3 Davide walibuta watsi: “Ubuyaphi?” Lona latsi: “Ngiphunyule enkambu yema-Israyeli.” 4 Davide walibuta watsi: “Kwentekeni? Ngicela ungitjele.” Lona latsi: “Bantfu babalekile emphini futsi labanyenti bafile. Ngisho naSawula nendvodzana yakhe, Jonathani, bafile.”+ 5 Davide waphindze walibuta lelijaha lelite naletindzaba, watsi: “Wati ngani kutsi Sawula nendvodzana yakhe Jonathani bafile?” 6 Lelijaha latsi: “BengiseNtsabeni iGilbowa,+ futsi Sawula abesime esikhalini sakhe, tincola kanye nebagibeli bemahhashi besebamkhandzile.+ 7 Watsi nakagucuka wangibona, wase uyangibita, ngasabela ngatsi: ‘Ngilapha!’ 8 Wangibuta watsi: ‘Ungubani?’ Ngatsi: ‘Ngingum-Amaleki.’+ 9 Sawula wase utsi: ‘Ngicela usondzele lapha ungicedzele ngobe ngisetinhlungwini kodvwa solo angifi.’* 10 Ngisondzele kuye ngamcedzela,+ ngobe bengati kutsi abengeke asindze ngobe abesalele phansi futsi alimele kakhulu. Ngibese ngitsatsa umchele lobewusenhloko yakhe kanye nelibhengela lebelisesandleni sakhe ngakuletsa lapha kuwe nkhosi yami.”
11 Nakeva loko, Davide wabamba tembatfo takhe watidzabula, nalamadvodza labekanye nawo adzabula tembatfo tawo. 12 Base badzindza sililo futsi bazila kudla+ kwaze kwahlwa, ngenca yaSawula, nendvodzana yakhe Jonathani, nebantfu baJehova kanye nendlu yaka-Israyeli+ ngobe bebabulewe ngenkemba.
13 Davide wabuta lelijaha lelambikela lendzaba watsi: “Uvelaphi?” Lona latsi: “Ngiyindvodzana yem-Amaleki, umuntfu walesinye sive.” 14 Davide wase utsi kulo: “Wentiwe yini lokungesabi kubulala logcotjiwe waJehova?”+ 15 Davide wabese ubita lelinye lijaha watsi: “Sondzela umbulale.” Ngako lamgwaza wafa.+ 16 Davide wabese utsi kulelijaha lelingum-Amaleki: “Wena ngekwakho unelicala ngekufa kwakho* ngobe ngemlomo wakho utsite: ‘Mine ngimbulele logcotjiwe waJehova.’”+
17 Ngemuva kwaloko Davide wacamba nayi ingoma yesililo, alilela Sawula kanye nendvodzana yakhe Jonathani+ 18 waphindze watsi bantfu bakaJuda kufanele bafundziswe lengoma lebitwa ngekutsi “Butjoki,” lebhalwe encwadzini yaJashari:+
19 “Buhle bakho Israyeli bulele phansi, bufele etindzaweni takho letiphakeme.+
Aze alala emachawe!
20 Ungayitsi vu eGathi;+
Ungayimemeteli etitaladini tase-Ashkeloni,
Ngobe emadvodzakati emaFilisti atawujabula,
Nemadvodzakati ebantfu labangakasoki atawujabula kakhulu.
21 Nine tintsaba taseGilbowa,+
Shengatsi kungaba bete ematolo noma imvula kini,
Futsi emasimu enu angayikhiciti iminikelo lengcwele,+
Ngobe kuleyondzawo lihawu lemachawe lidzelelekile,
Lihawu laSawula alisagcotjwanga ngemafutsa.
22 Butjoki baJonathani nenkemba yaSawula kuyabulala,
Loku kwabulala emachawe lanemandla,+
Kwagcwala ingati yetitsa.+
23 BoSawula naJonathani+ bebatsandvwa futsi babalulekile* nabasaphila,
Abakehlukani ngisho nasekufeni.+
24 Awu madvodzakati aka-Israyeli, lilelani Sawula,
Lowanembatsisa ngalokubovu, wanembatsisa netimphahla telikhetselo,
Lowafaka imihlobiso yeligolide etimphahleni tenu.
25 Awu Israyeli, aze awa emachawe akho emphini!
Jonathani ufele etindzaweni takho letiphakeme!+
26 Ngibuhlungu ngawe mnaketfu Jonathani;
Bengikutsandza kakhulu.+
Indlela bewungitsandza ngayo yendlula lutsandvo lwalabasikati.+
27 Aze awa emachawe!
Netikhali temphi setishabalele!”