Tihlabelelo
INCWADZI YESIBILI
(Tihlabelelo 42-72)
Sicondziso lesiya kumcondzisi. Imaskili yemadvodzana aKhora.+
42 Njengenyamatane leyomele emanti,
Nami ngilangatelela wena Nkulunkulu.
2 Ngitawufika nini futsi ngibonakale embikwaNkulunkulu?
Awu Nkulunkulu, wena Nkulunkulu lophilako, ngiyalilangatelela lelolanga.+
3 Tinyembeti tami tikudla kwami busuku nemini;
Bantfu bangedzelela lilanga lonkhe, batsi: “Uphi loNkulunkulu wakho?”+
4 Inhlitiyo yami iva buhlungu lobukhulu* nangikhumbula emuva,
Ngobe ngake ngahamba nesicumbi lesikhulu sebantfu;
Bengivame kuhamba kancane embikwaso ngisihola nasiya endlini yaNkulunkulu,
Besimemeta sijabulile futsi sibonga,
Simemeta njengesicumbi lesigubha umkhosi.+
5 Kungani ngiphelelwe* litsemba?+
Ngentiwa yini kutsi ngikhatsateke kangaka?
Ngitawulindzela Nkulunkulu,+
Ngobe ngisetawuchubeka ngimdvumisa njengobe anguMsindzisi wami Lomkhulu.+
6 Sengiphelelwe litsemba Nkulunkulu wami.+
7 Emanti lashonako abitana odvwana
Nakuvakala umsindvo wemabhudlo akho.
Tinkinga setingengame njengemagagasi akho lanemandla.+
8 Emini Jehova utangentela umusa,*
Ngitawuhlabela ngaye ebusuku, ngithantaze kuNkulunkulu longiniketa kuphila.+
9 Ngitawutsi kuNkulunkulu lolidvwala lami:
“Ungikhohlwe leni?+
Kungani kufanele ngihambahambe ngidzabukile ngenca yekucindzetelwa sitsa sami?”+
10 Titsa tami tiyangedzelela ngenca yekutsi tiyangenyanya;*
Tingedzelela lilanga lonkhe, titsi: “Uphi loNkulunkulu wakho?”+
11 Kungani ngiphelelwe* litsemba?
Ngentiwa yini kutsi ngikhatsateke kangaka?