EKSODUSI
1 Ngesikhatsi Israyeli aya eGibhithe, emadvodzana akhe ahamba naye futsi nguleyo naleyo yahamba nemndeni wayo. Nankha emabito alamadvodzana aJakobe:+ 2 Rubeni, Simeyoni, Levi, naJuda;+ 3 Isakhari, Zebuloni, naBhenjamini; 4 Dani naNaftali; Gadi na-Asheri.+ 5 Sebabonkhe bantfu labavela kuJakobe* bebangu-70, kodvwa ngaleso sikhatsi Josefa abesavele aseGibhithe.+ 6 Ekugcineni Josefa wafa.+ Bonkhe bomnakabo kanye nabo bonkhe bantfu lebebaphila ngesikhatsi sakhe* nabo bafa. 7 Ema-Israyeli* aba nebantfwana futsi acala kwandza kakhulu. Achubeka aba manyenti futsi aba nemandla ngelizinga lelimangalisako, kangangekutsi agcwala kulo lonkhe live laseGibhithe.+
8 Ngekuhamba kwesikhatsi kwabusa lenye inkhosi eGibhithe, futsi yona beyingamati Josefa. 9 Lenkhosi yatsi kubantfu bayo: “Bukani! Lama-Israyeli semanyenti kakhulu futsi anemandla kunatsi.+ 10 Ngako kufanele siwahlakaniphele. Ngobe nasingenti njalo atawuchubeka andza, bese kutsi nakusuka imphi ahlangane netitsa tetfu, alwe natsi futsi ahambe kulelive.”
11 Ngako babeka tindvuna kutsi tigadze tigcili letingema-Israyeli, titinikete nemsebenti lomatima.+ Lama-Israyeli akha emadolobha ekugcina kudla nemphahla yaFaro. Emagama alamadolobha bekuyiPhithomu neRamsesi.+ 12 Kodvwa bebatsi nabawagcilata, ema-Israyeli andze kakhulu futsi agcwale eveni. Ngako bantfu baseGibhithe besaba kakhulu ngenca yalama-Israyeli.+ 13 Ngaleso sizatfu bawagcilata, bawasebentisa kamatima.+ 14 Benta kuphila kwawo kwaba matima, njengobe bebawabhucisa ludzaka, bawabhakisa titini futsi bawentisa nayo yonkhe inhlobo yemisebenti lematima esigangeni. Bawasebentisa kamatima, bawagcilata ngato tonkhe tindlela.+
15 Ngekuhamba kwesikhatsi inkhosi yaseGibhithe yakhuluma nebabelekisi labangemaHebheru, boShifra naPhuwa, 16 yatsi: “Nanibelekisa bafati labangemaHebheru+ kufanele nibuke kutsi lomake utfole mntfwana muni.* Nangabe kungumfana nibombulala kodvwa nakuyintfombatana, ningambulali.” 17 Kodvwa-ke lababelekisi bebamesaba Nkulunkulu weliciniso, ngako abazange bakwente loko lenkhosi yaseGibhithe lebeyibatjele kona. Esikhundleni saloko, bebangababulali labantfwana lababafana.+ 18 Inkhosi yaseGibhithe yabese ibita lababelekisi, yatsi kubo: “Kungani ningakababulali labantfwana lababafana?” 19 Lababelekisi batsi: “Labafati labangemaHebheru abafani nebafati bemaGibhithe. Bona baphilile futsi umbelekisi utsi nakefika akhandze sebavele babelekile.”
20 Ngako Nkulunkulu wabasekela lababelekisi, nema-Israyeli achubeka andza futsi aba nemandla kakhulu. 21 Ngesizatfu sekutsi lababelekisi bebamesaba Nkulunkulu weliciniso, nabo batitalela bantfwana. 22 Ekugcineni Faro watjela bonkhe bantfu bakhe watsi: “Tonkhe tinswane temaHebheru letibafana kufanele nitijike eMfuleni iNayili, kodvwa letingemantfombatana nitiyekele.”+
2 Ngaleso sikhatsi, lenye indvodza levela endlini yaLevi+ yatsatsa intfombi nayo levela kuleyondlu yayenta umfati. 2 Lomfati wakhulelwa futsi watala indvodzana. Nakabona kutsi loluswane luhle, walufihla tinyanga letintsatfu.+ 3 Ngesikhatsi abona kutsi akasakhoni kulufihla,+ watsatsa bhasikidi* lowentiwe ngephaphira,* wawuhuca ngelitiyela nangeludzaka, wase ufaka loluswane kuwo. Ngemuva kwaloko wafihla lobhasikidi emhlangeni loseceleni kweMfula iNayili. 4 Sisi+ waloluswane wema bucadlwana kuze abuke kutsi kutakwentekani kulo.
5 Ngesikhatsi indvodzakati yaFaro ifika itewugeza kuloMfula iNayili, tincekukati tayo betihambahamba eceleni kwalomfula. Yabona lobhasikidi losekhatsi emhlangeni, futsi ngekushesha yatfumela intfombatana lesigcili sayo kutsi iyewutsatsa lobhasikidi.+ 6 Yatsi nayiwuvula, yakhandza kuneluswane lolungumfana lukhala. Ngako yaluvela, kodvwa yatsi: “Lolu ngulolunye lwetinswane temaHebheru.” 7 Sisi waloluswane watsi kulendvodzakati yaFaro: “Ngingakulandzela yini make longumHebheru lotakumunyisela lomntfwana aphindze amnakekele?” 8 Lendvodzakati yaFaro yatsi: “Hamba umlandze!” Ngaso leso sikhatsi lentfombatana yalandza make waloluswane.+ 9 Lendvodzakati yaFaro yatsi kulomake: “Tsatsa lomntfwana ungimunyisele yena uphindze umnakekele, mine ngitakubhadala.” Ngako lomake walutsatsa loluswane walunakekela. 10 Lomntfwana watsi nasakhulile, lomake longumHebheru wammikisa kulendvodzakati yaFaro, yase imtsatsa njengendvodzana yayo.+ Yametsa libito yatsi nguMosi,* ngobe beyitsi: “Kungenca yekutsi ngamkhipha emantini.”+
11 Ngesikhatsi Mosi sekamdzala,* wahamba wayovakashela bantfu bakubo kuze atibonele indlela lebebagcilatwa ngayo.+ Nakefika lapho wabona umGibhithe ashaya umuntfu wakubo longumHebheru. 12 Ngako wacalata, futsi nakabona kutsi kute umuntfu lombonako, wabulala lomGibhithe wase umfihla esihlabatsini.+
13 Nangelilanga lelilandzelako waphindze wabavakashela bantfu bakubo. Nakefika wakhandza emadvodza lamabili langemaHebheru alwa. Ngako watsi kulona lowonile: “Umshayelani umuntfu wakini?”+ 14 Lendvodza yatsi kuye: “Ngubani lokubeke kutsi ube yinkhosi nemehluleli wetfu? Nami sewufuna kungibulala njengalomGibhithe lombulele?”+ Mosi wesaba kakhulu futsi wacabanga watsi: “Vele kusho kutsi bantfu sebayayati lendzaba!”
15 Faro weva ngalendzaba wase wetama kubulala Mosi, kodvwa Mosi wambalekela waya eveni lakaMidiyani+ wayewuhlala khona. Watsi nakefika kulelo live, waphumula ngasemtfonjeni. 16 Umphristi wakaMidiyani+ abenemadvodzakati langu-7. Lamadvodzakati akhe eta kulomtfombo atewukha emanti, awagcwalise lakunatsela khona* tilwane futsi anatsise imfuyo yababe wawo. 17 Njengenhlalayenta, kwefika belusi bawacosha lamadvodzakati alomphristi kanye nalemihlambi yawo. Nakabona loku, Mosi wawasita* waphindze wanatsisa lemihlambi. 18 Nakefika ekhaya, babe wawo Rehuweli*+ wawabuta watsi: “Kwentiwe yini kutsi lamuhla nisheshe nibuye?” 19 Amphendvula atsi: “Lenye indvodza lengumGibhithe+ isivikele kubelusi, yaphindze yakha emanti yanatsisa imihlambi yetfu.” 20 Yena watsi kuwo: “Iphi pho lendvodza? Niyishiyeleni? Hambani niyoyilandza itewudla natsi.” 21 Ngemuva kwaloko, Mosi wavuma kuhlala naRehuweli, futsi Rehuweli wamnika Siphora+ indvodzakati yakhe kutsi abe ngumfati wakhe. 22 Ngekuhamba kwesikhatsi Siphora watala indvodzana. Mosi wayibita ngekutsi nguGeshomu*+ ngobe bekatsi: “Ngisihambi kulelive.”+
23 Ngemuva kwesikhatsi,* inkhosi yaseGibhithe yafa.+ Ema-Israyeli achubeka aphila kabuhlungu, akhala ngenca yekugcilatwa, futsi achubeka akhala kuNkulunkulu weliciniso kutsi awasite.+ 24 Ngekuhamba kwesikhatsi, Nkulunkulu wakuva kukhala kwawo,+ wasikhumbula nesivumelwane lasenta na-Abrahama, Isaka naJakobe.+ 25 Ngako Nkulunkulu wawanaka ema-Israyeli futsi wakubona nekuhlupheka kwawo.
3 Mosi waba ngumelusi wetimvu tababetala wakhe Jethro,+ umphristi wakaMidiyani. Ngalelinye lilanga ngesikhatsi atiyisa ngasenshonalanga yasehlane, wahamba waze wefika eHorebe,+ entsabeni yaNkulunkulu weliciniso. 2 Ngemuva kwaloko ingilosi yaJehova yabonakala kuye elangabini lemlilo lebelivutsa esihlahleni semanyeva.+ Nakachubeka abuka, wabona kutsi lesihlahla besivutsa kodvwa singashi. 3 Ngako Mosi watsi: “Asengiyewubuka lesimanga, kute ngibone kutsi kungani lesihlahla singashi.” 4 Ngesikhatsi Jehova abona kutsi Mosi sewuya kulesihlahla, wammemeta akulesihlahla watsi: “Mosi! Mosi!” Yena watsi: “Yebo Nkhosi.” 5 Nkulunkulu wabese utsi: “Ungasasondzeli. Khumula tincabule takho ngobe lendzawo lome kuyo ingcwele.”
6 Waphindze watsi: “Mine nginguNkulunkulu wababe wakho, Nkulunkulu wa-Abrahama,+ wa-Isaka+ newaJakobe.”+ Ngemuva kwaloko Mosi wambonya buso bakhe, ngobe bekesaba kubuka Nkulunkulu weliciniso. 7 Jehova wachubeka watsi: “Ngikubonile kuhlupheka kwebantfu bami eGibhithe, futsi ngikuvile kukhala kwabo ngenca yendlela labagcilatwa ngayo. Ngako ngibati kahle buhlungu labakubo.+ 8 Ngitakuya kubo kuze ngibakhulule kulabantfu baseGibhithe,+ ngibakhiphe kulelo live futsi ngibayise eveni lelihle nalelikhulu, live leligeleta lubisi neluju,+ lokulive lemaKhenani, lemaHethi, lema-Amori, lemaPheresi, lemaHivi nelemaJebhusi.+ 9 Ngikuvile kukhala kwebantfu baka-Israyeli, ngayibona nendlela bantfu baseGibhithe lababagcilata ngayo.+ 10 Manje-ke ngitakutfuma kuFaro, futsi ubakhiphe eGibhithe+ bantfu bami, ema-Israyeli.”
11 Kodvwa Mosi watsi kuNkulunkulu weliciniso: “Ngingubani nje mine kutsi ngingaya kuFaro, ngikhulule nema-Israyeli eGibhithe?” 12 Ngako Nkulunkulu watsi: “Ngitawuba nawe,+ futsi naku lotawubona ngako kutsi ngimi lokutfumile: Nasewubakhiphile labantfu eGibhithe, nitawubuya ningikhonte kulentsaba,+ mine Nkulunkulu weliciniso.”
13 Mosi watsi kuNkulunkulu weliciniso: “Asesitsi nangiya kuma-Israyeli ngifike ngitsi: ‘Nkulunkulu wabokhokho benu ungitfume kini,’ wona bese atsi: ‘Ngubani libito lakhe?’+ Kufanele ngitsini-ke kuwo?” 14 Nkulunkulu watsi kuye: “Ngitawuba Nguloko Lengifuna Kuba Ngiko.”*+ Wachubeka watsi: “Naku lokufanele ukusho kuma-Israyeli: ‘Loyo lonelibito lelisho kutsi: “Ngitawuba Nguloko Lengifuna Kuba Ngiko,” ungitfume kini.’”+ 15 Nkulunkulu waphindze watsi kuMosi:
“Naku lokufanele ukusho kuma-Israyeli: ‘Jehova, Nkulunkulu wabokhokho benu, Nkulunkulu wa-Abrahama,+ wa-Isaka+ newaJakobe+ ungitfume kini.’ Leli libito lami kuze kube phakadze+ futsi ngitawukhunjulwa ngalo kuto tonkhe titukulwane. 16 Ngako-ke hamba ubite emadvodza lamadzala aka-Israyeli, utsi kuwo: ‘Jehova, Nkulunkulu wabokhokho benu, Nkulunkulu wa-Abrahama, wa-Isaka newaJakobe ubonakele kimi, watsi: “Ngininakile+ futsi ngakubona loko lokwentiwa kini eGibhithe. 17 Ngako ngincume kunikhulula ekuhluphekeni+ lenikubangelwa bantfu baseGibhithe, nginiyise eveni lemaKhenani, lemaHethi, lema-Amori,+ lemaPheresi, lemaHivi nelemaJebhusi,+ lokulive leligeleta lubisi neluju.”’+
18 “Nakanjani batalilalela livi lakho,+ futsi wena nemadvodza lamadzala aka-Israyeli nibokuya enkhosini yaseGibhithe, nifike nitsi kuyo: ‘Jehova Nkulunkulu wemaHebheru+ ukhulume natsi. Ngako sicela kutsatsa luhambo lwemalanga lamatsatfu siye ehlane kuze sentele Jehova Nkulunkulu wetfu umhlatjelo.’+ 19 Kodvwa-ke ngati kahle kutsi inkhosi yaseGibhithe angeke inivumele kutsi nihambe, ngaphandle nakungaba khona lokungayicindzetela kutsi yente njalo.+ 20 Ngako ngitawelula sandla sami ngishaye iGibhithe ngato tonkhe tintfo letimangalisako lengitawutenta kuyo, ngemuva kwaloko lenkhosi itanivumela kutsi nihambe.+ 21 Ngitakwenta kutsi bantfu bami batfole umusa kubantfu baseGibhithe, futsi nasenihamba angeke niphume nilengisa tandla.+ 22 Nguloyo naloyo mfati kufanele acele tintfo telisiliva neteligolide kanye netimphahla kumakhelwane wakhe nakulomunye umfati lohlala endlini yakhe. Letintfo nitatinika emadvodzana nemadvodzakati enu, futsi nitawutitsatsa tonkhe tintfo tebantfu baseGibhithe.”+
4 Kodvwa Mosi waphendvula watsi: “Asengitsi abangikholwa futsi abalilaleli livi lami,+ esikhundleni saloko batsi: ‘Jehova akakabonakali kuwe.’” 2 Jehova wase utsi kuye: “Yini loloyiphetse esandleni sakho?” Yena watsi: “Yindvuku.” 3 Nkulunkulu watsi: “Yijike phansi.” Ngako Mosi wayijika phansi, yagucuka yaba yinyoka+ futsi wayibalekela. 4 Jehova wase utsi kuMosi: “Yelula sandla sakho uyibambe ngemsila.” Mosi waselula wayibamba, yase ibuyela iba yindvuku. 5 Nkulunkulu wase utsi: “Loku utawukwenta kuze bakholwe kutsi Jehova Nkulunkulu wabokhokho babo, Nkulunkulu wa-Abrahama, wa-Isaka newaJakobe+ ubonakele kuwe.”+
6 Jehova waphindze watsi kuye: “Ngicela ufake sandla sakho engutjeni yakho ngasesifubeni.” Ngako wasifaka, watsi nakasikhipha saphuma sesimhlophe njengelichwa, sinebulephelo.+ 7 Wase utsi: “Phindze ufake lesandla engutjeni yakho.” Ngako Mosi wasifaka, watsi nakasikhipha saphuma sesiphilile, sesifana nayo yonkhe inyama yakhe. 8 Nkulunkulu watsi: “Nangabe bangeke bakukholwe nobe bakunake nawenta lesimangaliso sekucala, nakanjani batakunaka nasewenta lesesibili.+ 9 Nangabe-ke bangatikholwa letimangaliso letimbili, bangafuni nekulilalela livi lakho, utawukha emanti eMfuleni iNayili uwatsele emhlabatsini lowomile, futsi atawugucuka abe yingati lapho emhlabatsini.”+
10 Mosi wase utsi kuJehova: “Ngiyacolisa Jehova, kusukela kadzeni mine angikaze ngibe sikhulumi lesihle, futsi bekusolo kunjalo kusukela wacala kukhuluma nenceku yakho. Ngiyanensa nangikhuluma futsi ngiyanamula.”+ 11 Jehova watsi kuye: “Ngubani lowanika umuntfu umlomo nobe lonemandla ekwenta umuntfu abe simungulu, angeva etindlebeni, abone kahle nobe abe yimphumphutse? Akusimi yini, mine Jehova? 12 Ngako-ke hamba, futsi mine ngitakusita nasewukhuluma,* ngitakufundzisa loko lokufanele ukusho.”+ 13 Kodvwa yena watsi: “Ngiyacolisa Jehova, ngicela umane utfume nobe ngabe ngubani lomunye lofuna kumtfuma.” 14 Ngako intfukutselo yaJehova yamvutsela Mosi, wase utsi kuye: “Ucabangani ngemnakenu Aroni,+ umLevi? Ngiyati kutsi yena ukhuluma kahle. Nyalo usendleleni uta kuwe, futsi nakakubona utawujabula kakhulu.+ 15 Kufanele ukhulume naye, umtjele loko lengikushito.+ Mine ngitanisita nanikhuluma,+ futsi ngitanifundzisa loko lokufanele nikwente. 16 Yena utawuba ngumkhulumeli wakho, akukhulumele kulabantfu, wena ube njengaNkulunkulu kuye.*+ 17 Ubophatsa lendvuku lesesandleni sakho, ngobe utakwenta ngayo timangaliso.”+
18 Ngako Mosi wabuyela kubabetala wakhe+ Jethro, wafike watsi: “Ngicela kuhamba ngibuyele kubantfu bakitsi eGibhithe ngiyobahlola kutsi basaphila yini.” Jethro watsi kuMosi: “Kulungile, hamba ngekuthula.” 19 Ngemuva kwaloko Jehova wakhuluma naMosi ngesikhatsi akaMidiyani, watsi: “Hamba ubuyele eGibhithe, ngobe bonkhe labantfu lebebafuna kukubulala sebafile.”+
20 Mosi wase utsatsa umfati wakhe kanye nemadvodzana akhe wabagibelisa embongolweni, ngemuva kwaloko besuka babuyela eGibhithe. Watsatsa nalendvuku Nkulunkulu weliciniso labetsite ayiphatse. 21 Jehova wase utsi kuMosi: “Nasewufikile eGibhithe, ubociniseka kutsi utenta tonkhe letimangaliso lengikunikete emandla ekutenta embikwaFaro.+ Kodvwa ngitawuvumela inhlitiyo yaFaro ibe lukhuni,+ futsi angeke abakhulule labantfu kutsi bahambe.+ 22 Naku lokufanele ukusho kuFaro: ‘Jehova utsi: “Israyeli uyindvodzana yami, umntfwana wami wekucala.+ 23 Ngako ngitsi kuwe, khulula lendvodzana yami kuze itengikhonta. Kodvwa nangabe ungayikhululi, ngitawubulala indvodzana yakho yekucala.”’”+
24 Batsi nasebasendleleni, endzaweni yekuphumula, Jehova+ wefika kuye futsi abefuna kumbulala.*+ 25 Ekugcineni Siphora+ watsatsa litje lelikhaliphile* wasoka indvodzana yakhe, wawisela lelijwabu etinyaweni tayo, wase utsi: “Kungobe ungumyeni wengati kimi.” 26 Ngako-ke Nkulunkulu wamyekela wahamba. Ngaleso sikhatsi Siphora watsi: “Ungumyeni wengati,” futsi loku wakusho ngenca yalokusoka.
27 Jehova wase utsi ku-Aroni: “Hamba uye ehlane uyohlangabeta Mosi.”+ Ngako Aroni wahamba futsi wahlangana naMosi entsabeni yaNkulunkulu weliciniso,+ wambingelela ngekumcabuza. 28 Mosi wase utjela Aroni onkhe emavi Jehova labewashito kuye njengobe abemtfumile,+ wamtjela nangato tonkhe timangaliso Nkulunkulu labetsite atente.+ 29 Ngemuva kwaloko boMosi na-Aroni babita onkhe emadvodza lamadzala langema-Israyeli.+ 30 Aroni watjela lamadvodza onkhe emavi Jehova labewakhulume kuMosi, futsi Mosi waphindze wenta netimangaliso+ embikwalabantfu. 31 Ngako labantfu bamkholwa+ Mosi. Batsi nabeva kutsi Jehova ubanakile+ futsi ukubonile kuhlupheka kwabo,+ baguca bakhotsama.
5 Ngemuva kwaloko boMosi na-Aroni baya kuFaro, bafike batsi: “Naku Jehova Nkulunkulu wema-Israyeli lakushoko: ‘Khulula bantfu bami kuze bayongentela umkhosi ehlane.’” 2 Kodvwa Faro watsi: “Ungubani Jehova+ kutsi ngingamlalela, ngikhulule ema-Israyeli?+ Angimati nekumati loJehova futsi nje angeke ngize ngiwavumele ema-Israyeli kutsi ahambe.”+ 3 Bona batsi: “Nkulunkulu wemaHebheru ukhulume natsi. Ngako sicela kutsi umane usivumele sitsatse luhambo lwemalanga lamatsatfu, siye ehlane futsi sentele Jehova Nkulunkulu+ wetfu umhlatjelo, ngobe nasingakwenti loko utawusishaya ngesifo nobe asibulale ngenkemba.” 4 Inkhosi yaseGibhithe yatsi kubo: “YeMosi nawe Aroni, kungani nifuna kuyekelisa labantfu imisebenti yabo? Asenibuyele emisebentini yenu!”+ 5 Faro wachubeka watsi: “Asenibuke nje kutsi labantfu banyenti kangakanani, kodvwa nine senifuna kubayekelisa imisebenti yabo.”
6 Ngalelolanga Faro watjela emadvodza labecondzisa umsebenti kanye netindvuna tawo watsi: 7 “Ningasabaniki labantfu tinhlanga tekubhaka titini.+ Kepha abahambe batifunele bona. 8 Kodvwa linani letitini lokufanele batibhake ngelilanga kufanele lingashintji, kufanele lilingane nalelo lebebasolo balibhaka. Ningalinciphisi, ngobe labantfu bayavilapha. Kungako nje balibele kutsi: ‘Sifuna kuhamba, sifuna kuyowentela Nkulunkulu wetfu umhlatjelo!’ 9 Bangeteleni umsebenti futsi bahlale basebenta kuze bangawalaleli lamanga.”
10 Ngako lamadvodza labecondzisa umsebenti+ kanye netindvuna tawo aya kulabantfu, atsi: “Naku Faro lakushoko: ‘Angeke ngisaninika tinhlanga. 11 Ngako-ke hambani niyotifunela tinhlanga nobe ngukuphi lapho ningatitfola khona, kodvwa imisebenti yenu angeke ize incishiswe.’” 12 Labantfu basakateka kuyo yonkhe iGibhithe bafuna tinhlanga. 13 Lamadvodza labecondzisa umsebenti abesolo atsi kubo: “Nguloyo naloyo kufanele awucedze umsebenti lanikwe wona lilanga nelilanga, njengobe nje benenta ngesikhatsi nisaniketwa tinhlanga.” 14 Abeshaya+ naletindvuna tema-Israyeli lebetibekwe ngulabacondzisi bemsebenti kutsi tibuke lama-Israyeli. Abetibuta atsi: “Anikabhaki ngani linani letitini lenikalelwe kutsi nilibhake ngelilanga, linani lebenivame kulenta? Nayitolo anikalihlanganisi, nalamuhla nehlulekile.”
15 Ngako letindvuna tema-Israyeli taya kuFaro takhala tatsi: “Utiphatselani ngalendlela tinceku takho? 16 Asisanikwa netinhlanga, kodvwa solo kutsiwa: ‘Bhakani titini!’ Bayasishaya nekusishaya, kube kubantfu bakho labaneliphutsa.” 17 Faro watsi: “Niyavilapha, anifuni kusebenta!+ Kungako nje nitsi: ‘Sifuna kuhamba, sifuna kuyowentela Jehova umhlatjelo.’+ 18 Sukani lapha, buyelani emsebentini! Angeke ninikwe tinhlanga, kodvwa linani letitini lokufanele nilibhake kufanele nilihlanganise njengakucala.”
19 Ngako letindvuna tema-Israyeli tabona kutsi tisenkingeni lenkhulu ngobe bekutsiwe: “Ningacali nilinciphise linani letitini lokufanele nilibhake ngelilanga.” 20 Ngemuva kwaloko letindvuna tatsi natiphuma kuFaro tahlangana naboMosi na-Aroni, njengobe bebasolo bamele tona. 21 Tatsi kubo: “Shengatsi Jehova anganibona aphindze anehlulele, ngobe nente kutsi Faro netinceku takhe basenyanye kakhulu* futsi nyalo batasibulala.”+ 22 Mosi wabese ukhuluma naJehova, watsi: “Jehova, ubaviseleni buhlungu labantfu? Vele ungitfumeleni? 23 Kusukela ngesikhatsi lengiye ngaso enkhosini ngiyoba ngumkhulumeli wakho,+ yona ibese ibaphatsa kabi kakhulu labantfu,+ kodvwa solo awubakhululi.”+
6 Ngako Jehova watsi kuMosi: “Nyalo utawubona kutsi ngitamentani Faro.+ Sandla lesinemandla sitawumphocelela kutsi anikhulule, futsi ngenca yesandla lesinemandla utawuphoceleleka nekutsi anikhiphe kulelive lakhe.”+
2 Nkulunkulu wabese utsi kuMosi: “NginguJehova. 3 Bengivame kubonakala ku-Abrahama, ku-Isaka nakuJakobe, nginguNkulunkulu Somandla,+ kodvwa angizange ngibachazele+ ngelibito lami lelitsi Jehova.+ 4 Ngaphindze ngenta nesivumelwane nabo sekutsi ngitabanika live laseKhenani, lokulive lebebahlala kulo njengetihambi.+ 5 Nyalo sengikuvile kukhala kwebantfu baka-Israyeli labagcilatwa bantfu baseGibhithe, futsi ngiyasikhumbula nesivumelwane lengasenta.+
6 “Ngako-ke, naku lokufanele ukutjele ema-Israyeli: ‘NginguJehova, futsi ngitanikhulula ekugcilatweni bantfu baseGibhithe,+ nginikhulule nasemisebentini lematima labanentisa yona. Ngitakwelula sandla sami, ngibajezise futsi nginisindzise kubo.+ 7 Ngitawunitsatsa nibe bantfu bami, mine ngibe nguNkulunkulu wenu.+ Nakanjani nitawukwati kutsi nginguJehova, Nkulunkulu wenu, loyo lonikhulula ekugcilatweni eGibhithe. 8 Ngitaningenisa eveni lengafunga* kutsi ngitalinika Abrahama, Isaka, naJakobe. Lelive ngitaninika lona kutsi libe ngelenu.+ NginguJehova.’”+
9 Ngemuva kwaloko, Mosi watjela ema-Israyeli ngaloku, kodvwa awazange amlalele ngobe abedvumatekile futsi agcilatwa kabuhlungu.+
10 Jehova wase utsi kuMosi: 11 “Hamba uyotjela Faro, inkhosi yaseGibhithe kutsi akhulule ema-Israyeli kulelive lakhe.” 12 Kodvwa Mosi watsi kuJehova: “Ema-Israyeli akakangilaleli,+ pho Faro utangilalela njani-ke njengobe ngingakwati nekukhuluma kahle?”*+ 13 Jehova waphindze waniketa Mosi na-Aroni imiyalo lebeyimayelana nekukhishwa kwema-Israyeli eGibhithe. Lemiyalo bekufanele bayitjele ema-Israyeli kanye naFaro, inkhosi yaseGibhithe.
14 Leti tinhloko temindeni yabokhokho bawo: Emadvodzana aRubeni, indvodzana yekucala+ ya-Israyeli, bekunguHanoki, Phalu, Hesroni naKhami.+ Lena yimindeni yaRubeni.
15 Emadvodzana aSimeyoni bekunguJemuweli, Jamini, Ohade, Jakhini, Zohari naShawula, indvodzana layitalelwa ngumfati longumKhenani.+ Lena yimindeni yaSimeyoni.
16 Nankha emabito emadvodzana aLevi+ ngetitukulwane tawo: Geshoni, Khohati kanye naMerari.+ Levi waphila iminyaka lengu-137.
17 Emadvodzana aGeshoni bekunguLibni naShimeyi, futsi abekwe ngemindeni yawo.+
18 Emadvodzana aKhohati bekungu-Amramu, Jisihari, Hebroni na-Uziyeli.+ Khohati waphila iminyaka lengu-133.
19 Emadvodzana aMerari bekunguMahali naMushi.
Lena yimindeni yemaLevi futsi ibekwe ngetitukulwane tayo.+
20 Amramu watsatsa Jokhebedi, anti wakhe, wamenta umfati wakhe.+ Jokhebedi wamtalela Aroni naMosi.+ Amramu waphila iminyaka lengu-137.
21 Emadvodzana aJisihari bekunguKhora,+ Nefegi naZikhri.
22 Emadvodzana a-Uziyeli bekunguMishayeli, Elisafani+ naSithri.
23 Aroni watsatsa Elisheba, indvodzakati ya-Aminadabi, longudzadzewabo Nasoni,+ waba ngumfati wakhe. Elisheba wamtalela Nadabi, Abihu, Eliyezeri na-Ithamari.+
24 Emadvodzana aKhora bekungu-Asiri, Elkhana na-Abiyasafa.+ Lena yimindeni levela kuKhora.+
25 Eliyezeri,+ indvodzana ya-Aroni, watsatsa lenye yemadvodzakati aPhutiyeli wayenta umfati. Yamtalela Finehasi.+
Nguleto-ke tinhloko tetindlu temaLevi, ngemindeni yato.+
26 Laba bo-Aroni naMosi, Jehova latsi kubo: “Khiphani bantfu baka-Israyeli eveni laseGibhithe ngemacembu abo.”*+ 27 BoMosi na-Aroni+ ngibo labakhuluma naFaro, inkhosi yaseGibhithe kutsi akhulule ema-Israyeli kulelo live.
28 Ngelilanga Jehova lakhuluma ngalo naMosi eveni laseGibhithe, 29 Jehova watsi kuye: “NginguJehova. Hamba uyotjela Faro, inkhosi yaseGibhithe onkhe lamavi lengikutjela wona.” 30 Mosi wabese utsi kuJehova: “Mine angikwati nekukhuluma kahle,* ngako-ke Faro utangilalela njani?”+
7 Jehova wabese utsi kuMosi: “Ngikwente waba njengaNkulunkulu* kuFaro, Aroni umnakenu yena utawuba ngumphrofethi wakho.+ 2 Kufanele uchazele Aroni umnakenu konkhe lengitakutjela kona, bese yena ukhuluma naFaro. Ekugcineni Faro utawakhipha ema-Israyeli eveni lakhe. 3 Mine ngitawuvumela inhlitiyo yaFaro kutsi ibe lukhuni,+ ngente tibonakaliso netimangaliso letinyenti eveni laseGibhithe.+ 4 Kodvwa Faro ngeke anilalele. Ngako ngitawushaya iGibhithe ngesandla sami, futsi emabutfo ami, lokubantfu bami ema-Israyeli ngitawakhipha eGibhithe, yona ngiyijezise kakhulu.+ 5 Nangelula sandla sami ngishaya iGibhithe, ngiphindze ngikhulula ema-Israyeli, bantfu baseGibhithe batawukwati kutsi mine nginguJehova.”+ 6 BoMosi na-Aroni bakwenta loko Jehova labebatjele kona; bakwenta konkhe njengobe abeshito. 7 Ngesikhatsi bakhuluma naFaro,+ Mosi abeneminyaka lengu-80 budzala, Aroni yena aneminyaka lengu-83.
8 Jehova wabese utsi kuMosi na-Aroni: 9 “Nangabe Faro atsi kini: ‘Yentani simangaliso,’ ubotjela Aroni utsi: ‘Tsatsa lendvuku yakho uyijike phansi embikwaFaro.’ Yona itawugucuka ibe yinyoka lenkhulu.”+ 10 Ngako boMosi na-Aroni baya kuFaro bafike benta njengobe nje Jehova abebatjelile. Aroni wajika indvuku yakhe phansi embikwaFaro netinceku takhe, yona yagucuka yaba yinyoka lenkhulu. 11 Kodvwa Faro wabita emadvodza lahlakaniphile netangoma, nebaphristi baseGibhithe+ labenta imilingo futsi nabo benta lokufanako ngemilingo yabo.+ 12 Nguloyo naloyo wajika indvuku yakhe phansi, tonkhe tagucuka taba tinyoka letinkhulu. Kodvwa indvuku ya-Aroni yamita letindvuku tabo. 13 Nobe kunjalo, inhlitiyo yaFaro yachubeka yaba lukhuni.+ Akazange abalalele boMosi na-Aroni, njengobe nje Jehova abeshito.
14 Ngemuva kwaloko Jehova watsi kuMosi: “Inhlitiyo yaFaro ilukhuni.+ Walile kukhulula bantfu bami. 15 Ubokuya kuFaro ekuseni, njengobe atawube aya emfuleni. Ubofike ume ngaseceleni kweMfula iNayili kuze akukhandze khona, futsi uphatse lendvuku legucuke yaba yinyoka.+ 16 Ubotsi kuye: ‘Jehova Nkulunkulu wemaHebheru ungitfume kuwe,+ watsi: “Khulula bantfu bami kuze bayewungikhonta ehlane,” kodvwa kuze kube ngunyalo solo awubakhululi. 17 Naku Jehova lakushoko: “Utawukwati ngaloku kutsi nginguJehova.+ Ngitawushaya emanti eMfula iNayili ngalendvuku, agucuke abe yingati. 18 Tinhlanti letiseMfuleni iNayili titawufa, nalomfula utawunuka. Bantfu baseGibhithe ngeke bakhone kuwanatsa lamanti awo.”’”
19 Jehova wabese utsi kuMosi: “Tjela Aroni utsi: ‘Tsatsa lendvuku yakho, welulele sandla sakho ngetulu kwemanti aseGibhithe,+ etikwemifula yakhona, imisele,* ematete,+ nasetikwawo onkhe emadamu akhona, kuze lamanti agucuke abe yingati.’ Kutawuba nengati kulo lonkhe live laseGibhithe, ngisho nasetintfweni tekuphatsa emanti letentiwe ngelugodvo nangematje.” 20 Ngekushesha boMosi na-Aroni benta njengobe nje Jehova abatjelile. Aroni waphakamisa lendvuku, washaya emanti eMfula iNayili embikwaFaro netinceku takhe, futsi onkhe lamanti agucuka aba yingati.+ 21 Tinhlanti lebetikuloMfula iNayili tafa,+ lomfula wabese uyanuka, nebantfu baseGibhithe bebangasakhoni kunatsa emanti awo.+ Kwaba nengati kulo lonkhe live laseGibhithe.
22 Kodvwa baphristi baseGibhithe labenta imilingo nabo benta lokufanako ngemilingo yabo,+ ngako inhlitiyo yaFaro yachubeka yaba lukhuni futsi akazange abalalele boMosi na-Aroni, njengobe nje Jehova abekhulumile.+ 23 Ngemuva kwaloko Faro wabuyela endlini yakhe, naloku lebekwentekile akazange akunake. 24 Bonkhe bantfu baseGibhithe bagubha kuto tonkhe tindzawo ngaseMfuleni iNayili kuze batfole emanti ekunatsa, ngobe bebangakhoni kuwanatsa emanti awo. 25 Kwendlula emalanga langu-7 kusukela Jehova ashaye uMfula iNayili.
8 Jehova wabese utsi kuMosi: “Yani kuFaro ufike utsi: ‘Naku Jehova lakushoko: “Khulula bantfu bami kuze bayongikhonta.+ 2 Nangabe uchubeka wala kubakhulula, ngitawushaya lelive lakho ngeticoco.+ 3 UMfula iNayili utawugcwala ticoco, futsi titawuphuma tigcwale endlini yakho, ekamelweni lakho lekulala, embhedzeni wakho, etindlini tetinceku takho, kubantfu bakho, kubohhavini bakho, nasetitjeni takho tekwentela inhlama.*+ 4 Leticoco titawugcwala kuwe, kubantfu bakho nakuto tonkhe tinceku takho.”’”
5 Ngekuhamba kwesikhatsi Jehova watsi kuMosi: “Tjela Aroni utsi: ‘Yelula sandla sakho uphakamisele indvuku yakho etikwemifula, etikwemisele yeNayili, nasetikwematete, wente kutsi kuphume ticoco tigcwale kulelive laseGibhithe.’” 6 Aroni welulela sandla sakhe etikwemanti aseGibhithe, kwaphuma ticoco tagcwala kulelive. 7 Baphristi labenta imilingo benta intfo lefanako ngemilingo yabo, nabo benta kutsi ticoco tigcwale kulelive laseGibhithe.+ 8 Faro wabese ubita Mosi na-Aroni, watsi kubo: “Ncengani Jehova kutsi asuse leticoco kimi nakubantfu bami,+ ngobe sengifuna kukhulula labantfu benu kute bayokwentela Jehova umhlatjelo.” 9 Mosi watsi kuFaro: “Ngicela kube nguwe longitjelako kutsi ngimncenge nini Nkulunkulu kutsi asuse leticoco kuwe, etincekwini takho, kubantfu bakho nasetindlini takho. Leticoco titawusala eMfuleni iNayili kuphela.” 10 Ngako Faro watsi: “Kusasa loku lokusako.” Mosi watsi: “Ngitawukwenta njengobe usho, kuze wati kutsi kute lomunye umuntfu lonjengaJehova, Nkulunkulu wetfu.+ 11 Leticoco titawusuka kuwe, etindlini takho, etincekwini takho nakubantfu bakho. Titawusala eMfuleni iNayili kuphela.”+
12 Ngako boMosi na-Aroni besuka kuFaro, futsi Mosi wancenga Jehova kutsi asuse leticoco lebekatiletse kuFaro.+ 13 Jehova wakwenta loko Mosi labekucela. Leticoco lebetisetindlini, emabaleni kanye nasetigangeni, tabese tiyafa. 14 Bantfu baseGibhithe batibutsisa ndzawonye taba ticumbi letinyenti kakhulu, futsi lelive lacala kunuka. 15 Ngesikhatsi Faro abona kutsi leticoco atisekho, wenta inhlitiyo yakhe yaba lukhuni+ futsi wangabalaleli boMosi na-Aroni, njengobe nje Jehova abeshito.
16 Jehova wabese utsi kuMosi: “Ubotjela Aroni utsi: ‘Tsatsa lendvuku yakho ushaye umhlabatsi futsi lolutfuli lwawo lutawuba timbuzulwane* kulo lonkhe live laseGibhithe.’” 17 BoMosi na-Aroni bakwenta loko. Aroni waphakamisa indvuku yakhe washaya umhlabatsi futsi timbuzulwane tagcwala kubantfu nasetilwaneni. Lonkhe lutfuli lwagucuka lwaba timbuzulwane futsi tagcwala yonkhe iGibhithe.+ 18 Baphristi labenta imilingo nabo betama kukwenta loku ngemilingo yabo,+ kodvwa behluleka. Ngako letimbuzulwane tagcwala kubantfu nasetilwaneni. 19 Labaphristi labenta imilingo batsi kuFaro: “Ngemandla aNkulunkulu*+ lente loku!” Kodvwa inhlitiyo yaFaro yachubeka ilukhuni futsi akazange abalalele boMosi na-Aroni, njengobe nje Jehova abekhulumile.
20 Ngemuva kwaloko Jehova watsi kuMosi: “Ekuseni kakhulu, Faro nakaya emfuleni, uboya kuye ufike utsi: ‘Naku Jehova lakushoko: “Khulula bantfu bami kuze bayongikhonta. 21 Kodvwa nawungabakhululi, ngitawutfumela tibawu* kuwe, etincekwini takho, kubantfu bakho nasetindlini takho. Letibawu titawugcwala etindlini taseGibhithe nakuto tonkhe tindzawo bantfu bakulelive labahlala kuto. 22 Ngalelolanga ngitayivikela indzawo yaseGosheni lapho kuhlala khona bantfu bami. Angeke tibe khona letibawu kuleyondzawo.+ Ngaleso sizatfu utawukwati kutsi mine Jehova ngikhona kulelive.+ 23 Ngitawukwenta kutsi kube nemehluko emkhatsini webantfu bami nebantfu bakho. Lesimangaliso sitakwenteka kusasa loku lokusako.”’”
24 Ngako Jehova wakwenta loko futsi libulo letibawu lagcwala endlini yaFaro nasetindlini tetinceku takhe nakulo lonkhe live laseGibhithe.+ Letibawu+ tenta umonakalo lomkhulu kulelive. 25 Ekugcineni Faro wabita boMosi na-Aroni watsi: “Hambani nentele Nkulunkulu wenu umhlatjelo, kodvwa nimentele khona lapha kulelive.” 26 Kepha Mosi watsi: “Angeke kulunge, ngobe lomhlatjelo lesitawunikela ngawo kuJehova Nkulunkulu wetfu uyintfo leyenyanyekako kubantfu baseGibhithe.+ Angeke yini basigcobe ngematje nasenta umhlatjelo ngentfo leyenyanyekako embikwabo? 27 Sitawutsatsa luhambo lwemalanga lamatsatfu siye ehlane, futsi kulapho-ke sitawumentela khona Jehova Nkulunkulu wetfu umhlatjelo, njengobe nje ashito kitsi.”+
28 Faro wase utsi: “Ngitanikhulula kutsi nihambe niyokwentela Jehova Nkulunkulu wenu umhlatjelo ehlane. Kodvwa-ke kufanele ningayi khashane kakhulu. Ngicela ningincengele kuNkulunkulu wenu.”+ 29 Ngemuva kwaloko Mosi watsi: “Nyalo ngiyahamba, futsi ngitakuncengela kuJehova. Kusasa letibawu titawusuka kuwe, nasetincekwini takho kanye nakubantfu bakho. Kodvwa wena Faro kufanele uyekele kudlala ngatsi, ngalokutsi ungabavumeli labantfu bahambe bayokwentela Jehova umhlatjelo.”+ 30 Mosi wase uyesuka kuFaro, futsi wancenga Jehova.+ 31 Ngako Jehova wakwenta loko Mosi labekucela. Letibawu tase tiyesuka kuFaro, nasetincekwini takhe kanye nakubantfu bakhe. Kute ngisho nasinye lesasala. 32 Nobe kunjalo, Faro waphindze wenta inhlitiyo yakhe yaba lukhuni, wangabakhululi labantfu.
9 Ngako Jehova watsi kuMosi: “Hamba uye kuFaro ufike utsi: ‘Naku Jehova Nkulunkulu wemaHebheru lakushoko: “Khulula bantfu bami kuze bayongikhonta.+ 2 Kodvwa nawungabakhululi kutsi bahambe futsi uchubeka ubavimba, 3 sandla saJehova+ sitawushaya imfuyo yakho. Emahhashi, timbongolo, emakamela, imihlambi yetinkhomo neyetimvu kutawushaywa ngesishayo lesibulalako.+ 4 Jehova utakwenta kutsi kube nemehluko emkhatsini wemfuyo yema-Israyeli nemfuyo yebantfu baseGibhithe. Kute lutfo lwema-Israyeli lolutawukufa.”’”+ 5 Ngetulu kwaloko, Jehova wabeka sikhatsi, watsi: “Kusasa loku lokusako mine Jehova ngitawukwenta loku kulelive.”
6 Ngakusasa, Jehova wakwenta loko. Yonkhe inhlobo yemfuyo yaseGibhithe yafa,+ kodvwa kute ngisho nayinye imfuyo yema-Israyeli leyafa. 7 Ngesikhatsi Faro abuta, watfola kutsi kute ngisho nasinye silwane emfuyweni yema-Israyeli lesasifile. Nobe kunjalo, inhlitiyo yakhe yachubeka ilukhuni, wangabakhululi labantfu kutsi bahambe.+
8 Jehova wase utsi kuMosi na-Aroni: “Tsatsani umlotsa etiko niwugcwalise etandleni tenu. Mosi kufanele awujike emoyeni embikwaFaro. 9 Lomlotsa utawuba lutfuli lolutawugcwala kulo lonkhe live laseGibhithe, uvete ematfumba lamabi kubantfu nasetilwaneni kulo lonkhe lelive.”
10 Ngako batsatsa umlotsa etiko base baya kuFaro. Mosi wafike wawujika emoyeni futsi kwavela ematfumba lamabi kubantfu nasetilwaneni. 11 Baphristi labenta imilingo abazange bakhone kuya kuMosi ngenca yalamatfumba. Lamatfumba avela nakulabaphristi kanye nakubo bonkhe bantfu baseGibhithe.+ 12 Kodvwa Jehova wavumela inhlitiyo yaFaro kutsi ibe lukhuni. Faro akazange abalalele boMosi na-Aroni, njengobe nje Jehova abeshito kuMosi.+
13 Ngemuva kwaloko Jehova watsi kuMosi: “Ubovuka ekuseni kakhulu uye kuFaro, ufike utsi kuye: ‘Naku Jehova Nkulunkulu wemaHebheru lakushoko: “Khulula bantfu bami kuze bayongikhonta. 14 Nyalo ngitawuletsa tonkhe tishayo tami kute ngishaye wena* netinceku takho kanye nebantfu bakho, khona utokwati kutsi kute lomunye lofana nami emhlabeni wonkhe.+ 15 Ngobe nanyalo ngabe sengiselulile sandla sami, ngakushaya wena nebantfu bakho ngesishayo lesibulalako, futsi ngabe sengikucotfulile emhlabeni. 16 Kodvwa ngikuyekele ngesizatfu sekutsi ngifuna kukukhombisa emandla ami, ngente nekutsi libito lami limenyetelwe kuwo wonkhe umhlaba.+ 17 Nanyalo solo unenkhani, awubakhululi bantfu bami. 18 Ngaleso sizatfu, kusasa ngalesikhatsi ngitawuletsa sangcotfo lesikhulu lesingazange sesihlasele iGibhithe kusukela yaba khona kuze kube ngunyalo. 19 Ngako-ke tfumela livi lekutsi yonkhe imfuyo yakho nato tonkhe tintfo takho letingephandle kungeniswe ngekhatsi. Bonkhe bantfu kanye netilwane lokutawutfolakala kungephandle kungakangeniswa, kutawufa nakufika lesangcotfo.”’”
20 Tonkhe tinceku taFaro letalilalela livi laJehova tatsatsa tinceku tato ngekushesha kanye nemfuyo yato takungenisa ngekhatsi, 21 kodvwa labo labangazange balilalele livi laJehova batishiya ngephandle tinceku tabo kanye nemfuyo yabo.
22 Jehova wase utsi kuMosi: “Phakamisela sandla sakho emazulwini, kuze kwehle sangcotfo kulo lonkhe live laseGibhithe,+ kubantfu nasetilwaneni nakuto tonkhe titjalo letikulelive.”+ 23 Ngako Mosi waphakamisela indvuku yakhe emazulwini. Jehova watfumela kudvuma nesangcotfo, futsi umlilo* wehlela emhlabeni. Jehova wenta kutsi kuchubeke kunesangcotfo eveni laseGibhithe. 24 Kwaba nesangcotfo, futsi kulesangcotfo bekwehla nemlilo. Besisikhulu kakhulu, futsi besingakaze sesibe khona lesifana naso kusukela sive saseGibhithe saba khona.+ 25 Sashaya yonkhe intfo lebeyingephandle eveni laseGibhithe, kusukela kubantfu kuya etilwaneni, sashaya tonkhe titjalo, saphindze savitsita tonkhe tihlahla lebetikhona.+ 26 Kusendzaweni yaseGosheni kuphela lapho bekute khona sangcotfo, ngobe kulapho ema-Israyeli abehlala khona.+
27 Ngemuva kwaloko Faro wabita boMosi na-Aroni, watsi kubo: “Nyalo sengiyavuma kutsi ngonile. Jehova ulungile, kodvwa ngimi nebantfu bami lesineliphutsa. 28 Ncengani Jehova kute kuphele lokudvuma nalesangcotfo lasiletsile. Ngemuva kwaloko ngitanikhulula kutsi nihambe, ngeke ngisanivimba.” 29 Mosi watsi kuye: “Ngekushesha nje nangiphuma kulelidolobha, ngitawuphakamisela tandla tami kuJehova. Lokudvuma kutawuphela, nalesangcotfo angeke sisachubeka, kuze wati kutsi umhlaba waJehova.+ 30 Kodvwa ngiyati kutsi nangemuva kwaloku, wena netinceku takho angeke nimesabe Jehova Nkulunkulu.”
31 Lesangcotfo savitsita iflekisi* kanye nebhali, ngobe ibhali beseyilungele kuvunwa naleflekisi beseyinetimbali. 32 Kodvwa kolo* wona asiwuvitsitanga, ngobe bewusengakavutfwa. 33 Mosi wase uyesuka kuFaro, waphuma kulelidolobha futsi waphakamisela tandla takhe kuJehova. Lokudvuma kanye nalesangcotfo kwaphela, nalemvula yayekela kuna.+ 34 Faro watsi nakabona kutsi lemvula, nesangcotfo kanye nalokudvuma sekuphelile waphindze wona. Yena netinceku takhe batenta taba lukhuni tinhlitiyo tabo.+ 35 Inhlitiyo yaFaro yachubeka ilukhuni, futsi akazange awakhulule ema-Israyeli kutsi ahambe, njengobe nje Jehova abeshito asebentisa Mosi.+
10 Jehova watsi kuMosi: “Hamba uye kuFaro ngobe ngivumele inhlitiyo yakhe kanye neyetinceku takhe kutsi ibe lukhuni,+ kuze ngente letimangaliso tami embikwakhe,+ 2 futsi nawe utawucocela emadvodzana akho kanye nebatukulu bakho kutsi ngabajezisa njani bantfu baseGibhithe, nekutsi ngutiphi timangaliso lengatenta kubo.+ Nakanjani nitawukwati kutsi mine nginguJehova.”
3 BoMosi na-Aroni baya kuFaro, batsi kuye: “Naku Jehova Nkulunkulu wemaHebheru lakushoko: ‘Kutawuze kube ngunini solo ungafuni kungilalela?+ Khulula bantfu bami kuze bayongikhonta. 4 Ngobe nangabe solo ungabakhululi, kusasa ngitawuletsa sikhonyane kulelive lakho. 5 Sitawugcwala kulo lonkhe lelive nize ningasawuboni nemhlabatsi. Sitawudla loko lobekusele, lokungazange kumoshwe sangcotfo, sidle nato tonkhe tihlahla tenu letimilako.+ 6 Sitawugcwala etindlini takho, etindlini tato tonkhe tinceku takho nakuto tonkhe tindlu taseGibhithe, sitawuba sinyenti ngendlela bobabe benu nabomkhulu benu labangazange sebayibone kusukela baba khona kulelive kuze kube ngulamuhla.’”+ Ngemuva kwaloko, Mosi wesuka kuFaro.
7 Ngako tinceku taFaro tatsi kuye: “Kutawuze kube ngunini sihlushwa ngulendvodza?* Khulula labantfu kuze bayokhonta Jehova Nkulunkulu wabo. Nanyalo solo awuboni yini kutsi iGibhithe seyimoshakele?” 8 Ngenca yaloko boMosi na-Aroni baletfwa kuFaro, futsi watsi kubo: “Hambani niyokhonta Jehova Nkulunkulu wenu. Kodvwa-ke bobani vele lenitawuhamba nabo?” 9 Mosi watsi: “Sitawuhamba nebantfu bakitsi labasha nalabadzala, emadvodzana kanye nemadvodzakati etfu, timvu kanye netinkhomo tetfu,+ ngobe siyowentela Jehova umkhosi.”+ 10 Faro watsi kubo: “Nangiyoke nginikhulule nine nebantfwana benu, impela kutawusho kutsi Jehova unani!+ Ngiyabona kutsi kunentfo lembi lenifuna kuyenta. 11 Cha, angeke nihambe nonkhe! Kutawuhamba emadvodza kuphela ayokhonta Jehova, ngobe nguloko lenikucelile.” Ngemuva kwaloko boMosi na-Aroni bakhishwa embikwaFaro.
12 Jehova wase utsi kuMosi: “Yelulela sandla sakho eveni laseGibhithe kuze kuvele sikhonyane futsi sidle tonkhe titjalo letikulelive, lokungiko konkhe lokungazange kumoshwe sangcotfo.” 13 Ngaso leso sikhatsi Mosi welulela indvuku yakhe eveni laseGibhithe. Jehova wase wenta kutsi kuhhushe umoya wasemphumalanga imini yonkhe nebusuku bonkhe kulelive. Ekuseni, lomoya wasemphumalanga waletsa sikhonyane. 14 Lesikhonyane sagcwala kulo lonkhe lelive laseGibhithe,+ sasakatekela kuyo yonkhe indzawo. Sabanga umonakalo lomkhulu kakhulu. Bekungakaze kube nesikhonyane lesingaka+ futsi besingeke siphindze sibe khona lesingangaso. 15 Lesikhonyane sambonya lonkhe lelive laze laba mnyama, sadla tonkhe titjalo kanye nato tonkhe titselo lebetisetihlahleni letingazange timoshwe sangcotfo. Kute ngisho nakunye lokuluhlata lokwasala etihlahleni nobe emasimini kulo lonkhe live laseGibhithe.
16 Ngekushesha Faro wabita Mosi na-Aroni watsi: “Ngonile kuJehova Nkulunkulu wenu, futsi ngonile nakini. 17 Ngicela ningicolele kanye nje, ningincengele nakuJehova Nkulunkulu wenu kutsi asuse lesishayo lesibulalako langiletsele sona.” 18 Ngako wesuka* embikwaFaro, wancenga Jehova.+ 19 Jehova wabese wenta kutsi lomoya ushintje uchamuke ngasenshonalanga, futsi waba mkhulu kakhulu wasusa sonkhe lesikhonyane wasiphephulela eLwandle Lolubovu. Kute ngisho nalesincane lesasala kulo lonkhe live laseGibhithe. 20 Kodvwa Jehova wavumela inhlitiyo yaFaro kutsi ibe lukhuni,+ futsi akazange awakhulule ema-Israyeli.
21 Jehova wase utsi kuMosi: “Yelulela sandla sakho emazulwini kuze kube mnyama eveni laseGibhithe, kube mnyama khwishi.” 22 Ngaso leso sikhatsi, Mosi welulela sandla sakhe emazulwini, futsi kwaba mnyama kakhulu kulo lonkhe live laseGibhithe emalanga lamatsatfu.+ 23 Bantfu baseGibhithe bebangabonani, futsi kute ngisho namunye lowakhona kusuka endzaweni labekuyo emalanga lamatsatfu. Kodvwa bekukhanya lapho ema-Israyeli abehlala khona.+ 24 Faro wase ubita Mosi watsi kuye: “Hambani niyokhonta Jehova.+ Kodvwa timvu tenu kanye netinkhomo tenu titawusala. Bantfwana benu ningahamba nabo.” 25 Mosi watsi: “Wena kufanele usivumele kutsi sihambe netilwane tekwenta imihlatjelo, nalesiyokwenta ngato iminikelo yekushiswa. Letilwane sitawunikela ngato kuJehova Nkulunkulu wetfu.+ 26 Imfuyo yetfu sitawuhamba nayo. Angeke sivume kutsi kusale ngisho nasinye silwane* ngobe sitawusebentisa letinye tato nasikhonta Jehova Nkulunkulu wetfu, futsi sitawukwati nasifika khona kutsi ngutiphi lesitawunikela ngato kuJehova.” 27 Jehova wavumela inhlitiyo yaFaro kutsi ibe lukhuni, futsi Faro akazange avume kutsi bahambe.+ 28 Faro watsi kuMosi: “Suka embikwami! Ungaphindzi nje ute lapha kimi, ngobe mhlazana uta kimi, utawufa.” 29 Ngako Mosi watsi: “Kutawuba njengobe usho, angeke ngiphindze ngite kuwe.”
11 Jehova wabese utsi kuMosi: “Ngitawuletsa sishayo sekugcina kuFaro naseGibhithe. Ngemuva kwaloko utanikhulula kutsi nihambe.+ Nasanikhulula, utawube sekanicosha kulelive.+ 2 Tjela ema-Israyeli kutsi onkhe emadvodza nebafati kufanele bacele tintfo telisiliva neteligolide kubomakhelwane babo.”+ 3 Jehova wenta kutsi bantfu bakhe batfole umusa kubantfu baseGibhithe. NaMosi abesahlonishwa kakhulu kulelive, ahlonishwa tinceku taFaro nangibo bonkhe bantfu.
4 Mosi wabese utsi kuFaro: “Naku Jehova lakushoko: ‘Ekhatsi nebusuku ngitakuya eGibhithe,+ 5 futsi onkhe ematibulo akulelive atawufa,+ kusukela etibulweni laFaro losesihlalweni sebukhosi kuya etibulweni lesigcilikati lesisebenta etjeni lekusila, nawo onkhe ematibulo emfuyo.+ 6 Kulo lonkhe live laseGibhithe, kutawuba nekukhala lokukhulu lokungazange sekube khona, nalokungayuphindze kube khona.+ 7 Kodvwa ngisho nenja angeke iwakhonkhotse ema-Israyeli,* emadvodza akhona nobe imfuyo yawo, kuze nati kutsi Jehova angakhona kwenta umehluko emkhatsini webantfu baseGibhithe nema-Israyeli.’+ 8 Tonkhe tinceku takho titawukuta kimi, tiguce embikwami titsi: ‘Hamba, wena nabo bonkhe labantfu labakulandzelako.’+ Ngemuva kwaloko ngitawuhamba.” Ngako Mosi waphuma kuFaro atfukutsele abila.
9 Jehova abetsite kuMosi: “Faro angeke anilalele,+ kuze ngitawukwenta timangaliso letinyenti eveni laseGibhithe.”+ 10 BoMosi na-Aroni bebatente tonkhe letimangaliso embikwaFaro,+ kodvwa Jehova wavumela inhlitiyo yaFaro kutsi ibe lukhuni, ngako akazange awakhulule ema-Israyeli eveni lakhe.+
12 Jehova wase ukhuluma naMosi na-Aroni eveni laseGibhithe, watsi: 2 “Lenyanga itawuba yekucala etinyangeni tenu. Itawuba yinyanga yekucala emnyakeni wenu.+ 3 Khuluma nawo onkhe ema-Israyeli utsi: ‘Ngelilanga lesi-10 kulenyanga, nguloyo naloyo kufanele akhetsele indlu yababe wakhe imvu,+ indlu ngayinye ibe nemvu yinye. 4 Kodvwa nangabe indlu iyincane kakhulu kutsi ingayidla yonkhe lemvu, labantfu* namakhelwane wabo losedvute kufanele bayidle ndzawonye endlini yinye, kuye ngekutsi kunebantfu labangakhi. Nanibabala, kufanele nibuke kutsi umuntfu ngamunye utawudla inyama lengakanani. 5 Lemvu kufanele kube ngulephile kahle,+ lenemnyaka munye futsi lendvuna. Ningakhetsa etimvini nobe etimbutini letisetincane. 6 Kufanele niyinakekele kuze kube lilanga lesi-14 kulenyanga.+ Onkhe ema-Israyeli kufanele ahlabe letimvu kusengakahlwi.*+ 7 Kufanele atsatse lenye yengati yayo ayifafate etinsikeni totimbili teminyango nangetulu kweminyango yetindlu lapho atawudlela khona lemvu.+
8 “‘Lenyama kufanele ayidle ngalobo busuku.+ Kufanele ayose futsi ayidle kanye nesinkhwa lesite imvubelo+ nemibhidvo lebabako.+ 9 Ningayidli iluhlata nobe ibilisiwe. Kodvwa niboyosa, nose inhloko yayo, imilente kanye nekwangekhatsi. 10 Kufanele kube bete leniyishiya kuze kube sekuseni, kodvwa letawusala kufanele niyishise.+ 11 Nayi indlela lenitayidla ngayo: Niboyidla nibophe emabhande enu, nigcoke tincabule etinyaweni tenu, niphetse netindvuku tenu futsi niyidle nisheshisa. Leli liPhasika laJehova. 12 Mine ngitawufika eveni laseGibhithe kulobo busuku ngibulale onkhe ematibulo akulelive, kusukela ematibulweni ebantfu kuya ematibulweni etilwane.+ Ngitawubehlulela bonkhe bonkulunkulu baseGibhithe.+ NginguJehova. 13 Lengati itawuba luphawu etindlini tenu. Ngitawutsi nangiyibona ngitendlule letindlu tenu, futsi lesishayo ngeke sinibulale nangishaya lelive laseGibhithe.+
14 “‘Lelilanga litawuba sikhumbuto kini, futsi niboligubha nentele Jehova umkhosi kuto tonkhe titukulwane tenu. Kufanele niligubhe, futsi loku kutawuba ngumtsetfo lohlala njalo. 15 Nitawudla sinkhwa lesite imvubelo emalanga langu-7.+ Ngelilanga lekucala kufanele nisuse inhlama lenemvubelo etindlini tenu, ngobe nobe ngubani lodla intfo lenemvubelo kusukela ngelilanga lekucala kuya elangeni lesi-7, loyo muntfu kufanele abulawe. 16 Ngelilanga lekucala nitawuba nembutsano longcwele, bese kutsi ngelilanga lesi-7 nibe nalomunye umbutsano longcwele. Kute umsebenti lokufanele wentiwe ngalawo malanga.+ Yinye kuphela intfo umuntfu langayenta, kutilungisela loko latakudla.
17 “‘Kufanele nente uMkhosi Wesinkhwa Lesite Imvubelo,+ ngobe ngalelilanga leli ngitawunikhipha ngemacembu enu* eveni laseGibhithe. Lelilanga kufanele niligubhe kuto tonkhe titukulwane tenu, loku kube ngumtsetfo lohlala njalo. 18 Kusihlwa ngelilanga lesi-14 enyangeni yekucala, kufanele nidle sinkhwa lesite imvubelo kuze kube kusihlwa ngelilanga lesi-21 kuleyo nyanga.+ 19 Kute inhlama lenemvubelo lokufanele itfolakale etindlini tenu kulamalanga langu-7, ngobe nangabe umuntfu adla intfo lenemvubelo, ngisho nobe awalesinye sive+ nobe angum-Israyeli ngekutalwa, kufanele abulawe.+ 20 Akukafaneli nidle intfo lenemvubelo. Kufanele nidle sinkhwa lesite imvubelo kuwo onkhe emakhaya enu.’”
21 Ngekushesha Mosi wabita onkhe emadvodza lamadzala aka-Israyeli,+ watsi kuwo: “Nguloyo naloyo akahambe akhetsele umndeni wakhe silwane lesisesincane,* asihlabe sibe ngumhlatjelo weliPhasika. 22 Ngemuva kwaloko kufanele nitsatse sitfungo sehisophu* nisenye engatini lesesitjeni bese niyifafata ngetulu kweminyango yenu kanye nasetinsikeni tayo totimbili. Kute ngisho namunye kini lokufanele aphume endlini yakhe kuze kube sekuseni. 23 Jehova nakaletsa lesishayo kubantfu baseGibhithe utayibona lengati lefafatwe ngetulu kweminyango yenu nasetinsikeni tayo totimbili. Ngako Jehova utawubese uyayendlula leyondlu, angavumeli kutsi kube khona lobulawa ngulesishayo sekufa.*+
24 “Lomkhosi kufanele niwugcine nine nemadvodzana enu, futsi loku kutawuba ngumtsetfo lohlala njalo.+ 25 Nanifika eveni Jehova lataninika lona, njengobe nje ashito, kufanele niwugcine lomkhosi.+ 26 Emadvodzana enu nakanibuta atsi: ‘Usho kutsini lomkhosi kini?’+ 27 Nibotsi: ‘Lona ngumhlatjelo weliPhasika lesiwentela Jehova, yena lowendlula tindlu tema-Israyeli eGibhithe ngesikhatsi aletsa sishayo kubantfu baseGibhithe, kodvwa tindlu tetfu watiphephisa.’”
Ngako-ke ema-Israyeli aguca futsi akhotsama. 28 Abese ayahamba enta njengobe nje Jehova abetjele boMosi na-Aroni.+ Akwenta konkhe njengobe nje Nkulunkulu abeshito.
29 Ekhatsi nebusuku Jehova wabulala onkhe ematibulo eveni laseGibhithe,+ kusukela etibulweni laFaro lobekasesihlalweni sebukhosi kuya etibulweni lesiboshwa lebesisejele* kanye nawo onkhe ematibulo etilwane.+ 30 Faro wavuka kulobo busuku nato tonkhe tinceku takhe kanye nabo bonkhe labanye bantfu baseGibhithe. Kwaba nekukhala lokukhulu eGibhithe ngobe bekute indlu lebeyingakafelwa.+ 31 Ngabo lobo busuku wavele wabita boMosi na-Aroni+ futsi watsi kubo: “Hambani la, niphume niphele kubantfu bami, nine nawo onkhe lamanye ema-Israyeli. Hambani niyokhonta Jehova njengekucela kwenu.+ 32 Tsatsani nemihlambi yenu yetimvu, yetimbuti neyetinkhomo nihambe, njengobe nje nishito.+ Kodvwa-ke nami kufanele ningibusise.”
33 Bantfu baseGibhithe bacala kuncenga ema-Israyeli kutsi aphume ngekushesha+ kulelive, batsi: “Ngobe sonkhe kufana nekutsi sesifile!”+ 34 Ngako ema-Israyeli aphatsa inhlama yawo lebeyite imvubelo, agocotela letitja tenhlama ngetimphahla tawo futsi atibophela emahlombe. 35 Ema-Israyeli akwenta loko Mosi labewatjele kona, acela netintfo telisiliva neteligolide kanye netimphahla kubantfu baseGibhithe.+ 36 Jehova wenta kutsi bantfu bakhe batfole umusa emehlweni ebantfu baseGibhithe, futsi babanika loko lebebakucela, batitsatsa tonkhe tintfo tebantfu baseGibhithe.+
37 Ngemuva kwaloko ema-Israyeli esuka eRamsesi+ aya eSukhothi.+ Bekunemadvodza labehamba ngetinyawo langaba ngu-600 000, nabangabalwa bantfwana.+ 38 Bahamba nelicembu*+ lelikhulu lebantfu baletinye tive, kanye nemihlambi yetimvu, yetimbuti neyetinkhomo. Lemfuyo beyiyinyenti kakhulu. 39 Babese batsatsa lenhlama lebebaphume nayo eGibhithe babhaka tinkhwa letiyindingilizi letite imvubelo. Lenhlama beyite imvubelo njengobe bebacoshiwe eGibhithe futsi bangakasitfoli nesikhatsi sekutilungiselela kudla.+
40 Ngesikhatsi ema-Israyeli aphuma eGibhithe,+ abesacitse iminyaka lengu-430+ aphila njengetihambi. 41 Ekupheleni kwaleminyaka lengu-430, bonkhe bantfu baJehova baphuma bamacembu* eveni laseGibhithe. Baphuma ngalo lelolanga. 42 Lobu busuku labatawukhumbula ngabo sikhatsi Jehova labakhipha ngaso eveni laseGibhithe. Lobusuku kufanele bugcinwe ngibo bonkhe bantfu baka-Israyeli kuto tonkhe titukulwane tabo kuze badvumise Jehova.+
43 Ngemuva kwaloko Jehova watsi kuboMosi na-Aroni: “Nangu umtsetfo weliPhasika: Kute umuntfu wekuhamba lokufanele alidle.+ 44 Kodvwa nangabe kukhona lonesigcili lasitsenga ngemali, kufanele sisokwe.+ Ngemuva kwaloko-ke sesingalidla leliPhasika. 45 Umuntfu lovela kulenye indzawo kanye nesisebenti lesicashiwe akukafaneli balidle. 46 LeliPhasika kufanele lidlelwe endlini yinye. Kute inyama lokufanele niphume nayo endlini, nematsambo ayo kufanele ningawaphuli.+ 47 Onkhe ema-Israyeli kufanele aligubhe. 48 Nangabe kunemuntfu wekuhamba lohlala nani futsi lofuna kugubha leliPhasika kuze advumise Jehova, bonkhe labadvuna bendlu yakhe kufanele basokwe. Ngemuva kwaloko sekangeta atoligubha, futsi utawufana nem-Israyeli wekutalwa. Kute umuntfu longakasokwa lokufanele alidle.+ 49 Kutawusebenta umtsetfo munye kumuntfu longum-Israyeli wekutalwa nakumuntfu wekuhamba lohlala nani.”+
50 Ngako onkhe ema-Israyeli enta njengobe nje Jehova abetjele Mosi na-Aroni. Akwenta konkhe njengobe abeshito. 51 Ngalo lelolanga, Jehova wawakhipha ema-Israyeli ngemacembu* awo eveni laseGibhithe.
13 Jehova wachubeka akhuluma naMosi, watsi: 2 “Onkhe ematibulo* lamadvuna ema-Israyeli kufanele uwanikele* kimi. Ematibulo lamadvuna latawutalwa ngewami,+ kungaba ngematibulo ebantfu nobe etilwane.”
3 Ngemuva kwaloko Mosi watsi kulabantfu: “Nibolikhumbula lelilanga leniphume ngalo eGibhithe,+ eveni lebenigcilatwa kulo, ngobe ngesandla lesinemandla Jehova unikhiphile khona.+ Ngako-ke kufanele ningadli lutfo lolunemvubelo. 4 Naphuma eGibhithe ngalelilanga leli, ngenyanga ya-Abibi.*+ 5 Ngalesikhatsi Jehova aningenisa eveni lemaKhenani, lemaHethi, lema-Amori, lemaHivi nelemaJebhusi,+ live lafunga kubokhokho benu kutsi utaninika lona,+ lokulive leligeleta lubisi neluju,+ nibowugubha lomkhosi ngalenyanga. 6 Kufanele nidle sinkhwa lesite imvubelo emalanga langu-7,+ bese kutsi ngelilanga lesi-7 nentele Jehova umkhosi. 7 Sinkhwa lesite imvubelo sitawudliwa emalanga langu-7,+ futsi kufanele kungatfolakali lutfo lolunemvubelo emkhatsini wenu.+ Akungatfolakali ngisho nenhlama lebilile kuyo yonkhe indzawo lenikuyo.* 8 Ngalelolanga emadvodzana enu nibowatjela nitsi: ‘Lomkhosi siwentela kukhumbula loko Jehova lasentela kona ngesikhatsi siphuma eGibhithe.’+ 9 Loku kutawuba luphawu etandleni tenu, kube sikhumbuto emabuntini+ enu,* kuze nikhulume ngemtsetfo waJehova, ngobe Jehova wanikhipha eGibhithe ngesandla lesinemandla. 10 Lomkhosi kufanele niwugcine minyaka yonkhe ngelilanga Nkulunkulu lalibekile.+
11 “Kutawutsi lapho Jehova aningenisa eveni lemaKhenani, live lafunga kutsi utalinika nine nabokhokho benu,+ 12 kufanele ninikele kuJehova onkhe ematibulo enu lamadvuna* kanye nawo onkhe ematibulo lamadvuna emfuyo yenu. Ematibulo lamadvuna ebantfu newetilwane ngewaJehova.+ 13 Litibulo lembongolo kufanele ulihlenge ngemvu, futsi nangabe ungalihlengi, ubolephula intsamo. Onkhe ematibulo enu lamadvuna nawo kufanele niwahlenge.+
14 “Ngekuhamba kwesikhatsi nakwenteka emadvodzana enu anibuta atsi: ‘Kusho kutsini loku?’ nibowatjela nitsi: ‘Jehova wasikhulula ngesandla lesinemandla eGibhithe, live lebesigcilatwa kulo.+ 15 Ngesikhatsi Faro anenkhani futsi angavumi kusikhulula,+ Jehova wabulala onkhe ematibulo aseveni laseGibhithe, kusukela ematibulweni ebantfu kuya ematibulweni etilwane.+ Kungako-ke siwanikela kuJehova onkhe ematibulo etilwane lamadvuna,* futsi sihlenga onkhe ematibulo etfu.’ 16 Loku kutawuba luphawu etandleni tenu, kube nalibhande emabuntini enu,*+ ngobe Jehova wasikhipha eGibhithe ngesandla lesinemandla.”
17 Ngesikhatsi Faro avumela ema-Israyeli kutsi ahambe, Nkulunkulu akazange awahambise ngendlela yaseveni lemaFilisti, nanobe beyidvutane, ngobe bekatsi: “Labantfu kungenteka bashintje umcondvo nababhekana nemphi, bese babuyela eGibhithe.” 18 Ngako Nkulunkulu wabahambisa ngendlela yasehlane lelingaseLwandle Lolubovu.+ Baphuma eGibhithe bahlelekile, banjengemacembu emasotja. 19 Mosi watsatsa ematsambo aJosefa futsi bahamba nawo, ngobe Josefa abefungise emadvodzana a-Israyeli, watsi: “Nakanjani Nkulunkulu utanisita. Nibotsatsa ematsambo ami nihambe nawo naniphuma kulendzawo.”+ 20 Besuka eSukhothi bafike bamisa emathende e-Ethamu, eceleni kwasehlane.
21 Emini Jehova abehamba embikwabo ngensika yelifu kuze abahole endleleni,+ ebusuku abehamba embikwabo ngensika yemlilo kuze abakhanyisele. Loku abekwenta kute bakhone kuhamba emini nasebusuku.+ 22 Emini, lensika yelifu beyingesuki kuma-Israyeli, nasebusuku lensika yemlilo nayo beyingesuki.+
14 Jehova wabese utsi kuMosi: 2 “Tjela ema-Israyeli kutsi akajike ayewumisa emathende embikwePhihahirothi, emkhatsini weMigdoli nelwandle, lapho kubonakala khona iBhali-sefoni.+ Kufanele nimise emathende enu ngaselwandle abukane neBhali-sefoni. 3 Ngemuva kwaloko Faro utawukhuluma ngebantfu baka-Israyeli atsi: ‘Bayazulazula futsi badidekile. Sebavimbeleke ehlane.’ 4 Ngitawuvumela inhlitiyo yakhe kutsi ibe lukhuni+ futsi utawubese uyawalandzela. Ngitawutikhatimulisa ngekuncoba Faro nalo lonkhe libutfo lakhe,+ nebantfu baseGibhithe batawukwati kutsi mine nginguJehova.”+ Ngako-ke ema-Israyeli enta kanjalo.
5 Ngekuhamba kwesikhatsi Faro inkhosi yaseGibhithe wabikelwa kutsi ema-Israyeli ahambile. Ngekushesha yena netinceku takhe bashintja ingcondvo,+ batsi: “Sikwenteleni vele loku? Siwakhululeleni lama-Israyeli ekubeni tigcili tetfu?” 6 Ngako Faro walungisa tinkalishi takhe temphi, watsatsa nebantfu bakhe wahamba nabo.+ 7 Watsatsa tinkalishi telikhetselo letingu-600 kanye nato tonkhe letinye tinkalishi taseGibhithe. Bekunemasotja kuleyo naleyo nkalishi. 8 Ngako Jehova wavumela inhlitiyo yaFaro inkhosi yaseGibhithe kutsi ibe lukhuni. Faro wacosha ema-Israyeli njengobe abehamba ngesibindzi.*+ 9 Bantfu baseGibhithe bawacosha,+ futsi onkhe emahhashi aFaro ladvonsa tinkalishi, nemasotja akhe lagibele emahhashi kanye nelibutfo lakhe, besebasondzela kuma-Israyeli labemise emathende awo ngaselwandle, edvute nePhihahirothi, abukene neBhali-sefoni.
10 Ngesikhatsi Faro asondzela, ema-Israyeli aphakamisa emehlo awo abona bantfu baseGibhithe betile emvakwawo. Acala kwesaba futsi akhala kuJehova.+ 11 Atsi kuMosi: “Besekute yini tindzawo tekungcwaba eGibhithe kutsi ungasiletsa lapha ehlane sitewufela khona?+ Yini lena losente yona? Usikhipheleni eGibhithe? 12 Akusiko yini loku lebesikutjela kona eGibhithe, ngesikhatsi sitsi: ‘Siyekele sisebentele bantfu baseGibhithe’? Kuncono kutsi sisebentele bona kunekutsi sifele lapha ehlane.”+ 13 Mosi watsi kuma-Israyeli: “Ningesabi.+ Cinani futsi nibone indlela Jehova latanisindzisa ngayo lamuhla.+ Labantfu baseGibhithe lenibabonako, angeke niphindze nibabone.+ 14 Jehova nguye lotanilwela,+ nine nitawuthula nibukele.”
15 Ngemuva kwaloko Jehova watsi kuMosi: “Kungani ukhalela lusito? Tjela ema-Israyeli kutsi akasale esuka kulendzawo. 16 Phakamisa indvuku yakho, welulele sandla sakho elwandle ulwehlukanise ekhatsi, kuze ema-Israyeli atekwewela ahamba emhlabatsini lowomile. 17 Mine ngitawuvumela tinhlitiyo tebantfu baseGibhithe kutsi tibe lukhuni, bese bayawalandzela. Ngako-ke ngitawutikhatimulisa ngekuncoba Faro nalo lonkhe libutfo lakhe, netinkalishi takhe temphi kanye nemasotja akhe lagibele emahhashi.+ 18 Bantfu baseGibhithe batawukwati kutsi mine nginguJehova nangitikhatimulisa ngekuncoba Faro, netinkalishi takhe temphi kanye nemasotja akhe lagibele emahhashi.”+
19 Lengilosi yaNkulunkulu weliciniso+ lebeyihamba embikwema-Israyeli yabese iyesuka iya ngemuva kwawo, nalensika yelifu lebeyisembikwawo yesuka yaya ngemuva.+ 20 Yema emkhatsini webantfu baseGibhithe nema-Israyeli,+ ngako kulolunye luhlangotsi kwaba mnyama, kulolunye kwakhanya.+ Ngaleso sizatfu, bantfu baseGibhithe abazange basondzele kuma-Israyeli bonkhe lobo busuku.
21 Mosi wabese welulela sandla sakhe elwandle.+ Kulobo busuku, Jehova wehlukanisa lwandle ngemoya lomkhulu lobewuchamuka emphumalanga, womisa umhlabatsi waselwandle,+ futsi wawehlukanisa ekhatsi nemanti alo.+ 22 Ngako ema-Israyeli ewela lolwandle ahamba emhlabatsini lowomile.+ Lamanti akha ludvonga ngesekudla nangesencele sawo.+ 23 Bantfu baseGibhithe bawacosha ema-Israyeli. Onkhe emahhashi aFaro, tinkalishi takhe temphi nemasotja akhe lagibele emahhashi awalandzela angena elwandle.+ 24 Ekuseni ngeluvivi,* Jehova wabuka bantfu baseGibhithe akulensika yemlilo neyelifu,+ wase ubangela kutsi kube nesiphitsiphitsi emkhatsini wabo. 25 Wakhumula emasondvo etinkalishini tabo, kangangekutsi besetihamba kamatima, futsi labantfu baseGibhithe batsi: “Asibalekeni sisuke kuma-Israyeli, ngobe Jehova uyawalwela.”+
26 Jehova wabese utsi kuMosi: “Yelulela sandla sakho elwandle, kuze lamanti ambonye bantfu baseGibhithe, tinkalishi tabo temphi nemasotja abo lagibele emahhashi.” 27 Ngako Mosi wavele welulela sandla sakhe elwandle, futsi kwatsi nasekusa, lwandle lwabuyela endzaweni yalo. Ngesikhatsi bantfu baseGibhithe babaleka, Jehova wabajika ekhatsi kulolwandle.+ 28 Lamanti abuya ambonya letinkalishi temphi, nalamasotja labegibele emahhashi nalo lonkhe libutfo laFaro lebelingene elwandle lilandzela ema-Israyeli.+ Kute ngisho namunye kubo lowasindza.+
29 Kodvwa ema-Israyeli abehamba emhlabatsini lowomile,+ futsi lamanti bekakhe ludvonga ngesekudla nangesencele sawo.+ 30 Ngako ngalelolanga, Jehova wawasindzisa ema-Israyeli kubantfu baseGibhithe,+ futsi ema-Israyeli ababona bafile elugwini lwelwandle. 31 Ema-Israyeli aphindze abona nemandla* lamakhulu Jehova labewasebentise kubantfu baseGibhithe. Ngako acala kumesaba Jehova futsi akholwa kuJehova nakuMosi,+ inceku yakhe.
15 Ngaleso sikhatsi Mosi nema-Israyeli bahlabelela Jehova+ nayi ingoma:
“Angihlabelele Jehova, ngobe uphakeme kakhulu.+
Lihhashi nemgibeli walo ukujike elwandle.+
2 Jehova ungemandla ami, ngobe uyinsindziso yami.+
Lona nguNkulunkulu wami, ngitamdvumisa;+ unguNkulunkulu wababe,+ ngako ngitamphakamisa.+
3 Jehova ulichawe lelinemandla.+ NguJehova libito lakhe.+
4 Tinkalishi taFaro nelibutfo lakhe ukujike elwandle,+
Nemasotja akhe lanemandla acwile eLwandle Lolubovu.+
5 Bambonywa ngemanti aselwandle, bacwila bashona phansi njengelitje.+
6 Awu Jehova, sandla sakho sangesekudla sinemandla lamakhulu;+
Awu Jehova, sandla sakho sangesekudla singasifihlita sitsa.
7 Ngebukhulu bakho lobubabatekako ungawisa labo labamelene nawe;+
Ukhipha intfukutselo yakho, ibashise shengatsi tinhlanga.
8 Waphefumula ngemakhala akho, emanti abutsana;
Lamanti ema njengeludvonga;
Futsi asha ekhatsi nekhatsi nelwandle.
9 Sitsa satsi: ‘Ngitawubacosha, ngibakhandze!
Ngitawutehlukanisela tintfo lengititsetse kubo ngize ngenetiseke!
Ngitawukhipha inkemba yami, ngibabulale ngesandla sami!’+
10 Waphefumula, lwandle lwabambonya;+
Bacwila njengensimbi lesindzako emantini lamanyenti.
11 Awu Jehova, ukhona yini emkhatsini wabonkulunkulu lonjengawe?+
Ngubani lonjengawe, wena lotiveta ungcwele ngendlela lebabatekako?+
Wena lokufanele wesatjwe uphindze udvunyiswe ngetingoma, wena lowenta tintfo letimangalisako.+
12 Welula sandla sakho sangesekudla, umhlaba wabagwinya.+
13 Bantfu bakho lowabahlenga ubahole ngelutsandvo lwakho lolucotfo;+
Ngemandla akho utawubaholela endzaweni yakho lengcwele.
15 Ngaleso sikhatsi baholi* baka-Edomu batawesaba kakhulu,
Nebabusi labanemandla bakaMowabi batawuchachatela.+
Bonkhe bantfu baseKhenani batawuphelelwa litsemba.+
16 Batawufikelwa kwesaba nekutfutfumela.+
Ngenca yemandla akho batawuba njengelitje, beme banganyakati
Kuze kube ngulapho bantfu bakho sebendlulile Jehova,
17 Utawubaletsa ubabeke entsabeni yakho,+
Endzaweni yakho lowatilungiselela kutsi utawuhlala kuyo, Jehova,
Indzawo yakho lengcwele Jehova, lowayenta ngetandla takho.
18 Jehova utawuba yinkhosi, abuse phakadze naphakadze.+
19 Ngesikhatsi emahhashi aFaro netinkalishi takhe temphi nemasotja akhe lagibele emahhashi angena elwandle,+
Jehova wabuyisa lamanti abambonya,+
Kodvwa bantfu baka-Israyeli bahamba emhlabatsini lowomile ekhatsi elwandle.”+
20 Ngako Miriyamu, dzadzewabo Aroni lobekangumphrofethikati, watsatsa ithamborini* futsi nabo bonkhe labanye bafati batsatsa emathamborini bamlandzela, badansa. 21 Miriyamu wavumela lamadvodza, wahlabela watsi:
“Hlabelelani Jehova, ngobe uphakeme kakhulu.+
Lihhashi nemgibeli walo ukujike elwandle.”+
22 Ngekuhamba kwesikhatsi, Mosi wesuka nema-Israyeli eLwandle Lolubovu, baya ehlane laseShuri futsi bahamba emalanga lamatsatfu kulelihlane, kodvwa abawatfolanga emanti. 23 Befika eMara*+ kepha behluleka kunatsa emanti akhona ngobe abebaba. Kungako lendzawo Mosi ayibita ngekutsi yiMara. 24 Ngako labantfu bacala kububula ngaMosi,+ batsi: “Sitawunatsani?” 25 Mosi wakhala kuJehova,+ ngako Jehova wamkhombisa lesinye sihlahla. Ngesikhatsi Mosi ajika lesihlahla kulamanti, ashintja aba mnandzi.
Kuleyo ndzawo, Nkulunkulu wawanika umtsetfo nesisekelo sekwehlulela futsi wawavivinya.+ 26 Nkulunkulu watsi: “Nanitawulilalelisisa livi laJehova Nkulunkulu wenu, nente lokulungile emehlweni akhe, nilalele imitsetfo yakhe niphindze nigcine yonkhe imiyalo yakhe,+ angeke nginiletsele letifo lengatiletsela bantfu baseGibhithe,+ ngobe mine Jehova ngiyaniphilisa.”+
27 Ngemuva kwaloko befika e-Elimu, lapho bekunemitfombo yemanti lengu-12 netihlahla telusundvu letingu-70. Ngako bemisa emathende kuleyo ndzawo, dvutane nalamanti.
16 Ngemuva kwekutsi ema-Israyeli esuke e-Elimu, efika ehlane laseSini,+ lelisemkhatsini we-Elimu neSinayi. Efika lapho ngelilanga lesi-15 lenyanga yesibili ngemuva kwekuphuma kwawo eveni laseGibhithe.
2 Ngesikhatsi ema-Israyeli asehlane, abese acala kukhonona ngaMosi na-Aroni.+ 3 Abesolo atsi kubo: “Kube mane Jehova wasibulala ngesandla sakhe eveni laseGibhithe ngesikhatsi sisatitika ngenyama,+ sitenetisa nangekudla sinkhwa. Nyalo nisikhiphele kulelihlane kuze sonkhe sife sibulawe yindlala.”+
4 Ngemuva kwaloko Jehova watsi kuMosi: “Ngitawunehlisela sinkhwa lesivela ezulwini,+ futsi lilanga ngalinye nguloyo naloyo kufanele aphume atibutsele loko latakudla.+ Loko ngitawukwenta kuze ngibavivinye, ngibone kutsi batawulalela yini umtsetfo wami.+ 5 Kodvwa ngelilanga lesitfupha+ kufanele babutse lokuphindvwe kabili kuloko lebebakubutse ngalalamanye emalanga,+ bese bayakulungisa.”
6 Ngako boMosi na-Aroni bakhuluma nawo onkhe ema-Israyeli batsi: “Ntsambama nitawukwati kutsi nguJehova lowanikhipha eveni laseGibhithe.+ 7 Ekuseni nitayibona inkhatimulo yaJehova, ngobe Jehova ukuvile kububula kwenu ngaye. Besibobani nje tsine kutsi ningabubula ngatsi?” 8 Mosi wachubeka watsi: “Jehova nakaninika inyama lenitawuyidla kusihlwa nesinkhwa lenitawutenetisa ngaso ekuseni, nitawubona kutsi Jehova ukuvile kububula kwenu ngaye. Besibobani nje tsine? Anibubuli ngatsi, kodvwa nibubula ngaJehova.”+
9 Mosi wabese utsi ku-Aroni: “Naku lokufanele ukutjele onkhe ema-Israyeli: ‘Wotani embikwaJehova, ngobe ukuvile kububula kwenu.’”+ 10 Ngekushesha nje Aroni nasekakhulume nawo onkhe ema-Israyeli, agucuka abuka ngasehlane, futsi abona inkhatimulo yaJehova ivela kulensika yelifu.+
11 Jehova wachubeka akhuluma naMosi, watsi: 12 “Ngikuvile kububula kwema-Israyeli.+ Khuluma nawo utsi: ‘Nitawudla inyama kusengakahlwi,* futsi ekuseni nitawutenetisa ngesinkhwa.+ Nakanjani nitawukwati kutsi nginguJehova Nkulunkulu wenu.’”+
13 Ngako-ke kusihlwa ngalelolanga kwagcwala tinyoni* kulenkambu,+ kwase kutsi ekuseni kwagcwala ematolo kuyo yonkhe leyo ndzawo. 14 Atsi nakesuka lamatolo kulelihlane, lapho emhlabatsini kwasala intfo lecolisakele futsi lephushutelako, lefana nesitfwatfwa.+ 15 Ngesikhatsi ema-Israyeli ayibona, abengati kutsi yini, ngako acala kubutana atsi: “Yini lena?” Mosi watsi kuwo: “Lesi sinkhwa Jehova laninike sona kutsi nisidle.+ 16 Naku Jehova lakushito: ‘Ngamunye wenu kufanele abutse loko latawukhona kukudla. Kufanele nikale loko lenikubutsela umuntfu ngamunye ngesikotela lesingaba ngemalitha lamabili,*+ kuye ngekutsi bangakhi bantfu* lenihlala nabo ethendeni.’” 17 Ema-Israyeli enta njalo, akubutsa lokudla. Labanye babutsa lokunyenti kantsi labanye babutsa lokuncane. 18 Batsi nabakukala ngalesikotela, batfola kutsi loyo labebutse lokunyenti abengabi nalokunyenti kakhulu futsi loyo lobutse lokuncane naye abengasweli.+ Bonkhe bebabutse loko lebebatawukhona kukudla.
19 Ngako Mosi watsi kubo: “Kute umuntfu lokufanele akushiye kuze kube sekuseni.”+ 20 Kodvwa abazange bamlalele. Ngesikhatsi labanye kulabantfu bashiya lokunye kwako, ekuseni kwase kunetibungu futsi sekunuka. Ngaleso sizatfu Mosi wabatfukutselela. 21 Bebakubutsa njalo ekuseni, nguloyo naloyo abutse loko latawukhona kukudla. Lilanga belitsi naselishisa, bese kuyancibilika.
22 Ngelilanga lesitfupha, babutsa kabili ngalesikotela lesingaba ngemalitha lamabili.+ Ngako bonkhe baholi baka-Israyeli beta kuMosi futsi bambikela ngaloko. 23 Nakeva ngako, Mosi watsi kubo: “Nguloko Jehova lakushito. Kusasa kutawuba lilanga lekuphumula,* lokulisabatha lelingcwele kuJehova.+ Bhakani loko lenidzinga kukubhaka, nibilise naloko lenidzinga kukubilisa,+ bese lokusele niyakubeka kuze kube sekuseni.” 24 Ngako bakubeka kwaze kwaba sekuseni, njengobe nje Mosi abebatjelile. Akuzange kunuke nobe kube netibungu. 25 Mosi wabese utsi: “Kudleni lamuhla, ngobe leli lilanga lelisabatha kuJehova. Lamuhla kute lenitakutfola emhlabatsini. 26 Nitakubutsa emalanga lasitfupha, kodvwa ngelilanga lesi-7, lokulilanga leliSabatha,+ kute lokutawuba khona.” 27 Nobe kunjalo, ngelilanga lesi-7 labanye bantfu baphuma batsi bayokubutsa, kodvwa kute labakutfola.
28 Ngako Jehova watsi kuMosi: “Kutawuze kube ngunini solo ningafuni kugcina imitsetfo yami nemiyalo yami?+ 29 Khumbulani kutsi Jehova uninikete liSabatha.+ Kungako ngelilanga lesitfupha aninika sinkhwa semalanga lamabili. Ngelilanga lesi-7 wonkhe umuntfu kufanele ahlale lapho akhona khona; kute lokufanele asuke endzaweni lahlala kuyo.” 30 Ngako-ke bantfu baligcina liSabatha* ngelilanga lesi-7.+
31 Ema-Israyeli abita lesinkhwa ngekutsi “yimana.”* Beyinjengenhlanyelo lencane lemhlophe, futsi inambitseka njengemacebelengwane laneluju.+ 32 Mosi wase utsi: “Naku Jehova lakushito: ‘Yigcwaliseni esikoteleni lesingaba ngemalitha lamabili, niyigcine kuto tonkhe titukulwane tenu,+ kuze tibone sinkhwa lenganinika sona nanisehlane ngesikhatsi nginikhipha eveni laseGibhithe.’” 33 Ngako Mosi watsi ku-Aroni: “Tsatsa imbita ufake imana lekalwe ngesikotela lesingaba ngemalitha lamabili, bese uyibeka embikwaJehova kuze igcinwe kuto tonkhe titukulwane tenu.”+ 34 Aroni wabeka lemana embikwelibhokisi leBufakazi*+ kuze igcinwe, njengobe nje Jehova abeshito kuMosi. 35 Ema-Israyeli adla lemana iminyaka lengu-40,+ kwaze kwaba ngulapho efika eveni lebelihlala labanye bantfu.+ Lemana ayidla aze efika ngasemnceleni welive laseKhenani.+ 36 Letikotela lebekatisebentisa betingafaka imana lengaba ngemalitha lamabili.*
17 Onkhe ema-Israyeli esuka ehlane laseSini,+ ahamba ema etindzaweni letehlukehlukene njengobe nje Jehova+ abewatjela. Afike amisa emathende eRefidimu,+ kodvwa akazange awatfole emanti ekunatsa.
2 Ngako labantfu bacala kulwa naMosi+ batsi: “Sinike emanti ekunatsa.” Kodvwa Mosi watsi kubo: “Kungani nilwa nami futsi nichubeka nivivinya Jehova?”+ 3 Ngenca yekutsi labantfu bebome kakhulu, bachubeka bakhonona ngaMosi+ batsi: “Usikhipheleni eGibhithe? Ufuna tsine nemadvodzana etfu kanye nemfuyo yetfu sife ngenca yekoma?” 4 Ekugcineni Mosi wakhala kuJehova, watsi: “Ngibatsini labantfu? Sekusele kancane kutsi bangigcobe ngematje!”
5 Jehova wase utsi kuMosi: “Tsatsa lamanye emadvodza lamadzala aka-Israyeli uhambe embikwalabantfu, uphatse nalendvuku yakho lowashaya ngayo uMfula iNayili.+ Uboyiphatsa ngesandla sakho bese uyahamba. 6 Mine ngitawube ngime embikwakho kulelidvwala laseHorebe. Uboshaya lelidvwala, futsi kutawuphuma emanti kulo bese labantfu bayawanatsa.”+ Ngako Mosi wenta njalo embikwalamadvodza lamadzala aka-Israyeli. 7 Ngako Mosi wabita lendzawo ngekutsi yiMasa*+ nangekutsi yiMeribha,*+ ngobe ema-Israyeli alwa naye futsi avivinya+ Jehova, atsi: “Jehova unatsi yini nobe cha?”
8 Kwabese kufika ema-Amaleki+ eRefidimu+ atekulwa nema-Israyeli. 9 Ngako Mosi watsi kuJoshuwa:+ “Khetsa emadvodza lotawuhamba nawo kuze niyokulwa nema-Amaleki. Kusasa ngitakuma esicongweni seligcuma, futsi esandleni sami ngitawube ngiphetse lendvuku Nkulunkulu weliciniso latsite ngiyiphatse.” 10 Joshuwa wenta njengobe Mosi amtjelile,+ walwa nema-Amaleki. BoMosi na-Aroni, kanye naHure+ bakhuphukela esicongweni saleligcuma.
11 Bekutsi Mosi nakaphakamise tandla takhe, ema-Israyeli awehlule ema-Amaleki, kodvwa lapho nje atehlisa, ema-Amaleki awehlule ema-Israyeli. 12 Ngesikhatsi tandla taMosi setidziniwe, bo-Aroni naHure bamletsela litje kuze ahlale kulo. Bema ngala nangala kwaMosi, base baphakamisa tandla takhe, futsi atizange tehle laze layewushona. 13 Ngako Joshuwa wawancoba ngenkemba+ ema-Amaleki kanye nalabo lebebaseluhlangotsini lwawo.
14 Jehova wase utsi kuMosi: “Bhala lamavi encwadzini kuze abe sikhumbuto, uphindze uwatjele Joshuwa, utsi: ‘Ngitawabhubhisa onkhe ema-Amaleki ngephansi kwemazulu, futsi ngeke aphindze akhunjulwe.’”+ 15 Ngako Mosi wakha li-al’thare walibita ngekutsi yiJehova-nisi,* 16 ngobe watsi: “Ngenca yekutsi sandla sema-Amaleki simelene nesihlalo sebukhosi saJehova,+ Jehova utakulwa nawo kanye nato tonkhe titukulwane tawo.”+
18 Jethro umphristi wakaMidiyani, babetala waMosi,+ weva ngako konkhe Nkulunkulu labekwentele Mosi nema-Israyeli, kutsi Jehova wawakhipha njani eGibhithe.+ 2 Jethro, babetala waMosi abenakekela Siphora, umfati waMosi njengobe Mosi ammikisa kuye, 3 kanye nemadvodzana+ akhe lamabili. Libito lalenye indvodzana yakhe bekunguGeshomu,*+ ngobe Mosi abetsite: “Ngisihambi kulelive.” 4 Lelenye yona wayetsa ngekutsi ngu-Eliyezeri,* ngobe watsi: “Nkulunkulu wababe ungumsiti wami longisindzisile enkembeni yaFaro.”+
5 Ngako Jethro, babetala waMosi, nemadvodzana aMosi kanye naSiphora, beta kuMosi ehlane lapho abemise khona emathende, entsabeni yaNkulunkulu weliciniso.+ 6 Jethro+ watfumela umlayeto kuMosi watsi: “Ngita lapho kuwe, ngihamba nemfati wakho nemadvodzana akho lamabili.” 7 Ngekushesha Mosi waphuma wayohlangabeta babetala, wafike wakhotsama futsi wamcabuza. Babutana imphilo, ngemuva kwaloko bangena ethendeni.
8 Mosi wacocela babetala wakhe ngako konkhe Jehova labekwente kuFaro naseveni laseGibhithe ngenca yema-Israyeli.+ Wamcocela nangabo bonkhe bumatima lebebahlangabetane nabo endleleni+ kanye nekutsi Jehova abebakhulule njani. 9 Jethro wajabula nakeva ngato tonkhe letintfo letinhle Jehova labetentele ema-Israyeli ngekuwakhulula eGibhithe.* 10 Ngako Jethro watsi: “Akadvunyiswe Jehova lowanikhulula eGibhithe nakuFaro, wakhulula bantfu bakhe ekugcilatweni eGibhithe. 11 Nyalo sengiyati kutsi Jehova mkhulu kunabo bonkhe labanye bonkulunkulu+ ngenca yaloko lakwentile kulabo lebebatiphakamisa futsi baphatsa kabi bantfu bakhe.” 12 Ngemuva kwaloko, Jethro babetala waMosi waletsa umnikelo wekushiswa kanye nemihlatjelo kuze inikelwe kuNkulunkulu. Aroni kanye nawo onkhe emadvodza lamadzala aka-Israyeli, beta badla nababetala waMosi embikwaNkulunkulu weliciniso.
13 Ngelilanga lelilandzelako, Mosi wahlala phansi njengenhlalayenta kuze ehlulele bantfu. Labantfu bebasolo befika beme embikwaMosi kusukela ekuseni lize liyoshona. 14 Ngesikhatsi babetala waMosi abona konkhe loko Mosi lebekakwentela labantfu, watsi: “Ukwentelani loku? Kungani uhleti phansi wedvwa, wehlulela bonkhe labantfu labeta kuwe kusukela ekuseni lize liyoshona?” 15 Mosi watsi kuye: “Kungobe labantfu beta kimi kuze bafune sicondziso saNkulunkulu. 16 Nakuvela inkinga, bayiletsa kimi futsi mine kufanele ngehlulele emkhatsini wabo, ngibatjele sincumo saNkulunkulu weliciniso kanye nemitsetfo yakhe.”+
17 Babetala waMosi watsi kuye: “Loku lokwentako akusikahle. 18 Utawugcine udziniwe, wena nalabantfu labeta kuwe, ngobe lomsebenti mkhulu kakhulu kutsi ungawutfwala wedvwa. 19 Ngako-ke ngilalele. Ngitakuniketa seluleko futsi Nkulunkulu utawuba nawe.+ Wena utawukhulumela labantfu kuNkulunkulu weliciniso+ netinkinga tabo utiletse kuye.+ 20 Kufanele ubafundzise ngemiyalo kanye nemitsetfo,+ ubakhombise nendlela lokufanele bahambe ngayo nemsebenti lokufanele bawente. 21 Kodvwa kufanele ukhetse emadvodza lanelikhono+ emkhatsini walabantfu, emadvodza lesaba Nkulunkulu, letsembekile, futsi langafuni kutizuzisa wona.+ Lamadvodza utawabeka kutsi abe baholi betinkhulungwane, baholi bemakhulu, baholi bemashumi lasihlanu kanye nebaholi bemashumi.+ 22 Kufanele ehlulele labantfu nakuvela tinkinga. Tonkhe tinkinga letimatima kakhulu atawutiletsa kuwe,+ kodvwa tinkinga letincane atawutehlulela wona. Yenta lomsebenti ube melula kuwe ngekutsi uwavumele akwetfwalise.+ 23 Nawukwenta loko, futsi Nkulunkulu akuvumela, utawukhona kuwutfwala lomsebenti, nabo bonkhe labantfu batawuhamba benetisekile.”
24 Ngekushesha Mosi wakulalela loko lebekushiwo ngubabetala wakhe futsi wakwenta konkhe labekushito. 25 Mosi wakhetsa emadvodza lanelikhono ka-Israyeli wawabeka kutsi abe baholi balabantfu, aba baholi betinkhulungwane, baholi bemakhulu, baholi bemashumi lasihlanu kanye nebaholi bemashumi. 26 Ngako bekutsi nakuvela tinkinga, lamadvodza abehlulele labantfu. Nakuvela inkinga lematima abeyendlulisela kuMosi,+ kodvwa inkinga lencane abeyehlulela wona. 27 Ngemuva kwaloko Mosi wamvalelisa babetala wakhe+ futsi Jethro wahamba wabuyela eveni lakhe.
19 Ngenyanga yesitsatfu ema-Israyeli aphumile eveni laseGibhithe, efika ehlane laseSinayi ngalo lelolanga.* 2 Esuka eRefidimu+ ahamba aze efika ehlane laseSinayi, amisa emathende khona. Awamisa abukana nentsaba.+
3 Ngemuva kwaloko Mosi waya kuNkulunkulu weliciniso futsi Jehova wambita akulentsaba+ watsi: “Naku lokufanele ukusho endlini yaJakobe, kubantfu baka-Israyeli: 4 ‘Nikubonile loko lengakwenta kubantfu baseGibhithe+ kute nginetfwale ngemaphiko etinsweti, nginiletse kimi.+ 5 Nangabe nitalilalelisisa livi lami, nigcine nesivumelwane sami, nitawuba yimphahla yami lekhetsekile* emkhatsini wato tonkhe tive,+ ngobe wonkhe umhlaba ngewami.+ 6 Kimi nitawuba ngumbuso webaphristi nesive lesingcwele.’+ Nguloko-ke lokufanele ukusho kuma-Israyeli.”
7 Ngako Mosi wahamba wayawubita emadvodza lamadzala alesive, wawatjela onkhe lamavi Jehova labemtjele wona.+ 8 Ngemuva kwaloko, bonkhe bantfu baphendvula ngavi linye batsi: “Konkhe loko Jehova lakushito sitimisele kukwenta.”+ Ngekushesha Mosi wahamba wayawutjela Jehova ngaloko lebekushiwo ngulabantfu. 9 Jehova watsi kuMosi: “Ngitawuta kuwe ngelifu lelikhulu lelimnyama, kuze labantfu beve nangikhuluma nawe futsi batewuhlale bakukholwa.” Ngako Mosi wabikela Jehova ngaloko lebekushiwo ngulabantfu.
10 Ngemuva kwaloko Jehova watsi kuMosi: “Hamba uye kulabantfu ufike ubangcwelise, lamuhla nakusasa, futsi kufanele bawashe timphahla tabo. 11 Kufanele balungele lilanga lesitsatfu, ngobe ngalelilanga lesitsatfu Jehova utakwehlela eNtsabeni iSinayi embikwabo bonkhe bantfu. 12 Ubokwakhela labantfu imincele kulentsaba, bese utsi kubo: ‘Nibocaphela kutsi ningenyukeli kulentsaba nobe ninyatsele emaphetselo ayo. Nobe ngubani loyitsintsako utawubulawa. 13 Loyo muntfu akukafaneli atsintfwe ngesandla, kodvwa kufanele agcotjwe ngematje nobe agwazwe.* Ngisho nobe kusilwane nobe kungumuntfu, kufanele kubulawe.’+ Nabeva umsindvo weluphondvo*+ sebangasondzela kulentsaba.”
14 Ngako Mosi wehla kulentsaba waya kulabantfu, wafike wabangcwelisa futsi bawasha netimphahla tabo.+ 15 Watsi kubo: “Lungelani lilanga lesitsatfu, futsi ningayi nasecansini.”*
16 Ekuseni ngelilanga lesitsatfu, kwaba nekudvuma nemibane, kwaba nelifu lelikhulu lelimnyama+ kulentsaba, kwevakala nemsindvo lomkhulu weluphondvo. Bonkhe bantfu kulenkambu besaba kakhulu.+ 17 Mosi wabese uyabakhipha kulenkambu kuze batewuhlangana naNkulunkulu weliciniso. Ngako bema phansi kwalentsaba. 18 Kwaba nentfutfu kuyo yonkhe iNtsaba iSinayi ngobe Jehova bekehlele kuyo ngemlilo.+ Lentfutfu beyiphakama njengentfutfu lesuka etiko, futsi yonkhe lentsaba yatamatama kamatima.+ 19 Njengobe lomsindvo weluphondvo bewusolo ukhula, Mosi wakhuluma, futsi livi laNkulunkulu weliciniso lamphendvula.
20 Ngako Jehova weta eNtsabeni iSinayi, wehlela esicongweni sayo. Ngemuva kwaloko Jehova wabita Mosi kutsi ete esicongweni salentsaba, Mosi wabese ukhuphukela khona.+ 21 Jehova watsi kuMosi: “Yehla uyewucwayisa labantfu kutsi bangetami kusondzela batewubuka Jehova, ngobe nabenta njalo kutawufa incumbi yebantfu. 22 Tjela nebaphristi, lokungibo labahlale basondzela kuJehova kutsi abatingcwelise kute Jehova angababulali.”+ 23 Mosi wabese utsi kuJehova: “Labantfu ngeke bakhuphukele eNtsabeni iSinayi, ngobe wena usecwayisile, watsi: ‘Yakhani imincele kulentsaba, futsi lentsaba niyente ibe ngcwele.’”+ 24 Kodvwa Jehova watsi kuye: “Yehla, bese ubuya na-Aroni kodvwa ungabavumeli baphristi kanye nalabantfu kutsi basondzele kuJehova, kuze ngingababulali.”+ 25 Ngako Mosi wehla waya kulabantfu, wafike wabatjela.
20 Ngemuva kwaloko Nkulunkulu washo nankha emavi:+
2 “Mine nginguJehova Nkulunkulu wakho, lowakukhipha eveni laseGibhithe, live lebewugcilatwa kulo.+ 3 Ungacali ube nalabanye bonkulunkulu ngaphandle kwami.*+
4 “Ungatenteli sithico nobe umfanekiso wanobe yini lesemazulwini, nobe lesemhlabeni nobe lesemantini ngephansi kwemhlaba.+ 5 Ungakukhotsameli nobe uyengelwe kutsi ukukhonte,+ ngobe mine Jehova Nkulunkulu wakho nginguNkulunkulu lofuna kutsi ukhonte yena yedvwa.+ NginguNkulunkulu loletsa sijeziso sesono lesentiwa bobabe, ngisiletsele emadvodzana abo, situkulwane sesitsatfu nesitukulwane sesine salabo labangitondzako, 6 kodvwa ngikhombise lutsandvo lolucotfo nasetinkhulungwaneni tetitukulwane talabo labangitsandzako futsi labagcina imiyalo yami.+
7 “Ungalisebentisi kabi+ libito laJehova Nkulunkulu wakho, ngobe Jehova ngeke amyekele angamjezisi loyo longalihloniphi+ libito lakhe.
8 “Ubolikhumbula lilanga leliSabatha kuze uligcine lingcwele.+ 9 Utawusebenta futsi wente tonkhe tintfo takho emalanga lasitfupha,+ 10 kodvwa lilanga lesi-7 lilisabatha kuJehova Nkulunkulu wakho. Kute umsebenti lokufanele uwente, wena kanye nendvodzana nobe indvodzakati yakho, sigcili nobe sigcilikati sakho, silwane sakho losifuyile ngisho nemuntfu losihambi lohlala emabaleni* akho.+ 11 Jehova wenta emazulu, umhlaba, lwandle nako konkhe lokukhona kuko ngemalanga lasitfupha, kwatsi ngelilanga lesi-7+ wacala kuphumula. Kungako Jehova alibusisa lilanga leliSabatha futsi walenta laba ngcwele.
12 “Hlonipha babe wakho namake wakho+ kuze utewuphila sikhatsi lesidze kulelive Jehova Nkulunkulu wakho latakunika lona.+
13 “Ungabulali.+
15 “Ungebi.+
16 “Ungakhulumi emanga nawufakaza endzabeni letsintsa umuntfu wakini.+
17 “Ungayihawukeli indlu yemuntfu wakini. Ungamfisi nemfati wakhe,+ sigcili nobe sigcilikati sakhe, inkhabi nobe imbongolo yakhe kanye nanobe yini lanayo.”+
18 Bonkhe labantfu bakuva lokudvuma nalomsindvo weluphondvo, babona nemibane kanye nentfutfu lebeyisuka entsabeni. Nababona letintfo futsi beva lomsindvo besaba kakhulu, ngako bachubeka beme khashane.+ 19 Batsi kuMosi: “Akube nguwe lokhuluma natsi, tsine sitakulalela. Akungabi nguNkulunkulu ngobe sesaba kutsi sitawufa.”+ 20 Ngako Mosi watsi kulabantfu: “Ningesabi ngobe Nkulunkulu weliciniso utele kutewunivivinya+ kuze nitewuchubeka nimesaba, khona ningatewukona.”+ 21 Ngaleso sizatfu, labantfu bachubeka beme khashane, kodvwa Mosi yena wasondzela kulelifu lelikhulu lelimnyama, lapho kwakunaNkulunkulu weliciniso khona.+
22 Jehova wabese utsi kuMosi: “Naku lokufanele ukusho kuma-Israyeli: ‘Nitibonele nine kutsi ngikhulume nani ngisezulwini.+ 23 Ningatenteli bonkulunkulu belisiliva bese ningibhanca nabo, ningatenteli nabonkulunkulu beligolide.+ 24 Kufanele ningentele li-al’thare ngemhlabatsi, futsi kulo nitawukwenta iminikelo yekushiswa, imihlatjelo yekuthula, ninikele ngemihlambi yetimvu, yetimbuti neyetinkhomo. Kuyo yonkhe indzawo lapho ngenta khona libito lami likhunjulwe,+ ngitawukuta kini nginibusise. 25 Naningentela li-al’thare ngematje, kufanele ningawasebentisi ematje lacetulwe ngemathulusi.*+ Ngobe nakwenteka nisebentisa emashizolo, nitawulingcolisa. 26 Ningabokwakha titebhisi tekugibela kuleli-al’thare, kuze ningabembuli bungcunu benu kulo.’
21 “Nayi imitsetfo lokufanele ubatjele yona:+
2 “Nangabe utsenga sigcili+ lesingumHebheru, sitakusebentela iminyaka lesitfupha, bese kutsi ngemnyaka wesi-7 uyasikhulula futsi kute lokufanele sikubhadale kona.+ 3 Nangabe sefika sodvwa, kufanele sihambe sodvwa. Kodvwa nangabe sefika nemfati waso, kufanele sihambe naye. 4 Nangabe inkhosi yaso isinika umfati, bese lomfati usitalela emadvodzana nobe emadvodzakati, lomfati kanye nalabantfwana batawuba benkhosi yaso, futsi lesigcili kufanele sihambe sodvwa.+ 5 Kodvwa nangabe lesigcili sincenga sitsi: ‘Ngiyayitsandza inkhosi yami, futsi ngiyamtsandza umfati wami kanye nemadvodzana ami, ngako ngicela ungangikhululi,’+ 6 lenkhosi yaso kufanele isitsatse iye naso embikwaNkulunkulu weliciniso. Ngemuva kwaloko kufanele isimise emnyango nobe ngasensikeni yemnyango, ibhobose indlebe yaso ngelusungulo. Lesigcili sitawubese siba senkhosi yaso kuphila kwaso konkhe.
7 “Nangabe indvodza itsengisa indvodzakati yayo kutsi ibe sigcili, lendvodzakati angeke ikhululwe ngendlela lokukhululwa ngayo sigcili lesidvuna. 8 Nangabe inkhosi yayo ingajabuli ngayo futsi ingafuni kuyitsatsa ibe ngumfati wayo lomncane, kodvwa ikhetse kuyitsengisela lomunye umuntfu,* ayikavumeleki kuyitsengisela umuntfu losihambi ngobe isuke ingaketsembeki kulendvodzakati. 9 Nangabe ikhetsa kuyiniketa indvodzana yayo kutsi ibe ngumfati wayo, lenkhosi kufanele iyiphatse njengendvodzakati yayo. 10 Nangabe lendvodzana* seyitsatsa lomunye umfati, akukafaneli iyekele kunika lomfati wayo wekucala kudla, kwekwembatsa, kanye nemalungelo akhe ebufati.*+ 11 Nangabe ingamenteli tonkhe letintfo letintsatfu, ukhululekile kutsi angahamba kodvwa angabhadali lutfo.
12 “Nobe ngubani loshaya umuntfu afe, naye kufanele abulawe.+ 13 Kodvwa nangabe loko akwente angakahlosi futsi naNkulunkulu weliciniso akuvumele, ngitawukhetsa indzawo langabalekela kuyo.+ 14 Nangabe umuntfu atfukutselela umuntfu wakubo aze ambulale ngemabomu,+ loyo muntfu kufanele abulawe ngisho nobe abalekela e-al’thare lami.+ 15 Loyo loshaya babe wakhe nobe make wakhe kufanele abulawe.+
16 “Nobe ngubani lotfumba umuntfu+ aphindze amtsengise nobe lomuntfu atfolakale akuye,+ kufanele abulawe.+
17 “Nobe ngubani localekisa babe wakhe nobe make wakhe kufanele abulawe.+
18 “Nangabe emadvodza alwa bese lena lenye ishaya lomuntfu wakubo ngelitje nobe ngesibhakela,* futsi loyo muntfu angafi kodvwa alale phansi endlini, naku lokufanele kwentiwe: 19 Nangabe lomuntfu akhona kuvuka futsi ahambahambe ngephandle asebentisa indvuku, loyo lomshayile akukafaneli ajeziswe. Kunaloko kufanele ancephetele lomuntfu lolimele ngesikhatsi lesimlahlekele angakhoni kusebenta kuze kube ngulapho elulama kahle.
20 “Nangabe umuntfu ashaya sigcili nobe sigcilikati sakhe ngendvuku bese sifela etandleni takhe, kufanele siphindziselelwe.+ 21 Kodvwa nangabe lesigcili nobe sigcilikati sifa ngemuva kwelilanga nobe lamabili, angeke siphindziselelwe ngobe inkhosi yaso yasitsenga ngemali.
22 “Nangabe emadvodza alwa futsi alimate umfati lotetfwele bese ubeleka sisengakefiki sikhatsi*+ kodvwa yena naloluswane bangafi,* loyo lowente loku kufanele ahlawule, kuye ngekwaloko lokushiwo yindvodza yalomfati. Loko lakukhokhako kufanele akukhokhe embikwebehluleli.+ 23 Kodvwa nangabe kuba khona lofako emkhatsini waloluswane namake walo, kufanele kwenanwe kuphila ngekuphila,+ 24 liso ngeliso, litinyo ngelitinyo, sandla ngesandla, lunyawo ngelunyawo,+ 25 kushiswa ngekushiswa, linceba ngelinceba, kushaywa ngekushaywa.
26 “Nangabe umuntfu ashaya sigcili nobe sigcilikati sakhe esweni futsi lilimale lize lingasaboni, kufanele asikhulule ngenca yaleliso laso.+ 27 Nangabe ashaya sigcili nobe sigcilikati sakhe bese kuphuma litinyo laso, kufanele asikhulule ngenca yalelitinyo.
28 “Nangabe inkunzi ihlaba indvodza nobe umfati bese uyafa, lenkunzi kufanele igcotjwe ngematje ize ife,+ nenyama yayo akukafaneli idliwe. Umnikati wayo akukafaneli ajeziswe. 29 Kodvwa nangabe lenkunzi beyinemkhuba wekuhlabana, nemnikati wayo ecwayisiwe ngaloko kodvwa wangayigadzi, bese ibulala indvodza nobe umfati, kufanele igcotjwe ngematje futsi nemnikati wayo kufanele abulawe. 30 Nangabe kutsiwa akakhiphe inhlawulo* kufanele akhiphe konkhe lokutsiwa akakukhiphe, kube linani lekuhlenga kuphila kwakhe. 31 Ngisho nobe lenkunzi ihlabe umfana nobe intfombatana, kufanele kwentiwe loko lokushiwo ngulomtsetfo kumnikati wayo. 32 Nangabe lenkunzi ihlabe sigcili nobe sigcilikati, umnikati wayo kufanele akhiphe tinhlavu telisiliva* letingu-30 atinike inkhosi yaso, futsi lenkunzi kufanele igcotjwe ngematje ize ife.
33 “Nangabe umuntfu avula umgodzi nobe awugubhe bese uwushiya ungakavalwa, futsi kugcumkele inkunzi nobe imbongolo kuwo, 34 umnikati walomgodzi kufanele ahlawule.+ Lomuntfu kufanele akhiphe loko umnikati waleso silwane latsite akakukhiphe, nalesilwane lesifile sibe sakhe. 35 Nangabe inkunzi yalotsite ilimata yalomunye futsi ife, kufanele batsengise lena lephilako bese behlukaniselana lemali labayitsengise ngayo; kufanele baphindze behlukaniselane nalenkunzi lefile. 36 Kodvwa nangabe bekwatiwa kutsi lenkunzi beyinemkhuba wekuhlabana, kepha umnikati wayo angayigadzi, kufanele akhiphe inkunzi lephilako enane lelefile, bese lena lefile iba yakhe.
22 “Nangabe umuntfu eba inkunzi nobe imvu futsi ayihlabe nobe ayitsengise, kufanele akhiphe tinkunzi letisihlanu abhadale lenkunzi layebile, lemvu yona ayibhadale ngetimvu letine.+
2 (“Nangabe lisela+ litfolwa ligcekeza ebusuku bese bayalishaya futsi life, kute licala lengati lelitawuba khona. 3 Kodvwa nangabe loku kwenteka lilanga seliphumile, litawuba khona licala lengati.)
“Lomuntfu lowebile kufanele ahlawule. Nangabe ete lutfo, kufanele atsengiswe kuze abhadale loko lakwebile. 4 Nangabe lalakwebile kutfolakala kuye kusaphila, kungaba yinkunzi, imbongolo nobe imvu, kufanele akhiphe inhlawulo lephindvwe kabili.
5 “Nangabe umuntfu akhipha tilwane takhe kutsi tiye emadlelweni nobe tiyekudla ensimini yemagilebisi bese uyatiyekela tidle ensimini yalomunye, kufanele ahlawule ngalokuncono kakhulu lakutsetse emasimini akhe nobe ensimini yakhe yemagilebisi.
6 “Nangabe kuba nemlilo, futsi ushise tihlahla temanyeva bese kusha nalokuvuniwe nobe lokungakavunwa nobe insimu yonkhe, loyo locale lomlilo kufanele abhadale loko lokushile.
7 “Nangabe umuntfu aniketa lomunye imali nobe tintfo takhe kutsi amgcinele tona, bese tiyebiwa endlini yalolotigcinile, lelisela nalitfolakala kufanele likhiphe inhlawulo lephindvwe kabili.+ 8 Nalingatfolakali lelisela, umnikati walendlu kufanele aletfwe embikwaNkulunkulu weliciniso+ kute kubukwe kutsi akakatebi yini letintfo labenikwe tona. 9 Kuto tonkhe tindzaba letitsintsa tintfo letitfolakele kulomunye ngalokungekho emtsetfweni, kungaba yinkunzi, yimbongolo, yimvu, yingubo, nanobe yini lelahlekile umuntfu latawutsi ngayo: ‘Loku kwami!’ bobabili laba labatsintsekako kufanele baletse lendzaba yabo embikwaNkulunkulu weliciniso.+ Loyo Nkulunkulu latambeka licala kufanele akhiphe inhlawulo lephindvwe kabili, abhadale lona lomunye.+
10 “Nangabe umuntfu aniketa lomunye imbongolo, inkunzi, imvu nobe lesinye silwane lesifuywako kutsi amgcinele sona bese lesilwane siyafa, silimale nobe sitsatfwe kodvwa kubete umuntfu lobonako, 11 loyo lebekaphatsiswe lesilwane kufanele afunge embikwaJehova kutsi akakasebi, futsi lomnikati waso kufanele akwemukele loko. Loyo muntfu akukafaneli ahlawuliswe.+ 12 Nangabe lesilwane sebiwe kuye, kufanele abhadale lomnikati waso. 13 Kodvwa nangabe sidliwe silwane sesiganga, kufanele aletse lesilwane lesifile sibe bufakazi. Angeke ahlawuliselwe intfo ledliwe silwane sesiganga.
14 “Kodvwa nangabe umuntfu aboleka silwane salomunye bese siyalimala nobe sife singekho kumnikati waso, lona losibolekile kufanele ahlawule. 15 Nangabe besikumnikati waso, lona losibolekile angeke ahlawuliswe. Nangabe abekhiphe imali kuze abolekwe sona, lemali layikhiphile ngiyo letawuba yinhlawulo.
16 “Nangabe umuntfu ancenga intfombi lekusete letsembisene naye futsi alale nayo, kufanele akhiphe emalobolo kuze ayitsatse ibe ngumfati wakhe.+ 17 Babe wayo nakala kumniketa yona, lomuntfu kufanele abhadale imali lelingana nemalobolo.
18 “Ningamvumeli umfati longumtsakatsi kutsi aphile.+
19 “Nobe ngubani lolala nesilwane kufanele abulawe.+
20 “Nobe ngubani lowentela labanye bonkulunkulu imihlatjelo kunekutsi entele Jehova, kufanele abulawe.+
21 “Ningabomphatsa kabi umuntfu losihambi nobe nimcindzetele,+ ngobe nani nake naba tihambi eveni laseGibhithe.+
22 “Ningabomhlupha umfelokati nobe intsandzane.+ 23 Nangabe nibahlupha bese bayakhala kimi, nakanjani ngitawukuva kukhala kwabo,+ 24 futsi intfukutselo yami itawuvutsa. Ngitanibulala ngenkemba, bese bafati benu baba bafelokati, nebantfwana benu babe tintsandzane.
25 “Nangabe umuntfu wami loweswele* futsi lohlala nawe umboleka imali, kufanele ungenti njengalabanye bantfu lababolekisa ngemali. Akukafaneli umbite intalo.+
26 “Nangabe utsatsa ingubo yemuntfu wakini kutsi ibe sibambiso semali lomboleke yona,+ lengubo kufanele uyibuyisele kuye lingakashoni lilanga. 27 Ngobe ikuphela kwengubo yakhe nobe kwekwembatsa lanako. Ngako lomuntfu utawubese ulala ngani?+ Nakakhala kimi, nakanjani ngitakuva kukhala kwakhe ngobe ngineluvelo.*+
28 “Ningabomcalekisa* Nkulunkulu+ nobe nicalekise umholi losemkhatsini wenu.+
29 “Nibonikela ngenala leniyitfole emasimini kanye nangenala yaloko lenikutfole ematjeni ekuhluta liwayini nangemafutsa.+ Bantfwana benu bekucala labadvuna kufanele nibanike mine.+ 30 Naku lokufanele nikwente ngematibulo etinkhomo newetimvu tenu:+ Atawuhlala nabonina emalanga langu-7, bese ngelilanga lesi-8 niwanika mine.+
31 “Kufanele nibe bantfu bami labangcwele,+ futsi ningayidli inyama yanobe yini lebulewe silwane sesiganga.+ Leyo nyama kufanele niyinike tinja.
23 “Ungawusakati* umbiko longemanga.+ Ungabambisani nemuntfu lomubi ngekutsi ube ngufakazi wemanga.+ 2 Ungalilandzeli linyenti ekwenteni lokubi, futsi ungawakhulumi emanga nawuniketa bufakazi kuze nje ujabulise linyenti.* 3 Kufanele ungakhetsi nakunelicala lelitsintsa umuntfu loweswele.+
4 “Nawuhlangana nenkhabi nobe imbongolo yemuntfu lositsa sakho ilahlekile, kufanele uyibuyisele kuye.+ 5 Nawubona imbongolo yemuntfu lokutondzako iwe nemtfwalo wayo, akukafaneli wendlule unganaki. Ubomsita ayivuse.+
6 “Ungamehluleli kabi umuntfu loweswele nakutekwa licala lakhe.+
7 “Ungatifaki ebufakazini lobungemanga,* futsi ungambulali umuntfu lote licala nobe umuntfu lolungile, ngobe angeke ngimemukele umuntfu lowenta leso sento lesibi.*+
8 “Ungavumi kudizelwa, ngobe kudizelwa kuyamshintja umuntfu lowehlulela kahle futsi kungawashintja nemavi emuntfu lolungile.+
9 “Ungamcindzeteli umuntfu losihambi, ngobe niyati kutsi kunjani kuba tihambi,* njengobe nani benitihambi eveni laseGibhithe.+
10 “Kufanele ulime umhlaba wakho iminyaka lesitfupha futsi uvune loko lokuhlanyele.+ 11 Kodvwa ngemnyaka wesi-7 ubowuyekela ungawulimi, futsi bantfu labeswele batawudla loko lokutawumila kuwo bese lokusalako kudliwe tilwane tesiganga. Loku kufanele ukwente nasensimini yakho yemagilebisi kanye nasensimini yetihlahla temncumo.
12 “Utawukwenta imisebenti yakho emalanga lasitfupha, kodvwa ngelilanga lesi-7 kufanele ungasebenti, kuze inkhabi nembongolo yakho kuphumule, nendvodzana yesigcilikati sakho kanye nemuntfu losihambi nabo batfole kuphumula.+
13 “Cinisekani kutsi nikwenta konkhe lengikushito kini.+ Emabito alabanye bonkulunkulu akangaphatfwa nekuphatfwa emkhatsini wenu, futsi akangevakali aphuma emilonyeni yenu.+
14 “Njalo ngemnyaka nibongentela imikhosi lemitsatfu.+ 15 Nitawugubha uMkhosi Wesinkhwa Lesite Imvubelo.+ Ngesikhatsi lengasibeka enyangeni ya-Abibi,*+ nitawudla sinkhwa lesite imvubelo emalanga langu-7, njengobe nje nganiyala, ngobe ngaleso sikhatsi naphuma eveni laseGibhithe. Kute lokufanele ete embikwami angakaphatsi lutfo.+ 16 Nitawuphindze nigubhe uMkhosi Wesivuno* setitselo tekucala temisebenti yenu, lokunguloko lenikulimile emasimini.+ Ekupheleni kwemnyaka nasenibutsa titselo temisebenti yenu emasimini, nitawugubha neMkhosi Wekubutsa.*+ 17 Onkhe emadvodza* kufanele ete embikweNkhosi yeliciniso lenguJehova,+ katsatfu ngemnyaka.
18 “Nanenta umhlatjelo, ingati ningaboyinikela nanobe yini lenemvubelo. Iminikelo yemanoni leyentiwa emikhosini yami kufanele ningayibeki kuze kube sekuseni.
19 “Titselo tekucala letivutsiwe temhlaba wenu letincono kakhulu kufanele nitiletse endlini yaJehova Nkulunkulu wenu.+
“Ningalibilisi lizinyane lembuti elubisini lwenina.+
20 “Ngitawutfumela ingilosi letawuhamba embikwenu+ kuze inigadze endleleni futsi iniyise endzaweni lenginilungisele yona.+ 21 Niboyilalela, nikunake naloko lekushoko. Ningamelani nayo ngobe ngeke iticolele tiphambeko+ tenu njengobe ita ngeligama lami. 22 Kodvwa nangabe nikulalelisisa loko lekushoko futsi nenta konkhe lenginitjela kona, ngitawuba sitsa setitsa tenu, ngimelane nalabo labamelana nani. 23 Ingilosi yami itawuhamba embikwenu iniyise eveni lema-Amori, lemaHethi, lemaPheresi, lemaKhenani, lemaHivi nelemaJebhusi, futsi mine ngitawuticotfula letive.+ 24 Bonkulunkulu bato kufanele ningabakhotsameli nobe nincengelwe kutsi nibakhonte, ningatilingisi netintfo letentiwa ngulabo bantfu.+ Esikhundleni saloko kufanele nibaphihlite labonkulunkulu, nibhidlite nematje abo langcwele.+ 25 Kufanele nikhonte Jehova Nkulunkulu wenu,+ futsi yena utawunibusisa ngesinkhwa nangemanti.+ Utawususa kugula emkhatsini wenu.+ 26 Bafati labaseveni lenu angeke bonakalelwe tisu nobe bangabi nembeleko,+ futsi ngitawunenta niphile sikhatsi lesidze.*
27 “Lapho nine nisengakefiki, ngitawubangela kutsi bangesabe,+ futsi ngitawubenta badideke bonkhe bantfu labalwa nani. Ngitawukwenta kutsi tonkhe titsa tenu nitehlule bese tiyanibalekela.*+ 28 Nitawutsi nisengakefiki, ngiwente aphelelwe ngemandla*+ emaHivi, emaKhenani kanye nemaHethi, ngaleso sizatfu abaleke embikwenu.+ 29 Angeke ngiwacoshe ngemnyaka munye, kuze lelive lingasali lingenamuntfu bese ligcwala tilwane tesiganga futsi tinilimate.+ 30 Ngitawacosha kancane kancane, kuze kube ngulapho senibanyenti, nalelive senilitsetse laba lenu.+
31 “Imincele yenu itawusuka eLwandle Lolubovu iye elwandle lwemaFilisti, isuke ehlane iyewufika eMfuleni,*+ ngobe ngitawubanikela esandleni senu bantfu labahlala khona futsi nitawubacosha embikwenu.+ 32 Ningenti sivumelwane nabo nobe nabonkulunkulu babo.+ 33 Labantfu kufanele bangahlali eveni lenu, kuze banganibangeli kutsi none kimi. Nanitawukhonta bonkulunkulu babo, loko kutawuba lugibe kini.”+
24 Nkulunkulu wabese utsi kuMosi: “Khuphuka uye kuJehova, wena na-Aroni, naNadabi, na-Abihu+ kanye nemadvodza lamadzala aka-Israyeli langu-70, futsi niguce phansi nisesekhashane. 2 Nguwe kuphela lokufanele usondzele kuJehova, kodvwa lalabanye bona bangasondzeli, futsi sonkhe lesive akukafaneli sikhuphuke.”+
3 Ngemuva kwaloko Mosi waya kulabantfu, wabatjela konkhe loko Jehova bekakushito kanye nayo yonkhe imitsetfo Nkulunkulu lebekamtjele yona.+ Bonkhe baphendvula ngavi linye batsi: “Konkhe loko Jehova lakushito sitimisele kukwenta.”+ 4 Ngako Mosi wakubhala phansi konkhe loko Jehova labekushito.+ Ngemuva kwaloko wavuka ekuseni kakhulu, wakha li-al’thare phansi kwentsaba, wabeka nematje esikhumbuto langu-12 lamelele tive letingu-12 taka-Israyeli. 5 Nakacedza, watfuma emajaha aka-Israyeli, futsi enta iminikelo yekushiswa anikela nangetinkhabi taba yimihlatjelo yekuthula+ kuJehova. 6 Mosi wabese utsatsa ihhafu yalengati wayifaka etindishini, lelenye ihhafu wayifafata e-al’thare. 7 Watsatsa nencwadzi yesivumelwane wayifundzela labantfu,+ bona batsi: “Konkhe loko Jehova lakushito sitimisele kukwenta, futsi sitakulalela.”+ 8 Ngako Mosi watsatsa lengati, wafafata ngayo labantfu+ futsi watsi: “Lena yingati yesivumelwane Jehova lasente nani ngekuvumelana nawo onkhe lamavi.”+
9 Mosi na-Aroni, naNadabi na-Abihu kanye nalamadvodza lamadzala aka-Israyeli langu-70 bakhuphuka, 10 futsi babona Nkulunkulu wa-Israyeli.+ Ngephansi kwetinyawo takhe bekunalokunjengesiyilo sesafire, kuhlanteke njengemazulu lucobo lwawo.+ 11 Nkulunkulu akazange abalimate labaholi bema-Israyeli.+ Bambona Nkulunkulu weliciniso embonweni futsi badla baphindze banatsa.
12 Jehova wabese utsi kuMosi: “Wota lapha kimi entsabeni futsi uhlale khona. Ngitakuniketa tibhelekece tematje lengitawubhala kuto imitsetfo nemiyalo kute ngifundzise labantfu.”+ 13 Ngako Mosi wesuka naJoshuwa inceku yakhe,+ futsi wakhuphukela entsabeni yaNkulunkulu weliciniso.+ 14 Kodvwa watjela lamadvodza lamadzala watsi: “Salani lapha nisimele size sibuye.+ Bakhona bo-Aroni naHure,+ ngako nobe ngubani lonetinkinga angaya kubo.”+ 15 Mosi wabese ukhuphukela kulentsaba, futsi beyisembonywe lifu.+
16 Inkhatimulo yaJehova+ yachubeka ikuleNtsaba iSinayi,+ nalelifu layimbonya emalanga lasitfupha. Ngelilanga lesi-7 Nkulunkulu wabita Mosi akulelifu. 17 Kuma-Israyeli lebekabukele, lenkhatimulo yaJehova lebeyibonakala esicongweni salentsaba beyinjengemlilo locotfulako. 18 Mosi wangena kulelifu futsi wenyukela kulentsaba.+ Wahlala khona emalanga langu-40 nebusuku lobungu-40.+
25 Jehova wabese utsi kuMosi: 2 “Tjela ema-Israyeli kutsi abekele eceleni iminikelo latayiletsa kimi, bese wena kanye nebaholi balesive niya kubo bonkhe bantfu labanenhlitiyo levumako, nitsatse leminikelo yami.+ 3 Nayi iminikelo lokufanele niyitsatse kubo: ligolide,+ lisiliva,+ litfusi,+ 4 intsambo leluhlata njengesibhakabhaka, insontfo lebukhwebeletane,* indvwangu lebovu, ilineni lecolisakele, boya bembuti, 5 tikhumba tetimvu letidaywe taba bovu, tikhumba tetilwane,* sigodvo sesihlahla semgamba,+ 6 emafutsa etibane,+ ibhalisamu yekwenta emafutsa ekugcoba,*+ imphepho leneliphunga lelimnandzi,+ 7 ematje e-oniksi kanye nalamanye ematje lokufanele kuhlotjiswe ngawo sidziya+ nesembatfo sesifuba.+ 8 Kufanele bangentele indzawo lengcwele, futsi ngitawuhlala emkhatsini wabo.+ 9 Kufanele wente lithende lekukhontela* kanye nato tonkhe tintfo letikulo ulandzela lendlela* lengikukhombisa yona njengobe injalo.+
10 “Ubowenta libhokisi ngesigodvo sesihlahla semgamba, libe ngemasentimitha langaba ngu-111* budze, emasentimitha langaba ngu-66* bubanti kanye nemasentimitha langaba ngu-66* kuphakama.+ 11 Ubolinameka ngeligolide lelicwengisisiwe.+ Utawulinameka ngeligolide ngephandle nangekhatsi, futsi ekugcineni kwalo ufake libhande lelingumhlobiso lelentiwe ngeligolide.+ 12 Kufanele wente emajiva lamane ngeligolide bese uwafaka ngenhla kwetinyawo talo letine. Emajiva lamabili atawuba ngenhlanye nalawa lamanye lamabili abe ngenhlanye. 13 Ubokwenta netindvuku ngesigodvo sesihlahla semgamba bese utinameka ngeligolide.+ 14 Letindvuku kufanele utifake kuletimbobo talamajiva langala nangale kwaleLibhokisi kuze niliphakamise ngato. 15 Ningatikhiphi kulamajiva aleLibhokisi, kufanele tihlale tikuwo.+ 16 KuleLibhokisi ubofaka tibhelekece tematje letibufakazi lengitakunika tona.+
17 “Kufanele wente nesimbonyo ngeligolide lelicwengisisiwe, sibe ngemasentimitha langaba ngu-111 budze nemasentimitha langaba ngu-66 bubanti.+ 18 Kufanele wente nemakherubhi lamabili ngeligolide, uwente* abe ngetulu kwalesimbonyo, lelinye libe ngala lelinye libe ngale.+ 19 Lamakherubhi akabe semaphetselweni omabili alesimbonyo, lelinye libe ngala lelinye libe ngale kwaso. 20 Kufanele avule timphiko tawo tibuke etulu, asibekele lesimbonyo ngaletimphiko,+ futsi abukane. Buso bawo kufanele bubuke phansi kulesimbonyo. 21 Lesimbonyo+ utasibeka etikwaleLibhokisi, ekhatsi kwalo ufake letibhelekece tematje letibufakazi lengitakunika tona. 22 Ngitawubonakala kuwe lapho futsi ngikhulume nawe ngisetikwalesimbonyo,+ ngikunikete nayo yonkhe imitsetfo lokufanele uyitjele ema-Israyeli, ngibe ngisemkhatsini walamakherubhi lamabili lasetikwalelibhokisi leBufakazi.
23 “Kufanele wente nelitafula+ ngesigodvo sesihlahla semgamba, libe ngemasentimitha langaba ngu-89* budze, emasentimitha langaba ngu-45* bubanti nemasentimitha langaba ngu-66* kuphakama.+ 24 Kufanele ulinameke ngeligolide lelicwengisisiwe, emaphetselweni alo ufake umhlobiso lowentiwe ngeligolide. 25 Ubokwenta nelibhande lelilingana nebubanti besandla* bese ufaka nemhlobiso weligolide lotungeleta ngephansi kwalelibhande. 26 Ubokwenta emajiva lamane ngeligolide bese uwafaka emakoneni alo lamane, lapho kufakwe khona tinyawo talo letine. 27 Lamajiva kufanele asondzele kulelibhande kuze kufakwe kuwo tindvuku lokutawuphakanyiswa ngato lelitafula. 28 Letindvuku ubotenta ngesigodvo sesihlahla semgamba bese utinameka ngeligolide. Lelitafula nitawuliphakamisa ngato.
29 “Utawukwenta titja talelitafula, tindzebe talo, kanye netindziwo netindishi lokutawutfululwa ngato iminikelo yalokunatfwako. Konkhe kufanele kwentiwe ngeligolide lelicwengisisiwe.+ 30 Ubobeka sinkhwa* njalo embikwami sibe kulelitafula.+
31 “Kufanele wente lutsi lwesibane+ ngeligolide lelicwengisisiwe. Lolutsi lwesibane kufanele lwentiwe ngesandvo. Sisekelo salo, sicu, emagala, timbali, imidvumba yalo kanye nemacembe langephansi kwaletimbali, konkhe kutawuba yintfo yinye.+ 32 Lolutsi lwesibane lutawuba nemagala lasitfupha, ngenhlanye kube nalamatsatfu kuphindze kube nalamanye lamatsatfu ngenhlanye. 33 Ligala ngalinye kulawa lamatsatfu langenhlanye kufanele libe netimbali letintsatfu letimise kwetimbali te-alimondi, nguleyo naleyo mbali ibe nemidvumba kanye nemacembe ngephansi kwayo. Nakulawa lamanye emagala lamatsatfu langenhlanye, ngalinye kufanele libe netimbali letintsatfu letimise kwetimbali te-alimondi, nguleyo naleyo mbali ibe nemidvumba kanye nemacembe ngephansi kwayo. Atawuba njalo-ke lamagala lasitfupha lasuka kulesicu salolutsi lwesibane. 34 Kulesicu salolutsi lwesibane kufanele kube netimbali letine letimise kwetimbali te-alimondi, nguleyo naleyo mbali itawuba nemidvumba kanye nemacembe ngephansi kwayo. 35 Kufanele kube nemdvumba munye ngephansi kwemagala lamabili ekucala laphuma kulesicu, kube nalomunye umdvumba ngephansi kwemagala lamabili lalandzelako kanye nalomunye umdvumba ngephansi kwemagala lamabili ekugcina, kuwo onkhe lamagala lasitfupha laphuma kulesicu. 36 Lemidvumba nalamagala kanye nalo lonkhe lolutsi lwesibane kutawuba yintfo yinye leyentiwe* ngeligolide lelicwengisisiwe.+ 37 Lolutsi lwesibane kufanele ulwente lube netibane letingu-7, futsi nasetikhanyisiwe titawukhanyisa lendzawo lesembikwalo.+ 38 Tindlawu kanye netitja talo tekufaka emalahle kufanele tentiwe ngeligolide lelicwengisisiwe.+ 39 Lolutsi lwesibane kanye nako konkhe lokuhambisana nalo kufanele kwentiwe ngeligolide lelicwengisisiwe lelinesisindvo selithalenta.* 40 Ciniseka kutsi konkhe ukwenta ulandzela lendlela lengikukhombise yona entsabeni.+
26 “Lelithende lekukhontela+ utawulakha ngetindvwangu letingu-10 letentiwe ngelineni lecolisakele futsi lephotsiwe, nangentsambo leluhlata njengesibhakabhaka, nangensontfo lebukhwebeletane* kanye nangentsambo lebovu. Kufanele utfungele imihlobiso+ yemakherubhi+ kuletindvwangu. 2 Indvwangu ngayinye kufanele ibe ngemamitha langaba ngu-13* budze, nemamitha langaba mabili* bubanti. Tonkhe letindvwangu kufanele tilingane.+ 3 Tindvwangu letisihlanu kufanele tihlanganiswe todvwa kuze tilandzelane, naleletinye letisihlanu nato tihlanganiswe todvwa tilandzelane. 4 Ubokwenta tihilelo ngentsambo leluhlata njengesibhakabhaka emphetfweni wendvwangu lesekugcineni kuleti letihlanganisiwe, futsi utawukwenta lokufanako nasemphetfweni wendvwangu lesekugcineni kuleti letinye letihlanganisiwe. Letihilelo utawutenta lapho kutawuhlangana khona letindvwangu. 5 Utawukwenta tihilelo letingu-50 emphetfweni walenye yaletindvwangu letisekugcineni, uphindze wente tihilelo letingu-50 emphetfweni walelenye, kuze letihilelo ticondzane lapho titawuhlanganiswa khona. 6 Kufanele wente emahhuka eligolide langu-50 futsi uhlanganise ngawo letindvwangu, ngaleyo ndlela lelithende lekukhontela litawuba yintfo yinye.+
7 “Utawukwenta netindvwangu tekumbonya lelithende lekukhontela, futsi kufanele utente ngeboya bembuti.+ Letindvwangu kufanele tibe ngu-11.+ 8 Indvwangu ngayinye itawuba ngemamitha langaba ngu-13* budze, nemamitha langaba mabili bubanti. Tonkhe letindvwangu kufanele tilingane. 9 Letisihlanu tato kufanele utihlanganise todvwa, naleletinye letisitfupha nato utihlanganise todvwa. Indvwangu yesitfupha lengembili kulelithende kufanele uyigoce. 10 Utawukwenta tihilelo letingu-50 emphetfweni wendvwangu lesekugcineni kuleti tekucala, wente netihilelo letingu-50 emphetfweni wendvwangu lesekugcineni kuleti letinye. Letihilelo utawutenta lapho kutawuhlangana khona letindvwangu. 11 Kufanele wente emahhuka elitfusi langu-50, uwafake kuletihilelo kuze uhlanganise letindvwangu, ngaleyondlela lelithende litawuba yintfo yinye. 12 Letindvwangu kufanele tigabance. Lenye incenye itawugabanca ngemuva kwalelithende lekukhontela. 13 Leletinye tincenye titawugabanca emihlubulweni yalelithende. Kufanele tigabance ngebudze lobungemasentimitha langaba ngu-45 emhlubulweni ngamunye, kuze lelithende lekukhontela limbonyeke.
14 “Utawuphindze wente lenye indvwangu yekumbonya lelithende ngetikhumba tetimvu letidaywe taba bovu, ngetulu kwayo wente nalenye indvwangu yekumbonya ngetikhumba tetilwane.*+
15 “Emabhaluko*+ alelithende lekukhontela utawenta ngesigodvo sesihlahla semgamba, futsi uwamise acondze.+ 16 Libhaluko ngalinye kufanele libe ngemamitha langaba sihlanu* kuphakama, bubanti balo bube ngemasentimitha langaba ngu-66. 17 Libhaluko ngalinye kufanele libe netinhlokwana letimbili letilinganisile. Kufanele uwente ngaleyondlela onkhe emabhaluko alelithende lekukhontela. 18 Umhlubulo walelithende lekukhontela loseningizimu kufanele uwentele emabhaluko langu-20, futsi atawubuka eningizimu.
19 “Utawukwenta emaseko+ elisiliva langu-40 ngephansi kwalamabhaluko langu-20. Kutawuba nemaseko lamabili ngephansi kwelibhaluko lekucala kuze kungene letinhlokwana talo letimbili, futsi kube nalamabili ngephansi kwelibhaluko ngalinye kulawa lalandzelako kuze kungene tinhlokwana talo letimbili.+ 20 Kufanele wente emabhaluko langu-20 latawuba senyakatfo yalelithende lekukhontela, 21 wente nemaseko awo elisiliva langu-40. Kutawuba nemaseko lamabili ngephansi kwelibhaluko lekucala, nalamabili ngephansi kwelibhaluko ngalinye kulawa lalandzelako. 22 Incenye lengemuva yalelithende lekukhontela lengasenshonalanga kufanele uyentele emabhaluko lasitfupha.+ 23 Utawukwenta emabhaluko lamabili latawuba semakoneni langemuva alelithende lekukhontela. 24 Kufanele abhancane kusuka phansi kuya etulu, kuze kuyewufika ejiveni lekucala. Omabili kufanele entiwe ngalendlela futsi abe semakoneni alelithende. 25 Lamabhaluko atawuba ngu-8, aphindze abe nemaseko elisiliva langu-16. Kutawuba nemaseko lamabili ngephansi kwelibhaluko lekucala, nalamabili ngephansi kwelibhaluko ngalinye kulawa lalandzelako.
26 “Kufanele wente imigcala ngesigodvo semgamba, kube nemigcala lesihlanu letawungena kulamabhaluko lakumunye walemihlubulo yalelithende lekukhontela,+ 27 futsi kube naleminye lesihlanu letawungena kulamabhaluko lakulolomunye umhlubulo, kanye naleminye lesihlanu letawungena kulawo lasencenyeni lengemuva yalelithende lekukhontela, enshonalanga. 28 Umgcala lotawungena emkhatsini kulemihlubulo kufanele usuke ekucaleni uze uphumele ekugcineni kwalelithende.
29 “Lamabhaluko kufanele uwanameke ngeligolide,+ nalamajiva lokutawungena kuwo lemigcala utawenta ngeligolide, futsi nalemigcala kufanele uyinameke ngeligolide. 30 Lelithende lekukhontela kufanele ulakhe ngalendlela lengikukhombise yona lapha entsabeni.+
31 “Kufanele wente indvwangu+ ngentsambo leluhlata njengesibhakabhaka, nangensontfo lebukhwebeletane,* nangentsambo lebovu kanye nangelineni lecolisakele futsi lephotsiwe. Utawutfungela imihlobiso yemakherubhi kulendvwangu. 32 Utayilengisa etinsikeni letine letentiwe ngemgamba letinamekwe ngeligolide. Emahhuka ato kufanele abe eligolide. Letinsika titawukuma etikwemaseko lamane elisiliva. 33 Lendvwangu utayilengisa ngaphansi kwalamahhuka lahlanganise tindvwangu telithende, bese ungenisa libhokisi leBufakazi+ ngekhatsi eNgcwelengcwele. Lendvwangu itawehlukanisa iNgcwele+ neNgcwelengcwele.+ 34 Kufanele ubeke lesimbonyo etikwalelibhokisi leBufakazi eNgcwelengcwele.
35 “Lelitafula utawulibeka eNgcwele, bese lolutsi lwesibane+ ulubeka ngaseningizimu yalelithende lekukhontela, lubukane nalelitafula. Lelitafula lona litawuba ngasenyakatfo. 36 Utawukwenta indvwangu* letawuba sekungeneni kwalelithende ngentsambo leluhlata njengesibhakabhaka, nangensontfo lebukhwebeletane, nangentsambo lebovu, kanye nangelineni lecolisakele futsi lephotsiwe.+ 37 Utawukwenta tinsika letisihlanu ngemgamba kuze ulengise lendvwangu,* uphindze utinameke ngeligolide. Emahhuka ato kufanele abe eligolide, futsi utawukwenta emaseko elitfusi lasihlanu letitawukuma etikwawo.
27 “Kufanele wente li-al’thare ngesigodvo semgamba.+ Litawuba ngemamitha langaba mabili* budze, nemamitha langaba mabili bubanti. Ngako budze nebubanti balo kufanele bulingane futsi kuphakama kwalo kube ngetudlwana kwemitha.*+ 2 Ubokwenta timphondvo+ emakoneni alo lamane, futsi letimphondvo titawuba yintfo yinye naleli-al’thare. Leli-al’thare kufanele ulinameke ngelitfusi.+ 3 Kufanele wente emabhakede ekukhipha umlotsa,* wente nemafosholo, tindishi, timfologo netitja tekufaka emalahle. Tonkhe letintfo utawutenta ngelitfusi.+ 4 Ubolentela sisefo selitfusi, wente nemajiva lamane elitfusi emakoneni alo lamane. 5 Lesisefo utasifaka ngentansi kwelibhande lelingumhlobiso lelitungelete leli-al’thare, sehle sifike emkhatsini walo. 6 Leli-al’thare kufanele ulentele tindvuku ngesigodvo semgamba futsi utinameke ngelitfusi. 7 Letindvuku titawufakwa kulamajiva lasemihlubulweni lemibili yaleli-al’thare, kuze litfwalwe ngato.+ 8 Kufanele ulakhe libe njengelibhokisi lemapulango lelivulekile. Ubolenta ngendlela lengikukhombise ngayo entsabeni.+
9 “Lelithende lekukhontela litawuba nelibala.*+ Luhlangotsi lwalelibala loluseningizimu lutawuba netindvwangu letilengisiwe telineni lecolisakele futsi lephotsiwe. Letindvwangu titawuba ngemamitha langaba ngu-45* budze.+ 10 Loluhlangotsi lutawuba netinsika letingu-20 kanye nemaseko elitfusi langu-20. Emahhuka aletinsika kanye netintfo tato tekuhlanganisa* kutawukwentiwa ngelisiliva. 11 Tindvwangu letitawulengiswa eluhlangotsini lolusenyakatfo nato titawuba ngemamitha langaba ngu-45 budze. Titawuba netinsika tato letingu-20 kanye nemaseko elitfusi langu-20. Letinsika titawuba nemahhuka kanye netintfo tekuhlanganisa* letentiwe ngelisiliva. 12 Eluhlangotsini lolusenshonalanga kutawulengiswa tindvwangu letingemamitha langaba ngu-22* budze, letitawulingana nebubanti balelibala. Kutawuba netinsika letingu-10 kanye nemaseko langu-10. 13 Bubanti beluhlangotsi lolungasemphumalanga butawuba ngemamitha langaba ngu-22. 14 Kulenye incenye yaloluhlangotsi kufanele kulengiswe tindvwangu letingemamitha langaba ngu-7,* kube netinsika letintsatfu kanye nemaseko ato lamatsatfu.+ 15 Nakulelenye incenye kutawulengiswa tindvwangu letingemamitha langaba ngu-7, kuphindze kube netinsika letintsatfu kanye nemaseko ato lamatsatfu.
16 “Ligede lalelibala kufanele libe nendvwangu* lengemamitha langaba ngu-9* budze. Lendvwangu kufanele yelukwe ngentsambo leluhlata njengesibhakabhaka, nangensontfo lebukhwebeletane,* nangentsambo lebovu kanye nangelineni lecolisakele futsi lephotsiwe.+ Kufanele kube netinsika letine kanye nemaseko ato lamane.+ 17 Tonkhe tinsika letitungelete lelibala titawuba netintfo tekufasa letentiwe ngelisiliva kanye nemahhuka elisiliva, kodvwa emaseko ato atawuba elitfusi.+ 18 Lelibala litawuba ngemamitha langaba ngu-45 budze,+ libe ngemamitha langaba ngu-22 bubanti, kantsi kuphakama kwaletindvwangu letentiwe ngelineni lecolisakele futsi lephotsiwe kufanele kube ngemamitha langaba mabili, futsi kutawuba nemaseko elitfusi. 19 Tonkhe titja netintfo lokwentiwa ngato imisebenti yasethendeni lekukhontela, kanye netikhonkwane talelithende netelibala kufanele tentiwe ngelitfusi.+
20 “Kufanele utjele ema-Israyeli kutsi aletse emafutsa emncumo lacengekile lokutawukhanyiswa ngawo, kuze tibane tihlale tikhanya.+ 21 Aroni nemadvodzana akhe batawunakekela letibane letiseNgcwele, kulelithende lekuhlangana, kuze tihlale tikhanya embikwaJehova+ kusukela ekushoneni kwelilanga kuze kube sekuseni. Lona kutawuba ngumtsetfo lohlala njalo lokufanele ulandzelwe ngema-Israyeli+ kuto tonkhe titukulwane tawo.
28 “Ubobita umnakenu Aroni kanye nemadvodzana akhe kuze babe baphristi,+ yena+ kanye nemadvodzana akhe,+ boNadabi, Abihu,+ Eliyezeri kanye na-Ithamari.+ 2 Kufanele wentele Aroni tingubo letingcwele, kuze ahlonipheke futsi abe muhle.+ 3 Ubokhuluma nabo bonkhe bantfu labanelikhono,* labo lengibanike kuhlakanipha+ kutsi bentele Aroni tingubo latawungcweliswa ngato, kuze atengikhonta njengemphristi.
4 “Nati letingubo lokufanele batente: sembatfo sesifuba,+ sidziya,+ lijazi lelite imikhono,+ ingubo lenemihlobiso lesatikwele, umshuculo lokhetsekile,+ kanye neseshi.+ Letingubo letingcwele kufanele batentele umnakenu Aroni nemadvodzana akhe, kuze batengikhonta njengebaphristi. 5 Labantfu labanelikhono batawusebentisa ligolide, intsambo leluhlata njengesibhakabhaka, insontfo lebukhwebeletane,* intsambo lebovu kanye nelineni lecolisakele.
6 “Sidziya kufanele basente ngeligolide, ngentsambo leluhlata njengesibhakabhaka, ngensontfo lebukhwebeletane, ngentsambo lebovu kanye nangelineni lecolisakele futsi lephotsiwe, baphindze basihlobise.+ 7 Sitawuba nemabhande lamabili latfungelwe emahlombe, latakwehla aye lapho sifike sihlangane khona. 8 Libhande lelelukiwe*+ lelitfungelwe kulesidziya futsi lesitawuboshwa ngalo kufanele nalo lentiwe ngeligolide, ngentsambo leluhlata njengesibhakabhaka, ngensontfo lebukhwebeletane, ngentsambo lebovu kanye nangelineni lecolisakele futsi lephotsiwe.
9 “Kufanele utsatse ematje e-oniksi+ lamabili ubhale kuwo emabito emadvodzana a-Israyeli.+ 10 Utawubhala emabito lasitfupha kulinye lalamatje, bese ubhala lasitfupha kuleli lelinye. Lamabito utawalandzelanisa ngekwelamana kwalamadvodzana. 11 Ubotfola umuntfu lokwati kubhala ematjeni kuze abhale lamabito alamadvodzana a-Israyeli kulamatje lamabili futsi kufanele awabhale shengatsi ubeka luphawu.+ Ngemuva kwaloko kufanele uwanamatsisele etikweligolide. 12 Lamatje kufanele uwafake kulamabhande lasemahlombe alesidziya, abe sikhumbuto kumadvodzana a-Israyeli.+ Aroni kufanele etfwale lamabito emahlombe akhe nakasembikwaJehova, kuze abe sikhumbuto. 13 Ubokwenta ligolide lotawunamatsisela kulo lamatje lamabili, 14 wente netintsambo letimbili teligolide lelicwengisisiwe. Letintsambo kufanele utiphotse+ futsi utikhungele kuleligolide lonamatsisele kulo lamatje.+
15 “Ubotfola umuntfu lotfungako lotawukwenta sembatfo sesifuba, lesitawuba sekwehlulela.+ Njengalesidziya, lesembatfo kufanele sentiwe ngeligolide, ngentsambo leluhlata njengesibhakabhaka, ngensontfo lebukhwebeletane, ngentsambo lebovu kanye nangelineni lecolisakele futsi lephotsiwe.+ 16 Nawusigoca kufanele sibe sikwele, sibe ngemasentimitha langaba ngu-22* budze nemasentimitha langaba ngu-22 bubanti. 17 Kulesembatfo kufanele unamatsisele ematje, akhe emalayini lamane. Elayinini lekucala kufanele kube nerubhi, ithophazi kanye nesimaragidu. 18 Elayinini lesibili kutawuba nethekhosi, isafire nejasiphi. 19 Kulesitsatfu kutawuba nelitje lokutsiwa yileshemu,* i-agathe ne-amethiste. 20 Elayinini lesine kutawuba nekhrisolithe, i-oniksi kanye nejeyidi. Lamatje kufanele anamatsiselwe etikweligolide. 21 Litje ngalinye litawumelela yinye yemadvodzana a-Israyeli langu-12. Kufanele libhalwe shengatsi kwentiwa luphawu, ngulelo nalelo libhalwe libito lesive ngasinye kuleti letingu-12.
22 “Kulesembatfo sesifuba kufanele wente tintsambo letiphotsiwe, letinjengetintsambo teligolide lelicwengisisiwe.+ 23 Utawuphindze usentele emajiva eligolide lamabili, uwafake emakoneni aso lamabili langetulu. 24 Letintsambo teligolide utawutifaka kulamajiva lamabili lasemakoneni langetulu alesembatfo. 25 Letintsambo kufanele uphindze utifake ngembili kuleligolide lotawunamatsisela kulo lamatje lasemabhandeni lamabili, emahlombe alesidziya. 26 Utawukwenta nemajiva lamabili eligolide futsi uwafake ngekhatsi kulalamanye emakona lamabili alesembatfo sesifuba, abukane nalesidziya.+ 27 Ubokwenta lamanye emajiva lamabili eligolide, uwafake encenyeni lengembili yalesidziya. Atawuba ngentansi kwalamabhande lamabili lasuka emahlombe aso, edvute nalapho sihlangana khona, ngenhla kwelibhande lelelukiwe* lalesidziya.+ 28 Kutawuba nentsambo leluhlata njengesibhakabhaka letawubamba lesembatfo. Lentsambo itawungena emajiveni alesembatfo, iyewubopha emajiveni alesidziya. Loku kutawukwenta lesembatfo sihlale kahle kulesidziya, sibe ngenhla kwalelibhande lelelukiwe.*
29 “Aroni kufanele etfwale lamabito emadvodzana a-Israyeli kulesembatfo sesifuba lesitawuba sekwehlulela, abe ngetulu kwenhlitiyo yakhe naketa eNgcwele, futsi atawuhlale asikhumbuto embikwaJehova. 30 Kulesembatfo sesifuba lesitawuba sekwehlulela, kufanele ufake i-Urimu neThumimu,*+ futsi itawuba ngetulu kwenhlitiyo ya-Aroni naketa embikwaJehova. Kufanele ahlale asifakile lesembatfo sesifuba lesitawuba sekwehlulela ema-Israyeli, sibe ngetulu kwenhlitiyo yakhe ngaso sonkhe sikhatsi nakasembikwaJehova.
31 “Lelijazi lelite imikhono lelitawuba ngephansi kwalesidziya kufanele lonkhe ulente ngentsambo leluhlata njengesibhakabhaka.+ 32 Ngetulu kulelijazi kutawuba nesikhala sekufaka inhloko. Umtfungi kufanele aweluke wonkhe umphetfo walesikhala. Sitawufana nesikhala selijazi lelisotja, kuze ingadzabuki. 33 Kufanele wente emahananandza* ngentsambo leluhlata njengesibhakabhaka, ngensontfo lebukhwebeletane, nangentsambo lebovu. Utawafaka kuwo wonkhe umphetfo walelijazi, futsi emkhatsini wawo ufake tinsimbi teligolide. 34 Kutawuba yinsimbi yeligolide kube lihananandza, kube yinsimbi yeligolide kube lihananandza, kuwo wonkhe umphetfo walelijazi lelite imikhono. 35 Lelijazi litawugcokwa ngu-Aroni kuze ente imisebenti yebuphristi, futsi umsindvo wekukhala kwaletinsimbi kufanele uvakale nakangena embikwaJehova endzaweni lengcwele nalapho aphuma, kuze angafi.+
36 “Ubokwenta ngcwengcwe lomanyatelako weligolide lelicwengisisiwe, kuwo ubhale emavi latsi: ‘Bungcwele ngebaJehova.’+ Lamavi utawabhala shengatsi ubeka luphawu. 37 Longcwengcwe ubowubophela emshuculweni lokhetsekile+ ngentsambo leluhlata njengesibhakabhaka, futsi kufanele uhlale ungembili kwalomshuculo. 38 Utawuba sebunti la-Aroni, futsi Aroni nguye lotawutfwala licala nangabe umuntfu angatiphatsi kahle tintfo letingcwele,+ leto ema-Israyeli lokufanele anikele ngato njengetipho letingcwele kuNkulunkulu. Longcwengcwe ubohlale usebuntini la-Aroni, kuze ema-Israyeli atokwemukeleka kuJehova.
39 “Lengubo lenemihlobiso lesatikwele uboyenta ngelineni lecolisakele, futsi wente nemshuculo lokhetsekile ngelineni lecolisakele, uphindze weluke neseshi.+
40 “Utawukwentela nemadvodzana a-Aroni tingubo, tinseshi, kanye nemishuculo,+ kuze ahlonipheke futsi abe mahle.+ 41 Letintfo utatigcokisa umnakenu Aroni nemadvodzana akhe. Kufanele ubagcobe ngemafutsa,+ ubabeke*+ babe baphristi, futsi ubangcwelise. Ngaleyo ndlela batawungikhonta njengebaphristi. 42 Ubobentela netikhindi* telineni kuze bafihle bungcunu babo.+ Letikhindi titawusuka elukhalo tiyewufika ematsangeni. 43 Aroni nemadvodzana akhe kufanele batigcoke nabeta ethendeni lekuhlangana nobe nabaya e-al’thare kuyewukwenta imisebenti yebuphristi endzaweni lengcwele, kuze bangatewuba nelicala futsi bafe. Lona ngumtsetfo lotawuhlala njalo, lokufanele ulandzelwe ngu-Aroni nentalelwane* yakhe letawuvela emvakwakhe.
29 “Naku lokufanele ukwente nawubangcwelisa kuze bangikhonte njengebaphristi: Ubotsatsa inkunzana, timvu letindvuna letimbili letite sici,+ 2 utsatse nesinkhwa lesite imvubelo, tinkhwa letiyindingilizi letite imvubelo letibhucwe ngemafutsa kanye nemacebelengwane lete imvubelo lagcotjiswe ngemafutsa.+ Konkhe kufanele ukwente ngafulaha wakolo locolisakele 3 bese ukufaka kubhasikidi+ futsi ukuletse ngawo, kuhambisane nalenkunzana kanye naletimvu letimbili.
4 “Ubotsatsa Aroni kanye nemadvodzana akhe ubaletse emnyango welithende lekuhlangana,+ ufike ubageze ngemanti.+ 5 Kufanele utsatse letimphahla+ futsi ugcokise Aroni ingubo, lijazi lelite imikhono lelitawuba ngephansi kwalesidziya, umgcokise nesidziya, kanye nesembatfo sesifuba, bese elukhalo umbopha lelibhande lelelukiwe* lalesidziya.+ 6 Ubofaka nalomshuculo enhloko yakhe, futsi kulomshuculo ubophele longcwengcwe weligolide longcwele,*+ 7 utsatse nemafutsa ekugcoba+ uwatsele enhloko yakhe kuze umgcobe ngawo.+
8 “Ubosondzeta nemadvodzana akhe uwagcokise letingubo+ 9 bese ubopha tinseshi elukhalo lwa-Aroni kanye nasetinkhalo temadvodzana akhe, ubowafaka nemishuculo enhloko. Buphristi butawuba babo futsi lona kutawuba ngumtsetfo lohlala njalo.+ Kufanele umbeke kanjalo Aroni kanye nemadvodzana akhe kuze bakhonte njengebaphristi.*+
10 “Ngemuva kwaloko kufanele uletse lenkunzana embikwelithende lekuhlangana, futsi Aroni nemadvodzana akhe batawubeka tandla tabo enhloko yalenkunzana.+ 11 Ubohlaba lenkunzana embikwaJehova, emnyango welithende lekuhlangana.+ 12 Kufanele ucobhote ngemunwe wakho kulengati yalenkunzana, futsi lengati uyibhoce etimphondvweni teli-al’thare+ bese utsela yonkhe lena lesele ekhatsi kulo.+ 13 Ubotsatsa emanoni+ lambonye ematfumbu, utsatse nemanoni lasesibindzini, tinso tayo totimbili kanye nemanoni lakuto, ukushise kuze intfutfu yako ishunce isuka kuleli-al’thare.+ 14 Kodvwa inyama yalenkunzana, sikhumba kanye nebulongo bayo kufanele ukushisele ngephandle kwalendzawo lenihleti kuyo. Lona kutawuba ngumnikelo wesono.
15 “Ubotsatsa yinye kuletimvu letindvuna, futsi Aroni nemadvodzana akhe kufanele babeke tandla tabo enhloko yayo.+ 16 Uboyihlaba bese utsatsa ingati yayo uyifafata kuto tonkhe tinhlangotsi taleli-al’thare.+ 17 Uboyicoba bese ugeza ematfumbu+ nabogalu bayo futsi ukuhlelembise kahle kanye nenhloko yayo. 18 Kufanele uyishise yonkhe lemvu kuze intfutfu yayo ishunce isuka kuleli-al’thare. Lona kutawuba ngumnikelo wekushiswa loya kuJehova, futsi utawuba liphunga lelimnandzi.*+ Lona ngumnikelo lowentiwa ngemlilo kuJehova.
19 “Ngemuva kwaloko ubotsatsa nalelenye imvu futsi Aroni nemadvodzana akhe kufanele babeke tandla tabo enhloko yayo.+ 20 Uboyihlaba utsatse lenye yengati yayo uyibhoce encenyeni lengephansi yendlebe ya-Aroni yangesekudla, nasetincenyeni letingephansi tetindlebe tangesekudla temadvodzana akhe. Lengati uboyibhoca nasetitfupheni tabo tangesekudla nakubobhozo babo bangesekudla, futsi uyifafate kuto tonkhe tinhlangotsi taleli-al’thare. 21 Ubotsatsa lenye yalengati lekuleli-al’thare kanye nemafutsa ekugcoba+ ufafate ngako Aroni, tingubo takhe, emadvodzana akhe, kanye netingubo tawo, kuze kutsi yena netingubo takhe, nemadvodzana akhe kanye netingubo tawo babe ngcwele.+
22 “Ubotsatsa emanoni alemvu, umsila wayo, emanoni lambonye ematfumbu, emanoni lasesibindzini, tinso tayo totimbili nemanoni lakuto,+ kanye nemlente wangesekudla, ngobe lena yimvu lenikelwa nakubekwa baphristi.+ 23 Kulobhasikidi wesinkhwa lesite imvubelo losembikwaJehova kufanele utsatse sinkhwa lesiyindingilizi nesinkhwa* lesinemafutsa kanye nelicebelengwane. 24 Konkhe loku kufanele ukubeke etandleni ta-Aroni nasetandleni temadvodzana akhe, futsi ukujikitise kube ngumnikelo lojikitiswako embikwaJehova. 25 Ngemuva kwaloko utakutsatsa etandleni tabo ukushise e-al’thare, etikwalomnikelo wekushiswa, kuze kube liphunga lelimnandzi* embikwaJehova. Lona ngumnikelo lowentiwa ngemlilo kuJehova.
26 “Ubotsatsa umganga walemvu lenikelwe nakubekwa Aroni kutsi abe ngumphristi,+ uwujikitise ube ngumnikelo lojikitiswako embikwaJehova, futsi lomganga utawuba wakho. 27 Kufanele ungcwelise lomganga walomnikelo lojikitiswako kanye nalomlente walencenye lengcwele yalomnikelo lojikitisiwe, lotsetfwe kulemvu lenikelwe nakubekwa Aroni nemadvodzana akhe kutsi babe baphristi.+ 28 Loku kutawuba kwa-Aroni nemadvodzana akhe futsi lona kutawuba ngumtsetfo lohlala njalo lotawugcinwa ngema-Israyeli, ngobe tingcwele futsi titawuba yincenye lengcwele letawunikelwa ngema-Israyeli.+ Tiyincenye lengcwele ema-Israyeli layinika Jehova futsi layitsetse emihlatjelweni yawo yekuthula.+
29 “Letingubo letingcwele+ ta-Aroni, titawusetjentiswa ngemadvodzana akhe+ latamlandzela nakagcotjwa futsi abekwa kutsi abe baphristi. 30 Umphristi lotawukhetfwa emadvodzaneni akhe kutsi angene esikhundleni sakhe futsi lotawungena ethendeni lekuhlangana kuze ente imisebenti yebaphristi endzaweni lengcwele, utawugcoka letingubo emalanga langu-7.+
31 “Kufanele utsatse lemvu lenikelwa nakubekwa umphristi futsi ubilise inyama yayo endzaweni lengcwele.+ 32 Aroni kanye nemadvodzana akhe batawudla+ lenyama yalemvu kanye nalesinkhwa lesikubhasikidi losemnyango welithende lekuhlangana. 33 Kufanele badle letintfo letentelwe kubuyisana naNkulunkulu, letisetjentiswe nababekwa kutsi babe baphristi* futsi bangcweliswa. Kodvwa lomunye umuntfu* akakavumeleki kutsi atidle ngobe tingcwele.+ 34 Nangabe inyama yemhlatjelo lowentiwa nakubekwa baphristi kanye nesinkhwa kusala kuze kube sekuseni, kufanele ukushise ngemlilo.+ Akukafaneli kudliwe ngobe kungcwele.
35 “Nguloku lokufanele ukwente ku-Aroni nakumadvodzana akhe, futsi kufanele ukwente konkhe njengobe nje ngishito. Utawutsatsa emalanga langu-7 kutsi ubagcobe babe baphristi.*+ 36 Malanga onkhe kufanele unikele ngenkunzi, ibe ngumnikelo wekutsetselelwa kwetono futsi ngalomnikelo wente li-al’thare libe ngcwele. Kufanele utsele nemafutsa kulo kuze libe ngcwele.+ 37 Loku utawukwenta emalanga langu-7, futsi kufanele leli-al’thare ulingcwelise kuze libe ngcwele ngalokuphelele.+ Umuntfu lotawutsintsa leli-al’thare kufanele abe ngcwele.
38 “Naku lotawunikela ngako kuleli-al’thare: Malanga onkhe kufanele unikele ngetimvu letimbili letindvuna letinemnyaka munye.+ 39 Lenye yato ubonikela ngayo ekuseni, bese unikela ngalelenye nasekutawuhwalala.*+ 40 Ubotsatsa fulaha locolisakele logcwele esikoteleni lesingemalitha lamabili* lohlanganiswe nelitha* yemafutsa lacengekile, nemnikelo walokunatfwako loyilitha yeliwayini. Loku utakunikela nalemvu yekucala. 41 Lemvu yesibili utawunikela ngayo nasekutawuhwalala* kanye nalomnikelo walokutinhlavu nemnikelo walokunatfwako, njengasekuseni. Utawunikela ngako kube liphunga lelimnandzi,* lokungumnikelo lowentiwa ngemlilo kuJehova. 42 Lomnikelo wekushiswa kufanele niwente njalo embikwaJehova kuto tonkhe titukulwane tenu. Nibowentela emnyango welithende lekuhlangana, lapho ngitawubonakala khona kini kuze ngikhulume nani.+
43 “Ngitawutiveta kuma-Israyeli kuleyo ndzawo, futsi itawungcweliswa yinkhatimulo yami.+ 44 Ngitawungcwelisa lelithende lekuhlangana kanye naleli-al’thare, ngingcwelise na-Aroni nemadvodzana akhe+ kuze bangikhonte njengebaphristi. 45 Ngitawuhlala emkhatsini wema-Israyeli, futsi ngitawuba nguNkulunkulu wawo.+ 46 Nakanjani atawukwati kutsi mine nginguJehova Nkulunkulu wawo, lowawakhipha eveni laseGibhithe kuze ngihlale emkhatsini wawo.+ Mine nginguJehova Nkulunkulu wawo.
30 “Kufanele wente li-al’thare lokutawushiselwa kulo imphepho,+ futsi ulente ngesigodvo semgamba.+ 2 Kufanele libe sikwele, budze balo bube ngemasentimitha langaba ngu-45,* bubanti balo bube ngemasentimitha langaba ngu-45, kuphakama kwalo kube ngemasentimitha langaba ngu-89.* Timphondvo talo titawuba yintfo yinye naleli-al’thare.+ 3 Incenye yalo lengetulu, kanye nato tonkhe tinhlangotsi talo netimphondvo talo ubotinameka ngeligolide lelicwengisisiwe. Ubokwenta umhlobiso weligolide lotawuba semaphetselweni alo. 4 Kufanele wente emajiva lamabili eligolide, abe ngentansi kwalomhlobiso etinhlangotsini taleli-al’thare letimbili letibukene. Kulamajiva kutawufakwa tindvuku letitawusetjentiselwa kutfwala leli-al’thare. 5 Ubokwenta letindvuku ngesigodvo sesihlahla semgamba bese utinameka ngeligolide. 6 Leli-al’thare utalibeka embikwendvwangu lesedvute nelibhokisi leBufakazi,+ embikwesimbonyo lesimbonye lelibhokisi leBufakazi, lapho ngitawubonakala khona kini.+
7 “Aroni+ utawushisa imphepho+ etikwaleli-al’thare+ kuze intfutfu ishunce isuka kulo, njalo nje ekuseni nakalungisa tibane.+ 8 Nakakhanyisa tibane nasekucala kuhwalala,* Aroni utawuphindze ashise imphepho. Lona ngumnikelo wemphepho lokufanele wentiwe njalo embikwaJehova kuto tonkhe titukulwane tenu. 9 Akukafaneli ninikele etikwalo ngemphepho lengemukeleki+ nobe ninikele ngemnikelo wekushiswa nobe ngemnikelo walokutinhlavu, futsi akukafaneli nitsele umnikelo walokunatfwako etikwalo. 10 Kanye ngemnyaka, Aroni kufanele ente umnikelo wekubuyisana naNkulunkulu etimphondvweni taleli-al’thare.+ Utalihlambulula kanye ngemnyaka asebentisa lenye yengati yemnikelo wesono lowentelwa kubuyisana naNkulunkulu,+ futsi loku kutakwentiwa kuto tonkhe titukulwane tenu. Leli-al’thare lingcwele ngalokuphelele kuJehova.”
11 Ngemuva kwaloko Jehova watsi kuMosi: 12 “Ngaso sonkhe sikhatsi nawenta lubalo lwemadvodzana aka-Israyeli,+ nguloyo naloyo kufanele anike Jehova inhlawulo yekuphila kwakhe. Loku kufanele bakwente kuze bangehlelwa sishayo nababhaliswa. 13 Naku lokufanele kukhishwe ngibo bonkhe lababhaliswako: lisiliva lelingemagremu langaba sitfupha* lelikalwe ngesisindvo lesisemtsetfweni sasendzaweni lengcwele.*+ Lishekeli lingemagera* langu-20, futsi lisiliva lelingemagremu langaba sitfupha ngilo lokufanele linikelwe kuJehova.+ 14 Bonkhe lababhalisiwe labaneminyaka lengu-20 kuya etulu budzala kufanele bakhiphe lomnikelo waJehova.+ 15 Labanjingile akukafaneli bakhiphe kakhulu, nalabeswele akukafaneli bakhiphe ngaphansi kwalelisiliva lelingemagremu langaba sitfupha* nabenta lomnikelo waJehova wekubuyisana naye. 16 Kufanele utsatse lemali yelisiliva ema-Israyeli layinikelele kubuyisana naNkulunkulu, uyisebentisele imisebenti yasethendeni lekuhlangana, kuze ibe sikhumbuto embikwaJehova ngenca yema-Israyeli futsi inente nibuyisane naNkulunkulu.”
17 Jehova wachubeka watsi kuMosi: 18 “Ubokwenta indishi yelitfusi netinyawo letawubekwa kuto,+ bese uyibeka emkhatsini welithende lekuhlangana neli-al’thare futsi utsele emanti kuyo.+ 19 Aroni nemadvodzana akhe batawugeza tandla netinyawo tabo kulendishi.+ 20 Kufanele bageze kulamanti lakulendishi nabangena ethendeni lekuhlangana nobe nabasondzela e-al’thare bayokwenta imisebenti yebaphristi neminikelo yemlilo kuze intfutfu yaleminikelo yenyukele kuJehova, khona bangatewukufa. 21 Kufanele bageze tandla netinyawo tabo kuze bangafi, futsi loku kutawuba ngumtsetfo lohlala njalo lokufanele ugcinwe ngibo kanye nebantfwana babo kuto tonkhe titukulwane tabo.”+
22 Jehova waphindze watsi kuMosi: 23 “Tsatsa emakha elikhetselo: emakhilogremu lasitfupha emure leyomile, emakhilogremu lamatsatfu esinamoni lenuka kamnandzi, emakhilogremu lamatsatfu ekhalamu lenuka kamnandzi, 24 emakhilogremu lasitfupha ekhasiya lakalwe ngesisindvo lesisemtsetfweni sasendzaweni lengcwele*+ kanye nemakhilogremu langaba matsatfu nehhafu* emafutsa emncumo. 25 Lamakha kufanele wente ngawo emafutsa ekugcoba langcwele, futsi kufanele ahlanganiswe ngebuciko.*+ Lawa kutawuba ngemafutsa ekugcoba langcwele.
26 “Kufanele ugcobe lelithende lekuhlangana+ nelibhokisi leBufakazi ngalamafutsa, 27 ugcobe litafula nato tonkhe tintfo letitawusetjentiswa kulo, lutsi lwesibane nato tonkhe tintfo letitawusetjentiswa kulo, neli-al’thare lekushisa imphepho, 28 li-al’thare lokwentelwa kulo umnikelo wekushiswa kanye nato tonkhe tintfo letitawusetjentiswa kulo, nalendishi kanye netinyawo lebekwa kuto. 29 Letintfo kufanele utingcwelise kuze tibe ngcwele ngalokuphelele.+ Nobe ngubani lotitsintsako kufanele abe ngcwele.+ 30 Kufanele ugcobe Aroni+ nemadvodzana akhe+ futsi ubangcwelise kuze bangikhonte njengebaphristi.+
31 “Ubokhuluma nema-Israyeli utsi: ‘Lamafutsa kufanele ahlale angemafutsa ekugcoba langcwele kuto tonkhe titukulwane tenu.+ 32 Akukafaneli bantfu bagcobise ngawo, futsi akukafaneli nente lamanye emafutsa ngalendlela. Lamafutsa angcwele, ngako kufanele achubeke angcwele kini. 33 Nobe ngubani lowenta emafutsa lafana nalawa futsi agcobe ngawo umuntfu longakafaneli,* utawubulawa.’”+
34 Jehova wabese utsi kuMosi: “Tsatsa sikali lesilinganako sanankha emakha:+ sitakathi, i-oninkha, igalibhanume lenuka kamnandzi nemakha lahlantekile esihlahla semphepho. 35 Kufanele wente imphepho+ ngalamakha, futsi ahlanganiswe ngebuciko,* afakwe luswayi,+ ahlanteke aphindze abe ngcwele. 36 Kufanele usile lenye yalemphepho ibe yimphuphu lecolisakele bese lenye yalemphuphu uyibeka embikwelibhokisi leBufakazi ethendeni lekuhlangana, lapho ngitawubonakala khona kuwe. Lemphepho kufanele ibe ngcwele ngalokuphelele kini. 37 Lemphepho lotawuyenta+ akukafaneli utisebentisele yona. Kufanele uyitsatse njengentfo lengcwele kuJehova. 38 Nobe ngubani lotawukwenta imphepho lefana nalena kuze ajatjuliswe liphunga layo, kufanele abulawe.”
31 Jehova wachubeka akhuluma naMosi, watsi: 2 “Ngikhetse* Besaleli+ indvodzana ya-Uri loyindvodzana yaHure, lovela esiveni sakaJuda.+ 3 Ngitamgcwalisa ngemoya wami,* ngimnike kuhlakanipha, kucondza, kanye nelwati lwekwenta lonkhe luhlobo lwemisebenti ledzinga likhono, 4 kuze ente imisebenti yebuciko, asebente ngeligolide, lisiliva, kanye nelitfusi, 5 acetule ematje futsi awanameke,+ aphindze ente lonkhe luhlobo lwetintfo tesigodvo.+ 6 Ngetulu kwaloko, ngibeke Oholiyabi+ indvodzana ya-Ahisamaki lovela esiveni sakaDani kutsi amsite. Ngitawufaka kuhlakanipha etinhlitiyweni tabo bonkhe bantfu labanelikhono,* kuze bente tonkhe letintfo lengikutjele tona.+ 7 Batawukwakha lithende lekuhlangana,+ libhokisi leBufakazi+ kanye nesimbonyo+ salo, nato tonkhe tintfo letitawusetjentiswa ethendeni, 8 bente nelitafula+ kanye netintfo letitawusetjentiswa kulo, lutsi lwesibane lolwentiwe ngeligolide lelicwengisisiwe kanye nato tonkhe tintfo letitawusetjentiswa kulo,+ li-al’thare lekushisa imphepho,+ 9 neli-al’thare lekwenta umnikelo wekushiswa+ nato tonkhe tintfo letitawusetjentiswa kulo, indishi kanye netinyawo letawubekwa kuto,+ 10 bente netingubo letitfungwe kahle, tingubo letingcwele ta-Aroni umphristi, tingubo temadvodzana akhe tekwenta imisebenti yebuphristi,+ 11 nemafutsa ekugcoba, kanye nemphepho leneliphunga lelimnandzi letawusetjentiswa endzaweni lengcwele.+ Batawutenta tonkhe letintfo lengikutjele tona.”
12 Jehova wabese utsi kuMosi: 13 “Ubokhuluma nema-Israyeli, utsi: ‘Ngetulu kwako konkhe, kufanele nigcine lisabatha+ ngobe liluphawu emkhatsini wami nani kuto tonkhe titukulwane tenu, kuze nati kutsi mine Jehova ngiyaningcwelisa. 14 Niboligcina liSabatha ngobe lingcwele kini.+ Nobe ngubani longalihloniphi kufanele abulawe. Nangabe kukhona losebenta ngelilanga leliSabatha, loyo muntfu kufanele abulawe.+ 15 Ningasebenta emalanga lasitfupha, kodvwa ngelilanga lesi-7 kutawuba lisabatha futsi kufanele kungasetjentwa sanhlobo.+ Lelilanga lingcwele kuJehova. Nobe ngubani losebenta ngelilanga leliSabatha kufanele abulawe. 16 Ema-Israyeli kufanele aligcine liSabatha, futsi loko atawukwenta kuto tonkhe titukulwane tawo. LeliSabatha lisivumelwane lesitawuhlala njalo. 17 Liluphawu loluhlala njalo emkhatsini wami nebantfu baka-Israyeli,+ ngobe Jehova wadala emazulu nemhlaba ngemalanga lasitfupha futsi waphumula ngelilanga lesi-7.’”+
18 Ngekushesha nakacedza kukhuluma naMosi eNtsabeni iSinayi, Nkulunkulu wamnika tibhelekece letimbili teBufakazi,+ lokutibhelekece tematje lebetibhalwe ngesandla saNkulunkulu.*+
32 Bantfu babona kutsi Mosi sewutsetse sikhatsi lesidze solo angehli entsabeni,+ ngako babutsana ku-Aroni, batsi kuye: “Sentele nkulunkulu lotawuhamba embikwetfu+ ngobe asati kutsi kwentekeni kuloMosi lowasihola wasikhipha eGibhithe.” 2 Nakeva loko, Aroni watsi: “Khiphani emacici eligolide+ lasetindlebeni tebafati benu, nasetindlebeni temadvodzana nemadvodzakati enu futsi niwaletse lapha kimi.” 3 Ngako bonkhe labantfu bawakhipha emacici eligolide labesetindlebeni tabo, bawaletsa ku-Aroni. 4 Aroni watsatsa lithuluzi wenta sithico* selitfole+ asebentisa lamacici eligolide lebebamnike wona. Labantfu babese batsi: “Israyeli, nanguNkulunkulu wakho lowakuhola wakukhipha eGibhithe.”+
5 Ngesikhatsi Aroni abona loku, wakha li-al’thare embikwalesithico. Ngemuva kwaloko wamemeta watsi: “Kusasa sitawukwentela Jehova umkhosi.” 6 Ngako ngakusasa bavuka kusesekuseni kakhulu, benta iminikelo yekushiswa nemihlatjelo yekuthula. Ngemuva kwaloko labantfu bahlala phansi badla baphindze banatsa. Nabacedza basukuma futsi batijabulisa.+
7 Jehova wabese utsi kuMosi: “Sale wehla ngobe labantfu bakho lowabahola wabakhipha eGibhithe sebente intfo lembi.+ 8 Sebaphambuke ngekushesha kuloko lebengibatjele kona.+ Batentele sithico* selitfole futsi solo bayasikhotsamela, benta nemihlatjelo kuso, batsi: ‘Israyeli, nanguNkulunkulu wakho lowakuhola wakukhipha eGibhithe.’” 9 Jehova wachubeka watsi kuMosi: “Sengibonile kutsi labantfu abalaleli.*+ 10 Ngako ngiyekele ngibacotfule ngenca yentfukutselo yami levutsako futsi ngitentele sive lesikhulu ngawe.”+
11 Mosi wabese uncenga* Jehova Nkulunkulu wakhe,+ watsi: “Awu Jehova, kungani ubatfukutselela kangaka labantfu bakho, ngemuva kwekubakhipha eveni laseGibhithe usebentisa emandla lamakhulu kanye nesandla sakho lesinemandla?+ 12 Bantfu baseGibhithe batawutsi: ‘Abenetinhloso letimbi nakabakhipha kulelive. Abefuna kubabulala etintsabeni futsi abacedze emhlabeni.’+ Mane uyibambe intfukutselo yakho, ushintje nesincumo* sakho sekubaletsela inhlekelele labantfu bakho. 13 Khumbula tinceku takho bo-Abrahama, Isaka na-Israyeli, lowatifunga wena kuto watsi: ‘Bantfwana* bakho ngitabandzisa babe ngangetinkhanyeti tasemazulwini,+ ngibanike yonkhe lendzawo lengincume kubanika yona, kute bayitsatse ibe ngeyabo kuze kube phakadze.’”+
14 Ngako Jehova wasishintja sincumo* labesasitsetse sekuletsa inhlekelele kulabantfu bakhe.+
15 Mosi wesuka, wehla entsabeni aphetse tibhelekece letimbili teBufakazi+ esandleni sakhe.+ Letibhelekece betibhalwe ngala nangala, tibhalwe ngemuva nangembili. 16 Betentiwe nguNkulunkulu futsi tibhalwe nguye ngesandla sakhe.+ 17 Ngesikhatsi Joshuwa eva umsindvo walabantfu njengobe bebamemeta, watsi kuMosi: “Kuvakala ngatsi kunemphi, kungako labantfu bamemeta.” 18 Kodvwa Mosi watsi:
“Lona akusiwo umsindvo wekuhlabela ngenca yekuncoba,*
Futsi akusiwo umsindvo wekulila ngenca yekuncotjwa,
Ngiva lomunye nje umsindvo wekuhlabela.”
19 Ngekushesha nje Mosi nakasondzela kulabantfu futsi abona lelitfole+ kanye nalokudansa, watfukutsela kakhulu walahla phansi letibhelekece tematje, taphihlika khona lapho phansi kwentsaba.+ 20 Watsatsa lelitfole lebebalentile walishisa ngemlilo futsi waligaya laba yimphuphu.+ Ngemuva kwaloko wayisakatela emantini wase utjela ema-Israyeli kutsi anatse lawo manti.+ 21 Mosi watsi ku-Aroni: “Yini labantfu labakwente yona kutsi ungaze ubaletsele sono lesingaka?” 22 Aroni watsi: “Ungatfukutseli nkhosi yami. Wati kahle kutsi labantfu bayatsandza kwenta tintfo letimbi.+ 23 Naku labakushito kimi: ‘Sentele nkulunkulu lotawuhamba embikwetfu ngobe asati kutsi kwentekeni ngaloMosi lowasihola wasikhipha eGibhithe.’+ 24 Ngako ngitsite kubo: ‘Nobe ngubani loneligolide akalikhiphe aliletse kimi.’ Ngemuva kwaloko ngilifake emlilweni kwase kuphuma lelitfole.”
25 Mosi wabona kutsi labantfu abasakhuteki ngesizatfu sekutsi Aroni abesabayekele kakhulu, kangangekutsi besebatihlazisa embikwetitsa tabo. 26 Ngemuva kwaloko Mosi wema egedeni lalendzawo lebebahlala kuyo futsi watsi: “Nobe ngubani loseluhlangotsini lwaJehova akete lapha kimi!”+ Onkhe emaLevi eta abutsana eceleni kwakhe. 27 Wabese utsi kuwo: “Naku Jehova Nkulunkulu wema-Israyeli lakushoko: ‘Nguloyo naloyo akatsatse inkemba yakhe adzabule kulendzawo kulelo nalelogede, abulale umnakabo, makhelwane wakhe kanye nemngani wakhe.’”+ 28 LamaLevi akwenta loko Mosi labewatjele kona. Ngako ngalelolanga kwabulawa emadvodza langaba ngu-3 000. 29 Ngemuva kwaloko, Mosi watsi: “Lamuhla tingcweliseni* kuze nikhonte Jehova, ngobe ngamunye wenu uhlasele indvodzana yakhe kanye nemnakabo,+ futsi yena utanibusisa lamuhla.”+
30 Ngelilanga lelilandzelako, Mosi watsi kulabantfu: “Nente sono lesibi kakhulu, futsi nyalo ngitawukhuphuka ngiye kuJehova kuze ngiyonicolisela ngalesono senu.”+ 31 Mosi wabese ubuyela kuJehova, wafike watsi: “Labantfu bente sono lesibi kakhulu! Batentele nkulunkulu weligolide!+ 32 Kodvwa-ke nangabe ufuna, mane ubacolele kulesono labasentile.+ Nangabe ungabacoleli ngicela umane ungesule encwadzini yakho loyibhalile.”+ 33 Kodvwa-ke Jehova watsi kuMosi: “Nobe ngubani lowonile kimi ngitawumesula encwadzini yami. 34 Ngako hamba, utsatse labantfu ubahole niye kulendzawo lengikutjele ngayo. Ingilosi yami itawuhamba embikwenu,+ futsi ngelilanga labatawulandzisa ngalo ngitawubajezisa ngenca yalesono sabo.” 35 Jehova wabese ubehlisela sishayo ngenca yalelitfole lebebancenge Aroni kutsi abentele lona.
33 Jehova wachubeka watsi kuMosi: “Sale usuka lapha nalabantfu lowabakhipha eveni laseGibhithe, nihambe niye eveni lengafunga ngalo ku-Abrahama, ku-Isaka nakuJakobe, nangitsi: ‘Lelive ngitalinika intalelwane* yakho.’+ 2 Ngitawutfumela ingilosi kutsi ihambe embikwenu,+ icoshe emaKhenani, ema-Amori, emaHethi, emaPheresi, emaHivi nemaJebhusi.+ 3 Hambani niye eveni leligeleta lubisi neluju.+ Kodvwa mine angeke ngihambe nani, ngobe anilaleli,*+ futsi ngingasuke nginicotfule endleleni.”+
4 Ngesikhatsi labantfu beva lamavi labuhlungu, balila, futsi kute ngisho namunye kubo lowafaka imihlobiso yakhe. 5 Jehova watsi kuMosi: “Khuluma nema-Israyeli utsi: ‘Nine nibantfu labangalaleli.*+ Ngesikhashana nje ngingavele ngihambe emkhatsini wenu nginicotfule.+ Ngako-ke ningayifaki lemihlobiso yenu, njengobe ngisacabanga kutsi ngitakwentani ngani.’” 6 Ngako kusukela ngesikhatsi aseNtsabeni iHorebe kuchubeke, ema-Israyeli bekangasayifaki* imihlobiso yawo.
7 Mosi watsatsa lithende lakhe walimisa ngephandle kwalendzawo lebebahlala kuyo, khashanyana nayo, futsi walibita ngekutsi lithende lekuhlangana. Bonkhe bantfu lebebafuna sicondziso kuJehova+ bebaya kulelithende lekuhlangana, lebelingephandle kwalendzawo lebebahlala kuyo. 8 Bekutsi njalo Mosi nakaya kulelithende, bonkhe bantfu basukume beme eminyango yemathende abo, bambuke aze ayongena kulelithende. 9 Ngekushesha nje nakangena kulelithende, bekwehla insika yelifu+ ime emnyango walo lapho Nkulunkulu akhuluma naMosi.+ 10 Ngesikhatsi bonkhe labantfu babona lensika yelifu ime emnyango walelithende, ngamunye wabo abesukuma akhotsame emnyango welithende lakhe. 11 Jehova abekhuluma naMosi buso nebuso,+ njengalapho umuntfu akhuluma nalomunye umuntfu. Bekutsi Mosi nakabuyela kulendzawo lebebahlala kuyo, Joshuwa+ indvodzana yaNuni, lobekayinceku nemsiti wakhe,+ yena angesuki kulelithende.
12 Mosi wabese utsi kuJehova: “Wena utsi kimi: ‘Hola labantfu ukhuphuke nabo,’ kodvwa awukasho kutsi utangitfuma nabani. Uphindze watsi kimi: ‘Ngikukhetsile* futsi utfole umusa emehlweni ami.’ 13 Nangabe ngitfole umusa emehlweni akho, ngicela ungifundzise tindlela takho+ kuze ngikwati futsi ngichubeke ngitfola umusa kuwe. Khumbula nekutsi labantfu basive sakho.”+ 14 Ngako Nkulunkulu watsi: “Mine* ngitawuhamba nawe,+ futsi ngitakusita kutsi ungakhatsateki.”+ 15 Mosi watsi kuye: “Nangabe wena* ungeke uhambe natsi, ungasikhiphi-ke kulendzawo. 16 Labanye batawukwati njani kutsi mine nebantfu bakho sitfole umusa emehlweni akho? Kuhamba kwakho natsi+ akusiko yini lokutawukwenta kutsi mine nalabantfu bakho sehlukaniseke kubo bonkhe labanye bantfu labasemhlabeni?”+
17 Jehova wachubeka watsi kuMosi: “Ngitawukwentela naloku lokucelako ngobe utfole umusa emehlweni ami futsi ngikwati kahle.” 18 Mosi wabese utsi: “Ngicela ungikhombise inkhatimulo yakho.” 19 Kodvwa Nkulunkulu watsi: “Ngitawukwenta kutsi ubone bonkhe buhle bami, ngiphindze ngimemetele kuwe libito lami, lelitsi Jehova.+ Ngitamentela umusa loyo lengifuna kumentela umusa, ngibe nesihawu kuloyo lengifuna kuba nesihawu kuye.”+ 20 Wachubeka watsi: “Ungeke ububone buso bami, ngobe kute umuntfu longangibona futsi aphile.”
21 Jehova wase utsi: “Nayi indzawo lapha eceleni kwami. Mani etikwalelidvwala. 22 Ngitawutsi nangendlula ngenkhatimulo yami, ngikufake embotjeni yalelidvwala, futsi ngikumbonye ngesandla sami ngize ngendlule. 23 Ngemuva kwaloko ngitawusisusa sandla sami, bese ubona umhlane wami. Kodvwa buso bami angeke uze ububone.”+
34 Ngemuva kwaloko Jehova watsi kuMosi: “Tentele tibhelekece tematje letimbili letifana naleti takucala,+ futsi ngitawubhala kuto lamavi lebengiwabhale kuleti takucala+ lotiphihlitile.+ 2 Tilungiselele kuze ekuseni ukhuphuke iNtsaba iSinayi futsi ume embikwami esicongweni salentsaba.+ 3 Kodvwa kute umuntfu lokufanele ahambe nawe nalokufanele abonakale nobe ngukuphi kulentsaba. Ngisho nemihlambi yetimvu neyetimbuti kanye neyetinkhomo akukafaneli idle embikwalentsaba.”+
4 Ngako Mosi wenta tibhelekece tematje letimbili letifana naleti takucala futsi wavuka ekuseni kakhulu wakhuphukela eNtsabeni iSinayi, njengobe nje Jehova abemtjelile. Abephetse letibhelekece tematje letimbili esandleni sakhe. 5 Jehova wabese uyehla+ asefini, wema edvute naye futsi wamemetela ngelibito lakhe lelitsi Jehova.+ 6 Jehova abendlula embikwakhe amemetela atsi: “NginguJehova, nginguJehova, nginguNkulunkulu lonesihawu+ neluvelo,*+ lowephuta kutfukutsela+ futsi lochichima lutsandvo lolucotfo+ neliciniso,*+ 7 lokhombisa lutsandvo lolucotfo etinkhulungwaneni tetitukulwane,+ acolele emaphutsa netiphambeko kanye netono,+ kodvwa angamyekeli loyo lonelicala.+ Uletsa sijeziso sesono lesentiwa bobabe, asiletsele emadvodzana abo, nebatukulu babo, asiletsele nesitukulwane sesitsatfu nesitukulwane sesine.”+
8 Ngekushesha Mosi waguca futsi wakhotsama. 9 Wabese utsi: “Awu Jehova, nangabe ngitfole umusa emehlweni akho, ngicela wena Jehova uhambe natsi ube semkhatsini wetfu+ ngisho nobe sibantfu labangalaleli.*+ Mane usicolele emaphutsa etfu netono tetfu,+ futsi usitsatse sibe bakho.” 10 Nkulunkulu waphendvula watsi: “Nasi sivumelwane lengisenta nani: Ngitawukwenta tintfo letimangalisako embikwabo bonkhe labantfu, tintfo letingakake tenteke* kuwo wonkhe umhlaba nobe kuto tonkhe tive,+ futsi bonkhe bantfu lenihlala emkhatsini wabo batayibona imisebenti yaJehova ngobe ngani ngitawukwenta intfo lebabatekako.+
11 “Lalelani loku lenginitjela kona lamuhla.+ Ngitawacosha embikwenu ema-Amori, emaKhenani, emaHethi emaPheresi, emaHivi kanye nemaJebhusi.+ 12 Caphelani kutsi ningenti sivumelwane nebantfu labahlala kulelive leniya kulo,+ ngobe loko kutawuba lugibe kini.+ 13 Kodvwa kufanele nibhidlite ema-al’thare abo, nibhidlite nematje abo langcwele futsi niwise netinsika tabo letingcwele.*+ 14 Kufanele ningamkhotsameli lomunye nkulunkulu+ ngobe Jehova ufuna kukhontwe yena yedvwa.* Phela unguNkulunkulu lofuna bantfu bakhe bakhonte yena kuphela.+ 15 Ningenti sivumelwane nebantfu labahlala kulelo live ngobe nabagwadla nabonkulunkulu babo futsi babentela imihlatjelo,+ kutawuba khona lotanimema bese nani senidla leyo mihlatjelo.+ 16 Ngemuva kwaloko nitawubese nitsatsa emadvodzakati abo kuze abe bafati bemadvodzana enu,+ futsi lamadvodzakati abo atawugwadla nabonkulunkulu babo bese abangela kutsi nalamadvodzana enu nawo agwadle nalabonkulunkulu.+
17 “Kufanele ningatenteli bonkulunkulu lababatwe ngensimbi.+
18 “Nibogubha uMkhosi Wesinkhwa Lesite Imvubelo.+ Nitawudla sinkhwa lesite imvubelo njengobe nje nganiyala, futsi loku nitawukwenta emalanga langu-7 ngesikhatsi lengasibeka enyangeni ya-Abibi,*+ ngobe naphuma ngaleyo nyanga eveni laseGibhithe.
19 “Onkhe ematibulo lamadvuna* ngewami,+ ngisho nematibulo emfuyo yenu, kungaba litibulo lelidvuna lenkhomo nobe lemvu.+ 20 Litibulo lembongolo kufanele ulihlenge ngemvu, kodvwa nangabe ungalihlengi, ubolephula intsamo. Onkhe ematibulo enu lamadvuna nawo kufanele niwahlenge.+ Kute lokufanele ete embikwami angakaphatsi lutfo.
21 “Nitawusebenta emalanga lasitfupha, kodvwa ngelilanga lesi-7 nitawuphumula.*+ Kufanele niphumule ngisho kusikhatsi sekulima nobe sekuvuna.
22 “Nitawugubha uMkhosi Wemaviki nanivuna titselo tekucala takolo, nigubhe neMkhosi Wekubutsa* nakuphela umnyaka.+
23 “Katsatfu ngemnyaka, onkhe emadvodza* kufanele ete embikweNkhosi yeliciniso, Jehova, Nkulunkulu wema-Israyeli.+ 24 Ngitawuticosha letive embikwenu+ ngente nendzawo yenu ibe yinkhulu. Kute lotawufisa kutsatsa live lenu nanisahambile niyobona Jehova Nkulunkulu wenu, njengobe nitawuhamba katsatfu ngemnyaka.
25 “Nanenta umhlatjelo, ingati ningaboyinikela niyihlanganise nalokutsite lokunemvubelo.+ Umhlatjelo leniwenta ngemkhosi weliPhasika akukafaneli usale kuze kube sekuseni.+
26 “Titselo tekucala letivutsiwe temhlaba wenu letincono kakhulu kufanele nitiletse endlini yaJehova Nkulunkulu wenu.+
“Ningalibilisi lizinyane lembuti elubisini lwenina.”+
27 Jehova wachubeka watsi kuMosi: “Lamavi kufanele uwabhale phansi,+ ngobe ngalamavi ngenta sivumelwane nawe kanye nema-Israyeli.”+ 28 Mosi wahlala lapho naJehova emalanga langu-40 kanye nebusuku lobungu-40. Akazange adle lutfo nobe anatse emanti.+ Kuletibhelekece Nkulunkulu wabhala emavi alesivumelwane, lokuyiMitsetfo Lelishumi.*+
29 Mosi wase uyehla eNtsabeni iSinayi aphetse letibhelekece letimbili teBufakazi.+ Ngesikhatsi ehla kulentsaba, Mosi abengati kutsi buso bakhe bebukhipha imisebe ngobe abekhulume naNkulunkulu. 30 Ngesikhatsi Aroni kanye nawo onkhe ema-Israyeli babona Mosi, babona kutsi buso bakhe bebukhipha imisebe futsi besaba kusondzela kuye.+
31 Kodvwa Mosi wababita. Ngako Aroni nabo bonkhe baholi bema-Israyeli beta kuye futsi wakhuluma nabo. 32 Ngemuva kwaloko, onkhe ema-Israyeli asondzela kuye futsi wawaniketa yonkhe lemitsetfo Jehova labemnike yona eNtsabeni iSinayi.+ 33 Mosi abetsi nakacedza kukhuluma nabo, ambonye buso bakhe ngendvwangu.+ 34 Kodvwa nakaya embikwaJehova kuze akhulume naye, abeyisusa lendvwangu kuze kube ngulapho esuka embikwakhe.+ Ngemuva kwaloko abehamba ayewutjela ema-Israyeli ngalemitsetfo labenikwe yona.+ 35 Ema-Israyeli abona kutsi buso baMosi bukhipha imisebe, ngako Mosi abeyibuyisela lendvwangu atimbonye ngayo kuze kube ngulapho ayokhuluma naNkulunkulu.*+
35 Mosi wabese ubitela ndzawonye onkhe ema-Israyeli, watsi kuwo: “Naku Jehova latsite kufanele kwentiwe:+ 2 Ningasebenta emalanga lasitfupha, kodvwa lilanga lesi-7 litawuba ngcwele kini, libe lisabatha kuJehova futsi kufanele kungasetjentwa sanhlobo.+ Nobe ngubani losebenta ngelilanga leliSabatha kufanele abulawe.+ 3 Ngalelilanga leliSabatha, akukafaneli nibase umlilo etindzaweni lenihlala kuto.”
4 Ngemuva kwaloko Mosi watjela onkhe ema-Israyeli watsi: “Naku Jehova lakushito: 5 ‘Bekelani eceleni iminikelo lenitayiletsa kuJehova.+ Bonkhe bantfu labanenhlitiyo levumako+ baboletsa nayi iminikelo kuJehova: ligolide, lisiliva, litfusi, 6 tintsambo letiluhlata njengesibhakabhaka, tinsontfo letibukhwebeletane,* tintsambo letibovu, ilineni lecolisakele, boya bembuti,+ 7 tikhumba tetimvu letidaywe taba bovu, tikhumba tetilwane,* tingodvo tesihlahla semgamba, 8 emafutsa etibane, ibhalisamu yekwenta emafutsa ekugcoba,* imphepho leneliphunga lelimnandzi,+ 9 nematje e-oniksi kanye nalamanye ematje lokufanele kuhlotjiswe ngawo sidziya+ nesembatfo sesifuba.+
10 “‘Bonkhe bantfu labanelikhono*+ emkhatsini wenu kufanele bente tonkhe letintfo Jehova latsite atentiwe: 11 Lithende lekukhontela kanye nendvwangu yalo,* nato tonkhe letinye tindvwangu tekulimbonya, emahhuka alo, emabhaluko,* imigcala, tinsika nemaseko alo; 12 libhokisi+ netindvuku talo,+ simbonyo,+ indvwangu+ yekwehlukanisa; 13 litafula+ netindvuku talo, nato tonkhe tintfo letitawusetjentiswa kulo netinkhwa+ letinikelwa kuNkulunkulu; 14 lutsi lwesibane+ lwekukhanyisa netintfo letitawusetjentiswa kulo, tibane nemafutsa ekukhanyisa;+ 15 li-al’thare lemphepho+ netindvuku talo; emafutsa ekugcoba nemphepho leneliphunga lelimnandzi;+ indvwangu* yemnyango welithende lekukhontela; 16 li-al’thare leminikelo yekushiswa+ nesisefo selitfusi, tindvuku talo, nato tonkhe tintfo letitawusetjentiswa kulo, indishi netinyawo letawubekwa kuto;+ 17 tindvwangu telibala* letitawulengiswa,+ tinsika talo nemaseko ato; indvwangu yeligede lelibala; 18 tikhonkwane telithende lekukhontela netikhonkwane telibala kanye netintsambo tato;+ 19 netingubo letitfungwe kahle+ tekusebenta endzaweni lengcwele, tingubo letingcwele ta-Aroni+ umphristi, kanye netingubo temadvodzana akhe tekwenta imisebenti yebuphristi.’”
20 Ngemuva kwaloko onkhe ema-Israyeli esuka embikwaMosi. 21 Bonkhe lebebanenhlitiyo levumako+ nabo bonkhe lebebanesifiso sekunikela, beta baletsa iminikelo yabo kuJehova lebeyitawusetjentiselwa lithende lekuhlangana, nayo yonkhe imisebenti lebeyitakwentiwa kulo, nasekwenteni tingubo letingcwele. 22 Bonkhe lebebanetinhlitiyo letivumako bebaloku beta, emadvodza nebafati. Baletsa tipeneti teligolide, emacici, tindandatho naleminye imihlobiso nayo yonkhe inhlobo yetintfo letentiwe ngeligolide. Bonkhe baletsa iminikelo* yabo yeligolide kuJehova.+ 23 Bonkhe lebebanetintsambo letiluhlata njengesibhakabhaka, tinsontfo letibukhwebeletane, tintsambo letibovu, ilineni lecolisakele, boya bembuti, tikhumba tetimvu letidaywe taba bovu kanye netikhumba tetilwane,* bakuletsa. 24 Bonkhe bantfu lebebanelisiliva nelitfusi banikela ngalo kuJehova, futsi bonkhe lebebanetigodvo temgamba lebetingaba lusito nabo batiletsa.
25 Bonkhe bafati lebebanelikhono+ benta imitiya, futsi bayiletsa. Baletsa tintsambo letiluhlata njengesibhakabhaka, tinsontfo letibukhwebeletane, tintsambo letibovu kanye nelineni lecolisakele. 26 Bonkhe bafati lebebanetinhlitiyo letivumako benta imitiya ngeboya bembuti.
27 Baholi baletsa ematje e-oniksi kanye nalamanye ematje lebekatawunamekwa kulesidziya nakulesembatfo sesifuba,+ 28 baletsa ibhalisamu, nemafutsa ekukhanyisa, emafutsa ekugcoba+ nemafutsa ekwenta imphepho leneliphunga lelimnandzi.+ 29 Onkhe emadvodza nebafati lebebanetinhlitiyo letivumako baletsa lokutsite lebekutawusetjentiswa emsebentini Jehova lebekatjele Mosi kutsi wentiwe. Ema-Israyeli aletsa letintfo taba ngumnikelo wekutitsandzela kuJehova.+
30 Ngemuva kwaloko Mosi watsi kuma-Israyeli: “Jehova ukhetse Besaleli indvodzana ya-Uri loyindvodzana yaHure, lovela esiveni sakaJuda.+ 31 Nkulunkulu umuphe umoya wakhe, wamnika kuhlakanipha, kucondza kanye nelwati lwekwenta lonkhe luhlobo lwemisebenti ledzinga likhono 32 kuze ente imisebenti yebuciko, asebente ngeligolide, ngelisiliva, nangelitfusi, 33 acetule ematje futsi awanameke, aphindze ente lonkhe luhlobo lwetintfo tesigodvo letentiwa ngebuciko. 34 Nkulunkulu umnikete likhono lekufundzisa labanye, yena kanye na-Oholiyabi+ indvodzana ya-Ahisamaki lovela esiveni sakaDani. 35 Ubanikete kuhlakanipha*+ kwekwenta yonkhe imisebenti ledzinga likhono, wabaniketa likhono lekuhlobisa tingubo, lekweluka ngentsambo leluhlata njengesibhakabhaka, ngensontfo lebukhwebeletane, ngentsambo lebovu nelineni lecolisakele kanye nelikhono lekutfunga. Lamadvodza atawukwenta yonkhe inhlobo yemisebenti aphindze ente lonkhe luhlobo lwetintfo tebuciko.
36 “Besaleli utawusebenta na-Oholiyabi kanye nawo onkhe emadvodza lanelikhono* Jehova lawanike kuhlakanipha nekucondza, kuze bati kutsi kufanele bawente njani wonkhe umsebenti wendzawo lengcwele njengobe nje Jehova ashito.”+
2 Ngako Mosi wabita Besaleli na-Oholiyabi kanye nawo onkhe emadvodza lanelikhono Jehova lawanike kuhlakanipha,+ onkhe labechutjwa yinhlitiyo kutsi asite ekwenteni lomsebenti.+ 3 Batsatsa yonkhe leminikelo+ yekwenta umsebenti endzaweni lengcwele, leyo ema-Israyeli labeyiletse kuMosi. Kodvwa njalo ekuseni ema-Israyeli abechubeka aletsa kuye iminikelo yekutitsandzela.
4 Ngesikhatsi sebawucalile lomsebenti longcwele, sisebenti ngasinye kuto tonkhe leti letinelikhono besiya kuMosi, 5 sifike sitsi: “Labantfu sebaletsa lokungetulu kwaloko lokudzingekako kulomsebenti Jehova latsite awentiwe.” 6 Ngako Mosi watsi akukhishwe simemetelo kuwo onkhe ema-Israyeli, lesitsi: “Sale nima kuletsa iminikelo letawusetjentiswa ethendeni lekukhontela.” Ngaleyo ndlela labantfu bamiswa kutsi bachubeke baletsa iminikelo. 7 Letintfo lebekunikelwe ngato kuze kwentiwe wonkhe lomsebenti besetenele futsi titinyenti kakhulu.
8 Ngako tonkhe letisebenti letinelikhono+ tenta lelithende lekukhontela+ ngetindvwangu letingu-10 letentiwe ngelineni lecolisakele futsi lephotsiwe, ngentsambo leluhlata njengesibhakabhaka, ngensontfo lebukhwebeletane* nangentsambo lebovu. Besaleli watfungela imihlobiso yemakherubhi kuletindvwangu.+ 9 Indvwangu ngayinye beyingemamitha langaba ngu-12* budze, nemamitha langaba mabili* bubanti. Tonkhe letindvwangu betilingana. 10 Watsatsa letisihlanu tato watihlanganisa todvwa, naleletinye letisihlanu nato watihlanganisa todvwa. 11 Ngemuva kwaloko wenta tihilelo ngentsambo leluhlata njengesibhakabhaka emphetfweni wendvwangu lesekugcineni kuleti letihlanganisiwe, watenta lapho bekutawuhlangana khona letindvwangu. Waphindze wenta tihilelo nasemphetfweni wendvwangu lesekugcineni kuleti letinye letihlanganisiwe, nato watenta lapho bekutawuhlangana khona letindvwangu. 12 Wenta tihilelo letingu-50 emphetfweni walenye yaletindvwangu letisekugcineni, naletinye letingu-50 emphetfweni walelenye, kuze letihilelo ticondzane lapho titawuhlanganiswa khona. 13 Ekugcineni wase wenta emahhuka eligolide langu-50 futsi wahlanganisa ngawo letindvwangu, kuze lelithende lekukhontela libe yintfo yinye.
14 Wabese wenta tindvwangu tekumbonya lelithende lekukhontela ngeboya bembuti. Wenta tindvwangu letingu-11.+ 15 Indvwangu ngayinye beyingemamitha langaba ngu-13 budze, nemamitha langaba mabili bubanti. Tonkhe letindvwangu letingu-11 betilingana. 16 Wahlanganisa tindvwangu letisihlanu todvwa, naleti letinye letisitfupha nato watihlanganisa todvwa. 17 Ngemuva kwaloko wenta tihilelo letingu-50 emphetfweni wendvwangu lesekugcineni kuleti tekucala, watenta lapho bekutawuhlangana khona letindvwangu. Wenta netihilelo letingu-50 emphetfweni wendvwangu lesekugcineni kuleti letinye, lapho betitawuhlanganiswa khona. 18 Wenta emahhuka elitfusi langu-50 ekuhlanganisa letindvwangu, kuze lelithende lekukhontela libe yintfo yinye.
19 Wenta lenye indvwangu yekumbonya lelithende lekukhontela ngetikhumba tetimvu letidaywe taba bovu, ngetulu kwayo wenta nalenye indvwangu yekumbonya ngetikhumba tetilwane.*+
20 Wase wenta emabhaluko* alelithende lekukhontela ngesigodvo sesihlahla semgamba,+ futsi wawamisa acondza.+ 21 Libhaluko ngalinye belingemamitha langaba sihlanu* kuphakama, bubanti balo bungemasentimitha langaba ngu-66.* 22 Libhaluko ngalinye belinetinhlokwana letimbili letilinganisile. Wawenta ngaleyo ndlela onkhe emabhaluko alelithende lekukhontela. 23 Umhlubulo walelithende lekukhontela loseningizimu wawentela emabhaluko langu-20, futsi wawenta abuka eningizimu. 24 Ngemuva kwaloko wenta emaseko elisiliva langu-40 ngephansi kwalamabhaluko langu-20. Kwaba nemaseko lamabili ngephansi kwelibhaluko lekucala kuze kungene letinhlokwana talo letimbili, futsi kwakunalamabili ngephansi kwelibhaluko ngalinye kulawa lalandzelako kuze kungene tinhlokwana talo letimbili.+ 25 Kulomhlubulo walelithende lekukhontela losenyakatfo, wenta emabhaluko langu-20 26 nemaseko awo elisiliva langu-40. Kwaba nemaseko lamabili ngephansi kwelibhaluko lekucala, nalamabili ngephansi kwelibhaluko ngalinye kulawa lamanye.
27 Encenyeni lengemuva yalelithende lekukhontela lengasenshonalanga wenta emabhaluko lasitfupha.+ 28 Emabhaluko lamabili wawenta aba semakoneni langemuva alelithende lekukhontela. 29 Abebhancene kusuka phansi kuya etulu aze ayewufika ejiveni lekucala. Omabili wawenta ngalendlela futsi aba semakoneni alelithende lekukhontela. 30 Lamabhaluko abengu-8 asawonkhe, futsi emaseko awo elisiliva abengu-16. Kwakunemaseko lamabili ngephansi kwelibhaluko ngalinye.
31 Wabese wenta imigcala ngesigodvo semgamba, kwaba nemigcala lesihlanu lengena kulamabhaluko lakumunye walemihlubulo yalelithende lekukhontela+ 32 naleminye imigcala lesihlanu lengena kulamabhaluko lakulolomunye umhlubulo, kanye naleminye lesihlanu lengena kulawo lasencenyeni lengemuva yalelithende lekukhontela, enshonalanga. 33 Lemigcala lesemkhatsini wayifaka yavundla emkhatsini walamabhaluko yasuka ekucaleni yaze yaphumela ekugcineni. 34 Lamabhaluko wawanameka ngeligolide, wenta nemajiva eligolide lokutawungena kuwo lemigcala, nalemigcala wayinameka ngeligolide.+
35 Ngemuva kwaloko wenta indvwangu+ ngentsambo leluhlata njengesibhakabhaka, nangensontfo lebukhwebeletane, nangentsambo lebovu kanye nangelineni lecolisakele futsi lephotsiwe. Watfungela imihlobiso+ yemakherubhi+ kuyo. 36 Lendvwangu wayentela tinsika letine ngesigodvo semgamba watinameka ngeligolide. Wenta nemahhuka ato ngeligolide. Letinsika watentela emaseko lamane elisiliva. 37 Ngemuva kwaloko wenta indvwangu* yasekungeneni kwalelithende lekukhontela, wayeluka ngentsambo leluhlata njengesibhakabhaka, nangensontfo lebukhwebeletane, nangentsambo lebovu, kanye nangelineni lecolisakele futsi lephotsiwe.+ 38 Wenta netinsika letisihlanu letentiwe ngemgamba nemahhuka ato. Tihloko taletinsika kanye netintfo tato tekuhlanganisa* watinameka ngeligolide, kodvwa emaseko ato lasihlanu bekentiwe ngelitfusi.
37 Besaleli+ wabese wakha Libhokisi+ ngesigodvo semgamba. Belingemasentimitha langaba ngu-111* budze, nemasentimitha langaba ngu-66* bubanti kanye nemasentimitha langaba ngu-66 kuphakama.+ 2 Walinameka ngeligolide lelicwengisisiwe ngephandle nangekhatsi, ekugcineni kwalo wafaka libhande lelingumhlobiso lelentiwe ngeligolide.+ 3 Ngemuva kwaloko wenta emajiva lamane ngeligolide, wawafaka ngenhla kwetinyawo talo letine. Kwaba nemajiva lamabili ngenhlanye nalamanye lamabili ngenhlanye. 4 Wenta netindvuku ngesigodvo sesihlahla semgamba wase utinameka ngeligolide.+ 5 Letindvuku watifaka kuletimbobo talamajiva langala nangale kwaleLibhokisi kuze litfwalwe ngato.+
6 Wenta simbonyo ngeligolide lelicwengisisiwe.+ Besingemasentimitha langaba ngu-111 budze nemasentimitha langaba ngu-66 bubanti.+ 7 Wenta nemakherubhi+ lamabili ngeligolide, wenta* lelinye laba ngala lelinye laba ngale kulesimbonyo.+ 8 Lamakherubhi abesemaphetselweni omabili alesimbonyo, lelinye laba ngala lelinye laba ngale kwaso. 9 Omabili abevule timphiko tawo tibuke etulu, asibekele lesimbonyo ngaletimphiko,+ futsi abukene. Buso bawo bebubuke phansi kulesimbonyo.+
10 Wabese wenta litafula ngesigodvo sesihlahla semgamba.+ Belingemasentimitha langaba ngu-89* budze, lingemasentimitha langaba ngu-45* bubanti nemasentimitha langaba ngu-66 kuphakama.+ 11 Walinameka ngeligolide lelicwengisisiwe. Emaphetselweni alo wafaka libhande lelingumhlobiso lowentiwe ngeligolide. 12 Wabese wenta libhande lelinebubanti lobulingana nebesandla,* wafaka nalomunye umhlobiso weligolide lotungeleta ngephansi kwalelibhande. 13 Wenta nemajiva lamane ngeligolide wawafaka emakoneni lamane alelitafula, lapho kufakwe khona tinyawo talo letine. 14 Lamajiva abesondzele kulelibhande kuze kufakwe kuwo tindvuku tekutfwala lelitafula. 15 Wenta tindvuku ngesigodvo sesihlahla semgamba, watinameka ngeligolide. Lelitafula belitawutfwalwa ngato. 16 Ngemuva kwaloko wenta nati tintfo lebetitawubekwa kulelitafula: titja, tindzebe, tindziwo kanye netindishi lokutawutfululwa ngato iminikelo yalokunatfwako. Konkhe wakwenta ngeligolide lelicwengisisiwe.+
17 Wabese wenta lutsi lwesibane+ ngeligolide lelicwengisisiwe, walwenta asebentisa sandvo. Sisekelo salo, sicu, emagala, timbali, imidvumba yalo kanye nemacembe langephansi kwaletimbali, konkhe kwakuyintfo yinye.+ 18 Lolutsi lwesibane belunemagala lasitfupha, ngenhlanye kunalamatsatfu kuphindze kube nalamanye lamatsatfu ngenhlanye. 19 Ligala ngalinye kulawa lamatsatfu langenhlanye belinetimbali letintsatfu letimise kwetimbali te-alimondi, nguleyo naleyo mbali inemidvumba nemacembe ngephansi kwayo. Nasegaleni ngalinye kulawa lamatsatfu langenhlanye bekunetimbali letintsatfu letimise kwetimbali te-alimondi, nguleyo naleyo mbali inemidvumba nemacembe ngephansi kwayo. Kwentiwa ngaleyo ndlela kuwo onkhe lamagala lasitfupha lasuka kulesicu salolutsi lwesibane. 20 Kulesicu bekunetimbali letine letimise kwetimbali te-alimondi, nguleyo naleyo mbali inemidvumba kanye nemacembe ngephansi kwayo. 21 Bekunemdvumba munye ngephansi kwemagala lamabili ekucala laphuma kulesicu, kunalomunye umdvumba ngephansi kwemagala lamabili lalandzelako kanye nalomunye umdvumba ngephansi kwemagala lamabili ekugcina, kuwo onkhe lamagala lasitfupha laphuma kulesicu salolutsi lwesibane. 22 Lemidvumba nalamagala kanye nalo lonkhe lolutsi lwesibane kwakuyintfo yinye leyentiwe* ngeligolide lelicwengisisiwe. 23 Wabese wenta tibane letingu-7 talolutsi lwesibane,+ netindlawu talo kanye netitja talo tekufaka tintsambo tesibane lesetisebentile. Konkhe wakwenta ngeligolide lelicwengisisiwe. 24 Lolutsi lwesibane kanye nako konkhe lokuhambisana nalo wakwenta ngeligolide lelicwengisisiwe lelinesisindvo selithalenta.*
25 Ngemuva kwaloko wenta li-al’thare lekushisela imphepho,+ walenta ngesigodvo semgamba. Belisikwele, budze balo bungemasentimitha langaba ngu-45, bubanti balo bungemasentimitha langaba ngu-45, kuphakama kwalo kungemasentimitha langaba ngu-89. Timphondvo talo betiyintfo yinye naleli-al’thare.+ 26 Incenye yalo lengetulu, kanye nato tonkhe tinhlangotsi talo netimphondvo talo watinameka ngeligolide lelicwengisisiwe. Wenta nelibhande lelingumhlobiso weligolide emaphetselweni alo. 27 Wenta emajiva lamabili eligolide, aba ngentansi kwalomhlobiso etinhlangotsini taleli-al’thare letimbili letibukene. Kulamajiva bekutawufakwa tindvuku tekutfwala leli-al’thare. 28 Ngemuva kwaloko wenta letindvuku ngesigodvo sesihlahla semgamba, watinameka ngeligolide. 29 Wabese wenta emafutsa ekugcoba langcwele,+ nemphepho lenuka kamnandzi futsi lehlantekile,+ konkhe kuhlanganiswe ngebuciko.*
38 Wenta li-al’thare lemnikelo wekushiswa ngesigodvo semgamba. Budze nebubanti balo bebulingana. Belingemamitha langaba mabili* budze, nemamitha langaba mabili bubanti, kuphakama kwalo kungetudlwana kwemitha.*+ 2 Wenta timphondvo emakoneni alo lamane, futsi taba yintfo yinye naleli-al’thare. Leli-al’thare wase ulinameka ngelitfusi.+ 3 Ngemuva kwaloko wenta tintfo lebetitawusetjentiswa kulo, tikotela, emafosholo, tindishi, timfologo kanye netitja tekufaka emalahle. Tonkhe letintfo watenta ngelitfusi. 4 Waphindze wenta sisefo selitfusi, wasifaka ngentansi kwelibhande lelingumhlobiso lelitungelete leli-al’thare, sehla safika emkhatsini walo. 5 Wenta emajiva lamane emakoneni alo lamane, edvute nalesisefo selitfusi. Kulamajiva bekutawufakwa tindvuku tekutfwala leli-al’thare. 6 Wabese wenta tindvuku ngesigodvo semgamba futsi watinameka ngelitfusi. 7 Letindvuku watifaka kulamajiva lasemihlubulweni yaleli-al’thare, kuze litfwalwe ngato. Leli-al’thare walakha laba njengelibhokisi lemapulango lelivulekile.
8 Ngemuva kwaloko wenta indishi yelitfusi+ netinyawo telitfusi letawubekwa kuto. Wasebentisa tibuko letentiwe ngelitfusi lebetitebafati lebebasebenta emnyango welithende lekuhlangana.
9 Wenta nelibala*+ lalelithende lekukhontela. Eluhlangotsini loluseningizimu lwalelibala wenta tindvwangu telineni lecolisakele futsi lephotsiwe, lebetitawulengiswa kulo. Letindvwangu taba ngemamitha langaba ngu-45* budze.+ 10 Bekunetinsika letingu-20 kanye nemaseko elitfusi langu-20. Emahhuka aletinsika kanye netintfo tato tekuhlanganisa* bekwentiwe ngelisiliva. 11 Tindvwangu letalengiswa eluhlangotsini lolusenyakatfo nato betingemamitha langaba ngu-45 budze. Tinsika tato letingu-20 nemaseko ato langu-20 bekwentiwe ngelitfusi. Emahhuka aletinsika netintfo tato tekuhlanganisa* bekwentiwe ngelisiliva. 12 Eluhlangotsini lolusenshonalanga kwalengiswa tindvwangu letingemamitha langaba ngu-22* budze. Kwaba netinsika letingu-10 nemaseko langu-10. Emahhuka aletinsika netintfo tato tekuhlanganisa* bekwentiwe ngelisiliva. 13 Bubanti beluhlangotsi lolungasemphumalanga bebungemamitha langaba ngu-22. 14 Kulenye incenye bekulengiswe tindvwangu letingemamitha langaba ngu-7,* kunetinsika letintsatfu nemaseko ato lamatsatfu. 15 Kulelenye incenye lengale kweligede lalelibala bekulengiswe tindvwangu letingemamitha langaba ngu-7, kunetinsika letintsatfu nemaseko ato lamatsatfu. 16 Tonkhe tindvwangu lebetilengiswe kulelibala betentiwe ngelineni lecolisakele futsi lephotsiwe. 17 Emaseko aletinsika bekentiwe ngelitfusi, emahhuka ato kanye netintfo tekuhlanganisa* kwentiwe ngelisiliva. Tihloko taletinsika betinamekwe ngelisiliva futsi tonkhe tinsika talelibala betinekwekufasa lokwentiwe ngelisiliva.+
18 Indvwangu* yeligede lalelibala beyelukwe ngentsambo leluhlata njengesibhakabhaka, nangensontfo lebukhwebeletane,* nangentsambo lebovu kanye nangelineni lecolisakele futsi lephotsiwe. Beyingemamitha langaba ngu-9* budze nemamitha langaba mabili* kuphakama. Lokuphakama kwayo bekulingana nekuphakama kwaletinye tindvwangu letilengiswe kulelibala.+ 19 Tinsika tato letine kanye nemaseko ato lamane bekwentiwe ngelitfusi. Emahhuka aletinsika kanye netintfo tato tekuhlanganisa* bekwentiwe ngelisiliva, futsi tihloko taletinsika betinamekwe ngelisiliva. 20 Tonkhe tikhonkwane talelithende lekukhontela netalelibala betentiwe ngelitfusi.+
21 Mosi watsi akwentiwe luhla lwetintfo lebetisetjentiswe ethendeni lekukhontela, lebelinelibhokisi leBufakazi.+ Loluhla lwentiwa ngemaLevi+ acondziswa ngu-Ithamari+ indvodzana ya-Aroni umphristi. 22 Besaleli+ indvodzana ya-Uri loyindvodzana yaHure, lovela esiveni sakaJuda wakwenta konkhe loko Jehova labekutjele Mosi. 23 Oholiyabi+ indvodzana ya-Ahisamaki lovela esiveni sakaDani abesebenta naye, asisebenti lesinelikhono, ahlobisa tingubo futsi eluka ngentsambo leluhlata njengesibhakabhaka, nangensontfo lebukhwebeletane, nangentsambo lebovu kanye nangelineni lecolisakele.
24 Lonkhe ligolide lelasetjentiswa kuwo wonkhe umsebenti wendzawo lengcwele belilingana neligolide lebelinikelwe laba ngumnikelo lojikitiswako,+ belingemakhilogremu langaba ngu-1 000* labekalwe ngesisindvo lesisemtsetfweni sasendzaweni lengcwele.* 25 Lisiliva lelaletfwa ngulabo lababhaliswa kuwo onkhe ema-Israyeli belingemakhilogremu langaba ngu-3 440* labekalwe ngesisindvo lesisemtsetfweni sasendzaweni lengcwele.* 26 Umuntfu ngamunye kulabo labebabhalisiwe lebebaneminyaka lengu-20 kuya etulu waletsa lisiliva lelingemagremu langaba sitfupha* lebelikalwe ngesisindvo lesisemtsetfweni sasendzaweni lengcwele.*+ Labantfu sebabonkhe bebangu-603 550.+
27 Kwentiwa emaseko endzawo lengcwele kanye nemaseko endvwangu yekwehlukanisa ngemathalenta langu-100. Emaseko langu-100 abengemathalenta langu-100, liseko lilinye lilithalenta linye.+ 28 Ngalamakhilogremu langu-20 elisiliva* wenta emahhuka aletinsika, wanameka tihloko tato ngelisiliva futsi wahlanganisa letinsika.
29 Litfusi lelanikelwa* belingemakhilogremu langu-2 420.* 30 Wenta ngalo emaseko emnyango welithende lekuhlangana, neli-al’thare lelentiwe ngelitfusi nesisefo salo selitfusi, nato tonkhe titja lebetitawusetjentiswa kuleli-al’thare, 31 nemaseko labetungelete lelibala, emaseko eligede lalelibala, nato tonkhe tikhonkwane telithende lekukhontela+ netelibala.
39 Benta tingubo letitfungwe kahle tekwenta umsebenti webuphristi endzaweni lengcwele basebentisa intsambo leluhlata njengesibhakabhaka, insontfo lebukhwebeletane,* nentsambo lebovu.+ Benta tingubo letingcwele ta-Aroni,+ njengobe nje Jehova abetjele Mosi.
2 Besaleli wenta sidziya+ ngeligolide, ngentsambo leluhlata njengesibhakabhaka, ngensontfo lebukhwebeletane, ngentsambo lebovu kanye nangelineni lecolisakele futsi lephotsiwe. 3 Batsatsa ligolide balishaya ngesandvo laba bongcwengcwe, yena walijuba laba tintsanjana kuze alihlanganise nalentsambo leluhlata njengesibhakabhaka, nensontfo lebukhwebeletane, nentsambo lebovu kanye nelineni lecolisakele futsi basihlobisa. 4 Lesidziya basentela emabhande, bawatfungela emahlombe. Lamabhande bekehla aye lapho lesidziya besifike sihlangane khona. 5 Benta nelibhande lelelukiwe* lelitfungelwe kulesidziya futsi lebesitawuboshwa ngalo.+ Nalo balenta ngeligolide, ngentsambo leluhlata njengesibhakabhaka, ngensontfo lebukhwebeletane, ngentsambo lebovu kanye nangelineni lecolisakele futsi lephotsiwe, njengobe nje Jehova abetjele Mosi.
6 Ngemuva kwaloko banameka ematje e-oniksi etikweligolide, base babhala kuwo emabito emadvodzana a-Israyeli, bawabhala shengatsi babeka luphawu.+ 7 Lamatje wawafaka emabhandeni lasemahlombe alesidziya, aba sikhumbuto kumadvodzana a-Israyeli,+ njengobe nje Jehova abetjele Mosi. 8 Wabese wenta sembatfo sesifuba+ futsi wasihlobisa njengalesidziya. Wasenta ngeligolide, ngentsambo leluhlata njengesibhakabhaka, ngensontfo lebukhwebeletane, ngentsambo lebovu kanye nangelineni lecolisakele futsi lephotsiwe.+ 9 Lesembatfo besisikwele nawusigocile. Budze nebubanti baso bebungemasentimitha langaba ngu-22.* 10 Banamatsisela ematje, aba ngemalayini lamane. Elayinini lekucala bekunerubhi, ithophazi kanye nesimaragidu. 11 Elayinini lesibili bekunethekhosi, isafire nejasiphi. 12 Kulesitsatfu kunelitje lokutsiwa yileshemu,* i-agathe ne-amethiste. 13 Elayinini lesine bekunekhrisolithe, i-oniksi kanye nejeyidi. Lamatje bekanamatsiselwe etikweligolide. 14 Litje ngalinye belimelela yinye yemadvodzana a-Israyeli langu-12. Lamabito abebhalwe shengatsi kubekwa luphawu, ngulelo nalelo limelela sive ngasinye kuleto letingu-12.
15 Kulesembatfo sesifuba babese benta tintsambo letiphotsiwe, letinjengetintsambo teligolide lelicwengisisiwe.+ 16 Benta neligolide lebekutawunamekwa kulo lamatje lamabili, benta nemajiva eligolide lamabili, bawafaka emakoneni langetulu alesembatfo. 17 Ngemuva kwaloko bafaka letintsambo teligolide kulamajiva lamabili lasemakoneni langetulu alesembatfo. 18 Letintsambo baphindze batifaka ngembili kuleligolide lebekunamatsiselwe kulo lamatje lasemabhandeni lamabili, emahlombe alesidziya, futsi batikhunga. 19 Benta nemajiva lamabili eligolide bawafaka ngekhatsi kulalamanye emakona lamabili alesembatfo sesifuba, abukana nalesidziya.+ 20 Babese benta lamanye emajiva lamabili eligolide, bawafaka encenyeni lengembili yalesidziya. Bekangentansi kwalamabhande lamabili lasuka emahlombe aso, ngenhla kwalapho lelibhande lelelukiwe* lihlangana khona nalesidziya. 21 Ekugcineni babopha lesembatfo ngentsambo leluhlata njengesibhakabhaka. Lentsambo beyingena emajiveni aso, iyewubopha emajiveni alesidziya. Loku bakwenta kuze lesembatfo sihlale kahle kulesidziya, sibe ngenhla kwalelibhande lelelukiwe,* njengobe nje Jehova abetjele Mosi.
22 Ngemuva kwaloko wenta lijazi lelite imikhono lebelitawuba ngephansi kwalesidziya. Belentiwe ngumtfungi, futsi lonkhe lentiwe ngentsambo leluhlata njengesibhakabhaka.+ 23 Ngetulu kwalelijazi bekunentsamo yekufaka inhloko, ifana nentsamo yelijazi lelisotja. Lentsamo beyinemphetfo kuze ingadzabuki. 24 Emphetfweni walelijazi benta emahananandza* lalukwe ngentsambo leluhlata njengesibhakabhaka, ngensontfo lebukhwebeletane, nangentsambo lebovu. 25 Benta netinsimbi teligolide lelicwengisisiwe, batifaka emkhatsini walamahananandza, kuwo wonkhe umphetfo walelijazi lelite imikhono. 26 Bekuba yinsimbi kube lihananandza, kube yinsimbi kube lihananandza, kuwo wonkhe umphetfo walelijazi lelite imikhono lebelisetjentiswa nakwentiwa umsebenti webuphristi, njengobe nje Jehova abetjele Mosi.
27 Bentela Aroni nemadvodzana+ akhe tingubo ngelineni lecolisakele, lebetelukwe ngumtfungi, 28 benta nemshuculo lokhetsekile+ ngelineni lecolisakele, benta naleminye imishuculo ngelineni lecolisakele futsi lebeyihlotjisiwe,+ baphindze benta netikhindi* ngelineni+ lecolisakele futsi lephotsiwe. 29 Beluka netinseshi ngelineni lecolisakele futsi lephotsiwe, nangentsambo leluhlata njengesibhakabhaka, ngensontfo lebukhwebeletane, nangentsambo lebovu, njengobe nje Jehova abetjele Mosi.
30 Ekugcineni benta ngcwengcwe longcwele* lomanyatelako, bawenta ngeligolide lelicwengisisiwe, futsi kuwo babhala emavi latsi: “Bungcwele ngebaJehova.”+ Lamavi bawabhala shengatsi babeka luphawu. 31 Kulongcwengcwe bafaka intsambo leluhlata njengesibhakabhaka kuze bawubophele kulomshuculo lokhetsekile, njengobe nje Jehova abetjele Mosi.
32 Ngako wacedvwa wonkhe umsebenti lohlobene nelithende lekukhontela, lokulithende lekuhlangana, futsi ema-Israyeli akwenta konkhe loko Jehova labekutjele Mosi.+ Akwenta konkhe njengobe abeshito.
33 Ngemuva kwaloko baletsa lelithende lekukhontela+ kuMosi, baletsa nendvwangu yalo,+ nato tonkhe tintfo lebetitawusetjentiswa kulo: emahhuka,+ emabhaluko,*+ imigcala,+ tinsika nemaseko alo;+ 34 indvwangu yetikhumba tetimvu letidaywe taba bovu,+ indvwangu leyentiwe ngetikhumba tetilwane,* nendvwangu yekwehlukanisa;+ 35 libhokisi leBufakazi, tindvuku talo+ nesimbonyo;+ 36 litafula, nato tonkhe tintfo letitawusetjentiswa kulo,+ netinkhwa letinikelwe kuNkulunkulu; 37 lutsi lwesibane lolwentiwe ngeligolide lelicwengisisiwe, tibane talo+ letihelile, tonkhe tintfo letitawusetjentiswa kulo,+ nemafutsa ekukhanyisa;+ 38 li-al’thare+ leligolide, emafutsa ekugcoba,+ imphepho leneliphunga lelimnandzi,+ nendvwangu*+ yemnyango welithende lekukhontela; 39 li-al’thare lelitfusi,+ nesisefo salo selitfusi, tindvuku talo,+ tonkhe tintfo letitawusetjentiswa kulo,+ indishi netinyawo letawubekwa kuto;+ 40 tindvwangu telibala* letitawulengiswa, tinsika talo nemaseko ato,+ indvwangu*+ yeligede lelibala, tintsambo talelithende lekukhontela, tikhonkwane talelithende lekukhontela,+ nato tonkhe tintfo letitawusetjentiswa nakwentiwa imisebenti kulelithende lekukhontela, lokulithende lekuhlangana. 41 Baletsa netingubo letitfungwe kahle tekusebenta endzaweni lengcwele, tingubo letingcwele ta-Aroni umphristi,+ kanye netingubo temadvodzana akhe tekwenta imisebenti yebuphristi.
42 Wonkhe lomsebenti ema-Israyeli awenta ngekuvumelana nako konkhe Jehova labekutjele Mosi.+ 43 Watsi Mosi nakahlola tonkhe letintfo lebebatentile, wabona kutsi batente njengobe nje Jehova abeshito, ngako Mosi wababusisa.
40 Ngemuva kwaloko Jehova watsi kuMosi: 2 “Ngelilanga lekucala enyangeni yekucala, kufanele umise lithende lekukhontela, lokulithende lekuhlangana.+ 3 Ubongenisa libhokisi leBufakazi kulelithende+ bese ufaka indvwangu kuze usitse lelibhokisi.+ 4 Kufanele ungenise nelitafula,+ ubeke nato tonkhe tintfo lokufanele tibe kulo, ungenise nelutsi lwesibane+ bese ukhanyisa tibane talo.+ 5 Ngemuva kwaloko ubobeka li-al’thare leligolide, lokuli-al’thare lekushisa imphepho+ embikwelibhokisi leBufakazi, ufake nendvwangu* yemnyango walelithende lekukhontela.+
6 “Kufanele ubeke li-al’thare lekwenta umnikelo wekushiswa+ embikwemnyango walelithende lekukhontela, lokulithende lekuhlangana. 7 Emkhatsini walelithende lekuhlangana kanye naleli-al’thare kufanele ubeke indishi, bese utsela emanti kuyo.+ 8 Ubobiyela nelibala+ lelitungelete lelithende lekukhontela, ufake nendvwangu*+ yeligede lalelibala. 9 Ngemuva kwaloko ubotsatsa emafutsa ekugcoba,+ ugcobe lelithende lekukhontela nato tonkhe tintfo letikulo,+ ulingcwelise kanye nato tonkhe tintfo talo kuze libe ngcwele. 10 Kufanele utsatse emafutsa ugcobe leli-al’thare lekwenta umnikelo wekushiswa nato tonkhe tintfo talo bese uyalingcwelisa kuze libe ngcwele ngalokuphelele.+ 11 Ubophindze ugcobe ngawo lendishi netinyawo letawubekwa kuto futsi ukungcwelise.
12 “Ubobese uletsa Aroni nemadvodzana akhe emnyango welithende lekuhlangana, ufike ubageze ngemanti.+ 13 Aroni ubomgcokisa letingubo letingcwele,+ umgcobe ngemafutsa+ uphindze umngcwelise, futsi yena utangikhonta njengemphristi. 14 Ngemuva kwaloko uboletsa nemadvodzana akhe, uwagcokise tingubo.+ 15 Nawo kufanele uwagcobe njengobe ugcobe babe wawo,+ kuze angikhonte njengebaphristi, futsi ngenca yalokugcotjwa, buphristi butawuchubeka bungebabo kuto tonkhe titukulwane tabo.”+
16 Mosi wakwenta konkhe loko Jehova labemtjele kona.+ Wakwenta konkhe njengobe abeshito.
17 Ngelilanga lekucala enyangeni yekucala, ngemnyaka wesibili, lelithende lekukhontela lamiswa.+ 18 Ngesikhatsi Mosi amisa lelithende lekukhontela, wabeka emaseko+ alo phansi, wase ufaka emabhaluko*+ nemigcala+ yalo, ekugcineni wafaka netinsika. 19 Watsatsa nendvwangu yalelithende+ lekukhontela walimbonya ngayo wabese ubeka leletinye tindvwangu tekumbonya+ etikwayo, njengobe nje Jehova abemtjelile.
20 Ngemuva kwaloko watsatsa tibhelekece teBufakazi+ watifaka kuleLibhokisi,+ wafaka netindvuku tekuletfwala,+ wase ubeka simbonyo+ etikwalo.+ 21 Watsatsa lelibhokisi walingenisa ethendeni lekukhontela wase ufaka indvwangu+ yekwehlukanisa kuze avimbe lelibhokisi leBufakazi,+ njengobe nje Jehova bekamtjelile.
22 Nakacedza, wafaka litafula+ enyakatfo yelithende lekuhlangana, lokulithende lekuhlangana, ngephandle kwendvwangu, 23 watsatsa nesinkhwa+ wasibeka embikwaJehova saba sitaki, njengobe nje Jehova abemtjelile.
24 Wabeka lutsi lwesibane+ kulelithende lekuhlangana, embikwelitafula, lwaba ngaseningizimu yalelithende lekukhontela. 25 Wakhanyisa letibane+ embikwaJehova, njengobe nje Jehova abemtjelile.
26 Wabese ubeka li-al’thare+ leligolide kulelithende lekuhlangana, embikwendvwangu yekwehlukanisa, 27 kuze imphepho leneliphunga lelimnandzi+ ishiselwe kulo,+ njengobe nje Jehova abemtjelile.
28 Ngemuva kwaloko wafaka indvwangu*+ yemnyango walelithende lekukhontela.
29 Wabeka li-al’thare lemnikelo wekushiswa+ emnyango walelithende lekukhontela, lokulithende lekuhlangana, kuze entele kulo umnikelo wekushiswa+ nemnikelo walokutinhlavu, njengobe nje Jehova abemtjelile.
30 Watsatsa nendishi wayibeka emkhatsini welithende lekuhlangana neli-al’thare, watsela kuyo emanti ekugeza.+ 31 BoMosi na-Aroni kanye nemadvodzana akhe bageza tandla kanye netinyawo tabo kulamanti. 32 Bebageza njalo nabangena ethendeni lekuhlangana nobe nabasondzela e-al’thare,+ njengobe nje Jehova abemtjelile.
33 Ekugcineni wenta libala*+ lelitungeleta lelithende lekukhontela neli-al’thare, wafaka nendvwangu* yeligede lalelibala.+
Ngako Mosi wawucedza wonkhe lomsebenti. 34 Insika yelifu yambonya lelithende lekuhlangana, nenkhatimulo yaJehova yagcwala kulelithende lekukhontela.+ 35 Mosi akakhonanga kungena kulelithende lekuhlangana, ngobe lelifu belisolo lilimbonyile, nenkhatimulo yaJehova igcwele kulelithende lekukhontela.+
36 Kulo lonkhe luhambo lwawo, bekutsi lapho lelifu lisuka kulelithende lekukhontela, ema-Israyeli nawo esuke endzaweni labemise kuyo emathende.+ 37 Kodvwa nangabe lelifu solo likhona kulelithende, ema-Israyeli bekangahambi kuze kube ngulapho lisuka.+ 38 Emini lelifu laJehova beliba setikwalelithende lekukhontela, bese kutsi ebusuku kube nemlilo ngetulu kwalo, futsi loku bekubonwa ngiwo onkhe ema-Israyeli kulo lonkhe luhambo lwawo.+
NgesiHebheru kutsi, “labaphuma etsangeni laJakobe.”
Nobe “naso sonkhe leso situkulwane.”
NgesiHebheru kutsi, “emadvodzana aka-Israyeli.”
NgesiHebheru kutsi, “futsi nitfola lomake asesihlalweni sekubelekisa.”
Nobe “libhokisi.”
Fundza Tinchazelo Temagama.
Lokusho kutsi “Kukhishwa,” lokukusindziswa emantini.
Nobe “sekanemandla.”
Nobe “emkhunjini.”
Nobe “wawavikela.”
Lokusho, Jethro.
Lokusho kutsi “Kuba Sihambi Endzaweni.”
NgesiHebheru kutsi, “emalanga lamanyenti.”
Nobe “Ngitawuba Nguloko Lengitawuba Ngiko.” Fundza Sandzisanchazo A4.
NgesiHebheru kutsi, “ngitawuba nemlomo wakho.”
Nobe “utawube umelela Nkulunkulu kuye.”
Loku kungenteka kusho indvodzana yaMosi.
Nobe “umukhwa lokhaliphile.”
Nobe “sibe liphunga lelibi kuFaro nasetincekwini takhe.”
NgesiHebheru kutsi, “lengaphakamisa sandla sami.”
NgesiHebheru kutsi, “tindzebe tami tingakasoki.”
NgesiHebheru kutsi, “ngemabutfo abo.”
NgesiHebheru kutsi, “Tindzebe tami atikasoki.”
NgesiHebheru kutsi, “waba nguNkulunkulu.”
Lokusho, imisele lesuka eNayili.
Nobe “etitjeni takho.”
Lolu luhlobo lwemphungane lencane lefana nembuzulwane lebeluvamile eGibhithe.
NgesiHebheru kutsi, “Ngumunwe waNkulunkulu.”
Lolu luhlobo lwemphungane lolulumanako.
NgesiHebheru kutsi, “enhlitiyweni yakho.”
Kungenteka kuchaza umbane lonemandla.
Sihlahla lebesilinywa eGibhithe, futsi bekwentiwa ngaso timphahla telineni.
NgesiHebheru kutsi, “kolo nesipileti.” Sipileti bekuluhlobo lwakolo lebelulinywa kadzeni eGibhithe.
NgesiHebheru kutsi, “ilugibe.”
Kungenteka kutsi nguMosi.
NgesiHebheru kutsi, “ngisho nalinye lisondvo.”
NgesiHebheru kutsi, “ilolele ema-Israyeli lulwimi.”
NgesiHebheru kutsi, “yena.”
NgesiHebheru kutsi, “emkhatsini wentsambama nekuhlwa.”
NgesiHebheru kutsi, “ngemabutfo enu.”
Lokusho, imvu nobe imbuti leseyincane.
Fundza Tinchazelo Temagama.
NgesiHebheru kutsi, “ngulenhlekelele.”
NgesiHebheru kutsi, “lebesisendlini lesemgodzini.”
Lokusho, licembu lebantfu labehlukahlukene labangesiwo ema-Israyeli, lokufaka ekhatsi bantfu baseGibhithe.
NgesiHebheru kutsi, “bangemabutfo.”
NgesiHebheru kutsi, “ngemabutfo.”
NgesiHebheru kutsi, “onkhe ematibulo lavula sibeletfo.”
Nobe “uwehlukanisele mine.”
Fundza Sandzisanchazo B15.
NgesiHebheru kutsi, “eminceleni yenu.”
NgesiHebheru kutsi, “emkhatsini wemehlo enu.”
NgesiHebheru kutsi, “bonkhe labavula sibeletfo.”
NgesiHebheru kutsi, “konkhe lokuvula sibeletfo.”
NgesiHebheru kutsi, “emkhatsini wemehlo enu.”
NgesiHebheru kutsi, “ngesandla lesiphakeme.”
Lokusho, cishe kusukela ngensimbi yesibili ekuseni kuya ensimbini yesitfupha ekuseni.
NgesiHebheru kutsi, “sandla.”
NgesiHebheru kutsi, “Imihelo.”
Lona bekungumholi wemndeni.
Lena yinsimbi yemculo lenjesigubhu lesincane.
Lokusho kutsi “Kubaba.”
NgesiHebheru kutsi, “emkhatsini wentsambama nekuhlwa.”
NgesiHebheru kutsi, “tigwaca.” Lena yinyoni lencane futsi lekhuluphele (icishe ibe ngemasentimitha langu-18 budze). Inyama yayo iyadliwa.
NgesiHebheru kutsi, “li-omeri.” Fundza Sandzisanchazo B14.
Nobe “imiphefumulo.”
Nobe “ngumkhosi welisabatha.”
Nobe “baphumula.”
Kungenteka lisuselwa emavini esiHebheru latsi “Yini lena?”
Lena bekuyindzawo yekugcina tintfo letibalulekile.
NgesiHebheru kutsi, “yincenye yinye kuletingu-10 teli-efa.” Fundza Sandzisanchazo B14.
Lokusho kutsi “Kuvivinya; Kulinga.”
Lokusho kutsi “Kulwa.”
Lokusho kutsi “Jehova Uyinsika Yami Leluphawu.”
Lokusho kutsi “Kuba Sihambi Endzaweni.”
Lokusho kutsi “Nkulunkulu Wami Ungumsiti.”
NgesiHebheru kutsi, “esandleni saseGibhithe.”
Bufakazi buveta kutsi lamavi asho lilanga lesuka ngalo eRefidimu.
Nobe “leligugu.”
Kungenteka bekudzingeka agwazwe ngebutjoki.
NgesiHebheru kutsi, “luphondvo lwemvu.”
NgesiHebheru kutsi, “ningasondzeli kumuntfu lomsikati.”
Nobe “wephule umtsetfo wami.” NgesiHebheru kutsi, “umelane nebuso bami.”
NgesiHebheru kutsi, “emasangweni.”
Nobe “lacetuliwe.”
NgesiHebheru kutsi, “iyihlenge.”
Kungaphindze kubekwe ngekutsi, “lenkhosi.”
Loku kusho kuya ecasini.
Kungaphindze kubekwe ngekutsi, “ngelithulusi.”
NgesiHebheru kutsi, “bese bantfwana bakhe bayaphuma.”
Nobe “kungenteki ingoti lematima.”
Nobe “sincephetelo.”
NgesiHebheru kutsi, “emashekeli.” Lishekeli lilinye belinesisindvo lesingemagremu langu-11.4. Fundza Sandzisanchazo B14.
Nobe “lohluphekile.”
Nobe “nginemusa.”
Nobe “Ningabometfuka.”
NgesiHebheru kutsi, “Ungawutsatsi.”
Nobe “bufakazi lobutsandvwa linyenti.”
NgesiHebheru kutsi, “emavini langemanga.”
Nobe “angeke ngimyekele umuntfu lomubi.”
Nobe “niyayati imphilo yekuba tihambi.”
Fundza Sandzisanchazo B15.
Watiwa nangekutsi nguMkhosi Wemaviki, nobe liPhentekhoste.
Watiwa nangekutsi nguMkhosi Wemadlangala (Emathende).
Nobe “Bonkhe labadvuna.”
Nobe “Ngitakwenta emalanga ekuphila kwenu abe manyenti.”
Nobe “Ngitawukwenta kutsi tonkhe titsa tenu tinifulatsele.”
Kungaphindze kubekwe ngekutsi, “kwesaba; kwetfuka.”
Lokusho, uMfula iYufrathe.
Nobe “insontfo lenembala lobovu sabukhwebeletane.” NgesiNgisi kutsi “purple.”
Tilwane taselwandle.
Ngemafutsa labesetjentiswa nakubekwa umuntfu esikhundleni lesitsite.
Fundza Tinchazelo Temagama.
Nobe “kubukeke ngendlela.”
NgesiHebheru kutsi, “ngemakhyubhitha langu-2.5.” Fundza Sandzisanchazo B14.
NgesiHebheru kutsi, “emakhyubhitha langu-1.5.” Fundza Sandzisanchazo B14.
NgesiHebheru kutsi, “emakhyubhitha langu-1.5.” Fundza Sandzisanchazo B14.
Lokusho kutsi, niwente nisebentisa sandvo.
NgesiHebheru kutsi, “ngemakhyubhitha lamabili.” Fundza Sandzisanchazo B14.
NgesiHebheru kutsi, “likhyubhitha.” Fundza Sandzisanchazo B14.
NgesiHebheru kutsi, “likhyubhitha nehhafu.” Fundza Sandzisanchazo B14.
Lokungaba ngemasentimitha langaba ngu-7.4 (2.9 inches). Fundza Sandzisanchazo B14.
Nobe “sinkhwa lesinikelwe kuNkulunkulu.”
Leyentiwe kusetjentiswa sandvo.
Lithalenta belilingana nemakhilogremu langu-34.2 (1 101 ema-ounce troy). Fundza Sandzisanchazo B14.
NgesiNgisi kutsi “purple.”
NgesiHebheru kutsi, “ngemakhyubhitha langu-28.” Fundza Sandzisanchazo B14.
NgesiHebheru kutsi, “nemakhyubhitha lamane.” Fundza Sandzisanchazo B14.
NgesiHebheru kutsi, “ngemakhyubhitha langu-30.” Fundza Sandzisanchazo B14.
Fundza umbhalo longentasi wa-Eks 25:5.
Lamabhaluko abenjengetinsika temnyango. Fundza Tinchazelo Temagama.
NgesiHebheru kutsi, “ngemakhyubhitha langu-10.” Fundza Sandzisanchazo B14.
NgesiNgisi kutsi “purple.”
Nobe “likhethini.”
Nobe “likhethini.”
NgesiHebheru kutsi, “ngemakhyubhitha lasihlanu.” Fundza Sandzisanchazo B14.
NgesiHebheru kutsi, “ngemakhyubhitha lamatsatfu.” Fundza Sandzisanchazo B14.
Nobe “umlotsa lonemafutsa,” lokusho umlotsa lonemafutsa etilwane lebetentiwa umhlatjelo.
Nobe “sibuya.”
NgesiHebheru kutsi, “ngemakhyubhitha langu-100.” Fundza Sandzisanchazo B14.
Nobe “emajiva; emabhande” ekuhlanganisa.
Nobe “emajiva; emabhande” ekuhlanganisa.
NgesiHebheru kutsi, “letingemakhyubhitha langu-50.” Fundza Sandzisanchazo B14.
NgesiHebheru kutsi, “letingemakhyubhitha langu-15.” Fundza Sandzisanchazo B14.
Nobe “likhethini.”
NgesiHebheru kutsi, “lengemakhyubhitha langu-20.” Fundza Sandzisanchazo B14.
NgesiNgisi kutsi “purple.”
NgesiHebheru kutsi, “labanenhlitiyo lehlakaniphile.”
NgesiNgisi kutsi “purple.”
Nobe “laselukhalo.”
NgesiHebheru kutsi, “bubanti besandla lobuphindvwe katsatfu.” Fundza Sandzisanchazo B14.
Leli litje leliligugu lelingatiwa, lokungenteka yi-amba, yihiyakinte, yi-opali nobe yithomalini.
Nobe “libhande laselukhalo.”
Nobe “libhande laselukhalo.”
Fundza Tinchazelo Temagama.
Nobe “emaphomegranathi.”
NgesiHebheru kutsi, “ugcwalise tandla tabo.”
Nobe “bobhulukwana.”
NgesiHebheru kutsi, “nenhlanyelo.”
Nobe “libhande laselukhalo.”
NgesiHebheru kutsi, “luphawu lolungcwele lwekutinikela.”
NgesiHebheru kutsi, “ugcwalise sandla sa-Aroni kanye netandla temadvodzana akhe.”
Nobe “lelijabulisako.” NgesiHebheru kutsi, “lelicabulako.”
Lesi bekusinkhwa lesiyindingilizi lesivuleke emkhatsini.
Nobe “lelijabulisako.” NgesiHebheru kutsi, “lelicabulako.”
NgesiHebheru kutsi, “nakugcwaliswa tandla tabo.”
NgesiHebheru kutsi, “sihambi,” lokungumuntfu longaphumi emndenini wa-Aroni.
NgesiHebheru kutsi, “ugcwalise tandla tabo.”
NgesiHebheru kutsi, “emkhatsini wentsambama nekuhlwa.”
NgesiHebheru kutsi, “loyincenye yinye kuletingu-10 teli-efa.” Fundza Sandzisanchazo B14.
NgesiHebheru kutsi, “nekota yelihini.” Fundza Sandzisanchazo B14.
NgesiHebheru kutsi, “emkhatsini wentsambama nekuhlwa.”
Nobe “lelijabulisako.” NgesiHebheru kutsi, “lelicabulako.”
NgesiHebheru kutsi, “likhyubhitha.” Fundza Sandzisanchazo B14.
NgesiHebheru kutsi, “ngemakhyubhitha lamabili.” Fundza Sandzisanchazo B14.
NgesiHebheru kutsi, “emkhatsini wentsambama nekuhlwa.”
NgesiHebheru kutsi, “ihhafu yelishekeli.” Fundza Sandzisachazo B14.
Nobe “nelishekeli lelingcwele.”
Ligera belilingana nemagremu langu-0.57 (ema-ounce troy langu-0.01835). Fundza Sandzisanchazo B14.
NgesiHebheru kutsi, “kwalehhafu yelishekeli.” Fundza Sandzisanchazo B14.
Nobe “nelishekeli lelingcwele.”
NgesiHebheru kutsi, “nelihini.” Fundza Sandzisanchazo B14.
Nobe “afane nemafutsa lentiwa ngumuntfu lonelikhono lekwenta emafutsa ekugcobisa.”
NgesiHebheru kutsi, “sihambi,” lokungumuntfu longaphumi emndenini wa-Aroni.
Nobe “afane nemafutsa lentiwa ngumuntfu lonelikhono lekwenta emafutsa ekugcobisa.”
NgesiHebheru kutsi, “Ngimbite.”
NgesiHebheru kutsi, “umoya waNkulunkulu.”
NgesiHebheru kutsi, “labanetinhlitiyo letihlakaniphile.”
NgesiHebheru kutsi, “ngemunwe waNkulunkulu.”
Nobe “sithico lesincibilikisiwe.”
Nobe “sithico lesincibilikisiwe.”
NgesiHebheru kutsi, “banetintsamo letilukhuni.”
Nobe “watsambisa buso baJehova.”
Nobe “utisole ngesincumo.”
NgesiHebheru kutsi, “Inhlanyelo.”
Nobe “watisola ngesincumo.”
Nobe “sento semandla.”
NgesiHebheru kutsi, “gcwalisani tandla tenu.”
NgesiHebheru kutsi, “inhlanyelo.”
NgesiHebheru kutsi, “ninetintsamo letilukhuni.”
NgesiHebheru kutsi, “labanetintsamo letilukhuni.”
NgesiHebheru kutsi, “ema-Israyeli ayikhipha.”
NgesiHebheru kutsi, “Ngikwati ngelibito.”
NgesiHebheru kutsi, “Buso bami.”
NgesiHebheru kutsi, “buso bakho.”
Nobe “nemusa.”
Nobe “nekwetsembeka.”
NgesiHebheru kutsi, “labanetintsamo letilukhuni.”
Nobe “tibe khona.”
Fundza Tinchazelo Temagama.
Nobe “Jehova watiwa ngekutsi akafuni kukhontwa nalabanye bonkulunkulu; Jehova ubitwa ngekutsi nguSikhwele.”
Fundza Sandzisanchazo B15.
NgesiHebheru kutsi, “Onkhe ematibulo lavula sibeletfo.”
Nobe “nitawugcina lisabatha.”
Watiwa nangekutsi nguMkhosi Wemadlangala (Emathende).
Nobe “bonkhe labadvuna.”
NgesiHebheru kutsi, “eMavi Lalishumi.” Yatiwa nangekutsi yiMitsetfo.
NgesiHebheru kutsi, “naye.”
NgesiNgisi kutsi “purple.”
Tilwane taselwandle.
Ngemafutsa labesetjentiswa nakubekwa umuntfu esikhundleni lesitsite.
NgesiHebheru kutsi, “labanenhlitiyo lehlakaniphile.”
Kungenteka kushiwo indvwangu lebeyentiwe ngeboya bembuti.
Lamabhaluko abenjengetinsika temnyango. Fundza Tinchazelo Temagama.
Nobe “likhethini.”
Nobe “tesibuya.”
Nobe “iminikelo lejikitiswako.”
Tilwane taselwandle.
NgesiHebheru kutsi, “inhlitiyo lehlakaniphile.”
NgesiHebheru kutsi, “onkhe emadvodza lanenhlitiyo lehlakaniphile.”
NgesiNgisi kutsi “purple.”
NgesiHebheru kutsi, “beyingemakhyubhitha langu-28.” Fundza Sandzisanchazo B14.
NgesiHebheru kutsi, “nemakhyubhitha lamane.” Fundza Sandzisanchazo B14.
Tilwane taselwandle.
Lamabhaluko abenjengetinsika temnyango. Fundza Tinchazelo Temagama.
NgesiHebheru kutsi, “belingemakhyubhitha langu-10.” Fundza Sandzisanchazo B14.
NgesiHebheru kutsi, “bungemakhyubhitha langu-1.5.” Fundza Sandzisanchazo B14.
Nobe “likhethini.”
Nobe “emajiva; emabhande” ekuhlanganisa.
NgesiHebheru kutsi, “belingemakhyubhitha langu-2.5.” Fundza Sandzisanchazo B14.
NgesiHebheru kutsi, “nemakhyubhitha langu-1.5.” Fundza Sandzisanchazo B14.
Wawenta asebentisa sandvo.
NgesiHebheru kutsi, “belingemakhyubhitha lamabili.” Fundza Sandzisanchazo B14.
NgesiHebheru kutsi, “likhyubhitha.” Fundza Sandzisanchazo B14.
Lokungaba ngemasentimitha langaba ngu-7.4 (2.9 ema-inch). Fundza Sandzisanchazo B14.
Lokusho kutsi beyentiwe kusetjentiswa sandvo.
Lithalenta belilingana nemakhilogremu langu-34.2 (1 101 ema-ounce troy). Fundza Sandzisanchazo B14.
Nobe “afane nemafutsa lentiwa ngumuntfu lonelikhono lekwenta emafutsa ekugcobisa.”
NgesiHebheru kutsi, “belingemakhyubhitha lasihlanu.” Fundza Sandzisanchazo B14.
NgesiHebheru kutsi, “kungemakhyubhitha lamatsatfu.” Fundza Sandzisanchazo B14.
Nobe “nesibuya.”
NgesiHebheru kutsi, “ngemakhyubhitha langu-100.” Fundza Sandzisanchazo B14.
Nobe “emajiva; emabhande” ekuhlanganisa.
Nobe “emajiva; emabhande” ekuhlanganisa.
NgesiHebheru kutsi, “letingemakhyubhitha langu-50.” Fundza Sandzisanchazo B14.
Nobe “emajiva; emabhande” ekuhlanganisa.
NgesiHebheru kutsi, “letingemakhyubhitha langu-15.” Fundza Sandzisanchazo B14.
Nobe “emajiva; emabhande” ekuhlanganisa.
Nobe “Likhethini.”
NgesiNgisi kutsi “purple.”
NgesiHebheru kutsi, “beyingemakhyubhitha langu-20.” Fundza Sandzisanchazo B14.
NgesiHebheru kutsi, “nemakhyubhitha lasihlanu.” Fundza Sandzisanchazo B14.
Nobe “emajiva; emabhande” ekuhlanganisa.
NgesiHebheru kutsi, “belingemathalenta langu-29 nemashekeli langu-730.” Fundza Sandzisanchazo B14.
Nobe “selishekeli lelingcwele.”
NgesiHebheru kutsi, “belingemathalenta langu-100 nemashekeli langu-1 775.” Fundza Sandzisanchazo B14.
Nobe “selishekeli lelingcwele.”
NgesiHebheru kutsi, “ihhafu yelishekeli.” Fundza Sandzisanchazo B14.
Nobe “selishekeli lelingcwele.”
NgesiHebheru kutsi, “emashekeli langu-1 775.”
Nobe “lemnikelo lojikitiswako.”
NgesiHebheru kutsi, “emathalenta langu-70 nemashekeli langu-2 400.”
NgesiNgisi kutsi “purple.”
Nobe “libhande laselukhalo.”
NgesiHebheru kutsi, “bubanti besandla lobuphindvwe katsatfu.” Fundza Sandzisanchazo B14.
Leli litje leliligugu lelingatiwa, lokungenteka yi-amba, yihiyakinte, yi-opali nobe yithomalini.
Nobe “libhande laselukhalo.”
Nobe “libhande laselukhalo.”
Nobe “emaphomegranathi.”
Nobe “bobhulukwana.”
NgesiHebheru kutsi, “luphawu lolungcwele lwekutinikela.”
Lamabhaluko abenjengetinsika temnyango. Fundza Tinchazelo Temagama.
Tilwane taselwandle.
Nobe “likhethini.”
Nobe “tesibuya.”
Nobe “likhethini.”
Nobe “likhethini.”
Nobe “likhethini.”
Lamabhaluko abenjengetinsika temnyango. Fundza Tinchazelo Temagama.
Nobe “likhethini.”
Nobe “sibuya.”
Nobe “likhethini.”