UMSHUMAYELI

1 Lawa ngemavi emfundzisi,*+ indvodzana yaDavide lebeyiyinkhosi yaseJerusalema.+

 2 Umfundzisi utsi: “Kulite!

Kulite! Konkhe kulite!”+

 7 Yonkhe imifula igeletela elwandle, kodvwa alugcwali.+

Imifula ibuyela emuva lapho isuke khona, kuze iphindze igelete.+

10 Ikhona yini intfo umuntfu langatsi ngayo: “Asenibuke naku, kusha”?

12 Mine mfundzisi, ngiyinkhosi yaka-Israyeli eJerusalema.+ 13 Ngancuma kusebentisa kuhlakanipha+ kwami kuze ngibukisise tonkhe tintfo letentiwa emhlabeni.+ Ngahlolisisa imisebenti lematima Nkulunkulu layinikete bantfu, futsi lebenta bahlale bamatasatasa.

16 Ngase ngikhuluma ngenhlitiyo ngitsi: “Asewubuke nje, mine ngatfola kuhlakanipha lokukhulu kwendlula bonkhe labake baba khona embikwami eJerusalema,+ nenhlitiyo yami yahlakanipha kakhulu futsi yaba nelwati lolunyenti.”+ 17 Ngatimisela kwati kuhlakanipha, umsangano* kanye nebulima,+ futsi ngabona kutsi naloku kufana nekucosha umoya.

2 Ngabese ngikhuluma ngenhlitiyo ngitsi: “Asengitijabulise futsi ngibone kutsi kukhona yini lokuhle lengitakutfola.” Kodvwa ngabona kutsi nako kulite.

 2 Ngatsi: “Kuhleka kubuhlanya!”

Ngatibuta ngatsi: “Umuntfu kumzuzisa ngani nje kujabula?”

3 Ngancuma kubuka kutsi ngingatfolani lenhle ngekutijabulisa ngeliwayini,+ kodvwa kuso sonkhe leso sikhatsi ingcondvo yami beyisolo ikahle. Ngaze ngatenta silima kuze ngibone kutsi kukhona yini lokuncono bantfu labangakwenta kuwo onkhe emalanga ekuphila kwabo lamhlabeni. 4 Ngabese ngenta imisebenti leminyenti.+ Ngatakhela tindlu+ futsi ngahlanyela tihlahla temagilebisi.+ 5 Ngenta tingadze letinkhulu lebetitinhle futsi kuto ngahlanyela tonkhe tinhlobo tetihlahla tetitselo. 6 Ngatigubhela emadamu kuze nginisele tihlahla letisakhula letisehlatsini lami. 7 Ngaba netinceku netincekukati,+ futsi letinye tinceku tatalelwa ekhaya lami. Ngetulu kwaloko, ngaba nemfuyo lenyenti, lefaka ekhatsi tinkhomo kanye nemihlambi yetimbuti neyetimvu,+ beyiyinyenti kwendlula yanobe ngubani lowabusa kucala kunami eJerusalema. 8 Ngacongelela lisiliva kanye neligolide+ lelinyenti, lokungumcebo lotfolwa ngemakhosi kanye netifundza+ kuphela. Ngatifunela bahlabeleli labadvuna nalabasikati, ngatifunela umuntfu lomsikati, yebo bantfu labasikati labanyenti, konkhe loku kuyabajabulisa bantfu. 9 Ngako ngaba netintfo letinyenti, ngandlula wonkhe umuntfu lowaphila kucala kunami eJerusalema.+ Futsi ngachubeka ngihlakaniphile.

10 Ngakwenta konkhe lebengifisa kukwenta.*+ Angizange ngitincishe injabulo, ecinisweni bengijabula ngawo wonkhe umsebenti wami lomatima, futsi loku bekungumvuzo wako konkhe kutikhandla kwami.+ 11 Kodvwa ngatsi nangicabanga ngawo wonkhe umsebenti wetandla tami, nangawo wonkhe umsebenti lomatima lebengitikhandla ngawo,+ ngabona kutsi konkhe kulite, kufana nekucosha umoya;+ ngabona nekutsi kute intfo lebeyibaluleke kangako* lamhlabeni.+

12 Ngabese ngicatsanisa kuhlakanipha, umsangano kanye nebulima.+ (Yini nje lengentiwa ngumuntfu lota emvakwenkhosi? Kute lokunye langakwenta ngaphandle kwaloko lesekuvele kwentiwe.) 13 Ngabona kutsi kuhlakanipha kuncono kunekuba silima,+ njengobe nekukhanya kuncono kunebumnyama.

14 Umuntfu lohlakaniphile ubona kahle lapho aya khona,*+ kodvwa silima sihamba ebumnyameni.+ Kepha ngibese ngiyabona nekutsi bobabili bafikelwa siphetfo lesifanako.+ 15 Ngabese ngikhuluma ngenhlitiyo ngitsi: “Loku lokwenteka kumuntfu losilima kutakwenteka nakimi.”+ Kungisite ngani-ke kuhlakanipha kakhulu? Ngako ngakhuluma ngenhlitiyo ngatsi: “Naloku kulite.” 16 Ngobe ngisho umuntfu asilima+ nobe ahlakaniphile, ngeke ahlale akhunjulwa. Ngekuhamba kwemalanga, bonkhe bantfu batawube bangasakhunjulwa. Umuntfu lohlakaniphile uyafa, njengobe nje nesilima+ sifa.

17 Ngako ngayenyanya lemphilo,+ ngobe konkhe lobekwenteka emhlabeni bekungicindzetela, futsi konkhe bekulite,+ kufana nekucosha umoya.+ 18 Ngakwenyanya konkhe lebengikusebentele kamatima lamhlabeni,+ ngobe bengati kutsi ngitakushiya, bese kutfolwa ngumuntfu lotakuta emvakwami.+ 19 Ngubani nje lowatiko kutsi utawuhlakanipha yini nobe utawuba silima?+ Nobe kunjalo, utawulawula tonkhe tintfo lokudzingeke kutsi ngitikhandle kakhulu futsi ngihlakaniphe kuze ngititfole lamhlabeni. Naloku kulite. 20 Ngako inhlitiyo yami yacala kuphelelwa litsemba ngawo wonkhe umsebenti lomatima lebengitikhandlile nangiwenta lamhlabeni. 21 Ngobe ngisho umuntfu angasebenta kamatima, asebentise kuhlakanipha, lwati nelikhono, kodvwa letintfo latisebentele utatishiyela lomunye umuntfu longakatisebenteli.+ Naloku kulite futsi kucindzetela kakhulu.*

22 Umuntfu utfolani nje ngako konkhe kusebenta kwakhe kamatima kanye nangesifiso sakhe lesikhulu lesimenta atikhandle lamhlabeni?+ 23 Ngobe kuko konkhe kuphila kwakhe, umsebenti wakhe umletsela buhlungu nekukhatsateka,+ futsi nasebusuku akakutfoli kuphumula.+ Naloku kulite.

24 Kute lokuncono lokwendlula kutsi umuntfu adle, anatse futsi ajabule ngalakusebentele kamatima.+ Naloku ngikubonile kutsi kuvela esandleni saNkulunkulu weliciniso,+ 25 ngobe kute umuntfu lodla njengami futsi anatse njengami.+

26 Umuntfu lamtsandzako umniketa kuhlakanipha, lwati kanye nenjabulo,+ kodvwa soni usiniketa umsebenti wekubutsa nekucongelela tintfo kuze tinikwe loyo lojabulisa Nkulunkulu weliciniso.+ Naloku kulite, kufana nekucosha umoya.

9 Sisebenti sitfolani ngekutikhandla kwaso?+ 10 Ngiwubonile umsebenti Nkulunkulu lawunike bantfu kutsi babe matasatasa ngawo. 11 Wente tonkhe tintfo taba tinhle* ngesikhatsi lesifanele.+ Ufake ngisho nebuphakadze etinhlitiyweni tabo; kodvwa bantfu abayuze bayicondze yonkhe* imisebenti yaNkulunkulu weliciniso.

12 Sengiyati kutsi kute lokuncono ngaphandle kwekutsi bantfu bajabule futsi bente lokuhle nabasaphila,+ 13 nekutsi bonkhe bantfu kufanele badle, banatse futsi bajabule ngemsebenti wabo lomatima. Lesi sipho lesivela kuNkulunkulu.+

14 Sengiyati kutsi konkhe lokwentiwa nguNkulunkulu weliciniso kutawuhlala kukhona kuze kube phakadze. Kute lokungengetwa kuko futsi kute lokungasuswa kuko. Nkulunkulu weliciniso wente tonkhe tintfo ngalendlela kuze bantfu bamesabe.+

15 Nobe yini leyentekako ike yenteka futsi nobe yini letako seyike yefika;+ kodvwa Nkulunkulu weliciniso ufuna loko bekufunwa bantfu.*

16 Naku lokunye lengikubonile lamhlabeni: Lapho kufanele kwehlulelwe kahle khona, kwentiwa lokubi, nalapho kufanele kube nekulunga khona, kuba nebubi.+ 17 Ngako ngatitjela ngatsi: “Nkulunkulu weliciniso utawehlulela labalungile nalababi,+ ngobe kunesikhatsi sako konkhe lokwentiwako nesikhatsi sawo wonkhe umsebenti.”

18 Ngaphindze ngafika esiphetfweni sekutsi Nkulunkulu weliciniso uvumela bantfu kutsi bavivinywe kuze babone kutsi bafana netilwane, 19 ngobe loko lokwenteka kubantfu kuyenteka nasetilwaneni, konkhe kunesiphetfo sinye.+ Njengobe nje nesilwane sifa, kanjalo nemuntfu uyafa futsi konkhe kunemoya lofanako.+ Ngako umuntfu kute lancono ngako kunesilwane, konkhe kulite. 20 Konkhe kuya endzaweni lefanako.+ Konkhe kuvela elutfulini,+ futsi konkhe kutawubuyela elutfulini.+ 21 Ngubani lowatiko kutsi umoya webantfu wenyukela etulu yini, nekutsi umoya wetilwane wehlela emhlabatsini yini?+ 22 Ngabona nekutsi kute lokuncono kwendlula kutsi umuntfu ajabule ngemsebenti lawentako,+ njengobe loko kungumvuzo wakhe; ngobe ngubani nje longamenta abone kutsi kutakwentekani nasekafile?+

4 Ngabuka futsi ngabona konkhe kucindzetelana lokukhona lamhlabeni. Ngabona tinyembeti talabacindzetelekile, futsi bekute lobadvudvutako.+ Labo lebebacindzetela labanye bebanemandla, futsi bekute nalodvudvuta labacindzetelwako. 2 Ngabona nekutsi bantfu labafile bancono kunalabasaphila.+ 3 Kodvwa loncono kakhulu kunabo bobabili nguloyo losengakatalwa,+ losengakatiboni letintfo letimbi letentiwako lamhlabeni.+

4 Ngabona kutsi bantfu basebenta kamatima* futsi bakhombise emakhono nabenta umsebenti wabo+ ngobe bayacudzelana; naloku kulite, futsi kufana nekucosha umoya.

5 Silima sigoca tandla taso, futsi silambe size sife.+

6 Kuncono kuphumula kancane* kunekusebenta kamatima* futsi ucoshe umoya.+

7 Ngabuka futsi ngabona letinye tintfo letilite lamhlabeni: 8 Kunemuntfu lohlala yedvwa, lote umngani; ute indvodzana nobe umnakabo, kodvwa uhlale asebenta kamatima. Emehlo akhe aweneliseki ngebunjinga.+ Kodvwa kuyenteka yini atibute atsi: ‘Ngubani lelengimsebentela kamatima kangaka, futsi ngitincishelani injabulo’?+ Naloku kulite futsi kungumsebenti locindzetelanako.+

9 Bantfu lababili bancono kunamunye+ ngobe batfola umvuzo lomuhle* ngemsebenti wabo lomatima. 10 Ngobe nakungenteka munye kubo awe, lona lomunye utamvusa. Kodvwa kungentekani nje kumuntfu nakangawa kantsi kute longamvusa?

11 Ngetulu kwaloko, nangabe bantfu lababili balele ndzawonye batawufutfumetana, kodvwa angafutfumala njani umuntfu nakayedvwa? 12 Umuntfu angehlulwa ngulomunye nangabe ayedvwa, kodvwa nabababili bangakhona kumncoba. Intsambo lenemicu lemitsatfu ayisheshi idzabuke.*

13 Uncono umntfwana lophuyile kodvwa lohlakaniphile kunenkhosi lendzala kodvwa lelibele,+ lengasalaleli nayelulekwa.+ 14 Ngobe lomntfwana waphuma ejele waba yinkhosi,+ nanobe abetelwe aphuyile+ embusweni walenkhosi. 15 Ngabuka bonkhe labaphilako labalapha emhlabeni, ngabuka nekutsi kuyihambela njani lenkhosi leseyinsha leyatsatsa sikhundla salena lenye. 16 Ngisho nobe babanyenti bantfu labayisekelako, kodvwa labo labaseta ngeke bajabule ngayo.+ Naloku kulite, kufana nekucosha umoya.

5 Ubotiphatsa kahle nawuya endlini yaNkulunkulu weliciniso;+ kuncono kutsi nawuye khona ulalele+ kunekutsi unikele umhlatjelo njengetilima,+ ngobe tona atati kutsi loko letikwentako kubi.

2 Ungasheshi ukhulume, futsi ungayivumeli inhlitiyo yakho ikwente ukhulume ungakacabangi embikwaNkulunkulu weliciniso,+ ngobe Nkulunkulu weliciniso usemazulwini kodvwa wena usemhlabeni. Kungako kufanele ukhulume emavi lambalwa.+ 3 Ngobe umuntfu uyaphupha nakunetintfo letinyenti laticabangako,*+ kanjalo nemavi lamanyenti enta umuntfu akhulume tintfo letibulima.+ 4 Nawenta sifungo kuNkulunkulu, ungephuti kusifeza,+ ngobe akajabuli ngetilima.+ Sifungo sakho sifeze.+ 5 Kuncono ungasenti sifungo, kunekutsi usente bese awusasifezi.+ 6 Ungawuvumeli umlomo wakho kutsi ukwentise sono,+ futsi ungacali usho embikwengilosi* kutsi ukwente ngeliphutsa.+ Umtfukutseliselani nje Nkulunkulu weliciniso ngaloko lokushoko, aze awente ube lite umsebenti wetandla takho?+ 7 Njengobe nje kucabanga tintfo letinyenti kwenta umuntfu abe nemaphupho,+ ngendlela lefanako, emavi lamanyenti alite. Ngako yesaba Nkulunkulu weliciniso.+

8 Nangabe ubona labeswele bacindzetelwa, ubona kutsi akwehlulelwa kahle nekutsi tintfo atentiwa ngekulunga esigodzini sakini, ungamangali.+ Ngobe leso siphatsimandla sibonwa ngumuntfu lophakeme kakhulu kunaso, futsi kunalabanye labaphakeme kunaso.

9 Nemkhicito welive utfolwa ngibo bonkhe bantfu; ngisho nekudla lokudliwa yinkhosi kubuya emasimini.+

10 Umuntfu lotsandza imali akayuze enetiseke ngayo, nemuntfu lotsandza umcebo akayuze enetiseke ngemali layitfolako.+ Naloku kulite.+

11 Nakwandza tintfo letinhle, labo labatisebentisako nabo bayandza.+ Tibese timsita ngani-ke umnikati wato, ngaphandle nje kwekutsi agcine ngekutibuka?+

12 Bumnandzi butfongo besisebenti ngisho nobe sinekudla lokuncane nobe lokunyenti, kodvwa inala yemuntfu lonjingile ayimniki butfongo.

13 Kunentfo levisana buhlungu kakhulu* lengiyibonile lamhlabeni: kunemuntfu lowacongelela umcebo, kodvwa ekugcineni walimata yena. 14 Lomcebo wamlahlekela ngenca yelibhizinisi lelingazange liphumelele, futsi kutawutsi lapho aba nendvodzana, abe sekete lifa latayinika lona.+

15 Njengobe umuntfu abengenalutfo nakaphuma esiswini samake wakhe, kutawuba njalo-ke nakafa.+ Kute ngisho nakunye latawube akuphetse kuko konkhe lakusebentele kamatima.+

16 Naku lokunye lokuvisana buhlungu kakhulu:* Indlela umuntfu lefike ngayo, itawuba njalo nalapho sekahamba; futsi kumsita ngani loyo lochubeka asebenta kamatima, kodvwa kufanane nekutsi ucosha umoya?+ 17 Ngetulu kwaloko, onkhe malanga udlela ebumnyameni, abe akhatsateke kakhulu, agula futsi atfukutsele.+

18 Naku lengikubone kukuhle futsi kulungile: kutsi umuntfu kufanele adle, anatse futsi ajabule ngemsebenti wakhe lomatima+ latikhandla ngawo lamhlabeni kulamalanga ekuphila lambalwa Nkulunkulu weliciniso lamuphe wona, ngobe loko kungumvuzo wakhe.+ 19 Ngetulu kwaloko, nangabe Nkulunkulu weliciniso aniketa umuntfu bunjinga+ kutsi atijabulise ngabo, kufanele awemukele umvuzo wakhe futsi ajabule ngemsebenti wakhe lomatima. Lesi sipho lesivela kuNkulunkulu.+ 20 Ngobe angeke atikhumbule tinkinga* labhekene nato kulesikhashana latasiphila, ngenca yekutsi Nkulunkulu weliciniso wenta inhlitiyo yakhe ihlale ijabulile.+

6 Kunalenye intfo lebuhlungu* lengiyibonile lamhlabeni futsi ivamile kubantfu: 2 Nkulunkulu weliciniso uniketa umuntfu bunjinga neludvumo, kuze lomuntfu akutfole konkhe lakufisako; kodvwa angamvumeli kutsi atijabulele letintfo, esikhundleni saloko tijatjulelwe ngumuntfu wekuhamba. Loku kulite futsi kubuhlungu kakhulu. 3 Nangabe indvodza iba nebantfwana labangu-100 futsi iphile sikhatsi lesidze ize iguge, kodvwa ingatijabuleli tintfo tayo letinhle isaphila,* ngitsi umntfwana lotelwe asafile uncono kakhulu kunayo.+ 4 Ngobe kutalwa kwalomntfwana kube lite futsi ufele ebumnyameni, nelibito lakhe lifihlakele ebumnyameni. 5 Ngisho nobe angakaze alibone lilanga nobe kwaba khona lakwatiko, kodvwa uncono kakhulu kunalona lophile sikhatsi lesidze.+ 6 Kusita ngani kuphila iminyaka lengu-2 000 kodvwa ube ungajabuli? Bonkhe bantfu abayi yini endzaweni lefanako?+

7 Umuntfu usebenta kamatima kute nje atfole langakufaka emlonyeni;+ kodvwa akwenteki esutse. 8 Ngako uncono ngani umuntfu lohlakaniphile kunalosilima,+ nobe kusita ngani kutsi umuntfu lophuyile ati kutsi angatiphilisa njani?* 9 Kuncono kutsi ujabulele tintfo lotibona ngemehlo akho kunekutsi ufise tintfo longeke ube nato. Naloku kulite, kufana nekucosha umoya.

10 Konkhe lokukhona kwetsiwa emabito kadzeni, futsi sekuyatiwa nekutsi umuntfu unjani. Umuntfu angeke akhone kutiveta kutsi umsulwa* nakasembikwemuntfu lonemandla kakhulu kunaye. 11 Kukhuluma emavi lamanyenti kwenta umuntfu agcine akhuluma lite; futsi kumsita ngani nje umuntfu? 12 Ngubani lowatiko kutsi yini lencono umuntfu langayenta nakasaphila? Kuphila kwakhe lokulite futsi lokufana nesitfunti+ kutawuphela. Ngobe ngubani nje longatjela umuntfu kutsi kutakwentekani lamhlabeni nasekafile?

7 Ligama lelihle* lincono kunemafutsa elikhetselo,+ nelilanga lekufa lincono kunelilanga lekutalwa. 2 Kuncono kuya lapho kulilwa khona kunekuya lapho kunelidzili khona,+ ngobe kufa kusiphetfo sabo bonkhe bantfu, futsi labaphilako kufanele bahlale bakukhumbula loku. 3 Kuncono kucindzeteleka kunekuhleka,+ ngobe buso lobudzabukile benta inhlitiyo ibe ncono.+ 4 Umuntfu lohlakaniphile losendlini yalabalilako uyacabangisisa ngekufa, kodvwa silima sihlale sicabanga ngekutijabulisa.+

5 Kuncono kulalela nawusolwa+ ngumuntfu lohlakaniphile kunekulalela tilima natikudvumisa.* 6 Ngobe kuhleka kwesilima+ kunjengemsindvo wemanyeva nawavutsa ngephansi kwelibhodo; futsi nako kulite. 7 Kucindzetelwa kungenta umuntfu lohlakaniphile abe silima, futsi kudizelwa kungenta inhlitiyo ibe yimbi.+

8 Sincono siphetfo sentfo kunesicalo sayo. Kuncono kubeketela kunekutigabatisa.+ 9 Ungasheshi utfukutsele,+ ngobe intfukutselo ihlala esifubeni setilima.*+

10 Ungacali utsi: “Kungani emalanga akadzeni bekancono kunalawa?” ngobe akusiko kuhlakanipha kubuta loko.+

11 Kuhle nangabe umuntfu lohlakaniphile atfola lifa. Loku kuyabasita labaphilako.* 12 Ngobe kuhlakanipha kusivikelo+ njengobe nje nemali isivikelo,+ kodvwa lokuhle ngelwati nangekuhlakanipha kutsi kulondvolota kuphila kwalabo labanako.+

13 Cabangisisa ngemisebenti yaNkulunkulu weliciniso, ngobe ngubani nje longakucondzisa loko lakugwegwisile?+ 14 Ubojabula nangabe lilanga lakho lilihle,+ futsi ngelilanga lenhlekelele ubokhumbula kutsi Nkulunkulu weliciniso uvumile kutsi kube nelilanga lelihle nelenhlekelele,+ kuze bantfu bangatowati kutsi likusasa+ libaphatseleni.

15 Kulokuphila kwami lokulite+ sengibone tonkhe tintfo, ngimbonile lolungile afa nanobe alungile,+ ngambona nalomubi aphila sikhatsi lesidze nanobe enta lokubi.+

16 Ungabi ngumuntfu lolunge kakhulu+ futsi ungabi ngumuntfu lohlakaniphe kakhulu.+ Utiletselelani nje inhlekelele?+ 17 Ungabi ngumuntfu lomubi kakhulu, nobe ube silima.+ Kungani nje kufanele usheshe ufe?+ 18 Kuncono usilalele lesecwayiso. Kodvwa ungacali usishiye nalesi lesinye.+ Ngobe loyo lowesaba Nkulunkulu utatilalela totimbili.

19 Kuhlakanipha kwenta umuntfu lohlakaniphile abe nemandla kwendlula emadvodza langu-10 lanemandla edolobheni.+ 20 Kute umuntfu lolungile emhlabeni lohlale enta lokuhle futsi lokungenteki one.+

21 Ngetulu kwaloko, ungatikhatsati kakhulu ngato tonkhe tintfo letishiwo bantfu,+ ngale kwaloko utawuva sisebenti sakho sikhuluma kabi ngawe;* 22 ngobe enhlitiyweni yakho wati kahle kutsi nawe uke wakhuluma kabi ngalabanye+ emahlandla lamanyenti.

23 Ngekuhlakanipha kwami ngacabangisisa ngato tonkhe letintfo, futsi ngatsi: “Ngitawuhlakanipha.” Kodvwa loku bekungetulu kwemandla ami. 24 Tintfo lesetentekile kulukhuni kutitfola futsi tijule kakhulu. Ngubani nje longaticondza?+ 25 Enhlitiyweni yami ngatimisela kwati kutsi kuyini kuhlakanipha, nekutsi kungani tintfo tenteka ngendlela letenteka ngayo. Bengifuna kutibuka letintfo futsi ngitihlolisise, ngifuna nekucondza tento letimbi tetilima kanye netento letibulima talabo labanemsangano.+ 26 Naku-ke lengakutfola: Umfati lofana nesitsiyo semtingeli uyingoti* kakhulu kunekufa, inhlitiyo yakhe ifana nelinethi, futsi tandla takhe tifana netinketane tasejele. Umuntfu lojabulisa Nkulunkulu weliciniso uyambalekela lomfati,+ kodvwa losoni ubanjwa ngulomfati.+

27 Umfundzisi*+ utsi: “Naku-ke lengikutfolile. Ngahlolisisa intfo ngayinye ngayinye kuze ngifike esiphetfweni, 28 kodvwa angizange ngikutfole loko lebengisolo ngikufuna. Kubantfu labangu-1 000 ngatfola indvodza yinye lelungile, kodvwa kute ngisho namunye umfati lolungile lengamtfola kubo. 29 Nguloku kuphela lengikutfolile: Kutsi Nkulunkulu weliciniso wadala bantfu wabenta baba ngulabacondzile,+ kodvwa bona batifunele emachinga+ lamanyenti.”

8 Ngubani lonjengemuntfu lohlakaniphile? Ngubani lowati kutsi inkinga ingacatululwa njani?* Kuhlakanipha kwemuntfu kubonakala ebusweni bakhe. Nangabe bekaswacile, buso bakhe buyashintja bugcwale injabulo.

2 Ngitsi kini: “Lalelani imitsetfo yenkhosi,+ ngobe nenta sifungo kuNkulunkulu.+ 3 Ningasheshi nisuke embikwayo.+ Ningenti lutfo lolubi,+ ngobe ingenta nobe yini leyitsandzako, 4 ngenca yekutsi lekushito akushintji.+ Ngubani nje longatsi kuyo: ‘Wentani?’”

5 Umuntfu lolalela umtsetfo ngeke ehlelwe ngulokubi,+ nemuntfu lonenhlitiyo lehlakaniphile utawati kutsi intfo letsite kufanele ayente nini futsi ayente njani.+ 6 Njengobe tinkinga tebantfu titinyenti kakhulu, tonkhe tintfo kufanele tentiwe ngendlela lekahle nangesikhatsi lesifanele.+ 7 Njengobe kute umuntfu lowatiko kutsi kutakwentekani, ngubani-ke longasho kutsi kutakwenteka njani?

8 Njengobe kute umuntfu longalawula emandla ekuphila,* kanjalo-ke kute umuntfu longalawula lilanga lekufa.+ Njengobe kute lisotja lelingatfola imvume yekuhamba emphini, kanjalo-ke nebubi angeke bubakhulule labo lababentako.*

9 Konkhe loku ngulengikubonile ngemuva kwekucabangisisa ngayo yonkhe imisebenti leyentiwe lamhlabeni. Kuso sonkhe lesikhatsi, umuntfu ubuse lomunye umuntfu wase uyamlimata.+ 10 Ngabona lababi bangcwatjwa, labo lebebaphuma bangena endzaweni lengcwele, kodvwa ngekushesha nje abazange basakhunjulwa kulelidolobha lapho bebenta khona lokubi.+ Naloku kulite.

11 Ngenca yekutsi sijeziso sentfo lembi siyephuta kukhishwa,+ bantfu babese bayatimisela kwenta lokubi.+ 12 Nanobe soni singenta lokubi tikhatsi letingu-100 futsi sichubeke siphila sikhatsi lesidze, kodvwa ngiyati kutsi kutabahambela kahle labo labesaba Nkulunkulu weliciniso, ngenca yekutsi bamesaba mbamba.+ 13 Kodvwa angeke kumhambele kahle lomubi,+ futsi angeke awandzise emalanga akhe lanjengesitfunti,+ ngobe akamesabi Nkulunkulu.

14 Kunentfo lelite* leyentekako lamhlabeni: Kunebantfu labalungile labaphatfwa kungatsi bente lokubi,+ futsi kunebantfu lababi labaphatfwa shengatsi bente lokulungile.+ Naloku kulite.

15 Ngako ngibona kuncono kutsi umuntfu ajabule,+ ngobe kute lokuncono langakwenta lamhlabeni ngaphandle kwekutsi adle, anatse futsi ajabule; kufanele ahlale ajabula njengobe asebenta kamatima kuko konkhe kuphila kwakhe+ Nkulunkulu weliciniso lamnike kona lamhlabeni.

16 Bengitimisele kutfola kuhlakanipha nekubuka konkhe lokwentekako* lamhlabeni,+ futsi busuku nemini bengingasalali ngisho nekulala.* 17 Ngabese ngicabangisisa ngayo yonkhe imisebenti yaNkulunkulu weliciniso, futsi ngabona kutsi bantfu angeke bakucondze lokwenteka emhlabeni.+ Ngisho nobe bangetama kangakanani, ngeke bakucondze. Ngisho nobe bangatsi bahlakaniphe kakhulu kangakanani, ngeke baze bakucondze.+

9 Ngako ngacabanga ngako konkhe loku, ngaphetsa ngekutsi labalungile nalabahlakaniphile kanye nemisebenti yabo, konkhe kusetandleni taNkulunkulu weliciniso.+ Bantfu abati lutfo ngelutsandvo nangenzondo lebekukhona basengakatalwa. 2 Bonkhe bantfu banesiphetfo lesifanako,+ lokufaka ekhatsi labalungile nalabangakalungi,+ labakahle, labahlantekile kanye nalabangcolile, labenta umhlatjelo kanye nalabangawenti. Umuntfu lolungile uyafana nalosoni, nemuntfu lowenta sifungo ngekubhudvutela uyafana naloyo locale acabange angakafungi. 3 Nayi intfo lecindzetelanako leyentekako lamhlabeni: Ngenca yekutsi bonkhe bantfu banesiphetfo lesifanako,+ tinhlitiyo tabo tigcwele bubi futsi kunemsangano etinhlitiyweni tabo kuwo onkhe emalanga ekuphila kwabo, kodvwa ngemuva kwaloko babese bayafa.

4 Lisekhona litsemba kuloyo lophilako, ngobe inja lephilako incono kakhulu kunelibhubesi lelifile.+ 5 Ngobe labaphilako bayati kutsi batakufa,+ kodvwa labafile abati lutfo,+ futsi sebete umvuzo ngobe abasakhunjulwa ngisho nekukhunjulwa.+ 6 Ngetulu kwaloko, lutsandvo lebebanalo, inzondo lebebanayo kanye nemona lebebanawo sekuphelile, futsi sekute nesabelo labanaso kulokwentiwako lamhlabeni.+

7 Hamba uyodla ujabulile futsi unatse liwayini ngenhlitiyo lejabulile,+ ngobe Nkulunkulu weliciniso uyajabula ngemisebenti yakho.+ 8 Shengatsi timphahla takho tingahlale timhlophe* futsi uhlale ugcobisa emafutsa enhloko yakho.+ 9 Jabulela kuphila nemfati wakho lomtsandzako+ kuko konkhe kuphila kwakho Nkulunkulu lakunikete kona lamhlabeni, kuwo onkhe emalanga ekuphila kwakho lokulite, ngobe loko kungumvuzo wakho ekuphileni futsi kungumvuzo wemsebenti wakho lomatima lowentako lamhlabeni.+ 10 Nobe yini lokhona kuyenta, yente ngawo onkhe emandla akho ngobe kute kusebenta, nobe kucabanga nobe lwati nobe kuhlakanipha eThuneni*+ lapho uya khona.

11 Kunalokunye lengikubonile lamhlabeni, kutsi labanematubane abahlali baphumelela emncintiswaneni, labanemandla abahlali bancoba emphini,+ labahlakaniphile abahlali banekudla, labakhaliphile engcondvweni abahlali banjingile+ nekutsi labo labanelwati abahlali baphumelela,+ ngobe bonkhe behlelwa sikhatsi senhlekelele netimo letingakalindzeleki. 12 Ngobe umuntfu akasati sikhatsi latawufa ngaso.+ Njengobe tinhlanti tibanjwa linethi netinyoni tibanjwa sitsiyo, kanjalo-ke nebantfu babanjwa sikhatsi senhlekelele lesibafikela bangakagadzi.

13 Naku lokunye lengakucondza mayelana nekuhlakanipha lamhlabeni, futsi kwangitsintsa: 14 Bekunelidolobha lelincane lebelihlala bantfu labambalwa; futsi kweta inkhosi lenemandla itolihlasela, yalivimbetela, yakha nelubondza lolukhulu lolutungeleta lelidolobha. 15 Kulelidolobha bekunendvodza lephuyile kodvwa lehlakaniphile futsi yasindzisa lelidolobha ngekuhlakanipha kwayo. Kodvwa kute ngisho namunye umuntfu lowayikhumbula lendvodza.+ 16 Ngako ngakhuluma ngenhlitiyo ngatsi: ‘Kuhlakanipha kuncono kunekuba nemandla,+ nobe kunjalo, kuhlakanipha kwemuntfu lophuyile kubukelwa phansi, nemavi akhe awalalelwa.’+

17 Kuncono kulalela emavi lapholile emuntfu lohlakaniphile kunekulalela nakumemeta umuntfu lobusa tilima.

18 Kuhlakanipha kuncono kunetikhali temphi, kodvwa soni sinye nje singona lokunyenti lokuhle.+

10 Njengobe nje imphungane lefile yenta emafutsa emuntfu lowenta emakha onakale futsi anuke kabi, kanjalo-ke nebulima lobuncane benta umuntfu alahlekelwe kuhlakanipha nekuhlonishwa.+

2 Inhlitiyo yemuntfu lohlakaniphile imholela endleleni lengiyo,* kodvwa inhlitiyo yesilima isiholela endleleni lengasiyo.*+ 3 Nobe ngukuphi lapho silima siya khona sihlale singenangcondvo,+ futsi sikhombisa wonkhe umuntfu kutsi sona sisilima.+

4 Nangabe umholi akutfukutselele kakhulu, ungasheshi uhambe,+ ngobe umoya lophansi uvimba tono letinyenti.+

5 Kunentfo lekhatsatanako lengiyibonile lamhlabeni, lokuliphutsa lelentiwa ngulabo labasemagunyeni:+ 6 Batsatsa tilima batibeke etikhundleni letisetulu, kodvwa labo labafanelwe nguletikhundla* bachubeka basetikhundleni letiphansi.

7 Ngibone tisebenti tigibele emahhashi kodvwa tindvuna tihamba ngetinyawo kuhle kwetisebenti.+

8 Loyo logubha umgodzi kungenteka agcumkele kuwo;+ naloyo lobhidlita lubondza lolwakhiwe ngematje kungenteka alunywe yinyoka.

9 Loyo logubha ematje kungenteka alinyatwe ngiwo, naloyo lokabha tingodvo kungenteka alinyatwe ngito.*

10 Nangabe lithulusi lensimbi lingakhaliphi, futsi umuntfu angaliloli, kutawudzingeka afake emandla nakalisebentisa. Kodvwa kuhlakanipha kwenta umuntfu aphumelele.

11 Nangabe inyoka iluma umuntfu asengakawenti umlingo wakhe, kuba nelikhono lekwenta imilingo* akumsiti ngalutfo.

12 Emavi emuntfu lohlakaniphile amnandzi,+ kodvwa umlomo wesilima usiletsela inhlekelele.+ 13 Silima sitsi nje nasivula umlomo sikhulume emavi labulima,+ nemavi lesiwasho ekugcineni angumsangano futsi aholela enhlekeleleni. 14 Nanobe kunjalo, silima asiyekeli kukhuluma.+

Umuntfu akati kutsi kutakwentekani, futsi ngubani longamtjela kutsi kutakwentekani nasekafile?+

15 Silima sidzinwa kakhulu ngenca yekutikhandla kwaso, ngobe asati nekutsi sitayibona njani indlela leya edolobheni.

16 Maye kubuhlungu nangabe live libuswa yinkhosi lesengumfana+ futsi netindvuna takhona tiba nemadzili lokwa ekuseni! 17 Liyajabula live lelibuswa yinkhosi letelwe emndenini lohloniphekile futsi lelinetindvuna letidla tiphindze tinatse ngesikhatsi lesikahle tentele kutfola emandla, hhayi kudzakwa.+

18 Nangabe umuntfu avilapha kakhulu luphahla lwakhe luyawa, futsi nangabe agoca tandla luphahla lwakhe luyavuta.+

19 Kudla kwenta umuntfu ahleke, neliwayini lenta kuphila kube mnandzi,+ kodvwa imali iyimphendvulo yato tonkhe tidzingo temuntfu.+

20 Ungayicalekisi* inkhosi+ ngisho nasengcondvweni yakho* futsi ungakhulumi kabi ngebantfu labanjingile ngisho nobe usekamelweni lakho, ngobe kungenteka inyoni ikutfutse loko lokushito nobe kungenteka inyoni lencane ihambe iyobika loko lokushito.

11 Jika sinkhwa sakho emantini,+ ngobe ngemuva kwemalanga lamanyenti utawuphindze usitfole.+ 2 Phani labangu-7 nobe labangu-8+ lokutsite kuloko lonako, ngobe awati kutsi nguyiphi inhlekelele letawenteka emhlabeni.

3 Nangabe emafu agcwele imvula, lemvula itawuna emhlabeni; futsi nangabe sihlahla siwe sabheka eningizimu nobe enyakatfo, sitawulala lapho siwele khona.

4 Loyo lonaka umoya ngeke ahlanyele, naloyo lonaka emafu ngeke avune.+

5 Njengobe nje ungati kutsi umoya wekuphila* usebenta njani ematsanjeni emntfwana losesiswini semfati lotetfwele,+ kanjalo-ke awuwati nemsebenti waNkulunkulu weliciniso, lokunguye lowenta tonkhe tintfo.+

6 Hlanyela inhlanyelo yakho ekuseni futsi ungayekeli kuhlanyela lize liyoshona;+ ngobe awati kutsi ngukuphi lokutawuphumelela, kutsi uhlanyele ekuseni nobe kutsi uhlanyele entsambama, nobe kutawuphumelela kokubili.

7 Kukhanya kumnandzi, futsi kuhle kutsi emehlo abone kukhanya kwelilanga. 8 Ngobe nangabe umuntfu angaphila iminyaka leminyenti, akayijabulele yonkhe.+ Kodvwa kufanele akhumbule kutsi emalanga ekucindzeteleka angahle abe manyenti. Konkhe lokuseta kulite.+

9 Muntfu lomusha, jabula ebusheni bakho, futsi inhlitiyo yakho ayijabule ngemalanga ebusha bakho. Landzela tindlela tenhlitiyo yakho futsi uye lapho emehlo akho akuholela khona; kodvwa ubowati kutsi Nkulunkulu weliciniso utakwehlulela* ngako konkhe loku.+ 10 Ngako susa tintfo letiyinkinga enhlitiyweni yakho, futsi utibalekele tintfo letiyingoti emtimbeni wakho, ngobe busha kanye nekucala kwemphilo kulite.+

12 Ngako-ke, khumbula uMdali wakho Lomkhulu nawusesemusha,+ tisengakefiki tinsuku tekuhlupheka,* isengakefiki+ neminyaka lapho utawutsi: “Kuphila angisakujabuleli”; 2 sisengakefiki sikhatsi lapho kukhanya kwelilanga, inyanga netinkhanyeti kutawuba mnyama,+ nemafu asengakabuyi ngemuva kwemvula* lenkhulu. 3 Ngalelolanga bogadzi bendlu batawuchachatela, emadvodza lanemandla atawuba butsakatsaka, bafati batawuyekela kusila ngobe batawube sebambalwa, netintfombi letibuka ngemafasitelo titawube setibona kalufifi;+ 4 iminyango leya emgwacweni itawube seyivaliwe, umsindvo welitje lekusila ungasevakali kahle, umuntfu sekavuswa kukhala kwenyoni, futsi onkhe emadvodzakati sekahlabelela phansi.+ 5 Ngetulu kwaloko, umuntfu usuke sekesaba kuba setindzaweni letiphakeme futsi akhatsateka ngetintfo letesabisako emgwacweni. Sihlahla sema-alimondi siyachakaza,+ nentsetse ihamba itotoba, umuntfu angasakukhanuki nekudla,* futsi usuke sekaya endlini+ latawuhlala kuyo sikhatsi lesidze, nebantfu labalilako sebahambahamba emgwacweni.+ 6 Mkhumbule isengakesuki intsambo yelisiliva, isengakaphihliki indishi yeligolide, isengakafi imbita lesemtfonjeni, nelisondvo lelisetjentiselwa kukha emanti emtfonjeni lisengakephuki. 7 Ngemuva kwaloko, lutfuli lubuyela emhlabatsini+ lapho belukhona khona, nemoya* ubuyele kuNkulunkulu weliciniso, lokunguye lowawuniketa bantfu.+

8 Umfundzisi*+ utsi: “Kulite! Konkhe kulite!”+

9 Lomfundzisi bekahlakaniphile, ngetulu kwaloko wachubeka afundzisa bantfu loko lakwatiko.+ Abecabangisisa futsi ahlolisisa kuze ahlanganise* kahle taga letinyenti.+ 10 Watimisela kutfola emavi lamnandzi+ nekubhala emavi laliciniso njengobe anjalo.

11 Emavi alabahlakaniphile afanana netindvuku leticijile tekuchuba tinkhomo,+ nemavi abo lahlanganiswe ndzawonye afanana netipikili letishayelwe tacina; onkhe avela kumelusi munye. 12 Ngetulu kwaloko, lalela nasi secwayiso ndvodzana yami: Kubhalwa kwetincwadzi letinyenti angeke kuphele, nekutifundza kakhulu kwenta umtimba udzinwe.+

13 Njengobe konkhe sekuvakele, siphetfo sendzaba sitsi: Yesaba Nkulunkulu weliciniso+ futsi ugcine imiyalo yakhe,+ ngobe nguloku lokubaluleke kakhulu umuntfu lokufanele akwente.+ 14 Ngobe Nkulunkulu weliciniso utawehlulela bantfu ngako konkhe labakwentako, lokufaka ekhatsi nalabakwenta ekusitsekeni, kuze kubonakale kutsi kuhle nobe kubi.+