DANYELA

1 Ngemnyaka wesitsatfu wekubusa kwaJehoyakimu inkhosi+ yakaJuda, Nebukhadnezari inkhosi yaseBhabhulona wefika eJerusalema futsi wavimbetela lelidolobha.+ 2 Ngemuva kwesikhatsi, Jehova wanikela Jehoyakimu inkhosi yakaJuda esandleni saNebukhadnezari,+ wanikela kuye naletinye tintfo tasendlini* yaNkulunkulu weliciniso. Nebukhadnezari watitsatsa letintfo watiyisa eShinari,*+ ethempelini* lankulunkulu wakhe, wafike watibeka lapho kugcinwa khona umcebo wankulunkulu wakhe.+

3 Inkhosi yabese itfuma Ashpenazi indvuna yetiphatsimandla tayo tasesigodlweni kutsi aletse lamanye ema-Israyeli,* lokufaka ekhatsi lawo asebukhosini nalawo lavela emindenini lehloniphekile.+ 4 Bekufanele kube ngemajaha* lete sici, labukeka kahle, lahlakaniphile, lanelwati kanye nekucondza+ nalangakhona kusebenta esigodlweni senkhosi. Lendvuna bekufanele iwafundzise kubhala lulwimi lwemaKhaledi kanye nekulukhuluma. 5 Ngetulu kwaloko, inkhosi beyitsite onkhe malanga kufanele anikwe tibiliboco tayo kanye neliwayini lebeyilinatsa. Lamajaha bekufanele aceceshwe* iminyaka lemitsatfu, futsi ekupheleni kwaleyo minyaka bekufanele asebentele inkhosi.

6 Emkhatsini wawo bekunalamanye emajaha labekaphuma esiveni* sakaJuda: BekunaDanyela,*+ Hananiya,* Mishayeli* na-Azariya.*+ 7 Lendvuna yabetsa emabito.* Danyela yametsa yatsi nguBhelteshasari,+ Hananiya yatsi nguShadraki, Mishayeli yatsi nguMeshaki kantsi Azariya yatsi ngu-Abednego.+

8 Kodvwa Danyela wancuma enhlitiyweni yakhe kutsi angeke atingcolise ngetibiliboco tenkhosi nobe ngeliwayini layo. Ngako wacela imvume kulendvuna yetiphatsimandla tasesigodlweni kutsi angatidli letintfo lebetitamngcolisa. 9 Ngako Nkulunkulu weliciniso wabangela kutsi lendvuna yentele Danyela umusa futsi ibe nesihawu kuye.+ 10 Kodvwa lendvuna yatsi kuDanyela: “Ngiyayesaba inkhosi yami, ngobe ikhiphe umyalo wekutsi niniketwe kudla nekwekunatsa. Ngitawenta njani naseyinibona nondzile kunalalamanye emajaha* labontsanga yenu? Ngingaba* nelicala enkhosini ngenca yenu.” 11 Bekunagadzi lobekabekwe ngulendvuna yetiphatsimandla tasesigodlweni kutsi anake Danyela, Hananiya, Mishayeli na-Azariya. Danyela watsi kuye: 12 “Sicela uvivinye tinceku takho emalanga langu-10. Sicela usinikete tibhidvo* nemanti ekunatsa kuphela; 13 bese uyabuka kutsi sinjani nasicatsaniswa nalamajaha* ladla tibiliboco tenkhosi, utawubese uyancuma kutsi wenta njani ngatsi nasewubone indlela lesitawube sibukeka ngayo.”

14 Logadzi wakuvuma loko futsi wabavivinya emalanga langu-10. 15 Ekupheleni kwalamalanga langu-10, bebabukeka babahle futsi bondleke kahle* kunawo onkhe lalamanye emajaha* lebekadla tibiliboco tenkhosi. 16 Ngako logadzi wachubeka wabanika tibhidvo esikhundleni seliwayini netibiliboco tenkhosi. 17 Nkulunkulu weliciniso wanika lamajaha* lamane kuhlakanipha, nelwati kanye nelikhono lekucondza yonkhe intfo lebhaliwe. Danyela wanikwa nelikhono lekucondza yonkhe imibono nemaphupho.+

18 Kwatsi nasesiphelile lesikhatsi lebesibekwe yinkhosi, futsi sekusikhatsi sekutsi lamajaha aletfwe enkhosini,+ lendvuna yawangenisa embikwaNebukhadnezari. 19 Ngesikhatsi inkhosi ikhuluma nalamajaha, kute ngisho namunye kuwo lebekafana naDanyela, Hananiya, Mishayeli kanye na-Azariya;+ futsi bachubeka basebentela inkhosi. 20 Bekutsi nje inkhosi nayibabuta lokutsite lobekudzinga kuhlakanipha nekucondza, ibakhandze bancono ngalokuphindvwe kalishumi nakucatsaniswa nabo bonkhe baphristi labenta imilingo+ kanye netangoma lebetisembusweni wayo. 21 Danyela wachubeka alapho kwaze kwaba ngumnyaka wekucala wekubusa kweNkhosi Khuresi.+

2 INkhosi Nebukhadnezari yaba nemaphupho lamanyenti, futsi yakhatsateka* kakhulu+ kangangekutsi beyingasakhoni ngisho nekulala. Loku kwenteka ngemnyaka wesibili wekubusa kwayo. 2 Ngako yatsi akubitwe baphristi labenta imilingo, tangoma, batsakatsi kanye nemaKhaledi laphengula ngekufundza tinkhanyeti* kuze bayitjele leliphupho layo. Beta futsi bema embikwenkhosi.+ 3 Inkhosi yabese itsi: “Ngibhudzile, futsi ngikhatsateke* kakhulu ngobe ngifuna kwati kutsi ngibhudzeni.” 4 EmaKhaledi laphengula ngekufundza tinkhanyeti aphendvula inkhosi ngesi-Aramu* atsi:+ “Lunwele loludze nkhosi. Tjela tinceku takho kutsi ubhudzeni, futsi tsine sitakutjela inchazelo yaleliphupho.”

5 Inkhosi yaphendvula lamaKhaledi yatsi: “Nasi-ke sincumo sami: Nangabe nehluleka kungitjela kutsi ngibhudzeni, futsi nehluleka nekungichazela leliphupho, nitawujutjwa nibe ticucu, netindlu tenu titawentiwa imithoyi yesive.* 6 Kodvwa nangabe nitangitjela leliphupho nenchazelo yalo, mine ngitaninika tipho kanye nemvuzo futsi nginente nihlonishwe kakhulu.+ Ngako ngitjeleni leliphupho nenchazelo yalo.”

7 Baphindze bayiphendvula batsi: “Inkhosi ayitjele tinceku tayo leliphupho, futsi tsine sitayitjela inchazelo yalo.”

8 Inkhosi yabaphendvula yatsi: “Ngiyanibona kutsi netama kuhambisa sikhatsi, ngobe niyati kutsi lesincumo lengisentile angeke sishintje. 9 Nangabe nitawehluleka kungitjela kutsi ngibhudzeni, nonkhe nitawutfola sijeziso sinye. Benicabanga kutsi nitangiyenga futsi ningikhohlise ngize ngishintje ingcondvo. Ngitjeleni kutsi ngibhudzeni, kuze ngibone kutsi vele nitalichaza leliphupho.”

10 LamaKhaledi aphendvula inkhosi atsi: “Kute ngisho namunye umuntfu lamhlabeni longakhona kwenta loku lokufunwa yinkhosi, ngobe akukake sekwenteke kutsi inkhosi lenkhulu nobe umbusi acele baphristi labenta imilingo nobe tangoma nobe emaKhaledi laphengula ngekufundza tinkhanyeti kutsi ente intfo lenje. 11 Loku lokufunwa yinkhosi kumatima, futsi kute ngisho namunye umuntfu longayitjela loku lekufunako ngaphandle kwabonkulunkulu, kodvwa-ke nalabonkulunkulu abekho lana.”*

12 Yatsi inkhosi nayiva loku yatfukutsela yagana lunwabu, yakhipha umyalo wekutsi kubulawe bonkhe bantfu labahlakaniphile baseBhabhulona.+ 13 Kwatsi nasekukhishwe lomyalo futsi sekusele kancane kutsi kubulawe labantfu labahlakaniphile, kwafunwa Danyela kanye nebangani bakhe kuze nabo babulawe.

14 Ngaleso sikhatsi, Danyela waya ku-Ariyoki loyindvuna yabogadzi benkhosi futsi lobekatfunywe kutsi ayobulala bantfu labahlakaniphile baseBhabhulona, wafike wakhuluma naye ngekuhlakanipha lokukhulu nangekucophelela. 15 Wabuta Ariyoki loyindvuna lebekwe yinkhosi watsi: “Inkhosi iwukhipheleni lomyalo lomatima kangaka?” Ariyoki wabese umtjela yonkhe lendzaba.+ 16 Ngako Danyela waya enkhosini wayicela kutsi imnike sikhatsi kuze ayichazele leliphupho.

17 Danyela waya endlini yakhe, wafike watjela bangani bakhe boHananiya, Mishayeli na-Azariya ngalendzaba. 18 Wabacela kutsi bathantaze kuNkulunkulu welizulu, bamcele kutsi abentele umusa futsi abembulele lemfihlo kuze yena nebangani bakhe bangabulawa kanye nalabantfu labahlakaniphile baseBhabhulona.

19 Ebusuku, Danyela wabona umbono lowembula lemfihlo.+ Ngako wadvumisa Nkulunkulu welizulu. 20 Danyela watsi:

24 Danyela wabese uya ku-Ariyoki, lobekabekwe yinkhosi kutsi abulale bonkhe bantfu labahlakaniphile baseBhabhulona,+ wafike watsi: “Ungababulali labantfu labahlakaniphile baseBhabhulona. Ngimikise enkhosini futsi ngitawufike ngiyichazele leliphupho layo.”

25 Ngekushesha Ariyoki watsatsa Danyela wamyisa enkhosini, wafike watsi kuyo: “Ngitfola nangu umuntfu emkhatsini wemaJuda+ latfunjiwe longachazela inkhosi leliphupho layo.” 26 Inkhosi yabuta Danyela, libito lakhe lebekunguBhelteshasari,+ yatsi: “Ungangitjela mbamba yini kutsi ngibhudzeni, bese uyangichazela nekutsi kusho kutsini?”+ 27 Danyela waphendvula inkhosi watsi: “Kute ngisho namunye kulamadvodza lahlakaniphile, kuletangoma, kulabaphristi labenta imilingo nobe kulaba labaphengula ngekufundza tinkhanyeti longakhona kuchaza lemfihlo yenkhosi.+ 28 Kodvwa emazulwini kunaNkulunkulu longuMembuli wetimfihlo,+ futsi ukwembulele wena Nkhosi Nebukhadnezari loko lokutawenteka emalangeni ekugcina. Naku lokubhudzile futsi nayi nemibono loyibonile ngesikhatsi ulele embhedzeni wakho:

29 “Awu nkhosi, ngesikhatsi ulele embhedzeni wakho, ubhudze loko* lokutawenteka esikhatsini lesitako, futsi uMembuli wetimfihlo ukwembulele loko lokutawenteka. 30 Lemfihlo angikembulelwa ngobe nje ngihlakaniphe kakhulu kunalabanye bantfu labaphilako; kodvwa ngembulelwe yona kuze ngikuchazele kutsi isho kutsini futsi ngikuchazele naloko lobewukucabanga.+

31 “Wena nkhosi, utsite nawubuka usemaphusheni wabona sitfombe lesikhulu. Lesitfombe lebesime embikwakho besisikhulu kakhulu, sikhatimula futsi sesabeka. 32 Inhloko yalesitfombe beyakhiwe ngeligolide lelicwengisisiwe,+ sifuba saso nemikhono yaso beyiyelisiliva,+ sisu saso nematsanga aso kulitfusi,+ 33 imilente yaso beyiyensimbi,+ futsi tinyawo taso betiyinhlanganisela yensimbi nelubumba.*+ 34 Utse usabukile, wabona kucetulwa litje kepha lingacetulwa tandla temuntfu, lafike lashaya lesitfombe kuletinyawo taso tensimbi nelubumba futsi latiphihlita.+ 35 Ngaleso sikhatsi, lensimbi, lubumba, litfusi, lisiliva naleligolide kwaphihlika konkhe futsi kwaba njengemakhoba lasebaleni lekubhulela ngesikhatsi sasehlobo. Konkhe kwapheshulwa ngumoya futsi akuzange kuphindze kutfolakale. Kodvwa lelitje lelashaya lesitfombe lakhula laba yintsaba lenkhulu, futsi yagcwala wonkhe umhlaba.

36 “Nguloku-ke inkhosi lekubhudzile, futsi nyalo sesitayichazela leliphupho. 37 Awu nkhosi, wena uyinkhosi yemakhosi futsi Nkulunkulu welizulu ukunike umbuso,+ emandla, tikhwepha neludvumo. 38 Nkulunkulu ubanikele esandleni sakho bantfu labakuto tonkhe tindzawo, futsi yena utinikele kuwe tilwane tesiganga kanye netinyoni letisemazulwini, wenta nekutsi konkhe kubuswe nguwe.+ Ngako nguwe lenhloko yeligolide.+

39 “Kodvwa emvakwakho kutawuvela lomunye umbuso+ lotawuba mncane kunalowakho; bese kulandzela umbuso wesitsatfu, lokungumbuso welitfusi, futsi utawubusa umhlaba wonkhe.+

40 “Umbuso wesine utawucina njengensimbi.+ Njengobe nje nensimbi iphihlita futsi isila yonkhe intfo, lombuso nawo utayiphihlita yonkhe leleminye uyente ibe ticucu.+

41 “Njengobe ubonile kutsi letinyawo netintwane talesitfombe tiyinhlanganisela yensimbi nelubumba,* lombuso nawo utawehlukana ekhatsi. Kodvwa incenye yawo itawucina njengensimbi, njengobe nje uyibonile lensimbi lehlanganiswe nelubumba lolutsambile. 42 Njengobe letintwane tiyinhlanganisela yensimbi nelubumba, kanjalo-ke lenye incenye yalombuso itawucina, lenye ibe butsakatsaka. 43 Njengobe uyibonile lensimbi ihlanganiswe nelubumba lolumanti, naletincenye talombuso titawuhlanganiswa nebantfu,* kodvwa angeke kuhlangane kube yintfo yinye, njengobe nje insimbi nelubumba kungahlangani.

44 “Ngemalanga alawo makhosi, Nkulunkulu welizulu utawubeka umbuso+ longeke uze ubhujiswe,+ futsi angeke uniketwe labanye bantfu.+ Utawupitjita yonkhe lemibuso+ uyicedze futsi ngiwo wodvwa lotawuma kuze kube phakadze.+ 45 Kutawufana nse naloko lokubonile ngesikhatsi litje licetulwa entsabeni kodvwa lingacetulwa tandla temuntfu, nangesikhatsi ulibona liphihlita lensimbi, litfusi, lubumba, lisiliva kanye neligolide.+ Nkulunkulu Lomkhulu sewuyembulele inkhosi loko lokutawenteka esikhatsini lesitako.+ Leliphupho litawugcwaliseka futsi lenchazelo yalo iliciniso.”

46 Ngemuva kwaloko, iNkhosi Nebukhadnezari yakhotsama embikwaDanyela yaze yatsintsa ngebuso phansi, yamhlonipha. Yabese itsi akaniketwe sipho futsi ashiselwe nemphepho. 47 Inkhosi yatsi kuDanyela: “Sengiyabona kutsi Nkulunkulu wakho unguNkulunkulu lophakeme kunabo bonkhe labanye bonkulunkulu futsi uyiNkhosi yemakhosi neMembuli wetimfihlo, ngobe nguye lokwente wakhona kungembulela lemfihlo.”+ 48 Inkhosi yabese iyamphakamisa Danyela yamnika netipho letinyenti letinhle. Yambeka nekutsi abuse sonkhe sifundza saseBhabhulona+ futsi abe yindvuna yetiphatsimandla letibuke bonkhe bantfu labahlakaniphile baseBhabhulona. 49 Danyela wacela inkhosi kutsi ibeke Shadraki, Meshaki na-Abednego+ kutsi kube ngibo lababuka tindzaba tesifundza saseBhabhulona, futsi inkhosi yababeka. Danyela yena wasebenta esigodlweni senkhosi.

3 INkhosi Nebukhadnezari yakha sitfombe seligolide lesingaba ngemamitha langu-27* kuphakama, nebubanti baso bebungaba ngemamitha lamatsatfu.* Yasibeka etsafeni leliseDura, esifundzeni saseBhabhulona. 2 Ngemuva kwaloko iNkhosi Nebukhadnezari yatfumela umlayeto wekutsi kuyobitwa labamelele inkhosi, tiphatsimandla, babusi, beluleki, labaphetse timali, emajaji, bomantji, nabo bonkhe lababuke tindzaba tetifundza kutsi babe khona emkhosini wekunikela lesitfombe lebesimiswe ngiyo.

3 Ngako labo labamelele inkhosi, tiphatsimandla, babusi, beluleki, labaphetse timali, emajaji, bomantji, nabo bonkhe lababuke tindzaba tetifundza beta kulomkhosi wekunikela lesitfombe lebesimiswe yiNkhosi Nebukhadnezari, futsi bafike bema embikwalesitfombe lebeyisimisile. 4 Sitfunywa senkhosi samemeta kakhulu satsi: “Naku lokufanele nikwente nine bantfu, nine tive, nani nonkhe nine lenikhuluma tilwimi letahlukahlukene: 5 Nibotsi naniva umsindvo weluphondvo, wemntjingo, welihabhu lelincane, wetinsimbi temculo letinetintsambo, wemntjingo lomkhulu kanye newato tonkhe letinye tinsimbi temculo, niguce futsi nikhonte lesitfombe seligolide lesimiswe yiNkhosi Nebukhadnezari. 6 Umuntfu longeke aguce futsi akhonte lesitfombe, utawujikwa emlilweni lowesabekako futsi lohhumako ngaso leso sikhatsi!”+ 7 Ngako ngesikhatsi bonkhe labantfu beva umsindvo weluphondvo, wemntjingo, welihabhu lelincane, wetinsimbi temculo letinetintsambo, wemntjingo lomkhulu kanye newato tonkhe letinye tinsimbi temculo, bonkhe labantfu, tive, nabo bonkhe labakhuluma tilwimi letahlukahlukene, baguca futsi bakhonta lesitfombe seligolide lebesimiswe yiNkhosi Nebukhadnezari.

8 Kwatsi kusenjalo, lamanye emaKhaledi aya enkhosini afike amangalela* emaJuda. 9 Akhuluma neNkhosi Nebukhadnezari atsi: “Lunwele loludze nkhosi. 10 Wena nkhosi ukhiphe umyalo wekutsi wonkhe umuntfu abotsi nakeva umsindvo weluphondvo, wemntjingo, welihabhu lelincane, wetinsimbi temculo letinetintsambo, wemntjingo lomkhulu kanye newato tonkhe letinye tinsimbi temculo, aguce futsi akhonte lesitfombe seligolide; 11 nekutsi umuntfu longeke aguce futsi akhonte lesitfombe, utawujikwa emlilweni lowesabekako nalohhumako.+ 12 Kodvwa kunemaJuda lowabeke kutsi engamele tindzaba taseBhabhulona, lokuboShadraki, Meshaki na-Abednego,+ futsi labangakuhloniphi wena nkhosi. Ababakhonti bonkulunkulu bakho futsi abafuni kusikhonta lesitfombe seligolide losimisile.”

13 Nebukhadnezari watfukutsela wagana lunwabu futsi watsi abalandvwe boShadraki, Meshaki, na-Abednego. Ngako balandvwa, baletfwa enkhosini. 14 Nebukhadnezari watsi kubo: “Wena Shadraki, Meshaki, nawe Abednego, kuliciniso yini kutsi anibakhonti bonkulunkulu bami,+ nekutsi anifuni kukhonta lesitfombe seligolide lengisimisile? 15 Nyalo-ke naniva umsindvo weluphondvo, wemntjingo, welihabhu lelincane, wetinsimbi temculo letinetintsambo, wemntjingo lomkhulu kanye newato tonkhe letinye tinsimbi temculo, futsi niguce, nikhonte lesitfombe lengisimisile, tintfo titanihambela kahle. Kodvwa naningafuni kusikhonta, nitawujikwa emlilweni lowesabekako futsi lohhumako ngaso leso sikhatsi. Ngumuphi nje lonkulunkulu longanikhulula esandleni sami?”+

16 BoShadraki, Meshaki na-Abednego baphendvula inkhosi batsi: “Awu Nkhosi Nebukhadnezari, kute lokunye lesingakusho ngalendzaba. 17 Nangabe sitawujikijelwa kulomlilo lowesabekako nalohhumako, Nkulunkulu lesimkhontako angakhona kusisindzisa kuwo futsi angasikhulula esandleni sakho nkhosi.+ 18 Kodvwa ngisho nome angasikhululi, sifuna wati nkhosi kutsi angeke sibakhonte bonkulunkulu bakho nobe sikhonte lesitfombe seligolide losimisile.”+

19 Nebukhadnezari wabatfukutselela kakhulu boShadraki, Meshaki na-Abednego, waze washintja nasebusweni.* Watsi lomlilo awubaselwe ushise ngelizinga leliphindvwe kangu-7. 20 Watfuma lamanye emachawe elibutfo lakhe kutsi abophe boShadraki, Meshaki na-Abednego abajikijele kulomlilo lowesabekako futsi lohhumako.

21 Ngako baboshwa solo bagcoke tingubo tabo tangaphansi netangetulu, imishuculo yabo kanye naletinye timphahla, futsi bajikijelwa kulomlilo lowesabekako nalohhumako. 22 Ngenca yekutsi lomyalo wenkhosi bewumatima kakhulu, nalomlilo ushisa kakhulu, lamadvodza lajikijela Shadraki, Meshaki na-Abednego emlilweni ngiwo lahashulwa ngulomlilo afa. 23 Kodvwa boShadraki, Meshaki na-Abednego bajikijelwa bobatsatfu kulomlilo baboshiwe.

24 INkhosi Nebukhadnezari yabese yesaba kakhulu futsi ngaso leso sikhatsi yasukuma, yakhuluma netikhulu yatsi: “Angitsi matsatfu emadvodza lesiwabophile sawajika emlilweni?” Letikhulu tayiphendvula tatsi: “Yebo nkhosi.” 25 Yona yatsi: “Ase ningibukiseni! Ngibona emadvodza lamane langakaboshwa ahambahamba emlilweni, awakalimali ndzawo futsi lena yesine ifana nendvodzana yabonkulunkulu.”

26 Nebukhadnezari wasondzela emnyango lapho bekunalomlilo lomkhulu khona futsi watsi: “Shadraki, Meshaki nawe Abednego, nine tinceku taNkulunkulu Losetikwako Konkhe,+ phumani nite lapha!” BoShadraki, Meshaki na-Abednego baphuma kulomlilo. 27 Labo labamelele inkhosi, tiphatsimandla, tindvuna kanye nebabusi lebebahlangene lapho,+ babona kutsi lomlilo awukawalimati ndzawo* lamadvodza;+ bekute ngisho nalunye lunwele etinhloko tawo lebeluhashulwe ngulomlilo, netembatfo tawo betisolo tinjalo nje futsi tinganuki ngisho nentfutfu.

28 Nebukhadnezari wabese utsi: “Akadvunyiswe Nkulunkulu waboShadraki, Meshaki na-Abednego+ lotfume ingilosi yakhe, wakhulula tinceku takhe. Bebametsemba Nkulunkulu wabo futsi bangawulaleli umyalo wenkhosi, bebatimisele ngisho nekufa kunekutsi bakhonte lomunye nkulunkulu ngaphandle kwaNkulunkulu wabo.+ 29 Ngako ngikhipha umyalo wekutsi bantfu, tive, nabo bonkhe labakhuluma tilwimi letahlukahlukene labatawutfolakala bakhuluma kabi ngaNkulunkulu waShadraki, Meshaki na-Abednego, kufanele bajutjwe babe ticucu netindlu tabo tiguculwe tibe yimithoyi yesive;* ngobe kute lomunye nkulunkulu longakhona kusindzisa ngalendlela.”+

30 Inkhosi yabese iniketa boShadraki, Meshaki na-Abednego tikhundla letiphakeme* esifundzeni saseBhabhulona.+

4 “Lona ngumlayeto iNkhosi Nebukhadnezari lewutfumela kubo bonkhe bantfu, tive nakubo bonkhe labakhuluma tilwimi letahlukahlukene emhlabeni: Shengatsi ningaba nekuthula lokukhulu! 2 Kuyangijabulisa kunitjela ngetibonakaliso nangetimangaliso Nkulunkulu Losetikwako Konkhe langentele tona. 3 Maye tinkhulu tibonakaliso takhe, netimangaliso takhe tinemandla kakhulu! Umbuso wakhe utawuhlala ukhona kuze kube phakadze, futsi utawubusa situkulwane ngesitukulwane.+

4 “Mine Nebukhadnezari bengihleti ngekuthula endlini yami, netintfo tingihambela kahle esigodlweni sami. 5 Ngabhudza intfo lengesabisako. Tintfo lengatibona ngesikhatsi ngilele embhedzeni wami tangetfusa kakhulu.+ 6 Ngako ngatsi akubitwe bonkhe bantfu labahlakaniphile baseBhabhulona kuze batongichazela leliphupho.+

7 “Ngaleso sikhatsi kwefika baphristi labenta imilingo, tangoma, emaKhaledi* kanye nalabaphengula ngekufundza tinkhanyeti.+ Ngatsi nangibatjela kutsi ngibhudzeni, behluleka kungichazela leliphupho.+ 8 Ekugcineni kwefika Danyela, lobeketsiwe ngekutsi nguBhelteshasari,+ kususelwa ebitweni lankulunkulu wami,+ futsi umoya wabonkulunkulu labangcwele bewukuye.+ Ngamtjela leliphupho ngatsi:

9 “‘Awu Bhelteshasari, wena ndvuna yebaphristi labenta imilingo,+ ngiyati kutsi umoya wabonkulunkulu labangcwele ukuwe,+ futsi kute imfihlo longeke ukhone kuyembula.+ Ngako ngichazele loko lengikubone ephusheni.

10 “‘Ngesikhatsi ngilele embhedzeni wami, ngibone sihlahla+ emhlabeni futsi besisidze kakhulu.+ 11 Sakhula sacina futsi sihloko saso sakhula saze safika emazulwini. Lesihlahla besibonakala ngisho nasemikhawulweni yemhlaba. 12 Emacembe aso bekamahle, futsi besinetitselo letinyenti, sinjalo nje sinekudla kwabo bonkhe. Tilwane tesiganga betitfola umtfunti ngephansi kwaso, netinyoni telizulu betihlala emagaleni aso futsi konkhe lokuphilako* bekudla titselo taso.

13 “‘Ngitsite ngiselele embhedzeni wami, ngabona sitfunywa* lesingcwele sehla sivela emazulwini.+ 14 Samemeta kakhulu satsi: “Juba lesihlahla,+ ujube nemagala aso, hhihlita emacembe aso futsi usakate netitselo taso! Tilwane tesiganga letingephansi kwaso atibaleke, netinyoni letisemagaleni aso nato atibaleke. 15 Kodvwa uboshiya siphunti kanye netimphandze taso emhlabatsini, usibophe ngensimbi nangelitfusi khona lapho etjanini lobusesigangeni. Asimantiswe ngematolo asezulwini futsi sihlale netilwane tesiganga emkhatsini walokumila emhlabeni.+ 16 Inhlitiyo yaso ayishintjwe ibe yesilwane sesiganga, ingasabi yemuntfu futsi akwendlule tikhatsi letingu-7.+ 17 Lesincumo simenyetelwe titfunywa+ futsi lesijubo* simenyetelwe ngulabangcwele, kuze bantfu labaphilako bati kutsi Losetikwako Konkhe uneligunya leliphakeme etikwemibuso yebantfu,+ nekutsi bukhosi ubunika nobe ngubani lafuna kumnika futsi emandla ekubusa uwanika ngisho nemuntfu lophansi* kunabo bonkhe.”

18 “‘Nguloku-ke lengikubhudzile mine Nkhosi Nebukhadnezari. Manje-ke Bhelteshasari, ngichazele leliphupho, ngobe bonkhe labahlakaniphile embusweni wami behlulekile kungitjela inchazelo yalo.+ Kodvwa wena utawukhona, ngobe umoya wabonkulunkulu labangcwele ukuwe.’

19 “Ngaleso sikhatsi, Danyela lobekabitwa ngekutsi nguBhelteshasari+ wacale wetfuka futsi woma sikhashana, naloko lokwefika engcondvweni yakhe kwamesabisa.

“Inkhosi yatsi: ‘Awu Bhelteshasari, alingakwetfusi leliphupho, futsi ayingakwesabisi nenchazelo yalo.’

“Bhelteshasari waphendvula watsi: ‘Awu nkhosi yami, shengatsi loko lokushiwo nguleliphupho kungenteka kulabo labakwenyanyako nasetitseni takho.

20 “‘Lesihlahla losibonile, lesakhula sacina, sihloko saso saze safika emazulwini, futsi sabonakala ngisho nasemikhawulweni yemhlaba,+ 21 emacembe aso amahle, sinetitselo letinyenti, sinjalo nje sinekudla kwabo bonkhe futsi tilwane tesiganga tihlala ngephansi kwaso, netinyoni telizulu tihlala emagaleni aso,+ 22 simelela wena nkhosi, ngobe nawe ube nemandla futsi wacina, neludvumo lwakho lukhule lwaze lwayofika emazulwini+ futsi bukhosi bakho befika nasemikhawulweni yemhlaba.+

23 “‘Inkhosi yabese ibona sitfunywa lesingcwele+ sehla sivela emazulwini futsi satsi: “Juba lesihlahla usibulale, kodvwa uboshiya siphunti netimphandze taso emhlabatsini, usibophe ngensimbi nangelitfusi khona lapho etjanini lobusesigangeni. Asimantiswe ngematolo asezulwini futsi sihlale netilwane tesiganga kuze kube ngulapho kwendlula tikhatsi letingu-7.”+ 24 Awu nkhosi, nayi-ke inchazelo yaleliphupho lakho; lesi sijubo lesivela kuLosetikwako Konkhe lesitawutfolwa yinkhosi yami. 25 Wena utawucoshwa emkhatsini webantfu, futsi utawuhlala netilwane tesiganga, udle tjani njengetinkunzi. Kutawengca tikhatsi letingu-7 solo umantiswa ngematolo asezulwini,+ kuze kube ngulapho sewati kutsi Losetikwako Konkhe uneligunya leliphakeme etikwemibuso yebantfu, nekutsi bukhosi ubunika nobe ngubani lafuna kumnika.+

26 “‘Kodvwa njengobe kutsiwe akushiywe siphunti salesihlahla kanye netimphandze taso,+ kanjalo-ke nawe utawuphindze ube yinkhosi nasewati kutsi Nkulunkulu ubusa emazulwini. 27 Awu nkhosi, mane ulalele seluleko sami. Shiya tono takho wente lokulungile, uyekele nekwenta lokubi futsi ubentele umusa labahluphekile. Mhlawumbe nje ungaphumelela, uphile nesikhatsi lesidze.’”+

28 Konkhe loku kwayehlela iNkhosi Nebukhadnezari.

29 Ngemuva kwetinyanga letingu-12, Nebukhadnezari abehambahamba eluphahleni lwasesigodlweni saseBhabhulona. 30 Bekatsi: “Lena akusiyo yini iBhabhulona Lenkhulu lengiyakhe ngemandla ami kuze ibe sigodlo senkhosi futsi ivete bukhatikhati bebukhosi bami?”

31 Watsi asakhuluma, kwevakala livi livela emazulwini litsi: “Awu Nkhosi Nebukhadnezari, nangu umlayeto wakho: ‘Umbuso sewutsetfwe kuwe,+ 32 futsi wena utawucoshwa emkhatsini webantfu. Utawuhlala netilwane tesiganga, udle tjani njengetinkunzi futsi kutawengca tikhatsi letingu-7, kuze kube ngulapho sewati kutsi Losetikwako Konkhe uneligunya leliphakeme etikwemibuso yebantfu, nekutsi bukhosi ubunika nobe ngubani lafuna kumnika.’”+

33 Lamavi agcwaliseka kuNebukhadnezari ngaso leso sikhatsi. Wacoshwa emkhatsini webantfu, futsi wacala kudla tjani njengetinkunzi. Umtimba wakhe wamantiswa ngematolo emazulu, netinwele takhe takhula taba tindze kuhle kwetinsiba telusweti, futsi tingalo takhe tafanana netingalo tenyoni.+

34 “Ekupheleni kwaleso sikhatsi,+ mine Nebukhadnezari ngabuka emazulwini, futsi ingcondvo yami yabuya. Ngadvumisa Losetikwako Konkhe, ngamdvumisa futsi ngamkhatimulisa Loyo lophila kuze kube phakadze, ngobe utawubusa kuze kube phakadze, nembuso wakhe utawuhlala ukhona situkulwane ngesitukulwane.+ 35 Bonkhe bantfu basemhlabeni abasilutfo nabacatsaniswa naye, futsi wenta lakufunako ngetingilosi kanye nangebantfu labasemhlabeni. Kute longamvimba*+ kutsi ente nobe yini, futsi kute longatsi: ‘Manje sewenteni?’+

36 “Ngaleso sikhatsi ingcondvo yami yabuya, umbuso wami waphindze wadvuma, kwabuya nebukhosi bami kanye nebukhatikhati bami.+ Tiphatsimandla kanye nebantfu labahloniphekile baphindze babuya batocela teluleko kimi, futsi ngaphindze ngaba yinkhosi, ngadvuma kakhulu kunasekucaleni.

37 “Mine Nebukhadnezari, sengidvumisa iNkhosi lesemazulwini+ futsi sengiyayikhatimulisa, ngobe yonkhe imisebenti yayo ihambisana neliciniso,+ netindlela tayo tilungile futsi iyamtfobisa lotigcabhako.”+

5 INkhosi Bhelshasari+ yentela tindvuna tayo letingu-1 000 lidzili lelikhulu, futsi yona beyihleti embikwato inatsa liwayini.+ 2 Ngesikhatsi iNkhosi Bhelshasari seyidzakiwe, yatfumela umlayeto wekutsi kuyolandvwa tindzebe teligolide netelisiliva lebetitsetfwe ngubabe* wayo Nebukhadnezari ethempelini lebeliseJerusalema,+ kuze yona netindvuna tayo, emaphovela ayo kanye nalabanye bafati bayo banatsele kuto. 3 Ngako taletfwa letindzebe teligolide lebetitsetfwe endzaweni lengcwele yendlu yaNkulunkulu lebeyiseJerusalema, futsi inkhosi netindvuna tayo, nemaphovela ayo kanye nalabanye bafati bayo banatsela kuto. 4 Banatsa liwayini, badvumisa bonkulunkulu labakhiwe ngeligolide nangelisiliva, ngelitfusi, ngensimbi, ngelugodvo nangelitje.

5 Ngaso leso sikhatsi, kwatsi mefu sandla semuntfu, sabhala elubondzeni macondzana nelutsi lwesibane esigodlweni senkhosi, futsi inkhosi yasibona lesandla njengobe besibhala. 6 Ngako yashintja ebusweni, naloko lokwefika engcondvweni yayo kwayetfusa, imilente yayo yachachatela,+ futsi kwacegetela nemadvolo.

7 Inkhosi yamemeta kakhulu yatsi akubitwe tangoma, emaKhaledi* kanye nalabaphengula ngekufundza tinkhanyeti.+ Yatjela labantfu labahlakaniphile baseBhabhulona yatsi: “Umuntfu lotawufundza loku lokubhaliwe futsi angitjele inchazelo yako, utawugcokiswa ingubo lebukhwebeletane,* agatjiswe umgaco weligolide entsanyeni,+ futsi utawuba ngumbusi wesitsatfu embusweni.”+

8 Kodvwa kute ngisho namunye kulabantfu labahlakaniphile labeta enkhosini lowakhona kufundza lombhalo, futsi kute kubo lowakhona kusho inchazelo yawo.+ 9 Ngako iNkhosi Bhelshasari yesaba kakhulu nebuso bayo bashintja; futsi tindvuna tayo tetfuka kakhulu.+

10 Indlovukazi yatsi kube ive loko inkhosi netindvuna tayo lebetikhuluma ngako, yangena kulendlu yelidzili. Yafike yatsi: “Lunwele loludze nkhosi. Letintfo loticabangako atingakwesabisi nkhosi, futsi ungetfuki uze ubonakale nasebusweni. 11 Lapha embusweni wakho kunendvodza* lenemoya wabonkulunkulu labangcwele. Ngesikhatsi sababe wakho, kwatfolakala kutsi lendvodza inelwati lolunyenti, inekucondza futsi ihlakaniphe njengabonkulunkulu.+ Babe wakho Nebukhadnezari wayibeka kutsi ibe yindvuna yebaphristi labenta imilingo, yetangoma, yemaKhaledi* neyalabaphengula ngekufundza tinkhanyeti.+ 12 Danyela, loyo inkhosi leyametsa yatsi nguBhelteshasari,+ bekanengcondvo lekhaliphile, anelwati futsi anekucondza lobekumenta kutsi akhone kuchaza emaphupho, netiphicwaphicwane kanye nekucatulula tinkinga letimatima.*+ Manje-ke bita Danyela futsi utakuchazela loku lokubhaliwe.”

13 Ngako Danyela waletfwa embikwenkhosi. Inkhosi yambuta yatsi: “UnguDanyela yini wena, futsi ungulomunye yini walabo labatsatfwa ngubabe kaJuda wabatfumba?+ 14 Ngivile kutsi unemoya wabonkulunkulu+ nekutsi unelwati lolunyenti, unekucondza futsi ukhaliphile engcondvweni.+ 15 Ngibite tangoma kanye nebantfu labahlakaniphile kutsi bete batewufundza naku lokubhaliwe futsi bangichazele kutsi kusho kutsini, kepha bayehluleka kungichazela.+ 16 Kodvwa ngivile kutsi wena uyakhona kuchaza timfihlo+ nekucatulula tinkinga letimatima.* Ngako nangabe ungakhona kufundza loku lokubhaliwe futsi ungichazele kona, utawugcokiswa ingubo lebukhwebeletane, ugatjiswe umgaco weligolide entsanyeni, futsi utawuba ngumbusi wesitsatfu embusweni.”+

17 Danyela wabese utsi enkhosini: “Letipho takho ungatigcina nobe utinikete labanye bantfu. Kepha mine ngitakufundzela loku lokubhaliwe futsi ngikuchazele kona. 18 Awu nkhosi, Nkulunkulu Losetikwako Konkhe waniketa babe wakho Nebukhadnezari umbuso, ludvumo, kuhlonipheka kanye nebukhatikhati.+ 19 Ngenca yeludvumo lebekamnike lona, bonkhe bantfu, tive kanye nabo bonkhe lebebakhuluma tilwimi letehlukahlukene bebamesaba kakhulu.+ Nakutsi akabulale umuntfu bekavele ambulale, nakutsi akamyekele bekamyekela, nakutsi akamphakamise bekamphakamisa, futsi nakutsi akamtfobise bekamtfobisa.+ 20 Kodvwa watsi nasekacala kutikhukhumeta, asacala nekuba nenkhani leyamenta wagcine sekatigcabha,+ wabese sewuyehliswa esihlalweni sakhe sebukhosi futsi wemukwa nesitfunti sakhe. 21 Wacoshwa emkhatsini webantfu, inhlitiyo yakhe yashintjwa yaba yesilwane futsi wahlala netimbongolo tesiganga. Wadla tjani njengetinkunzi, wamantiswa ngematolo asezulwini, kwaze kwaba ngulapho sekati kutsi Nkulunkulu Losetikwako Konkhe uneligunya leliphakeme etikwemibuso yebantfu, nekutsi bukhosi ubunika nobe ngubani lafuna kumnika.+

22 “Kodvwa wena Bhelshasari, wena ndvodzana* yakhe, awukatitfobi ngisho nobe bewukwati konkhe loku. 23 Esikhundleni saloko, uyivukele iNkhosi yasemazulwini,+ futsi utsite akuletfwe tindzebe tasendlini yayo.+ Wena netindvuna takho, nemaphovela akho kanye nalabanye bafati bakho nibese ninatsela kuto liwayini futsi nadvumisa bonkulunkulu labakhiwe ngeligolide nangelisiliva, ngelitfusi, ngensimbi, ngelugodvo nangelitje, lokubonkulunkulu labangaboni, labangeva, futsi labangati lutfo.+ Awuzange umkhatimulise Nkulunkulu lonemandla ekulawula kuphila kwakho+ kanye nato tonkhe tintfo lotentako. 24 Ngako nguye lolotfumele lesandla lesifike sabhala lamavi.+ 25 Nguloku-ke lokubhaliwe: MENE, MENE, THEKELI, PHARISINI.

26 “Nayi-ke inchazelo yalamavi: MENE usho kutsi Nkulunkulu sewuwabalile emalanga embuso wakho futsi sewaphelile.+

27 “THEKELI usho kutsi Nkulunkulu ukukalile etikalini, wakutfola ulula kakhulu.*

28 “PHERES usho kutsi Nkulunkulu uwehlukanisile umbuso wakho, wawunika emaMediya nemaPheresiya.”+

29 Ngemuva kwaloko, Bhelshasari watsi akugcokiswe Danyela ingubo lebukhwebeletane, agatjiswe nemgaco weligolide entsanyeni futsi benta njengobe inkhosi beyishito; bamemetela nekutsi utawuba ngumbusi wesitsatfu embusweni.+

30 Bhelshasari inkhosi yemaKhaledi wabulawa ngabo lobo busuku.+ 31 Dariyusi+ longumMediya watsatsa umbuso; futsi abeneminyaka lengaba ngu-62 budzala.

6 Dariyusi wancuma kubeka bantfu labangu-120 lebebatawuba bameleli bakhe kuwo wonkhe umbuso wakhe.+ 2 Bebabukwe tikhulu letintsatfu, futsi Danyela abengulesinye sato.+ Laba labamelele inkhosi+ bebahlale baletsa umbiko kuletikhulu kuze tintfo tenkhosi tihlale tivikelekile. 3 Danyela wakhombisa kutsi unelikhono kakhulu kwengca leletinye tikhulu nebameleli benkhosi, ngobe yena abenengcondvo lekhaliphile.+ Inkhosi beseyifuna kumniketa sikhundla lesisetulu embusweni wayo.

4 Ngaleso sikhatsi, letindvuna nalabo labamelele inkhosi bebafuna kutfola sizatfu lebebangamangalela ngaso Danyela endleleni lebekenta ngayo umsebenti wembuso. Kodvwa abazange batfole ngisho nasinye, futsi kute lokukhohlakele lebebangatsi ukwentile, ngobe beketsembekile, acotfo, nemsebenti wakhe awunakisisa. 5 Lamadvodza abese atsi: “Kute ngisho nasinye sizatfu lesitasitfola sekumangalela Danyela, ngaphandle nasingatfola lokutsite lokutsintsana nemtsetfo waNkulunkulu wakhe.”+

6 Ngako letikhulu nalabo labamelele inkhosi bahlangana baba licembu futsi baya enkhosini, bafike batsi kuyo: “Lunwele loludze Nkhosi Dariyusi. 7 Tonkhe tikhulu tembuso, tiphatsimandla, labamelele inkhosi, beluleki bembuso kanye nebabusi bavumelene ngekutsi inkhosi ikhiphe umyalo futsi kube nemtsetfo lovimbelako lotsi umuntfu lotawutfolakala kulamalanga langu-30 ancusa kulomunye nkulunkulu nobe kulomunye umuntfu ngaphandle kwakho nkhosi, kufanele ajikijelwe emgodzini wemabhubesi.+ 8 Awu nkhosi, sicela ukhiphe lomyalo futsi uwusayine+ kuze ungashintjwa, ngobe umtsetfo wemaMediya nemaPheresiya awushintjwa.”+

9 Ngako iNkhosi Dariyusi yawusayina lomtsetfo lovimbelako.

10 Kodvwa watsi Danyela kube eve ngalomtsetfo lobewusayiniwe, waya endlini yakhe futsi bekuvulwe emafasitelo asekamelweni lelisetulu lebekabuke eJerusalema.+ Bekaguca, athantaza futsi advumisa Nkulunkulu wakhe katsatfu ngelilanga, njengobe nje bekahlale enta usengakakhishwa lomtsetfo. 11 Kwatsi kusenjalo, lamadvodza atseleka endlini yaDanyela, futsi amkhandza athantaza kuNkulunkulu wakhe, acela nekutsi amentele umusa.

12 Ngako lamadvodza aya enkhosini, afike ayikhumbuta ngalomtsetfo, atsi: “Angitsi wena nkhosi uwusayinile umtsetfo lotsi umuntfu lotawutfolakala kulamalanga langu-30 ancusa kulomunye nkulunkulu nobe kulomunye umuntfu ngaphandle kwakho nkhosi, kufanele ajikijelwe emgodzini wemabhubesi?” Inkhosi yaphendvula yatsi: “Yebo, futsi lomtsetfo angeke ushintje, ngobe umtsetfo wemaMediya nemaPheresiya awushintji.”+ 13 Ngekushesha atsi enkhosini: “Danyela, longulomunye wemaJuda latfunjiwe,+ akakulaleli nkhosi futsi akawulaleli nalomtsetfo lowusayinile, ngobe uthantaza kuNkulunkulu wakhe katsatfu ngelilanga.”+ 14 Inkhosi yatsi nje nayiva loku, yakhatsateka kakhulu futsi yacabanga ngekutsi ingamvikela njani Danyela. Kwaze kwashona lilanga solo yetama tindlela tekumsindzisa. 15 Ekugcineni lamadvodza abuya enkhosini alicembu futsi atsi: “Khumbula nkhosi kutsi umtsetfo wemaMediya nemaPheresiya utsi nobe ngumuphi umyalo nobe umtsetfo loshaywa yinkhosi awushintji.”+

16 Ngako inkhosi yatfumela livi, futsi Danyela walandvwa wabese ujikijelwa emgodzini wemabhubesi.+ Inkhosi yatsi kuDanyela: “Nkulunkulu wakho lohlale umkhonta utakusindzisa.” 17 Ngako kwalandvwa litje futsi labekwa emlonyeni walomgodzi, inkhosi yabeka luphawu kulelitje ngendandatho yayo yesicinisekiso nangendandatho yetindvuna tayo, kuze loko lokuncunyiwe ngaDanyela kungashintjwa.

18 Inkhosi yabese iya esigodlweni sayo. Yazila kudla ngalobo busuku, yala nekutsi kuletfwe kwekuyijabulisa* futsi ayikhonanga ngisho nekulala.* 19 Kwatsi lokwa entsatsakusa, inkhosi yavuka futsi yaphutfuma yaya emgodzini wemabhubesi. 20 Yatsi nje nayisondzela kulomgodzi, yamemeta Danyela ngelivi lelibuhlungu yatsi: “Awu Danyela, nceku yaNkulunkulu lophilako. Nkulunkulu wakho lohlale umkhonta ukuvikele yini emabhubesini?” 21 Ngaso leso sikhatsi Danyela waphendvula inkhosi watsi: “Lunwele loludze nkhosi. 22 Nkulunkulu wami utfumele ingilosi yakhe futsi ifike yavala imilomo yalamabhubesi.+ Awakangilimati,+ ngobe Nkulunkulu ubonile kutsi ngite licala futsi kute ngisho nakunye lokubi lengikwentile kuwe nkhosi.”

23 Inkhosi yajabula kakhulu futsi yatsi Danyela akakhishwe kulomgodzi. Ngesikhatsi akhishwa kuwo, bekangakalimali ndzawo ngobe beketsembele kuNkulunkulu wakhe.+

24 Inkhosi yabese ikhipha umyalo, yatsi lamadvodza lebekamangalele* Danyela awaletfwe, ajikijelwe kulomgodzi wemabhubesi. Ajikijelwa nemadvodzana awo kanye nebafati bawo. Batsi basengakefiki ngisho naphansi kulomgodzi, emabhubesi avele abahlasela futsi abhasha onkhe ematsambo abo.+

25 INkhosi Dariyusi yabese ibhalela bonkhe bantfu, tive, nabo bonkhe bantfu labakhuluma tilwimi letehlukahlukene emhlabeni, yatsi:+ “Shengatsi ningaba nekuthula lokukhulu! 26 Ngikhipha umtsetfo wekutsi kuto tonkhe tindzawo letingephansi kwembuso wami, bantfu kufanele besabe Nkulunkulu waDanyela+ futsi bamhloniphe, ngobe unguNkulunkulu lophilako futsi utawuhlala akhona kuze kube phakadze. Umbuso wakhe awuyuze ubhujiswe, futsi yena utawuchubeka abusa* kuze kube phakadze.+ 27 Uyabavikela bantfu bakhe,+ futsi abasindzise, ente netibonakaliso kanye netimangaliso emazulwini nasemhlabeni,+ ngobe umsindzisile Danyela etidladleni temabhubesi.”

28 Ngako tintfo tamhambela kahle Danyela embusweni waDariyusi+ nasembusweni waKhuresi umPheresiya.+

7 Ngemnyaka wekucala waBhelshasari inkhosi+ yaseBhabhulona, Danyela wabhudza futsi wabona imibono ngesikhatsi alele embhedzeni wakhe.+ Wabese ukubhala phansi loko bekakubhudzile;+ wakubhala konkhe loko bekakubonile. 2 Danyela watsi:

“Ngatsi nangiselele ebusuku ngabona imimoya lemine yasemazulwini lebeyihhusha ngemandla, ihhusha elwandle lolukhulu.+ 3 Kwabese kuphuma tilwane tesiganga letine letinkhulu+ kulolwandle, futsi nguleso naleso besehlukile kulesinye.

4 “Silwane sekucala besinjengelibhubesi+ futsi besinetimphiko telusweti.+ Ngatsi ngisebukile ngabona kukhishwa timphiko taso, saphakanyiswa emhlabatsini, samiswa ngetinyawo letimbili njengemuntfu futsi sanikwa inhlitiyo yemuntfu.

5 “Ngabese ngibona lesinye silwane sesibili lebesinjengelibhele.+ Besiphakamise lunyawo lwaso futsi besibambe timbambo letintsatfu ngematinyo aso. Kwakhulunywa naso kwatsiwa: ‘Vuka udle inyama lenyenti.’+

6 “Ngemuva kwaloko ngachubeka ngibukile, futsi ngabona lesinye silwane lebesifana nengwe,+ kepha emhlane waso besinetimphiko letine letinjengetenyoni. Lesilwane besinetinhloko letine,+ futsi saniketwa emandla ekubusa.

7 “Njengobe bengisolo ngibona lemibono ebusuku, ngabese ngibona silwane sesine. Besesabeka, setfusa, sinemandla lamakhulu futsi sinematinyo lamakhulu ensimbi. Besishwabadzela yonkhe intfo lesihlangana nayo futsi siyifihlita, bese kutsi lokusele sikunyatsele ngetinyawo taso.+ Besehlukile kuleti letinye tilwane letivele kucala kunaso, futsi besinetimphondvo letingu-10. 8 Ngatsi ngisebukile futsi ngicabanga ngaletimphondvo, ngabona kuvela lolunye luphondvo loluncane+ emkhatsini wato, futsi timphondvo letintsatfu kuleti tekucala takhishwa embikwalo. Loluphondvo belunemehlo lanjengewemuntfu, futsi belunemlomo lokhuluma ngekwedzelela.*+

9 “Ngachubeka ngibukile, ngabona tihlalo tebukhosi tibekwa etindzaweni tato futsi Loyo Lobekaphila Kusukela Endvulo+ wahlala phansi.+ Tembatfo takhe betimhlophe njengesitfwatfwa,+ netinwele letisenhloko yakhe betimhlophe njengeboya. Sihlalo sakhe sebukhosi besivutsa emalangabi, nemasondvo aso avutsa umlilo.+ 10 Bekunemlilo lebewugeleta njengemfudlana futsi usuka embikwakhe.+ Tinkhulungwane tetinkhulungwane tetingilosi betichubeka tenta umsebenti wakhe, futsi tinkhulungwane letilishumi letiphindvwe katinkhulungwane letilishumi betime embikwakhe.+ INkantolo+ yacala kusebenta, netincwadzi tavulwa.

11 “Ngaleso sikhatsi, ngachubeka ngibukile njengobe bengiva lamavi ekwedzelela* lebekakhulunywa nguloluphondvo.+ Ngatsi ngisabukile ngabona lesilwane sibulawa, umtimba waso wajikwa emlilweni lovutsako futsi sabhujiswa. 12 Kodvwa leletinye tilwane+ temukwa ligunya lato lekubusa futsi tavunyelwa kutsi tichubeke tiphila sikhatsi lesitsite.

13 “Njengobe bengisolo ngibona lemibono ebusuku, ngabese ngibona lotsite lofana nendvodzana yemuntfu+ ehla nemafu asemazulwini; wavunyelwa kutsi angene kuLoyo Lobekaphila Kusukela Endvulo,+ futsi wangeniswa embikwakhe. 14 Waniketwa ligunya lekubusa,+ neludvumo+ kanye nembuso, kuze bonkhe bantfu, netive kanye nebantfu labakhuluma tilwimi letehlukahlukene bamkhonte.+ Kubusa kwakhe kutawuhlala phakadze futsi angeke kuphele, nembuso wakhe angeke ubhujiswe.+

15 “Lemibono leyetfusako lengayibona yangenta ngacindzeteleka kakhulu.+ 16 Ngako ngasondzela kulenye yetingilosi lebetime lapho, ngayibuta kutsi kahlekahle letintfo tisho kutsini. Yangiphendvula, futsi yangichazela ngaletintfo.

17 “‘Letilwane letine letinkhulu timelela emakhosi lamane+ latawuba khona emhlabeni.+ 18 Kodvwa labangcwele baNkulunkulu Lophakeme+ batawunikwa umbuso+ futsi utawuba ngewabo+ kuze kube phakadze, yebo, phakadze naphakadze.’

19 “Bengifuna kwati nangalesilwane sesine lebesehlukile kuleti letinye. Besesabeka kakhulu, sinematinyo ensimbi, futsi sinetidladla telitfusi. Besishwabadzela yonkhe intfo lesihlangana nayo futsi siyifihlita, bese kutsi lokusele sikunyatsele ngetinyawo taso;+ 20 bengifuna kwati nangaletimphondvo letingu-10+ lebetisenhloko yaso, nangaloluphondvo lolwavela futsi lwenta kutsi kudzilike letintsatfu.+ Loluphondvo belunemehlo, lunemlomo lokhuluma ngekwedzelela* futsi belubukeka lulukhulu kunaleti letinye.

21 “Bengisolo ngibukile njengobe loluphondvo belulwa nalabangcwele futsi lubehlulekisa,+ 22 kwaze kwaba ngulapho Nkulunkulu Lophakeme, Loyo Lobekaphila Kusukela Endvulo+ akhipha sijubo lesivikela labangcwele bakhe, futsi sefika nesikhatsi lebesibekiwe sekutsi labangcwele banikwe umbuso.+

23 “Lengilosi yatsi: ‘Lesilwane sesine simelela umbuso wesine lotawuvela emhlabeni. Utawehluka kuyo yonkhe leleminye imibuso, futsi wona utawushwabadzela wonkhe umhlaba, uwugcobagcobe futsi uwufihlite.+ 24 Letimphondvo letingu-10 timelela emakhosi langu-10 latawuvela kulombuso. Emvakwawo kutawuvela lenye inkhosi, yona itawehluka kunalawa lamanye futsi itawehlulekisa emakhosi lamatsatfu.+ 25 Lenkhosi itawedzelela Losetikwako Konkhe,+ futsi itawuchubeka ihlupha labangcwele baNkulunkulu Lophakeme. Itawetama kushintja tikhatsi nemtsetfo, futsi labangcwele batawunikelwa kuyo kube sikhatsi, tikhatsi nehhafu yesikhatsi.*+ 26 INkantolo yacala kusebenta, futsi lenkhosi yemukwa ligunya layo lekubusa kuze ibhujiswe, ingaphindzi ibe khona.+

27 “‘Bantfu labangcwele baNkulunkulu Lophakeme banikwa umbuso, ligunya lekubusa neludvumo lwayo yonkhe imibuso lesemhlabeni.+ Umbuso wabo utawuhlala ukhona kuze kube phakadze;+ yonkhe imibuso itabasebentela futsi ibalalele.’

28 “Iphelela lapha-ke lendzaba. Yangetfusa kakhulu ngaze ngashintja nasebusweni; kodvwa ngayigcina enhlitiyweni yami.”

8 Ngemnyaka wesitsatfu wekubusa kweNkhosi Bhelshasari,+ ngabona lomunye umbono.+ 2 Nangibona lombono bengisesigodlweni* lesiseShushani,*+ esifundzeni sase-Elamu;+ bengiseceleni kwemfula* i-Ulayi. 3 Ngatsi nangiphakamisa emehlo ngabona imvu lendvuna+ lenetimphondvo letimbili ime embikwalomfula.+ Letimphondvo betitindze, kepha lolunye beluludze kunalolunye, futsi lolu loludze kakhulu lwavela muva.+ 4 Ngabona lemvu lendvuna ihlasela titsa letisenshonalanga, letisenyakatfo naletiseningizimu futsi kute ngisho nasinye silwane sesiganga lebesingamelana nayo, kute nalobekangakhona kukhulula letilwane esandleni* sayo.+ Beyenta lekufunako futsi itigabatisa.

5 Ngatsi ngisabukile ngabona imbuti lendvuna+ ichamuka enshonalanga futsi idzabula wonkhe umhlaba, beyigijima kakhulu kangangekutsi tinyawo tayo betingatsintsi phansi. Emkhatsini wemehlo ayo bekuneluphondvo lolugcamile.+ 6 Beyita ngakulemvu lendvuna lenetimphondvo letimbili lebengiyibone ime embikwemfula; beyigijima itfukutsele kakhulu icondze kulemvu lendvuna.

7 Ngayibona isondzela kulemvu lendvuna futsi itfukutsele kakhulu. Yayihlasela futsi yayephula letimphondvo tayo letimbili, lemvu lendvuna ayizange ikhone kutivikela. Ngemuva kwaloko yayijika phansi futsi yayigcobagcoba, kwaba bete ngisho namunye lobekangayilamulela esandleni* salembuti.

8 Lembuti lendvuna yabese itiphakamisa kakhulu, kodvwa kwatsi lapho seyinemandla, loluphondvo lolukhulu lwephuka. Kwabese kuvela timphondvo letine letigcamile esikhundleni salo, tabuka emagumbini lamane emhlaba.*+

9 Kulolunye lwaletimphondvo kwamila luphondvo loluncane, futsi lwakhula kakhulu lwabheka eningizimu, emphumalanga naseVeni Lelihle.+ 10 Loluphondvo lwakhula kakhulu lwaze lwafika nasebutfweni lasemazulwini, futsi lwadzilita incenye yalelibutfo kanye nencenye yetinkhanyeti, lwakudzilitela emhlabeni, lwase luyakugcobagcoba. 11 Lwedzelela ngisho neSikhulu selibutfo, lwasemuka umhlatjelo lokufanele wentiwe njalo, futsi kwabhidlitwa indzawo yaso lengcwele lemiswe yacina.+ 12 Ngenca yesono, lelibutfo kanye nalomhlatjelo lokufanele wentiwe njalo kwanikelwa kuloluphondvo. Beluchubeka lutsatsa liciniso lulilahlela phansi emhlabeni. Belwenta lelikufunako futsi luphumelela.

13 Ngemuva kwaloko ngeva ingilosi ikhuluma futsi lenye ingilosi yatsi kuyo: “Kutawuchubeka sikhatsi lesidze kangakanani loku lokuvele kulombono lomayelana nemhlatjelo lokufanele wentiwe njalo, lomayelana nesono lesibhubhisako,+ nekugcotjwagcotjwa kwalendzawo lengcwele kanye nelibutfo?” 14 Lengilosi yatsi kimi: “Kutawutsatsa emalanga* langu-2 300; futsi nakanjani lendzawo lengcwele itawubuyiselwa esimeni sayo.”

15 Ngatsi ngisabukile kulombono futsi ngisetama kuwucondza, ngabese ngibona lotsite lonjengemuntfu sekeme embikwami. 16 Ngemuva kwaloko ngeva livi lemuntfu lichamuka e-Ulayi,+ futsi belimemeta litsi: “Gabhriyeli,+ chazela lomuntfu kutsi kusho kutsini loku lakubonile.”+ 17 Ngako wasondzela lapho bengime khona, kodvwa watsi nakefika ngesaba kakhulu kangangekutsi ngaguca ngatsintsa ngebuso phansi. Yena watsi kimi: “Awu ndvodzana yemuntfu, yati kutsi lombono utawugcwaliseka esikhatsini sekugcina.”+ 18 Kodvwa watsi asakhuluma nami, ngafikelwa butfongo lobukhulu ngalala buso bami butsintse emhlabatsini. Ngako wangitsintsa futsi wangisukumisa, wangimisa labengime khona.+ 19 Wabese utsi kimi: “Nyalo-ke sengitakuchazela loko lokutawenteka encenyeni yekugcina yesikhatsi sentfukutselo yaNkulunkulu, ngobe lombono utawugcwaliseka esikhatsini sekugcina.+

20 “Lemvu lendvuna loyibonile lenetimphondvo letimbili imelela inkhosi yaseMediya neyasePheresiya.+ 21 Lembuti lendvuna* imelela inkhosi yaseGrisi;+ futsi loluphondvo lolukhulu lobelusemkhatsini wemehlo ayo lumelela inkhosi yekucala.+ 22 Letimphondvo letine letamila esikhundleni salolu lolwephuka+ timelela imibuso lemine letawuvela embusweni wayo, kodvwa lemibuso ngeke ibe nemandla njengalenkhosi.

23 “Kutawutsi ekugcineni kwesikhatsi sekubusa kwawo, lapho tono tawo setitinyenti ngalokuphelele,* kuvele inkhosi lengahleki namuntfu futsi lecondza emavi lakhohlisako.* 24 Itawuba nemandla kakhulu, kodvwa loko ngeke ikwente ngemandla ayo. Itawenta umonakalo lowesabekako,* futsi itawuphumelela kuko konkhe lekwentako. Itawubhubhisa nalabanemandla, yente nemonakalo kulabangcwele.+ 25 Itawuphumelela ekukhohliseni bantfu labanyenti; futsi itatiphakamisa. Kutawutsi lapho bantfu basetihlalele ngekuthula,* ivele ibhubhise labanyenti babo. Itawumelana ngisho naneSikhulu setikhulu, futsi itawephulwa, kodvwa angeke yephulwe ngesandla semuntfu.

26 “Kuliciniso loku lokuve kukhulunywa kulombono mayelana neminikelo leyentiwa njalo nakuhlwa nasekuseni, kodvwa ubokugcina kuyimfihlo, ngobe kumayelana nesikhatsi lesitako.”+

27 Mine Danyela ngaphelelwa ngemandla, futsi ngagula emalanga lamanyenti.+ Ngemuva kwaloko ngavuka ngachubeka nemsebenti lebengiwentela inkhosi;+ kodvwa bengisetfukile ngenca yaloko bengikubonile futsi kute lobekawucondza lombono.+

9 Bekungumnyaka wekucala waDariyusi+ indvodzana ya-Ahashiveroshi, lobekangumMediya ngekutalwa, futsi lowabekwa kutsi abe yinkhosi embusweni wemaKhaledi.+ 2 Ngalomnyaka wekucala wekubusa kwakhe, mine Danyela, ngafundza tincwadzi* futsi ngacondza kutsi Jehova abekhulume nemphrofethi Jeremiya watsi iJerusalema beyitawusala ikhala libhungane+ iminyaka lengu-70.+ 3 Ngako ngacela lusito* kuJehova Nkulunkulu weliciniso, ngathantaza kuye ngamncenga, futsi ngazila kudla,+ ngembatsa indvwangu yelisaka, ngatitsela nangemlotsa. 4 Ngathantaza kuJehova Nkulunkulu wami ngavuma tono, futsi ngatsi:

“Awu Jehova Nkulunkulu weliciniso, wena unguNkulunkulu lomkhulu nalowesabekako, uyasigcina sivumelwane sakho futsi ubakhombisa lutsandvo lolucotfo+ labo labakutsandzako nalabagcina imitsetfo yakho.+ 5 Kodvwa tsine sonile, sente lokubi, sente tintfo letingakalungi futsi sikuvukele;+ asikayilaleli imitsetfo yakho nemiyalo yakho. 6 Asikatilaleli tinceku takho letibaphrofethi,+ letakhuluma egameni lakho, takhuluma nemakhosi etfu, baholi betfu, bokhokho betfu, kanye nabo bonkhe bantfu labaseveni letfu. 7 Awu Jehova, wena ulungile, kodvwa tsine sihlazekile,* njengobe kunjalo nalamuhla. Bantfu bakaJuda, nawo onkhe ema-Israyeli, nalabo labahlala eJerusalema, nabo bahlazekile, ngobe bonkhe ubahlakatele etindzaweni letidvutane naletikhashane ngenca yekungetsembeki kwabo.+

8 “Awu Jehova, tsine nebaholi betfu, nemakhosi etfu, kanye nabokhokho betfu, sihlazekile* ngobe sonile kuwe. 9 Wena Jehova Nkulunkulu wetfu uyatsetselela futsi unemusa,+ kodvwa tsine sikuvukele.+ 10 Asikalilaleli livi lakho Jehova Nkulunkulu wetfu, asizange siyigcine imitsetfo yakho lowasinika yona usebentisa tinceku takho letibaphrofethi.+ 11 Onkhe ema-Israyeli awephulile uMtsetfo wakho, akushiya ngekutsi angalilaleli livi lakho. Ngako-ke wasehlisela sicalekiso lesibhalwe eMtsetfweni waMosi inceku yaNkulunkulu weliciniso,+ ngenca yekutsi sonile kuye. 12 Yena ukwentile loko latsi utakwenta kitsi+ nakubabusi betfu, wasehlisela inhlekelele lenkhulu. Emhlabeni wonkhe, ayizange seyenteke intfo lefana nalena leyenteke eJerusalema.+ 13 Nanobe seyisehlele yonkhe lenhlekelele lebhalwe eMtsetfweni waMosi,+ kodvwa solo asikakuceli wena Jehova Nkulunkulu wetfu kutsi usentele umusa, ngekutsi siphendvuke etonweni tetfu+ futsi sati kutsi wena uneliciniso.*

14 “Ngako wena Jehova wachubeka ulindzile futsi wasehlisela lenhlekelele, ngobe konkhe lokwentako wena Jehova Nkulunkulu wetfu kulungile; kepha tsine asikalilaleli livi lakho.+

15 “Awu Jehova Nkulunkulu wetfu, wena lowakhipha bantfu bakho eGibhithe ngesandla lesinemandla+ futsi watakhela ligama lelisakhunjulwa ngisho nalamuhla,+ tsine sonile kuwe futsi senta lokubi. 16 Awu Jehova, wena uhlale wenta lokulungile,+ sicela umane ususe intfukutselo yakho edolobheni lakho laseJerusalema, leliyintsaba yakho lengcwele; ngobe ngenca yetono tetfu kanye nemaphutsa abokhokho betfu, bonkhe bantfu labakhelene natsi bahlekisa ngeJerusalema nangebantfu bakho.+ 17 Awu Nkulunkulu wetfu, ngicela ulalele umthantazo wami mine nceku yakho, ulalele neticelo tami. Ngenca yelibito lakho Jehova, mane uyentele umusa indzawo yakho lengcwele+ leseyisele ingenalutfo.+ 18 Awu Nkulunkulu wami, naka futsi ulalele. Vula emehlo akho ubone kuhlupheka kwetfu, ubone nekutsi lelidolobha lebelibitwa ngelibito lakho selisele lingenalutfo; sikucela ngobe wena unguNkulunkulu lonemusa lomkhulu, hhayi ngobe tsine sitibona silungile.+ 19 Awu Jehova silalele. Awu Jehova sitsetselele.+ Sicela usinake futsi usisite Jehova! Ungephutisi Nkulunkulu wami, mane wentele libito lakho, ngobe lelidolobha lakho libitwa ngelibito lakho, futsi nalabantfu bakho babitwa ngalo.”+

20 Ngatsi ngisakhuluma, ngisathantaza futsi ngivuma sono sami kanye nesono sema-Israyeli futsi ngicela Jehova Nkulunkulu wami kutsi ayentele umusa intsaba yakhe lengcwele,+ 21 ngisesekhatsi nje nemthantazo, lendvodza lenguGabhriyeli+ lebengike ngayibona embonweni lowendlulile+ yefika kimi ngidzinwe kakhulu, futsi bekusikhatsi semnikelo wakusihlwa. 22 Yangichazela yatsi:

“Awu Danyela, ngitele kutokuniketa lwati nekucondza. 23 Ngesikhatsi ucala kuthantaza uncenga, mine ngitfole umlayeto kuNkulunkulu futsi nyalo sengite kutokutjela wona, ngobe wena uligugu kakhulu.*+ Ngako cabangisisa ngaloku lengitakutjela kona futsi ucondze lombono.

24 “Kunemaviki* langu-70 lamiselwe bantfu bakini nelidolobha lakini lelingcwele,+ kuze kucedvwe bubi, kucedvwe sono,+ kutsetselelwe emaphutsa,+ kuletfwe kulunga lokutawuhlala njalo,+ kucinisekiswe kutsi lemibono naletiphrofetho*+ tiliciniso, futsi iNgcwelengcwele inikelwe* kuNkulunkulu. 25 Kufanele ucondze futsi wati kutsi kusukela nakuphuma umyalo wekutsi kuvusetelwe iJerusalema+ futsi yakhiwe kabusha kuze kube ngulapho kufika Mesiya*+ longuMholi,+ kutawuba ngemaviki langu-7 kanye nemaviki langu-62.+ IJerusalema itawuvusetelwa futsi yakhiwe kabusha, ibe nemakethe futsi kugujwe nemsele, kodvwa loku kutawenteka ngesikhatsi sekucindzeteleka.

26 “Ngemuva kwalamaviki langu-62, Mesiya utawubulawa,+ futsi kute kwakhe lokutawusala.+

“Libutfo lemholi lotako litawubhubhisa lelidolobha kanye nendzawo lengcwele.+ Siphetfo sayo sitawufika njengesikhukhula. Kutawuba nemphi kuze kube sekugcineni; Nkulunkulu sewuncumile kutsi kutawuba nembhubhiso.+

27 “Ngenca yebantfu labanyenti, utawugcina* sivumelwane sisebenta liviki linye; kodvwa ehhafini yalelo viki utawucedza imihlatjelo neminikelo.+

“Loyo lobhubhisako utawuta aseluphikweni lwetintfo letenyanyekako;+ futsi loko lokuncunyiwe kutawutfululelwa kuloyo losele yedvwa kuze kube ngulapho acotfulwa.”

10 Ngemnyaka wesitsatfu wekubusa kweNkhosi Khuresi+ yasePheresiya, Danyela lobekabitwa ngekutsi nguBhelteshasari+ wembulelwa lokutsite; lomlayeto lawutfola bewuliciniso futsi bewumayelana nemphi lenkhulu. Wawucondza lomlayeto futsi wasitwa nekutsi akucondze loku labekubonile.

2 Ngaleso sikhatsi, besekuphele emaviki lamatsatfu mine Danyela solo ngilila.+ 3 Bengingatidli tibiliboco, ngingayidli inyama, ngingalinatsi neliwayini, futsi kwaphela emaviki lamatsatfu solo umtimba wami ngingawugcobisi ngemafutsa. 4 Ngelilanga lesi-24 enyangeni yekucala, ngesikhatsi ngiselusentseni lwemfula lomkhulu iThigrisi,*+ 5 ngatsi ngiyabuka ngabona indvodza legcoke timphahla telineni+ futsi elukhalo beyibophe libhande lelentiwe ngeligolide lase-Ufazi. 6 Umtimba wayo bewufana nekhrisolithe,+ buso bayo bebukhanya njengembane, emehlo ayo abefana netibane letivutsako, imikhono yayo netinyawo tayo betifana nelitfusi lelicwebetelako,+ futsi livi layo belivakala ngatsi ngumsindvo wesicumbi sebantfu. 7 Ngimi kuphela mine Danyela lowabona lombono; lamadvodza lebengikanye nawo awazange awubone.+ Kodvwa esaba kakhulu aze abaleka ayobhaca.

8 Ngagcine ngisele ngedvwa, futsi ngesikhatsi ngibona lombono lomangalisako, ngaphelelwa ngemandla ngaze ngashintja ngisho nasebusweni, ngacobeka wonkhe umtimba.+ 9 Ngemuva kwaloko ngeva lendvodza ikhuluma; kodvwa yatsi isakhuluma, ngafikelwa butfongo lobukhulu ngalala buso bami butsintse emhlabatsini.+ 10 Kwatsi kusenjalo kwaba khona sandla lesingitsintsako+ futsi sanginyakatisa, ngako ngavuka ngasima ngemadvolo nangetandla. 11 Lendvodza yabese itsi kimi:

“Awu Danyela, ndvodza leligugu kakhulu,*+ nakisisa lamavi lengitakutjela wona. Sukuma ume ngetinyawo, ngobe Nkulunkulu ungitfume kuwe.”

Yatsi nayisho njalo, ngasukuma ngichachatela.

12 Ngemuva kwaloko yatsi kimi: “Ungesabi+ Danyela, ngobe kusukela ngelilanga lowacala ngalo kutimisela kutsi ucondze letintfo futsi utitfobe kuNkulunkulu wakho, yena wawuva umthantazo wakho, kungako sengite lapha kuwe.+ 13 Kepha sikhulu+ sembuso wasePheresiya samelana nami emalanga langu-21. Kodvwa Mikhayeli,*+ longulesinye setikhulu letihamba embili,* weta kutongisita. Ngaleso sikhatsi bengisolo ngilapho, eceleni kwemakhosi asePheresiya. 14 Manje-ke sengitele kutokusita kutsi ucondze loko lokutawehlela bantfu bakini emalangeni ekugcina,+ ngobe lombono umayelana netintfo letitawenteka esikhatsini lesitako.”+

15 Yatsi naseyikushito konkhe loku, ngabheka phansi futsi ngangasakhoni nekukhuluma. 16 Ngemuva kwaloko, lotsite lonjengemuntfu watsintsa tindzebe temlomo wami,+ ngabese ngiyakhona kukhuluma futsi ngatsi kulona lobekeme embikwami: “Nkhosi, lombono uyangesabisa, sengize ngite ngisho nemandla.+ 17 Mine nceku yakho, ngingakhona njani kukhuluma nawe nkhosi yami?+ Angisenamandla, futsi angisakhoni nekuphefumula.”+

18 Lona lonjengemuntfu waphindze wangitsintsa futsi wangicinisa.+ 19 Wabese utsi kimi: “Ungesabi+ ndvodza leligugu kakhulu.*+ Shengatsi ungaba nekuthula.+ Cina ube nemandla.” Njengobe abechubeka akhuluma nami, ngativa senginemandla futsi ngatsi kuye: “Khuluma nkhosi yami ngobe sewungente ngaba nemandla.”

20 Wabese utsi: “Uyati yini kutsi ngiteleni lapha kuwe? Nyalo ngitawubuyela emuva ngiyokulwa nesikhulu sasePheresiya.+ Ngitawutsi nangisuka, kufike sikhulu saseGrisi. 21 Kodvwa-ke ngitakutjela tintfo letibhalwe encwadzini yeliciniso. Kute ngisho namunye longilekelelako kuloku ngaphandle kwaMikhayeli+ sikhulu senu.”+

11 Ngemuva kwaloko, lona lonjengemuntfu watsi: “Ngemnyaka wekucala wekubusa kwaDariyusi+ umMediya, mine ngasukuma kuze ngisekele Mikhayeli* futsi ngimcinise.* 2 Loku lengitakutjela kona nyalo kuliciniso:

“Kunalamanye emakhosi lamatsatfu latawuvela embusweni wasePheresiya, futsi inkhosi yesine itawunjinga kakhulu kunawo onkhe lalamanye. Itawutsi naseyinemandla ngenca yalomcebo wayo, inyakatise tonkhe tintfo kuze imelane nenkhosi yaseGrisi.+

3 “Kutawuvela inkhosi lenemandla futsi itawubusa ngemandla lamakhulu,*+ yente tintfo ngekutsandza kwayo. 4 Kodvwa naseyinemandla kakhulu, umbuso wayo utawufihlitwa futsi usakatelwe emagumbini lamane emhlaba.*+ Angeke wendluliselwe kubantfwana* bayo futsi angeke ube nemandla njengalapho kusabusa yona; ngobe umbuso wayo utawusishulwa uniketwe labanye bantfu.

5 “Inkhosi yaseningizimu, lebeyingulenye yetindvuna tayo,* itawuba nemandla; kodvwa kunemuntfu lotayehlula futsi abuse ngemandla lamakhulu kwendlula yona.

6 “Ngemuva kweminyaka letsite, batawenta sivumelwane, futsi indvodzakati yenkhosi yaseningizimu itawuya enkhosini yasenyakatfo kuze kucinisekiswe lesivumelwane. Kodvwa emandla emkhono walendvodzakati atawuphela; nemandla alenkhosi nawo atawuphela. Lendvodzakati, nalabo labayiletsa, nababe wayo kanye naloyo lowayenta yaba nemandla ngaleto tikhatsi, batawunikelwa kulabanye bantfu. 7 Kutawuvela umuntfu wakhabolendvodzakati lotawutsatsa sikhundla sababe wakhe,* futsi utawuhlasela libutfo, ahlasele nendzawo levikelekile yenkhosi yasenyakatfo, utawubahlasela futsi abancobe. 8 Utawutsatsa bonkulunkulu babo, tithico tabo tensimbi, netintfo tabo letiligugu letentiwe ngelisiliva nangeligolide kanye naloko lokutfunjiwe, aye nako eGibhithe. Kutawuphela iminyaka letsite angalwi nenkhosi yasenyakatfo. 9 Kodvwa inkhosi yasenyakatfo itawuhlasela umbuso wenkhosi yaseningizimu, kepha itawubuyela eveni layo.

10 “Emadvodzana ayo* atatilungiselela kuya emphini futsi ahlanganise ndzawonye libutfo lelikhulu lemphi. Itawuhamba iyohlasela lelive futsi ilikhukhule kuhle kwesikhukhula. Kodvwa itawubuyela emuva, ihambe ilwa ize iyofika endzaweni yayo levikelekile.

11 “Inkhosi yaseningizimu itawutfukutsela, ihambe iyokulwa nenkhosi yasenyakatfo, futsi lenkhosi yasenyakatfo itawubutsisa sicumbi lesikhulu kepha lesicumbi sitawunikelwa kulelenye.* 12 Lesicumbi sitawutsatfwa, futsi itawubese iyatiphakamisa enhlitiyweni yayo, icotfule emashumi etinkhulungwane. Itawuba nemandla kepha angeke ilisebentise kahle lelo tfuba.

13 “Inkhosi yasenyakatfo itawubuya futsi ibutsise sicumbi lesikhulu kakhulu kunakucala; ngemuva kwesikhatsi lesitsite, nasekuphele iminyaka letsite, itawuta nelibutfo lelikhulu, iphetse netintfo letinyenti. 14 Ngaleto tikhatsi, bantfu labanyenti batawumelana nenkhosi yaseningizimu.

“Emkhatsini webantfu bakini, labo labephula umtsetfo* batawuyengwa ngulabanye kutsi betame kwenta umbono ugcwaliseke, kodvwa batawehluleka.

15 “Inkhosi yasenyakatfo itawuta, ifike yakhe lubondza lwekuvimbetela futsi incobe lidolobha lelivikelekile. Emabutfo* aseningizimu angeke aphumelele, nemasotja akhona lanemandla kakhulu ngeke aphumelele; futsi angeke akhone kutivikela. 16 Loyo lotawuhlasela inkhosi yaseningizimu utawutentela matsandza futsi kute lotakuma embikwakhe. Utawuma* eVeni Lelihle+ futsi utawuba nemandla ekucotfula. 17 Utawuta ngekutimisela, ete nalo lonkhe libutfo lelinemandla lembuso wakhe, kodvwa utawenta sivumelwane naleyo nkhosi; ente loko lakucabangako. Utawuvunyelwa kutsi aletsele indvodzakati yemfati inhlekelele. Lendvodzakati angeke ime futsi angeke ichubeke ingeyakhe. 18 Utawuhlasela tindzawo letiseceleni kwelwandle futsi ancobe letinyenti. Kutawuba nendvuna yelibutfo letawucedza kutigcabha kwakhe, kuze ingahlazeki. Kepha itawenta kutsi kuhlazeke yena. 19 Utawubese ubuyela etindzaweni letivikelekile letiseveni lakhe, futsi utawugileka awe, bese uyanyamalala.

20 “Esikhundleni sakhe kutawuvela loyo lotawutfuma umtselisi* kutsi adzabule embusweni lokhatimulako, kodvwa utakufa ngemuva kwemalanga lambalwa, kepha angeke afe ngesibhuku nobe afele emphini.

21 “Sikhundla sakhe sitawubese sitsatfwa nguloyo lobukelwa phansi,* futsi angeke bamnike ludvumo lwembuso; utawufika ngesikhatsi sekuthula* futsi atsatse umbuso ngebucili.* 22 Utawuncoba emabutfo* lanjengesikhukhula, futsi atawubhujiswa; neMholi+ wesivumelwane+ utawufihlitwa. 23 Ngenca yesivumelwane lesentiwe naye, utawuchubeka akhohlisa, akhula futsi abe nemandla asebentisa sive lesinebantfu labambalwa. 24 Ngesikhatsi sekuthula* utakuya etindzaweni letinotsile* tesifundza futsi ente loko bokhokho bakhe labangazange sebakwente. Utawehlukanisela bantfu tintfo letebiwe naletitsetfwe emphini kanye nemphahla; futsi utawakha emacebo lamelene netindzawo letivikelekile, kodvwa kutawumane kube kwesikhashana.

25 “Utawulungisa libutfo lelikhulu futsi ngesibindzi ahlasele inkhosi yaseningizimu, nenkhosi yaseningizimu itawutilungiselela kuyokulwa, ihlanganise libutfo lelikhulu kakhulu nalelinemandla. Angeke aphumelele ngobe batamakhela emacebo lamelene naye. 26 Kodvwa labo labadla tibiliboco takhe batamwisa.

“Libutfo lakhe litawukhukhulwa futsi labanyenti batawubulawa.

27 “Tinhlitiyo talamakhosi lamabili titawufuna kwenta lokubi, futsi lamakhosi atawuhlala etafuleni linye ayengane. Kodvwa kute lokutawuphumelela, ngobe kuphela kutawufika ngesikhatsi lesimisiwe.+

28 “Inkhosi yasenyakatfo itawubuyela eveni layo iphetse tintfo letinyenti kakhulu, futsi inhlitiyo yayo itawube imelene nesivumelwane lesingcwele. Itawenta loko lekucabangako futsi ibuyele eveni layo.

29 “Ngesikhatsi lesibekiwe itawubuya futsi ihlasele live laseningizimu. Kodvwa ngaleso sikhatsi angeke kusafana nasekucaleni, 30 ngobe itawuhlaselwa yimikhumbi yaseKhithimu,+ futsi itfotjiswe.

“Itawubuyela emuva itfukutselele sivumelwane lesingcwele,+ yente loko lekucabangako; itawubuyela emuva inake labo labasishiyako sivumelwane lesingcwele. 31 Kutawuvela emabutfo* lasuka kuyo; edzelele indzawo lengcwele+ nendzawo levikelekile, asuse nemhlatjelo lokufanele wentiwe njalo.+

“Futsi atawubeka intfo leyenyanyekako lebangela imbhubhiso.+

32 “Inkhosi yasenyakatfo itawusebentisa bucili* kuze ibente tihlubuki labo labenta lokubi futsi labephula sivumelwane. Kodvwa bantfu labati Nkulunkulu wabo batawuphumelela futsi batawenta loko labakucabangako. 33 Labo labahlakaniphile+ emkhatsini webantfu batawenta labanyenti babe nekucondza. Batawugileka futsi bawe ngenkemba, bashiswe, batfunjwe, batsatselwe tintfo tabo, kepha loko kutawenteka emalanga latsite. 34 Kodvwa batawutsi nabagileka, baniketwe lusito loluncane; futsi labanyenti batawusebentisa bucili* kuze batihlanganise nabo. 35 Labanye kulabo labahlakaniphile batawugileka. Loku kutawenteka kuze kufike sikhatsi sekuphela, khona batawuhlanjululwa, bacwengwe futsi bashiywe bangenasici,+ ngobe loku kutawenteka ngesikhatsi lesimisiwe.

36 “Lenkhosi itawutentela matsandza, itikhukhumete futsi itiphakamise ngetulu kwabo bonkhe bonkulunkulu; itawukhuluma tintfo letetfusako ngaNkulunkulu lophakeme kunabo bonkhe labanye bonkulunkulu.+ Tintfo titayihambela kahle kuze kube ngulapho ijeziswa; ngobe kufanele kwenteke loko Nkulunkulu lakuncumile. 37 Angeke imhloniphe Nkulunkulu wabokhokho bayo; netifiso tebafati angeke itinake, futsi kute ngisho namunye nkulunkulu letamhlonipha, kodvwa itatiphakamisa ibe ngetulu kwabo bonkhe bantfu. 38 Esikhundleni saloko itawudvumisa nkulunkulu wetindzawo letivikelekile; itawudvumisa lonkulunkulu lobekangatiwa ngisho nabokhokho bayo, imdvumise ngeligolide nangelisiliva, ngematje laligugu nangetintfo letinhle.* 39 Itawuhlasela tindzawo letivikeleke kakhulu, isitwa ngulonkulunkulu lomusha.* Itawubanika ludvumo lolukhulu labo labayisekelako,* futsi itawubenta babuse bantfu labanyenti; ibehlukanisele umhlaba ube ngumvuzo wabo.

40 “Esikhatsini sekuphela, inkhosi yaseningizimu itawufucana nayo,* kodvwa inkhosi yasenyakatfo itayihlasela kuhle kwesivunguvungu, ite netinkalishi tayo, nemasotja lagibele emahhashi kanye nemikhumbi leminyenti; futsi itawufika emaveni ikhukhule konkhe kuhle kwesikhukhula. 41 Itawungena naseVeni Lelihle+ futsi incobe emave lamanyenti. Kodvwa bantfu baka-Edomu, bakaMowabi, kanye nebantfu labamcoka baka-Amoni batawusindza esandleni sayo. 42 Itawuchubeka ihlasela emave; futsi neGibhithe angeke idzabule. 43 Itawulawula ligolide nelisiliva lelifihliwe kanye nato tonkhe tintfo letiligugu taseGibhithe. Bantfu baseLibhiya nebaseTopiya batakwenta konkhe lokufunwa ngulenkhosi.*

44 “Kodvwa itawuphazanyiswa yimibiko levela emphumalanga nasenyakatfo, futsi itawuphuma itfukutsele kakhulu kuze icotfule labanyenti futsi ibabhubhise. 45 Itawumisa emathende ayo ebukhosi* emkhatsini welwandle lolukhulu nentsaba lengcwele yaseVeni Lelihle;+ futsi itawufika esiphetfweni sayo, kube bete nalongayisita.

12 “Ngaleso sikhatsi, kutawuvela* Mikhayeli,*+ losikhulu lesikhulu+ lesisita bantfu bakini.* Kutawuba nesikhatsi sekucindzeteleka lesingazange sesibe khona kusukela kwacala kuba khona sive kuze kube nguleso sikhatsi. Ngaleso sikhatsi, bonkhe bantfu bakini lokutawutfolakala emabito abo abhaliwe encwadzini yaNkulunkulu* batawusindza.+ 2 Bantfu labanyenti labafile* batawuvuka, labanye bavukele ekuphileni lokuphakadze kantsi labanye bavukele ehlazweni laphakadze.

3 “Labo labanekucondza batawukhanya njengekukhanya kwesibhakabhaka, futsi labo labasita bantfu labanyenti kutsi babe ngulabalungile, batawukhanya njengetinkhanyeti kuze kube phakadze naphakadze.

4 “Kodvwa wena Danyela, wagcine ayimfihlo lamavi futsi uvale lencwadzi kuze kube sikhatsi sekugcina.+ Labanyenti batayihlolisisa lencwadzi* futsi lwati lweliciniso lutawuba lunyenti.”+

5 Ngemuva kwaloko, mine Danyela ngatsi ngiyabuka ngabona labanye lababili beme embikwami, lomunye bekeme ngala elusentseni lwemfula kantsi lomunye bekeme kulololunye lusentse.+ 6 Lomunye wabo wakhuluma nalona lobekagcoke timphahla telineni+ futsi lobekeme etikwalomfula watsi: “Kutawutsatsa sikhatsi lesingakanani kutsi letintfo letimangalisako tenteke tize tifike ekugcineni?” 7 Ngabese ngiva lona lobekagcoke timphahla telineni futsi lobekeme etikwalomfula aphendvula. Njengobe abephendvula, waphakamisela sandla sakhe sangesekudla nesangesencele emazulwini futsi wafunga ngaNkulunkulu lophila phakadze+ watsi: “Kutawutsatsa sikhatsi lesimisiwe, tikhatsi letimisiwe, nehhafu yesikhatsi.* Ngekushesha nje nakuphela sikhatsi sekutsi kuphihlitwe emandla alabangcwele, tonkhe letintfo titawufika ekugcineni.”+

8 Ngakuva loko, kodvwa angizange ngikucondze,+ ngako ngatsi: “Awu nkhosi yami, utawuba yini umphumela wako konkhe loku?”

9 Wabese utsi kimi: “Hamba Danyela, ngobe lencwadzi kufanele uyivale futsi lamavi uwagcine ayimfihlo kuze kufike sikhatsi sekugcina.+ 10 Bantfu labanyenti batatihlambulula, bente lokulungile futsi bacwengwe.+ Bantfu lababi batawenta tintfo letimbi futsi kute ngisho namunye kubo lotawuba nekucondza; kodvwa labo labahlakaniphile batawuba nekucondza.+

11 “Kusukela nakususwa umhlatjelo lokufanele wentiwe njalo+ futsi kwabekwa intfo leyenyanyekako lebangela imbhubhiso,+ kutawuba ngemalanga langu-1 290.

12 “Uyajabula loyo lohlala alindzile* kuze kube sekugcineni kwemalanga langu-1 335.

13 “Kodvwa wena cinisela kuze kube sekugcineni. Utawuphumula, kepha nasesiphelile sikhatsi sekulindza kwakho, utawuvuka utfole sabelo* sakho.”+