INCWADZI LEYA KUBASEROMA

1 Mine Pawula, ngiyinceku yaKhristu Jesu leyabitelwa kuba ngumphostoli, naleyakhetfwa kutsi itomemetela tindzaba letimnandzi taNkulunkulu+ 2 latetsembisa kusukela ekucaleni, asebentisa baphrofethi bakhe emiBhalweni lengcwele. 3 Letindzaba timayelana neNdvodzana yakhe leyatalwa ingumuntfu ivela entalelwaneni* yaDavide,+ 4 kodvwa yavetwa iyiNdvodzana+ yaNkulunkulu ngemandla emoya longcwele ngesikhatsi ivuswa ekufeni.+ LeNdvodzana nguJesu Khristu iNkhosi yetfu. 5 Ngaye, semukela umusa lomkhulu waNkulunkulu nemsebenti wekuba baphostoli+ kuze bantfu bato tonkhe tive+ babe nekukholwa futsi balalele, ngaleyondlela badvumise ligama lakhe. 6 Nani nabitwa kubantfu betive kuze nibe baJesu Khristu. 7 Ngibhalela bonkhe labatsandzekako baNkulunkulu labaseRoma, futsi lababitelwe kutsi babe ngulabangcwele:

Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini lenguJesu Khristu.

8 Ngitsi angicale ngekubonga Nkulunkulu wami ngani nonkhe, ngimbonge ngeligama laJesu Khristu, ngobe kukholwa kwenu kukhulunywa ngako eveni lonkhe. 9 Nkulunkulu lengimentela umsebenti longcwele ngenhlitiyo yonkhe, ngekumemetela tindzaba letimnandzi letimayelana neNdvodzana yakhe uyati kutsi ngihlale nginithantazela,+ 10 ngimncenga kutsi nakungenteka, futsi kuvumelana nentsandvo yakhe, ngigcine ngiphumelele kufika kini. 11 Ngobe nginesifiso lesikhulu sekunibona kuze ngininike sipho lesivela kuNkulunkulu khona nitocina; 12 ngalamanye emagama ngisho kutsi sikhutsatane, nine ningikhutsate+ ngekukholwa kwenu nami nginikhutsate ngekukholwa kwami.

13 Bazalwane, yatini kutsi bengifuna kuta kini tikhatsi letinyenti kuze ngitfole imiphumela lemihle nakini njengobe bengiyitfola nakuletinye tive, kodvwa bengisolo ngivimbeleka kuze kube ngunyalo. 14 Ngikweleta emaGriki nebantfu bakuletinye tive,* labahlakaniphile nalabangakahlakaniphi. 15 Ngako ngiyakulangatelela kumemetela tindzaba letimnandzi nakini lapho eRoma.+ 16 Ngite emahloni ngetindzaba letimnandzi,+ ngobe ecinisweni tiyindlela lenemandla Nkulunkulu labasindzisa ngayo bonkhe labanekukholwa,+ kumaJuda kucala+ kulandzele emaGriki.+ 17 Ngobe ngekushunyayelwa kwetindzaba letimnandzi, kulunga kwaNkulunkulu kuvetwa ngekukholwa+ kwemuntfu futsi kukwenta kucine, njengobe kwabhalwa kwatsiwa: “Lolungile utawuphila ngenca yekukholwa.”+

18 Nkulunkulu uveta intfukutselo+ yakhe asezulwini, futsi uyivetela bonkhe bantfu labangamhloniphi nalabangakalungi labavimba liciniso+ ngetindlela letingakalungi, 19 ngesizatfu sekutsi loko bantfu labangase bakwati ngaNkulunkulu kubekwe ebaleni, ngobe ukwente kwacaca kubo.+ 20 Nanobe Nkulunkulu angabonakali, kepha kusukela ekudalweni kwelive kuchubeke, bantfu bakhonile kuwabona emandla+ akhe langapheli, babona nekutsi vele unguNkulunkulu,+ ngobe loku kuyabonakala etintfweni latidalile,+ ngako-ke bete taba. 21 Ngobe ngisho nobe bebamati Nkulunkulu kepha abazange bamdvumise nobe bambonge, esikhundleni saloko bacabanga tintfo letilite futsi tinhlitiyo tabo atizange ticondze.+ 22 Ngisho nobe bebatsi bahlakaniphile, baba ngulabangakahlakaniphi, 23 futsi esikhundleni sekutsi bakhatimulise Nkulunkulu lohlala phakadze, badvumisa imifanekiso yebantfu labafako, yetinyoni, yetilwane letinetinyawo letine neyetilwane letihumako.+

24 Ngako Nkulunkulu wabayekelela ebubini ngekuvumelana netifiso tetinhlitiyo tabo kuze imitimba yabo ingcoliswe. 25 Bakhetsa kukholwa emanga kunekutsi bakholwe liciniso lelivela kuNkulunkulu, badvumisa indalo futsi bayikhonta kunekutsi bakhonte uMdali, lokunguye lokufanele advunyiswe phakadze. Amen. 26 Kungako Nkulunkulu abayekelela etinkhanukweni tabo letilihlazo,+ ngobe labasikati sebasebentisa imitimba yabo ngendlela lephambene nemvelo,+ 27 nalabadvuna abasayisebentisi imitimba yabo kulabasikati,* kodvwa sebashiswa kukhanukana bodvwa. Indvodza seyikhanuka lenye indvodza,+ futsi benta lokulichilo. Ngako batfola sijeziso lesibafanele ngenca yekona+ kwabo.

28 Njengobe bebangafuni kumati kahle Nkulunkulu, wabayekelela ekucabangeni kwabo lokungemukeleki kuye, kuze bente tintfo letingakafaneli.+ 29 Bagcwele kungalungi,+ kona, bukhali,*+ bubi, umona,+ kubulala,+ kubanga, kukhohlisa,+ tinhlitiyo letimbi,+ kuhleba, 30 kunyundzela,+ kutondza Nkulunkulu, kwedzelela, kutigcabha, kutigabatisa, kwenta emacebo etintfo letimbi, kungalaleli batali,+ 31 kungacondzi,+ kungatigcini tivumelwane, kuba bete lutsandvo nekuba bete sihawu. 32 Nanobe bawati kahle umtsetfo lolungile waNkulunkulu lotsi bantfu labenta tintfo letinjalo bafanelwe kufa,+ kepha abagcini nje ngekutenta kuphela, kodvwa basekela nalabo labatentako.

2 Ngako-ke nangabe wena wehlulela labanye, ute taba ngisho nobe ungubani.+ Ngobe nawehlulela lomunye umuntfu kodvwa wena ube wenta letintfo latentako, usuke utilahla wena.+ 2 Siyati kutsi Nkulunkulu ubehlulela ngekuvumelana neliciniso labo labenta tintfo letinjalo.

3 Ucabanga kutsi ungakhona yini kubalekela kwehlulelwa nguNkulunkulu nangabe wehlulela lomunye umuntfu, kodvwa nawe ube wenta letintfo latentako? 4 Ububukela phansi yini bukhulu bemusa wakhe,+ kutibamba+ kwakhe kanye nekubeketela+ kwakhe, ngobe ungati kutsi ngalomusa wakhe, Nkulunkulu ufuna kukwenta uphendvuke?+ 5 Kodvwa ngenca yenkhani nebulukhuni benhlitiyo yakho, utibekela lulaka ngelilanga laNkulunkulu lentfukutselo nelekwehlulela ngekulunga.+ 6 Yena utawunika umuntfu ngamunye umvuzo, kuye ngemisebenti yakhe.+ 7 Utawubanika kuphila lokuphakadze labo labafuna inkhatimulo, neludvumo, nekungonakali,+ ngobe bachubeka benta tintfo letinhle; 8 kodvwa labo labatsandza imibango, nalabenta tintfo letingavumelani neliciniso, futsi labenta lokungakalungi batawutfola intfukutselo nelulaka+ lwaNkulunkulu. 9 Wonkhe umuntfu lowenta lokubi utawuhlupheka futsi acindzeteleke, kucale kumaJuda kulandzele emaGriki; 10 kodvwa wonkhe umuntfu lowenta lokuhle utawutfola inkhatimulo, ludvumo, nekuthula, kucale kumaJuda+ kulandzele emaGriki,+ 11 ngobe Nkulunkulu akakhetsi.+

12 Bonkhe labona bete umtsetfo batakufa bete umtsetfo;+ kodvwa bonkhe labona banemtsetfo batawehlulelwa ngemtsetfo.+ 13 Labalungile emehlweni aNkulunkulu akusibo labo labeva umtsetfo, kodvwa labo labaphila ngekuvumelana nemtsetfo ngibo lokutawutsiwa balungile.+ 14 Ngobe nangabe kutentakalela kutsi bantfu betive labete umtsetfo+ bente tintfo letivumelana nemtsetfo, ngisho nobe bete umtsetfo, baveta kutsi banawo etingcondvweni tabo. 15 Imisebenti yabo ikhombisa kutsi loko lokufunwa ngumtsetfo kubhaliwe etinhlitiyweni tabo, nanembeza wabo uvumelana nabo, futsi imicabango yabo iyabalahla nobe ibavumele. 16 Loku kutawenteka ngelilanga lapho Nkulunkulu atawusebentisa khona Khristu Jesu kuze ehlulele tintfo letifihlekile tebantfu,+ ngekuvumelana netindzaba letimnandzi lengitimemetelako.

17 Wena utibita ngekutsi ungumJuda,+ ulalela umtsetfo, utigabatisa ngaNkulunkulu, 18 uyayati nentsandvo yakhe, futsi utsandza tintfo letinhle ngobe ufundziswe* ngeMtsetfo,+ 19 ukholelwa kutsi wena ungumholi walabangaboni emehlweni, nekutsi ukukhanya kwalabo labasebumnyameni, 20 ucecesha labo labete ingcondvo, ufundzisa bantfwana, futsi unesisekelo selwati neseliciniso leliseMtsetfweni. 21 Pho njengobe ufundzisa labanye, wena awutifundzisi ngani?+ Wena loshumayela utsi: “Ungebi,”+ awebi yini? 22 Wena lotsi: “Ungaphingi,”+ awuphingi yini? Wena lowenyanya tithico, ugcekeza emathempeli yini? 23 Wena lotigabatisa ngemtsetfo, wedzelela Nkulunkulu yini ngekwephula uMtsetfo? 24 Ngobe “libito laNkulunkulu liyahlanjalatwa kubantfu betive ngenca yenu,” njengobe nje kubhaliwe.+

25 Kusoka+ kuzuzisa kuphela nangabe ulandzela umtsetfo,+ kodvwa nangabe uwephula, kusoka kwakho kuvele kufane nekungasoki. 26 Angitsi nangabe umuntfu longakasoki+ enta loko lokufunwa nguMtsetfo, kungasoki kwakhe kuvele kufane nekusoka?+ 27 Ngekugcina uMtsetfo, umuntfu longakasoki enyameni utanehlulela, ngobe nine nephula uMtsetfo nanobe nibhalelwe wona futsi nisokile. 28 Umuntfu longumJuda ngephandle+ akasuye umJuda mbamba, nekusoka akusiko kwangaphandle enyameni.+ 29 Umuntfu longumJuda enhlitiyweni+ usuke angumJuda mbamba, futsi usuke asoke enhlitiyweni+ ngemoya longcwele, hhayi ngemtsetfo lobhalwe phansi.+ Loyo muntfu akadvunyiswa bantfu kodvwa udvunyiswa nguNkulunkulu.+

3 Kuzuzisa ngani kuba ngumJuda, futsi kusita ngani kusoka? 2 Kuzuzisa kakhulu, ngobe kwekucala emaJuda anikwe emavi langcwele aNkulunkulu.+ 3 Kutsiwani nangabe lamanye emaJuda angazange akholwe? Kweswela kwawo kukholwa bekungenta bantfu bangasametsembi yini Nkulunkulu? 4 Cha! Nkulunkulu utawuhlala etsembekile+ ngisho nobe bonkhe bantfu banemanga,+ njengobe nje kubhaliwe kwatsiwa: “Emavi akho atawukhombisa kutsi ulungile futsi nawubekwa licala utawutfolakala umsulwa.”+ 5 Kodvwa kutsiwani-ke nangabe kungalungi kwetfu kwenta kulunga kwaNkulunkulu kubonakale? Nkulunkulu usuke angakalungi yini nakaveta intfukutselo yakhe? (Loku lengikushoko yindlela bantfu labacabanga ngayo.) 6 Cha! Nakunjalo, Nkulunkulu bekatawehlulela njani umhlaba?+

7 Nangabe ngicala emanga, futsi loko kwente liciniso laNkulunkulu ligcame kakhulu kuze akhatinyuliswe, kungani-ke ngehlulelwa njengesoni? 8 Anikhulumi ngani njengalabanye bantfu labasicalela emanga, batsi sitsi: “Asenteni tintfo letimbi kuze sitotfola lokuhle”? Kwehlulelwa lokutfolwa ngulabo bantfu kusuke kubafanele.+

9 Sincono yini tsine? Cha! Ngobe sengishito kutsi onkhe emaJuda nemaGriki anesono;+ 10 njengobe nje kubhaliwe kutsi: “Kute ngisho namunye umuntfu lolungile;+ 11 kute lonekucondza, futsi kute nalofuna Nkulunkulu. 12 Bonkhe bantfu bayekele kwenta lokuhle futsi bonkhe abasiti ngalutfo; kute ngisho namunye kubo lonemusa.”+ 13 “Imiphimbo yabo injengemathuna lavulekile; bayakhohlisa ngelulwimi lwabo.”+ “Tintfo labatikhulumako tilimata njengesihlungu setinyoka.”+ 14 “Imilomo yabo igcwele kucalekisa netintfo letibabako.”+ 15 “Tinyawo tabo tiyashesha kuyobulala.”*+ 16 “Bahlale balimata labanye bantfu futsi babahlupha, 17 abayati nendlela yekuba nekuthula+ nalabanye.” 18 “Abamesabi Nkulunkulu.”+

19 Nyalo sesiyati kutsi tonkhe tintfo letishiwo nguMtsetfo tisuke ticondzene nalabo labangephansi kwawo, kuze kube bete umuntfu lotsi umsulwa, nelive lonkhe litewutilandzisela kuNkulunkulu, khona litojeziswa.+ 20 Kute umuntfu* lokungatsiwa ulungile embikwaNkulunkulu ngekwenta imisebenti lefunwa ngumtsetfo,+ ngobe umtsetfo usenta sisati kahle sono.+

21 Kodvwa nyalo sesiyati kutsi kulunga emehlweni aNkulunkulu akutfolakali ngekugcina umtsetfo,+ futsi loku kufakazelwa nguMtsetfo nebaPhrofethi.+ 22 Bonkhe labanekukholwa bangaba ngulabalungile emehlweni aNkulunkulu ngekukholwa kwabo kuJesu Khristu, ngobe Nkulunkulu akakhetsi.+ 23 Bonkhe bonile, futsi abakwati kuveta inkhatimulo yaNkulunkulu.+ 24 Kusipho+ kubo kutsi kutsiwe balungile ngemusa wakhe lomkhulu+ ngenca yekukhululwa yinhlawulo leyakhokhwa nguKhristu Jesu.+ 25 Nkulunkulu wanikela ngaye kuze bantfu babuyisane+ naye ngekutsi bakholwe engatini+ yaKhristu. Loku wakwenta kuze avete kulunga kwakhe, ngobe uyabeketela futsi uyatitsetselela tono letentiwe esikhatsini lesengcile, 26 wakwentela nekutsi avete kulunga+ kwakhe kulesikhatsi sanyalo, kuze kubonakale kutsi yena ulungile nekutsi wonkhe umuntfu lokholwa kuJesu umtsatsa njengalolungile.+

27 Umuntfu angatigabatisa yini? Cha ngeke. Ngumuphi umtsetfo lomvimbela kutsi atigabatise? Nguloyo lotsi loko lakwentako kubalulekile yini?+ Cha, kodvwa nguloyo lotsi kufanele akholwe. 28 Ngobe siyati kutsi umuntfu kutsiwa ulungile ngenca yekukholwa kwakhe, hhayi ngekwenta loko lokufunwa ngumtsetfo.+ 29 Kantsi Nkulunkulu wemaJuda kuphela yini?+ Akasuye yini naNkulunkulu webantfu betive?+ Yebo uphindze abe nguNkulunkulu webantfu betive.+ 30 Ngesizatfu sekutsi Nkulunkulu munye,+ utawutsi bantfu labasokile balungile+ ngenca yekukholwa kwabo, nalabo labangakasoki utawutsi balungile+ ngenca yekukholwa kwabo. 31 Siyawucedza yini umtsetfo ngekukholwa kwetfu? Cha! Esikhundleni saloko siyawugcina.+

4 Pho singatsini-ke ngakhokho wetfu Abrahama lesivela kuye? Watfolani? 2 Kube Abrahama kwatsiwa ulungile ngenca yemisebenti, bekatawuba nesizatfu sekutigabatisa. Kodvwa bekangeke atigabatise embikwaNkulunkulu. 3 Utsini umbhalo? Utsi: “Abrahama wakholwa kuJehova,* ngako kwatsiwa ulungile.”+ 4 Umuntfu losebentako utfola umvuzo wakhe, hhayi ngobe entelwa umusa lomkhulu, kodvwa uwutfola ngobe awufanele.* 5 Ngakulokunye, umuntfu longetsembeli emisebentini yakhe, kodvwa lowetsembela kuLoyo lotsi bantfu lababi balungile, kutawutsiwa ulungile ngenca yekukholwa kwakhe.+ 6 NaDavide wakhuluma ngenjabulo letfolwa ngumuntfu Nkulunkulu latsi ulungile nanobe angakwenti konkhe lokushiwo ngumtsetfo, watsi: 7 “Bayajabula labo labatsetselelwe tento tabo letimbi, nalabo labatsetselelwe tono tabo;* 8 uyajabula umuntfu Jehova* langeke aze ambalele sono sakhe.”+

9 Lenjabulo itfolwa ngulabasokile kuphela yini, nobe nalabo labangakasoki bayayitfola?+ Ngobe sitsi: “Abrahama kwatsiwa ulungile ngenca yekukholwa kwakhe.”+ 10 Kwashiwo nini kutsi ulungile? Ngesikhatsi sekasokile yini nobe ngesikhatsi asengakasoki? Kwashiwo ngesikhatsi asengakasoki. 11 Wanikwa luphawu+ lolukusoka, lolwaba sicinisekiso sekutsi kutsiwe ulungile ngekukholwa lebekanako ngesikhatsi asengakasoki, kuze abe ngubabe wabo bonkhe lababa nekukholwa+ ngisho bangakasoki, khona nabo kutawutsiwa balungile; 12 futsi aphindze abe ngubabe webantfwana labasokile, hhayi nje labo labasoke enyameni, kodvwa nalabo labahamba ngendlela lefanele etinyatselweni tababe wetfu Abrahama,+ ngobe naye bekanekukholwa ngesikhatsi asengakasoki.

13 Abrahama nentalelwane* yakhe abazange banikwe setsembiso sekuba tindlalifa telive+ ngenca yemtsetfo, kodvwa bekungenca yekutsi kwatsiwa balungile ngekukholwa kwabo.+ 14 Ngobe nangabe labo labagcina umtsetfo batindlalifa, kukholwa akusenamsebenti, nalesetsembiso sesiphelile. 15 Ecinisweni, uMtsetfo wenta umuntfu afanelwe yintfukutselo+ yaNkulunkulu, kodvwa nakute umtsetfo, kute nekuwephula.+

16 Ngako lesetsembiso saba khona ngenca yekukholwa kuze sitocinisekiswa kuyo yonkhe intalelwane*+ yakhe, futsi loko bekungenca yemusa lomkhulu+ waNkulunkulu, hhayi kulabo labagcina uMtsetfo kuphela kodvwa nakulabo labanekukholwa lokufana nekwa-Abrahama, longubabe wetfu sonkhe.+ 17 (Kunjengobe nje kwabhalwa kwatsiwa: “Ngikukhetsele kutsi ube ngubabe wetive letinyenti.”)+ Lesetsembiso sentiwa nguNkulunkulu, loyo Abrahama lebekakholwa kuye, futsi lovusa bantfu labafile, nalokhuluma ngetintfo letisengekho kube shengatsi tikhona.* 18 Kodvwa Abrahama wetsemba nanobe bekete sizatfu sekuba nelitsemba, wakholwa kutsi utawuba ngubabe wetive letinyenti njengobe kwakushiwo nakutsiwa: “Batawuba ngako-ke nebantfwana* bakho.”+ 19 Ngisho nobe kukholwa kwakhe kungazange kunciphe, kepha wabona kutsi umtimba wakhe sekufana nekutsi ufile (ngobe besekaneminyaka lengaba ngu-100 budzala),+ kantsi naSara bekangabatfoli bantfwana.*+ 20 Kodvwa ngenca yesetsembiso saNkulunkulu wakholwa futsi akazange angabate, futsi wacina ngenca yekukholwa kwakhe, wakhatimulisa Nkulunkulu. 21 Bekaciniseka kutsi loko Nkulunkulu bekametsembise kona utawukhona kukwenta.+ 22 Ngako “kwatsiwa ulungile.”+

23 Nanobe kunjalo, lamavi latsi “kwatsiwa ulungile” akazange abhalelwe yena kuphela,+ 24 kodvwa abhalelwa natsi lokutawutsiwa silungile ngobe siyakholwa kuLoyo lowavusa Jesu iNkhosi yetfu ekufeni,+ 25 lowanikelwa ngenca yetono tetfu+ futsi wavuswa kuze kutsiwe silungile.+

5 Njengobe nyalo sekutsiwe silungile ngenca yekukholwa,+ asibe nekuthula* naNkulunkulu ngeNkhosi yetfu Jesu Khristu,+ 2 lesitfole ngayo umusa lomkhulu ngekukholwa,+ futsi asijabule* ngobe sinelitsemba lekutfola inkhatimulo yaNkulunkulu. 3 Asingagcini ngaloko, kodvwa asijabule* nasihlupheka,+ ngobe siyati kutsi kuhlupheka kuveta kucinisela;+ 4 kucinisela kusenta semukeleke+ kuNkulunkulu; kwemukeleka kuNkulunkulu kona kusinika litsemba,+ 5 futsi litsemba alisidvumati,+ ngobe lutsandvo Nkulunkulu lanalo ngatsi lugcwaliswe etinhlitiyweni tetfu ngemoya longcwele lesanikwa wona.+

6 Ngobe ngesikhatsi sisebutsakatsaka,+ Khristu wafela bantfu labangamesabi Nkulunkulu, futsi loku kwenteka ngesikhatsi lesibekiwe. 7 Akukavami kutsi lotsite afele umuntfu lolungile; mhlawumbe lotsite angamfela umuntfu lowenta lokuhle. 8 Kodvwa Nkulunkulu ukhombisa lutsandvo lwakhe kitsi, ngobe ngesikhatsi sisetoni, Khristu wasifela.+ 9 Kakhulu kangakanani-ke nyalo njengobe sekutsiwe silungile ngengati yakhe,+ sitawusindziswa ngaye elulakeni+ lwaNkulunkulu. 10 Ngobe nangabe ngesikhatsi sisetitsa, sabuyisana naNkulunkulu ngekufa kweNdvodzana yakhe,+ nyalo-ke njengobe sesibuyisene naye, singaciniseka kakhulu kutsi sitawusindziswa ngekuphila kwayo. 11 Akusiko loko kuphela, kodvwa futsi siyajabula ngebuhlobo lesinabo naNkulunkulu ngeNkhosi yetfu Jesu Khristu, leyente kutsi sikhone kubuyisana+ naNkulunkulu.

12 Ngako sono sangena ngemuntfu munye eveni, nekufa kwangena ngesono,+ ngenca yaloko kufa kwasakatekela kubo bonkhe bantfu ngobe bonkhe bonile.+ 13 Ngobe sono saba khona eveni usengakabi khona uMtsetfo, kodvwa kute lokutsiwa unesono nangabe umtsetfo ungekho.+ 14 Nanobe kunjalo, kufa kwabusa njengenkhosi kusukela ku-Adamu kuze kuyofika kuMosi, ngisho nakulabo labangonanga njenga-Adamu. Adamu bekafana ngetindlela letitsite naloyo lobeketa.+

15 Kodvwa sono asifani nesipho saNkulunkulu. Ngobe nangabe ngekona kwemuntfu munye kwafa bantfu labanyenti, ngendlela lefanako umusa lomkhulu waNkulunkulu nesipho sakhe kanye nemusa lomkhulu wemuntfu munye,+ longuJesu Khristu, kubazuzise* kakhulu bantfu labanyenti.+ 16 Lesipho asifani nesono lesentiwa ngumuntfu munye.+ Ngobe umphumela wesono sinye waba kulahlwa,+ kodvwa sipho lesaba khona ngemuva kwetono letinyenti saba kutsi kutsiwe bantfu balungile.+ 17 Nangabe ngesono semuntfu munye kufa kwabusa njengenkhosi,+ kakhulu kangakanani-ke ngalabo labatfola umusa lomkhulu waNkulunkulu nesipho labaphe sona sekutsi kutsiwe balungile,+ ngobe ngenca yemuntfu munye, longuJesu Khristu,+ batawuphila futsi babe ngemakhosi.+

18 Ngesono sinye, bantfu bato tonkhe tinhlobo balahlwa ngelicala,+ ngendlela lefanako, ngesento sinye lesilungile, bantfu bato tonkhe tinhlobo+ kutawutsiwa balungile kuze batfole kuphila.+ 19 Ngobe njengobe ngekungalaleli kwemuntfu munye bantfu labanyenti baba toni,+ ngendlela lefanako, ngekulalela kwemuntfu munye bantfu labanyenti kutawutsiwa balungile.+ 20 UMtsetfo waba khona kuze sono sibonakale.+ Kodvwa kwatsi nasesibonakele, umusa lomkhulu waNkulunkulu nawo wabonakala kakhulu. 21 Ngayiphi injongo? Ngobe njengobe sono kanye nekufa+ bekubusa njengenkhosi, ngendlela lefanako nemusa lomkhulu waNkulunkulu utawubusa njengenkhosi ngenca yekulunga kuze bantfu batfole kuphila lokuphakadze ngaJesu Khristu iNkhosi yetfu.+

6 Singatsini-ke? Kufanele sichubeke sona yini kuze umusa lomkhulu waNkulunkulu ubonakale? 2 Cha! Njengobe sesikhululekile esonweni,*+ akukafaneli sichubeke siphila kuso.+ 3 Anati yini kutsi sonkhe tsine lesabhajatiswa kuKhristu Jesu+ besibhajatiselwa ekufeni kwakhe?+ 4 Ngako sangcwatjwa naye ngekubhajatiselwa ekufeni+ kwakhe, kuze kutsi njengobe naKhristu avuswa ekufeni ngenkhatimulo yaBabe, natsi ngalokufanako siphile imphilo lensha.+ 5 Nangabe sibe munye naye ekufeni+ lokufana nekwakhe, nakanjani sitawuba munye naye ekuvusweni+ lokufana nekwakhe. 6 Ngenca yekutsi siyati kutsi buntfu betfu lobudzala babetselwa naye elugodvweni,+ kuze imitimba yetfu lenesono ibe bete emandla,+ khona singatochubeka sitigcili tesono.+ 7 Ngobe umuntfu lofile ukhululiwe* esonweni sakhe.

8 Ngetulu kwaloko, nangabe sife naKhristu siyakholwa kutsi sitawuphindze siphile naye. 9 Ngobe siyati kutsi njengobe Khristu sekavusiwe ekufeni,+ ngeke asafa;+ kufa sekute emandla etikwakhe. 10 Wafa kwaba kanye kuphela kuze asuse sono,+ futsi uyaphila kuze ente intsandvo yaNkulunkulu. 11 Ngalokufanako, nani titsatseni njengalabafile esonweni, kodvwa nititsatse njengalabaphilako kuNkulunkulu, ngaKhristu Jesu.+

12 Ngako-ke, ningasivumeli sono kutsi sichubeke sibusa njengenkhosi emitimbeni yenu lefako,+ kuze ningenti lokufiswa ngiyo. 13 Ningayinikeli imitimba* yenu esonweni ibe tikhali tekungalungi, kodvwa tinikeleni kuNkulunkulu kube ngatsi nivuswe ekufeni, ninikele nemitimba* yenu kuye ibe tikhali tekulunga.+ 14 Akukafaneli nibuswe sono ngobe anisekho ngephansi kweMtsetfo+ kodvwa senitfole umusa lomkhulu+ waNkulunkulu.

15 Kusho kutsini loku? Kufanele sone yini ngenca yekutsi asikho ngephansi kwemtsetfo kodvwa sesitfole umusa lomkhulu+ waNkulunkulu? Cha! 16 Anati yini kutsi nangabe nitinikela kulotsite kuze nibe tigcili letilalelako, nisuke nitigcili taloyo muntfu lenimlalelako,+ kungaba kutsi nitigcili tesono+ lesiholela ekufeni+ nobe nitigcili tekulalela lokuholela ekulungeni? 17 Kepha akabongwe Nkulunkulu ngekutsi nanobe nake naba tigcili tesono, kodvwa seniyilalela ngalokusuka enhlitiyweni lemfundziso lenanikwa yona. 18 Njengobe nakhululwa esonweni,+ senaba tigcili tekulunga.+ 19 Ngenca yebutsakatsaka bemitimba yenu ngikhuluma emavi labawetayele bantfu, kutsi njengobe nanikela ngemitimba yenu kutsi ibe tigcili tekungcola nebubi kuze nente lokubi, nyalo nikelani ngemitimba yenu kutsi ibe tigcili tekulunga lokuholela ekubeni ngcwele.+ 20 Ngesikhatsi nisetigcili tesono, benikhululekile kutsi nente lokungakalungi.

21 Ngaleso sikhatsi, ngumuphi umvuzo lebeniwutfola ngetintfo lebenitenta? Kwaba tintfo leseninemahloni ngato. Ngobe umphumela waleto tintfo kufa.+ 22 Nanobe kunjalo, njengobe senikhululiwe esonweni futsi senitigcili taNkulunkulu, nitfola umvuzo wekuba ngcwele,+ bese kutsi ekugcineni nitfole kuphila lokuphakadze.+ 23 Ngobe umvuzo wesono kufa,+ kodvwa sipho Nkulunkulu lasinika sona, kuphila lokuphakadze+ ngaKhristu Jesu iNkhosi yetfu.+

7 Bazalwane, kungenteka yini kutsi anati (ngobe ngikhuluma nalabo labati umtsetfo) kutsi umuntfu ubuswa nguMtsetfo yingci nje nakasaphila? 2 Nasi sibonelo: Ngekusho kwemtsetfo, umfati loshadile ubophekile endvodzeni yakhe nayisaphila; kodvwa nangabe indvodza yakhe seyifile, sewukhululiwe emtsetfweni wayo.+ 3 Ngako nangabe indvodza yakhe isaphila, kutawutsiwa uyaphinga nakashada nalenye indvodza.+ Kodvwa nangabe seyifile indvodza yakhe, usuke sekakhululekile emtsetfweni wayo, kangangekutsi ngeke kutsiwe uyaphinga nakashada nalenye indvodza.+

4 Ngemtimba waKhristu, nani bazalwane naba ngulabafile eMtsetfweni, kuze nibe baKhristu, loyo lowavuswa ekufeni,+ khona sitotsela titselo letikhatimulisa Nkulunkulu.+ 5 Ngobe ngesikhatsi sisaphila ngekuvumelana nenyama, tifiso letisono letavetwa nguMtsetfo betisebenta emitimbeni* yetfu kuze sitsele titselo letiletsa kufa.+ 6 Nyalo sesikhululiwe eMtsetfweni,+ ngobe sesafa kuloko lebesiboshelwe kuko, kuze sibe tigcili, hhayi ngobe sicondziswa ngumtsetfo lobhalwe phansi,+ kodvwa ngenca yekutsi sicondziswa ngumoya.+

7 Singatsini-ke? UMtsetfo usono yini? Cha awusiso! Ngobe ngaphandle kwawo, ngabe angikasati sono, futsi ngabe angati kutsi kuyini kuhawukela kube uMtsetfo+ awushongo kutsi: “Ungahawukeli.”+ 8 Kodvwa sono satfola litfuba ngemtsetfo, senta kutsi kubonakale tonkhe tinhlobo tekuhawukela lebenginato, ngobe ngaphandle kwemtsetfo sono besifile.+ 9 Ecinisweni ngake ngaphila ngaphandle kwemtsetfo, kodvwa kwatsi lapho umtsetfo ufika, sono saphindze saphila, kepha mine ngafa.+ 10 Ngatfola kutsi lomtsetfo lobekufanele uholele ekuphileni,+ uholela ekufeni. 11 Ngobe sono satfola litfuba ngemtsetfo futsi sangiyenga saphindze sangibulala ngawo. 12 Ngako uMtsetfo ungcwele, nemyalo nawo ungcwele, ulungile futsi muhle.+

13 Ngako-ke, lokuhle ngiko yini lokwabangela kutsi ngife? Cha! Sono ngiso lesabangela loko ngekutsi sisebentise lokuhle+ kuze siletse kufa kimi, futsi sivete naloko lesingiko. Ngaleyondlela, umtsetfo waveta kutsi sono sibi kakhulu.+ 14 Ngobe tsine siyati kutsi uMtsetfo uvela kuNkulunkulu, kodvwa mine ngiyinyama, futsi ngitsengiswe esonweni.+ 15 Angikucondzi kahle loko lengikwentako. Ngobe loko lengifisa kukwenta angikwenti, kodvwa loko lengikutondzako ngiko lengikwentako. 16 Nanobe kunjalo, nangabe loko lengingakufisi kungiko lengikwentako, ngiyavuma kutsi uMtsetfo muhle. 17 Ngobe akusasimi lowenta loko, kodvwa kwentiwa sono lesikimi.+ 18 Ngiyati kutsi kimi, lokusho kutsi enyameni yami, kute lokuhle lokukhona; ngobe nginaso sifiso sekwenta lokuhle kodvwa angikhoni kukwenta.+ 19 Lokuhle lengifisa kukwenta angikwenti, kodvwa ngenta lokubi lengingafisi kukwenta. 20 Ngako-ke nangabe ngenta loko lengingafisi kukwenta, kusuke kungasimi lokwentako, kodvwa kusuke kusono lesikimi.

21 Kimi ngikhandza kutsi kunanangu umtsetfo: Nangifisa kwenta lokulungile, kunalokubi kimi.+ 22 Ngiyajabula ngemtsetfo waNkulunkulu ngenca yemuntfu lenginguye ngekhatsi,+ 23 kodvwa ngibona lomunye umtsetfo emtimbeni* wami, lolwisana nemtsetfo losengcondvweni yami,+ futsi ungenta sigcili semtsetfo wesono+ losemtimbeni* wami. 24 Maye mine muntfu lohluphekako! Ngubani lotangikhulula kulomtimba lofako? 25 Akabongwe Nkulunkulu ngaJesu Khristu iNkhosi yetfu! Engcondvweni yami ngisigcili semtsetfo waNkulunkulu, kodvwa enyameni ngisigcili semtsetfo wesono.+

8 Ngako-ke, labo labamunye naKhristu Jesu abalahlwa ngelicala. 2 Ngobe umtsetfo wemoya lonika kuphila ebunyeni naKhristu Jesu, unikhululile+ emtsetfweni wesono newekufa. 3 Loko uMtsetfo lowehluleka kukwenta+ ngenca yekuba butsakatsaka+ kwenyama, Nkulunkulu wakwenta ngekutfumela iNdvodzana yakhe+ leyeta injengebantfu labanesono*+ kuze itosusa sono enyameni, 4 khona loko lokulungile lokufunwa nguMtsetfo kutogcwaliseka kitsi+ tsine lesicondziswa ngumoya, hhayi inyama.+ 5 Ngobe labo labacondziswa yinyama banaka tintfo tenyama,+ kodvwa labo labacondziswa ngumoya banaka tintfo temoya.+ 6 Kunaka tintfo tenyama kuletsa kufa,+ kodvwa kunaka tintfo temoya kuletsa kuphila nekuthula;+ 7 ngobe kunaka tintfo tenyama kubangela umuntfu kutsi abe sitsa naNkulunkulu,+ ngenca yekutsi inyama ayiwutfobeli umtsetfo waNkulunkulu, futsi ecinisweni angeke seyikhone kuwutfobela. 8 Ngako-ke labo labacondziswa yinyama ngeke bamjabulise Nkulunkulu.

9 Nanobe kunjalo, nangabe umoya waNkulunkulu uhlala kini, nisuke nicondziswa ngumoya+ hhayi inyama. Kodvwa nangabe umuntfu ete umoya waKhristu, usuke angasuye waKhristu. 10 Nangabe Khristu amunye nani,+ umtimba usuke ufile ngenca yesono, kodvwa umoya uninika kuphila, ngobe kutsiwe nilungile. 11 Nangabe umoya waloyo lowavusa Jesu ekufeni uhlala kini, loyo lowavusa Khristu Jesu utawuphindze ente imitimba yenu lefako iphile+ ngemoya wakhe lohlala kini.

12 Ngako-ke bazalwane sibophekile, kodvwa asikaboshwa yinyama+ kutsi siphile ngekuvumelana nayo; 13 ngobe nangabe niphila ngekuvumelana nayo nakanjani nitakufa;+ kodvwa nangabe nibulala tento letimbi ngekusitwa ngumoya, nitawuphila.+ 14 Bonkhe labacondziswa ngumoya waNkulunkulu bangemadvodzana aKhe.+ 15 Ngobe anizange nemukele umoya webugcili lonenta niphindze nesabe, kodvwa nemukela umoya lowanenta nafakwa esiswini naba ngemadvodzana. Ngalomoya siyamemeta sitsi: “Abha,* Babe!”+ 16 Lomoya ufakazelana nemoya+ wetfu kutsi sibantfwana baNkulunkulu.+ 17 Nangabe-ke sibantfwana baNkulunkulu, siphindze sibe tindlalifa,+ yebo tindlalifa taNkulunkulu, kodvwa letitindlalifa naKhristu. Nasihlupheka naye+ sitawuphindze sikhatinyuliswe naye.+

18 Ngiyabona kutsi kuhlupheka lokukhona nyalo akusilutfo nakucatsaniswa nenkhatimulo lesitawembulelwa yona.+ 19 Ngobe indalo ilindzele ngekulangatelela lokukhulu kubona kwembulwa kwemadvodzana aNkulunkulu.+ 20 Ngobe yentiwe kutsi iphile imphilo lelite,+ hhayi ngentsandvo yayo kodvwa ngentsandvo yaloyo loyentile, nalowayinika litsemba, 21 kuze ikhululwe+ ekugcilatweni konakala, bese itfola inkhululeko lekhatimulako yebantfwana baNkulunkulu. 22 Ngobe siyati kutsi yonkhe indalo ichubeka ilila kanyekanye futsi isetinhlungwini kanyekanye kuze kube ngunyalo. 23 Ngetulu kwaloko, natsi lesinetitselo tekucala, lokungumoya, siyalila ngekhatsi+ njengobe silindzele kufakwa esiswini sentiwe emadvodzana+ aNkulunkulu, sikhululwe ngenhlawulo kulemitimba yetfu. 24 Ngobe sasindziswa sinalelitsemba; kodvwa litsemba lentfo lebonwako akusilo litsemba, ngobe kungenteka yini kutsi umuntfu abe nelitsemba lentfo layibonako? 25 Kodvwa nasinelitsemba+ lentfo lesingayiboni,+ siyachubeka siyilindze ngekucinisela futsi siyilangatelela.+

26 Ngendlela lefanako, umoya uhlanganyela natsi ekusisiteni kulobutsakatsaka betfu;+ ngobe sisuke singati kutsi singathantazela ini, kepha umoya uyasincengela nasilila ngisho singakasho lutfo.* 27 Kodvwa loyo lohlola tinhlitiyo+ uyati kutsi umoya usho kutsini, ngobe wona uncengela labangcwele ngekuvumelana nentsandvo yaNkulunkulu.

28 Sesiyati kutsi Nkulunkulu ubangela kutsi yonkhe imisebenti yakhe ihleleke kahle, kuze kuzuze labo labamtsandzako, lokungulabo lababitwe ngenca yenjongo yakhe;+ 29 ngobe labo yena labanaka kusukela ekucaleni wabahlelela kusengaphambili kutsi bentiwe bafane neNdvodzana yakhe,+ kuze ibe litibulo+ kubomnakabo labanyenti.+ 30 Ngetulu kwaloko, labo labahlelela kusengaphambili+ ngulabo lababita; futsi labo lababita+ ngulabo latsi balungile.+ Ekugcineni, labo latsi balungile ngulabo laphindze wabakhatimulisa.+

31 Singatsini-ke ngaletintfo? Nangabe Nkulunkulu angakitsi, ngubani longamelana natsi?+ 32 Njengobe angayigodlanga iNdvodzana yakhe kodvwa ayinikela ngenca yetfu,+ angehluleka kanjani kusinika ngemusa tonkhe letintfo, aneNdvodzana yakhe? 33 Ngubani longamangalela labakhetsiwe baNkulunkulu?+ Ngobe Nkulunkulu nguye lotsi balungile.+ 34 Ngubani longabalahla ngelicala? Ngobe Khristu Jesu nguye lowafa, ngetulu kwaloko nguye nalowavuswa ekufeni, longesekudla saNkulunkulu,+ nalosincengelako.+

35 Kukhona yini lokungenta Khristu angasasitsandzi?+ Kungaba yini kuhlupheka, nobe kucindzeteleka, kuphatfwa kabi, indlala, kuhamba ngcunu, ingoti nobe inkemba?+ 36 Ngobe kubhaliwe kwatsiwa: “Ngenca yakho sibulawa malanga onkhe, futsi sinjengetimvu letiyohlatjwa.”+ 37 Kodvwa kuto tonkhe letintfo siyaphumelela+ ngenca yaloyo lowasitsandza. 38 Ngobe ngiyaciniseka kutsi ngisho nekufa, kuphila, tingilosi, babusi, tintfo letikhona nyalo naleto letitako, emandla,+ 39 kuphakama, kujula, ngisho nanobe nguyiphi indalo, ngeke kukwati kusehlukanisa nelutsandvo Nkulunkulu lasikhombisa lona ngaKhristu Jesu iNkhosi yetfu.

9 Ngikhuluma liciniso ngenca yaKhristu; angicali emanga ngobe nembeza wami uyangifakazela ngemoya longcwele, 2 kutsi ngilusizi kakhulu futsi inhlitiyo yami iva buhlungu lobungapheli. 3 Ngobe bengingafisa kwehlukaniswa naKhristu ngibe ngulocalekisiwe ngenca yebomnaketfu labatihlobo tami enyameni, 4 lokungema-Israyeli. Bona batsatfwa bentiwa emadvodzana+ futsi bakhatinyuliswa, banikwa tivumelwane,+ uMtsetfo,+ umsebenti longcwele,+ netetsembiso.+ 5 Bavela kubokhokho,+ naKhristu wavela kubo ayinyama.+ Nkulunkulu losetikwako konkhe akadvunyiswe kuze kube phakadze. Amen.

6 Kodvwa akusho kutsi livi laNkulunkulu lehlulekile. Ngobe akusibo bonkhe labavela ku-Israyeli “labangema-Israyeli” mbamba.+ 7 Akusibo bonkhe lababantfwana ba-Abrahama ngenca nje yekutsi bayintalelwane*+ yakhe, ngobe kwatsiwa: “Intalelwane* yakho itawuvela ku-Isaka.”+ 8 Loku kusho kutsi bantfwana benyama akusibo lababantfwana baNkulunkulu,+ kodvwa bantfwana besetsembiso+ ngibo lokutsiwa bayintalelwane.* 9 Ngobe lesetsembiso besitsi: “Ngalesikhatsi lesi ngitawufika, futsi Sara utawuba nendvodzana.”+ 10 Lesetsembiso asigcinanga lapho kuphela, kodvwa sashiwo nangesikhatsi Rebheka atetfwele futsi atotfola emaphahla a-Isaka longukhokho wetfu.+ 11 Ngesikhatsi lamaphahla asengakatalwa futsi asengakenti lutfo loluhle nobe lolubi, (kuze injongo yaNkulunkulu yekukhetfwa kwawo ingayi ngemisebenti, kodvwa iye ngaLoyo lowabitako), 12 kwatsiwa kuRebheka: “Lomdzala utawuba sigcili salomncane.”+ 13 Kunjengobe kubhaliwe kwatsiwa: “Jakobe ngamtsandza, kodvwa Esawu ngamenyanya.”+

14 Singatsini-ke? Nkulunkulu akakalungi yini? Cha akusinjalo!+ 15 Ngobe watsi kuMosi: “Ngitawuba nesihawu kuloyo lengifuna kuba nesihawu kuye, futsi ngitamvela loyo lengifuna kumvela.”+ 16 Ngako-ke akuyi ngekufisa kwemuntfu nobe ngekutikhandla kwakhe,* kodvwa kuya ngaNkulunkulu lonesihawu.+ 17 Ngobe umbhalo wakhuluma ngaFaro watsi: “Ngulesi sizatfu lesingente ngakuyekela, kuze ngente emandla ami abonakale ngawe, nelibito lami limenyetelwe kuwo wonkhe umhlaba.”+ 18 Ngako uba nesihawu kuloyo lafuna kuba nesihawu kuye, kodvwa labo lafuna babe lukhuni uyabayekela babe lukhuni.+

19 Nine nitawutsi kimi: “Nkulunkulu usabasolelani-ke bantfu? Ngobe ngubani longamelana nentsandvo yakhe?” 20 Ungubani wena kutsi ungaphendvulana naNkulunkulu?+ Intfo lebunjiwe ingasho yini kuloyo loyibumbile itsi: “Ungibumbeleni kanjena?”+ 21 Anati yini kutsi umbumbi unelilungelo lekusebentisa sigadla sinye selubumba+ kuze ente titja letimbili, sinye sibe selikhetselo lesinye singabi selikhetselo? 22 Kutsiwani-ke nangabe Nkulunkulu bekafuna kuveta intfukutselo yakhe futsi ente nemandla akhe abonakale, kodvwa wakhetsa kubayekela waphindze wababeketelela labo labatitja letifanelwe yintfukutselo nekubhujiswa? 23 Kutsiwani-ke nangabe loku wakwenta kuze avete kutsi inkhatimulo yakhe yinkhulu kulabo labatitja letifanelwe sihawu,+ lebesekavele abahlelele kusengaphambili kutsi batfole inkhatimulo, 24 lokungitsi tsine lasibita, wangasibiti kumaJuda kuphela kodvwa wasibita nakubantfu betive?+ 25 Kunjengobe nje asho kuHoseya nakatsi: “Labo labangasibo bantfu bami+ ngitawubabita ngekutsi ‘bantfu bami,’ naloyo lobekangatsandvwa ngitawutsi ‘ngulotsandzekako.’+ 26 Nakulendzawo lapho ngatsi kubo: ‘Anisibo bantfu bami,’ kulapho labatawubitwa khona ngekutsi ‘ngemadvodzana aNkulunkulu lophilako.’”+

27 Ngetulu kwaloko, Isaya wakhuluma mayelana nema-Israyeli watsi: “Ngisho nobe emadvodzana aka-Israyeli angaba ngangesihlabatsi saselwandle, ngulabo labasele kuphela labatawusindziswa.+ 28 Ngobe Jehova* utawenta umhlaba ulandzise, futsi loko utawukwenta ngalokuphelele nangekushesha.”+ 29 Isaya waphrofetha watsi: “Kube Jehova* wemabutfo akasishiyelanga intalelwane,* besitawuvele sifane ncamashi neSodoma, futsi besitawufana neGomora.”+

30 Singatsini-ke? Bantfu betive baba ngulabalungile ngisho nobe bangazange basebentele kuba ngulabalungile,+ lokukulunga lokuletfwa kukholwa;+ 31 kodvwa nanobe ema-Israyeli awusebentela umtsetfo wekulunga, akawugcinanga. 32 Ngasiphi sizatfu? Ngobe awazange awusebentele ngekukholwa, kodvwa bewacabanga kutsi kuba ngulabalungile kuya ngemisebenti. Akhutjwa “litje lelibangela kukhubeka,”+ 33 njengobe kubhaliwe kwatsiwa: “ESiyoni ngibeka litje+ lelibangela kukhubeka nelidvwala leliwisanako, kodvwa loyo lokholwa kulo ngeke advumateke.”+

10 Bazalwane, lengikufisela ema-Israyeli enhlitiyweni yami nalengiwancusela kona kuNkulunkulu kutsi asindziswe.+ 2 Ngiyawafakazela kutsi ayatimisela kukhonta Nkulunkulu,+ kodvwa eswele lwati lolungulonalona. 3 Ngobe wona awati kutsi yini leyenta Nkulunkulu+ atsi umuntfu ulungile, kodvwa afuna kutiveta alungile ngendlela yawo,+ awafuni kulandzela loko Nkulunkulu latsi kulungile.+ 4 Khristu usiphetfo seMtsetfo,+ kuze wonkhe umuntfu lokholwako kutsiwe ulungile.+

5 Ngobe Mosi wabhala mayelana nemuntfu lokutsiwa ulungile ngekuvumelana neMtsetfo, watsi: “Loyo logcina lokuseMtsetfweni utawuphila ngenca yako.”+ 6 Kodvwa mayelana nekulunga lokuletfwa kukholwa, kwatsiwa: “Ungacali usho enhlitiyweni yakho+ utsi: ‘Ngubani lotawenyukela ezulwini?’+ lokusho kutsi aletse Khristu emhlabeni, 7 nobe utsi: ‘Ngubani lotawehlela ekujuleni kwemhlaba?’+ lokusho kutsi avuse Khristu ekufeni.” 8 Kodvwa utsini umBhalo? Utsi: “Lelivi lisedvute nawe, futsi lisemlonyeni wakho nasenhlitiyweni yakho”;+ ‘lokulivi’ lekukholwa lesilishumayelako. 9 Ngobe nawumemetela kubantfu kutsi Jesu uyiNkhosi,+ futsi ukholwa enhlitiyweni kutsi Nkulunkulu wamvusa ekufeni, utawusindziswa. 10 Ngobe ngenhlitiyo umuntfu uyakholwa bese kutsiwa ulungile, kodvwa ngemlomo umuntfu uvuma embikwebantfu+ bese uyasindziswa.

11 Umbhalo utsi: “Loyo lokholwa nguye ngeke advumateke.”+ 12 Ngobe kute umehluko emkhatsini wemJuda nemGriki.+ Bonkhe baneNkhosi yinye, futsi ibabusisa* kakhulu bonkhe labo labayibitako. 13 “Wonkhe umuntfu lobita libito laJehova* utawusindziswa.”+ 14 Kodvwa-ke batambita njani nangabe bangazange bakholwe nguye? Batawukholwa njani kuloyo labangevanga ngaye? Batawuva njani nakute loshumayelako? 15 Batawushumayela njani nangabe bangakatfunywa?+ Kunjengobe nje kubhaliwe kutsi: “Maye tinhle tinyawo talabo labamemetela tindzaba letimnandzi talokuhle!”+

16 Kodvwa-ke akusibo bonkhe labatilalele letindzaba letimnandzi. Ngobe Isaya watsi: “Jehova,* ngubani lokholwe nguloko lakuve kitsi?”*+ 17 Ngako umuntfu ukholwa nangabe sekeve livi.+ Lelivi livakala nangabe kukhona loshumayela ngaKhristu. 18 Ngiyabuta ngitsi: Abakeva yini? Cha bevile, ngobe “lenkhulumo isakateke emhlabeni wonkhe, nalomlayeto ufike kubo bonkhe bantfu labakuto tonkhe tincenye temhlaba.”+ 19 Ngiyabuta ngitsi: Israyeli bekangati yini?+ Ngobe Mosi watsi: “Ngitawunenta nibe nesikhwele ngebantfu labangasiso sive; ngitawunenta nitfukutsele ngesive lesilibele.”+ 20 Isaya waba nesibindzi watsi: “Ngatfolwa ngulabo labangazange bangifune;+ ngatiwa ngulabo labangazange sebabute ngami.”+ 21 Kodvwa mayelana na-Israyeli watsi: “Ngavula tandla tami lilanga lonkhe, ngativulela bantfu labangalaleli nalabanenkhani.”+

11 Ngako ngiyabuta ngitsi: Nkulunkulu wabalahla yini bantfu bakhe?+ Cha! Nami ngingum-Israyeli, ngiyintalelwane* ya-Abrahama futsi ngiwesive sakaBhenjamini. 2 Nkulunkulu akabalahlanga bantfu bakhe lebekabati kwasekucaleni.+ Anikwati yini loko lokushiwo ngumbhalo nga-Elija ngesikhatsi akhonona kuNkulunkulu ngema-Israyeli? 3 Watsi: “Jehova,* bababulele baphrofethi bakho, bawabhidlitile nema-al’thare akho, sengimi kuphela losele futsi nyalo sebafuna kungibulala.”+ 4 Kodvwa Nkulunkulu wamphendvula watsini? Watsi: “Ngisenebantfu labangu-7 000 lengitigcinele bona, lokubantfu labangazange sebaguce ngemadvolo bakhonte Bhali.”+ 5 Ngendlela lefanako, kulesikhatsi sanyalo basekhona labasele+ labakhetfwe ngenca yemusa lomkhulu waNkulunkulu. 6 Nangabe loku kube ngenca yemusa lomkhulu+ waNkulunkulu, kusho kutsi akuyi ngemisebenti;+ ngale kwaloko kungasho kutsi umusa lomkhulu waNkulunkulu awusasiwo.

7 Singatsini-ke? Yona lentfo ema-Israyeli lebekayifuna ngekutimisela akazange ayitfole, kodvwa labo labakhetsiwe bayitfola.+ Tingcondvo tabo bonkhe lalabanye taba lukhuni,+ 8 njengobe nje kubhaliwe kwatsiwa: “Nkulunkulu ubente baba njengebantfu labasebutfongweni lobukhulu,+ emehlo abo akaboni, netindlebe tabo ativa kuze kube ngulamuhla.”+ 9 NaDavide watsi: “Shengatsi emadzili abo angaba lugibe kubo, abe sitsiyo, nentfo lebabangela kukhubeka, futsi abe sijeziso. 10 Akube mnyama emehlweni abo kuze bangaboni, futsi bente bagobe emacolo abo ngaso sonkhe sikhatsi.”+

11 Ngako ngiyabuta ngitsi: Ema-Israyeli akhubeka futsi awa angasavuki yini? Cha! Kodvwa ngekwephula kwawo umtsetfo, bantfu betive basindziswa, kuze wona entiwe abe nesikhwele.+ 12 Nangabe ngekwephula kwawo umtsetfo live labusiswa, futsi kuncipha kwawo kwenta bantfu betive+ batfola tibusiso, kakhulu kangakanani-ke naseliphelele linani lawo?

13 Ngikhuluma nani nine bantfu betive. Njengobe ngingumphostoli kubantfu betive,+ ngiyawungcwelisa umsebenti wami,+ 14 kuze ngibone kutsi ngingakhona yini kwenta bantfu* bakitsi babe nesikhwele futsi ngisindzise labanye babo. 15 Ngobe nangabe kulahlwa+ kwabo kwente live labuyisana naNkulunkulu, kwemukelwa kwabo ngeke yini kusho kuvuswa ekufeni? 16 Ngetulu kwaloko, nangabe litsantana lenhlama lelitsatfwa njengelekucala lingcwele, yonkhe lelenye inhlama isuke ingcwele; nangabe timphandze tingcwele, nemagala asuke angcwele.

17 Kodvwa nangabe lamanye emagala ajutjwa kwase kutsi wena nanobe ungumncumo wesiganga wahlunyeleliswa emkhatsini walalamanye wase uyazuza etimphandzeni letikhuluphele talomncumo, 18 ungawabukeli phansi* lamagala. Nangabe uwabukela phansi,*+ khumbula kutsi akusiwe losimise timphandze kodvwa timphandze ngito letikusimisile. 19 Ngako utawutsi: “Emagala ajutjwa kuze mine ngihlunyeleliswe.”+ 20 Loko kuliciniso! Wona ajutjwa+ ngenca yekuba bete kukholwa, kepha wena usime ngenca yekukholwa.+ Ungatigabatisi, kodvwa yesaba. 21 Njengobe Nkulunkulu angazange awayekele emagala lebekavele akhona, nawe ngeke akuyekele. 22 Cabangisisa ngemusa waNkulunkulu+ nesijeziso lesivela kuye. Labo labawa bajeziswa,+ kodvwa wena utfola umusa waNkulunkulu, kuphela nje nangabe uchubeka wenta tintfo letitawenta utfole umusa wakhe; ngale kwaloko nawe utawujutjwa. 23 Nangabe banekukholwa, batawuhlunyeleliswa,+ ngobe Nkulunkulu angakhona kuphindze abahlumelelise. 24 Ngobe nangabe wena wajutjwa emncumeni wesiganga futsi wahlunyeleliswa emncumeni wasekhaya ngendlela lephambene nemvelo, angeke yini lamagala lebekavele akhona aphindze ahlunyeleliswe, abuyiselwe esihlahleni sawo semncumo?

25 Bazalwane, ngifuna niyati lemfihlo lengcwele+ kuze ningacabangi kutsi nihlakaniphile. Lemfihlo ikutsi lamanye ema-Israyeli ala kulalela, futsi loku kutawenteka kuze kube ngulapho sekungene linani leliphelele lebantfu betive. 26 Ngaleyo ndlela onkhe ema-Israyeli+ atawusindziswa. Kunjengobe nje kubhaliwe kwatsiwa: “Umsindzisi* utawuvela eSiyoni,+ ente bonkhe bantfwana baJakobe bashiye imikhuba yabo lemibi. 27 Lesi sivumelwane lengitasenta nabo+ nangisusa tono tabo.”+ 28 Kuliciniso kutsi ngekungatemukeli tindzaba letimnandzi baba titsa naNkulunkulu kuze kuzuze nine, kodvwa ngekukhetfwa nguye baba ngulabatsandzekako kuye ngenca yabokhokho babo.+ 29 Ngobe Nkulunkulu ngeke atisole ngekupha kwakhe nangekukhetsa labo labakhetsile. 30 Njengobe nani nake nangamlaleli Nkulunkulu,+ kodvwa nyalo senikhonjiswe sihawu+ ngenca yekungalaleli kwabo,+ 31 ngendlela lefanako, kungalaleli kwabo sekunente nakhonjiswa sihawu, kuze nabo bakhonjiswe sihawu. 32 Ngobe Nkulunkulu ubavumele bonkhe kutsi babe tigcili tekungalaleli+ kuze bonkhe abakhombise sihawu.+

33 Maye tinyenti tibusiso letivela kuNkulunkulu, futsi kuhlakanipha kwakhe nelwati lwakhe kujule kakhulu! Kwehlulela kwakhe akuphenyeki, netindlela takhe ngeke size siticondze! 34 “Ngubani lowati imicabango yaJehova,* futsi ngubani longaba ngumeluleki wakhe?”+ 35 “Ngubani locale wamnika lokutsite, kuze naye atombhadala?”+ 36 Ngobe tonkhe tintfo tivela kuye, tikhona ngaye futsi tikhonela yena. Ludvumo aluye kuye kuze kube phakadze. Amen.

12 Ngako ngiyanincenga bazalwane ngemusa waNkulunkulu, kutsi ninikele imitimba yenu+ ibe ngumhlatjelo lophilako, longcwele+ nalowemukelekako kuNkulunkulu. Nanenta njalo nitawube nikhonta Nkulunkulu ngayo yonkhe ingcondvo yenu.+ 2 Yekelani kufana nebantfu balelive,* kodvwa gucukani ngekutsi nishintje tingcondvo tenu,+ kuze nititfolele nine+ loko lokuyintsandvo yaNkulunkulu, nikwati lokuhle, lokwemukelekako nalokuphelele.

3 Ngenca yemusa lomkhulu Nkulunkulu langentele wona, nginitjela nonkhe kutsi akubebete emkhatsini wenu lotibona amkhulu kunaloko langiko, kodvwa nguloyo naloyo akaticabange+ ngendlela lefanele, loku akwente ngekuvumelana nekukholwa lakunikwe* nguNkulunkulu.+ 4 Njengobe emtimbeni munye kunemalunga lamanyenti,+ lamalunga akenti umsebenti munye, 5 ngako natsi nanobe sibanyenti, singumtimba munye ebunyeni naKhristu, futsi singemalunga letsembele kulelinye nalelinye.+ 6 Ngenca yemusa lomkhulu waNkulunkulu, sonkhe sinetipho letingafani.+ Nangabe sipho setfu kukuphrofetha, asiphrofethe ngekuvumelana nekukholwa lesinikwe kona; 7 nangabe sipho setfu sikwenta umsebenti, asichubeke siwenta; lofundzisako akachubeke afundzisa;+ 8 lokhutsatako* akachubeke akhutsata;*+ lowabako* akabe ngenhlitiyo levulekile;+ lowengamele* akengamele ngekutimisela;*+ naloyo lonemusa akawukhombise ngenjabulo.+

9 Lutsandvo lwenu alube bete kutentisa.+ Tondzani lokubi;+ nibambisise lokuhle. 10 Nonkhe tsandzanani ngelutsandvo lwebuzalwane. Nihambe embili*+ ekuhloniphaneni. 11 Khutsalani,* ningavilaphi.*+ Vutsani emoyeni.+ Sebentelani Jehova.*+ 12 Jabulani ngenca yelitsemba leninalo. Ciniselani nanihlushwa.+ Phikelelani emthantazweni.+ 13 Phanini labangcwele kuye ngetidzingo tabo.+ Kwenteni umkhuba kwemukela tivakashi.+ 14 Chubekani nibusisa labo labanihluphako;+ busisani, ningacalekisi.+ 15 Jabulani nalabajabulako, nikhale nalabakhalako. 16 Nibotsatsa labanye ngendlela nani lenititsatsa ngayo; ningatigabatisi,* kodvwa tfobekani.+ Ningatiboni ngatsi nihlakaniphile.+

17 Ningaphindziseli lokubi ngalokubi kulabanye.+ Yetamani kwenta lokuhle kubo* bonkhe bantfu. 18 Nakungenteka, yentani konkhe lokusemandleni enu kuze nibe nekuthula nabo bonkhe bantfu.+ 19 Bazalwane labatsandzekako, ningatiphindziseleli, kodvwa shiyelani konkhe elulakeni+ lwaNkulunkulu, ngobe kubhaliwe kwatsiwa: “Jehova* utsi: ‘Kuphindzisela kwami, ngimi lengitawuphindzisela.’”+ 20 Kodvwa “nangabe sitsa sakho silambile, siphe kudla; nangabe somile, sinike kwekunatsa; ngobe nawenta njalo kutawufana nekutsi ubutsisa emalahle lavutsako enhloko yaso.”*+ 21 Ungavumi kuncotjwa ngulokubi, kodvwa chubeka uncoba lokubi ngalokuhle.+

13 Bonkhe bantfu* abatfobele tiphatsimandla,+ ngobe kute ligunya lelingaveli kuNkulunkulu;+ futsi tiphatsimandla letikhona nyalo tisetikhundleni tato letehlukahlukene ngobe tivunyelwe nguNkulunkulu.+ 2 Ngako loyo lomelene netiphatsimandla usuke amelene nalokubekwe nguNkulunkulu, futsi labo labamelene nato batawujeziswa. 3 Ngobe labo lababusako kufanele besatjwe, kepha bangesatjwa ngulabenta lokulungile, kodvwa besatjwe ngulabenta lokubi.+ Nangabe ufuna kungatesabi tiphatsimandla, chubeka wenta lokuhle,+ futsi titakudvumisa ngaloko; 4 ngobe tisebentela Nkulunkulu kuze kuzuze wena. Kodvwa nangabe wenta lokubi, kufanele wesabe ngobe atiyiphatseli lite inkemba. Titisebenti taNkulunkulu, futsi tibaphindziseli kuze tivete lulaka* lwakhe kulabo labenta tintfo letimbi.

5 Ngako-ke kunesizatfu lesibalulekile sekutsi nititfobe kuto, hhayi ngenca yalolo lulaka kuphela, kodvwa nangenca yabonembeza benu.+ 6 Kungako nibhadala imitselo; ngobe tiphatsimandla titisebenti taNkulunkulu letisita sive, naletichubeka tenta lomsebenti. 7 Bonkhe banikeni loko lokubafanele. Lofuna umtselo, mnikeni umtselo;+ lofuna kubhadalwa, mbhadaleni; lofuna kwesatjwa, mesabeni;+ nalofuna kudvunyiswa, mdvumiseni.+

8 Akubete lutfo lenilukweleta umuntfu, ngaphandle kwekutsi nikweletane lutsandvo,+ ngobe loyo lotsandza lomunye umuntfu usuke alalela umtsetfo.+ 9 UMtsetfo utsi: “Ungaphingi,+ ungabulali,+ ungebi,+ ungahawukeli.”+ Lemitsetfo kanye nayo yonkhe leminye ihlanganiswe nganankha emavi latsi: “Kufanele utsandze makhelwane wakho njengobe utitsandza wena.”+ 10 Lutsandvo alukwenti lokubi kumakhelwane;+ ngako lutsandvo lukugcwaliseka kwemtsetfo.+

11 Loku kwenteni ngobe niyasati sikhatsi, kutsi sengilo li-awa lekutsi nivuke ebutfongweni,+ ngobe nyalo kusindziswa kwetfu sekusedvute kunangesikhatsi siba ngemakholwa. 12 Busuku sebuyaphela; imini seyisondzele. Ngako asilahleni imisebenti yebumnyama,+ sihlome ngetikhali tekukhanya.+ 13 Asihambe ngendlela lefanele+ njengasemini, sibalekele imicimbi lengalawulwa,* kudzakwa, kugwadla, kona lokuhambisana nekwedzelela,*+ kucabana kanye nemona.+ 14 Kodvwa lingisani* iNkhosi Jesu Khristu,+ futsi ningakuhleli kusengaphambili kwenelisa tifiso tenyama.+

14 Memukeleni umuntfu lobutsakatsaka ekukholweni,+ kodvwa ningamehluleli ngekutsi imibono yakhe yehlukile.* 2 Kukholwa kuyamvumela lomunye umuntfu kutsi adle konkhe, kodvwa umuntfu lobutsakatsaka udla tibhidvo kuphela. 3 Lodlako akangambukeli phansi longadli, nalongadli akangamehluleli lodlako,+ ngobe naye wemukelwe nguNkulunkulu. 4 Ungubani wena kutsi ungehlulela sisebenti salomunye umuntfu?+ Kuma nekuwa kwaso kusenkhosini yaso.+ Ecinisweni sitawukuma ngobe Jehova* angasenta sime.

5 Lomunye umuntfu utsatsa lilanga lelitsite njengalelibalulekile kunalelinye;+ lomunye ulitsatsa njengalelifana nawo onkhe lamanye emalanga;+ nguloyo naloyo akaciniseke kahle engcondvweni yakhe. 6 Loyo lotsatsa lilanga lelitsite njengalelibalulekile, wenta loko kuze ahloniphe Jehova.* Naloyo lodlako udla kuze ahloniphe Jehova,* ngobe ubonga Nkulunkulu;+ nalongadli akadli kuze ahloniphe Jehova,* futsi naye ubonga Nkulunkulu.+ 7 Ecinisweni, kute kitsi lotiphilela yena,+ futsi kute nalotifela yena. 8 Ngobe nasiphila siphilela kuhlonipha Jehova,*+ nanasifa sifela Jehova.* Ngako ngisho siphila nobe sifa, sibaJehova.*+ 9 Ngobe Khristu wafa waphindze wavuswa kuze abe yiNkhosi yalabafile nalabaphilako.+

10 Umehlulelelani umzalwane wakho?+ Kungani umbukela phansi? Sonkhe sitawukuma embikwesihlalo saNkulunkulu sekwehlulela.+ 11 Ngobe kubhaliwe kwatsiwa: “Jehova* utsi: ‘Njengobe nje ngiphila,+ onkhe emadvolo atawuguca embikwami futsi tonkhe tilwimi titawudvumisa Nkulunkulu.’”+ 12 Ngako-ke, Nkulunkulu utawehlulela umuntfu ngamunye kuye ngekwaloko lakwentile.+

13 Ngako asingasehlulelani.+ Esikhundleni saloko asitimiseleni kutsi singenti tintfo letingakhuba umzalwane wetfu nobe timphambukise.+ 14 Njengobe ngingumlandzeli weNkhosi Jesu, ngiyati futsi ngiyaciniseka kutsi kute lutfo lolungcolile ngekwalo;+ kodvwa nangabe umuntfu atsatsa intfo ngekutsi ingcolile, isuke ingcole kuye. 15 Ngobe nangabe umzalwane wakho akhubeka ngaloko lokudlako, wena usuke ungasaphili ngekuvumelana nelutsandvo.+ Ungamlimati ngalokudlako loyo lowafelwa nguKhristu.+ 16 Ngako ningakuvumeli lokuhle lenikwentako kutsi kunente nikhulunywe kabi. 17 Kungena eMbusweni waNkulunkulu akuyi ngekutsi umuntfu uyadla nobe uyanatsa,+ kodvwa kufanele abe ngulolungile, abe nekuthula, futsi abe nenjabulo leletfwa ngumoya longcwele. 18 Ngobe loyo losebentela Khristu ngalendlela uyemukeleka kuNkulunkulu futsi uyemukeleka nakubantfu.

19 Ngako-ke, asenteni konkhe lokusemandleni etfu kuze sibe nekuthula+ nalabanye futsi sakhane.+ 20 Yekelani kubhidlita imisebenti yaNkulunkulu ngenca nje yekudla.+ Kuliciniso kutsi tonkhe tintfo tihlantekile, kodvwa kuyingoti* nangabe umuntfu adla kantsi ukhuba labanye.+ 21 Kuncono kutsi ungayidli inyama, ungalinatsi neliwayini futsi ungenti nobe yini lekhuba umzalwane wakho.+ 22 Kukholwa lonako akube kwakho wedvwa naNkulunkulu. Uyajabula umuntfu longatehluleli ngaloko yena lakubona kwemukeleka. 23 Kodvwa nangabe angabata, sewuvele ulahliwe nakadla, ngobe ukwenta ngekungakholwa. Ecinisweni, konkhe lokungakasekelwa ekukholweni kusono.

15 Tsine lesicinile kufanele setfwale butsakatsaka balabo labangakacini,+ futsi singatijabulisi tsine.+ 2 Nguloyo naloyo kitsi akentele makhelwane wakhe lokuhle futsi amakhe.+ 3 Ngisho naKhristu akatijabulisanga yena,+ njengobe nje kubhaliwe kwatsiwa: “Tinhlamba talabakuhlambalatako tehlele kimi.”+ 4 Ngobe tonkhe tintfo letabhalwa kadzeni tabhalelwa kufundzisa tsine,+ kuze kutsi ngekucinisela kwetfu+ nangendvudvuto lesiyitfola emiBhalweni sibe nelitsemba.+ 5 Shengatsi Nkulunkulu losisita kutsi sicinisele nalosidvudvutako angenta kutsi indlela lenicabanga ngayo ibe njengeyaKhristu Jesu, 6 kuze kutsi ngavi* linye, nonkhe+ nikhatimulise Nkulunkulu longuBabe weNkhosi yetfu Jesu Khristu.

7 Ngako-ke yemukelanani,+ njengobe nje naKhristu anemukela,+ kuze kukhatinyuliswe Nkulunkulu. 8 Ngobe ngiyanitjela kutsi Khristu waba sikhonti salabo labasokile+ kuze afakazele kutsi Nkulunkulu uneliciniso, khona atocinisekisa tetsembiso Nkulunkulu latenta kubokhokho babo,+ 9 kuze netive titokhatimulisa Nkulunkulu ngenca yemusa wakhe.+ Njengobe nje kubhaliwe kwatsiwa: “Kungako ngitakuvuma embikwetive, ngihlabele ngidvumise+ libito lakho.” 10 Kuphindze kutsiwe: “Jabulani nine tive nebantfu bakhe.”+ 11 Kuphindze futsi kutsiwe: “Dvumisani Jehova* nonkhe nine tive, nebantfu bonkhe abamdvumise.”+ 12 Na-Isaya watsi: “Kutawuba khona imphandze yaJese,+ futsi itawubusa tive;+ tive titawetsembela kuyo.”+ 13 Shengatsi Nkulunkulu lonikana litsemba anganenta nijabule kakhulu futsi aninike nekuthula ngenca yekutsi netsembele kuye, kuze nitogcwala* litsemba ngemandla emoya longcwele.+

14 Nami ngiyaciniseka ngani bazalwane, kutsi nihlale nikulungele kwenta lokuhle, njengobe nigcwaliswe ngalo lonkhe lwati, futsi niyakhona kwelulekana.* 15 Kodvwa-ke nginibhalela ngesibindzi lesikhulu ngaletinye tintfo, kuze ngiphindze nginikhumbute ngenca yekutsi Nkulunkulu ungentele umusa lomkhulu, 16 khona ngitowuba yinceku yaKhristu Jesu etiveni.+ Ngenta umsebenti longcwele wekumemetela tindzaba letimnandzi taNkulunkulu,+ kuze letive tibe ngumnikelo lowemukelekako, longcweliswe ngemoya longcwele.

17 Ngako nginesizatfu sekujabula ngobe ngingumfundzi waKhristu Jesu futsi ngenta umsebenti waNkulunkulu. 18 Ngobe ngeke ngikhulume lutfo ngaphandle kwetintfo Khristu latentile asebentisa mine kuze tive titewulalela. Loko wakwenta asebentisa emavi ami netento tami, 19 emandla etibonakaliso netimangaliso,+ kanye nemandla emoya waNkulunkulu; ngaleso sizatfu ngahamba ngesuka eJerusalema ngajikeleta ngaze ngefika e-Ilirikhu ngitishumayela ngalokuphelele tindzaba letimnandzi letimayelana naKhristu.+ 20 Ngako ngakwenta umgomo wami kutsi ngingatimemeteli tindzaba letimnandzi etindzaweni lebesekukhulunywe kuto ngelibito laKhristu, kuze ngingakheli esisekelweni salomunye umuntfu, 21 njengobe nje kubhaliwe kwatsiwa: “Labo labangatjelwanga ngaye batawubona, nalabo labangevanga batawucondza.”+

22 Kungako ngabambeka emahlandla lamanyenti kuta kini. 23 Kodvwa nyalo sekute indzawo kuletifundza lengingakafiki kuyo, futsi sekuphele iminyaka leminyenti* solo ngifuna kuta kini. 24 Ngako ngiyetsemba kutsi nangiya eSpaniya ngitawukhona kunibona, ngiyetsemba nekutsi nasengihleti sikhashana nani nitangiphekeletela sigatjana. 25 Kodvwa nyalo sengitawuhamba ngiye eJerusalema kuze ngiyosita labangcwele.+ 26 Ngobe labo labaseMasedoniya nase-Akhaya bakujabulele kunikela ngetintfo tabo, baphe labangcwele labeswele labaseJerusalema.+ 27 Kuliciniso kutsi bakujabulele kwenta kanjalo, futsi ecinisweni bebabakweleta; ngobe nangabe emaJuda ahlanganyele nebetive tintfo tawo letivela kuNkulunkulu, nabo bebanesikweleti sekutsi bawasite ngetintfo tabo.+ 28 Nasengicedzile futsi sengibanikile loko lokunikelwe,* ngitawendlula kini nangiya eSpaniya. 29 Ngiyati nekutsi nangita kini ngitawuta netibusiso letinyenti letivela kuKhristu.

30 Ngako ngiyanincenga bazalwane ngeNkhosi yetfu Jesu Khristu nangelutsandvo loluvetwa ngumoya, kutsi nihlanganyele nami ekungithantazeleni ngalokujulile kuNkulunkulu,+ 31 khona ngitophunyula+ kulabangakholwa labaseJudiya futsi nemsebenti lengiwentela iJerusalema wemukeleke kulabangcwele,+ 32 kuze ngentsandvo yaNkulunkulu ngite kini ngenjabulo futsi ngiphumule nani. 33 Shengatsi Nkulunkulu lonikana kuthula angaba nani nonkhe.+ Amen.

16 Nginetfulela* dzadzewetfu Foyibe, loyinceku ebandleni laseKhenkhariya,+ 2 kuze nimemukele eNkhosini ngendlela lefanele labangcwele, nekutsi nimsite nganobe yini langahle ayidzinge,+ ngobe ube ngumvikeli walabanyenti, kuhlanganise nami imbala.

3 Ngicela nivusele boPhrisila na-Akhwila,+ labatisebenti letikanye nami kuKhristu Jesu, 4 lababeka kuphila kwabo engotini ngenca yekuphila kwami,+ futsi akusimi ngedvwa lengibabongako kodvwa nawo onkhe emabandla ebetive ayababonga. 5 Vuselani nelibandla lelihlanganela endlini yabo.+ Vuselani Ephayinethosi lotsandzekako, longulomunye walabo lababa balandzeli baKhristu bekucala e-Asiya. 6 Vuselani Mariya lonisebentele kakhulu. 7 Vuselani Andronikhusi naJuniyasi labatihlobo tami+ nalengaboshwa nabo, labatiwa kahle baphostoli futsi lesebanesikhatsi lesidze kunami basebunyeni naKhristu. 

8 Ngicela nivusele Ampliyatusi umzalwane wami lotsandzekako eNkhosini. 9 Vuselani Ubhanusi losisebenti lesikanye natsi kuKhristu, naStakhusi umzalwane wami lotsandzekako. 10 Vuselani Apelesi lowemukelekako kuKhristu. Nibovusela nalabo labasekhaya la-Aristobulusi. 11 Vuselani Herodiyoni sihlobo sami. Nivusele labasekhaya laNasisusi labaseNkhosini. 12 Vuselani boTrayifina naTrayifosa, bafati labasebenta ngekutimisela eNkhosini. Nivusele naPhesisi, dzadzewetfu lotsandzekako, ngobe uyisebentele kakhulu iNkhosi. 13 Vuselani Rufusi longulokhetsiwe eNkhosini, nivusele namake wakhe lophindze abe ngumake nakimi. 14 Vuselani Asinkrithusi, Flegoni, Hemesi, Phatrobasi, Hemasi kanye nebazalwane labakanye nabo. 15 Vuselani Filologusi naJuliya, Neriyusi nadzadzewabo, kanye na-Olimpasi, nabo bonkhe labangcwele labakanye nabo. 16 Nibovuselana ngekwanga kwebuzalwane. Onkhe emabandla aKhristu ayanivusela.

17 Ngiyanincenga bazalwane, kutsi nicaphele labo lababangela kwehlukana nekuwa ekukholweni, lokutintfo letiphambene nemfundziso lenayemukela, futsi nibecwaye.+ 18 Ngobe bantfu labanjalo abasito tigcili teNkhosi yetfu Khristu, kodvwa batigcili tetifiso* tabo; ngemavi abo lamnandzi newekuncoma badukisa tingcodvo* talabangakahlakaniphi. 19 Kulalela kwenu sekubonwa ngibo bonkhe, ngenca yaloko ngiyajabula ngani. Kodvwa ngifuna kutsi nibe ngulabahlakaniphile kulokuhle, kepha nibe msulwa kulokubi.+ 20 Masinyane, Nkulunkulu lonika kuthula utawupitjita Sathane+ ngephansi kwetinyawo tenu. Shengatsi umusa lomkhulu weNkhosi yetfu Jesu ungaba nani.

21 Thimothi losisebenti lesikanye nami uyanivusela, naLusiyusi, Jasoni, kanye naSosipateri, labatihlobo tami+ nabo bayanivusela.

22 Nami Thethiyusi, lokungimi lengibhale lencwadzi, ngiyanivusela eNkhosini.

23 Gayusi+ longemukele emtini wakhe nalowemukele lonkhe libandla uyanivusela. Erastusi umgcinisikhwama welidolobha uyanivusela, nemnakabo Kwathusi naye uyanivusela.⁠ 24 *——

25 Nkulunkulu utanenta nicine ngekuvumelana netindzaba letimnandzi lengitimemetelako nangekushumayela ngaJesu Khristu. Letindzaba letimnandzi timayelana nekwembulwa kwemfihlo lengcwele+ lebekusolo kungakhulunywa ngayo kusukela kadzeni. 26 Nyalo seyembuliwe* futsi seyentiwe yatiwa kuto tonkhe tive ngemiBhalo lesiphrofetho, ngekuvumelana nemyalo waNkulunkulu lophila phakadze kuze kutfutfukiswe kulalela ngekukholwa; 27 kuNkulunkulu lokunguye yedvwa lohlakaniphile,+ akube ludvumo ngaJesu Khristu kuze kube phakadze. Amen.