INCWADZI YESIBILI LEYA KUBASEKHORINTE

1 Mine Pawula, umphostoli waKhristu Jesu ngentsandvo yaNkulunkulu, ngikanye naThimothi+ umzalwane wetfu, ngibhalela libandla laNkulunkulu leliseKhorinte nabo bonkhe labangcwele labakulo lonkhe lase-Akhaya:+

2 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini lenguJesu Khristu.

3 Akadvunyiswe Nkulunkulu, Babe weNkhosi yetfu Jesu Khristu,+ longuBabe wemusa,+ naNkulunkulu wayo yonkhe indvudvuto,+ 4 losidvudvuta* kuko konkhe kuhlupheka*+ kwetfu, kuze ngendvudvuto lesiyemukela kuye* natsi sikwati kudvudvuta labanye+ kunobe ngukuphi kuhlupheka.+ 5 Njengobe sihlupheka kakhulu ngenca yaKhristu,+ nendvudvuto lesiyitfola ngaye iyaphuphuma. 6 Ngako-ke nasihlupheka,* loko kungenjongo yekutsi kudvudvutwe nine futsi nisindziswe; nasidvudvutwa, loko kungenjongo yekutsi kudvudvutwe nine kuphindze kunisite nibeketelele kuhlupheka lokunjengekwetfu. 7 Sinetsemba mbamba, ngobe siyati kutsi njengobe nihlupheka njengatsi, nani nitawudvudvuteka njengatsi.+

8 Ngobe asifisi bazalwane kutsi ningati ngekuhlupheka lesahlangabetana nako esifundzeni sase-Asiya.+ Besicindzeteleke kakhulu, futsi besekungetulu kwemandla etfu, kangangekutsi besesingetsembi nekutsi sitawusindza.+ 9 Ecinisweni, besesibona shengatsi sitfole sigwebo sekufa. Loku kwenteka kuze singatetsembi tsine, kodvwa setsembele kuNkulunkulu+ lovusa labafile. 10 Wasisindzisa engotini lenkhulu yekufa, futsi utasisindzisa; setsembele kuye kutsi utawuchubeka asisindzisa.+ 11 Nani ningasisita ngekutsi nisincusele,+ kuze labanyenti basibongele kuNkulunkulu ngemusa lesiwutfola ngekuphendvulwa kwemithantazo leyentiwa bantfu labanyenti.+

12 Ngobe intfo lesitigabatisa ngayo naleyo nembeza wetfu losifakazela kuyo, kutsi kulelive sitiphetse ngebungcwele nangebucotfo lobuvela kuNkulunkulu, ikakhulukati nakini, hhayi ngekuhlakanipha kwenyama+ kodvwa ngemusa lomkhulu waNkulunkulu. 13 Ngobe asinibhaleli lutfo ngaphandle kwaloko lenitawukhona kukufundza* futsi nikucondze, ngetsemba nekutsi nitawuchubeka nikucondza kahle,* 14 njengobe ngelizinga lelitsite nani nibonile kutsi tsine sisizatfu sekutigabatisa kwenu, nekutsi nani nitawuba ngiso kitsi ngelilanga leNkhosi yetfu Jesu.

15 Ngenca yekutsi ngiyaciniseka, bengifisa kuta kini kucala kuze niphindze nijabule;* 16 ngobe bengifuna kunivakashela nangisaya eMasedoniya futsi nginibone nanangibuya khona, bese ningiphekeletela sigatjana nasengiya eJudiya.+ 17 Ngesikhatsi ngifuna kwenta loku, angitsi angizange ngiyitsatsele phansi lendzaba? Ngihlela tintfo ngekuvumelana nenyama yami yini, kuze ngitsi “Yebo kunjalo,” bese ngiphindze ngitsi “Cha angeke”? 18 Kodvwa singetsembela kuNkulunkulu kutsi loko lesikusho kini akubi ngu-“yebo” kube kungu-“cha.” 19 Ngobe iNdvodzana yaNkulunkulu lenguJesu Khristu, lesashumayela ngayo kini, mine naSilvanosi* kanye naThimothi,+ ayizange ibe ngu-“yebo” kantsi ingu-“cha,” kodvwa “yebo” ube ngu-“yebo” ngayo. 20 Ngobe ngisho nobe tingakanani tetsembiso taNkulunkulu, setibe ngu-“yebo” ngayo.+ Ngako-ke, ngayo sekutsiwa “Amen” kuNkulunkulu,+ futsi loko kumenta akhatinyuliswe ngatsi. 21 Kodvwa nguNkulunkulu locinisekisa kutsi nine kanye natsi sibaKhristu futsi nguye losigcobile.+ 22 Ubeke neluphawu lwakhe kitsi+ futsi ngemoya losetinhlitiyweni tetfu usinike sicinisekiso* saloko lokuseta.+

23 Nyalo ngibeka Nkulunkulu kutsi abe ngufakazi wami wekutsi bengingafuni kunivisa buhlungu kakhulu, ngiko bengisolo ngingeti eKhorinte. 24 Hhayi kutsi singemakhosi ekukholweni kwenu,+ kodvwa sitisebenti letikanye nani kute nijabule, ngobe kukholwa kwenu ngiko lokunenta nime nicine.

2 Ngincume kutsi ngingaphindzi nginivise buhlungu nangita kini. 2 Ngobe nangabe nginivisa buhlungu, ngubani lotangikhutsata ngaphandle kwaloyo lengimvise buhlungu? 3 Ngako loko lengakubhala ngakubhalela kutsi nangita, ngingaviswa buhlungu ngulabo lokufanele ngijabule ngabo, ngobe nginelitsemba lekutsi loko lokungijabulisako nani kuyanijabulisa. 4 Ngobe ngebuhlungu benhlitiyo nangetinyembeti letinyenti, nganibhalela nginelusizi lolukhulu, hhayi kutsi nginivise buhlungu+ kodvwa kuze nati kutsi nginitsandza kangakanani.

5 Nangabe lomunye umuntfu anivise buhlungu,+ akabuvisi mine kodvwa ubuvise nine nonkhe ngelizinga lelitsite—angikacondzi kusho emavi lacinile ngaloku. 6 Lesijeziso lasitfole kubantfu labanyenti simenele loyo muntfu; 7 ngako nyalo kufanele nimtsetselele ngemusa futsi nimdvudvute,+ kuze kungenteki kutsi ngandlela tsite ancotjwe kuva buhlungu lobukhulu.+ 8 Ngiyanikhutsata kutsi nimcinisekise kutsi niyamtsandza.+ 9 Lokunye lokungente nganibhalela loku kutsi bengifuna kubona bufakazi bekutsi niyalalela yini kuto tonkhe tintfo. 10 Nanitsetselela umuntfu kunobe yini, nami ngiyamtsetselela. Ecinisweni, nangabe ngitsetselela (nangabe kukhona lengikutsetselele) ngisuke ngentela kusita nine futsi Khristu ungufakazi waloko, 11 kuze singancotjwa* nguSathane,+ ngobe siyawati emacebo*+ akhe.

12 Ngesikhatsi ngifika eThrowasi+ kutomemetela tindzaba letimnandzi ngaKhristu, futsi ngivulelwe nemnyango wekwenta umsebenti weNkhosi, 13 bengikhatsateke kakhulu* ngobe angimtfolanga umzalwane wami Thithusi.+ Ngako ngabavalelisa ngase ngiya eMasedoniya.+

14 Akabongwe Nkulunkulu lohlale asihola njengemasotja labuya kuyoncoba emphini sikanye naKhristu, nalosebentisa tsine kuze ente liphunga* lelwati ngaye livakale kuto tonkhe tindzawo. 15 Ngobe kuNkulunkulu siliphunga lelimnandzi laKhristu emkhatsini walabasindziswako nalababhubhako; 16 kulababhubhako, siliphunga lekufa leliyisa ekufeni,+ kantsi kulabasindziswako, siliphunga lekuphila leliyisa ekuphileni. Bobani letibafanela kahle letintfo? 17 Ngitsi, ngobe asisibo batsengisi* belivi laNkulunkulu+ njengobe bantfu labanyenti bangibo, kodvwa sikhuluma ngebucotfo sikanye naKhristu, njengalabatfunywe nguNkulunkulu nalababonwa nguye.

3 Sesiphindze siyatincoma yini? Nobe njengalabanye, natsi sidzinga tincwadzi tekusincoma letiya kini nobe letisuka kini? 2 Nine ngekwenu niyincwadzi yetfu+ lebhalwe etinhlitiyweni tetfu naleyatiwako, futsi lefundvwa ngibo bonkhe bantfu. 3 Ngobe nine nikhombisa kutsi niyincwadzi yaKhristu lebhalwe ngitsi tsine tinceku,+ lengakabhalwa nge-inki kodvwa lebhalwe ngemoya waNkulunkulu lophilako, hhayi etibhelekeceni tematje,+ kodvwa etibhelekeceni tenyama, lokutinhlitiyo.+

4 NgaKhristu, sinalelitsemba kuNkulunkulu. 5 Hhayi kutsi ngitsi lesitente sakufanela kahle kwenta lomsebenti, kepha nguNkulunkulu losente sawufanela,+ 6 usente sakufanela kahle kuba tinceku tesivumelwane lesisha,+ hhayi sivumelwane semtsetfo lobhalwe phansi,+ kodvwa sivumelwane semoya; ngobe umtsetfo lobhalwe phansi uletsa kufa,+ kodvwa umoya wona uyaphilisa.+

7 Ngetulu kwaloko, nangabe lomtsetfo loletsa kufa nalobewubhalwe ematjeni+ weta nalenkhatimulo, kangangekutsi bantfwana baka-Israyeli abazange bakwati ngisho nekubuka buso baMosi ngenca yenkhatimulo lebeyisebusweni bakhe,+ lokuyinkhatimulo lebeyitawususwa, 8 ngeke yini tintfo letentiwa ngumoya+ tibe nenkhatimulo lenkhulu kunalena?+ 9 Ngobe nangabe lomtsetfo loletsa sehlulelo+ bewukhatimula,+ kukhishwa kwekulunga kutawukhatimula kakhulu kunawo.+ 10 Ecinisweni, naloko lokwake kwaba nenkhatimulo sekwemukiwe leyo nkhatimulo, ngenca yenkhatimulo lenkhulu kunako.+ 11 Nangabe loko lobekutawususwa kweta nenkhatimulo,+ itawuba yinkhulu kakhulu-ke inkhatimulo yaloko lokusele.+

12 Njengobe sinalelitsemba,+ sikhuluma ngekukhululeka lokukhulu, 13 futsi asenti loko Mosi lakwenta ngesikhatsi ambonya buso bakhe+ ngendvwangu kuze bantfwana baka-Israyeli bangatowubukisisa umphumela waloko lobekutawususwa. 14 Kodvwa tingcondvo tabo tentiwa taba lukhuni.+ Kuze kube ngulamuhla, lendvwangu solo ayisuswa nakufundvwa sivumelwane lesidzala,+ ngobe isuswa ngaKhristu kuphela.+ 15 Ecinisweni, kuze kube ngulamuhla, nobe nini nakufundvwa emavi aMosi,+ kuba nendvwangu lembonya tinhlitiyo tabo.+ 16 Kodvwa nangabe umuntfu aphendvukela kuJehova,* lendvwangu iyasuswa.+ 17 Jehova* unguMoya,+ futsi lapho kunemoya waJehova* khona, kuba nenkhululeko.+ 18 Nanobe sonkhe sinebuso lobungakambonywa, siveta inkhatimulo yaJehova* njengetibuko, futsi siyaguculwa sibe ngumfanekiso munye, sisuke ezingeni lelitsite lenkhatimulo siye kulelinye,* ngendlela Jehova* longuMoya* lakwenta ngayo.+

4 Njengobe sinalomsebenti ngenca yemusa lesentelwa wona, asipheli emandla. 2 Kodvwa sitilahlile tintfo tebumnyama naletilihlazo, asiphili ngebucili, asilisontsi nelivi laNkulunkulu,+ kodvwa ngekwenta liciniso libonakale siba sibonelo kubo bonkhe bonembeza bebantfu embikwaNkulunkulu.+ 3 Nangabe tindzaba letimnandzi lesitimemetelako tifihlekile, tisuke tifihleke kulababhubhako, 4 lokungulabangakholwa, labo nkulunkulu walelive*+ lavale tingcondvo tabo,+ kuze kungatokhanya+ kukhanya kwetindzaba letimnandzi letikhatimulako letimayelana naKhristu, longumfanekiso waNkulunkulu.+ 5 Ngobe asishumayeli ngatsi, kodvwa sishumayela ngekutsi Jesu Khristu uyiNkhosi, nekutsi ngenca yakhe tsine sitinceku tenu. 6 Nkulunkulu nguye lowatsi: “Kukhanya akukhanye ebumnyameni,”+ futsi ngebuso baKhristu ukhanyise tinhlitiyo tetfu+ ngelwati lolukhatimulako lolumayelana naye.

7 Kodvwa sinalomcebo+ etitjeni telubumba,+ kuze emandla lamakhulu kakhulu abe aNkulunkulu, angabi etfu.+ 8 Sicindzeteleke kakhulu ngato tonkhe tindlela, kodvwa hhayi kutsi asisakwati kunyakata; sicakekile, kodvwa hhayi kutsi sesite indlela yekuphuma;*+ 9 siphatfwa kabi, kodvwa asikalahlwa;+ sijikwa phansi, kodvwa asibhubhi.+ 10 Emitimbeni yetfu sihlale sibeketelela kuphatfwa kabi lokusenta sibe sengotini yekufa njengaJesu,+ kuze kuphila kwakhe kutobonakala emitimbeni yetfu. 11 Ngobe ngenca yaJesu, tsine lesiphilako sihlala sisengotini yekufa,+ kuze kuphila kwakhe kutobonakala emitimbeni yetfu lefako. 12 Ngenca yaloko tsine siyafa, kodvwa loko kwenta kutsi nine niphile.

13 Njengobe sinemoya wekukholwa lofana naloyo lokwabhalwa ngawo nakutsiwa: “Ngakholwa, ngako ngakhuluma”;+ natsi siyakholwa ngako siyakhuluma, 14 futsi siyati kutsi Loyo lowavusa Jesu utasivusa natsi njengaye, bese usiletsa embikwaJesu sikanye nani.+ 15 Ngobe tonkhe letintfo tentelwe nine, khona umusa lomkhulu waNkulunkulu utowandza ngobe labanyenti babonga Nkulunkulu futsi umphumela waloko kuba kutsi akhatinyuliswe.+

16 Ngako-ke asipheli emandla, kodvwa ngisho nobe imitimba yetfu ihhohloka, kepha tingcondvo netinhlitiyo tetfu tivuselelwa malanga onkhe. 17 Ngobe nanobe kuhlupheka* kukwesikhashana futsi kumelula, kitsi kuveta inkhatimulo lengeke icatsaniswe nalutfo* nalehlala phakadze;+ 18 futsi emehlo etfu ahlale anake tintfo letingabonwa,+ hhayi letibonwako. Ngobe tintfo letibonwako tesikhashana, kodvwa tintfo letingabonwa tihlala phakadze.

5 Siyati kutsi nayidzilitwa* lendlu yetfu yasemhlabeni, lokungulelithende,+ Nkulunkulu utasinika indlu letawuhlala phakadze ezulwini futsi lengakentiwa ngetandla.+ 2 Ngobe kulendlu* siyalila, futsi silangatelela kugcoka indlu* yetfu levela ezulwini,*+ 3 kuze nasesiyigcokile singatfolakali singcunu. 4 Ecinisweni, tsine lesikulelithende siyalila, futsi siyasindvwa; ngobe asifuni kuyikhumula lendlu, kodvwa sifuna kugcoka lelenye+ kuze kuphila kutogwinya loko lokufako.+ 5 NguNkulunkulu lowasenta sakulungela loku,+ futsi nguye lowasinika umoya njengesicinisekiso* saloko lokuseta.+

6 Ngako sihlale siciniseka futsi sati kutsi njengobe sisaphila kulomtimba,* asikho kanye neNkhosi,+ 7 ngobe siphila* ngekukholwa, hhayi ngekubona. 8 Siyaciniseka, futsi sikubona kuncono kutsi singabi kulomtimba, kodvwa likhaya letfu libe seNkhosini.+ 9 Ngisho nobe sikanye nayo ekhaya nobe singekho nayo, senta konkhe lokusemandleni etfu kutsi semukeleke kuyo. 10 Ngobe sonkhe kufanele sime* embikwesihlalo saKhristu sekwehlulela, kuze nguloyo naloyo anikwe umvuzo ngalakwente asekulomtimba, kungaba ngulokuhle nobe lokubi.+

11 Ngako, njengobe sati kutsi kuyini kwesaba iNkhosi, siyachubeka senta bantfu bakholwe, futsi Nkulunkulu usati kahle. Kodvwa ngetsemba kutsi nabonembeza benu basati kahle. 12 Akusiko kutsi sesiphindze siyatincoma kini, kodvwa sinikhutsata kutsi nitigabatise ngatsi, kuze nikhone kubaphendvula labo labatigabatisa ngalokubonakala ngephandle+ kunekutsi batigabatise ngalokusenhlitiyweni. 13 Ngobe nangabe besihlanya,+ loko bekukwaNkulunkulu; nangabe siphilile engcondvweni, loko kwenu. 14 Lutsandvo Khristu lanalo luyasichuba, ngobe naku lesesiphetse ngako: Umuntfu munye wafela bonkhe bantfu,+ ngobe bonkhe bebafile. 15 Wafela bonkhe bantfu kuze labo labaphilako bangasatiphileli bona,+ kodvwa baphilele loyo lowabafela waphindze wavuswa.

16 Kusukela nyalo, kute umuntfu lesimbuka ngembono webantfu.+ Ngisho nobe Khristu besike sambuka ngembono webantfu, nyalo asisambuki ngaleyo ndlela.+ 17 Nangabe umuntfu amunye naKhristu, usidalwa lesisha;+ tintfo letindzala setendlulile, futsi sekuvele tintfo letinsha. 18 Kodvwa tonkhe tintfo tivela kuNkulunkulu, lowasenta sabuyisana naye ngaKhristu,+ nalowasinika lomsebenti wekubuyisana,+ 19 lokusho kutsi Nkulunkulu wenta live labuyisana naye ngaKhristu,+ wangalibaleli tono talo,+ futsi wasiphatsisa umlayeto wekubuyisana.+

20 Ngako singemancusa+ lamelele Khristu,+ kube shengatsi Nkulunkulu uncenga ngatsi. Njengobe simelele Khristu sincenga bantfu sitsi: “Buyisanani naNkulunkulu.” 21 Loyo longazange asati sono+ wamenta waba ngumhlatjelo wesono* ngenca yetfu, kuze ngaye sitewuba ngulabalungile kuNkulunkulu.+

6 Njengobe sisebenta naNkulunkulu,+ natsi siyanikhutsata kutsi ningawemukeli umusa wakhe lomkhulu bese nilahlekelwa yinjongo yawo.+ 2 Ngobe Nkulunkulu utsi: “Ngesikhatsi lesifanele ngakuva, futsi ngelilanga lensindziso ngakusita.”+ Lesi sengiso sikhatsi lesifanele, futsi leli sengilo lilanga lensindziso.

3 Asiniki muntfu sizatfu sekukhubeka nganobe nguyiphi indlela, kuze umsebenti wetfu ungatfolakali uneliphutsa;+ 4 kodvwa ngato tonkhe tindlela sikhombisa kutsi sitisebenti taNkulunkulu,+ ngekucinisela kulokunyenti, ngetinhlupheko, ngetikhatsi tekweswela, ngebumatima,+ 5 ngekushaywa, ngekufakwa emajele,+ ngetiphitsiphitsi, ngekutikhandla, ngekungalali ebusuku, ngendlala,+ 6 ngekuhlanteka, ngelwati, ngekubeketela,+ ngemusa,+ ngemoya longcwele, ngelutsandvo lolute kutentisa,+ 7 ngekukhuluma liciniso, ngemandla aNkulunkulu;+ ngetikhali tekulunga+ esandleni sangesekudla* nasesandleni sangesencele,* 8 ngenkhatimulo nangekwedzelelwa, ngemibiko lemibi nalemihle. Siphatfwa njengebakhohlisi kodvwa sibe sineliciniso, 9 sitsatfwa njengalabangatiwa kodvwa sibe satiwa kahle, sitsatfwa njengalabafanelwe kufa* kodvwa sisaphila,+ siyajeziswa* kodvwa asinikelwa ekufeni,+ 10 sinjengalabeva buhlungu kodvwa sihlale sijabulile, sinjengalabeswele kodvwa senta labanyenti banjinge, sinjengalabete lutfo kodvwa sinato tonkhe tintfo.+

11 Asikanifihleli lutfo nine baseKhorinte, futsi sivule netinhlitiyo tetfu. 12 Asinigodleli lutsandvo lwetfu,+ kodvwa nine nisigodlele lutsandvo lwenu. 13 Ngako ngikhuluma nani shengatsi ngikhuluma nebantfwana bami, nani yentani lokufanako, vulani tinhlitiyo tenu.+

14 Ningaboshelwa* ejokeni linye nebantfu labangakholwa.+ Ngobe kulunga kunabudlelwane buni nekungalungi?+ Kukhanya kunabudlelwane buni nebumnyama?+ 15 Ngetulu kwaloko, Khristu unabudlelwane buni naBheliyali?*+ Umuntfu lowetsembekile* ufana ngani* nemuntfu longakholwa?+ 16 Lithempeli laNkulunkulu linakuvumelana kuni netithico?+ Ngobe tsine silithempeli laNkulunkulu lophilako;+ njengobe nje Nkulunkulu atsi: “Ngitawuhlala+ futsi ngihambe emkhatsini wabo, ngitawuba nguNkulunkulu wabo, bona babe bantfu bami.”+ 17 “Jehova* utsi: ‘Ngako-ke phumani kubo, nitehlukanise nabo, futsi ningatsintsi lutfo lolungcolile’”;+ “‘mine ngitanemukela.’”+ 18 “‘Ngitawuba ngubabe kini,+ nani nitawuba ngemadvodzana nemadvodzakati kimi,’+ kusho Jehova* longuSomandla.”

7 Bazalwane labatsandzekako, njengobe sinaletetsembiso,+ asitihlante kuko konkhe kungcola kwenyama nekwemoya,+ siphelelise bungcwele betfu ngekwesaba Nkulunkulu.

2 Semukeleni etinhlitiyweni tenu.+ Kute lesimphetse kabi, kute lesimonile futsi kute nalesisitakele ngaye.+ 3 Loku angikusho ngenhloso yekunibeka licala. Ngobe ngishito ekucaleni kutsi nine nisetinhlitiyweni tetfu kuze sitokufa kanye kanye futsi siphile kanye kanye. 4 Nangikhuluma nani ngikhuluma ngekukhululeka lokukhulu. Ngitigabatisa kakhulu ngani. Ngidvudvuteke kakhulu futsi kuko konkhe kuhlupheka kwetfu ngitiva ngigcwele injabulo.+

5 Ecinisweni ngesikhatsi sifika eMasedoniya,+ imitimba* yetfu ayizange ikutfole kuphumula, kodvwa besisolo sihlupheka ngato tonkhe tindlela—bekunekulwa ngephandle, kunekwesaba ngekhatsi. 6 Nanobe kunjalo, Nkulunkulu lodvudvuta labo labephukile etihlitiyweni,+ wasidvudvuta natsi ngekuba khona kwaThithusi. 7 Asidvudvutwanga kufika kwaThithusi kuphela, kepha sadvudvutwa nakutsi wabuya akhutsatekile ngenca yenu, njengobe afike wasibikela ngesifiso senu sekungibona, nangebuhlungu lobukhulu lebenibuva kanye nangekukhatsateka* kwenu ngami; ngako ngajabula kakhulu.

8 Nanobe kungenteka kutsi nganivisa buhlungu ngencwadzi lenganibhalela yona,+ kodvwa angitisoli ngaloko. Ngisho nobe kungenteka kutsi ngatisola ekucaleni (ngiyabona kutsi lencwadzi yanivisa buhlungu, kodvwa kwaba kwesikhashana), 9 nyalo sengiyajabula, hhayi ngenca yekutsi nganivisa buhlungu, kodvwa ngenca yekutsi kuva kwenu buhlungu kwanenta naphendvuka. Ngobe neva buhlungu ngekuvumelana nentsandvo yaNkulunkulu. Kungako loko lesakusho kungazange kunilimate. 10 Kuva buhlungu ngekuvumelana nentsandvo yaNkulunkulu kuholela ekuphendvukeni kube kusindziswa, lokuyintfo longeke utisole ngayo;+ kodvwa kuva buhlungu ngendlela lefana neyebantfu balelive kuholela ekufeni. 11 Bukani-ke kutsi kuva kwenu buhlungu ngekuvumelana nentsandvo yaNkulunkulu kuvete kutimisela lokungakanani kini, kwaveta kutihlenga, intfukutselo, kwesaba, sifiso lesihle, kukhutsala kanye nekulungisa lokubi.+ Kuto tonkhe tintfo nitivete nimsulwa* kulendzaba. 12 Nanobe nganibhalela, loko angizange ngikwentele loyo lobekonile,+ nobe loyo lobekoniwe, kodvwa ngabhala kuze kutimisela kwenu kubonakale embikwaNkulunkulu nasemkhatsini wenu. 13 Kungako-ke sidvudvutekile.

Kodvwa ngetulu kwekudvudvuteka kwetfu sajabula kakhulu ngekubona Thithusi ajabulile, ngenca yekutsi nonkhe beniwuvuselele umoya wakhe. 14 Ngobe nangabe ngatigabatisa ngani kuye, angizange ngihlazeke; kodvwa njengobe tonkhe letintfo lesanitjela tona betiliciniso, nekutigabatisa ngani kuThithusi nako kube liciniso. 15 Nendlela lanitsandza ngayo yinkhulu kakhulu ngobe usakhumbula kutsi nonkhe niyalalela,+ futsi usayikhumbula nendlela lenamemukela ngayo ngenhlonipho lenkhulu. 16 Ngiciniseka* mbamba kutsi nitawenta lokulungile kuto tonkhe tintfo, kungako ngijabula.

8 Bazalwane, sifuna nati ngemusa lomkhulu Nkulunkulu lawentele emabandla aseMasedoniya.+ 2 Ngesikhatsi bahlupheka ngenca yekuvivinywa lokukhulu, bapha labanye ngenjabulo lenkhulu ngisho nobe bebeswele kakhulu. Loku kwakhombisa kutsi banesandla lesivulekile.* 3 Ngobe banikela ngako konkhe lebebangakhona kunikela ngako,+ ecinisweni bekungetulu kwaloko lebebanako,+ futsi mine ngingakufakazela loko. 4 Bebachubeka basincengisisa kuze batfole litfuba lekupha baphindze bahlanganyele nasemsebentini wekusita labangcwele.+ 5 Akuzange kube njengobe besilindzele, kodvwa ngentsandvo yaNkulunkulu, bacale batinikela eNkhosini base batinikela nakitsi. 6 Ngako sakhutsata Thithusi+ kutsi njengobe bekawucalile lomsebenti emkhatsini wenu, kufanele aphindze awucedzele. 7 Nine nenta kahle kuto tonkhe tintfo. Kukholwa kwenu kucinile, ninelikhono lekukhuluma, ninelwati lolunyenti, niyatimisela kuko konkhe lenikwentako, futsi nibatsandza mbamba labanye njengobe natsi sinitsandza. Shengatsi ningachubeka nephana.+

8 Loku lengikushoko akusiwo umyalo, kodvwa ngifuna nati ngekutimisela kwalabanye, futsi ngifuna kuhlola kutsi lutsandvo lwenu lungilo sibili yini. 9 Ngobe niyawati umusa lomkhulu weNkhosi yetfu Jesu Khristu, kutsi nanobe bekanjingile waba nguloweswele ngenca yenu,+ kuze nitonjinga ngekweswela kwakhe.

10 Asenginivetele umbono wami+ ngalendzaba: Loku kutawusita nine ngobe emnyakeni lowengcile nacala kwenta lomsebenti futsi anigcinanga lapho, kodvwa naveta nesifiso senu sekuwenta. 11 Ngako cedzani loko lesenikucalile. Nanenta njalo nitawupha ngaloko leninako, futsi loko kutawuhambisana nesifiso senu. 12 Kupha ngalokusuka enhlitiyweni kuyamjabulisa Nkulunkulu, ngobe ufuna umuntfu aphe ngaloko lanako,+ hhayi ngaloko lete kona. 13 Angifuni kwenta kutsi kube melula kulabanye kepha kube matima kini; 14 kodvwa injongo kutsi kube nekulingana, kuze inala leninayo nyalo ihlangabetane netidzingo tabo, nenala yabo ihlangabetane netidzingo tenu, khona kutowuba nekulingana. 15 Kunjengobe nje kubhaliwe kwatsiwa: “Umuntfu lobekanalokunyenti akazange abe nalokunyenti kakhulu, nemuntfu lobekanalokuncane akazange abe nalokuncane kakhulu.”+

16 Ngako siyambonga Nkulunkulu ngekwenta kutsi Thithusi+ anikhatsalele njengatsi, 17 ngobe usilalele lesikhutsato, futsi njengobe alangatelela kakhulu kwenta loko lesimcele kona, uta kini ngekutitsandzela. 18 Simtfumela kutsi ete kini akanye nemzalwane lodvunyiswa kuwo onkhe emabandla ngenca yekushumayela tindzaba letimnandzi. 19 Akusiko loko kuphela, kodvwa wabekwa ngemabandla kutsi ahambe natsi nasihambisa lesipho kuze kutokhatinyuliswa iNkhosi, futsi kufakazelwe nekutsi sitimisele kusita. 20 Ngako asifuni kutsi kube khona umuntfu lositfola sinelicala ngalomnikelo lesiwuhambisako+ nalowentiwe ngemusa. 21 Ngobe ‘sinakekela tonkhe tintfo ngekwetsembeka, hhayi embikwaJehova* kuphela, kodvwa nasembikwebantfu.’+

22 Ngetulu kwaloko, sibatfumela kutsi bete kini bakanye nemzalwane wetfu lesesimbonile kutsi utimisele etintfweni letinyenti, kodvwa nyalo sewutimisele mbamba ngenca yelitsemba lelikhulu lanalo kini. 23 Kepha nangabe ninembuto ngaThithusi, usisebenti lengibambisene* naso nalengikanye naso kuze kusitakale nine; futsi nangabe ninemibuto ngalabazalwane betfu, babaphostoli bemabandla futsi bakhatimulisa Khristu. 24 Ngako bakhombiseni lutsandvo lwenu,+ nente emabandla abone sizatfu lesasenta satigabatisa ngani.

9 Mayelana nalomsebenti lowentelwa labangcwele,+ kute sidzingo sekutsi nginibhalele ngawo, 2 ngobe ngiyati kutsi nitimisele, futsi ngiyatigabisa ngani kubaseMasedoniya, kutsi sekuphele umnyaka nine base-Akhaya nikulungele kusita, futsi kutimisela kwenu sekwente labanyenti babo baba nemdlandla. 3 Kodvwa ngitfumela labazalwane, kuze kutigabatisa kwetfu ngani kulendzaba kungabi lite, kepha kuze nitokulungela kusita, njengobe nje ngasho kutsi nitawube senikulungele. 4 Kodvwa-ke nangabe baseMasedoniya bangefika nami banikhandze ningakakulungeli, tsine kanye nani sitawuhlazeka ngekunetsemba kwetfu. 5 Ngako ngikubone kufanele kukhutsata labazalwane kutsi bete kini kucala futsi basilungise kusenesikhatsi lesipho senu lesikhulu lenasetsembisa, kuze sihlale silungile, sibe sipho lesentiwe ngesihle hhayi ngekuphocelelwa.

6 Kodvwa kuloku, loyo lohlanyela kancane utawuvuna kancane; naloyo lohlanyela kakhulu utawuvuna kakhulu.+ 7 Nguloyo naloyo akente njengobe ancumile enhlitiyweni yakhe, hhayi ngekutitila* nobe ngekucindzetelwa,+ ngobe Nkulunkulu utsandza umuntfu lopha ajabulile.+

8 Ngetulu kwaloko, Nkulunkulu uyakwati kwenta umusa wakhe lomkhulu uphuphume kini, kuze nihlale ninalokwenele kuto tonkhe tintfo, nibe nalokunyenti lokutanisita nanenta yonkhe imisebenti lemihle.+ 9 (Kunjengobe nje kubhaliwe kwatsiwa: “Uphe ngenhlitiyo lekhululekile, wapha labeswele. Kulunga kwakhe kutawuhlala kuze kube phakadze.”+ 10 Loyo lonika umuntfu lohlanyelako inhlanyelo lenyenti kanye nesinkhwa sekudla, utaninika inhlanyelo lenitayihlanyela futsi ayandzise, aphindze ente kutsi nitfole imiphumela lemihle ngenca yekulunga kwenu.) 11 Nkulunkulu unibusise kakhulu kuze nani nibaphe kakhulu labanye, futsi bantfu batawubonga Nkulunkulu ngenca yesipho senu lesitasinika labanye; 12 ngobe injongo yalomsebenti lesiwentela labanye ayisiko nje kuphela kunakekela kahle tidzingo talabangcwele,+ kodvwa lomsebenti utawenta nekutsi bantfu labanyenti babonge Nkulunkulu. 13 Ngebufakazi lobuletfwa ngulomsebenti, bakhatimulisa Nkulunkulu ngenca yekutsi nine niyatilalela tindzaba letimnandzi lenitimemetelako letimayelana naKhristu, nekutsi ninikela ngekukhululeka, kubo nakubo bonkhe labanye.+ 14 Ngekunincusela, baveta lutsandvo labanalo ngani ngenca yemusa lomkhulu Nkulunkulu lanentele wona.

15 Akabongwe Nkulunkulu ngalesipho sakhe lesingachazeki.

10 Mine Pawula nginincenga ngemoya lophansi* nangemusa waKhristu,+ nanobe ngibonakala ngedzelelekile nanginani,+ kodvwa ngibonakala nginesibindzi nangingekho nani.+ 2 Ngifisa kutsi nangifika, labo labacabanga kutsi siphila ngendlela yenyama babe sebashintjile, kuze kungadzingeki kutsi ngibekhute kamatima. 3 Ngobe nanobe siphila enyameni, asilwi ngekuvumelana nayo. 4 Tikhali lesilwa ngato atisito tenyama,+ kodvwa Nkulunkulu utente taba nemandla+ ekubhidlita tintfo letimbelwe tacina. 5 Sibhidlita imicabango nato tonkhe tintfo letiphakeme letimelene nelwati ngaNkulunkulu;+ futsi sitfumba yonkhe imicabango kuze ilalele Khristu. 6 Nitawutsi nasenikhombisile kutsi senilalela mbamba, sibese siyakulungela kujezisa nobe ngubani longalaleli.+

7 Nine nibuka tintfo ngendlela letibonakala ngayo ngephandle. Nangabe umuntfu aciniseka kutsi waKhristu, akacabange nganali liciniso: Kutsi njengobe yena awaKhristu, natsi sibaKhristu. 8 Ngisho nobe ngingatigabatisa kakhulu ngeligunya iNkhosi lesinike lona lekutsi sinakhe ekukholweni, kepha singanibhidliti,+ bengingeke ngihlazeke. 9 Loku ngikusho ngobe angifuni kubonakale shengatsi bengetama kunesabisa ngetincwadzi lenginibhalela tona. 10 Labanye batsi: “Tincwadzi takhe tinesisindvo nemandla, kodvwa nakakhona uyedzeleleka kantsi nenkhulumo yakhe ayinasisindvo.” 11 Umuntfu losho loko akacabange nganaku: Kutsi loko lesikusho etincwadzini nasingekho, ngiko lesitawukwenta nasesikhona.+ 12 Ngobe akwenteki kutsi sitifananise nalabo labatincomako+ nobe siticatsanise nabo. Kodvwa nabatilinganisa bona futsi baticatsanisa bona, basuke bete kucondza.+

13 Tsine ngeke sitigabatise size secele ngale kwemincele lesisikelwe yona, kodvwa sitawutigabatisa ngekhatsi kwemincele Nkulunkulu lasisikele yona,* lefika ngisho nakini.+ 14 Ngesikhatsi sita kini, bekungasiko kutsi seca imincele yetfu, ngobe ngitsi lesafika kucala kini netindzaba letimnandzi letimayelana naKhristu.+ 15 Asitigabatisi ngemsebenti walomunye umuntfu, lokusho kutigabatisa ngale kwemincele lesisikelwe yona, kodvwa setsemba kutsi njengobe kukholwa kwenu kuchubeka kukhula, loko lesikwentile nitakubona kukukhulu nanikucatsanisa nemincele yetfu. Ngako-ke sitawuchubeka sikhula, 16 kuze simemetele tindzaba letimnandzi emaveni langale kwenu, khona singatotigabatisa eminceleni yalomunye umuntfu, lapho tintfo setivele tentiwe khona. 17 “Kodvwa lotigabatisako, akatigabatise ngaJehova.”*+ 18 Ngobe umuntfu lotincomako akusuye lowemukelekako,+ kodvwa lowemukelekako nguloyo lonconywa nguJehova.*+

11 Ngifisa shengatsi ningangibeketelela njengobe ngibonakala shengatsi anginangcondvo. Ecinisweni vele niyangibeketelela! 2 Ngobe nginesikhwele ngani, sikhwele lesifana nesaNkulunkulu,* njengobe ngetsembisa kunendzisa endvodzeni yinye, kuze nginetfule njengentfombi ntfo* kuKhristu.+ 3 Kodvwa ngiyesaba kutsi njengobe inyoka yayenga Eva ngebucili bayo,+ tingcondvo tenu tingahle tidukiswe bese niyayekela kuba cotfo nekuba msulwa* ngendlela lefanele Khristu.+ 4 Ngobe nyalo nakufika umuntfu ashumayela ngalomunye Jesu ngaphandle kwaloyo lesashumayela ngaye, nobe nanemukela lomunye umoya ngaphandle kwaloyo lenawemukela, nobe nemukela letinye tindzaba letimnandzi ngaphandle kwaleto lenatemukela,+ nivele nimbeketelele loyo muntfu. 5 Ngicabanga kutsi kute ngisho nayinye intfo lengenta ngibukeleke phansi kunalabaphostoli benu lababonakala babahle.+ 6 Ngisho nobe ngite likhono lekukhuluma,+ nginalo lwati; loku sikwente kwacaca kini ngato tonkhe tindlela nakuto tonkhe tintfo.

7 Ngatishumayela ngekutitsandzela tindzaba letimnandzi taNkulunkulu ngaphandle kwekunibhadalisa futsi ngatitfoba kuze kuphakanyiswe nine. Ngona yini ngekwenta loko?+ 8 Ngemukela lusito kulamanye emabandla, futsi kwaba ngatsi ngiyawebela kuze ngitosita nine.+ 9 Kodvwa ngesikhatsi senginani futsi ngeswele, kute umuntfu lengaba ngumtfwalo kuye, ngobe bazalwane lebebasuka eMasedoniya batinakekela kahle tidzingo tami.+ Bengetama ngato tonkhe tindlela kutsi ngingabi ngumtfwalo kini, futsi ngitawuchubeka ngenta njalo.+ 10 Njengobe ngineliciniso laKhristu, ngeke ngiyekele kutigabatisa+ etifundzeni tase-Akhaya. 11 Ngasiphi sizatfu? Ngobe nginganitsandzi yini? Nkulunkulu uyati kutsi ngiyanitsandza.

12 Loku lengikwentako ngitawuchubeka ngikwenta,+ kuze labo labafuna kubonakala balingana natsi babe bete sizatfu sekutigabatisa ngetintfo* labatentile. 13 Ngobe bantfu labanjalo babaphostoli bemanga, futsi batisebenti letinebucili, benta shengatsi babaphostoli baKhristu.+ 14 Loku akumangalisi ngobe naSathane uchubeka enta shengatsi uyingilosi yekukhanya.+ 15 Akumangalisi-ke nangabe netinceku takhe tichubeka tenta shengatsi titinceku tekulunga. Kodvwa siphetfo sato sitawuhambisana nemisebenti yato.+

16 Ngiphindze ngiyanitjela ngitsi: Akube bete umuntfu locabanga kutsi anginangcondvo. Kodvwa ngisho nobe nicabanga kanjalo, ngemukeleni njengobe nginjalo, kuze nami ngikhone kutigabatisa kancane. 17 Angilingisi sibonelo seNkhosi ngendlela lengikhuluma ngayo nyalo, kodvwa ngikhuluma njengemuntfu longenangcondvo, lotigabatisako futsi lotetsembako. 18 Njengobe labanyenti batigabatisa ngetintfo talelive,* nami ngitawutigabatisa. 19 Njengobe-ke nine nitsi ninengcondvo, kuyanijabulisa kubeketelela bantfu labangenangcondvo. 20 Ecinisweni, nibeketelela nobe ngubani lonigcilatako, lotsatsa tintfo tenu, lonemuka loko leninako, lotenta loncono kunani, nanobe ngubani lonishaya ngemphama ebusweni.

21 Sitiva sinemahloni ekusho loku, ngobe kubonakala shengatsi siyesaba.

Kodvwa nangabe labanye bete emahloni ekutigabatisa, nami-ke ngite emahloni ekutigabatisa, ngisho nobe labanye bangangitsatsa njengemuntfu longenangcondvo. 22 BangemaHebheru yini? Nami nginguye.+ Bangema-Israyeli yini? Nami nginguye. Babantfwana* ba-Abrahama yini? Nami nginguye.+ 23 Batisebenti taKhristu yini? Ngiphendvula njengeluhlanya, ngitsi mine ngingulesihamba embili: Ngente umsebenti lomnyenti,+ ngaboshwa tikhatsi letinyenti,+ ngashaywa tikhatsi letinyenti, futsi kanyenti ngaba sengotini yekufa.+ 24 Tikhatsi letisihlanu emaJuda angishaya imivimba lengu-39,+ 25 ngashaywa ngemizaca tikhatsi letintsatfu,+ ngagcotjwa ngematje+ kanye, ngaphukelwa ngumkhumbi+ katsatfu, ngacitsa busuku nemini elwandle; 26 ngatsatsa luhambo kanyenti, ngaba setingotini emifuleni, etigebengwini, kubantfu besive sakitsi,+ kubantfu betive,+ emadolobheni,+ etigangeni, elwandle, nakubazalwane mbumbulu, 27 bengikhandleka futsi ngisebenta kamatima, bengiphelelwa butfongo tikhatsi letinyenti,+ ngilamba futsi ngoma,+ ngite kudla tikhatsi letinyenti,+ ngiva emakhata futsi ngite nekwekugcoka.*

28 Kodvwa ngaphandle kwaleto tintfo, kunentfo lengihlupha malanga onkhe:* Kukhatsateka ngawo onkhe emabandla.+ 29 Ngubani loba butsakatsaka mine ngingabi butsakatsaka? Ngubani lowako ekukholweni kodvwa mine ngingatfukutseli?

30 Nangabe kufanele ngitigabatise, ngitawutigabatisa ngetintfo letiveta butsakatsaka bami. 31 Nkulunkulu longuBabe weNkhosi Jesu, lokunguye lokufanele advunyiswe phakadze, uyati kutsi angicambi emanga. 32 EDamaseko, umbusi longephansi kweNkhosi Arethasi bekagadze lidolobha lebaseDamaseko kuze angibambe, 33 kodvwa ngehliswa ngabhasikidi ngelifasitelo lebeliselubondzeni lwalelidolobha,+ futsi ngaphunyula etandleni takhe.

12 Kufanele ngitigabatise. Kona akusiti, kodvwa sengitawukhuluma ngemibono+ nangetembulo letivela eNkhosini.+ 2 Kunendvodza lengiyatiko lebeyimunye naKhristu, lokwatsi eminyakeni lengu-14 leyengcile yatsatfwa yayiswa ezulwini lesitsatfu—kodvwa kutsi beyikulomtimba yini nobe cha, angati, nguNkulunkulu lowatiko. 3 Ngiyayati leyo ndvodza—⁠kodvwa kutsi beyikulomtimba yini nobe beyingekho kuwo, angati, nguNkulunkulu lowatiko. 4 Lendvodza yatsatfwa yayiswa epharadisi, futsi yeva emavi langeke akhulunywe nalokute umuntfu lovumeleke kuwakhuluma. 5 Ngitawutigabatisa ngendvodza lenjalo, kodvwa mine ngeke ngitigabatise, ngaphandle kwekutigabatisa ngebutsakatsaka bami. 6 Nakungenteka ngifune kutigabatisa, kutawube kungasiko kutsi ngite ingcondvo, ngobe ngitawube ngikhuluma liciniso. Kodvwa ngikhetsa kungenti kanjalo, kuze kube bete longiphakamisa kakhulu kwendlula loko langibona ngikwenta nobe lakuva kimi. 7 Kute lokufanele angibone ngincono ngenca nje yekutsi ngitfola letembulo letimangalisako.

Ngako-ke kuze ngingativa ngiphakeme kakhulu, ngafakwa linyeva enyameni,+ lelisebenta njengengilosi yaSathane, khona litochubeka lingilimata* kuze ngingaphakanyiswa kakhulu. 8 Ngase ngincenga iNkhosi katsatfu ngaloku, kutsi ilisuse kimi. 9 Kodvwa yona yatsi: “Umusa wami lomkhulu ukwenele, ngobe emandla ami abonakala ngalokucacile nawubutsakatsaka.”+ Ngako ngitawube ngijabulile nangitigabatisa ngebutsakatsaka bami, kuze emandla aKhristu achubeke ahleti kimi njengelithende. 10 Ngenca yaKhristu ngiyajabula nangabe ngibutsakatsaka, ngetfukwa, ngeswela, ngiphatfwa kabi futsi ngibhekana nebumatima. Ngobe nangibutsakatsaka, kulapho ngiba nemandla khona.+

11 Ngibe bete ingcondvo, kodvwa ngini leningibangele loko, ngobe bekufanele ngabe nginconywe ngini. Kunobe yini, angizange ngibukeleke phansi kunebaphostoli benu labahle kakhulu, ngisho nobe ngingasilutfo.+ 12 Ecinisweni, nganikhombisa timphawu tekutsi ngingumphostoli futsi loko ngakuveta ngekubeketela lokukhulu,+ ngetibonakaliso, ngetimangaliso nangemisebenti yemandla.+ 13 Yini leyanenta nehluka kulamanye emabandla, ngaphandle nje kwekutsi angizange ngibe ngumtfwalo kini?+ Ngicela ningicolele kuloku.

14 Sekwesitsatfu ngilungele kuta kini, futsi ngeke ngibe ngumtfwalo. Ngobe angifuni tintfo tenu+ kodvwa ngifuna nine; njengobe bantfwana+ kungakalindzeleki kutsi bacongelelele batali babo lokutsite, kodvwa batali ngibo labacongelelela bantfwana babo lokutsite. 15 Mine ngitawusebentisa konkhe lenginako, futsi nami ngitawusetjentiswa ngalokugcwele ngenca yenu.+ Nangabe nginitsandza kakhulu, kufanele ngitsandvwe kancane yini mine? 16 Nanobe kunjalo, angizange nginetfwese umtfwalo.+ Kodvwa nine nitsi “benginemachinga” futsi nganibamba “ngebucili.” 17 Angitsi angisitakalanga ngani nganobe ngumuphi kulabazalwane lengabatfuma? 18 Ngancenga Thithusi kutsi ete kini futsi ngatfuma umzalwane kanye naye. Angitsi Thithusi akazange asitakale ngani?+ Asizange yini sente tintfo ngemoya lofanako? Futsi asizange yini sihambe etinyatselweni letifanako?

19 Benisolo nicabanga kutsi besitivikela kini yini? Sikhuluma ngaKhristu embikwaNkulunkulu. Kodvwa konkhe loku lesikwentako bazalwane labatsandzekako, sikwentela kwakha nine. 20 Ngobe ngesaba kutsi nangifika, kungenteka nginganitfoli ninguloko lengikufisako futsi kungenteka nami ngingabi nguloko lenikufisako, kodvwa kungenteka kube nemibango, umona, intfukutselo, kuphikisana, kunyundzela, kuhleba, labanye bagcwale umgcabho, kube nanetiphitsiphitsi. 21 Kungenteka nangiphindze ngifika, Nkulunkulu wami angihlaze embikwenu, futsi kudzingeke kutsi ngililele labo lebebonile kodvwa labasolo bangakaphendvuki ekungcoleni kwabo, nasekugwadleni,* kanye nasekwenteni tono letihambisana nekwedzelela.*

13 Nyalo sekwesitsatfu ngitsi ngita kini. “Kudzingeka kube nabofakazi* lababili nobe labatsatfu kuze kucinisekiswe kutsi indzaba iliciniso.”+ 2 Nanobe ngingekho nyalo, kodvwa ngatsi sengikhona kwesibili, futsi ngiphindze ngiyabecwayisa labo lebebonile kanye nabo bonkhe labanye, kutsi nakungenteka ngiphindze ngite lapho, ngeke ngibayekele, 3 njengobe nifuna bufakazi bekutsi Khristu usebentisa mine nakakhuluma. Khristu akasibutsakatsaka emkhatsini wenu, kodvwa uveta emandla akhe lamakhulu. 4 Kuliciniso kutsi wabulawelwa elugodvweni abutsakatsaka, kodvwa uyaphila ngenca yemandla aNkulunkulu.+ Kuliciniso nekutsi tsine sibutsakatsaka njengobe naye bekake waba butsakatsaka, kodvwa sitawuphila kanye naye+ ngenca yemandla Nkulunkulu lanikhombise wona.+

5 Chubekani nitihlola kutsi nisekukholweni yini; chubekani nihlola loko nine leningiko.+ Nobe anati yini kutsi Jesu Khristu umunye nani? Ngaphandle nangabe ningemukeleki. 6 Ngetsemba kutsi nitawubona kutsi siyemukeleka kuNkulunkulu.

7 Sithantaza kuNkulunkulu kutsi ningenti lutfo lolubi, hhayi ngoba sifuna kubonakala semukeleka, kodvwa kuze nente lokulungile, ngisho nobe tsine singabonakala singemukeleki. 8 Ngobe kute lesingakwenta lokumelene neliciniso, kodvwa lesikwentako sikwentela liciniso kuphela. 9 Siyajabula nangabe sibutsakatsaka kodvwa nine ninemandla; futsi sithantazela kutsi nilungiswe. 10 Kungako ngibhala letintfo nangisengekho, kuze nasengikhona, kungadzingeki ngicinise sandla nangisebentisa ligunya lengilinikwe yiNkhosi,+ lokuligunya lekwakha hhayi lekubhidlita.

11 Kwekugcina bazalwane, chubekani nijabula, nilungiswa, nidvudvutwa,+ nicabanga ngekuvumelana,+ niphila ngekuthula;+ futsi Nkulunkulu welutsandvo newekuthula+ utawuba nani. 12 Nibovuselana ngekwanga kwebuzalwane. 13 Bonkhe labangcwele bayanivusela.

14 Shengatsi umusa lomkhulu weNkhosi Jesu Khristu, nelutsandvo lwaNkulunkulu, kanye nemoya longcwele lesinikwe wona kungaba nani nonkhe.