INCWADZI LEYA KUBASEGALATHIYA

1 Mine Pawula, umphostoli longazange atfunywe bantfu nobe abekwe ngumuntfu, kodvwa lowabekwa nguJesu Khristu+ naNkulunkulu longuBabe,+ lowavusa Khristu ekufeni, 2 ngibhalela emabandla aseGalathiya nginabo bonkhe bazalwane labanami:

3 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini lenguJesu Khristu. 4 Yatinikela ngenca yetono tetfu+ kuze isikhulule kulelive+ lelibi* lelikhona nyalo, ngekuvumelana nentsandvo yaNkulunkulu wetfu longuBabe,+ 5 lokufanele akhatinyuliswe phakadze naphakadze. Amen.

6 Kuyangimangalisa kutsi senimhlubuke masinyane* kangaka Loyo lowanibita ngemusa lomkhulu waKhristu, futsi naya kulolunye luhlobo lwetindzaba letimnandzi.+ 7 Kodvwa kute letinye; kuphela nje kutsi labanye bayanihlupha+ futsi bafuna kugucula letindzaba letimnandzi letimayelana naKhristu. 8 Nangabe kukhona ingilosi levela ezulwini nobe lomunye kitsi lomemetela lokutsite atsi kutindzaba letimnandzi, kube kwehlukile kuleto lesatimemetela kini, akacalekiswe. 9 Njengobe sesishito, ngiphindze ngiyasho ngitsi: Nobe ngubani lomemetela lokutsite atsi kutindzaba letimnandzi, kube kwehlukile kuleto lenatemukela, akacalekiswe.

10 Manje ngetama kwemukelwa bantfu yini nobe kwemukelwa nguNkulunkulu? Ngifuna kujabulisa bantfu yini? Nangabe ngisajabulisa bantfu, bengingeke ngibe sigcili saKhristu. 11 Bazalwane, ngifuna nati kutsi letindzaba letimnandzi lengatimemetela kini ativeli kubantfu;+ 12 ngobe angizange ngitemukele kumuntfu nobe ngifundziswe tona, kodvwa ngatembulelwa nguJesu Khristu.

13 Nine neva ngekutiphatsa kwami ngesikhatsi ngiseseNkholweni YebuJuda,+ kutsi ngachubeka ngilihlupha kamatima libandla laNkulunkulu, ngetama nekulicedza;+ 14 futsi bengitfutfuka kakhulu kuleNkholo kwendlula bontsanga yami labanyenti esiveni sakitsi, ngobe bengiwashisekela kakhulu emasiko abobabe.+ 15 Kodvwa ngesikhatsi Nkulunkulu lowangikhipha esiswini samake futsi wangibita ngemusa wakhe lomkhulu,+ akubona kukuhle 16 kutsi embule iNdvodzana yakhe ngami, kuze ngimemetele tindzaba letimnandzi ngayo etiveni,+ angibutanga muntfu;* 17 futsi angizange ngiye eJerusalema kulabo lababa baphostoli kucala kunami, kodvwa ngaya e-Arabhiya, ngase ngibuyela eDamaseko.+

18 Ngemuva kweminyaka lemitsatfu ngaya eJerusalema+ ngayovakashela Khefase,*+ futsi ngahlala naye emalanga langu⁠-⁠15. 19 Kodvwa angibabonanga labanye baphostoli, ngaphandle kwaJakobe+ umnakabo weNkhosi. 20 Mayelana netintfo lenginibhalela tona, ngiyanicinisekisa embikwaNkulunkulu kutsi angikhulumi emanga.

21 Ngemuva kwaloko, ngaya etifundzeni taseSiriya naseSilisiya.+ 22 Kodvwa emabandla aseJudiya lebekamunye naKhristu bekangakaze angibone. 23 Bekamane agcine ngekuva kutsiwa: “Lomuntfu lobekasiphatsa kabi+ sewumemetela tindzaba letimnandzi ngalokukholwa lebekake wetama kukucedza.”+ 24 Ngako abese akhatimulisa Nkulunkulu ngenca yaloko lokwenteka kimi.

2 Ngemuva kweminyaka lengu-14, ngabuyela eJerusalema ngikanye naBhanabasi+ naThithusi.+ 2 Ngabuyela khona ngobe ngembulelwa kutsi kufanele ngiye khona, futsi ngetfula tindzaba letimnandzi lengitishumayela etiveni embikwemadvodza lebekahlonishwa kakhulu. Nanobe kunjalo, loku ngakwenta embikwawo kuphela kuze ngiciniseke kutsi angigijimeli lite nobe kutsi angizange ngigijimele lite. 3 Kepha ngisho naThithusi+ lebengihamba naye abazange bamphocelele kutsi asoke,+ nanobe bekangumGriki. 4 Kodvwa lenkinga yasuswa bazalwane mbumbulu labangena ngekunyenya+ njengetinhloli kuze baphatamise inkhululeko+ lesinayo ebunyeni naKhristu Jesu, khona batosenta tigcili tabo+— 5 asizange sibalalele nobe sititfobe kubo+ ngisho nesikhashana nje,* kuze liciniso letindzaba letimnandzi lihlale linani.

6 Kodvwa mayelana nalabo lebebatsatfwa njengalababalulekile+—kute lokusha lengikutfole kulawo madvodza lahlonishwa kakhulu. Ngisho nobe bekabantfu labanjani, loko akwenti mehluko kimi, ngobe Nkulunkulu akabuki lingephandle lemuntfu. 7 Esikhundleni saloko, ngesikhatsi babona kutsi bengiphatsiswe umsebenti wekumemetela tindzaba letimnandzi kulabangakasoki,+ njengobe naPhetro bekaphatsiswe wona kulabasokile 8 (ngobe Loyo lowanika Phetro emandla ekuba ngumphostoli kulabasokile, nami wanginika wona kubantfu betive),+ 9 futsi ngesikhatsi babona kutsi Nkulunkulu ungentele umusa lomkhulu,+ boJakobe,+ naKhefase* kanye naJohane lebebatsatfwa njengetinsika, babamba mine naBhanabasi+ ngesandla sangesekudla bakhombisa kutsi sitawusebenta* kanye nabo, kuze tsine siye etiveni, kodvwa bona baye kulabasokile. 10 Basicela kutsi sihlale sibakhumbula labeswele, futsi loku bengisolo ngitimisele kukwenta.+

11 Kodvwa ngesikhatsi Khefase*+ efika e-Antiyokhi,+ ngakhuluma naye* ngalokucondzile njengobe bekucaca kutsi wente liphutsa.* 12 Ngobe ngesikhatsi basengakefiki bantfu lebebavela kuJakobe,+ bekavame kudla nebantfu betive;+ kodvwa nabefika wayekela, wase uyatehlukanisa ngenca yekwesaba labo labasokile.+ 13 Onkhe lamanye emaJuda ahlanganyela naye kulokutentisa, kangangekutsi naBhanabasi wahambisana nabo kuko. 14 Ngesikhatsi ngibona kutsi bebangasahambi ngeliciniso letindzaba letimnandzi,+ ngakhuluma naKhefase* embikwabo bonkhe ngatsi: “Nangabe wena nanobe ungumJuda uphila njengebantfu betive, hhayi njengemaJuda, ungabacindzetela njani bantfu betive kutsi baphile ngekuvumelana nendlela yemaJuda?”+

15 Tsine lesingemaJuda ngekutalwa, futsi lesingasito toni letivela etiveni, 16 siyati kutsi umuntfu kutsiwa ulungile ngenca yekukholwa+ kuJesu Khristu,+ hhayi ngenca yekwenta imisebenti lefunwa ngumtsetfo. Ngako-ke sibe nekukholwa kuKhristu Jesu kuze kutsiwe silungile ngekukholwa kwetfu kuye, hhayi ngekwenta imisebenti lefunwa ngumtsetfo, ngobe kute umuntfu* lokutawutsiwa ulungile ngekwenta imisebenti lefunwa ngumtsetfo.+ 17 Ngako nangabe natsi sitfolakele sitoni nanobe besifuna kutsi kutsiwe silungile ngaKhristu, kusho kutsi Khristu usikhonti sesono yini? Cha! 18 Nangabe ngiphindze ngivusa tona letintfo lengake ngatibhidlita, ngikhombisa kutsi ngisephulamtsetfo. 19 Ngobe ngemtsetfo ngafa emtsetfweni,+ kuze ngiphile kuNkulunkulu. 20 Sengibetselwe naKhristu elugodvweni.+ Akusesimi lophilako,+ kodvwa nguKhristu lophila ebunyeni nami. Ecinisweni kuphila lengikuphila enyameni ngikuphila ngekukholwa eNdvodzaneni yaNkulunkulu,+ leyangitsandza futsi yatinikela ngenca yami.+ 21 Angiwali* umusa lomkhulu waNkulunkulu,+ ngobe nangabe kulunga kutfolakala ngemtsetfo, kusho kutsi Khristu wafela lite.+

3 Awu nine baseGalathiya leningenangcondvo, ngubani loloniyenge kangaka?+ Ngobe ekucaleni nacaciselwa kahle kutsi Jesu Khristu wabetselwa elugodvweni.+ 2 Asenginibute* naku: Umoya nawemukela ngekwenta imisebenti lefunwa ngumtsetfo yini nobe ngekukholwa loko lenakuva?+ 3 Kantsi aninangcondvo ngaleyondlela? Njengobe nacale nahamba endleleni yemoya,* nyalo senifuna kuhamba endleleni yenyama yini?*+ 4 Letinhlupheko letinyenti lenahlangabetana nato betilite yini? Ngiyaciniseka kutsi betingasilo lite. 5 Ngako-ke, loyo loninika umoya futsi ente nemisebenti yemandla+ emkhatsini wenu, ukwenta ngenca yekutsi nenta imisebenti lefunwa ngumtsetfo yini, nobe ukwenta ngenca yekukholwa leninako kuloko lenakuva? 6 Ngobe na-Abrahama “wakholwa kuJehova,* ngako kwatsiwa ulungile.”+

7 Ecinisweni niyati kutsi labo labanekukholwa ngibo labangemadvodzana a-Abrahama.+ 8 Umbhalo wakuveta kadzeni kutsi Nkulunkulu bekatawutsi bantfu betive balungile ngenca yekukholwa, ngako wamemetela letindzaba letimnandzi ku-Abrahama kusukela ekucaleni, watsi: “Tonkhe tive titawubusiswa ngawe.”+ 9 Ngaleso sizatfu, labo labanekukholwa bayabusiswa njengobe na-Abrahama lobekanekukholwa abusiswa.+

10 Bonkhe labetsembele emisebentini lefunwa ngumtsetfo bacalekisiwe, njengobe kubhaliwe kwatsiwa: “Ucalekisiwe umuntfu longatenti tonkhe tintfo letibhalwe emculwini weMtsetfo futsi longatigcini.”+ 11 Ngetulu kwaloko, kuyacaca kutsi kute lokutsiwa ulungile kuNkulunkulu ngenca yemtsetfo,+ ngobe “lolungile utawuphila ngenca yekukholwa.”+ 12 UMtsetfo awukasekelwa ekukholweni. Ngobe kubhaliwe kwatsiwa: “Loyo logcina lokuseMtsetfweni utawuphila ngenca yako.”+ 13 Khristu wasitsenga,+ wasikhulula+ ekucalekisweni nguMtsetfo ngekutsi acalekiswe esikhundleni setfu, ngobe kubhaliwe kwatsiwa: “Ucalekisiwe wonkhe umuntfu lolengiswa elugodvweni.”+ 14 Loku kwenteka kuze sibusiso lesetsenjiswa Abrahama sifike etiveni ngaKhristu Jesu,+ khona ngekukholwa kwetfu sitotfola umoya lowetsenjisiwe.+

15 Bazalwane, asenginibekisele ngentfo levamile: Nangabe sivumelwane sesicinisekisiwe, ngisho nobe sicinisekiswe ngumuntfu, kute losephulako nobe engete lokutsite kuso. 16 Letetsembiso tashiwo ku-Abrahama nasentalelwaneni*+ yakhe. Akushiwo kutsi: “Nasetintalelwaneni,”* lokusho letinyenti, kodvwa kushiwo yinye nakutsiwa: “Nasentalelwaneni* yakho,” lenguKhristu.+ 17 Ngetulu kwaloko ngitsi: UMtsetfo lowaba khona eminyakeni lengu-430 ngemuva kwaloko,+ awenti kutsi sivumelwane Nkulunkulu lasenta singasasebenti, futsi awusicedzi leso setsembiso. 18 Ngobe nangabe lifa lisekelwe emtsetfweni, kusho kutsi alisasekelwanga esetsembisweni; kantsi ngemusa, Nkulunkulu ulinike Abrahama ngesetsembiso.+

19 Waba khona leni-ke uMtsetfo? Wengetelwa kuveta tiphambeko+ tebantfu, kuze kube ngulapho kufika intalelwane*+ lokwentiwa kuyo lesetsembiso; futsi loMtsetfo waletfwa tingilosi+ ngesandla semlamuli.+ 20 Akabi khona umlamuli nangabe kungumuntfu munye lotsintsekako, kodvwa Nkulunkulu munye. 21 UMtsetfo uyaphikisana yini netetsembiso taNkulunkulu? Cha! Ngobe nangabe bekunemtsetfo lobewungaletsa kuphila, kusho kutsi kulunga bekutawuba khona ngenca yemtsetfo. 22 Kodvwa umBhalo wente tonkhe tintfo taba ngephansi kwesono, kuze setsembiso lesitfolakala ngekukholwa kuJesu Khristu sinikwe labo labanekukholwa.

23 Nanobe kunjalo, ngesikhatsi kusengakefiki kukholwa, besicondziswa ngumtsetfo futsi besingephansi kwawo, silindzele nekukholwa lobekutawembulwa.+ 24 Ngako-ke uMtsetfo sewube ngumcondzisi* wetfu losiyisa kuKhristu,+ kuze kutsiwe silungile ngekukholwa kwetfu.+ 25 Kepha njengobe kukholwa sekukhona,+ asisekho ngephansi kwemcondzisi.*+

26 Ecinisweni, nonkhe ningemadvodzana aNkulunkulu+ ngekukholwa kwenu kuKhristu Jesu.+ 27 Ngobe nonkhe nine lenabhajatiselwa kuKhristu, senembetse Khristu.+ 28 Sekute umJuda nobe umGriki,+ sekute sigcili nobe lokhululekile,+ futsi sekute lomdvuna nobe lomsikati;+ ngobe nonkhe senimunye ebunyeni naKhristu Jesu.+ 29 Ngetulu kwaloko, nangabe nibaKhristu, ningiyo mbamba intalelwane* ya-Abrahama,+ futsi nitawutfola lifa+ njengobe nje Nkulunkulu etsembisa.+

4 Manje ngitsi: Nangabe indlalifa isengumntfwana isuke ifana nesigcili ngisho nobe iyinkhosi yato tonkhe tintfo, 2 kepha iba ngephansi kwebacondzisi nebaphatsi kuze kufike lilanga lelabekwa ngubabe wayo. 3 Ngalokufanako, ngesikhatsi natsi sisebantfwana, besigcilatwa tintfo letitsatfwa njengaletibalulekile eveni.+ 4 Kodvwa kwatsi nakufika sikhatsi lesibekiwe, Nkulunkulu watfuma iNdvodzana yakhe leyatalwa ngumfati,+ nalebeyingephansi kwemtsetfo,+ 5 kuze ikhulule labo labangephansi kwemtsetfo+ ngekutsi ibatsenge, khona sitofakwa esiswini sibe ngemadvodzana.+

6 Ngenca yekutsi seningemadvodzana, Nkulunkulu utfumele umoya+ weNdvodzana yakhe etinhlitiyweni tetfu,+ futsi lomoya umemeta utsi: “Abha,* Babe!”+ 7 Ngako-ke anisesito tigcili kodvwa seningemadvodzana; futsi nangabe ningemadvodzana, niphindze nibe tindlalifa ngaNkulunkulu.+

8 Nanobe kunjalo, ngesikhatsi nisengakamati Nkulunkulu benitigcili tabonkulunkulu bemanga. 9 Kodvwa njengobe senimati Nkulunkulu, nobe njengobe senatiwa nguNkulunkulu, nibuyelelani etintfweni letitsatfwa njengaletibalulekile+ eveni, naletibutsakatsaka futsi letingenamsebenti, nifune kuphindze nibe tigcili tato?+ 10 Niwagcina ngekucophelela emalanga, tinyanga,+ tikhatsi,* kanye neminyaka. 11 Ningishayisa ngeluvalo, ngobe kungenteka ngasebentela lite ngenca yenu.

12 Ngiyanincenga bazalwane, kutsi nibe njengami, ngobe nami ngake ngaba njengani,+ futsi kute leningone ngako. 13 Kodvwa niyati kutsi kugula lokwangenta ngatfola litfuba lekumemetela tindzaba letimnandzi kini kwekucala. 14 Nanobe kungaphili kwami bekuluvivinyo kini, anizange ningedzelele nobe ningicansukele;* kodvwa nangemukela kwaba shengatsi nemukela ingilosi yaNkulunkulu, futsi kwaba shengatsi nemukela Khristu Jesu. 15 Seyishonephi injabulo lebeninayo? Ngobe ngiyaciniseka kutsi kube bekungenteka, beningawakupuluta emehlo enu niwanike mine.+ 16 Manje-ke sengisitsa senu yini ngesizatfu sekutsi nginitjela liciniso? 17 Labanye bantfu batimisele kunizuza, hhayi ngenjongo lenhle, kodvwa bafuna kunehlukanisa nami, kuze nitofuna kubalandzela. 18 Nanobe kunjalo bantfwabami, kuhle kutsi lotsite atimisele kunizuza ngenjongo lenhle, hhayi nje kuphela nangikhona, 19 futsi sengiphindze ngifikelwa yimihelo ngenca yenu,+ kutawuze kube ngulapho Khristu akheka kini. 20 Ngifisa shengatsi ngingaba nani khona nyalo futsi ngikhulume nani ngendlela leyehlukile, ngobe niyangicaka.

21 Nine lenifuna kuba ngephansi kwemtsetfo, aseningitjele, aniwuva yini uMtsetfo? 22 Asenginibekisele: Kubhaliwe kutsi Abrahama bekanemadvodzana lamabili, lenye ayitfole esigcilakatini,+ lenye ayitfole kumfati lokhululekile;+ 23 kodvwa lena lebekayitfole kulesigcilakati beyitelwe ngendlela levamile,*+ kantsi lena lebekayitfole kulomfati lokhululekile beyitelwe ngesetsembiso.+ 24 Letintfo tingatsatfwa njengendzaba lengumfanekiso; ngobe labafati bamelela tivumelwane letimbili, lesinye sentiwa eNtsabeni iSinayi,+ siveta bantfwana bebugcili, futsi sifana naHagari. 25 Hagari umelela iSinayi,+ lokuyintsaba lese-Arabhiya, futsi ufana neJerusalema yalamuhla, ngobe isebugcilini nebantfwana bayo. 26 Kodvwa iJerusalema lesetulu ikhululekile, futsi ingumake wetfu.

27 Kubhaliwe kwatsiwa: “Jabula wena mfati lote imbeleko, futsi longabatfoli bantfwana; memeta ngenjabulo wena mfati lote imihelo; ngobe bantfwana bemfati lolahliwe banyenti kakhulu kunebaloyo lonendvodza.”+ 28 Nani-ke bazalwane, senibantfwana besetsembiso njenga-Isaka.+ 29 Kodvwa njengobe ngaleso sikhatsi loyo lobekatelwe ngendlela levamile* acala kuphatsa kabi loyo lobekatelwe ngendlela yemoya,+ kunjalo nanyalo.+ 30 Utsini-ke umbhalo? Utsi: “Cosha lesigcilakati nendvodzana yaso, ngobe indvodzana yalesigcilakati ngeke ibe yindlalifa kanye nendvodzana yemfati lokhululekile.”+ 31 Ngako-ke bazalwane, tsine asisibo bantfwana besigcilakati kodvwa sibantfwana bemfati lokhululekile.

5 Khristu wasikhulula kuze sihlale sikhululekile. Ngako-ke cinani,+ ningavumi kutsi niphindze niboshelwe ebugcilini.+

2 Mine Pawula ngiyanitjela ngitsi nangabe nisoka, Khristu ngeke abe lusito kini.+ 3 Ngiphindze ngitjela wonkhe umuntfu losokako kutsi ubophekile kugcina wonkhe uMtsetfo.+ 4 Nangabe wetama kuba ngulolungile ngemtsetfo,+ usuke wehlukanisiwe naKhristu, futsi usuke ukhweshile emseni wakhe lomkhulu. 5 Kodvwa ngemoya, tsine sikulindzele ngekulangatelela kuba ngulabalungile ngenca yekukholwa kwetfu. 6 Ngobe kulabo labamunye naKhristu Jesu, kusoka nobe kungasoki akukabaluleki,+ kodvwa kukholwa lokusebenta ngelutsandvo ngiko lokubalulekile.

7 Benigijima kahle.+ Ngubani-ke lonivimbele kutsi nichubeke nilalela liciniso? 8 Loluhlobo lwemfundziso aluveli kuLoyo lonibitako. 9 Imvubelo lencane ibilisa yonkhe inhlama.+ 10 Ngiyaciniseka kutsi nine lenimunye neNkhosi+ ngeke nicabange ngendlela leyehlukile; kodvwa loyo lonibangela tinkinga,+ ngisho nobe kungaba ngubani, utawutfola sehlulelo lesimfanele. 11 Kodvwa bazalwane, nangabe mine ngisashumayela ngekusoka, pho ngisahlushelwani? Kube bekunjalo ngabe bantfu abasakhubekiswa lugodvo*+ Jesu labetselwa kulo. 12 Ngifisa shengatsi lamadvodza letama kuniphatamisa angatiphakula.*

13 Bazalwane, nabitelwa enkhululekweni; kodvwa ningayisebentisi njengelitfuba lekwenta lokufiswa yinyama,+ kepha ngelutsandvo, banini tigcili talomunye nalomunye.+ 14 Ngobe wonkhe uMtsetfo upheleliswe* emyalweni munye, lotsi: “Kufanele utsandze makhelwane wakho njengobe utitsandza wena.”+ 15 Nangabe-ke nichubeka nilumana futsi nishwabadzelana,+ caphelani kutsi ningacedzani.+

16 Kodvwa ngitsi: Chubekani nihamba ngemoya+ futsi ngeke nize nente lokufiswa yinyama.+ 17 Ngobe ngetifiso tayo, inyama iphambene nemoya, nemoya uphambene nenyama; letintfo tiyaphikisana, kungako ningakwenti loko lenifuna kukwenta.+ 18 Ngetulu kwaloko, nangabe niholwa ngumoya, anikho ngephansi kwemtsetfo.

19 Imisebenti yenyama ibonakala kahle, futsi ngulena: Bugwadla,*+ kungcola, kona lokuhambisana nekwedzelela,*+ 20 kukhonta tithico, kusebentelana nemimoya,*+ yinzondo, kucabana, ngumona, yintfukutselo lengalawuleki, yimibango, kwehlukana, ngemahlelo, 21 kuhawukela, kudzakwa,+ yimicimbi lengalawulwa* naletinye tintfo letifana naleti.+ Ngiyanecwayisa ngaletintfo, njengobe besengivele nginecwayisile, kutsi labo labenta tintfo letinjena ngeke balidle lifa leMbuso waNkulunkulu.+

22 Ngakulokunye, titselo temoya nguleti: Lutsandvo, yinjabulo, kuthula, kubeketela, ngumusa, buhle,+ kukholwa, 23 ngumoya lophansi* nekutibamba.+ Kute umtsetfo lomelene naletintfo. 24 Labo lababaKhristu Jesu bayibetsele elugodvweni inyama yabo kanye netifiso netinkhanuko tayo.+

25 Nangabe siphila ngemoya, asichubekeni siphila ngekuvumelana nekucondziswa ngumoya.+ 26 Asingatigabatisi,+ singakukhutsati kuncintisana,+ futsi singadlelani umona.

6 Bazalwane, ngisho nobe kungenteka umuntfu ahambe ngendlela lengasiyo abe angaboni, nine lenivutsiwe yetamani kumsita ngemoya lophansi*+ umuntfu lonjalo. Kodvwa ticapheleni,+ ngobe nani kungenteka nilingwe.+ 2 Chubekani nitfwalisana imitfwalo lesindzako,+ ngekwenta njalo nitawube nigcwalisa umtsetfo waKhristu.+ 3 Ngobe nangabe umuntfu acabanga kutsi ulutfo nanobe angasilutfo,+ usuke atiyenga. 4 Kodvwa nguloyo naloyo akahlole tento takhe,+ nakenta njalo utawujabula ngalakwentile, hhayi ngekutsi aticatsanise nalomunye umuntfu.+ 5 Ngobe nguloyo naloyo utawutetfwalela umtfwalo wakhe.*+

6 Ngetulu kwaloko, nobe ngubani lofundziswa* livi akahlanganyele kuko konkhe lokuhle naloyo lomfundzisako.*+

7 Ningadukiswa: Nkulunkulu akasuye wekuphukutwa. Ngobe nobe yini umuntfu layihlanyelako, utawuvuna+ yona futsi; 8 lohlanyela anembono wenyama utawuvuna konakala enyameni yakhe, kodvwa lohlanyela anembono wemoya utawuvuna kuphila lokuphakadze emoyeni.+ 9 Ngako-ke asingapheli emandla ekwenta lokuhle, ngobe ngesikhatsi lesifanele sitawuvuna nasingadzinwa.*+ 10 Nangabe nje sinelitfuba,* asenteni lokuhle kubo bonkhe, ikakhulukati kulabo labahlobene natsi ekukholweni.

11 Bukani kutsi tinkhulu kangakanani tinhlavu temagama lenginibhalele ngato ngesandla sami.

12 Bonkhe labafuna kubonakala babahle kubantfu* ngibo labetama kunicindzetela kutsi nisoke, kodvwa loku bakwentela kubalekela kuphatfwa kabi ngenca yelugodvo* lokwabetselwa kulo Khristu. 13 Ngobe ngisho nalabo labasokako abawugcini uMtsetfo,+ kepha bafuna nine nisoke kuze batowuba nesizatfu sekutigabatisa ngani. 14 Kodvwa mine angifuni kutigabatisa, ngaphandle kwekutigabatisa ngelugodvo* lokwabetselwa kulo iNkhosi Jesu Khristu,+ futsi ngayo live lifana nalelifile* kimi, nami ngifana nalofile eveni. 15 Ngobe kusoka nekungasoki akusilutfo,+ kodvwa indalo lensha ngiyo lelutfo.+ 16 Shengatsi bonkhe labaphila ngekuvumelana nalomtsetfo wekutiphatsa, lokungu-Israyeli waNkulunkulu,+ bangaba nekuthula nemusa.

17 Kusukela nyalo akube bete longihluphako, ngobe emtimbeni wami nginetimphawu tekuba sigcili saJesu.+

18 Bazalwane, shengatsi umusa lomkhulu weNkhosi Jesu Khristu ungaba nani njengoba nikhombisa umoya lomuhle. Amen.