INCWADZI LEYA KUBASEFILIPHI

1 Lencwadzi ivela kuPawula naThimothi, labatisebenti taKhristu Jesu, iya kubo bonkhe labangcwele baseFiliphi+ labamunye naKhristu Jesu, nakubabonisi kanye netinceku letisebentako:+

2 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini lenguJesu Khristu.

3 Ngihlale ngimbonga Nkulunkulu wami nanginikhumbula. 4 Ngimbonga ngaso sonkhe sikhatsi nanginincusela nonkhe, futsi ngihlale ngincusa ngekujabula+ 5 ngenca yesandla lenisifakile* etindzabeni letimnandzi kusukela ngelilanga lekucala kuze kube ngunyalo. 6 Ngobe nginelitsemba lekutsi loyo lowacala umsebenti lomuhle kini utawucedzela+ kuze kufike lilanga laKhristu Jesu.+ 7 Kuhle kutsi ngicabange loku ngani njengobe nisenhlitiyweni yami, ngobe niyangisita njengobe ngiboshiwe, futsi nangisita ekuvikeleni tindzaba letimnandzi nasekuticaliseni ngalokusemtsetfweni. Ngaleyo ndlela, mine nani satfola umusa lomkhulu waNkulunkulu.+

8 Nkulunkulu uyati kutsi nginikhumbula kakhulu, nekutsi nginitsandza njengaKhristu Jesu. 9 Ngichubeka ngithantazela kutsi lutsandvo lwenu lukhule kakhulu+ ngelwati lolungulonalona+ nangekucondza lokuphelele;+ 10 khona nitociniseka ngetintfo letibaluleke kakhulu,+ nibe msulwa futsi ningakhubi muntfu+ kuze kufike lilanga laKhristu; 11 nekutsi nigcwaliswe ngesitselo sekulunga lesitfolakala ngaJesu Khristu,+ kube yinkhatimulo neludvumo kuNkulunkulu.

12 Manje ngifuna nati bazalwane, kutsi lesimo lengikuso sente kutsi tindzaba letimnandzi tichutjekiselwe embili, 13 ngobe kuboshwa kwami+ ngenca yaKhristu sekwatiwa+ ngibo bonkhe Bogadzi Bembusi nalabanye bantfu. 14 Bazalwane labanyenti labaseNkhosini batfole emandla ngekuboshwa kwami, futsi bayachubeka bakhuluma livi laNkulunkulu ngesibindzi.

15 Labanye bashumayela ngaKhristu ngobe banemona futsi bayabanga, kodvwa labanye bashumayela ngenhlitiyo lenhle. 16 Laba labashumayela ngenhlitiyo lenhle bamemetela ngaKhristu ngobe bachutjwa lutsandvo, futsi bayati kutsi ngibekelwe kuvikela tindzaba letimnandzi;+ 17 kodvwa laba labanye bakwenta ngembango, hhayi ngenjongo lenhle, ngobe bafuna kungibangela tinkinga njengobe ngiboshiwe. 18 Umphumela uba yini? Uba kutsi ngato tonkhe tindlela Khristu uyamenyetelwa, ngisho kungaba ngekutentisa nobe ngeliciniso, futsi ngiyajabula ngaloko. Ecinisweni ngitawuchubeka ngijabula, 19 ngobe ngiyati kutsi loku kutawuphumela ekusindzisweni kwami ngenca yekuncusa kwenu+ nekusitwa ngumoya waJesu Khristu.+ 20 Ngiyaciniseka futsi nginelitsemba lekutsi ngeke ngibe nemahloni nganome nguyiphi indlela, kodvwa ngiyati kutsi ngitawukhuluma ngesibindzi futsi Khristu utawudvunyiswa ngemtimba wami njengobe kwenteka kucala, kungaba ngekuphila nobe ngekufa.+

21 Ngobe nangiphila, ngiphilela Khristu,+ futsi nangifa loko kutawuzuzisa mine.+ 22 Nangabe ngitawuchubeka ngiphila enyameni, umsebenti wami utawuba netitselo; kodvwa angikwenti kwatiwe loko lengitakukhetsa. 23 Angati kutsi yini lengitayikhetsa kuloku lokubili, ngobe nginesifiso sekukhululwa ngibe naKhristu,+ futsi ngiyaciniseka kutsi loku ngiko lokuncono kakhulu.+ 24 Kodvwa kubaluleke kakhulu kutsi ngihlale ngisenyameni ngenca yenu. 25 Njengobe ngiciniseka ngaloku, ngiyati kutsi ngitawuchubeka ngiphila futsi nginani nonkhe khona nitotfutfuka futsi nijabule ekukholweni, 26 kuze kutsi nasengiphindze nginani, injabulo yenu iphuphume kuKhristu Jesu ngenca yami.

27 Philani ngendlela lefanele tindzaba letimnandzi letimayelana naKhristu,+ kuze kutsi nobe ngingafika nginibone nobe ngingekho, ngive kutsi nime nicinile, nekutsi nicabanga ngendlela lefanako,* nimunye*+ futsi nisebenta ngekubambisana kuze nichubeke ninekukholwa lokusekelwe etindzabeni letimnandzi, 28 futsi ningabowesatjiswa ngulabamelene nani. Konkhe loku kufakazela kutsi batawubhujiswa,+ nekutsi nine nitawusindziswa.+ Loku-ke kuvela kuNkulunkulu. 29 Ngobe ninikwe lilungelo ngenca yaKhristu, hhayi nje kuphela kutsi nikholwe nguye, kodvwa nekutsi nihlupheke ngenca yakhe.+ 30 Ngobe nibhekene nekuhlupheka lokunjengaloko lenangibona ngibhekene nako,+ nanyalo leniva kutsi ngisebhekene nako. 

2 Njengobe nimunye naKhristu, njengobe nikhutsata labanye futsi nibadvudvuta ngelutsandvo, njengobe nibakhatsalela, nibatsandza, futsi nibavela, 2 ngenteni ngijabule kakhulu ngekutsi nibe nemcondvo munye nelutsandvo lolufanako, ngekutsi nibe nebunye ngalokuphelele, futsi nicabange ngendlela lefanako.+ 3 Ningenti lutfo ngekubanga+ nome ngekutati,+ kodvwa ngekutfobeka nitsatse labanye njengalabakhulu kunani,+ 4 futsi ningaticabangeli nine kuphela,+ kodvwa nicabangele nalabanye.+

5 Hlalani ninalomcondvo naKhristu Jesu+ lebekanawo, 6 lowatsi nanobe bekanesimo saNkulunkulu,+ wangakucabangi kutsatsa sikhundla saNkulunkulu futsi atente lolingana naye.+ 7 Kodvwa watidzela, waba njengesigcili+ futsi waba ngumuntfu.*+ 8 Ngetulu kwaloko, ngesikhatsi afika aba ngumuntfu,* watitfoba waphindze walalela kwaze kwaba ngulapho afa,+ afela elugodvweni.*+ 9 Ngaleso sizatfu, Nkulunkulu wamphakamisela esikhundleni lesisetulu,+ futsi ngemusa wamnika ligama lelingetulu kwawo onkhe emagama,+ 10 kuze egameni laJesu onkhe emadvolo aguce—alabo labasezulwini, newalabasemhlabeni, newalabangephansi kwemhlaba;+ 11 futsi bonkhe kufanele bavume kutsi Jesu Khristu uyiNkhosi,+ khona kutewukhatinyuliswa Nkulunkulu longuBabe.

12 Bazalwane labatsandzekako, benihlale nilalela ngesikhatsi ngisenani, futsi nyalo njengobe ngingasekho senilalela kakhulu. Ngako-ke chubekani nisebentela kusindziswa kwenu futsi loko nikwente ngekwesaba nangenhlonipho lenkhulu. 13 Ngobe Nkulunkulu nguye lonenta nibe nemandla, futsi uninika sifiso nemandla ekwenta intsandvo yakhe. 14 Chubekani nenta tonkhe tintfo ngaphandle kwekukhonona+ nekuphikisana,+ 15 kuze ningasoleki kodvwa nibe msulwa, nibe bantfwana baNkulunkulu+ labangenabala esitukulwaneni lesigwegwile nalesonakele,+ lenikhanya emkhatsini waso njengetibane eveni,+ 16 futsi nichubeke nibambisise livi lekuphila.+ Nanenta njalo ngitawuba nesizatfu sekujabula ngelilanga laKhristu, ngati kutsi angigijimelanga lite nekutsi angizange ngikhandlekele lite. 17 Kodvwa ngisho nobe ngingatfululwa njengemnikelo walokunatfwako+ emhlatjelweni+ nasemsebentini longcwele kukholwa kwenu lokuniholele kuwo, ngiyajabula futsi ngitfokota nani nonkhe. 18 Ngendlela lefanako, nani kufanele nijabule futsi nitfokote kanye nami.

19 Nginelitsemba eNkhosini Jesu kutsi masinyane ngitawutfumela Thimothi+ kini, kuze ngikhutsateke nangiva tindzaba letimayelana nani. 20 Ngite lomunye lonjengaye, lotaninakekela kahle. 21 Ngobe bonkhe labanye bakhatsateka ngetintfo tabo, hhayi taKhristu Jesu. 22 Kodvwa niyasati sibonelo lesihle lasibeka, kutsi njengemntfwana+ lokanye nababe wakhe, watigcilata kanye nami kuze tindzaba letimnandzi tichutjekiselwe embili. 23 Nguye-ke lona lenginelitsemba lekumtfumela ngekushesha nje nasengibona kutsi tintfo tingihambela njani. 24 Nangabe iNkhosi itsandza, ngiyaciniseka kutsi ngitawufika masinyane.+

25 Kodvwa nyalo ngikubona kukuhle kutsi ngitfumele kini Ephafrodithu, umzalwane wami losisebenti lengikanye naso, lolisotja laKhristu, futsi lenamtfuma kutsi anakekele tidzingo tami,+ 26 ngobe ulangatelela kunibona nonkhe, futsi ukhatsatekile njengobe neva kutsi bekagula. 27 Ecinisweni wagula wacishe wafa; kodvwa Nkulunkulu wamentela umusa, hhayi yena kuphela kodvwa nami, kuze ngingabi nelusizi etikwelusizi. 28 Ngako ngimtfumela kini masinyane, khona kutawutsi nanimbona niphindze nijabule, nami ngingasakhatsateki kakhulu. 29 Memukeleni ngenjabulo njengobe nihlale nibemukela labo labalandzela iNkhosi, futsi nichubeke nibaphatsa ngenhlonipho bantfu labanjengaye,+ 30 ngobe wacishe wafa ngenca yemsebenti waKhristu,* wabeka kuphila kwakhe engotini kuze avale sikhala sekungabi khona kwenu kutongisita.+

3 Kwekugcina bazalwane bami, chubekani nijabula eNkhosini.+ Akungikhatsati kunibhalela intfo yinye, futsi loku kutawuphephisa nine.

2 Caphelani tinja; caphelani labo labenta tintfo letimbi; nicaphele nalabo labasoka inyama.+ 3 Ngobe tsine sisoke mbamba,+ senta umsebenti longcwele ngemoya waNkulunkulu, sitigabatisa ngaKhristu Jesu+ futsi asilibeki litsemba kuloko bantfu labetsembela kuko, 4 kepha nangabe kukhona lonetizatfu tekwetsembela kuloko bantfu labetsembela kuko, loyo muntfu ngimi.

Nangabe akhona lomunye locabanga kutsi unetizatfu tekwetsembela kuloko bantfu labetsembela kuko, mine-ke nginato kakhulu: 5 Ngobe ngasokwa ngelilanga lesi-8,+ futsi ngingum-Israyeli, ngiwesive sakaBhenjamini, ngingumHebheru lotalwa ngemaHebheru;+ bengingumFarisi+ logcina umtsetfo; 6 ngenca yekutsi bengishiseka ngahlupha libandla;+ futsi bengikwenta ngekucophelela loko lobekufunwa ngumtsetfo. 7 Kodvwa tintfo lebetiyinzuzo kimi sengititsatsa njengaletilite* ngesizatfu saKhristu.+ 8 Ngetulu kwaloko, tonkhe tintfo ngititsatsa njengaletilite ngesizatfu selwati lolukhulu lolumayelana naKhristu Jesu iNkhosi yami. Ngenca yakhe ngilahlekelwe ngito tonkhe tintfo futsi ngititsatsa njengencumbi yetibi,* kuze ngemukelwe nguKhristu, 9 futsi ngibe sebunyeni naye, hhayi ngekulunga kwami ngoba ngilandzela uMtsetfo, kodvwa ngekulunga lokuletfwa kukholwa+ kuKhristu,+ lokukulunga lokuvela kuNkulunkulu nalokusekelwe ekukholweni.+ 10 Inhloso yami kutsi ngimati yena kanye nekuvuswa kwakhe,+ ngihlupheke njengaye,+ futsi nami ngife njengaye,+ 11 ngibone nekutsi ngingakhona yini kuba semkhatsini walabo labatawuvuswa kucala.+

12 Akusho kutsi sengivele ngiwutfolile umvuzo nome sengivele ngiphelelisiwe, kodvwa ngichubeka ngekutimisela+ kuze ngitobona kutsi ngingakhona yini kukutfola loko Khristu Jesu langikhetsela* kona.+ 13 Bazalwane, angititsatsi njengalosawutfolile umvuzo, kodvwa ngiciniseka ngentfo yinye: Kutsi ngiyatikhohlwa tintfo letingemuva+ futsi ngilwela kutfola tintfo letitako,+ 14 ngichubeka ngekutimisela emgomeni wekutfola umvuzo+ welubito lwasezulwini+ loluvela kuNkulunkulu ngaKhristu Jesu. 15 Ngako tsine lesivutsiwe+ asicabangeni ngalendlela, nangabe nicabanga ngalenye indlela kunobe ngukuphi, Nkulunkulu utanisita kutsi nicabange ngendlela lekahle. 16 Ngelizinga lesesitfutfuke ngalo, asichubekeleni embili ngendlela lefanako.

17 Bazalwane, ngebunye lingisani mine,+ futsi ninake labo labahamba ngendlela levumelana nesibonelo lesinibekela sona. 18 Ngobe banyenti lesebatitsa telugodvo* lokwabetselwa kulo Khristu, futsi bengivame kukhuluma ngabo, kodvwa nyalo sengikhuluma ngabo ngetinyembeti. 19 Siphetfo sabo kubhujiswa, nkulunkulu wabo sisu sabo, batigabatisa ngetintfo lokufanele ngabe banemahloni ngato, netingcondvo tabo tisetintfweni talapha emhlabeni.+ 20 Kodvwa tsine sitakhamuti+ tasezulwini+ futsi simlindzele ngekulangatelela umsindzisi lovela khona, iNkhosi Jesu Khristu,+ 21 lotawusebentisa emandla akhe lamakhulu kuze agucule umtimba wetfu lobutsakatsaka kutsi ufane* nemtimba wakhe lokhatimulako,+ abeke nato tonkhe tintfo ngephansi kwakhe.+

4 Bazalwane bami lengibatsandzako, ngilangatelela kunibona, nine ningenta ngijabule futsi ningumchele wami,+ ngako-ke manini nicine+ ngalendlela eNkhosini, nine labatsandzekako bami.

2 Ngiyala bo-Evodiya naSintike kutsi babe mcondvo munye eNkhosini.+ 3 Njengobe wena usisebenti seliciniso lesikanye nami,* ngiyakuncusa kutsi uchubeke usita labafati. Bona kanye naKlemente nato tonkhe letinye tisebenti lengikanye nato bebasebenta nami ngekutimisela* ekumemeteleni tindzaba letimnandzi, futsi emabito abo asencwadzini yekuphila.+

4 Hlalani nijabula eNkhosini. Ngiyaphindza ngitsi jabulani!+ 5 Kucabangela kwenu+ akwatiwe ngibo bonkhe bantfu. INkhosi isedvute. 6 Ningakhatsateki ngalutfo,+ kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga;+ 7 futsi kuthula+ kwaNkulunkulu lokwendlula konkhe kucondza kutawulondvolota tinhlitiyo+ netingcondvo* tenu ngaKhristu Jesu.

8 Kwekugcina bazalwane, chubekani ninaka* nome ngutiphi tintfo letiliciniso, nome ngutiphi tintfo letibaluleke kakhulu, nome ngutiphi tintfo letilungile, nome ngutiphi tintfo letimsulwa,* nome ngutiphi tintfo letitsandzekako, nome ngutiphi tintfo lokukhulunywa kahle ngato, nome ngutiphi tintfo letinhle, nanome ngutiphi tintfo letidvunyiswako.+ 9 Tintfo lenatifundza nalenatemukela, lenativa futsi natibona mayelana nami, tenteni.+ Nkulunkulu wekuthula utawuba nani.

10 Ngijabula kakhulu eNkhosini ngekutsi nyalo seniphindze niyangikhatsalela.+ Nanobe beningikhatsalela, benisengakalitfoli litfuba lekungikhombisa loko. 11 Loku angikusho ngesizatfu sekutsi ngeswele, ngobe sengifundze kwenetiseka kunobe ngutiphi timo lengikuto.+ 12 Ngikwati kokubili kutsi kunjani kuba nalokuncane+ nekuba nalokunyenti. Kuto tonkhe tintfo nakuto tonkhe timo ngifundze imfihlo yekwenetiseka ngisho ngesutsi nobe ngilambile, ngisho nginalokunyenti nobe ngite lutfo. 13 Nginemandla ekwenta tonkhe tintfo ngenca yaloyo longipha emandla.+

14 Nente kahle ngekungisita ekuhluphekeni kwami. 15 Ecinisweni, nine baseFiliphi nati kahle kutsi ngemuva kwekutsi nive tindzaba letimnandzi kwekucala, ngesikhatsi ngisuka eMasedoniya, kute libandla lelangisita nobe lelemukela lusito lwami ngaphandle kwenu;+ 16 ngobe ngesikhatsi ngiseThesalonika nangitfumelela lokutsite, hhayi kanye nje kuphela kodvwa kabili. 17 Akusiko kutsi ngifuna kuphiwa, kodvwa ngifuna nente tintfo letinhle letitanizuzisa kakhulu. 18 Nanobe kunjalo, nginako konkhe lengikudzingako futsi kunyenti kakhulu. Ngenetisekile njengobe sengitfole loko lenikuphatsise Ephafrodithu,+ kungemakha lamnandzi,+ umhlatjelo lowemukelekako nalojabulisako kuNkulunkulu. 19 Ngetulu kwaloko, ngaKhristu Jesu, Nkulunkulu wami utaniniketa konkhe lenikudzingako+ ngenca yebukhulu benkhatimulo yakhe. 20 Nkulunkulu longuBabe wetfu akadvunyiswe kuze kube phakadze naphakadze. Amen.

21 Vuselani bonkhe labangcwele labamunye naKhristu Jesu. Bazalwane labakanye nami nabo bayanivusela. 22 Bonkhe labangcwele, ikakhulukati labo labasesigodlweni saKhesari+ nabo bayanivusela.

23 Shengatsi umusa lomkhulu weNkhosi Jesu Khristu ungaba nani njengobe nikhombisa umoya lomuhle.