INCWADZI LEYA KUBASEKHOLOSE

1 Mine Pawula, umphostoli waKhristu Jesu ngentsandvo yaNkulunkulu, ngikanye naThimothi+ umzalwane wetfu, 2 ngibhalela labangcwele nebazalwane labetsembekile baseKholose labamunye naKhristu:

Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu.

3 Nasinithantazela, sihlale simbonga Nkulunkulu longuBabe weNkhosi yetfu Jesu Khristu, 4 ngobe seva ngekukholwa kwenu kuKhristu Jesu nangendlela lenibatsandza ngayo bonkhe labangcwele, 5 ngenca yelitsemba lenibekelwe lona ezulwini.+ Esikhatsini lesendlulile, nafundza ngalelitsemba ngesikhatsi nitjelwa umlayeto weliciniso letindzaba letimnandzi 6 letefika kini. Letindzaba letimnandzi titsela titselo futsi tiyandza emhlabeni wonkhe.+ Kusukela ngelilanga leneva ngalo liciniso ngemusa lomkhulu waNkulunkulu futsi nawati kahle, tindzaba letimnandzi betisolo titsela titselo kini. 7 Nguloko lenikufundze ku-Ephafrasi,+ losigcili lesitsandzekako lesikanye natsi, losisebenti saKhristu lesetsembekile futsi losimelele. 8 Wasitjela nangelutsandvo leninalo loluvetwa ngumoya.*

9 Ngaleso sizatfu, kusukela ngelilanga lesakuva ngalo loku, asiyekelanga kunithantazela+ nekucela kutsi nigcwale lwati lolungulonalona+ ngentsandvo yaNkulunkulu, futsi nitfole konkhe kuhlakanipha nekucondza lokuvela kuye,+ 10 kuze nihambe ngendlela lefanele embikwaJehova,* khona nitomjabulisa ngalokuphelele njengobe nichubeka nitsela titselo kuyo yonkhe imisebenti lemihle, futsi nikhula elwatini lolungulonalona ngaNkulunkulu.+ 11 Shengatsi ningaciniswa ngawo onkhe emandla ngebukhulu benkhatimulo yakhe,+ kuze nicinisele ngalokuphelele ngekubeketela nenjabulo, 12 njengobe nibonga Babe lonente nakufanela kutfola lifa lalabangcwele+ labasekukhanyeni.

13 Wasikhulula emandleni ebumnyama,+ futsi wasendlulisela embusweni weNdvodzana yakhe layitsandzako, 14 lesitfole ngayo kukhululwa ngenhlawulo, lokukutsetselelwa kwetono tetfu.+ 15 Yona ingumfanekiso waNkulunkulu longabonakali,+ litibulo layo yonkhe indalo;+ 16 ngobe tonkhe letinye tintfo tadalwa ngayo ezulwini nasemhlabeni, tintfo letibonakalako naletingabonakali,+ kungaba tihlalo tebukhosi, emandla ekubusa, bohulumende nome tiphatsimandla. Tonkhe letinye tintfo tadalwa ngayo+ futsi tadalelwa yona. 17 Yona yekucala kuto tonkhe letinye tintfo,+ futsi tonkhe taba khona ngayo, 18 iyinhloko yemtimba, lokulibandla.+ Isicalo, futsi yekucala kuvuswa kulabafile,+ kuze ibe yekucala kuto tonkhe tintfo; 19 ngobe bekuyintsandvo yaNkulunkulu kutsi iphelele kuto tonkhe tintfo,+ 20 nekutsi ngayo ente tonkhe letinye tintfo+ tibuyisane naye ngekwenta kuthula ngengati+ yayo leyacitseka elugodvweni,* kungaba tintfo letisemhlabeni nobe letisezulwini.

21 Ecinisweni, nine benehlukanisiwe naNkulunkulu futsi nititsa naye ngobe tingcondvo tenu betinake imisebenti lemibi, 22 kodvwa nyalo sewunente nabuyisana naye ngemtimba waloyo lowatinikela ekufeni, kuze anente nibe ngcwele, nibe msulwa futsi ningasoleki embikwakhe.+ 23 Loko kutawenteka kuphela nangabe nichubeka ekukholweni,+ nibambelela esisekelweni,+ nicinile+ futsi ninganyakatiswa etsembeni letindzaba letimnandzi lenativa, naletashunyayelwa kuyo yonkhe indalo lengephansi kwelizulu.+ Mine Pawula ngaba yinceku lememetela letindzaba letimnandzi.+

24 Nyalo ngiyajabula ngekuhlupheka ngenca yenu,+ futsi ngihlupheka njengaKhristu, kodvwa kusafanele ngihlupheke ngalokuphelele ngenca yemtimba wakhe,+ lokulibandla.+ 25 Ngaba yinceku yalelibandla ngobe Nkulunkulu wangiphatsisa lomsebenti+ kuze kuzuze nine, kungako ngishumayela livi lakhe ngenhlitiyo yonkhe, 26 lokuyimfihlo lengcwele+ lebeyifihliwe etikhatsini* letengcile+ nasetitukulwaneni letengcile. Kodvwa nyalo seyembuliwe kulabangcwele bakhe,+ 27 labo Nkulunkulu lakujabulele kubembulela bukhulu benkhatimulo yalemfihlo lengcwele etiveni,+ lenguKhristu lenisebunyeni naye futsi leninelitsemba lekukhatinyuliswa naye.+ 28 Nguye lesimemetela ngaye, seluleke ngaye futsi sifundzise ngaye bonkhe bantfu ngako konkhe kuhlakanipha, kuze sisite wonkhe umuntfu losebunyeni naKhristu kutsi avutfwe bese simletsa kuNkulunkulu.+ 29 Kuze kube ngunyalo, ngisebenta kamatima ngiphindze ngitikhandle ngekuciniswa nguye, ngenca yemandla langinika wona.+

2 Ngifuna nati kutsi kukhulu kangakanani kuhlupheka lengibhekana nako ngenca yenu, nangenca yebaseLawodisiya+ kanye nabo bonkhe labangakaze bangibone.* 2 Loku ngikwentela kutsi tinhlitiyo tabo tidvudvuteke,+ futsi bahlanganiswe babe munye elutsandvweni,+ batfole netibusiso* letingumphumela wekuciniseka ngetintfo labaticondzako, kuze bazuze lwati lolungulonalona lwemfihlo lengcwele yaNkulunkulu, lokunguKhristu.+ 3 Kuye, kufihlisiswe wonkhe umcebo wekuhlakanipha newelwati.+ 4 Loku ngikusho kuze kube bete umuntfu longahle aniyenge ngemavi lakhangako. 5 Nanobe ngingekho nani ngemtimba, kodvwa nginani ngemoya, futsi kuyangijabulisa kubona kuhleleka kwenu,+ nekucina kwekukholwa kwenu kuKhristu.+

6 Ngako njengobe senemukele Khristu Jesu iNkhosi, chubekani nihamba ebunyeni naye, 7 nicine futsi nakhiwe kuye,+ nisime nasekukholweni,+ njengobe nje nafundziswa, futsi nibohlale nibonga.+

8 Cinisekani kutsi kube bete umuntfu lonitfumba* ngekuhlakanipha kwebantfu, nangekuyenga lokulite+ lokungakasekelwa kuKhristu, kodvwa lokusekelwe emasikweni ebantfu nasetintfweni letitsatfwa njengaletibalulekile eveni; 9 ngobe bonkhe bunguye baNkulunkulu lobuphelele buhlala kuye.+ 10 Ngako senitfole kuphelela ngenca yakhe, loyo loyinhloko yabo bonkhe bohulumende nebabusi.+ 11 Ngenca yekutsi ninebuhlobo naye nasokwa, kodvwa anisokwanga ngetandla, kunaloko nasusa lokutsandvwa ngumtimba wenu lonesono.+ Nasokwa ngekusoka lokukwaKhristu.+ 12 Nangcwatjwa naye ngelubhabhatiso lwakhe,+ futsi ngaye navuswa+ kanyekanye ngekukholwa leninako kuloko lokwafezwa ngemandla aNkulunkulu, lowamvusa ekufeni.+

13 Ngetulu kwaloko, ngisho nome benifile ngenca yetiphambeko tenu futsi ningakasoki enyameni, Nkulunkulu waniphilisa kanye naKhristu.+ Ngemusa wasitsetselela tonkhe tiphambeko tetfu,+ 14 futsi wayicisha* incwadzi lebhalwe ngesandla,+ lebeyinemitsetfo+ futsi imelene natsi.+ Wayisusa ngekuyibetsela elugodvweni*+ lokwabetselwa kulo Jesu. 15 Wancoba bohulumende nebabusi, wabaveta kuwonkhe wonkhe kutsi ubehlulile, futsi ngalolugodvo* wabukisa ngabo akhombisa kutsi ubancobile.+

16 Ngako ningavumeli muntfu kutsi anehlulele ngalenikudlako nangalenikunatsako,+ nobe ngekugujwa kwemikhosi, kugujwa kwekwetfwasa kwenyanga+ nobe kwelisabatha.+ 17 Leto tintfo tisitfunti saleto letitako,+ kodvwa lokungiko sibili kukuKhristu.+ 18 Akube bete umuntfu lonemuka umklomelo,+ lokungumuntfu lojatjuliswa kutishaya lotfobekile, lokhonta tingilosi, “nalome”* etintfweni latibonile. Udvwaliswa yimicabango yakhe lelite, 19 futsi akabambeleli enhlokweni,+ lenguloyo wonkhe umtimba lowondliwa uphindze uhlanganiswe kuye kanyekanye ngemalunga nangemisipha, futsi lowentiwa ukhule ngemandla lavela kuNkulunkulu.+

20 Nangabe nafa kanye naKhristu etintfweni letitsatfwa njengaletibalulekile eveni,+ pho niphilelani shengatsi niseseyincenye yelive, ngekuchubeka nititfoba kulemitsetfo+ letsi: 21 “Ungaphatsi, unganambitsi, ungatsintsi”? 22 Ngobe lemitsetfo ikhuluma ngetintfo letiphelako natisetjentiswa, futsi ivumelana nemitsetfo yebantfu netimfundziso tabo.+ 23 Nanobe leto tintfo tibonakala tikuhlakanipha, timane tikukhonta labatentele kona, nekutishaya labatfobekile, kanye nekuhlupha umtimba,+ kodvwa atisiti ngalutfo ekulweni netifiso tenyama.

3 Nangabe-ke navuswa naKhristu,+ chubekani nifuna tintfo letisezulwini, lapho Khristu ahleti khona ngesekudla saNkulunkulu.+ 2 Tingcondvo tenu atihlale tinake tintfo letisezulwini,+ hhayi letisemhlabeni.+ 3 Ngobe nafa, futsi kuphila kwenu kukuKhristu ebunyeni naNkulunkulu. 4 Kutawutsi lapho Khristu, lokuphila kwetfu,+ entiwa abonakale, nani-ke nitawentiwa nibonakale kanye naye enkhatimulweni.+

5 Bulalani emalunga emitimba yenu+ asemhlabeni kuze ningaweli ebugwadleni,* ekungcoleni, enkhanukweni lengalawuleki,+ esifisweni lesibi, kanye nasekubeni bukhali, lokukukhonta tithico. 6 Lulaka lwaNkulunkulu lutawufika ngenca yetintfo letinjalo. 7 Nani benitiphatsa* kanjalo ekucaleni.*+ 8 Kodvwa nyalo kufanele nikulahle konkhe loku: lulaka, intfukutselo, bubi,+ kuhlambalata+ nenkhulumo leyenyanyekako.+ 9 Ningakhulumi emanga kulomunye nalomunye.+ Khumulani buntfu* lobudzala+ kanye nemikhuba yabo, 10 nigcoke buntfu lobusha,+ lokutsi ngelwati lolungulonalona bentiwe bube busha ngekwemfanekiso waLoyo lowabudala,+ 11 futsi kuba bete umehluko kumGriki nobe kumJuda, kulosokile nome kulongakasoki, kumuntfu wetive, kumSikithi,* kulosigcili, nome kumuntfu lokhululekile; kodvwa Khristu ungito tonkhe tintfo futsi ukubo bonkhe.+

12 Ngako-ke, njengobe nibantfu baNkulunkulu labakhetsiwe,+ labangcwele nalabatsandzekako, gcokani luvelo,+ umusa, kutfobeka,+ umoya lophansi,*+ nekubeketela.+ 13 Chubekani nibeketelelana futsi nitsetselelana ngekukhululeka+ ngisho nobe umuntfu anesizatfu sekukhonona ngalomunye.+ Njengobe nje Jehova* anitsetselele ngekukhululeka, nani yentani kanjalo.+ 14 Kodvwa ngetulu kwato tonkhe letintfo, gcokani lutsandvo+ ngobe lusibopho lesiphelele sebunye.+

15 Vumelani kuthula kwaKhristu kubuse* tinhlitiyo tenu,+ ngobe ecinisweni nabitelwa kulokuthula emtimbeni munye, futsi banini ngulababongako. 16 Livi laKhristu aliphuphume kini futsi linente nihlakaniphe. Chubekani nifundzisana futsi nikhutsatana* ngetingoma,+ nihlabele tingoma tekudvumisa, netingoma tekukhonta Nkulunkulu letihlatjelwa ngekubonga, futsi nihlabelele Jehova* etinhlitiyweni tenu.+ 17 Nobe yini leniyikhulumako nobe leniyentako, konkhe kwenteni egameni leNkhosi Jesu, ngayo nibonge Nkulunkulu longuBabe.+

18 Bafati, tfobelani emadvodza enu+ ngobe loku kuhle eNkhosini. 19 Madvodza, chubekani nitsandza bafati benu+ futsi ningabatfukutseleli kakhulu.*+ 20 Bantfwana, lalelani batali benu kuto tonkhe tintfo,+ ngobe loku kuyayijabulisa iNkhosi. 21 Bobabe, ningabatfukutselisi* bantfwana benu+ kuze bangapheli emandla. 22 Tigcili, balaleleni kuto tonkhe tintfo labo labaniphetse emhlabeni,+ hhayi kuphela nabanibukile kuze nje nijabulise bantfu,* kodvwa nibalalele ngenhlitiyo lecotfo nangekwesaba Jehova.* 23 Konkhe lenikwentako kwenteni ngemphefumulo* wonkhe kube shengatsi nentela Jehova,*+ hhayi bantfu, 24 ngobe niyati kutsi lifa lelingumvuzo wenu nitalitfola kuJehova.*+ Sebentelani iNkhosi, lenguKhristu. 25 Loyo lowenta lokubi utawutfola umvuzo walokubi lakwentile,+ ngobe Nkulunkulu akakhetsi.+

4 Nine leniphetse, nibophatsa tigcili tenu ngendlela lekahle nalefanele, nati kutsi nani nineNkhosi ezulwini.+

2 Phikelelani emthantazweni,+ futsi niwuphaphamele ngekubonga.+ 3 Natsi nibosithantazela+ kuze Nkulunkulu asivulele umnyango wekushumayela livi, khona sitokwati kumemetela imfihlo lengcwele lemayelana naKhristu, leyo lengiboshwe+ ngenca yayo; 4 kuze ngikhulume ngayo ngalokucacile njengobe kufanele ngente.

5 Chubekani nihamba ngekuhlakanipha emkhatsini walabo labangephandle, nisisebentise kahle nesikhatsi senu.*+ 6 Ngaso sonkhe sikhatsi, emavi leniwakhulumako akabe nemusa, futsi avangwe ngeluswayi,+ kuze niyati indlela yekuphendvula umuntfu ngamunye.+

7 Thikhikhusi+ umzalwane wami lotsandzekako, losisebenti lesetsembekile futsi losigcili lengikanye naso eNkhosini, utanitjela konkhe ngami. 8 Ngimtfumela kini kuze nati kutsi sinjani, khona atonidvudvuta. 9 Utawufika na-Onesimuse,+ umzalwane wami lowetsembekile nalotsandzekako losuka kini, futsi batanitjela tonkhe tintfo letenteka lapha.

10 Aristakhusi+ losiboshwa lengikanye naso uyanivusela, naMakho+ umzala waBhanabasi uyanivusela (loyo lenayalwa kutsi nimemukele+ nakefika kini), 11 naJesu lokutsiwa nguJustusi naye uyanivusela, futsi bonkhe laba bangulabasokile. Ngulaba kuphela labatisebenti letikanye nami teMbuso waNkulunkulu, futsi bayindvudvuto lenkhulu kimi.* 12 Ephafrasi+ losigcili saKhristu Jesu nalosuka kini, uyanivusela. Uhlale anithantazela ngekutimisela kuze nime nicine futsi nibe nekukholwa lokucinile kuko konkhe lokuphatselene nentsandvo yaNkulunkulu. 13 Ngiyamfakazela kutsi wenta umetamo lomkhulu ngenca yenu nangenca yalabo labaseLawodisiya naseHiyerapholisi.

14 Lukha+ longudokotela lotsandzekako uyanivusela, naDemasi+ naye uyanivusela. 15 Vuselani bazalwane labaseLawodisiya, naNimfasi nelibandla lelisendlini yakhe.+ 16 Naseniyifundzile lencwadzi, hlelani kutsi ifundvwe+ nasebandleni laseLawodisiya, bese nani nifundza leyo lengayitfumela khona. 17 Nibotjela Akhiphusi+ nitsi: “Ciniseka kutsi uyawufeza umsebenti lowawemukela eNkhosini.”

18 Mine Pawula ngiyanivusela futsi loku ngikubhale ngesandla sami.+ Hlalani nikhumbula kutsi ngiboshiwe.+ Umusa lomkhulu waNkulunkulu awube nani.