INCWADZI YESIBILI LEYA KUTHIMOTHI

1 Mine Pawula, umphostoli waKhristu Jesu ngentsandvo yaNkulunkulu ngekuvumelana nesetsembiso sekuphila lesikhona ngaKhristu Jesu,+ 2 ngibhalela Thimothi umntfwana lotsandzekako:+

Shengatsi ungemukela umusa lomkhulu, nesihawu kanye nekuthula lokuvela kuNkulunkulu longuBabe, nakuKhristu Jesu iNkhosi yetfu.

3 Ngiyambonga Nkulunkulu lengimkhonta nganembeza lohlantekile njengobe bokhokho bami bebenta, futsi angikukhohlwa nangincusa busuku nemini. 4 Ngilangatelela kukubona njengobe ngikhumbula tinyembeti takho, kuze ngijabule kakhulu. 5 Ngobe ngikhumbula kukholwa kwakho lokute kutentisa,+ lokwacala kugogo wakho Lowisi nakumake wakho Yunisi, nalengicinisekako kutsi kukhona nakuwe.

6 Ngenca yaloku, ngikukhumbuta kutsi uchubeke usenta sivutse njengemlilo sipho lowasemukela kuNkulunkulu, lowasitfola ngekutsi ngikubeke tandla.+ 7 Ngobe Nkulunkulu akazange asinike umoya webugwala,+ kepha wasinika umoya wemandla,+ welutsandvo, newekuba nengcondvo lebhadlile. 8 Ngako-ke ungabi nemahloni ekufakaza ngeNkhosi+ nobe ngami, mine lengisiboshwa ngenca yayo, kodvwa hlanganyela ekuhluphekeni+ ngenca yetindzaba letimnandzi, ngekutsi wetsembele emandleni aNkulunkulu.+ 9 Yena wasisindzisa futsi wasibita ngelubito lolungcwele,+ hhayi ngenca yemisebenti yetfu, kodvwa ngenca yenjongo yakhe nemusa wakhe lomkhulu.+ Sentelwa lomusa etikhatsini takadzeni ngaKhristu Jesu, 10 kodvwa nyalo sekwentiwe kwacaca ngekubonakaliswa kweMsindzisi wetfu, Khristu Jesu,+ lowacedza kufa+ futsi wenta kuphila+ nekungonakali kwakhanya+ ngetindzaba letimnandzi,+ 11 lengabekwa kutsi ngibe ngumshumayeli wato, umphostoli kanye nemfundzisi wato.+

12 Kungako ngihlupheka,+ kodvwa-ke ngite emahloni,+ ngobe ngiyamati Loyo lengikholwe kuye, futsi ngiyaciniseka kutsi utawukwati kulondvolota loko langinike kona kuze kube ngulelolanga.+ 13 Chubeka ubambelele esibonelweni semavi laphilile*+ lowaweva kimi ngekukholwa nangelutsandvo loluvela ebunyeni naKhristu Jesu. 14 Lelifa lowanikwa lona lilondvolote ngemoya longcwele lohlala kitsi.+

15 Uyati kutsi onkhe emadvodza asesifundzeni sase-Asiya+ angifulatsele, lokufaka ekhatsi Figelusi naHemogenesi. 16 Shengatsi iNkhosi ingamentela umusa Onesiforusi nemndeni wakhe,+ ngobe bekahlale angikhutsata, futsi ete nemahloni ngekuboshwa kwami. 17 Ngesikhatsi aseRoma, wangifunisisa futsi wangitfola. 18 Shengatsi iNkhosi ingenta kutsi atfole umusa lovela kuJehova* ngelilanga lekwehlulelwa. Nawe utati kahle tonkhe tintfo latenta e-Efesu.

2 Ngako wena mntfwanami,+ chubeka uticinisa ngemusa lomkhulu lesiwukhonjiswa nguKhristu Jesu, 2 futsi tintfo lowativa kimi letasekelwa bofakazi labanyenti+ tiphatsise emadvodza letsembekile, nawo latakufanela kahle kufundzisa labanye. 3 Njengobe ulisotja lelihle+ laKhristu Jesu, nawe kubeketelele kuhlupheka.+ 4 Kute lisotja lelitifaka* etindzabeni tekutsengiselana,* nangabe lifuna kwemukelwa nguloyo lolicashe njengelisotja. 5 Kantsi nasemidlalweni, umuntfu longayilandzeli imitsetfo yemdlalo akawutfoli umklomelo.+ 6 Umlimi lokhutsele nguye lokufanele adle titselo kucala. 7 Ubohlale ucabanga ngaloko lengikushoko, futsi iNkhosi itakusita kutsi ucondze tonkhe tintfo.

8 Khumbula kutsi Jesu Khristu wavuswa ekufeni+ nekutsi bekayintalelwane* yaDavide+ ngekusho kwetindzaba letimnandzi lengitishumayelako,+ 9 lengihlupheka ngenca yato futsi ngaze ngaboshwa kwaba shengatsi ngisigebengu.+ Kodvwa-ke livi laNkulunkulu lona alikaboshwa.+ 10 Ngaleso sizatfu, ngichubeka ngibeketelela tonkhe tintfo ngenca yalabakhetsiwe,+ kuze nabo batotfola insindziso letfolakala ngaKhristu Jesu, batfole nenkhatimulo yaphakadze. 11 Etsembekile lamavi latsi: Nangabe sife kanye kanye, sitawuphindze siphile kanye kanye;+ 12 nasichubeka sibeketela, sitawubusa kanyekanye njengemakhosi;+ nasimphika, naye utasiphika;+ 13 ngisho nobe singetsembeki, yena uhlale etsembekile ngobe angeke atiphike.

14 Chubeka ubakhumbuta ngaletintfo, ubayale* embikwaNkulunkulu kutsi bangalwi ngemagama, lokuyintfo lengenamsebenti ngobe kulimata* labo labalalele. 15 Yenta konkhe lokusemandleni akho kutsi utivete wemukeleka kuNkulunkulu, usisebenti lesite emahloni ngalutfo, nalesiphatsa livi leliciniso ngendlela lefanele.+ 16 Kodvwa tibalekele tinkhulumo letilite letingakuhloniphi lokungcwele;+ ngobe titawuholela kulo lonkhe luhlobo lwekutiphatsa kwekungamhloniphi Nkulunkulu, 17 kantsi emavi alabo labatikhulumako atawusakateka njengesilondza lesibhidlikako. BoHumenayosi naFiletusi bangulabanye balabo bantfu.+ 18 Baphambukile ecinisweni, batsi labafile sebavele bavusiwe,+ futsi balimata kukholwa kwalabanye. 19 Nangetulu kwaloko, sisekelo lesicinile saNkulunkulu solo simile, sineluphawu lolutsi, “Jehova* uyabati labo lababakhe,”+ kanye nalolutsi, “Wonkhe umuntfu lobita libito laJehova*+ akalahle kungalungi.”

20 Endlini lenkhulu akuhlali titja teligolide netelisiliva kuphela, kodvwa kuhlala netitja tesigodvo netelubumba, letinye telikhetselo kodvwa letinye atisito telikhetselo. 21 Ngako nangabe umuntfu atigcina akhashane naleti letingasito telikhetselo, utawuba sitja selikhetselo, lesingcwelisiwe, lesilusito kumnikati waso, nalesilungele wonkhe umsebenti lomuhle. 22 Ngako tibalekele tifiso tebusha, kodvwa ulwele kuba nekulunga, kukholwa, lutsandvo, nekuthula, ukanye nalabo labetsemba iNkhosi futsi labanenhlitiyo lehlantekile.

23 Ngetulu kwaloko, balekela timphikiswane letibulima naletilite,+ wati kutsi tibangela kulwa. 24 Ngobe sisebenti seNkhosi akukafaneli silwe, kodvwa kufanele sibe nemusa* kubo bonkhe,+ sikufanele kufundzisa, futsi sitibambe nasoniwa,+ 25 sibayale ngemoya lophansi* labo labamelene naso,+ ngobe Nkulunkulu angahle abente baphendvuke,* batfole lwati lolungulonalona lweliciniso,+ 26 futsi mhlawumbe bangasanguluka baphindze baphunyule elugibeni lwaDeveli, ngobe ubabambe baphila kuze bente intsandvo yakhe.+

3 Kepha yati kutsi emalangeni ekugcina+ kutawuba netikhatsi letibucayi lokumatima kubhekana nato. 2 Ngobe bantfu batawutitsandza bona, batsandze imali, batigabatise, batigcabhe, bahlambalate, bangalaleli batali, bangabongi, bangetsembeki, 3 babe bete lutsandvo, bangavumi kwenta tivumelwane, banyundzele, bangatibambi, babe nelulaka, bangakutsandzi lokuhle, 4 batsengise ngalabanye, babe nenkhani, bagcwale umgcabho, batsandze injabulo kunekutsandza Nkulunkulu, 5 babonakale shengatsi bayamhlonipha Nkulunkulu kodvwa indlela labaphila ngayo ingakukhombisi loko;+ bantfu labanjalo ubobafulatsela. 6 Emkhatsini wabo kuba nebantfu labangena ngekunyenya emakhaya bakhange bafati lababutsakatsaka labesindvwa tono, futsi labalawulwa tinkhanuko letehlukahlukene, 7 nalabahlale bafundza kodvwa bangakhoni kutfola lwati lolungulonalona lweliciniso.

8 Njengobe nje boJanesi naJambresi bamelana naMosi, nabo laba bachubeka bamelana neliciniso. Bantfu labanjalo bonakele ngalokuphelele etingcondvweni tabo futsi abemukeleki ekukholweni. 9 Kodvwa ngeke baphumelele, ngobe bulima babo butawubonakala kubo bonkhe, njengobe nje nebulima balamadvodza lamabili babonakala.+ 10 Kepha wena uyilandzele edvute imfundziso yami, indlela yami yekuphila,+ injongo, kukholwa, kubeketela, lutsandvo, kucinisela kwami, 11 kuphatfwa kabi kanye nekuhlupheka lokunjengaloko lengabhekana nako e-Antiyokhi,+ e-Ikhoniyumi,+ naseListra.+ Ngacinisela kulokuphatfwa kabi lokunjalo futsi iNkhosi yangikhulula kuko konkhe.+ 12 Ecinisweni bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.+ 13 Kepha bantfu lababi nebakhohlisi batawudlanga ngebubi, badukise futsi nabo badukiswe.+

14 Kodvwa wena chubeka wenta loko lowafundziswa kona nalowasitwa kutsi ukukholwe,+ ngobe uyati kutsi wakufundza kubobani, 15 nekutsi kusukela useluswane+ wayati imibhalo lengcwele,+ leyo lengakhona kukwenta uhlakaniphe kuze usindziswe ngekukholwa kuKhristu Jesu.+ 16 Yonkhe imiBhalo iphefumulelwe nguNkulunkulu,+ ilusito ekufundziseni,+ ekwekhuteni, ekulungiseni tintfo,* nasekuyaleni ngekulunga,+ 17 kuze umuntfu waNkulunkulu akulungele ngalokuphelele, futsi akufanele kahle kwenta yonkhe imisebenti lemihle.

4 Ngiyakuyalisisa embikwaNkulunkulu nasembikwaKhristu Jesu, lotawehlulela+ labaphilako nalabafile+ lapho sekabonakala+ futsi sekayiNkhosi eMbusweni,+ ngitsi: 2 Shumayela livi;+ ushumayele ngekutimisela ngetikhatsi letivumako naletimatima; ukhalimele,+ wekhute, uyale ngako konkhe kubeketela nangelikhono lekufundzisa.+ 3 Ngobe kutawufika sikhatsi lapho bangeke bayibeketelele khona imfundziso lephilile,*+ kodvwa ngekuvumelana netifiso tabo, batawutifunela bafundzisi kuze babakitate tindlebe.*+ 4 Batawuyekela kulalela liciniso, bese banaka tindzaba letingemanga. 5 Kodvwa wena hlala usangulukile kuto tonkhe tintfo, ucinisele nakumatima,+ uchubeke ushumayela tindzaba letimnandzi,* futsi uwente kahle umsebenti wakho.+

6 Ngobe sengivele ngitfululwa njengemnikelo walokunatfwako,+ kantsi nesikhatsi sekutsi ngikhululwe+ sesisedvute. 7 Ngikulwile kulwa lokuhle,+ ngilicedzile nelibanga lami,+ futsi ngikugcinile kukholwa. 8 Kusukela nyalo ngigcinelwe umchele wekulunga,+ lowo iNkhosi lengumehluleli lolungile+ letanginika wona kutsi ube ngumvuzo ngalelolanga,+ hhayi mine kuphela kepha nabo bonkhe labakutsandzile kubonakaliswa kwayo.

9 Lwela kutsi ufike kimi masinyane. 10 Ngobe Demasi+ ungishiyile ngenca yekutsi utsandza lelive,* futsi uye eThesalonika, Khresensi yena uye eGalathiya, Thithusi waya eDalmathiya. 11 NguLukha kuphela lonami. Ubokuta naMakho ngobe uyangisita emsebentini lengiwentela Nkulunkulu. 12 Thikhikhusi+ ngimtfumele e-Efesu. 13 Nawuta ubophatsa sembatfo sami lengasishiya eThrowasi kuKhaphusi, uphatse nemiculu, ikakhulukati leyesikhumba.

14 Alekzanda losebenta ngelitfusi wente tintfo letinyenti letimbi kimi. Jehova* utangiphindziselela, kuye ngaloko lakwentile.+ 15 Nawe kufanele umcaphele ngobe wamelana kakhulu nemlayeto wetfu.

16 Ekutivikeleni kwami kwekucala kute lowangisekela, kodvwa bonkhe bangishiya. Shengatsi bangete balandzisa ngaloko. 17 Kepha iNkhosi yema eceleni kwami yanginika emandla, kuze kutsi ngami umsebenti wekushumayela wentiwe ngalokugcwele, nekutsi tonkhe tive titowuva ngawo;+ futsi ngakhululwa emlonyeni welibhubesi.+ 18 INkhosi itangikhulula kuyo yonkhe imisebenti lemibi, ingisindzisele uMbuso wayo wasezulwini.+ Ludvumo aluye kuyo phakadze naphakadze. Amen.

19 Vusela boPhrisila na-Akhwila+ kanye na-Onesiforusi nemndeni wakhe.+

20 Erastusi+ wasala eKhorinte, kodvwa Trofimusi+ ngamshiya agula eMilethusi. 21 Lwela kutsi ufike kusengakabi sebusika.

Ebulusi uyakuvusela, naPhudensi, naLinusi, naKlawudiya kanye nabo bonkhe bazalwane.

22 INkhosi ayibe nawe njengobe ukhombisa umoya lomuhle. Shengatsi umusa wayo lomkhulu ungaba nani.