INCWADZI LEYA KUMAHEBHERU

1 Kadzeni, Nkulunkulu wakhuluma nabokhokho betfu tikhatsi letinyenti nangetindlela letinyenti asebentisa baphrofethi.+ 2 Nyalo ekupheleni kwalamalanga, ukhulume natsi asebentisa iNdvodzana,+ leyo layibeka yaba yindlalifa yato tonkhe tintfo,+ futsi watenta ngayo tintfo letisemhlabeni naletisezulwini.*+ 3 Ikubonakaliswa kwenkhatimulo yaNkulunkulu,+ futsi inguwo kanye umfanekiso webunguye baKhe,+ isekela tonkhe tintfo ngelivi layo lelinemandla. Ngemuva kwekuhlanta tono tetfu,+ yahlala ngesekudla saNkulunkulu lophakeme ezulwini.+ 4 Ngako seyibe sesikhundleni lesisetulu kakhulu kunetingilosi,+ kangangekutsi itfole ligama lelihle kakhulu kunelato.+

5 Nasi sibonelo: Ikhona yini ingilosi Nkulunkulu lake watsi kuyo: “Wena uyindvodzana yami, lamuhla ngikutele”?+ Nobe watsi: “Ngitawuba ngubabe wayo, yona ibe yindvodzana yami”?+ 6 Mayelana nesikhatsi latawuphindze aletse ngaso Litibulo lakhe+ emhlabeni, utsi: “Tonkhe tingilosi taNkulunkulu atimkhotsamele.”

7 Ngetulu kwaloko, mayelana netingilosi utsi: “Wena wente tingilosi takho taba nemandla,* tinceku* takho+ watenta taba lilangabi lemlilo.”+ 8 Kodvwa mayelana neNdvodzana utsi: “Nkulunkulu ukunike bukhosi*+ phakadze naphakadze, nentfonga yeMbuso wakho iyintfonga yekulunga.* 9 Wena wakutsandza kulunga futsi wabutondza bubi. Kungako Nkulunkulu, longuNkulunkulu wakho akugcobe+ ngemafutsa futsi wakwenta wajabula kakhulu kwendlula onkhe lamanye emakhosi.”+ 10 Uphindze atsi: “Ekucaleni, wena Nkhosi wabeka tisekelo temhlaba, futsi emazulu angumsebenti wetandla takho. 11 Kutawushabalala, kodvwa wena utawuhlale ukhona; konkhe kutawuguga njengengubo, 12 futsi utakugoca njengesembatfo nanjengengubo. Kodvwa wena awushintji, futsi utawuhlale ukhona.”+

13 Ikhona yini ingilosi lake wakhuluma ngayo watsi: “Hlala ngesekudla sami kuze kube ngulapho titsa takho ngitibeka ngephansi kwetinyawo takho”?+ 14 Tonkhe tingilosi tingumoya futsi tenta umsebenti longcwele.+ Nkulunkulu utitfuma kutsi tiyosita labo labatawusindziswa.

2 Kungako kubalulekile kutsi sitinakisise tintfo lesitivile,+ kuze singaphambuki.+ 2 Ngobe nangabe loko lokwakhulunywa ngako kusetjentiswa tingilosi+ kwaba liciniso, futsi bonkhe labonako nalabangalaleli batfola sijeziso lesihambisana nekulunga,+ 3 singasindza njani nangabe singazange siyinake insindziso lenkhulu kangaka?+ Ngobe iNkhosi yetfu yaba yekucala kukhuluma ngayo+ futsi labo labayiva bakufakazela loko kitsi, 4 naNkulunkulu wakufakazela ngetibonakaliso, ngetimangaliso, ngemisebenti leyehlukahlukene yemandla,+ kanye nangemoya longcwele lokhishwa ngekuvumelana nentsandvo yakhe.+

5 Umhlaba lotako lesikhuluma ngawo akakawubeki ngephansi kwetingilosi.+ 6 Kodvwa kunalomunye fakazi lowake wafakaza watsi: “Umuntfu abeyini-ke kutsi ungahlale umkhumbula, nendvodzana yemuntfu beyiyini kutsi ungayinakekela?+ 7 Umente waba ngephansana kwetingilosi; wametfwesa ludvumo nekuhlonipheka, waphindze wambeka ngetulu kwemisebenti yetandla takho. 8 Wabeka tonkhe tintfo ngephansi kwetinyawo takhe.”+ Ngekubeka tonkhe tintfo ngephansi kwakhe,+ kute intfo Nkulunkulu layishiya.+ Kepha nyalo sisengakatiboni tonkhe tintfo tingephansi kwakhe.+ 9 Kodvwa siyabona kutsi Jesu, lowentiwa waba ngephansana kwetingilosi,+ sewetfweswe ludvumo nekuhlonipheka ngobe wahlupheka waze wafa,+ kuze kutsi ngemusa lomkhulu waNkulunkulu afele bonkhe bantfu.+

10 Bekufanele kutsi loyo tonkhe tintfo letaba khona ngenca yakhe naletaba khona ngaye, ngekuletsa emadvodzana lamanyenti enkhatimulweni,+ ente uMmeleli Loyinhloko wensindziso yawo+ apheleliswe ngekuhlupheka.+ 11 Ngobe loyo longcwelisako nalabo labangcweliswako,+ bonkhe bavela kumuntfu munye,+ ngaleso sizatfu ute emahloni ekubabita ngekutsi bomnakabo,+ 12 njengobe atsi: “Libito lakho ngitalimemetela kubomnaketfu; ngikudvumise ngetingoma emkhatsini welibandla.”+ 13 Uphindze atsi: “Ngitawubeka litsemba lami kuye.”+ Aphindze atsi: “Bukani, mine nebantfwana labancane lengibanikwe nguJehova.”*+

14 Ngako-ke njengobe ‘labantfwana labancane’ bayingati nenyama, naye waba nguloko,+ kuze kutsi ngekufa kwakhe amente lite loyo lonendlela yekubangela kufa,+ lokunguDeveli,+ 15 futsi akhulule bonkhe lebebagcilatwe kwesaba kufa+ kuko konkhe kuphila kwabo. 16 Ecinisweni akasiti tingilosi, kodvwa usita intalelwane* ya-Abrahama.+ 17 Kungako kwadzingeka kutsi afane ‘nabomnakabo’ kuto tonkhe tintfo,+ kuze abe ngumphristi lophakeme lonesihawu futsi lowetsembekile etintfweni letimayelana naNkulunkulu, khona atonikela umhlatjelo wekuhlawulela+ tono tebantfu.*+ 18 Njengobe naye ahlupheka ngesikhatsi alingwa,+ uyakwati kubasita labo labalingwako.+

3 Ngako-ke bazalwane labangcwele leninelubito* lwasezulwini,+ cabangisisani ngaJesu longumphostoli nemphristi lophakeme, futsi lesivumako kutsi siyakholwa kuye.+ 2 Beketsembekile kuNkulunkulu, lokunguye lowambeka,+ njengobe nje naMosi beketsembekile kuyo yonkhe indlu yaNkulunkulu.+ 3 Yena* ufanelwe ludvumo lolukhulu+ kwendlula Mosi, njengobe nje umakhi advunyiswa kakhulu kunendlu. 4 Ecinisweni, nguleyo naleyondlu inemakhi wayo, kodvwa loyo lowakhe tonkhe tintfo nguNkulunkulu. 5 Mosi bekayinceku leyetsembekile kuyo yonkhe indlu yaNkulunkulu kuze kube bufakazi betintfo lebetitawukhulunywa ngemuva kwaloko, 6 kodvwa Khristu wetsembeka njengobe bekayindvodzana+ endlini yaNkulunkulu. Tsine siyindlu yaNkulunkulu+ nangabe sichubeka sikhuluma sikhululekile futsi sibambisise litsemba lesitigcabha ngalo kuze kube sekugcineni.

7 Ngako-ke, njengobe nje umoya longcwele utsi:+ “Kube mane lamuhla beningalilalela livi lakhe nakatsi: 8 Ningatenti lukhuni tinhlitiyo tenu njengalapho bokhokho benu bangitfukutselisa ngelilanga labangivivinya ngalo ehlane,+ 9 ngesikhatsi bangivivinya futsi bangilinga, nanobe bebayibonile imisebenti yami iminyaka lengu-40.+ 10 Kungako ngasicansukela leso situkulwane futsi ngatsi: ‘Tinhlitiyo tabo tihlale tiphambuka; netindlela tami abatilandzeli.’ 11 Ngako ngafunga ngitfukutsele ngatsi: ‘Ngeke ngibavumele kutsi baphumule kanye nami.’”+

12 Caphelani bazalwane, kutsi kube bete kini loba nenhlitiyo lembi nalete kukholwa ngekutsi akhweshe kuNkulunkulu lophilako;+ 13 kodvwa chubekani nikhutsatana malanga onkhe, yingci nje nakusatsiwa “Lamuhla,”+ khona kutawuba bete emkhatsini wenu loba lukhuni ngenca yekuyenga kwesono. 14 Ngako sitawutfola* loko lokwatfolwa nguKhristu kuphela nangabe sikubambisisa kuze kube sekugcineni kuciniseka lebesinako ekucaleni.+ 15 Ngobe kutsiwa: “Kube mane lamuhla beningalilalela livi lakhe nakatsi ningatenti lukhuni tinhlitiyo tenu njengalapho bokhokho benu bangitfukutselisa.”+

16 Bobani labamuva kodvwa bamtfukutselisa? Akusibo yini bonkhe labo labaphuma eGibhithe baholwa nguMosi?+ 17 Ngetulu kwaloko, bobani Nkulunkulu labacansukela iminyaka lengu-40?+ Akusibo yini labo lebebonile, futsi labafela ehlane?+ 18 Kantsi futsi bobani lafunga kutsi ngeke baphumule kanye naye? Akusibo yini labo labangazange balalele? 19 Siyabona-ke kutsi bebangeke baphumule kanye naye ngobe bebete kukholwa.+

4 Ngako njengobe sisekhona setsembiso sekuphumula kanye naye, asicaphele* kuze kutsi emkhatsini wenu kube bete losalela ngephandle.+ 2 Ngobe tindzaba letimnandzi tamenyetelwa nakitsi+ njengobe kwaba njalo nakubo; kodvwa livi labaliva alizange libazuzise ngenca yekutsi bebete kukholwa lokucinile njengalabo labalalela. 3 Tsine lesikholwako siphumula kanye naye, njengobe nje atsi: “Ngako ngafunga ngitfukutsele ngatsi: ‘Ngeke ngibavumele kutsi baphumule kanye nami,’”+ ngisho nobe besekayicedzile imisebenti yakhe kusukela ekusekelweni kwemhlaba.+ 4 Ngobe kulomunye umbhalo wakhuluma ngelilanga lesi-7 watsi: “Nkulunkulu waphumula kuyo yonkhe imisebenti yakhe ngelilanga lesi-7,”+ 5 futsi waphindze watsi: “Ngeke ngibavumele kutsi baphumule kanye nami.”+

6 Njengobe labanye basengakhona kuphumula kanye naye, futsi nalabo tindzaba letimnandzi letashunyayelwa kubo kucala bangazange baphumule kanye naye ngenca yekungalaleli,+ 7 uphindze wabeka lilanga ngesikhatsi akhuluma ngemuva kwesikhatsi lesidze esihlabelelweni saDavide atsi “Lamuhla”; njengobe nje ngenhla kutsiwe: “Kube mane lamuhla beningalilalela livi lakhe nakatsi ningatenti lukhuni tinhlitiyo tenu+ njengobe bokhokho benu benta.” 8 Ngobe kube Joshuwa+ wabayisa endzaweni yekuphumula, Nkulunkulu bekangeke bese ukhuluma ngalelinye lilanga. 9 Ngako-ke kusekhona kuphumula kwelisabatha lokusalele bantfu baNkulunkulu.+ 10 Umuntfu lophumule kanye naNkulunkulu uphumulile emisebentini yakhe, njengobe nje naNkulunkulu aphumulile kuyakhe.+

11 Asilwele kuphumula kanye naye, kuze kube bete umuntfu lowako futsi alingise sibonelo sabo sekungalaleli.+ 12 Ngobe livi laNkulunkulu liyaphila, linemandla+ futsi likhalipha kwendlula inkemba lesika nhlangotsi totimbili,+ lihlaba kuze kwehlukane umphefumulo* nemoya,* emalunga nemnkantja, futsi liyakwati kucondza imicabango netinhloso tenhlitiyo. 13 Kute nendalo lefihlekile emehlweni akhe,+ kodvwa tonkhe tintfo tembuliwe futsi tibekwe ebaleni emehlweni aloyo lesitawulandzisa kuye.+

14 Njengobe sinemphristi lophakeme kakhulu nalodzabule emazulu, lokunguJesu iNdvodzana yaNkulunkulu,+ asichubeke sivuma kutsi siyakholwa kuye.+ 15 Umphristi wetfu lophakeme ngeke ehluleke kuvelana natsi ebutsakatsakeni betfu,+ ngobe uvivinywe njengatsi kuto tonkhe tintfo, kepha yena ute sono.+ 16 Ngaleso sizatfu, asisondzele esihlalweni sebukhosi semusa lomkhulu waNkulunkulu sinenkhululeko yekukhuluma,+ kuze sitfole sihawu nemusa wakhe lotasisita ngesikhatsi lesifanele.

5 Ngobe wonkhe umphristi lophakeme lokhetfwa kubantfu ubekelwa kwenta imisebenti yaNkulunkulu ngenca yabo,+ kuze anikele ngetipho nangemihlatjelo yetono.+ 2 Uyakhona kubaphatsa ngemusa* labo labete lwati nalabaphambukako* ngobe naye unebakhe butsakatsaka, 3 ngenca yaloko kufanele ente imihlatjelo yetono takhe njengobe nje naye entela labanye.+

4 Umuntfu akatitsatseli yena lomsebenti, kodvwa uwenta kuphela nangabe abitwe nguNkulunkulu, njengobe bekunjalo nga-Aroni.+ 5 Ngako naKhristu akazange atiphakamise yena+ kutsi abe ngumphristi lophakeme, kodvwa waphakanyiswa nguLoyo lowatsi kuye: “Wena uyindvodzana yami, lamuhla ngikutele.”+ 6 Kulomunye umbhalo uphindze atsi: “Wena ungumphristi kuze kube phakadze njengaMelkhisedeki.”+

7 Ngesikhatsi asemhlabeni,* Khristu wancusa waphindze wacela kuLoyo lobekangamsindzisa ekufeni, loku wakwenta ngekukhala lokukhulu nangetinyembeti,+ futsi imithantazo yakhe yevakala ngenca yekutsi bekesaba Nkulunkulu. 8 Ngisho nome bekayindvodzana, wafundza kulalela ngekuhlupheka kwakhe.+ 9 Ngemuva kwekupheleliswa,+ waba ngumtfombo wensindziso yaphakadze kubo bonkhe labamlalelako,+ 10 ngobe ubekwe nguNkulunkulu kutsi abe ngumphristi lophakeme njengaMelkhisedeki.+

11 Kunyenti lesingakusho ngaye, kodvwa kulukhuni kukuchaza ngobe seniyephuta kucondza.* 12 Nanome nyalo* kufanele ngabe senibafundzisi, kepha nisadzinga umuntfu lotanifundzisa tintfo letimelula+ temavi aNkulunkulu, acale ekucaleni; futsi seniphindze nidzinga lubisi, hhayi kudla lokucinile. 13 Wonkhe umuntfu losanatsa lubisi akaketayelani nelivi laNkulunkulu lelilungile, ngobe usuke angumntfwana lomncane.+ 14 Kodvwa kudla lokucinile kwebantfu labavutsiwe, labo labahlale bacecesha tingcondvo tabo* ngekutisebentisa kuze tehlukanise lokulungile nalokungakalungi.

6 Ngako njengobe sesendlulile emfundzisweni lesisekelo+ lemayelana naKhristu, asichubekeleni ekuvutfweni,+ singasaphindzi sibeke sisekelo, lokutimfundziso letifaka ekhatsi kuphendvuka emisebentini lefile, kukholwa kuNkulunkulu, 2 imfundziso yelubhabhatiso, kubekwa kwetandla,+ kuvuswa kwalabafile+ kanye nekwehlulelwa kwaphakadze. 3 Loku sitakwenta nangabe Nkulunkulu avuma.

4 Ngobe labo lebebake bakhanyiselwa,+ futsi banambitsa sipho samahhala lesivela ezulwini, bemukela nemoya longcwele, 5 banambitsa nelivi lelihle laNkulunkulu kanye netintfo letinemandla telive* lelitako, 6 kodvwa base bayaphambuka,+ ngeke kwenteke kutsi baphindze baphendvuke ngobe sebaphindze babetsela iNdvodzana yaNkulunkulu elugodvweni futsi bayitsela ngelihlazo.+ 7 Umhlabatsi utfola sibusiso lesivela kuNkulunkulu nawumunya emanti emvula lenako, futsi uvete lokumilako lokulusito kulabo labalimile. 8 Kodvwa nawuveta emanyeva nelukhula, uba yintfo lengenamsebenti futsi kusuke sekusedvute kutsi ucalekiswe, ekugcineni utawushiswa.

9 Mayelana nani bazalwane labatsandzekako, ngisho nobe sikhuluma ngalendlela, siyaciniseka kutsi nine nincono, ngobe nenta tintfo letitawenta kutsi nisindziswe. 10 Ngobe Nkulunkulu ulungile, ngako ngeke awukhohlwe umsebenti wenu nelutsandvo lenibe nalo ngelibito lakhe,+ ngekutsi benibasita labangcwele futsi niyachubeka nibasita. 11 Kodvwa sifisa kutsi ngamunye wenu achubeke akhutsele njengasekucaleni kute niciniseke ngalokuphelele ngelitsemba+ lenu kuze kube sekugcineni,+ 12 khona ningatovilapha,+ kepha nilingise labo labatfola letetsembiso ngekukholwa nangekubeketela.

13 Ngesikhatsi Nkulunkulu enta setsembiso ku-Abrahama, watifunga yena ngobe bekute lomunye lomkhulu kunaye lebekangafunga ngaye,+ 14 watsi: “Nakanjani ngitakubusisa, futsi ngitakwandzisa mbamba.”+ 15 Ngako ngemuva kwekubeketela, Abrahama wasitfola lesetsembiso. 16 Bantfu bafunga umuntfu lomkhulu kunabo, nesifungo sabo sicedza konkhe kuphikisana ngobe sisicinisekiso lesisemtsetfweni kubo.+ 17 Ngendlela lefanako, ngesikhatsi Nkulunkulu akhetsa kukuveta ngalokucacile kungashintji kwenjongo* yakhe kulabo labatindlalifa tesetsembiso,+ wakucinisekisa* ngesifungo, 18 kuze kutsi ngesetsembiso sakhe nangesifungo sakhe, tsine lesibalekele esiphephelweni sikhutsateke kakhulu kutsi sibambelele etsembeni lelibekwe embikwetfu. Nkulunkulu angeke acale emanga+ ngobe setsembiso sakhe nesifungo sakhe akwenteki sishintje. 19 Sinalelitsemba+ lelinjengelihhuka lemkhumbi emiphefumulweni* yetfu. Lelitsemba licinisekisiwe futsi licinile, liphindze lingene liphumele ngale kwendvwangu+ 20 lapho Jesu angena khona kucala ngenca yetfu futsi wasivulela indlela,+ waba ngumphristi lophakeme phakadze njengaMelkhisedeki.+

7 LoMelkhisedeki, loyinkhosi yaseSalema futsi longumphristi waNkulunkulu Losetikwako Konkhe, wahlangana na-Abrahama abuya kuyoncoba emakhosi futsi wambusisa.+ 2 Abrahama wase umnika* incenye yinye kuletilishumi kuto tonkhe tintfo. Libito laMelkhisedeki lisho kutsi “INkhosi Yekulunga,” uphindze abe yinkhosi yaseSalema, lokusho kutsi “INkhosi Yekuthula.” 3 Akwatiwa kutsi ngubani babe wakhe namake wakhe, kute umlandvo wekutalwa kwakhe, akwatiwa kutsi watalwa nini nekutsi wafa nini, kodvwa njengobe entiwe wafana neNdvodzana yaNkulunkulu, uhlala angumphristi kuze kube phakadze.+

4 Kuyabonakala kutsi beyibaluleke kakhulu lendvodza, leyo khokho wetfu Abrahama layinika incenye yinye kuletilishumi etintfweni letincono kakhulu lebekatitfumbile.+ 5 Kuliciniso kutsi ngekusho kweMtsetfo, emadvodzana aLevi+ lasebenta njengebaphristi anikwe umyalo wekutsi atsatse kwelishumi kubantfu,+ lokubomnakabo, nanobe nabo bayintalelwane* ya-Abrahama. 6 Kodvwa lendvodza lebeyingesiyo intalelwane yemaLevi* yatsatsa kwelishumi ku-Abrahama futsi yambusisa loyo lobekanetetsembiso.+ 7 Ngako-ke ngeke sikuphike kutsi lophansi ubusiswa ngulomkhulu. 8 EmaLevi bekanikwa kwelishumi kantsi abantfu labafako, kodvwa lona lomunye lowanikwa kwelishumi, imiBhalo ifakazela kutsi uyaphila.+ 9 Kungaphindze kushiwo nekutsi Levi lonikwa kwelishumi, ukhiphe kwelishumi nga-Abrahama, 10 ngobe bekasengakatalwa* ngesikhatsi Melkhisedeki ahlangana na-Abrahama.+

11 Nangabe-ke buphristi bemaLevi bebutawenta bantfu babe bete sono+ (ngobe bebuyincenye yeMtsetfo lobewunikwe bantfu), besitawuba kuphi sidzingo sekutsi kuvele lomunye umphristi lokutsiwa unjengaMelkhisedeki+ kodvwa longasinjenga-Aroni? 12 Njengobe buphristi sebushintjwa, kunesidzingo sekutsi uMtsetfo nawo ushintjwe.+ 13 Ngobe lendvodza letishiwo mayelana nayo letintfo yavela kulesinye sive, lokute muntfu kuso lowake wasebenta e-al’thare.+ 14 Kuyakhanya kutsi iNkhosi yetfu yavela kaJuda,+ kodvwa Mosi akazange asho lutfo ngaleso sive mayelana nebuphristi.

15 Loku kucaca kakhulu njengobe kuvela lomunye umphristi+ lonjengaMelkhisedeki,+ 16 lobe ngumphristi ngenca yemandla ekuphila lokungapheli, hhayi ngenca yesive lebekavela kuso njengobe uMtsetfo bewufuna kutsi kube kanjalo.+ 17 Ngobe umbhalo utsi ngaye: “Wena ungumphristi kuze kube phakadze njengaMelkhisedeki.”+

18 Ngako umyalo wasekucaleni ubekelwe eceleni ngesizatfu sekutsi ubutsakatsaka futsi awusebenti.+ 19 Ngobe kute intfo uMtsetfo loyente yaphelela,+ kodvwa litsemba lelincono+ Nkulunkulu lasinike lona ngilo lelente loko. Ngalo siyakhona kusondzela edvute naNkulunkulu.+ 20 Njengobe Nkulunkulu afunga ngesikhatsi abeka Jesu kutsi abe ngumphristi, 21 (ngobe ecinisweni kunemadvodza labe baphristi ngaphandle kwekwentiwa kwesifungo, kodvwa lona ube ngumphristi ngesifungo lesentiwa ngaye, sentiwa nguLoyo lowatsi: “Jehova* ufungile futsi angeke ashintje,* watsi: ‘Wena ungumphristi kuze kube phakadze’”),+ 22 Jesu sewube sicinisekiso* sesivumelwane lesincono.+ 23 Ngetulu kwaloko, labanyenti babe baphristi ngekulandzelana+ ngobe kufa bekubavimba kutsi bachubeke babaphristi, 24 kodvwa ngenca yekutsi yena uchubeka aphila kuze kube phakadze,+ kute lotawungena esikhundleni sakhe. 25 Ngako uyakwati nekubasindzisa ngalokuphelele labo labaya kuNkulunkulu ngaye, ngobe uhlale aphila kuze abancusele.+

26 Kuyadzingeka kutsi sibe nemphristi lophakeme lowetsembekile, longasoleki, lohlantekile,+ longafani netoni, nalophakanyiswe waba ngetulu kwemazulu.+ 27 Yena akafani nalabo baphristi labaphakeme, ngobe akadzingi kwenta iminikelo malanga onkhe,+ entela tono takhe netalabanye,+ ngenca yekutsi loku wakwenta kanye kuphela ngesikhatsi atinikela yena lucobo.+ 28 UMtsetfo ubeka emadvodza lanebutsakatsaka kutsi abe baphristi labaphakeme,+ kodvwa livi lesifungo+ lesentiwa ngemuva kweMtsetfo, libeka indvodzana leyentiwe yaphelela+ kuze kube phakadze.

8 Nali liphuzu lelibalulekile laloku lesikushoko: Sinaye umphristi lophakeme lonjalo,+ futsi sewuhleti ngesekudla sesihlalo sebukhosi saNkulunkulu emazulwini,+ 2 usisebenti* endzaweni lengcwele+ nasethendeni lelingulonalona, lelo lelamiswa nguJehova* hhayi bantfu. 3 Wonkhe umphristi lophakeme ubekelwa kutsi anikele ngetipho nangemihlatjelo; ngako bekufanele kutsi nalona abe nalokutsite langanikela ngako.+ 4 Kube bekasemhlabeni, bekangeke abe ngumphristi,+ ngobe sekavele akhona emadvodza lanikela ngetipho ngekuvumelana neMtsetfo. 5 Lamadvodza enta umsebenti longcwele longumfanekiso nesitfunti+ setintfo tasezulwini;+ njengobe nje ngesikhatsi Mosi sekatawukwakha lithende anikwa umyalo lovela ezulwini, ngobe Nkulunkulu utsi: “Ciniseka kutsi tonkhe tintfo utenta ulandzela lendlela lengikukhombise yona entsabeni.”+ 6 Nyalo, Jesu sewutfole umsebenti lomuhle kakhulu, ngobe uphindze abe ngumlamuli+ wesivumelwane lesincono kakhulu,+ leso lesentiwe ngalokusemtsetfweni ngetetsembiso letincono.+

7 Kube lesivumelwane sekucala besite sici, besingeke sibe khona sidzingo sekutsi kwentiwe sivumelwane sesibili.+ 8 Ngobe bantfu ubatfola banesici nakatsi: “Jehova* utsi: ‘Kutawufika emalanga lapho ngitawenta khona sivumelwane lesisha nebantfu baka-Israyeli kanye nebantfu bakaJuda. 9 Lesivumelwane angeke sifanane naleso lengasenta nabokhokho babo ngesikhatsi ngibabamba ngesandla ngibakhipha eveni laseGibhithe,+ ngobe abazange bahlale betsembekile esivumelwaneni sami, kangangekutsi ngayekela kubanakekela,’ kusho Jehova.”*

10 “Jehova* utsi: ‘Nasi sivumelwane lengitasenta nebantfu baka-Israyeli ngemuva kwalawo malanga. Ngitawufaka imitsetfo yami etingcondvweni tabo, futsi ngiyibhale etinhlitiyweni tabo.+ Ngitawuba nguNkulunkulu wabo, bona babe bantfu bami.+

11 “‘Kute loyawuphindze afundzise makhelwane wakhe nobe umnakabo atsi: “Yati Jehova!”* Ngobe bonkhe bayawungati, kusukela kumuntfukatana kuya kumuntfu losesikhundleni lesiphakeme. 12 Ngobe ngitawutitsetselela tento tabo letimbi, futsi ngeke ngiphindze ngitikhumbule tono tabo.’”+

13 Ngekukhuluma atsi “sivumelwane lesisha,” wente kutsi lesekucala singasasebenti.+ Ngako-ke sekusedvute kutsi siphele lesi lesingasasebenti futsi lesidzala.+

9 Sivumelwane sekucala besinemitsetfo yekwenta umsebenti longcwele futsi sinendzawo yaso lengcwele+ emhlabeni. 2 Bekwakhiwe incenye yekucala yelithende, ngekhatsi kuyo bekunelutsi lwesibane,+ nelitafula, kanye netinkhwa letinikelwe kuNkulunkulu;+ futsi ibitwa ngekutsi Yindzawo Lengcwele.+ 3 Ngemuva kwendvwangu yesibili+ bekunencenye yelithende lebitwa ngekutsi yiNgcwelengcwele.+ 4 Kuyo bekunesitja seligolide+ sekushisela imphepho kanye nelibhokisi lesivumelwane+ lebeliligolide yonkhe indzawo,+ futsi kulo bekufakwe imbita yeligolide lebeyinemana,+ kunendvuku ya-Aroni leyahluma,+ kanye netibhelekece tematje+ esivumelwane; 5 etikwalo bekunemakherubhi lakhatimulako lebekasibekele simbonyo.*+ Kepha nyalo akusiso sikhatsi sekuchaza konkhe mayelana naletintfo.

6 Nasetakhiwe ngalendlela letintfo, baphristi bebangena ngaso sonkhe sikhatsi encenyeni yekucala yelithende, kuze bente imisebenti lengcwele;+ 7 kodvwa kanye ngemnyaka umphristi lophakeme bekangena yedvwa encenyeni yesibili yelithende,+ futsi angena nengati+ lebekayinikela ngenca yakhe+ nangenca yetono bantfu+ lebebatente ngekungati. 8 Umoya longcwele ukwenta kucace kutsi indlela leya endzaweni lengcwele beyisengakembulwa ngesikhatsi kusenelithende lekucala.+ 9 Lelithende lingumfanekiso lomayelana nalesikhatsi sanyalo,+ futsi kuze kube ngunyalo kusanikelwa ngetipho nangemihlatjelo.+ Nanobe kunjalo, letintfo atikhoni kwenta nembeza walomuntfu lowenta umsebenti longcwele kutsi ube msulwa.+ 10 Timane nje timayelana nekudla, lokunatfwako kanye nekucwiliswa kwetintfo emantini.*+ Loku bekufunwa nguMtsetfo mayelana nemtimba,+ futsi kwaba khona kwaze kwaba sikhatsi lesibekiwe sekulungisa tintfo.

11 Kodvwa ngesikhatsi Khristu eta angumphristi lophakeme wetintfo letinhle lesetentekile, wadzabula ethendeni lelikhulu naleliphelele kakhulu lelingakentiwa ngetandla, lokusho kutsi lelingasilo lalapha emhlabeni. 12 Wangena endzaweni lengcwele kwaba kanye kuphela, angangeni nje nengati yetimbuti neyetinkunzana, kodvwa angena nengati yakhe,+ futsi wasitfolela kukhululwa* kwaphakadze.+ 13 Ngobe nangabe ingati yetimbuti neyetinkunzi+ kanye nemlotsa welitfokati lokufafatwa kulabo labangcolile kubangcwelisa kuze kuhlantwe inyama,+ 14 ingati yaKhristu+ lowatinikela kuNkulunkulu ete sici ngemoya waphakadze yenta lokungetulu kakhulu kwaloko! Itawuhlambulula bonembeza betfu emisebentini lefile,+ kuze sentele Nkulunkulu lophilako umsebenti longcwele.+

15 Kungako kunguye longumlamuli wesivumelwane lesisha,+ ngobe ngekufa kwakhe ukhulule bantfu ngenhlawulo+ etonweni labatente ngephansi kwesivumelwane sekucala, kuze labo lababitiwe batfole setsembiso lesilifa laphakadze.+ 16 Lapho kunesivumelwane khona, umuntfu lowente leso sivumelwane kufanele afe, 17 ngobe sivumelwane sisebenta ngemuva kwekufa, njengobe singeke sisebente nangabe umuntfu losentile asaphila. 18 Ngako ngisho nesivumelwane sekucala sasungulwa* ngengati. 19 Ngobe ngesikhatsi Mosi sekatjele bonkhe bantfu yonkhe imiyalo yeMtsetfo, watsatsa ingati yetinkunzana neyetimbuti, emanti, boya lobubovu kanye nehisophu* wafafata lencwadzi* nabo bonkhe bantfu, 20 watsi: “Lena yingati yesivumelwane Nkulunkulu laniyale kutsi nisigcine.”+ 21 Wabese ulifafata ngengati+ lithende kanye nato tonkhe titja temsebenti longcwele. 22 Ngekusho kweMtsetfo, cishe tonkhe tintfo tihlanjululwa ngengati,+ futsi nangabe ingakacitfwa ingati ayibi khona intsetselelo.+

23 Ngako bekubalulekile kutsi imifanekiso+ yetintfo tasezulwini ihlanjululwe ngalendlela,+ kodvwa tintfo tasezulwini tidzinga imihlatjelo lencono kakhulu kunalena. 24 Ngobe Khristu akangenanga endzaweni lengcwele leyentiwe ngetandla,+ lengumfanekiso waleyo lengiyo sibili,+ kodvwa wangena ezulwini lucobo,+ kuze nyalo avele embikwaNkulunkulu* ngenca yetfu.+ 25 Loko bekangakwenteli kutsi atinikele kanyenti, njengalapho umphristi lophakeme angena nengati lengasiyo yakhe endzaweni lengcwele umnyaka nemnyaka.+ 26 Kube bekunjalo, bekutawudzingeka kutsi ahlupheke kanyenti kusukela kwasekelwa live.* Kodvwa nyalo utivete kanye kuphela ekupheleni kwalelive* kuze asuse sono ngemhlatjelo wakhe.+ 27 Njengobe bantfu batawufa kanye kuphela, ngemuva kwaloko behlulelwe, 28 naKhristu wanikelwa kanye kuphela kuze etfwale tono talabanyenti;+ nasekabonakala kwesibili utawube angaketeli kutosusa sono,* futsi utawubonwa ngulabo labamfuna ngekutimisela kuze basindziswe.+

10 Njengobe uMtsetfo usitfunti+ setintfo letinhle letiseta,+ awusito letintfo lucobo lwato, ngako-ke ngeke ukwati* kwenta labo labeta kuNkulunkulu baphelele ngekutsi bachubeke banikela ngemihlatjelo lefanako umnyaka nemnyaka.+ 2 Kube bekunjalo, bekungeke yini kuphele kunikelwa kwemihlatjelo? Ngobe labo labenta umsebenti longcwele labahlantwe kwaba kanye kuphela bebangeke bative banelicala ngenca yetono tabo. 3 Kepha lemihlatjelo yenta kutsi umnyaka nemnyaka tono tikhunjulwe,+ 4 ngobe ingati yetinkunzi neyetimbuti ayikhoni kususa tono.

5 Khristu naketa emhlabeni utsi: “‘Wena awuzange ujatjuliswe ngumhlatjelo nemnikelo,* kodvwa wangilungiselela umtimba. 6 Awuzange uyemukele iminikelo yekushiswa neminikelo yesono.’+ 7 Ngako mine* ngatsi: ‘Naku ngitile (encwadzini lengumculu* kubhalwe ngami) kuze ngente intsandvo yakho Nkulunkulu.’”+ 8 Ngemuva kwekucale atsi: “Awuzange uyifune nobe uyemukele imihlatjelo neminikelo, kanye neminikelo yekushiswa neyesono,” lokuyimihlatjelo lenikelwa ngekuvumelana neMtsetfo, 9 ubese utsi: “Naku ngitile kuze ngente intsandvo yakho.”+ Ucedza kwekucala kuze acalise kwesibili. 10 ‘Ngalentsandvo,’+ singcwelisiwe ngekunikelwa kwemtimba waJesu Khristu lokwenteke kanye kuphela.+

11 Malanga onkhe umphristi ngamunye uya endzaweni yakhe lefanele kuze ente umsebenti longcwele,+ futsi njalo anikele imihlatjelo lefanako+ lengeke ize ikwati kutisusa ngalokuphelele tono.+ 12 Kodvwa yena wanikela umhlatjelo munye wetono kwaba kanye kuphela, wabese uhlala ngesekudla saNkulunkulu,+ 13 kusukela lapho walindzela kutsi titsa takhe tibekwe ngaphansi kwetinyawo takhe.+ 14 Ngobe ngemhlatjelo munye wente kutsi labo labangcwelisiwe baphelele+ kuze kube phakadze. 15 Ngetulu kwaloko, umoya longcwele ufakaza kitsi, ngobe ngemuva kwekutsi utsi: 16 “Naku lokushiwo nguJehova:* ‘Nasi sivumelwane lengitasenta nabo ngemuva kwalawo malanga. Ngitawufaka imitsetfo yami etinhlitiyweni tabo, ngiyibhale etingcondvweni tabo,’”+ 17 ubese utsi: “Ngeke ngiphindze ngitikhumbule tono tabo kanye netento tabo letimbi.”+ 18 Nangabe loku sekutsetselelwe, sisuke sesingekho sidzingo semnikelo wesono.

19 Ngako-ke bazalwane, njengobe ngengati yaJesu sinesibindzi sekusebentisa indlela yekungena endzaweni lengcwele+ 20 lasivulele* yona, yaba yindlela lensha nalephilako ledzabula endvwangwini,+ lokuyinyama yakhe, 21 nanjengobe sinemphristi lomkhulu lowengamele indlu yaNkulunkulu,+ 22 asisondzele kuNkulunkulu ngetinhlitiyo leticotfo nangekukholwa lokuphelele, njengobe tinhlitiyo tetfu tihlanjululwe kunembeza lomubi+ ngekufafatwa, nemitimba yetfu yagezwa ngemanti lahlantekile.+ 23 Asilibambisise litfuba lekumemetela litsemba letfu embikwebantfu ngaphandle kwekungabata,+ ngobe wetsembekile loyo lowetsembisile. 24 Asinakaneni* kuze sikhutsatane elutsandvweni nasemisebentini lemihle,+ 25 singakuyekeli kuhlangana kwetfu ndzawonye+ njengobe labanye sebanemkhuba wekungahlangani, kodvwa asikhutsatane+ ikakhulukati njengobe nibona lilanga lisondzela.+

26 Ngobe nangabe sisenta ngemabomu sono ngemuva kwekutfola lwati lolungulonalona lweliciniso,+ sekute umhlatjelo losele waleto tono,+ 27 kodvwa sekusele kutsi kulindzelwe sehlulelo ngekwesaba, kulindzelwe nentfukutselo levutsako letawucedza labo labaphikisako.+ 28 Ngebufakazi balababili nobe balabatsatfu, umuntfu lowedzelele uMtsetfo waMosi ufa ngaphandle kwekuhawukelwa.+ 29 Nicabanga kutsi ufanelwe sehlulelo lesikhulu kangakanani-ke umuntfu lonyatsele iNdvodzana yaNkulunkulu, futsi loyitsetse njengentfo lengakabaluleki ingati yesivumelwane+ langcweliswe ngayo, nalotfukutselise umoya wemusa lomkhulu waNkulunkulu ngekuwedzelela?+ 30 Ngobe siyamati Loyo lowatsi: “Kuphindzisela kwami, ngimi lengitawuphindzisela.” Waphindze watsi: “Jehova* utawehlulela bantfu bakhe.”+ 31 Kuyintfo leyesabekako kujeziswa nguNkulunkulu lophilako.

32 Ngako chubekani nikhumbula emalanga akadzeni, ningakhohlwa kutsi ngemuva kwekutsi nikhanyiselwe,+ nacinisela futsi nahlupheka kakhulu. 33 Ngaletinye tikhatsi benihlanjalatwa niphindze nihlushwe embikwebantfu,* kantsi ngaletinye tikhatsi benibambisana* nalabo lebebaphatfwa ngaleyo ndlela. 34 Benivelana nalababoshiwe, futsi benihlala nijabulile ngisho nobe banitsatsela tintfo tenu,+ ngobe benati kutsi ninalokutsite lokuncono kakhulu nalokuhlala njalo.+

35 Ngako-ke chubekani niba nesibindzi,* ngobe nanenta njalo nitawutfola umvuzo lomkhulu.+ 36 Kudzingeka nicinisele+ kuze kutsi nasenente intsandvo yaNkulunkulu, nitfole kugcwaliseka kwesetsembiso. 37 Ngobe “sekusele kancane”+ kutsi “loyo lotako efike, futsi ngeke ephute.”+ 38 “Kodvwa lolungile wami utawuphila ngenca yekukholwa,”+ kantsi “nakungenteka ahlehlele emuva, ngeke ngijabule ngaye.”+ 39 Tsine asisibo labahlehlela emuva, lokuyintfo leholela ekubhujisweni,+ kodvwa singulabo labanekukholwa, lokuholela ekulondvolotweni kwekuphila kwetfu.

11 Kukholwa kukutilindzela ngekuciniseka tintfo letetsenjwako,+ futsi kukuciniseka* ngetintfo letikhona mbamba letingakabonwa. 2 Ngenca yekutsi bantfu basendvulo* bebanekukholwa lokunjalo, Nkulunkulu wakhombisa kutsi uyajabula ngabo.

3 Ngekukholwa, siyati kutsi tintfo letisezulwini nasemhlabeni* tentiwe taba khona ngelivi laNkulunkulu, ngobe loko lokubonwako kube khona ngetintfo letingabonakali.

4 Ngekukholwa, Abela wanikela kuNkulunkulu umhlatjelo lobaluleke kakhulu kunewaKhayini,+ futsi ngalokukholwa kwafakazwa ngaye kutsi ulungile, ngobe Nkulunkulu watemukela* tipho takhe;+ nanobe afa kadzeni, kodvwa ngekukholwa kwakhe usakhuluma.+

5 Ngekukholwa, Enoki+ watsatfwa kuze angakuboni kufa, futsi akatfolakalanga ndzawo ngobe Nkulunkulu wamtsatsa;+ kodvwa ngesikhatsi asengakatsatfwa, kwafakazwa ngaye kutsi bekamjabulisile Nkulunkulu. 6 Ngetulu kwaloko, ngaphandle kwekukholwa ngeke kwenteke kutsi umuntfu amjabulise Nkulunkulu, ngobe loyo loya kuye kufanele akholwe kutsi ukhona nekutsi ubanika umvuzo labo labamfuna ngekutimisela.+

7 Ngekukholwa, Nowa+ watsi ngemuva kwekutfola secwayiso lesivela kuNkulunkulu ngetintfo lebetisengakenteki,+ wakhombisa kumesaba, wakha umkhumbi+ kuze asindzise umndeni wakhe; ngalokukholwa walilahla live,+ futsi waba yindlalifa yekulunga lokuletfwa kukholwa.

8 Ngekukholwa, Abrahama+ watsi nakabitwa walalela ngekutsi aphume aye endzaweni lebekatawunikwa yona ibe lifa lakhe; waphuma nanobe bekangati kutsi uyaphi.+ 9 Ngekukholwa wahlala njengesihambi eveni lesetsembiso kwaba shengatsi kukulelinye live,+ futsi wahlala emathendeni+ na-Isaka kanye naJakobe, labatindlalifa letikanye naye tesetsembiso lesifanako.+ 10 Ngobe bekalindzele lidolobha lelinetisekelo leticinile, lelisungulwe* nguNkulunkulu futsi lakhiwa nguye.+

11 Ngekukholwa, Sara wemukela emandla kuze atetfwale,* ngisho nobe besekamdzala kakhulu+ kutsi angatetfwala, ngobe bekametsemba Loyo lowetsembisa. 12 Ngaleso sizatfu, ngemuntfu munye lobesekafana nalofile,+ kwatalwa bantfwana+ labanyenti ngangetinkhanyeti tasezulwini, nalabangeke babalwe njengesihlabatsi lesiselugwini lwelwandle.+

13 Bonkhe laba bafa banekukholwa nanobe bangazange bakutfole kugcwaliseka kwaletetsembiso,+ kodvwa batibona tisekhashane,+ batemukela futsi bavuma kutsi batihambi netakhamuti tesikhashana eveni. 14 Labo labasho loku bakwenta kucace kutsi bayifuna ngekutimisela indzawo letawuba ngeyabo. 15 Nanobe kunjalo, kube bebasolo bayikhumbula indzawo lebebaphume kuyo,+ bebangalitfola litfuba lekubuyela emuva. 16 Kodvwa bebafuna kutfola indzawo lencono, lokuyindzawo yasezulwini. Ngako Nkulunkulu ute emahloni ngabo kutsi abitwe ngaNkulunkulu wabo,+ ngobe ubalungiselele lidolobha.+

17 Ngekukholwa, Abrahama watsi nakavivinywa+ kwafana nekutsi sewuvele unikele nga-Isaka; lomuntfu lowatemukela ngekujabula tetsembiso bekatimisele kunikela ngendvodzana yakhe lekuphela kwayo,+ 18 ngisho nobe bekutsiwe kuye: “Intalelwane* yakho itawuvela ku-Isaka.”+ 19 Kepha wacondza kutsi Nkulunkulu bekangakhona kumvusa Isaka ngisho nobe sekafile, futsi ngendlela lengumfanekiso, wamemukela avela ekufeni.+

20 Ngekukholwa, Isaka wabusisa Jakobe+ na-Esawu+ ngalokuphatselene netintfo lebetiseta.

21 Ngekukholwa, kwatsi lapho Jakobe sekatakufa+ wabusisa emadvodzana aJosefa+ futsi wakhonta Nkulunkulu asime eludvondvolweni lwakhe.+

22 Ngekukholwa, watsi Josefa nasekatakufa wakhuluma ngekuphuma kwebantfwana baka-Israyeli eGibhithe, wabanika ticondziso* mayelana nekungcwatjwa kwakhe.*+

23 Ngekukholwa, batali baMosi bamfihla tinyanga letintsatfu ngemuva kwekutalwa kwakhe,+ ngobe bebabona kutsi lomntfwana muhle,+ futsi abazange bawesabe umyalo wenkhosi.+ 24 Ngekukholwa, watsi Mosi nasekakhulile+ wala kubitwa ngekutsi uyindvodzana yendvodzakati yaFaro,+ 25 wakhetsa kuhlushwa nebantfu baNkulunkulu kunekutsi atijabulise kwesikhashana esonweni, 26 ngobe watsatsa kuhlanjalatwa ngenca yaKhristu njengeligugu lelikhulu kakhulu kunemcebo waseGibhithe, njengobe bekanakisise umvuzo. 27 Ngekukholwa, washiya iGibhithe+ angayesabi intfukutselo yenkhosi,+ ngobe wachubeka acinile kwaba shengatsi uyambona Loyo longabonakali.+ 28 Ngekukholwa, wagubha liPhasika waphindze wanyenyeta ingati kuze umbhubhisi angawalimati* ematibulo ema-Israyeli.+

29 Ngekukholwa, bantfu baNkulunkulu badzabula eLwandle Lolubovu kwaba shengatsi bahamba emhlabatsini lowomile,+ kodvwa baseGibhithe bamita nabetama kwenta loko.+

30 Ngekukholwa, bantfu batungeleta lubondza lwaseJerikho emalanga langu-7, futsi lolubondza lwabese luyawa.+ 31 Ngekukholwa, Rahabi ingwadla akazange abhujiswe kanye nalabangalaleli, ngobe watemukela ngemusa tinhloli.+

32 Ngingaphindze ngitsini? Ngobe sikhatsi asingivumeli kutsi ngichubeke ngilandzisa ngaGideyoni,+ Bharaki,+ Samsoni,+ Jeftha,+ Davide,+ Samuweli,+ kanye nalabanye baphrofethi. 33 Ngekukholwa bancoba imibuso,+ benta lokulungile, batfola tetsembiso,+ bavala imilomo yemabhubesi,+ 34 bancoba emandla emlilo,+ baphunyuka enkembeni,+ banikwa emandla ebutsakatsakeni,+ baba ngemachawe emphini,+ futsi bancoba emabutfo lahlaselako.+ 35 Labasikati bemukela tihlobo tabo letavuswa ekufeni;+ lamanye emadvodza wona ahlushwa ngobe bekangafuni kukhululwa ngalenye indlela, kuze avuswe ekufeni ngendlela lencono kakhulu. 36 Labanye bebahlekwa futsi bashaywa kamatima, ngetulu kwaloko, bebaboshwa+ bafakwe nasemajele.+ 37 Bebagcotjwa ngematje,+ bavivinywa, basahwa emkhatsini, babulawa ngenkemba;+ bebahamba bembetse tikhumba tetimvu netetimbuti,+ beswele, bahlupheka,+ baphatfwa kabi;+ 38 futsi live belingakabafaneli. Bebazulazula etindzaweni letilugwadvule, etintsabeni, emihumeni+ nasemigedzeni yemhlaba.

39 Kodvwa bonkhe laba, nanobe kwafakazwa kahle ngabo ngenca yekukholwa kwabo, abazange bakutfole kugcwaliseka kwesetsembiso, 40 ngobe Nkulunkulu wawubona kusengaphambili umvuzo loncono kakhulu lebekatasinika wona,+ kuze bona bangentiwa baphelele ngaphandle kwetfu.

12 Ngako-ke ngenca yekutsi situngeletwe sicumbi* lesikhulu kangaka sabofakazi, asilahle konkhe lokusindzako nesono lesisigigela kamelula,+ siwugijime ngekucinisela umncintiswano losembikwetfu+ 2 njengobe sinakisise Jesu, longuMmeleli Loyinhloko wekukholwa kwetfu neMphelelisi wako.+ Ngobe ngenca yenjabulo lebeyibekwe embikwakhe wabeketelela kufa elugodvweni,* wangalinaki lihlazo, futsi wahlala ngesekudla sesihlalo sebukhosi saNkulunkulu.+ 3 Ngako cabangisisani ngaloyo lowabeketelela inkhulumo lephikisako yetoni+ lebeyilahla tona, kuze ningadzinwa bese niphelelwa ngemandla.+

4 Ekulweni kwenu nalesono, nisengakake namelana naso naze nafa. 5 Kodvwa seniwukhohlwe ngalokuphelele umyalo lenatjelwa wona nakukhulunywa nani njengemadvodzana kutsiwa: “Ndvodzana yami, ungasedzeleli sijeziso lesivela kuJehova,* ungapheli emandla nawukhalinyelwa nguye; 6 ngobe Jehova* uyabekhuta bantfu labatsandzako; ecinisweni, uyabajezisa bonkhe labemukela njengemadvodzana.”+

7 Kufanele nicinisele ngobe lena yindlela leniyalwa* ngayo. Nkulunkulu uniphatsa njengemadvodzana.+ Ikhona yini indvodzana babe wayo langayiyali?+ 8 Kodvwa nangabe nonkhe ningazange nisitfole lesijeziso, benitawube anisiwo emadvodzana akhe, kepha benitawube ningemavezandlebe. 9 Ngetulu kwaloko, bobabe betfu balamhlabeni* bebasijezisa, futsi besibahlonipha. Akukafaneli yini sititfobe kakhulu kuBabe locondzisa kuphila kwetfu ngemoya wakhe longcwele kuze siphile?+ 10 Bebasijezisa kwesikhashana kuye ngaloko lebebakubona kukahle, kodvwa yena usiyala kuze kusitakale tsine khona sitoba ngcwele njengaye.+ 11 Kuliciniso kutsi kute sijeziso lesibonakala sijabulisa ngaleso sikhatsi, kodvwa sibuhlungu;* kepha ngemuva kwaloko, labo labaceceshwe ngiso batawutfola umvuzo wekuthula, lokuyimphilo lelungile.

12 Ngako-ke, cinisani tandla letibutsakatsaka nemadvolo lacegako,+ 13 futsi nichubeke nicondzisa tindlela tetinyawo tenu,+ kuze lilunga lelichutako lingabese lichuta kakhulu, kepha liphiliswe. 14 Lwelani kuba nekuthula nabo bonkhe bantfu,+ nilwele nekuba ngcwele,*+ ngobe kute umuntfu longayibona iNkhosi nangabe angasingcwele. 15 Caphelisisani kutsi kube bete lowehluleka kutfola umusa lomkhulu waNkulunkulu, kuze kungaveli imphandze lenashevu letawubangela tinkinga, futsi kungabi khona labangcoliswa ngiyo;+ 16 nibocaphela nekutsi emkhatsini wenu kungabi khona loyingwadla* nobe umuntfu longatitsatsi njengaletibalulekile tintfo letingcwele, njenga-Esawu lowalahla lilungelo lakhe lebutibulo kuze nje atfole sidlo sinye.+ 17 Ngobe niyati kutsi ekugcineni ngesikhatsi sekafuna kutfola sibusiso, waliwa, futsi ngisho nobe beketama kushintja lesincumo* ngetinyembeti,+ akazange akhone.*

18 Aniketi entfweni leningayitsintsa,+ leyokhelwe ngemlilo,+ efini lelimnyama, ebumnyameni lobukhulu, esivunguvungwini,+ 19 ekukhaleni kwelicilongo,+ nasevini lebelikhuluma,+ lokwatsi bantfu nabaliva bacela kutsi kungasakhulunywa lutfo kubo.+ 20 Ngobe bewumatima kubo umyalo lotsi: “Ngisho nesilwane lesitsintsa intsaba kufanele sigcotjwe ngematje.”+ 21 Nalombono bewesabeka kakhulu kangangekutsi Mosi watsi: “Ngiyesaba futsi ngiyachachatela.”+ 22 Kodvwa nine nite eNtsabeni iSiyoni+ nasedolobheni laNkulunkulu lophilako, lokuyiJerusalema yasezulwini,+ nite emashumini etinkhulungwane tetingilosi 23 letisemhlanganweni wato,+ ebandleni lematibulo labhaliswe emazulwini, kuNkulunkulu longuMehluleli wabo bonkhe,+ kulabalungile labaphila ngekuvumelana nemoya longcwele+ futsi labentiwe baphelela,+ 24 kuJesu longumlamuli+ wesivumelwane lesisha,+ nasengatini lefafatiwe lekhuluma kancono kunengati ya-Abela.+

25 Cinisekani kutsi niyamlalela* loyo lokhulumako. Ngobe nangabe bangaphunyulanga labo labangazange bamlalele loyo lobekabanika secwayiso emhlabeni, kakhulu kangakanani-ke ngatsi, ngeke siphunyule nangabe simfulatsela loyo lokhuluma asemazulwini.+ 26 Ngaleso sikhatsi livi lakhe lanyakatisa umhlaba,+ kepha nyalo wetsembisile watsi: “Ngitawuphindze nginyakatise, hhayi umhlaba kuphela kodvwa nelizulu.”+ 27 Emavi latsi “ngitawuphindze” aveta kususwa kwetintfo letinyakatiswako, lokutintfo letentiwe ngulotsite, kuze kutsi tintfo letingeke tinyakatiswe tihlale tikhona. 28 Ngako-ke njengobe sitawutfola uMbuso longeke unyakatiswe, asichubeke semukela umusa lomkhulu waNkulunkulu lesingenta ngawo umsebenti wakhe longcwele ngendlela leyemukelekako, ngekumesaba nangekumhlonipha. 29 Ngobe Nkulunkulu wetfu ungumlilo locotfulako.+

13 Hlalani nitsandzana njengobe nibazalwane.+ 2 Ningakukhohlwa kwemukela tivakashi,*+ ngobe ngekwenta kanjalo labanye bangenisa tingilosi bangati.+ 3 Bakhumbuleni labo labasemajele*+ kube shengatsi nani niboshwe kanye nabo,+ nikhumbule nalabo labaphatfwa kabi, njengobe nani nikulomtimba.* 4 Umshado awuhlonishwe ngibo bonkhe bantfu, futsi awungangcoliswa,+ ngobe Nkulunkulu utawutehlulela tingwadla* netiphingi.+ 5 Indlela leniphila ngayo ayingabi yekutsandza imali,+ kodvwa yenetiswani tintfo leninato.+ Ngobe Nkulunkulu utsite: “Ngeke ngize ngikushiye, futsi ngeke ngize ngikulahle.”+ 6 Ngako singakhuluma ngesibindzi sitsi: “Jehova* ungumsiti wami; angeke ngesabe. Umuntfu angangentani nje?”+

7 Khumbulani labo labaniholako,+ labakhulume livi laNkulunkulu kini, futsi njengobe nicabangisisa ngemiphumela yekutiphatsa kwabo, lingisani kukholwa kwabo.+

8 Jesu Khristu akashintji, kusukela itolo, lamuhla naphakadze.

9 Ningadukiswa timfundziso letehlukahlukene naletingatiwa; ngobe kuncono kutsi inhlitiyo iciniswe ngemusa lomkhulu waNkulunkulu kunekutsi iciniswe ngalokudliwako,* lokungabazuzisi labo labakunakile.+

10 Tsine sineli-al’thare, kodvwa labo labenta umsebenti longcwele ethendeni bete ligunya lekudla kulo.+ 11 Ngobe imitimba yetilwane lebetinikelwa beyishiselwa ngephandle kwenkambu, futsi umphristi lophakeme bekatsatsa ingati yato ayiyise endzaweni lengcwele ibe ngumnikelo wesono.+ 12 Ngako naJesu wahlushwa ngephandle kwelisango lelidolobha+ kuze angcwelise bantfu ngengati yakhe.+ 13 Natsi-ke asiyeni kuye ngephandle kwenkambu, futsi setfwale lihlazo naye laletfwala,+ 14 ngobe lapha site lidolobha lelitawuhlala likhona, kodvwa ngekutimisela sifuna lelo lelitako.+ 15 Ngaye asihlale sinikela kuNkulunkulu umhlatjelo wekudvumisa,+ lokusitselo setindzebe tetfu,+ ngekutsi simemetele libito lakhe embikwebantfu.+ 16 Ngetulu kwaloko, ningakukhohlwa kwenta lokuhle nekupha labanye loko leninako,+ ngobe Nkulunkulu uyajabula ngeminikelo lenjalo.+

17 Balaleleni labo labaniholako+ futsi nititfobe kubo,+ ngobe bahlale baninakekela njengobe batawulandzisa,+ kuze loku bakwente ngekujabula hhayi ngekukhonona, ngobe loko bekutanilimata.

18 Chubekani nisithantazela, ngobe siyetsemba kutsi sinanembeza lomsulwa,* njengobe sifisa kutiphatsa ngekwetsembeka kuto tonkhe tintfo.+ 19 Nginikhutsata kakhulu kutsi ningithantazele kuze ngibuyele kini masinyane.

20 Shengatsi Nkulunkulu wekuthula, lowamvusa ekufeni umelusi lomkhulu+ wetimvu, iNkhosi yetfu Jesu, inengati yesivumelwane saphakadze, 21 anganinika tonkhe tintfo letinhle kuze nente intsandvo yakhe, futsi ngaJesu Khristu asisite kutsi sente lokumjabulisako; ludvumo aluye kuye phakadze naphakadze. Amen.

22 Ngiyanincenga bazalwane kutsi nisilalelisise lesikhutsato, ngobe nginibhalele incwadzi lemfisha. 23 Ngifuna nati kutsi umzalwane wetfu Thimothi sewukhululiwe. Nangabe efika masinyane, ngitawuta naye sitonibona.

24 Vuselani bonkhe labaniholako kanye nabo bonkhe labangcwele. NebaseTaliyane+ bayanivusela.

25 Umusa lomkhulu waNkulunkulu awube nani nonkhe.