INCWADZI YA-JAKOBE

1 Mine Jakobe,+ sigcili saNkulunkulu neseNkhosi Jesu Khristu, ngibhalela tive letingu-12 letisakatekile:

Ngiyanibingelela!

2 Bazalwane bami, nibojabula nanehlelwa tilingo letehlukahlukene,+ 3 nati kutsi nangabe kukholwa kwenu kuvivinywe ngalendlela nitawubese nifundza kucinisela.+ 4 Kodvwa vumelani kucinisela kucedzele umsebenti wako, kuze niphelele, niphile kuto tonkhe tintfo, futsi ningesweli lutfo.+

5 Nangabe lomunye wenu eswele kuhlakanipha, akachubeke akucela kuNkulunkulu+ futsi utawuphiwa kona,+ ngobe bonkhe ubapha ngesandla lesivulekile futsi ngeke abatfukutselele.*+ 6 Akachubeke acela ngekukholwa,+ angangabati sanhlobo,+ ngobe loyo longabatako ufana neligagasi laselwandle lelipheshulwa ngumoya liyiswa lena nalena. 7 Ecinisweni loyo muntfu akukafaneli alindzele kutfola lokutsite kuJehova;* 8 ngobe akatati kutsi ufunani,+ futsi uyagucugucuka kuto tonkhe tindlela takhe.

9 Umzalwane lophansi akajabule* ngekuphakanyiswa kwakhe,+ 10 nalonjingile akajabule ngekuhlazwa kwakhe+ ngobe utawunyamalala njengembali yesiganga. 11 Njengobe nje lilanga liphuma nekushisa kwalo lokukhulu futsi libunise lokumilako, timbali tako tihhohloke, nebuhle bako buphele, kanjalo-ke nemuntfu lonjingile utawunyamalala asenta tintfo takhe.+

12 Uyajabula umuntfu lochubeka abeketelela kuvivinywa,+ ngobe utawutsi nakemukelwa atfole umchele wekuphila,+ loyo Jehova* lawetsembise labo labachubeka bamtsandza.+ 13 Nangabe umuntfu alingwa, angabosho kutsi: “Ngilingwa nguNkulunkulu.” Ngobe Nkulunkulu ngeke alingwe ngalokubi kantsi naye akalingi muntfu. 14 Kodvwa nguloyo naloyo ulingwa ngekuhungwa sifiso sakhe+ nangekuyengwa* ngiso. 15 Ngako sifiso nasesakhekile siveta sono;* bese kutsi sono nasesentiwe, siletse kufa.+

16 Bazalwane bami labatsandzekako, ningacali nidukiswe. 17 Tonkhe tipho letinhle naletiphelele tivela etulu,+ tichamuka kuBabe wetibane tasesibhakabhakeni,+ longagucuki nobe ashintje njengesitfunti.*+ 18 Wasinika kuphila ngesikhatsi sikholwa livi lakhe leliliciniso+ ngobe loko bekuyintsandvo yakhe, kuze sitowuba titselo tekucala tetidalwa takhe.+

19 Naku lokufanele nikwati bazalwane bami labatsandzekako: Wonkhe umuntfu kufanele asheshe kulalela, ephute kukhuluma,+ ephute nekutfukutsela,+ 20 ngobe intfukutselo yemuntfu ayikuletsi kulunga kwaNkulunkulu.+ 21 Ngako lahlani konkhe kungcola nako konkhe lokubi,*+ nilemukele ngemoya lophansi livi lelihlanyelwa kini, futsi lelinganisindzisa.

22 Kodvwa banini benti belivi,+ ningabi ngulabalivako kuphela, nitiyenga ngekucabanga lokungemanga. 23 Ngobe nangabe umuntfu eva livi kodvwa angabi ngumenti walo,+ ufana nemuntfu lobuka buso bakhe esibukweni. 24 Uyatibuka, bese uyesuka ahambe, ngekushesha akhohlwe kutsi unjani. 25 Kodvwa loyo lophenyisisa umtsetfo lophelele+ wenkhululeko aphindze akwente loko lokushoko, akabi ngulovako bese uyakhohlwa, kepha uba ngumenti welivi, futsi utawujabula ngekwenta njalo.+

26 Nangabe umuntfu acabanga kutsi ukhonta Nkulunkulu* kodvwa abe angalulawuli* lulwimi lwakhe,+ usuke atiyenga enhlitiyweni, kantsi nekukhonta kwakhe Nkulunkulu kulite. 27 Kukhonta* lokuhlantekile nalokungakangcoli embikwaNkulunkulu longuBabe wetfu nguloku: Kunakekela tintsandzane+ nebafelokati+ elusizini lwabo,+ nekutsi umuntfu atigcine ete libala eveni.+

2 Bazalwane bami, kwenteka njani kutsi nanobe nikholwa eNkhosini yetfu lekhatimulako, lenguJesu Khristu, kodvwa nibe nikhetsa labanye?+ 2 Asesitsi kufika bantfu lababili emhlanganweni wenu, lomunye ufake tindandatho teligolide eminweni yakhe futsi ugcoke kahle, kantsi lolomunye weswele futsi ugcoke timphahla letingcolile, 3 bese ninaka loyo logcoke kahle, nitsi kuye: “Hlala lapha endzaweni lehloniphekile,” kodvwa nitsi kulona loweswele: “Chubeka umile,” nobe nitsi: “Hlala lapha phansi.”+ 4 Nangabe kunjalo, nisuke ningakhetsi yini,+ futsi anisibo yini behluleli labakhipha tijubo letimbi?+

5 Lalelani bazalwane bami labatsandzekako. Nkulunkulu akazange yini akhetse labo labatsatfwa njengalabeswele kulelive kutsi banjinge ekukholweni+ baphindze babe tindlalifa teMbuso lawetsembisa labo labamtsandzako?+ 6 Kodvwa nine nibabukela phansi bantfu labeswele. Labanjingile akusibo yini labanicindzetelako,+ futsi banihudvulele etinkantolo? 7 Abalihlambalati yini libito lelihle lenabitwa ngalo? 8 Nenta kahle nangabe niwugcina umtsetfo webukhosi ngekuvumelana nembhalo lotsi: “Kufanele utsandze makhelwane wakho njengobe utitsandza wena.”+ 9 Kepha nanichubeka nikhetsa labanye,+ niyona futsi uMtsetfo uyanilahla ngobe niyawephula.+

10 Nobe ngubani logcina wonkhe uMtsetfo kodvwa ephule munye kuwo, usuke sekayephule yonkhe.+ 11 Ngobe loyo lowatsi: “Ungaphingi,”+ waphindze watsi: “Ungabulali.”+ Nangabe-ke ungaphingi kodvwa ube ubulala, sewuwephulile umtsetfo. 12 Ngaso sonkhe sikhatsi, indlela lenikhuluma ngayo nalenitiphatsa ngayo ayifane neyalabo labatawehlulelwa ngemtsetfo webantfu labakhululekile.*+ 13 Ngobe loyo longawukhombisi umusa utawehlulelwa ngaphandle kwemusa.+ Umusa uncoba kakhulu kunekwehlulela.

14 Bazalwane bami, kusita ngani kutsi umuntfu atsi unekukholwa kodvwa abe ete imisebenti?+ Lokukholwa ngeke kumsindzise.+ 15 Nangabe umzalwane nobe dzadze eswele kwekugcoka nobe kudla lokwenele kwelilanga, 16 bese lomunye wenu utsi kuye: “Hamba ngekuthula, ufutfumale futsi wesutse,” kodvwa angamniki lakudzingako kuze aphile, loko kusita ngani?+ 17 Ngendlela lefanako, kukholwa nakute imisebenti kufile.+

18 Kepha lomunye utawutsi: “Wena unekukholwa, mine nginemisebenti. Ngikhombise kukholwa kwakho lokute imisebenti, mine ngitakukhombisa kukholwa kwami ngemisebenti.” 19 Angitsi uyakholwa kutsi kunaNkulunkulu munye? Wenta kahle, kodvwa nemadimoni ayakholwa futsi aze achachatele.+ 20 Wena muntfu lolibele, uyati yini kutsi akusiti ngalutfo kukholwa lokute imisebenti? 21 Akuzange yini kutsiwe Abrahama longukhokho* wetfu ulungile ngemisebenti, ngemuva kwekutsi anikele nga-Isaka indvodzana yakhe e-al’thare?+ 22 Uyabona-ke kutsi kukholwa kwakhe kwahambisana nemisebenti futsi kwapheleliswa ngayo,+ 23 kwaphindze kwagcwaliseka nembhalo lotsi: “Abrahama wakholwa kuJehova,* ngako kwatsiwa ulungile,”+ futsi wabitwa ngekutsi ngumngani waJehova.*+

24 Niyabona-ke kutsi umuntfu kutawutsiwa ulungile ngemisebenti, hhayi ngekukholwa kuphela. 25 Ngendlela lefanako, akuzange yini kutsiwe Rahabi ingwadla ulungile ngemisebenti, ngemuva kwekutsi atemukele kahle titfunywa, futsi watikhipha ngalenye indlela?+ 26 Ngako-ke, njengobe umtimba ngaphandle kwemoya* ufile,+ nekukholwa lokute imisebenti kufile.+

3 Bazalwane, akusini nonkhe lokufanele nibe bafundzisi, njengobe sati kutsi sitawutfola sehlulelo lesimatima.*+ 2 Ngobe sonkhe siyona* tikhatsi letinyenti.+ Nangabe kukhona longoni ngemavi, loyo muntfu ute sono,* uyakwati nekulawula umtimba wakhe wonkhe shengatsi uwufake ematomu. 3 Emahhashi nasiwafaka ematomu kuze atosilalela, sisuke silawula nemitimba yawo yonkhe. 4 Ngisho nemikhumbi, nanobe imikhulu futsi ihanjiswa ngumoya lomkhulu, icondziswa ngeliphini lelincane kakhulu iye lapho loyo loshayelako afuna iye khona.

5 Lulwimi nalo lusitfo semtimba lesincane, kodvwa lutigabatisa kakhulu. Asewubuke nje kutsi mncane kangakanani umlilo longalumeka lihlatsi lelikhulu! 6 Nelulwimi lungumlilo.+ Kuto tonkhe titfo temitimba yetfu, lulwimi lugcwele kungalungi, ngobe lungcolisa wonkhe umtimba+ luphindze lulumeke konkhe kuphila* kwemuntfu ngemlilo, futsi nalo lushiswa yiGehena.* 7 Tonkhe tinhlobo tetilwane tesiganga, tetinyoni, tetilwane letihumako,* nato tonkhe tinhlobo tetilwane taselwandle tiyafundziswa futsi tifundziswa bantfu. 8 Kodvwa kute umuntfu longacecesha lulwimi. Alulawuleki, luyalimata, futsi lugcwele shevu lobulalako.+ 9 Ngalo sibonga Jehova,* longuBabe, futsi ngalo siphindze sicalekise bantfu labentiwe “ngemfanekiso waNkulunkulu.”+ 10 Umlomo munye uyabusisa uphindze ucalekise.

Bazalwane bami, akukafaneli tintfo tenteke ngalendlela.+ 11 Kuyenteka yini kutsi umtfombo ukhiphe emanti lamnandzi* nalababako ngemlomo munye? 12 Bazalwane bami, kungenteka yini kutsi sihlahla semkhiwa sitsele titselo temncumo, nesihlahla semagilebisi sitsele emakhiwa?+ Nemtfombo wemanti laneluswayi ngeke ukhiphe emanti lamnandzi.

13 Ngubani lohlakaniphile futsi lonekucondza emkhatsini wenu? Ngekutiphatsa kwakhe lokuhle, akakhombise kutsi imisebenti yakhe uyenta ngemoya lophansi loletfwa kuhlakanipha. 14 Kodvwa nangabe ninemona lomubi+ kanye nemibango*+ etinhlitiyweni tenu, ningabotigabatisa+ ngobe nanenta loko, liciniso nilenta emanga. 15 Loko akusiko kuhlakanipha lokuvela ezulwini; kodvwa kwasemhlabeni,+ kubulwane, futsi kubudimoni. 16 Ngobe nobe ngukuphi lapho kunemona nemibango* khona, kutawuba netiphitsiphitsi nayo yonkhe inhlobo yebubi.+

17 Kodvwa kuhlakanipha lokuvela ezulwini kucale kwente umuntfu abe msulwa,+ bese uba nekuthula,+ acabangele,+ alungele kulalela, agcwale umusa netitselo letinhle,+ angakhetsi,+ futsi angatentisi.+ 18 Ngetulu kwaloko, sitselo sekulunga sihlanyelwa etimeni letinekuthula,+ sihlanyelelwe labo* labakha kuthula.+

4 Tivelaphi timphi nekulwa emkhatsini wenu? Ativeli yini etifisweni tenu tenyama letichubeka tilwa ngekhatsi kini?*+ 2 Niyafisa kodvwa nite lutfo. Nichubeka nibulala futsi nihawukela, kodvwa niyehluleka kutfola. Nichubeka nilwa, nibangele netimphi.+ Nite lutfo ngenca yekutsi aniceli. 3 Nanicela aninikwa ngobe nicela ngenhloso lembi, futsi nifuna kukusebentisela tifiso tenu tenyama.

4 Nine tiphingi,* anati yini kutsi kuba ngumngani welive kwenta umuntfu abe sitsa naNkulunkulu? Ngako-ke nobe ngubani lofuna kuba ngumngani welive utenta sitsa saNkulunkulu.+ 5 Nobe nicabanga kutsi umbhalo umane usho ngaphandle kwesizatfu yini nawutsi: “Ngenca yekutsi ngekhatsi kitsi kunemona, sichubeka sifisa tonkhe tintfo”?+ 6 Kepha umusa lomkhulu Nkulunkulu lasinika wona mkhulu kakhulu. Kungako umbhalo utsi: “Nkulunkulu umelene nalabatigcabhako,+ kodvwa labatfobekile ubanika umusa wakhe lomkhulu.”+

7 Ngako-ke titfobeni kuNkulunkulu,+ kodvwa nimelane naDeveli+ futsi utanibalekela.+ 8 Sondzelani kuNkulunkulu, naye utawusondzela kini.+ Gezani tandla tenu nine toni,+ nihlambulule tinhlitiyo tenu+ nine leningabatako. 9 Vanini buhlungu, nilile futsi nikhale.+ Kuhleka kwenu akugucuke kube sililo, nekujabula kwenu kube kujabha. 10 Titfobeni embikwaJehova,*+ futsi utaniphakamisa.+

11 Bazalwane, yekelani kukhulumana kabi.+ Umuntfu lokhuluma kabi ngemzalwane wakhe nobe amehlulele, ukhuluma kabi ngemtsetfo futsi wehlulela umtsetfo. Nangabe wehlulela umtsetfo usuke ungawugcini umtsetfo, kodvwa ungumehluleli. 12 Munye loSishayamtsetfo nalonguMehluleli,+ loyo lokwati kusindzisa nekubhubhisa.+ Ungubani-ke wena kutsi ungehlulela makhelwane wakho?+

13 Labanye benu banemkhuba wekutsi: “Lamuhla nobe kusasa sitawuhamba siye kulela dolobha, sihlale khona umnyaka, sibe nelibhizinisi futsi sente nenzuzo,”+ 14 kepha nibe ningati kutsi kuphila kwenu kutawube kunjani kusasa.+ Ngobe ninjengenkhungu leba khona sikhashana bese iyanyamalala.+ 15 Esikhundleni saloko kufanele nitsi: “Nangabe Jehova* atsandza,+ sitawuphila futsi sitawenta lokwa nalokwa.” 16 Kodvwa nine niyatigcabha futsi niyatigabatisa. Kutigabatisa lokunjalo kubi. 17 Ngako-ke nangabe umuntfu ati kutsi angakwenta kanjani lokulungile kepha angakwenti, usuke ona.+

5 Nine tinjinga, khalani futsi nilile ngetinhlupheko letitawunehlela.+ 2 Umcebo wenu sewubolile, netimphahla tenu tidliwe ngumvunya.+ 3 Ligolide nelisiliva lenu selitfombile, futsi lokutfomba kutawuba bufakazi lobunilahlako kuphindze kucedze nenyama yenu. Loko lenikucongelele kutawuba njengemlilo ngemalanga ekugcina.+ 4 Bukani-ke, tisebenti letivuna emasimu enu solo tiyakhala ngobe nitigodlele umholo wato, naJehova* wemabutfo sewukuvile kukhala kwalabavunako bakhalela lusito.+ 5 Nine beniphila ntofontofo futsi nitenetisa emhlabeni. Nikhuluphalise tinhlitiyo tenu ngisho nangelilanga lekuhlatjwa.+ 6 Nimlahle ngelicala umuntfu lolungile futsi nambulala. Akakamelani yini nani?

7 Ngako beketelani bazalwane, kuze kube sekubeni khona kweNkhosi.+ Ngobe nemlimi uhlala alindzele sitselo lesiligugu lesivetwa ngumhlaba, abeketele kuze kufike timvula tekucala netimvula tekugcina.+ 8 Nani-ke beketelani,+ nicinise tinhlitiyo tenu, ngobe sesisondzele sikhatsi sekuba khona kweNkhosi.+

9 Bazalwane, ningakhononi* ngalomunye nalomunye kuze ningatowehlulelwa.+ Nangu uMehluleli sewume emnyango. 10 Bazalwane, lingisani sibonelo sebaphrofethi lebebakhuluma egameni laJehova,*+ labahlupheka ngetindlela letinyenti+ futsi babeketela.+ 11 Sitsi bayajabula* labo labacinisele.+ Nivile ngekucinisela kwaJobe,+ nawubona nemphumela Jehova* lawuletsa,+ ngaleyo ndlela nabona kutsi Jehova* unelutsandvo* lolukhulu futsi unemusa.+

12 Ngetulu kwako konkhe bazalwane bami, yekelani kufunga, kungaba ngelizulu nobe ngemhlaba, nanganobe ngusiphi lesinye sifungo. Kodvwa “Yebo” wenu akabe nguyebo, na-“Cha” wenu abe ngucha,+ kuze ningafanelwa kwehlulelwa.

13 Ukhona yini lohluphekako emkhatsini wenu? Akachubeke athantaza.+ Ukhona yini lojabulile? Akahlabele tingoma tekudvumisa.+ 14 Ukhona yini logulako emkhatsini wenu? Akabite labadzala belibandla,+ futsi abamthantazele, bamgcobe ngemafutsa+ egameni laJehova.* 15 Umthantazo lowentiwa ngekukholwa utamphilisa umuntfu logulako,* futsi Jehova* utamphilisa. Nangabe onile, utawutsetselelwa.

16 Ngako-ke vumani tono tenu+ kulomunye nalomunye, nithantazelane kuze niphiliswe. Kuncusa kwemuntfu lolungile kunemandla kakhulu.*+ 17 Elija bekangumuntfu lonemiva lefana neyetfu, kodvwa ngekutimisela, wathantazela kutsi lingani, futsi alizange line eveni iminyaka lemitsatfu netinyanga letisitfupha.+ 18 Waphindze wathantaza, litulu labese liyana nemhlaba waveta titselo.+

19 Bazalwane bami, nangabe lomunye kini adukiswa ecinisweni, bese lomunye uyambuyisa, 20 nibokwati kutsi nobe ngubani lobuyisa soni ekoneni+ kwaso utawusisindzisa ekufeni, ambonye netono letinyenti.+