INCWADZI YEKUCALA YA-PHETRO

1 Mine Phetro, umphostoli+ waJesu Khristu, ngibhalela labo labahleti kwesikhashana eveni, labasakatekele ePhontusi, eGalathiya, eKhaphadosiya,+ e-Asiya kanye naseBhithiniya, lokungulabakhetfwe 2 ngekuvumelana naloko Nkulunkulu longuBabe+ lebekakuhlele kusengaphambili, nangekungcweliswa ngemoya,+ kuze balalele futsi bafafatwe ngengati yaJesu Khristu:+

Shengatsi ningemukela umusa lomkhulu kanye nekuthula.

3 Akabongwe Nkulunkulu longuBabe weNkhosi yetfu Jesu Khristu, ngobe ngemusa wakhe lomkhulu wasenta satalwa kabusha+ etsembeni leliphilako+ ngekuvuswa kwaJesu Khristu ekufeni,+ 4 wasinika nelifa lelingonakali, lelihlantekile futsi lelingaphuphi.+ Lelifa nibekelwe lona emazulwini,+ 5 nine lenilondvolotwa nguNkulunkulu ngemandla akhe ngenca yekutsi ninekukholwa. Uyanilondvolota kuze nitfole insindziso letawembulwa esikhatsini sekugcina. 6 Ngenca yaloku, nijabula kakhulu nanobe kwesikhashana benike nacindzetelwa tilingo letehlukahlukene,+ 7 kuze kukholwa kwenu lokuvivinyiwe+ kube sizatfu sekudvunyiswa, senkhatimulo neseludvumo ngesikhatsi kwembulwa Jesu Khristu.+ Lokukholwa kuligugu kakhulu kwengca ligolide leliphelako ngisho nobe livivinywe* ngemlilo. 8 Nanobe ningazange senimbone, niyamtsandza. Nanobe ningamboni kwanyalo, niyakholwa kuye futsi nijabula kakhulu ngenjabulo lengachazeki nalekhatimulako, 9 njengobe nitfola umphumela wekukholwa kwenu, lokukusindziswa kwekuphila kwenu.+

10 Baphrofethi labaphrofetha ngemusa lomkhulu waNkulunkulu lebenitawutfola, baphenyisisa ngalensindziso futsi bayihlolisisa.+ 11 Bachubeka bahlola kutsi umoya longcwele lokubo ukhomba siphi sikhatsi nobe luphi luhlobo lwesikhatsi nawukhuluma ngaKhristu,+ ngobe umoya longcwele wafakaza kusengaphambili mayelana nekuhlupheka lobekutawehlela Khristu+ nenkhatimulo lebekatayitfola. 12 Bembulelwa kutsi bebangatisebenteli bona kepha bebasebentela nine, futsi nyalo letintfo tishunyayelwe kini, tashunyayelwa ngulabo labanitjela tindzaba letimnandzi ngemoya longcwele lotfunyelwe uvela ezulwini.+ Tingilosi nato tiyafisa kuticondza letintfo.

13 Ngako-ke yentani tingcondvo tenu tilungele umsebenti;+ nichubeke nicabangisisa kahle;+ niwetsembe umusa lomkhulu lenitawentelwa nguNkulunkulu nasekwembulwa Jesu Khristu. 14 Njengobe nibantfwana labalalelako, yekelani kucondziswa* tifiso lebeninato ngesikhatsi nisengakati lutfo, 15 kepha banini ngcwele kuko konkhe kutiphatsa kwenu, njengaLoyo Longcwele lowanibita,+ 16 ngobe kubhaliwe kwatsiwa: “Kufanele nibe ngcwele, ngobe mine ngingcwele.”+

17 Nangabe nicela tintfo kuBabe lowehlulela umuntfu ngamunye ngekungakhetsi+ kuye ngemisebenti yakhe, tiphatseni ngekwesaba+ njengobe nisahleti kwesikhashana eveni. 18 Ngobe niyati kutsi ngesikhatsi nikhululwa* endleleni lelite yekuphila lenayinikwa bokhokho benu,* anizange nikhululwe ngetintfo letonakalako, lokulisiliva neligolide.+ 19 Kodvwa nakhululwa ngengati leligugu,+ lefana neyeliwundlu lelimsulwa nalelite sici,+ lokuyingati yaKhristu.+ 20 Kuliciniso kutsi besekavele akhetsiwe lisengakasekelwa live,*+ kodvwa wembulwa ekupheleni kwetikhatsi ngenca yenu.+ 21 Ngaye niyakholwa kuNkulunkulu,+ lokunguye lowamvusa ekufeni+ wamnika nenkhatimulo,+ kuze kukholwa nelitsemba lenu kube kuNkulunkulu.

22 Njengobe nyalo senitihlambululile ngekulalela liciniso, lokunente natsandzana mbamba njengobe nibazalwane,+ tsandzanani kakhulu ngalokusuka enhlitiyweni.+ 23 Ngobe nitalwe kabusha,+ hhayi ngenhlanyelo* leyonakalako kodvwa ngenhlanyelo lengonakali,+ nangelivi laNkulunkulu lophilako nalohlala phakadze.+ 24 “Bonkhe bantfu bafana netjani, futsi yonkhe inkhatimulo yabo ifana nembali yesiganga; tjani buyabuna, nembali iyahhohloka, 25 kodvwa livi laJehova* lihlala phakadze.”+ ‘Lelivi’ litindzaba letimnandzi letamenyetelwa kini.+

2 Ngako-ke lahlani bonkhe bubi,+ bucili, kutentisa, umona, nayo yonkhe inhlobo yekunyundzela. 2 Njengetinswane,+ langatelelani lubisi lwelivi lolungakabhicwa nalutfo,* kuze ngalo nivutfwe futsi nisindziswe,+ 3 nangabe nje nibonile* kutsi iNkhosi inemusa.

4 Njengobe nita kuloyo lolitje leliphilako lelaliwe bantfu,+ kodvwa lelikhetsiwe futsi leliligugu kuNkulunkulu,+ 5 nani njengobe ningematje laphilako niyakhiwa nibe yindlu leyentiwe ngemoya,*+ kuze nibe baphristi labangcwele khona nitonikela imihlatjelo levumelana nemoya,*+ naleyemukelekako kuNkulunkulu ngaJesu Khristu.+ 6 Ngobe umBhalo utsi: “Ngibeka litje lelikhetsiwe eSiyoni, litje lekusimisa lelisisekelo futsi leliligugu. Kute umuntfu lokholwa kulo loyoke advumateke.”*+

7 Ngako liligugu kini ngobe niyakholwa; kodvwa kulabo labangakholwa, “lelitje lelaliwe bakhi+ seligucuke laba litje leliyinhloko,”*+ 8 futsi selibe “litje lelibangela kukhubeka nelidvwala leliwisanako.”+ Bayakhutjwa ngobe abalilaleli livi. Lesi ngiso siphetfo sabo. 9 Kodvwa nine “niluhlanga lolukhetsiwe, umbuso webaphristi, sive lesingcwele+ nebantfu labayimphahla lekhetsekile,+ kuze kuyo yonkhe indzawo nimemetele buhle”*+ baLoyo lowanibita naphuma ebumnyameni nangena ekukhanyeni kwakhe lokumangalisako.+ 10 Ngobe nake nangabi bantfu baNkulunkulu, kodvwa nyalo senibantfu bakhe;+ Nkulunkulu bekanganenteli umusa, kodvwa nyalo senitfole umusa.+

11 Bazalwane labatsandzekako, njengobe nitihambi futsi nihleti kwesikhashana eveni,+ ngiyanincenga kutsi nichubeke nibalekela tifiso tenyama+ letilwa nani.+ 12 Gcinani kutiphatsa kwenu kukuhle emkhatsini webantfu,+ kuze nabanisola ngekutsi nibenti balokubi, batibonele bona imisebenti yenu lemihle,+ futsi ngenca yaloko bakhatimulise Nkulunkulu ngelilanga lakhe lekuhlola.

13 Ngenca yeNkhosi, titfobeni kubo bonkhe labasetikhundleni,*+ kungaba senkhosini+ njengobe iphakeme, 14 nobe kubabusi njengobe ibatfumile kuze bajezise labenta lokubi kodvwa babonge labo labenta lokuhle.+ 15 Ngobe intsandvo yaNkulunkulu ikutsi ngekwenta lokuhle, nicedze* kukhuluma lokulite kwebantfu labangenangcondvo.+ 16 Banini bantfu labakhululekile,+ inkhululeko yenu ningayisebentisi njengesaba* sekwenta lokubi,+ kodvwa yisebentiseni njengetisebenti taNkulunkulu.+ 17 Hloniphani tonkhe tinhlobo tebantfu,+ nitsandze bonkhe bazalwane,+ nesabe Nkulunkulu+ futsi nihloniphe nenkhosi.+

18 Tisebenti atitfobele baphatsi bato ngayo yonkhe inhlonipho lefanele,+ tingatfobeli nje labo labalungile nalabacabangelako kuphela, kodvwa nalabo lokumatima kubajabulisa. 19 Ngobe Nkulunkulu uyajabula nangabe umuntfu abeketelela kuhlushwa* futsi aphatfwa kabi ngenca yekufuna kuba nanembeza lomuhle embikwakhe.+ 20 Ngobe kuhle ngani kutsi ubeketelele kushaywa nawente lokubi?+ Kodvwa nangabe ubeketelela kuhlushwa ngobe wenta lokulungile, loku kuhle kuNkulunkulu.+

21 Ecinisweni nabitelwa kulendlela yekuphila, ngobe ngisho naKhristu wahlupheka ngenca yenu,+ wanishiyela sibonelo kuze nilandzele tinyatselo takhe edvute.+ 22 Akentanga sono,+ futsi emlonyeni wakhe akuzange kuphume emanga.+ 23 Naketfukwa*+ akazange aphindzisele ngekwetfuka.*+ Nangesikhatsi ahlushwa+ akazange asongele, kodvwa wabeka litsemba lakhe kuLoyo lowehlulela+ ngekulunga. 24 Ngesikhatsi aselugodvweni,*+ wetfwala tono tetfu+ emtimbeni wakhe, kuze sikhululwe etonweni* futsi siphile ngekulunga. “Naphiliswa nangemanceba akhe.”+ 25 Ngobe beninjengetimvu letidukako,+ kodvwa nyalo senibuyele kumelusi+ nembonisi wekuphila kwenu.

3 Ngendlela lefanako, nine bafati titfobeni emadvodzeni enu,+ kuze kutsi nangabe lamanye kuwo angalilaleli livi, azuzwe ngaphandle kwemavi ngekutiphatsa kwebafati bawo,+ 2 ngenca yekutsi atibonele wona kutiphatsa kwenu lokumsulwa+ nenhlonipho yenu lenkhulu. 3 Kutihlobisa kwenu akungabi kwangaphandle, njengekuchina imichino, kufaka imihlobiso yeligolide,+ nobe kugcoka timphahla letidulile, 4 kodvwa akube nguloko lokusenhlitiyweni, lokukutihlobisa ngemoya wekuthula nalophansi,*+ longonakali futsi lobaluleke kakhulu emehlweni aNkulunkulu. 5 Ngobe bebatihlobisa ngaleyo ndlela bafati labangcwele basendvulo lebebetsembele kuNkulunkulu, batitfoba emadvodzeni abo, 6 njengobe naSara bekamlalela Abrahama, ambita ngekutsi yinkhosi.+ Nani senibantfwana bakhe, yingci nje nanichubeka nenta lokuhle, futsi ningancotjwa kwesaba.+

7 Ngendlela lefanako, nani madvodza chubekani nihlala nabo ngekubati.* Nibahloniphe+ njengesitja lesibutsakatsaka kakhudlwana, umuntfu lomsikati, ngobe batindlalifa temusa waNkulunkulu loletsa kuphila njengobe nani ningito,+ kuze imithantazo yenu ingavimbeki.

8 Kwekugcina, nonkhe cabangani ngekuvumelana,*+ nivelane, nitsandzane njengobe nibazalwane, nibe nesihawu,+ futsi nitfobeke.+ 9 Ningaphindziseli lokubi ngalokubi,+ nobe kwetfukwa ngekwetfuka.+ Esikhundleni saloko busisani,+ ngobe nabitelwa kulendlela yekuphila kuze nitfole sibusiso.

10 Ngobe “nobe ngubani lotsandza kuphila nalofuna kuba nemalanga lajabulisako, kufanele abambe lulwimi lwakhe kulokubi,+ abambe netindzebe takhe ekukhulumeni emanga. 11 Akafulatsele lokubi,+ ente lokuhle,+ afune kuthula futsi akubambisise.+ 12 Ngobe emehlo aJehova* akesuki kulabalungile, netindlebe takhe tilalela kuncusa kwabo;+ kodvwa Jehova* umelene nalabenta lokubi.”+

13 Ngubani lotanilimata nangabe nikhutsalela kwenta lokuhle?+ 14 Ngisho nobe kungenteka nihlushwe ngenca yekulunga, niyajabula.+ Kepha-ke ningakwesabi loko labakwesabako,* futsi ningaphatamiseki.+ 15 Kunaloko, ngcwelisani Khristu njengeNkhosi etinhlitiyweni tenu, nihlale nikulungele kutiphendvulela ngelitsemba lenu kubo bonkhe labanibuta ngalo, kodvwa nente njalo ngemoya lophansi*+ nangenhlonipho lenkhulu.+

16 Hlalani ninanembeza lomuhle,+ kuze kutsi kunobe yini labanikhuluma kabi kuyo, bahlazeke+ ngenca yekutiphatsa kwenu lokuhle njengobe nibalandzeli baKhristu.+ 17 Kuncono kuhlupheka ngobe nenta lokuhle+ nangabe loko kuyintsandvo yaNkulunkulu, kunekuhlupheka ngobe nenta lokubi.+ 18 Ngisho naKhristu wafa kwaba kanye kuphela ngenca yetono,+ umuntfu lolungile wafela labangakalungi,+ kuze aniholele kuNkulunkulu.+ Wabulawa ayinyama,+ kodvwa wavuswa angumoya.+ 19 Ngesikhatsi anemtimba wemoya, wahamba wayoshumayela emimoyeni lebeyiboshiwe,+ 20 lebeyingalaleli ngesikhatsi Nkulunkulu alindze ngekubeketela* emalangeni aNowa,+ ngalesikhatsi kwakhiwa umkhumbi+ lokwatsi ngawo bantfu* labangu-8 kuphela bahamba ngekuphepha etikwemanti.+

21 Lubhabhatiso loluhlobene naloku seluyanisindzisa (hhayi ngekususwa kwekungcola kwenyama, kodvwa ngekucela nembeza lomuhle kuNkulunkulu),+ ngekuvuswa kwaJesu Khristu ekufeni. 22 Ungesekudla saNkulunkulu+ ngobe waya ezulwini, futsi tingilosi, emagunya kanye nemandla kwabekwa ngephansi kwakhe.+

4 Khristu wahlupheka enyameni,+ ngako-ke nani tilungiseleleni kuze nicabange* njengaye, ngobe umuntfu lohlupheke enyameni akasatenti tono,+ 2 kuze sikhatsi lesisele asesenyameni angasasisebentiseli kwenta lokufiswa bantfu,+ kodvwa asisebentisele kwenta intsandvo yaNkulunkulu.+ 3 Ngobe sikhatsi lesengcile besenele kutsi nente lokutsandvwa bantfu balelive+ ngesikhatsi nichubeka nekona lokuhambisana nekwedzelela,* tinkhanuko letingalawulwa, kunatsa kakhulu, imicimbi lengalawulwa,* kucudzelana ngekunatsa, kanye nekukhonta tithico lokungakavumeleki.+ 4 Bayamangala ngobe anisahambi nabo endleleni yekutitika ngekutiphatsa lokubi, ngako banikhuluma kabi.+ 5 Kodvwa labantfu batawulandzisa kuloyo lolungele kwehlulela labaphilako nalabafile.+ 6 Ecinisweni kungako tindzaba letimnandzi tamenyetelwa nakulabafile,*+ kuze kutsi nanobe behlulelwa enyameni njengabo bonkhe bantfu, baphile ngekucondziswa ngumoya waNkulunkulu.

7 Kuphela kwato tonkhe tintfo sekusondzele. Ngako-ke, banini nengcondvo lebhadlile,+ futsi nikuphaphamele* kuthantaza.+ 8 Ngetulu kwako konkhe, tsandzanani kakhulu,+ ngobe lutsandvo lumbonya tono letinyenti.+ 9 Nibowemukelana* ngaphandle kwekukhonona.+ 10 Ngekwelizinga umuntfu ngamunye lemukele ngalo sipho, akasisebentise kuze asite labanye njengenceku lekahle lephatsiswe umusa lomkhulu waNkulunkulu lokhonjiswa ngetindlela letehlukahlukene.+ 11 Nangabe umuntfu akhuluma, akube shengatsi ukhuluma emavi lavela kuNkulunkulu; nangabe lotsite asita labanye, loko akakwente etsembele emandleni lavela kuNkulunkulu;+ kuze kuto tonkhe tintfo kukhatinyuliswe Nkulunkulu+ ngaJesu Khristu. Ludvumo kanye nemandla kwakhe phakadze naphakadze. Amen.

12 Bazalwane labatsandzekako, tinganimangalisi tilingo letimatima* lenihlangabetana nato,+ kube shengatsi nehlelwa yintfo lengakavami. 13 Kunaloko, chubekani nijabula+ ngobe nihlanganyela ekuhluphekeni kwaKhristu,+ kuze nitojabula kakhulu nasekwembulwa inkhatimulo yakhe.+ 14 Niyajabula nangabe nihlanjalatwa* ngenca yelibito laKhristu,+ ngobe umoya wenkhatimulo, lokungumoya waNkulunkulu, usetikwenu.

15 Kodvwa akube bete kini lohlupheka ngobe angumbulali, alisela, enta lokubi, nobe atsandza tindzaba tebantfu.+ 16 Kepha nangabe umuntfu ahlupheka ngenca yekutsi ungumKhristu, akabe bete emahloni,+ kunaloko akachubeke akhatimulisa Nkulunkulu njengobe abitwa ngalelibito. 17 Ngobe nyalo sesikhatsi sekutsi kwehlulela kucale endlini yaNkulunkulu.+ Nangabe-ke kucala ngatsi,+ kutawentekani kulabo labangatilaleli tindzaba letimnandzi taNkulunkulu?+ 18 “Nangabe kumatima ngemuntfu lolungile kutsi asindziswe, kutawentekani-ke kumuntfu longamhloniphi Nkulunkulu nalosoni?”+ 19 Ngako-ke labo labahlupheka ngenca yentsandvo yaNkulunkulu, abachubeke babeka kuphila kwabo kuMdali lowetsembekile, babe benta lokuhle.+

5 Njengobe ngingulomdzala welibandla lokanye nani, lofakaza ngekuhlupheka kwaKhristu nalohlanganyela enkhatimulweni letawembulwa,+ ngincenga* labadzala belibandla labasemkhatsini wenu, ngitsi: 2 Yelusani umhlambi waNkulunkulu+ leniwuphatsisiwe, nibe babonisi,* loko ningakwenti ngekucindzetelwa, kodvwa nikwente ngekutitsandzela embikwaNkulunkulu;+ hhayi ngekufuna kutizuzisa,+ kodvwa ngekutimisela; 3 ningatenti emakhosi etikwalabo labalifa laNkulunkulu,+ kodvwa banini tibonelo emhlambini.+ 4 Nasekembuliwe umelusi lomkhulu,+ nitawutfola umchele wenkhatimulo longaphuphi.+

5 Ngendlela lefanako, nine madvodza lasemasha titfobeni emadvodzeni lamadzala.*+ Nonkhe nibotfobelana, ngobe Nkulunkulu umelene nalabatigcabhako kodvwa ubanika umusa wakhe lomkhulu labo labatfobekile.+

6 Titfobeni ngephansi kwesandla saNkulunkulu lesinemandla, khona atoniphakamisa ngesikhatsi lesifanele,+ 7 futsi niphonse konkhe kukhatsateka kwenu kuye,+ ngobe uyanikhatsalela.+ 8 Hlalani nisangulukile niphindze nicaphele.+ Sitsa senu Develi, sihambahamba njengelibhubesi lelibhodlako, lelifuna lotsite lelingamshwabadzela.*+ 9 Kodvwa melanani naye,+ nicine ekukholweni, nati kutsi bonkhe bazalwane benu emhlabeni babeketelela kuhlupheka lokufanako.+ 10 Ngemuva kwekuhlupheka sikhashana, Nkulunkulu wawo wonkhe umusa lomkhulu, lowanibitela enkhatimulweni yaphakadze+ nimunye naKhristu, utawucedzela kuceceshwa kwenu. Utanenta nicine,+ anente nibe nemandla+ futsi anibeke esisekelweni lesicinile. 11 Emandla ngewakhe kuze kube phakadze. Amen.

12 Silvanosi*+ longumzalwane lowetsembekile ungisitile kutsi nginibhalele lencwadzi lemfisha, kuze nginikhutsate futsi ngininike bufakazi lobuliciniso bekutsi lona ngiwo mbamba umusa lomkhulu waNkulunkulu. Ngako manini nicine kuwo. 13 Umfati* loseBhabhulona lokhetsiwe njengani, uyanivusela, kanye naMakho+ indvodzana yami uyanivusela. 14 Nibovuselana ngekwanga kwelutsandvo.

Shengatsi nonkhe lenisebunyeni naKhristu ningaba nekuthula.