Bantfu BaNkulunkulu Baphuma EBhabhulona

KWASE kuphele iminyaka lemibili liBhabhulona litsetfwe ngemaMede nemaPheresiya. Ase ubuke kutsi kwentekani manje kulesitfombe! Ema-Israyeli ayaphuma eBhabhulona. Aphunyule kanjani? Ngubani lowakhululile?

Akhululwe nguKhuresi inkhosi yasePheresiya. Asengakatalwa Khuresi, Jehova wasebentisa umphrofethi wakhe Isaya kutsi abhale ngaye, watsi: ‘Utawenta intsandvo yami. Emasango atawushiywa avuliwe kuze ulitfumbe liBhabhulona.’ Khuresi vele abehamba phambili ngalesikhatsi liBhabhulona litfunjwa. EmaMede nemaPheresiya angena kulelidolobha ebusuku emasangweni alo labeshiywe avuliwe.

Umphrofethi waJehova longu-Isaya naye washo kutsi Khuresi abetawukhipha umyalo ngekutsi kwakhiwe kabusha liJerusalema nelithempeli. Wawukhipha yini Khuresi lomyalo? Yebo, wawukhipha. Watsi kuma-Israyeli: ‘Buyelani emuva eJerusalema niyowakha lithempeli laNkulunkulu wenu Jehova.’ Nguloko kanye ema-Israyeli lesibona aphuma ayokwenta.

Akusiwo onkhe ema-Israyeli labeseBhabhulona latsatsa loluhambo loludze lolubuyela eJerusalema. Loluhambo lwaluludze cishe lungemakhilomitha langu-800. Labanyenti kuma-Israyeli njengoba bese babadzala kakhulu kantsi labanye bebagula, bebangeke bakhone kuhamba lendlela lendze kangaka. Kunaletinye-ke noko tizatfu letabangela kutsi labanye bagcine bangakahambi. Kulabo labasala, Khuresi watsi: ‘Banikeni isiliva negolide naletinye tipho labantfu lababuyela emuva kuyowakha lithempeli eJerusalema.’

Ngako ema-Israyeli labuyela emuva eJerusalema, aphiwa tipho letinyenti. Khuresi wawaniketa netitja kanye netinkomishi letatsatfwa yiNkhosi Nebukhadnezari ethempelini laJehova, nayibhubhisa liJerusalema. Ema-Israyeli abenetintfo letinye lokwakufanele abuyele nato emuva.

Cishe ngemuva kwetinyanga letine, ema-Israyeli efika eJerusalema. Kwase kuphele iminyaka lengu-70 lelidolobha libhujisiwe, futsi lingenabantfu. Nanobe nje ema-Israyeli abesabuyele eveni lawo ahlangana nebumatima, njengoba sitawubona endzabeni lelandzelako.