Kungani Kulukhuni Kwenta Lokulungile?

NGUBANI lobekajabula ngesikhatsi Sawula enta tintfo letimbi?— NguSathane Develi. Baholi benkholo yemaJuda nabo bebajabula. Ngesikhatsi Sawula sekaba ngumfundzi weMfundzisi Lomuhle Kakhulu, labo baholi benkholo bacala kumenyanya. Uyabona kutsi yini lebangela kube lukhuni ngebafundzi baJesu kutsi bente lokulungile?—

Umphristi lophakeme lobekabitwa ngekutsi ngu-Ananiyase, wake watjela emadvodza kutsi ashaye Pawula ebusweni. Ananiyase wenta ngisho nemetamo yekutsi Pawula afakwe ejele. Pawula wahlushwa kakhulu ngesikhatsi aba ngumfundzi waJesu. Sibonelo saloko kutsi bantfu lababi bashaya Pawula futsi betama kumbulala basebentisa ematje lamakhulu.​—Imisebenti 23:1, 2; 2 Khorinte 11:24, 25.

Bantfu labanyenti batawetama kutsi sente tintfo letingamjabulisi Nkulunkulu. Imibuto lokufanele sitibute yona ngunayi: Ngikutsandza kangakanani kwenta lokuhle? Ngikutsandza ngelizinga lelikhulu yini lokuhle, kangangekutsi ngisho nobe labanye bantfu bakwenyanya,kodvwa mine ngichubeka ngikwenta? Uyavuma yini kutsi kudzingeka sibe nesibindzi kute sikwente loko?—

Kungenteka utibute: ‘Yini leyenta bantfu bangenyanye nangenta tintfo letinhle? Akukafaneli yini bajabule?’ Kunengcondvo kucabanga kanjalo. Ngalokuvamile bantfu bebamtsandza Jesu ngobe bekenta tintfo letinhle. Ngalesinye sikhatsi, bonkhe bantfu bakulelo dolobha bahlangana ndzawonye emnyango wendlu lapho bekahlala khona. Beta lapho ngobe Jesu bekelapha bantfu labagulako.​—Makho 1:33.

Ngalesinye sikhatsi bantfu bebangakutsandzi loko lebekufundziswa nguJesu. Nanobe bekahlale afundzisa liciniso, labanye bebakhombisa kumenyanya ngobe bekakhuluma liciniso. Loko kwenteka ngalelinye lilanga eNazaretha, lokulidolobha Jesu lakhululela kulo. Waya esinagogeni, indzawo sive semaJuda lebesihlangana kuyo kuze sikhonte Nkulunkulu.

Lapho esinagogeni wetfula inkhulumo lemnandzi lesekelwe emiBhalweni. Ekucaleni labantfu bayijabulela. Bamangaliswa ngemavi lamnandzi labephuma emlonyeni wakhe. Bebangakholwa kutsi leli bekulijaha lelikhulele edolobheni lakubo.

Ngemuva kwaloko Jesu wabese usho lokunye. Wakhuluma ngetikhatsi lapho Nkulunkulu akhombisa umusa lokhetsekile kubantfu labangasiwo emaJuda. Ngesikhatsi asho loko, bantfu lebebasesinagogeni batfukutsela. Batfukutseliswa yini?— Bebacabanga kutsi ngibo kuphela lebebatfole umusa lokhetsekile lovela kuNkulunkulu. Bebacabanga kutsi bancono kunalabanye bantfu. Ngako bamenyanya Jesu ngenca yaloko labekakukhulumile. Ucabanga kutsi yini labetama kuyenta kuye?—

LiBhayibheli litsi: “Bamkhiphela ngephandle kwelidolobha. Bamyisa esicongweni sentsaba lelalakhiwe kuyo, kute bamjikijele phansi. Kodvwa wavele waphuma emkhatsini wabo.”​—Lukha 4:16-30.

Nakungenteka kuwe loko, bewungakhona yini kuphindze ubuyele kulabo bantfu uyokhuluma nabo ngaNkulunkulu?— Uyavuma yini kutsi loko kungadzinga kutsi ube nesibindzi?— Ngemuva kwemnyaka kwenteke loko, Jesu wabuyela eNazaretha. LiBhayibheli litsi: “Wafundzisa emasinagogeni.” Jesu akayekelanga kukhuluma liciniso ngobe esaba bantfu lebebangamtsandzi Nkulunkulu.​—Matewu 13:54.

Ngalelinye lilanga kulisabatha, Jesu bekasendzaweni lapho bekunendvodza lenesandla lesikhubatekile. Jesu bekanawo emandla lavela kuNkulunkulu ekwelapha leyo ndvodza. Kodvwa lamanye emadvodza enta imetamo yekufaka Jesu enkingeni. Ucabanga kutsi yini leyentiwa nguMfundzisi Lomuhle Kakhulu?— Kwekucala wababuta: “Ukhona yini lapha kini longatsi anemvu yinye bese nayigcumkela emgodzini ngeliSabatha angayikhiphi?”

Kuliciniso bebatayisita lemvu ngisho nobe kuliSabatha, lilanga lebekufanele baphumule ngalo. Jesu watsi: ‘Akusincono yini kwelapha umuntfu ngeliSabatha, ngobe umuntfu ubaluleke kwendlula imvu.’ Kwabakhanyela kutsi bekuyintfo lefanele kutsi Jesu elaphe lendvodza.

Jesu watjela lendvodza kutsi yelule sandla sayo. Salapheka ngaleso sikhatsi. Leyo ndvodza yajabula kakhulu. Kwentekani kulalamanye emadvodza? Ajabula yini?— Akajabulanga. Loko kwenta amenyanya nakakhulu Jesu. Aphuma futsi enta imetamo yekubulala Jesu.​—Matewu 12:9-14.

Simo siyafanana nalamuhla. Ngisho nobe singentani, ngeke kwenteke sijabulise wonkhe umuntfu. Ngako kudzingeka sente sincumo sekutsi ngubani lesifuna kumjabulisa. Nangabe sifuna kujabulisa Jehova Nkulunkulu neNdvodzana yakhe Jesu Khristu, kufanele sihlale senta loko labakufundzisako. Nasenta loko, ngubani lotasenyanya? Ngubani lotawenta kube lukhuni ngatsi kutsi sente lokulungile?—

Sathane Develi nguye lowenta kube lukhuni ngatsi kutsi sente lokulungile. Kodvwa, ngubani lomunye ngaphandle kwaSathane?— Ngulabo labakhohliswe nguSathane kutsi bakholelwe etintfweni letimbi. Jesu watjela baholi benkholo bangesikhatsi sakhe, watsi: “Nine nivela kuyihlo lokunguDeveli, nifuna nekwenta loko lokufiswa nguye.”​—Johane 8:44.

Banyenti bantfu labatsandvwa nguDeveli. Jesu ubabita ngekutsi “live.” Ucabanga kutsi liyini lelive Jesu lakhuluma ngalo?— Asifundze Johane sehluko 15, vesi 19 kuze sibone. Lelivesi litsi: “Kube beniyincenye yelive, live belitanitsandza ngobe nibalo. Kodvwa njengobe ningasiyo incenye yelive, futsi mine nginikhetsile kulo, kungako linitondza.”

Live lelenyanya bafundzi baJesu lakhiwa ngibo bonkhe bantfu labangasibo balandzeli bakhe. Kungani live libenyanya bafundzi baJesu?— Ase ucabange ngaloko. Ngubani umbusi walelive?— LiBhayibheli litsi: “Lonkhe live lisemandleni alomubi.” Lomubi lokukhulunywa ngaye lapha nguSathane Develi.​—1 Johane 5:19.

Sewuyabona manje kutsi yini leyenta kube lukhuni kwenta lokulungile?— Sathane nelive lakhe bakwenta kube lukhuni. Kuphindze kube nalesinye sizatfu. Uyasikhumbula yini?— ESehlukweni 23 salencwadzi sifundze kutsi sonkhe sitalwa sinesono. Ucabanga kutsi ngeke kujabulise yini kuphila ngesikhatsi sono, Develi kanye nelive lakhe sekungekho?—

LiBhayibheli liyetsembisa: “Live liyendlula.” Loku kusho kutsi bonkhe labo labangasibo balandzeli beMfundzisi Lomuhle Kakhulu angeke basaba khona. Ngeke bavunyelwe kutsi baphile phakadze. Uyati yini kutsi bobani labatawuphila phakadze?— LiBhayibheli liyachubeka litsi: “Loyo lowenta intsandvo yaNkulunkulu uhlala kuze kube phakadze.” (1 Johane 2:17) Kuliciniso, ngulabo labenta lokuhle, labo labenta “intsandvo yaNkulunkulu” labatawuhlala phakadze emhlabeni lomusha. Ngisho nobe ngabe kulukhuni sifisa kwenta lokulungile, angitsi kunjalo?—