Jesu Watalwa NgaDecember Yini?

LIBHAYIBHELI alisitjeli kutsi Jesu watalwa nini. Nobe kunjalo, lisiniketa sizatfu lesivakalako lesisenta siphetse ngekutsi Jesu akazange atalwe ngaDecember.

Ase ucabange ngesimo selitulu saseBhetlehema ngaleso sikhatsi semnyaka, lapho Jesu atalelwa khona. Inyanga yemaJuda yaChislev (ifanana naNovember/December) bekuyinyanga lebandza kakhulu futsi bekusikhatsi semvula. Inyanga lelandzelako nguTebeth (December/January). Lesi bekusikhatsi semnyaka lapho simo selitulu besibandza kakhulu futsi ngaletinye tikhatsi kube nelichwa etindzaweni letiphakeme. Ase sibone kutsi liBhayibheli lisitjelani ngesimo selitulu saleyondzawo.

Umbhali weliBhayibheli longu-Ezra wakhombisa kutsi Chislev abeyinyanga leyatiwa ngemakhata futsi kuna nelitulu. Ngemva kwekusho kutsi sicumbi besihlangene eJerusalema “enyangeni yemfica [Chislev] ngelilanga lemashumi lamabili kuleyo nyanga,” Ezra wabika kutsi labantfu ‘bebachucha futsi litulu belina.’ Labantfu labebahlangene ndzawonye batsi ngalesimo selitulu sangaleso sikhatsi semnyaka: “Nelitulu liyana; ngako, singeke sikhone kuma lapha ngaphandle.” (Ezra 10:9, 13; Jeremiya 36:22) Kungako belusi labebahlala lapho bebaciniseka kutsi bona nemihlambi yabo bebangahlali ngephandle ebusuku nakusikhatsi saDecember.

Noko-ke, liBhayibheli litsi belusi bebasemadlelweni nemihlambi yabo ngebusuku Jesu latalwa ngabo. Umbhali weliBhayibheli longuLukha utsi belusi ‘bebalusa imihlambi yetimvu ebusuku etsafeni’ edvute neBhetlehema. (Lukha 2:8-12) Naka kutsi belusi bebaluse imihlambi yetimvu tabo ebusuku ematsafeni, akusho kutsi bebahambahamba ngaphandle emini nje kuphela. Bebanemihlambi yabo ebusuku. Lencazelo yekutsi bebelusela ematsafeni iyefanana yini nesimo selitulu semvula saseBhetlehema sangaDecember? Cha, ayifanani. Ngako-ke, lokwenteka ngalesikhatsi kutalwa Jesu, kukhombisa ngalokucacile kutsi akatalwanga ngaDecember.a

LiVi laNkulunkulu lisitjela ngalokucacile kutsi Jesu wafa nini, kodvwa lisiniketa ticondziso letimbalwa letikhombisa kutsi watalwa nini. Loku kusikhumbuta emavi eNkhosi Solomoni, latsi: “Libito lelihle lincono kunemakha lamnandzi, nelilanga lekufa lincono kunelekutalwa.” (Umshumayeli 7:1) Ngako akusimangalisi kutsi liBhayibheli lisiniketa imininingwane leminyenti ngemsebenti waJesu kanye nekufa kwakhe, kodvwa limane nje lisinikete lembalwa ngekutalwa kwakhe.