INCENYE 14
Baphrofethi Bendlulisela Umlayeto waNkulunkulu
Jehova umisa baphrofethi kute bendlulisele umlayeto wakhe lophatselene nesehlulelo, kukhonta lokuhlobile, kanye nekufika kwaMesiya
NGESIKHATSI kubusa emakhosi aka-Israyeli newakaJuda, emadvodza lakhetsiwe endlulisela umlayeto waNkulunkulu. Lawa kwakungemadvodza lanelukholo lolucinile nesibindzi, lakhuluma ngesimemetelo saJehova. Ase ucabange ngetihloko letine labakhuluma ngato labaphrofethi baNkulunkulu.
1. Kubhujiswa kweliJerusalema. Kwakusasele sikhatsi lesidze lapho baphrofethi baNkulunkulu lababili, kakhulukati bo-Isaya naJeremiya, becwayisa ngekutsi liJerusalema litawubhujiswa, futsi lishiywe lingenamuntfu. Baveta kutsi kungani Nkulunkulu abatfukutselela bantfu baseJerusalema. Kusho kwalabantfu baseJerusalema kutsi bamelela Jehova kwakungasilo liciniso ngenca yekukhonta kwabo kwemanga, kuba kwabo nenkhohlakalo kanye nebudlova.—2 Emakhosi 21:10-15; Isaya 3:1-8, 16-26; Jeremiya 2:1–3:13.
2. Kubuyiselwa kwekukhulekela kweliciniso. Ngemuva kweminyaka lengu-70 basekutfunjweni, bantfu baNkulunkulu bebatawukhululwa eBhabhulona. Labantfu bebatawubuyela eJerusalema, futsi bavusetele lithempeli laJehova. (Jeremiya 46:27; Amose 9:13-15) Kusasele iminyaka lengu 200, Isaya wabiketela ligama lalobeyawuncoba liBhabhulona, Khuresi, futsi labetawukhulula bantfu baNkulunkulu kutsi babuyisele kukhonta lokuhlobile. Isaya waphindze wachaza indlela lengakavami lebeyitawusetjentiswa nguKhuresi ekuncobeni liBhabhulona.—Isaya 44:24–45:3.
3. Kufika kwaMesiya kanye netintfo letitawumehlela. Mesiya abetawutalelwa edolobheni laseBhetlehema. (Mikha 5:2) Abetawuba ngulotfobekile, futsi angene eJerusalema agibele litfole lembongolo. (Zakhariya 9:9) Nanobe amnene futsi anemusa, abengeke atsandvwe, futsi labanyenti bebangeke bamemukele. (Isaya 42:1-3; 53:1, 3) Abeyawukufa kabuhlungu. Lokufa kwakhe kwakuyosho siphetfo sakhe yini? Chake, ngoba injongo yako kwakutsi bantfu batsetselelwe tono tabo. (Isaya 53:4, 5, 9-12) Kuvuswa kwakhe kuphela lobekungafeza loku.
4. Kubusa kwaMesiya emhlabeni. Ngekungafanani nebantfu labangakapheleli, labangakwati kubusa ngekuthula, iNkhosi lenguMesiya iyawubitwa ngekutsi yiNkhosi yekuThula. (Isaya 9:6, 7; Jeremiya 10:23) Lapho asabusa, bonkhe bantfu batawuhlala ngekuthula, futsi kuyawuba nekuthula kubantfu netilwane. (Isaya 11:3-7) Kugula angeke kuphindze kube khona. (Isaya 33:24) Ngisho nekufa kuyawugwinywa kuze kube phakadze. (Isaya 25:8) Lapho asabusa Mesiya, bantfu labafile batawuvuselwa ekuphileni emhlabeni.—Danyela 12:13.
—Lendzaba itsetfwe encwadzini ya-Isaya, Jeremiya, Danyela, Amose, Mikha, kanye naZakhariya.