Pawula Ubhalela Emabandla

LIBANDLA lelisandza kusungulwa lemaKhristu belitawuba nencenye lebalulekile ekugcwalisekeni kwenjongo yaJehova. Lawo maKhristu etikhatsi tebaphostoli ahlaselwa ngekushesha. Abetawukwati yini kuba cotfo kuNkulunkulu, lapho ashushiswa bantfu labangasiwo emaKhristu ngisho nangemaKhristu imbala? ImiBhalo yemaKhristu yesiGriki inetincwadzi letingu-21 letatiniketa siyalo kanye nesikhutsato.

Letingu-14 tato, kusukela kumaRoma kuya kumaHebheru, tabhalwa ngumphostoli Pawula. Letincwadzi tatibitwa ngemagama ebantfu letatibhalelwe bona​—kungaba ngumuntfu ngamunye noma emabandla latsite. Ase uhlole letinye tetihloko letikuletincwadzi taPawula.

Ticwayiso letimayelana netimiso tekutiphatsa. Labo labenta budlundlulu, labaphingako, kanye nalabenta tono letinye letenyanyekako “bangeke balidle lifa lembuso waNkulunkulu.” (Galathiya 5:19-21; 1 Khorinte 6:9-11) Tikhonti taNkulunkulu kufanele tibe munye ngisho nobe tivela etiveni letingafanani. (Roma 2:11; Efesu 4:1-6) Kufanele tikujabulele kusita labanye. (2 Khorinte 9:7) Pawula watsi: “Thandazani ningayekeli.” Bakhulekeli baNkulunkulu bakhutsatwa kutsi betfule imiva yabo lejulile kuJehova ngemthandazo. (1 Thesalonika 5:17; 2 Thesalonika 3:1; Filiphi 4:6, 7) Kute imithandazo iviwe nguNkulunkulu kufanele yentiwe ngelukholo.​—Hebheru 11:6.

Yini lengasita imindeni kutsi ihlale ijabulile? Emadvodza kufanele atsandze bafati bawo njengoba atsandza imitimba yawo. Bafati kufanele babe nenhlonipho lenkhulu ngemadvodza abo. Bantfwana kufanele balalele batali babo ngoba loko kuyamjabulisa Nkulunkulu. Batali kufanele bacondzise futsi baceceshe bantfwana babo ngelutsandvo, basebentisa timiso letivela kuNkulunkulu.​—Efesu 5:22–6:4; Kholose 3:18-21.

EmaKhristu atfola lusito lwekucondza injongo yaNkulunkulu. Tigaba letinyenti teMtsetfo waMosi taba nendzima ekucondziseni kanye nasekuvikeleni ema-Israyeli kwaze kwafika Khristu. (Galathiya 3:24) Kute sidzingo sekutsi emaKhristu agcine lomtsetfo kute akhonte Nkulunkulu. Ngesikhatsi abhalela emaHebheru, lobekungemaKhristu lasuka emaJudeni, Pawula wakuchaza kahle loko lokushiwo ngumtsetfo ngekutsi injongo yaNkulunkulu igcwaliseka kanjani ngaKhristu. Pawula waphindze wachaza kutsi tici letinyenti talomtsetfo betitiphrofetho. Sibonelo saloku kutsi imihlatjelo lebeyentiwa ngetilwane beyikhombisa kutsi bekutawuba nemhlatjelo lomkhulu esikhatsini lesitako wekufa kwaJesu lowawutawuba nendzima lenkhulu ekutsetselelweni tono. (Hebheru 10:1-4) Ngekufa kwaJesu Nkulunkulu wawesula umtsetfo wesivumelwane ngoba bewungasadzingeki.​—Kholose 2:13-17; Hebheru 8:13.

Sicondziso sekuhlelwa kwelibandla ngendlela lefanele. Emadvodza lanesifiso sekusingatsa imisebenti yekuphatfwa kwelibandla kufanele abe ngulatiphatsa kahle futsi alwele kuba netimfanelo letisemiBhalweni letiwenta afanelekele kuphatsa libandla. (1 Thimothi 3:1-10, 12, 13; Thithusi 1:5-9) Tikhonti taNkulunkulu kufanele tihlangane ndzawonye tikhatsi tonkhe kute tikwati kukhutsatana. (Hebheru 10:24, 25) Imihlangano yekukhonta Nkulunkulu kufanele yakhe futsi iyale.​—1 Khorinte 14:26, 31.

Ngesikhatsi Pawula abhalela Thimothi incwadzi yakhe yesibili, lomphostoli abesabuyele eRoma, aboshiwe futsi alindzele sigwebo sakhe. Bambalwa kuphela bazalwane lababa nesibindzi sekumvakashela. Pawula besekati kutsi sikhatsi sekuphila kwakhe sesifishane. Ngako-ke watsi: “Ngikulwile kulwa lokuhle, sengiyicedzile indzima yami, ngibambelele ekukholweni.” (2 Thimothi 4:7) Kungenteka Pawula wabulawelwa lukholo lwakhe ngemuva-nje kwekusho lawo mavi. Nobe kunjalo, letincwadzi talomphostoli tisachubeka ticondzisa bakhulekeli baNkulunkulu nalamuhla.

​—Lendzaba itsetfwe encwadzini YebaseRoma sehluko 1 na-2, ku-1 kubaseKhorinte, na-2 kubaseKhorinte, KubaseGalathiya, kubase-Efesu, KubaseFiliphi, KubaseKholose, ku-1 kubaseThesalonika na-2 kubaseThesalonika, ku-1 kuThimothi na-2 kuThimothi, KuThithusi, KuFilemoni, kanye naKumaHebheru.