INshumayelo YaseNtsabeni

Ngemuva kwekukhetsa baphostoli labangu-12, Jesu waya endzaweni lapho bekuhlangene khona bantfu labanyenti. Labanye bebachamuka eGalile, eJudiya, eThire, eSidoni, eSiriya nakuletinye tindzawo letingaseJordane. Beta nebantfu labagulako nalabebanemadimoni. Jesu wabelapha bonkhe. Wahlala phasi entsabeni wase uyabafundzisa. Wachaza kutsi yini lokufanele siyente nasifuna kuba bangani baNkulunkulu. Watsi kufanele sibone kutsi siyamdzinga Jehova futsi simtsandze. Kodvwa ngeke simtsandze Nkulunkulu nangabe singabatsandzi labanye. Kufanele sibe nemusa futsi sivelane nalabanye, ngisho netitsa tetfu imbala.

Jesu watsi: ‘Akukeneli kutsi nitsandze bangani benu kuphela. Kodvwa kufanele nitsandze netitsa tenu futsi nicolele nebantfu ngalokusuka enhlitiyweni. Nangabe kunemuntfu lokukwatele, ngekushesha hamba kuye ufike ucolise. Phatsa labanye ngendlela longatsandza kutsi bakuphatse ngayo.’

Jesu waphindze wakhuluma nangekutsandza umcebo. Watsi: ‘Kubaluleke kakhulu kuba ngumngani waJehova kunekuba nemali lenyenti. Sigebengu singayeba imali yakho, kodvwa kute longeba bungani bakho naJehova. Ningakhatsateki ngekutsi nitawudlani, nitawunatsani nobe nitawugcokani. Bukani tinyoni. Nkulunkulu uyaciniseka kutsi tihlale tinako kudla. Kukhatsateka ngeke kukwente uphile sikhatsi lesidze. Khumbula, Jehova uyati kutsi udzingani.’

Lesicumbi sebantfu besingakaze sive umuntfu lokhuluma njengaJesu. Baholi babo benkholo bebangakabafundzisi letintfo leti. Kungani Jesu aba ngumfundzisi lomkhulu? Kungobe konkhe lebekakufundzisa bekuvela kuJehova.