June

Kuphila kwalomfelokati kumatima kakhulu; kungenteka ute ngisho nemali leyenele yekutsenga tintfo latidzingako. Nanobe kunjalo, uya kulinye lalamabhokisi futsi ngekuhlakanipha ufaka tinhlavu letimbili temali telinani lelincane kakhulu, letingabangi ngisho nemsindvo njengobe tingena kulelibhokisi. Jesu uyati kutsi ufakeni, tinhlavu letimbili te-lephithoni, lokutinhlavu letincane kakhulu lebetisetjentiswa ngaleso sikhatsi. Lena yimali lencane kakhulu kutsi ingatsenga ngisho najolwane, lokuyinyoni leshiphe kakhulu lebeyitsengiswa kuze idliwe. Jesu ujabula kakhulu ngalomfelokati. Ngako ubita bafundzi bakhe, abakhombise lomfelokati, bese utsi: “Lomfelokati lophuyile ufake lokunyenti kwendlula bonkhe.” Ngemuva kwaloko uyabachazela utsi: “Bonkhe labanye [ikakhulukati labanjingile] bafake labakutsetse kulokunyenti labanako, kodvwa yena nanobe aphuyile, ufake konkhe lanako nalebekaphila ngako.” (Mak. 12:43, 44) Ngesikhatsi lomfelokati lophuyile anikela ngemali yakhe yekugcina, beketsemba kutsi Jehova utamnakekela.​—Hla. 26:3. w21.04 6 ¶17-18

Ngesikhatsi Jesu alamhlabeni, wachubeka afundzisa bantfu anelitsemba lekutsi batomlalela futsi bekafuna bafundzi bakhe bente lokufanako. (Joh. 4:35, 36) Ngesikhatsi anebafundzi bakhe, bebashumayela ngekutimisela. (Luk. 10:1, 5-11, 17) Ngemuva kwekuboshwa kwaJesu nekufa kwakhe, bafundzi bakhe baphelelwa ngumdlandla wekushumayela kwesikhashana. (Joh. 16:32) Nasekavusiwe ekufeni, Jesu wabakhutsata kutsi banake umsebenti wekushumayela. Nasekabuyele ezulwini, bashumayela ngemdlandla lomkhulu kangangekutsi titsa tabo taze takhonona njengobe kuvetwe embhalweni welusuku lwalamuhla. Jesu wawacondzisa emaKhristu ekucala nakashumayela, futsi Jehova wawabusisa kangangekutsi bantfu labanyenti bawemukela lomlayeto. Nasi sibonelo, ngeliPhentekhoste langa-33 C.E., kwabhajatiswa bantfu labangaba ngu-3 000. (Imis. 2:41) Linani lebafundzi lachubeka landza kakhulu. (Imis. 6:7) Nanobe kunjalo, Jesu watsi banyenti kakhulu bantfu lebebatawemukela tindzaba letimnandzi ngemalanga ekugcina.​—Joh. 14:12; Imis. 1:8. w21.05 14 ¶1-2

Usakhumbula yini ngesikhatsi ubona kutsi sewulitfolile liciniso? Bewucabanga kutsi bonkhe bantfu batakwemukela loko besewukukholelwa. Bewuciniseka kutsi umlayeto weliBhayibheli utawubenta bajabulele kuphila nyalo futsi babe nelitsemba lelihle ngesikhatsi lesitako. (Hla. 119:105) Ngako wacocela bonkhe bangani bakho netihlobo takho ngemaciniso lebesewuwafundzile. Kepha kwentekani? Wamangala ngobe bantfu labanyenti abakwemukelanga loku bewubatjela kona. Akukafaneli simangale nangabe labanye bangawemukeli umlayeto lesiwushumayelako. Ngemalanga aJesu, bantfu labanyenti abazange bamemukele, nanobe bekenta timangaliso lebetifakazela kutsi usekelwa nguNkulunkulu. Nasi sibonelo, Jesu wavusa Lazaro ekufeni, lokusimangaliso lebebangeke bakhone kusiphika labo bebamphikisa. Nanobe kunjalo, baholi bemaJuda abazange bakholwe kutsi unguMesiya. Bebafuna ngisho nekubulala Jesu naLazaro!​—Joh. 11:47, 48, 53; 12:9-11. w21.05 2 ¶1-2

Yenta konkhe lokusemandleni akho kuze ube khona njalo emihlanganweni. Imihlangano itakukhutsata futsi ungakhona nekubati kancono bazalwane bakho nabodzadze. Yakha bungani ebandleni nebantfu longafundza kubo, bangaba badzala nobe bancane kunawe, nobe babe nemasiko lehlukile kunewakho. LiBhayibheli liyasikhumbuta kutsi kuhlakanipha ‘kutfolakala kulasebakhulile.’ (Jobe 12:12) Labakhulile nabo bangafundza lokunyenti kulabasebasha labetsembekile. Davide bekamncane kunaJonathani, kodvwa loko akuzange kubavimbele kutsi babe bangani. (1 Sam. 18:1) BoDavide naJonathani bebasitana kutsi bakhonte Jehova nanobe bekunetinkinga letimatima. (1 Sam. 23:16-18) Lomunye dzadze lokutsiwa ngu-Irina, lokunguye kuphela Fakazi emndenini wakubo utsi: “Bazalwane betfu nabodzadze bangafana mbamba nebatali betfu nobe bantfwana bakitsi. Jehova angabasebentisa kutsi babe ngumndeni lesiwudzingako.” Bangani bakho bayafuna kukukhutsata nekukusita, kodvwa kufanele ubatjele kutsi bangakusita ngani. w21.06 10-11 ¶9-11

Jesu washo umfanekiso lomayelana nenkhosi nesisebenti sayo. Lenkhosi yesula sikweleti lesikhulu salesisebenti lebesingeke sikhone kusibhadala. Ngemuva kwesikhatsi, lesisebenti sala kwesula sikweleti lesincane salesinye sisebenti. Ekugcineni, lenkhosi yavalela ejele lesisebenti lesite umusa. Loko lokwentiwa ngulesisebenti akuzange kulimate sona kuphela, kodvwa kwalimata nalabanye. Kwekucala, asizange sisikhombise umusa lesi lesinye sisebenti, ngobe “sasifaka ejele kute sihlale lapho site sibhadale konkhe lesasisikweleta kona.” Kwesibili, sativisa buhlungu leti letinye tisebenti letabona loko lesakwenta. Tatsi “leletinye tisebenti natibona konkhe loku lobekwentekile, teva buhlungu kakhulu.” (Mat. 18:30, 31) Ngendlela lefanako, lesikwentako kuyabatsintsa labanye. Yini lengenteka nangabe lotsite asiphatsa kabi futsi sale kumcolela? Kwekucala, simvisa buhlungu ngekutsi singamcoleli, singamnaki futsi singamkhombisi lutsandvo. Kwesibili, senta labanye ebandleni bangajabuli nababona kutsi asivani naloyo muntfu. w21.06 22 ¶11-12

Bantfu bangumfanekiso waNkulunkulu, kodvwa Sathane uyatsandza kubentisa tintfo letimbi. Ngesikhatsi Nkulunkulu ‘abona kutsi umuntfu bekenta tintfo letimbi kakhulu’ ngemalanga aNowa, “Jehova watisola ngekutsi udale umuntfu emhlabeni, futsi weva buhlungu enhlitiyweni yakhe.” (Gen. 6:5, 6, 11) Sesincono yini simo emhlabeni? Cha! Develi ujabula kakhulu nakabona tonkhe tinhlobo tekutiphatsa kabi ngekwelicansi tandze kakhulu, lokufaka ekhatsi kutiphatsa kabi kwebantfu bebulili lobehlukene nebebulili lobufanako! (Ef. 4:18, 19) Sathane ujabula kakhulu nakabona labo labakhonta Jehova benta sono lesikhulu. Ngephansi kwekubusa kwaSathane, umuntfu akagcini nje ‘ngekubusa lomunye umuntfu bese uyamlimata’ kodvwa uphindze angawunakekeli umhlaba kanye netilwane njengobe Jehova acela bantfu kutsi bakunakekele. (Shu. 8:9; Gen. 1:28) Uyini umphumela? Labanye bososayensi batsi ngenca yetintfo letentiwa bantfu, letinye tintfo letidaliwe letingabangu-1 000 000 titawufa tiphele nya kuleminyaka lembalwa letako. w21.07 12 ¶13-14

Letinye tikhonti taNkulunkulu tichubeka titisola ngemaphutsa letawenta. Ticabanga kutsi Jehova angeke aticolele nanobe timcelile kutsi atitsetselele, tayekela nekwenta lokubi. Nangabe utiva ngalendlela, kutakusita kufundza ngekutsi Nkulunkulu uyafuna kukukhombisa lutsandvo lwakhe lolucotfo. Kutawukwenta ukhonte Jehova ujabulile nganembeza lohlantekile. Loku kungenteka ngobe “ingati yaJesu iNdvodzana yakhe iyasihlanta kuto tonkhe tono.” (1 Joh. 1:7) Nangabe udvumatekile ngenca yemaphutsa akho, khumbula kutsi Jehova uyafuna futsi uyakulangatelela kucolela soni lesiphendvukile. Naka kutsi umhlabeleli Davide waluhlobanisa njani lutsandvo lolucotfo nekutsetselela. Wabhala watsi: “Njengobe emazulu aphakeme kakhulu kunemhlaba, mkhulu kangako-ke umusa lawentela labo labamesabako. Njengobe imphumalanga ikhashane kakhulu nenshonalanga, naye utikhweshise kangako-ke tono tetfu kitsi.”​—Hla. 103:11, 12. w21.11 5-6 ¶12-13

Indvodza lengumKhristu kufanele imhloniphe umfati wayo. (1 Phet. 3:7) Kuhlonipha kusho kubanaka ngalokukhetsekile labanye nekubaphatsa kahle. Nasi sibonelo, indvodza ihlonipha umkayo ngekutsi imphatse ngendlela lekhombisa kutsi ubalulekile. Ayilindzeli kutsi ente lokungetulu kwalangakhona kukwenta. Ngetulu kwaloko, ayimcatsanisi nalabanye bafati. Umfati bekangativa njani nangabe indvodza yakhe imcatsanisa nalabanye? Indvodza yaRosa, lengasiye Fakazi, ihlala imcatsanisa nalabanye bafati. Emavi ayo lalimatako ente Rosa wativa angasilutfo futsi wangabata kutsi ukhona umuntfu lomtsandza mbamba. Rosa utsi: “Ngihlale ngidzinga kucinisekiswa kutsi ngibalulekile kuJehova.” Ngalokwehlukile, indvodza lengumKhristu iyamhlonipha umfati wayo. Iyati kutsi loko kutabutsintsa buhlobo bayo naye kanye nebuhlobo bayo naJehova. Indvodza lemhloniphako umkayo iyamdvumisa, imcinisekise kutsi iyamtsandza futsi imncome. w21.07 22 ¶7-8

Uyadvumateka yini nangabe umele liphasela lolidzinga kakhulu kodvwa lingefiki ngesikhatsi lebewulilindzele ngaso? Kodvwa nawuva kutsi leliphasela alikefiki ngesikhatsi lobewulilindzele ngaso ngenca yetizatfu letivakalako kungenteka ubeketele futsi ukulungele kulindza. Taga 13:11 tisifundzisa kutsi kungani kufanele sibeketele. Titsi: “Umcebo lotfolakele kamelula utawusheshe uphele, kodvwa umuntfu lotfola umcebo kancane kancane utawugcine sekanalokunyenti.” Yini lesiyifundza kulelivesi? Kukuhlakanipha kubeketela nawenta tintfo, utente kancane kancane. Taga 4:18 tisitjela kutsi “indlela yalabalungile ifana nekukhanya kwasentsatsakusa lokuya ngekuya kukhanye kakhulu kuze kube semini.” Kungenteka lamavi asho indlela Jehova lembula ngayo injongo yakhe kubantfu bakhe kancane kancane. Nanobe kunjalo, kungenteka lelivesi lisho nendlela umKhristu latfutfuka ngayo ebuhlotjeni bakhe naJehova. Kutsatsa sikhatsi kutsi umuntfu asondzelane naJehova. w21.08 8 ¶1, 3-4

Sinemsebenti lomnyenti lokufanele siwente njengobe lelive liya ngasekupheleni. (Mat. 24:14; Luk. 10:2; 1 Phet. 5:2) Sonkhe sifuna kwenta konkhe lesingakhona kukwenta ekukhonteni Jehova. Labanye bafuna tindlela tekwenta lokunyenti ekukhonteni Jehova. Labanye bafisa kuba ngemahlahlandlela. Labanye bafisa kusebenta eBethel nobe basite emsebentini wekwakha takhiwo tenhlangano. Kantsi labanye bazalwane labanyenti bafuna kuba tinceku letisebentako nobe kuba ngulabadzala belibandla. (1 Thim. 3:1, 8) Jehova ujabula kakhulu nakabona indlela bantfu bakhe labafuna ngayo kumentela lokutsite ekumkhonteni! (Hla. 110:3) Kodvwa udvumatekile yini ngenca yekutsi solo awukhoni kufinyelela umgomo lotsite emsebentini waJehova? Nakunjalo, thantaza kuJehova umtjele indlela lotiva ngayo. (Hla. 37:5-7) Ngetulu kwaloko, cela seluleko kubazalwane labavutsiwe ngendlela longatfutfuka ngayo emsebentini waNkulunkulu, futsi wente konkhe lokusemandleni akho kuze usisebentise. Nawenta njalo, kungenteka uwufinyelele lomgomo. w21.08 20 ¶1; 21 ¶4

Ana lobekangumfelokati longumphrofethikati, bekaneminyaka lengu-84 kodvwa “bekaba khona njalo ethempelini.” Jehova wambusisa ngobe bekabakhona njalo ethempelini futsi wamvumela kutsi abone Jesu aseluswane. (Luk. 2:36-38) Etikhatsini talamuhla, banyenti labakhulile futsi labetsembekile labatibonelo letinhle kulabasebasha. Sitawuzuza kakhulu nasitinika sikhatsi sekucoca nabo futsi sibalalele nabasitjela ngenjabulo labayitfolile ngekuba senhlanganweni yaJehova. Bazalwane betfu nabodzadze lasebakhulile babaluleke kakhulu kuJehova nasenhlanganweni yakhe. Bayibonile indlela Jehova labusise ngayo inhlangano yakhe ngetindlela letinyenti, nalababusise ngayo. Bafundze tifundvo letinyenti emaphutseni abo. Batsatse njengemtfombo wekuhlakanipha, futsi ufundze kubo. (Taga 18:4) Nawutinika sikhatsi sekubati, kukholwa kwakho kutawucina. w21.09 3 ¶4; 4 ¶7-8; 5 ¶11, 13

Bantfu baJehova bangawasebentisa lamakhono Isaya lawachaza ngekutsi “lubisi lwetive.” (Isa. 60:5, 16) Ngenca yemakhono alamadvodza nalabafati labaligugu labemukela liciniso, umsebenti wekushumayela wentiwa emaveni langu-240, futsi kukhicitwa tincwadzi letisekelwe eBhayibhelini ngetilwimi letingetulu kwa-1 000. Kulesikhatsi sekuphela, kunyakatiswa kwetive kuphocelela bantfu kutsi bente sincumo. Batawusekela yini uMbuso waNkulunkulu, nobe batawetsembela kubohulumende balelive? Wonkhe muntfu kufanele asente lesincumo. Nanobe bantfu baJehova bayihlonipha imitsetfo yabohulumende bemave labahlala kuwo, kodvwa abatingeneli sanhlobo tepolitiki talelive. (Rom. 13:1-7) Bayati kutsi uMbuso ukuphela kwelikhambi letinkinga tebantfu. LoMbuso awusiyo incenye yalelive.​—Joh. 18:36, 37. w21.09 17-18 ¶13-14

Nangabe umuntfu lomtsandzako ayekela kukhonta Jehova, kubaluleke kakhulu kutsi uchubeke ucinisa kukholwa kwakho nekwemalunga emndeni wakho. Ungakwenta njani loko? Tfola emandla kuJehova ngekutsi uchubeke ufundza liVi lakhe futsi uzindla ngalo nangekuba khona emihlanganweni yelibandla. Babe waJoanna nasisi wakhe bayekela kukhonta Jehova, Joanna utsi: “Ngitiva ngincono nangifundza nga-Abigayili, nga-Esta, ngaJobe, ngaJosefa nangaJesu, lokukhulunywa ngabo eBhayibhelini. Tibonelo tabo tiyangikhutsata futsi tingenta ngihlale nginembono lokahle.” Nawutiva ucindzetelekile, ungayekeli kuthantaza kuJehova. Ncenga Nkulunkulu wetfu lonelutsandvo kutsi akusite ubuke tintfo ngendlela latibuka ngayo, nekutsi ‘akunike kucondza futsi akukhombise indlela lokufanele uhambe ngayo.’ (Hla. 32:6-8) Kuliciniso kutsi kungahle kube buhlungu kakhulu njengobe utjela Jehova indlela lotiva ngayo. Kodvwa Jehova uyabucondza buhlungu lobuvako. Uyakuncenga kutsi umtjele konkhe lokusenhlitiyweni yakho.​—Eks. 34:6; Hla. 62:7. w21.09 28 ¶9-10

Ngemuva kweliPhasika langa-32 C.E., umphostoli Phetro, Jakobe naJohane babona umbono lomangalisako. Kungenteka bekusetulu eNtsabeni iHemoni, ngesikhatsi Jesu ashintja embikwabo. “Buso bakhe bakhanya njengelilanga, netingubo takhe tangetulu takhanya bha!” (Mat. 17:1-4) Baphostoli beva Nkulunkulu atsi: “Lena yiNdvodzana yami letsandzekako nalengiyemukele. Yilaleleni.” Indlela labaphostoli labaphila ngayo yakhombisa kutsi bamlalela Jesu. Natsi sifuna kubalingisa. Siyajabula ngekutsi Jehova usicondzisa asebentisa Jesu Khristu ‘loyinhloko yelibandla.’ (Ef. 5:23) Shengatsi singatimisela ‘kumlalela,’ njengobe kwenta umphostoli Phetro, Jakobe naJohane. Nasenta njalo, sitawutfola tibusiso letinyenti nyalo futsi sitawuchubeka sijabula nasesikhatsini lesitako. w21.12 22 ¶1; 27 ¶19

Lomunye umKhristu eKhorinte bekatiphatsa kabi nemfati wababe wakhe. Umphostoli Pawula watjela libandla kutsi limsuse emkhatsini walo. Lentfo lembi lebeyentiwa ngulendvodza beyililimata libandla ngobe labanye bebangacabangi kutsi yenta sono lesikhulu! (1 Khor. 5:1, 2, 13) Ngekuhamba kwesikhatsi, Pawula weva kutsi lesoni besiphendvuke mbamba! Pawula watjela labadzala watsi: “Nimtsetselele ngemusa futsi nimdvudvute.” Naka kutsi kungani Pawula asho njalo, watsi: “Kuze kungenteki kutsi ngandlela tsite ancotjwe kuva buhlungu lobukhulu.” Pawula wayivela lendvodza lebeseyiphendvukile. Bekangafuni kutsi itive idvumateke kakhulu nobe ive buhlungu kakhulu ngaloko beyikwentile ize iyekele kucela kutsetselelwa. (2 Khor. 2:5-8, 11) NjengaJehova, labadzala belibandla bayakutsandza kukhombisa umusa. Batawuniketa sijeziso lesicinile nakudzingekile, kodvwa babe nemusa nakungenteka. Nangabe labadzala belibandla bangamjezisi umuntfu lowonile, basuke bangamkhombisi umusa kodvwa basuke bavumela bubi kutsi buchubeke. w21.10 11-12 ¶12-15

Kuviswa ngulabanye buhlungu kungafana nesilondza. Letinye tilondza tincane; letinye tinkhulu. Nasi sibonelo, kungenteka nasivula imvilophu sisikeke kancane emnweni. Singeva buhlungu, kepha ngemuva kwelilanga nobe lamabili, kungenteka singasakhumbuli nekutsi silimele kuphi. Ngendlela lefanako, letinye tintfo letentiwa bantfu letisivisa buhlungu tincane. Sibonelo nje, umngani nobe umuntfu lotsite angasho nobe ente lokutsite lokungasivisa buhlungu, kepha sikutfola kumelula kumcolela. Kodvwa nangabe silimele kakhulu, kungahle kudzingeke kutsi dokotela atfunge lelinceba futsi alibhandishe. Nasingahlala sisicacabula lesilondza sitawube sitilimata tsine. Lokubuhlungu kutsi umuntfu angenta lokufanako nakaphetfwe kabi kakhulu. Angahlale acabanga ngekutsi umvise buhlungu kanganani lomuntfu. Kodvwa labo lababamba emagcubu batilimata bona. Ngako kukuhlakanipha kulalela seluleko lesikulombhalo welusuku lwalamuhla. w21.12 12 ¶15

Asesitsi lomdzala welibandla ukhatsatekile ngendlela ummemeteli lagcoka ngayo nobe latilungisa ngayo. Lona lomdzala angahle atibute: ‘Sikhona yini sizatfu lesisekelwe eBhayibhelini lesingangenta ngisho lokutsite?’ Ngenca yekutsi akafuni kwentiwe lokufunwa nguye, angahle acele umbono walomunye lomdzala welibandla nobe ummemeteli lovutsiwe. Bangabese babuka seluleko saPawula lesimayelana nekugcoka nekutilungisa. (1 Thim. 2:9, 10) Pawula washo timiso letiveta kutsi umKhristu kufanele agcoke ngendlela lekahle, lezitsile naleveta kutsi uvutsiwe. Kodvwa akazange abeke imitsetfo yekutsi umuntfu kufanele agcoke ini nobe angagcoki ini. Bekati kutsi emaKhristu angagcoka nobe yini layifunako, kuphela nje nakuvumelana naloko lokushiwo liBhayibheli. Ngako labadzala belibandla kufanele bacabange ngekutsi loko umuntfu lakukhetsile kuveta kutsi uzitsile yini nekutsi uvutsiwe yini. Kufanele sikhumbule kutsi emaKhristu lamabili angenta tincumo letingafani kodvwa letikahle. Kufanele singabaphoceleli bazalwane betfu kutsi bente tintfo ngendlela tsine lesicabanga kutsi ikahle. w22.02 16 ¶9-10

Sinetizatfu letivakalako tekukhombisa labanye lutsandvo lolucotfo. Ngutiphi letinye tato? Naka kutsi letaga letiphefumulelwe tiwuphendvula njani lombuto: “Shengatsi ungahlale unelutsandvo lolucotfo futsi wetsembekile. . . . Nawenta njalo utawuba ngumuntfu lotsandvwako nalohlakaniphile embikwaNkulunkulu nasembikwebantfu.” “Umuntfu lonemusa uyasitakala ngekuba nemusa kwakhe.” ‘Loyo lofuna kulunga kanye nelutsandvo lolucotfo utawutfola kuphila.’ (Taga 3:3, 4; 11:17; 21:21) Letaga tivete tizatfu letintsatfu tekutsi kungani kufanele sikhombise lutsandvo lolucotfo. Kwekucala, siba ligugu kuNkulunkulu nasikhombisa lutsandvo lolucotfo. Kwesibili, nasikhombisa lutsandvo lolucotfo siyasitakala. Sibonelo saloko kutsi siba nebungani lobuhlala njalo nalabanye. Kwesitsatfu, nasikhombisa lutsandvo lolucotfo sitawutfola tibusiso esikhatsini lesitako, letifaka ekhatsi kuphila lokuphakadze. Ngako, sinetizatfu letinhle tekulalela emavi aJehova latsi: “Niphatsane ngelutsandvo lolucotfo nangemusa.” w21.11 8 ¶1-2

Nangabe tinkinga loke wabhekana nato, nobe lobhekene nato nyalo tikukhombisa kutsi kukholwa kwakho akukacini, ungadvumateki. Loko kutsatse njengelitfuba lekucinisa kukholwa kwakho. Thantaza kuJehova ngalokusuka enhlitiyweni, ikakhulukati nawubhekene netinkinga letimatima. Khumbula kutsi Jehova angasisita asebentisa umndeni nobe bangani. Nawuvumela Jehova kutsi akusite nawubhekene netinkinga nyalo, utawetsemba kutsi utakusita ubeketelele nobe ngutiphi tinkinga longabhekana nato esikhatsini lesitako. Jesu wasita bafundzi bakhe babona lapho bekufanele bacinise khona kukholwa kwabo, kodvwa bekaciniseka kutsi ngekusitwa nguJehova bebatawukhona kubhekana netinkinga lebetiseta. (Joh. 14:1; 16:33) Bekaciniseka kutsi kukholwa lokucinile kutawusita sicumbi lesikhulu sisindze ekuhluphekeni lokukhulu. (Semb. 7:9, 14) Utawuba semkhatsini waso nangabe wenta konkhe longakwenta nyalo kuze ucinise kukholwa kwakho!​—Heb. 10:39. w21.11 25 ¶18-19

Asikakulindzeli kusindziswa ngalokusimangaliso lamuhla. Kodvwa siyati kutsi labo labetsemba Jehova batawutfola kuphila lokuphakadze ngisho nobe bangafa nyalo. Esikhatsini lesitako, sitawuvivinywa kutsi simetsemba mbamba yini Jehova kutsi utasivikela. Ngesikhatsi Gogi wakaMagogi, lokutive letihlangene, ahlasela bantfu baNkulunkulu, kuphila kwetfu kutawubonakala shengatsi kusengotini. Kutawudzingeka siciniseke kutsi Jehova utasivikela. Tive titawubona shengatsi sifana netimvu letite longativikela. (Hez. 38:10-12) Sitawube singakahlomi futsi singakaceceshelwa kulwa. Tive titawubona shengatsi kutawuba melula kusicotfula. Titawube tingati kutsi tingilosi taJehova tilungele kusisita. Kodvwa tsine sitawube sikwati loko ngenca yekutsi sinekukholwa. Tive angeke titibone letingilosi ngobe atikholwa kuNkulunkulu. Titawetfuka kakhulu natibona emabutfo asezulwini asivikela!​—Semb. 19:11, 14, 15. w22.01 6 ¶12-13

Bonkhe bazalwane betfu nabodzadze babalulekile kuJehova, ngako natsi kufanele sibatsatse njengalababalulekile. Kufanele sente nobe yini kuze sibavikele futsi sibanakekele. Nangabe sibona kutsi ukhona lesimphetse kabi, akukafaneli sente shengatsi kute lokwentekile, sicabange kutsi kufanele asitsetselele futsi akhohlwe ngako. Yini lengenta labanye bakhubeke? Ngenca yendlela labakhule ngayo, kungenteka labanye bazalwane nabodzadze batibukela phansi. Labanye basandza kucala kukhonta Nkulunkulu; basengakafundzi kutsi kufanele babatsetselele labanye nabente emaphutsa. Kunobe ngutiphi timo, kufanele sente konkhe lesingakwenta kuze sakhe kuthula. Ngetulu kwaloko, nangabe umuntfu avame kuphatseka kabi, kufanele abone kutsi kudzingeka ente konkhe lokusemandleni akhe kuze atfutfukise buntfu bakhe. Nakenta njalo, utawujabula futsi abe nebuhlobo lobuhle nebazalwane bakhe. w21.06 21 ¶7

Jesu uyayicondza indlela lotiva ngayo. Nasikhatsatekile, siyajabula nasidvudvutwa ngumngani lovelana natsi, ikakhulukati loke wabhekana nesimo lesifana nesetfu. Jesu ungulomngani. Uyati kutsi kunjani kuba butsakatsaka futsi udzinge lusito. Uyayati indlela lesakheke ngayo futsi utawucinisekisa kutsi silutfola “ngesikhatsi lesifanele” lusito lesiludzingako. (Heb. 4:15, 16) Njengobe naJesu avuma kusitwa yingilosi ensimini yaseGetsemane, natsi kufanele silwemukele lusito lesilutfola kuJehova kungaba ngetincwadzi, nge-video, ngenkhulumo, nobe sikhutsato lesisitfola kulomdzala welibandla nobe ngemzalwane nobe dzadze. (Luk. 22:39-44) Jehova utakunika “kuthula kwaNkulunkulu” futsi akucinise. Nasithantaza, sitawutfola “kuthula kwaNkulunkulu lokwendlula konkhe kucondza.”​—Fil. 4:6, 7. w22.01 18-19 ¶17-19

Siyaciniseka kutsi Jehova uhlale enta lokulungile. Nobe kunjalo, singakutfola kumatima kwetsemba labo labammelele emhlabeni. Singahle sitibute kutsi labo labaholako enhlanganweni yaJehova benta loko lokushiwo nguJehova yini nobe benta labakufunako. Liciniso likutsi angeke sitsi siyametsemba Jehova nasingabetsembi labo labammelele emhlabeni, njengobe yena abetsemba. Lamuhla, Jehova uhola incenye yenhlangano yakhe lesemhlabeni asebentisa ‘sisebenti lesetsembekile nalesihlakaniphile.’ (Mat. 24:45) Njengesigungu lesibusako sangesikhatsi semaKhristu ekucala, lesisebenti sihola bantfu baNkulunkulu emhlabeni wonkhe futsi siniketa labadzala bemabandla ticondziso. Labadzala babese bayasisebentisa lesicondziso emabandleni. Sikhombisa kutsi siyayetsemba indlela Jehova lenta ngayo tintfo ngekutsi silalele sicondziso lesisitfola enhlanganweni nakulabadzala belibandla. w22.02 4 ¶7-8

Sijabula kakhulu ngekuba BoFakazi BaJehova futsi siyatigcabha ngaloko! Siyajabula nasisita lotsite ‘lotimisele kutfola kuphila lokuphakadze’ kutsi abhajatiswe. (Imis. 13:48) Sitiva njengaJesu ‘lowajabula kakhulu futsi wagcwala umoya longcwele’ ngesikhatsi bafundzi bakhe bamtjela ngalokuhle lebekwentekile nabashumayela. (Luk. 10:1, 17, 21) Umphostoli Pawula wakhutsata Thimothi watsi: “Hlale utinaka wena, unake naloko lokufundzisako.” Wachubeka watsi: “Nawenta njalo utawutisindzisa wena kanye nalabo labakulalelako.” (1 Thim. 4:16) Ngako kushumayela kwetfu kusindzisa kuphila kwebantfu. Sihlale sitinaka tsine ngobe sitakhamiti teMbuso waNkulunkulu. Sifuna kuhlale sitiphatsa ngendlela letawudvumisa Jehova futsi letawukhombisa kutsi siyatikholelwa letindzaba letimnandzi lesitishumayelako. (Fil. 1:27) Sikhombisa kutsi ‘siyayinaka indlela lesifundzisa ngayo’ ngekutsi silungiselele kahle ngaphambi kwekutsi siyoshumayela nangekutsi sicele Jehova asisite. w21.10 24 ¶1-2

“Buntfu lobusha” yindlela umuntfu lacabanga ngayo nalenta ngayo leveta buntfu baJehova. Umuntfu ugcoka buntfu lobusha nakaveta titselo temoya waNkulunkulu, avumele lomoya longcwele kutsi ulawule indlela lacabanga ngayo, lativa ngayo nalenta ngayo. Nasi sibonelo, uyamtsandza Jehova kanye nebantfu bakhe. (Mat. 22:36-39) Umuntfu lonjalo uchubeka ajabula ngisho nobe anetinkinga. (Jak. 1:2-4) Utsandza kutsi kube nekuthula emkhatsini wakhe nalabanye. (Mat. 5:9) Uyabeketela futsi ubakhombisa umusa labanye. (Khol. 3:13) Uyakutsandza lokuhle futsi uyakwenta. (Luk. 6:35) Ukhombisa ngaloko lakwentako kutsi unekukholwa lokucinile kuBabe wakhe wasezulwini. (Jak. 2:18) Akatfukutseli nangabe labanye bamtfukutselisa futsi uyatibamba nakalingwa. (1 Khor. 9:25, 27; Thit. 3:2) Kuze sigcoke buntfu lobusha, kufanele sibe nabo bonkhe lobuntfu lokukhulunywa ngabo KubaseGalathiya 5:22, 23 nakulamanye emavesi eliBhayibheli. w22.03 8-9 ¶3-4

Labadzala belibandla bangasilingisa sibonelo semphostoli Pawula ngekutsi bangagcini ngekushumayela emtini ngemuti kodvwa basebentise onkhe ematfuba labawatfolako kuze bashumayele. (Ef. 6:14, 15) NjengaPawula, labadzala belibandla nabashumayela bangasisebentisa leso sikhatsi kuze baceceshe labanye, lokufaka ekhatsi tinceku letisebentako. (1 Phet. 5:1, 2) Kodvwa akukafaneli labadzala belibandla babe matasa kakhulu ngemisebenti yabo baze babebete sikhatsi sekushumayela. (Mat. 28:19, 20) Kuze babe naso sikhatsi sekwenta konkhe lokufanele bakwente, ngalesinye sikhatsi kungahle kudzingeke kutsi bangayemukeli leminye imisebenti. Ngemuva kwekucabanga nekuthantaza ngaloko, bangabese bayabona kutsi nabawemukela lomsebenti batawuba bete sikhatsi sekwenta leminye imisebenti lebalulekile. Lefaka ekhatsi kuba nekukhonta kwemndeni, kwenta umsebenti wekushumayela nobe kucecesha bantfwana babo kutsi bente lomsebenti. Bangaciniseka kutsi Jehova uyati kutsi bafisa kuyenta kahle naleleminye imisebenti labanayo. w22.03 27 ¶4, 7; 28 ¶8

Uyakhumbula yini ngesikhatsi wesaba kuba nguFakazi waJehova? Kungenteka bewuva shengatsi ngeke ukhone kushumayela. Mhlawumbe bewesaba kutsi umndeni nebangani bakho batakuphikisa. Nangabe bewutiva ngalendlela, ungayicondza indlela lativa ngayo lofundza naye liBhayibheli. Jesu washo kutsi labanye bantfu bebatawesaba. Nanobe kunjalo, wakhutsata balandzeli bakhe kutsi bangakuvumeli kwesaba kubente bangamkhonti Jehova. (Mat. 10:16, 17, 27) Chubeka ucecesha umfundzi kutsi acocele labanye ngaloko lakufundzako. Kungenteka bafundzi baJesu bebesaba ngesikhatsi abatfuma kutsi bayoshumayela. Kodvwa wabasita ngekutsi abatjele kutsi bashumayele kuphi nekutsi bashumayele batsini. (Mat. 10:5-7) Ungamlingisa njani Jesu? Sita umfundzi abone kutsi angashumayela kuphi. Nasi sibonelo, mbute kutsi ukhona yini lacabanga kutsi kungamsita kufundza liciniso lelitsite leliseBhayibhelini. Ngemuva kwaloko, msite alungiselele latakusho ngekutsi umkhombise indlela lemelula yekumcocela leliciniso. w21.06 6 ¶15-16

“Ngemaminishana nje, titolo kanye netakhiwo letindzala tacala kudzilika.” “Wonkhe muntfu bekatfukile . . . Bantfu labanyenti batsi kwatsatsa imizuzu lengaba mibili. Kimi kwaba shengatsi kutsetse sikhatsi lesidze.” Lawa ngemavi alabanye labasindza ngesikhatsi kutamatama umhlaba eNepal nga-2015. Nobe kunjalo, nyalo sibhekene nalolunye luhlobo lwekunyakatiswa, lolwenteka emhlabeni wonkhe. Umphrofethi Hagayi wabhala watsi: “Ngobe naku Jehova wemabutfo lakushoko: ‘Ngesikhashana nje ngitawuphindze nginyakatise emazulu, umhlaba, lwandle kanye nendzawo leyomile.’” (Hag. 2:6) Kunyakatiswa lakhuluma ngako Hagayi, akufani nekutamatama kwemhlaba lokuletsa umonakalo kuphela. Kunaloko, kunemiphumela lemihle. Jehova utsi: “Ngitawunyakatisa tonkhe tive futsi tintfo letiligugu tato tonkhe tive titawungena; mine ngitawugcwalisa lendlu ngenkhatimulo.” w21.09 14 ¶1-3

Nangabe ufuna kwakha bungani nemuntfu lotsite, kufanele uhlale ukhuluma naye futsi umtjele indlela lotiva ngayo. Loko kuyafana nebungani betfu naJehova. Nangabe sithantaza, simtjela indlela lesitiva ngayo, ngalesikucabangako nangalokusikhatsatako, sisuke sikhombisa kutsi siyametsemba nekutsi siyati kutsi uyasitsandza. (Hla. 94:17-19; 1 Joh. 5:14, 15) Tihlanganise nebangani labetsembekile; basipho lesivela kuJehova. (Jak. 1:17) Babe wetfu wasezulwini ukhombisa kutsi unendzaba natsi ngekusinika bazalwane nabodzadze ‘labasitsandza ngaso sonkhe sikhatsi.’ (Taga 17:17) Encwadzini yemphostoli Pawula leya KubaseKholose, wakhuluma ngalamanye emaKhristu lamsekela, watsi ‘ayindvudvuto lenkhulu.’ (Khol. 4:10, 11) Ngisho naKhristu Jesu, bekaludzinga lusito futsi wajabula kakhulu ngelusito lalutfola kubangani bakhe, lokutingilosi nebantfu. (Luk. 22:43) Kutjela umngani lovutsiwe ngetinkinga tetfu akusho kutsi sinekukholwa lokubutsakatsaka; kodvwa kwenta njalo kungasivikela. w21.04 24-25 ¶14-16

Yini lokufanele uyente nangabe umzalwane nobe dzadze ente intfo lengakuphatsi kahle? Yenta konkhe lokusemandleni akho kuze ulondvolote kuthula. Thantaza utjele Jehova indlela lotiva ngayo. Mcele amsite lona lokuphetse kabi futsi akusite nawe ubone buntfu bakhe lobuhle lobumenta amtsandze. (Luk. 6:28) Nangabe ungakhoni kukwendlulisa loko umzalwane wakho lakwente kona, cabanga ngendlela lekahle yekukhuluma naye. Kukahle kuhlale ucabanga kutsi umzalwane wakho angeke akuvise buhlungu ngenhloso. (Mat. 5:23, 24) Nawukhuluma naye, titjele kutsi umzalwane wakho unetisusa letinhle. Yini longayenta nangabe angafuni kwakha kuthula? ‘Chubeka umbeketelela.’ Chubeka uba nesineke. (Khol. 3:13) Lokubaluleke kakhulu kutsi ungahlali umtfukutselele, ngobe loko kungalimata buhlobo bakho naJehova. Ungavumeli lutfo kutsi ikukhube. Nawenta njalo, utawube ukhombisa kutsi Jehova umtsandza kwendlula nobe ngabe yini lenye.​—Hla. 119:165. w21.06 23 ¶15