“Bengisidlova”

KUPHILA KWAMI KWESIKHATSI LESENGCILE:

Ngakhulela endzaweni lephuyile lengasesikhumulweni semikhumbi edolobheni laseTurku. Babe abesihlabani ekushayeni sibhakela. Tsine nemnaketfu lomncane besilingisa yena sibashayi besibhakela. Esikolweni, bebavamise kungisukela bese ngiyabanemba ngesibhakela. Nangisemusha, ngajwayela licembu lelatiwako letihonga lelangenta ngaba sidlova nakakhulu. Ngaphindze ngatfola kutsi nginelikhono lekuhlabela i-heavy-metal futsi ngacala kuba neliphupho lekuba sihlabani semculo we-rock.

Ngatsenga tigubhu temculo, ngasungula ibhendi, ngekushesha ngabahola ekuhlabeleni ebhendini. Nangisesiteji bengitsandza kwentisa kweluhlanya. Ngesizatfu sekutsi ebhendini yetfu besinelunya futsi sigcoka kabi, kancane kancane sadvuma. Sacala kudlala umculo wetfu embikwebantfu labanyenti satsebula tingoma letimbalwa, tekugcina tato bebatitsandza kakhulu. Ngasekupheleni kweminyaka yangabo-1980, saya eMelika sayokhangisa ibhendi yetfu. Sahlabela tikhatsi letimbalwa eNew York naseLos Angeles sachumana nebahlabeli labadvumile sisengakabuyeli eFinland.

Nobe bengikujabulela kuba sebhendini, bengifuna kuphila lokuncono. Ngaphoceka nangibona kungaphatsani kahle kutemculo futsi bengingayitsandzi indlela lebengiphila ngayo. Benginemuva wekutsi ngingumuntfu longakalungi futsi ngesaba kutsi ngitawushiswa esihogweni. Ngetama kufuna timphendvulo temibuto lebenginayo etincwadzini tenkholo futsi bengithantaza ngicela lusito kuNkulunkulu ngisho nome benginemuva wekutsi angiyuze ngikhone kwenta intsandvo yakhe.

INDLELA LIBHAYIBHELI LELAKUGUCULA NGAYO KUPHILA KWAMI:

Bengisebenta eposini kuze ngitiphilise. Ngalelinye lilanga ngatfola kutsi lomunye lebengisebenta naye unguFakazi WaJehova. Ngambuta imibuto leminyenti. Tangitsintsa timphendvulo takhe letinengcondvo letisekelwe emiBhalweni, ngako ngavuma kutsi angichubele sifundvo seliBhayibheli. Ngemuva kwemaviki lambalwa ngicalile kufundza, ebhendini saba nenhlanhla yekutfola labatasitsebulela tingoma tetfu futsi loko bekutasibeka etfubeni lekukhipha i-album eMelika. Leli, bekulitfuba leliyingcayizivele.

Ngacocela loFakazi lebekangifundzela liBhayibheli kutsi bengifisa kukhipha yinye nome lamanyenti ema-album bese kutsi ngemuva kwaloko ngekutimisela ngisebentise timiso teliBhayibheli ekuphileni kwami. Akazange awuvete umbono wakhe, kunaloko, wamane nje wangicela kutsi ngifundze emavi aJesu lakuMatewu 6:24. Lelivesi litsi: “Kute umuntfu longakhonta emakhosi lamabili.” Ngamangala kakhulu nangibona kutsi lamavi aJesu asho kutsini. Ngemuva kwemalanga lambalwa, lobekangifundzisa liBhayibheli kwaba nguye lomangalako. Ngamtjela kutsi ngesizatfu sekutsi ngifuna kuba ngumlandzeli waJesu, ngiphume ngaphela ebhendini.

LiBhayibheli lafanana nesibuko lesingikhombisa emaphutsa ami. (Jakobe 1:22-25) Ngabona kutsi bengisidlova ngiphindze ngisidvwaladvwala futsi benginesifiso sekutsi liphupho lami lifezeke kumnyama kubovu. Bengetfuka, ngisihonga, ngiyimbemi futsi ngisidzakwa setjwala. Ngatsi nangibona indlela kuphila kwami lobekuphambene ngayo netimiso teliBhayibheli, ngeva buhlungu. Nanobe bekumatima kakhulu, bengitimisele kwenta tingucuko ekuphileni kwami.—Efesu 4:22-24.

Nangicala kushintja, benginekutisola lokungapheli ngetintfo letimbi lengatenta kodvwa Fakazi lebekangifundzela liBhayibheli wangisita kakhulu. Wangikhombisa loko lokushiwo liBhayibheli ku-Isaya 1:18, lotsi: “Nome tono tenu tibovu njengengati, titawuba mhlophe njengangcocwane.” Lelivesi nalamanye angicinisekisa kutsi Babe wetfu losezulwini unesihe futsi ufuna kuphotisa emanceba alabaphendvukile.

Ngatsi nasengimati Jehova futsi sengimtsandza, ngafuna kunikela kuphila kwami kuye. (Tihlabelelo 40:8) Ngabhajatiswa nga-1992 emhlanganweni wetive waboFakazi BaJehova lobewubanjelwe eSt. Petersburg, eRussia.

INDLELA LENGIZUZE NGAYO:

Ngitfole bangani labanyenti kubantfu labakhonta Jehova. Sihlale siba nemibutsano, sidlale tingoma letikahle sijabulele lesipho lesivela kuNkulunkulu lesingumculo. (Jakobe 1:17) Sibusiso lesiyingcayizivele lengisitfolile kushada nemfati wami lengimtsandzako, Kristina. Sisobabili nemkami, ekuphileni sibe netikhatsi letimnandzi naletibuhlungu futsi ngimtfululela sifuba.

Kube angizange ngibe nguFakazi WaJehova, mhlawumbe ngabe sengafa. Esikhatsini lesendlulile, bengihlale nginetinkinga kodvwa nyalo kuphila kwami sekunenjongo. Nyalo nginemuva wekutsi tintfo tingihambela kahle.