Bewati Yini?

Timiso lebetiseMtsetfweni waMosi betisetjentiswa yini nakucatululwa tinkinga talamanga onkhe tekungevani ka-Israyeli?

YEBO, ngaletinye tikhatsi betisetjentiswa. Cabanga nganasi sibonelo. Dutheronomi 24:14, 15 utsi: “Ungamcindzeteli umuntfu lomcashile ngenca yekutsi umphofu futsi weswele, nome ngabe ngumnakenu um-Israyeli nome ngabe wetive . . . Ngaphandle kwaloko uyawukhala ngawe kuSimakadze, bese uba nelicala lesono.”

Eceleni kwase-Ashdod, kwatfolakala incwadzi yesikhalo leyabhalwa ngelikhulu lesi-7 B.C.E. Kungenteka lencwadzi yabhalwa sisebenti sasemasimini lesahluleka kuvuna loko lebekufanele sikuvune, beyibhalwe entfweni leyakhiwe ngelubumba futsi beyitsi: “Emalangeni lambalwa lendlulile, ngemuva kwekutsi sisebenti sakho sicedze kuvuna, Hoshayahu indvodzana yaShobay yefika yatsatsa timphahla tenceku yakho. . . . Bonkhe lengisebenta nabo lebesivuna labo kushisa lilanga bangangifakazela kutsi loku kuliciniso. Kute licala lengilentile. . . . Umbusi akaphoceleleki kutsi asite inceku yakhe kutsi itfole timphahla tayo, kepha ngiyakuncenga kutsi ungentele umusa. Akukafaneli uthule nangabe sisebenti sakho site timphahla taso.”

Simon Schama losati semlandvo utsi: “Lencwadzi yesikhalo isho lokungetulu nje kwekuhlupheka kwalesisebenti ngenca yekulahlekelwa timphahla taso. Iphindze ivete kutsi lesisebenti kukhona lebesikwati mayelana nemtsetfo lebewuseBhayibhelini losencwadzini yaLevithikhusi neyaDutheronomi lebeyingakuvumeli kuphatfwa kabi kwebantfu labaphuyile.”