Umsebenti Lojabulisa Kakhulu
1. Ngumuphi umsebenti wekusita bantfu kutsi bati Jehova lowentiwa esikhatsini setfu?
1 Labo lababona ngesikhatsi kwelashwa bantfu ngelikhulu lekucala leminyaka, bajabula kakhulu. (Luk. 5:24-26) Nasesikhatsini setfu, siyajabula ngekwenta umsebenti wekusita bantfu kutsi bati Jehova. (Semb. 22:1, 2, 17) Kujabulisa kakhulu kufundza lokuhlangenwe nako lokuveta kutsi liVi laJehova kanye nemoya longcwele kuyakushintja kuphila kwebantfu! Ngetulu kwaloko, kuzuzisa kakhulu kuhlanganyela kulomsebenti ngechuba tifundvo teliBhayibheli letitfutfukako.
2. Nguyiphi injabulo lesitawuba nayo nasifundzisa lotsite liciniso?
2 Ngubani libito laNkulunkulu? Kungani avumela kuhlupheka? UMbuso waNkulunkulu utawubentelani bantfu? Asigcini nje ngekujabula nasiphendvula umfundzi imibuto lefanana nalena, kodvwa siyajabula nalapho sibona injabulo laba nayo ngekufundza liciniso. (Taga 15:23; Luk. 24:32) Njengobe umfundzi atfutfuka, angacala kusebentisa libito laJehova, ashintje indlela yakhe yekugcoka neyekutilungisa, ayekele imikhuba leyingoti, futsi acale kufakaza kulabanye bantfu. Nangabe asatfutfuke wate watinikela kuNkulunkulu futsi wabhajatiswa, utawuba ngumzalwane wetfu kanye nesisebenti lesikanye natsi. Tonkhe letinyatselo tisiletsela injabulo.—1 Thes. 2:19, 20.
3. Ngutiphi tinyatselo letisebentako lesingatitsatsa kute sicale sifundvo seliBhayibheli?
3 Ungahlanganyela Yini Kuwo? Nangabe ufuna kuhlanganyela kulomsebenti lojabulisa kakhulu, cela Jehova akunike emandla ekuchuba sifundvo seliBhayibheli, bese wenta ngekuvumelana nemithandazo yakho. (1 Joh. 5:14) Shumayela nobe ngabe ngukuphi nanganobe ngusiphi sikhatsi bantfu labatfolakala ngaso. Cela sifundvo seliBhayibheli ngaso sonkhe sikhatsi. (Shu. 11:6) Nawutfola umuntfu lonenshisekelo futsi sewuhlanyele nembewu yeliciniso, buyela kuye kute uyinisele.—1 Khor. 3:6-9.
4. Kungani kufanele sicele tifundvo teliBhayibheli sinembono wekuphutfuma?
4 Basebanyenti bantfu labalambele futsi labomele kulunga. Bobani labatawubasita ekwenetiseni sidzingo sabo sekwati Jehova ngekutsi babachubele sifundvo seliBhayibheli? (Mat. 5:3, 6) Asitinikele ngekutimisela kute siwucedze umsebenti wekushumayela kanye newekwenta bafundzi, ngembikwekutsi sikhatsi sekuvuna siphele.—Isa. 6:8.